Sikuzote Umtwike Yehova Mzigo Wako
LEO wengi huhisi wamelemewa na mizigo. Magumu ya kiuchumi, matatizo ya familia yenye kutaabisha, matatizo ya afya, maumivu na mateseko kwa sababu ya dhuluma na ukandamizo, na mapigo mengine mengi huwakumba. Mbali na mikazo hiyo ya nje, wengine wamehisi wamelemewa na hisia ya kwamba hawafai kitu na ya kushindwa na hali kwa sababu ya kutokamilika kwao wenyewe. Wengi wamejisikia waache kabisa kupambana na mambo hayo. Unaweza kukabilianaje na mizigo ionekanayo kuwa haiwezi kubebeka?
Pindi moja Mfalme Daudi wa Israeli alihisi kwamba alikuwa na mkazo ambao karibu ashindwe kuvumilia. Kulingana na Zaburi 55, alifadhaishwa sana na hangaiko kwa sababu ya mikazo na uhasama wa maadui wake. Alihisi maumivu makubwa ya moyoni na hofu nyingi. Aliweza tu kupiga kite katika huzuni yake. (Zaburi 55:2, 5, 17) Hata hivyo, japo mifadhaiko yake yote, alipata njia ya kukabiliana na hali. Kwa njia gani? Alimwendea Mungu amtegemeze. Anawashauri hivi wengine ambao huenda wakahisi kama alivyohisi: “Umtwike BWANA mzigo wako.”—Zaburi 55:22.
Alimaanisha nini kwa kusema “umtwike BWANA mzigo wako”? Je, ni kumwendea tu Yehova kwa sala na kumweleza hangaiko letu? Au sisi wenyewe twaweza kufanya jambo fulani la kusaidia kupunguza mzigo wetu? Vipi tukihisi hatustahili kamwe kumwendea Yehova? Twaweza kuelewa kile alichomaanisha Daudi kwa kuona mambo fulani aliyojionea ambayo angekumbuka vizuri sana alipoandika maneno hayo.
Tenda kwa Nguvu za Yehova
Je, wakumbuka jinsi Goliathi alivyotia hofu mioyo ya wanaume wa vita wa Israeli? Hilo jitu lenye kimo cha zaidi ya meta 2.7 liliwahofisha kabisa. (1 Samweli 17:4-11, 24) Lakini Daudi hakuogopa. Kwa nini? Kwa sababu hakujaribu kupigana na Goliathi kwa nguvu zake mwenyewe. Tangu wakati alipotiwa mafuta akiwa mfalme wa wakati ujao wa Israeli, aliruhusu roho ya Mungu imwongoze na kumwimarisha katika mambo yote aliyofanya. (1 Samweli 16:13) Basi alimwambia Goliathi: “Mimi ninakujia wewe kwa jina la BWANA wa majeshi, Mungu wa majeshi ya Israeli uliowatukana. Siku hii ya leo BWANA atakuua mkononi mwangu.” (1 Samweli 17:45, 46) Daudi alikuwa mpiga-kombeo stadi, lakini twaweza kuwa na hakika kwamba roho takatifu ya Yehova iliongoza na kufanya jiwe alilomtupia Goliathi kuwa hatari hata zaidi.—1 Samweli 17:48-51.
Daudi alikabiliana na ushindani huo mkubwa sana naye akashinda kwa kuwa na uhakika kwamba Mungu atamtegemeza na kumwimarisha. Alikuwa amesitawisha uhusiano mzuri wenye utumainifu pamoja na Mungu. Bila shaka huo uliimarishwa na njia ambayo Yehova alikuwa amemwokoa mapema. (1 Samweli 17:34-37) Kama Daudi, unaweza kudumisha uhusiano wa binafsi wenye nguvu pamoja na Yehova na kuwa na uhakika kamili katika uwezo wake na utayari wake wa kukuimarisha na kukutegemeza katika hali zote.—Zaburi 34:7, 8.
Fanya Uwezavyo Kutatua Tatizo
Hata hivyo, hili halimaanishi kwamba hakutakuwa kamwe na nyakati za maumivu mengi, hangaiko, na hata hofu, kama Zaburi 55 ionyeshavyo wazi. Kwa mfano, miaka kadhaa baada ya wonyesho huo wa uhakika usio na hofu katika Yehova, Daudi alishikwa na hofu kubwa mbele za maadui wake. Alipoteza upendeleo wake mbele ya Mfalme Sauli akalazimika kutoroka ili kuokoa uhai wake. Ebu jaribu kuwazia mvurugo wa kihisia-moyo ambao ni lazima Daudi alipata na maswali ambayo huo lazima ulitokeza akilini mwake kuhusu kutimizwa kwa kusudi la Yehova. Isitoshe, alikuwa ametiwa mafuta kuwa mfalme wa wakati ujao katika Israeli, na huku alikuwa akilazimika kusalimika akiwa mkimbizi nyikani, akiwindwa kama mnyama wa pori. Alipojaribu kukimbilia jiji la Gathi, mji wa nyumbani mwa Goliathi, alitambuliwa. Kwa matokeo gani? Rekodi yasema kwamba ‘akaogopa sana.’—1 Samweli 21:10-12.
Lakini hakuruhusu hofu yake na hangaiko lake kubwa limzuie asijaribu kutafuta msaada kwa Yehova. Kulingana na Zaburi 34 (iliyoandikwa kutokana na mambo aliyojionea), Daudi alisema: “Nalimtafuta BWANA akanijibu, akaniponya na hofu zangu zote. Maskini huyu aliita, BWANA akasikia, akamwokoa na taabu zake zote.”—Zaburi 34:4, 6.
Bila shaka Yehova alimtegemeza. Lakini Daudi hakuketi kitako tu na kungoja Yehova amwokoe. Alitambua uhitaji wa kufanya yote awezayo chini ya hali hizo ili aponyoke hali hiyo ngumu. Alikiri aliokolewa na mkono wa Yehova, lakini yeye mwenyewe alichukua hatua, akijifanya kuwa amerukwa akili mpaka mfalme wa Gathi hakumuua. (1 Samweli 21:14–22:1) Sisi pia twahitaji kufanya yote tuwezayo ili kukabiliana na mizigo, badala ya kungoja tu Yehova atuokoe.—Yakobo 1:5, 6; 2:26.
Usiongeze Mizigo Yako
Daudi alijifunza somo jingine lenye uchungu mno baadaye katika maisha yake. Lilikuwa lipi? Kwamba nyakati nyingine sisi hujiongezea mizigo yetu wenyewe. Baada ya kushinda Wafilisti, mambo yalimwendea Daudi vibaya alipoamua kuhamisha sanduku la agano Yerusalemu. Simulizi la kihistoria latuambia hivi: “Akaondoka Daudi akaenda pamoja na watu wote waliokuwa naye, mpaka Baala wa Yuda, ili kulipandisha kutoka huko sanduku la Mungu . . . Wakaliweka sanduku la Mungu juu ya gari jipya, . . . nao Uza na Ahio wana wa Abinadabu wakaliendesha lile gari jipya.”—2 Samweli 6:2, 3.
Kutumia kigari cha kukokotwa kusafirisha Sanduku kulikiuka maagizo yote ambayo Yehova alikuwa ametoa kulihusu. Ilikuwa imesemwa wazi kwamba wabebaji pekee waliopewa mamlaka wa kulibeba, wale Walawi Wakohathi, walipaswa kubeba Sanduku mabegani mwao, wakitumia fito zilizowekwa kupitia vikuku vilivyotengenezwa kipekee kwenye Sanduku. (Kutoka 25:13, 14; Hesabu 4:15, 19; 7:7-9) Kupuuza maagizo hayo kulileta msiba. Ng’ombe wenye kukokota kigari walipofanya karibu kianguke, Uza, ambaye yaelekea alikuwa Mlawi lakini bila shaka hakuwa kuhani, alisonga ili arekebishe Sanduku akapigwa na Yehova kwa kukosa kumstahi.—2 Samweli 6:6, 7.
Ilikuwa lazima Daudi akiwa mfalme alaumike kwa kadiri fulani juu ya tukio hilo. Itikio lake laonyesha kwamba hata wale ambao wana uhusiano mzuri pamoja na Yehova pindi kwa pindi waweza kuitikia vibaya hali zenye kujaribu. Kwanza Daudi alipandwa na hasira. Kisha akaanza kuogopa. (2 Samweli 6:8, 9) Uhusiano wake wenye utumainifu pamoja na Yehova ulijaribiwa kwelikweli. Hii ilikuwa ni pindi ambapo inaonekana alikosa kumtwika Yehova mzigo wake, alipokosa kufuata amri zake. Je, nyakati nyingine hali hiyo hutupata? Je, sisi hupata kumlaumu Yehova kwa ajili ya matatizo yatokeayo kwa sababu twapuuza maagizo yake?—Mithali 19:3.
Kukabiliana na Mzigo wa Hatia
Baadaye, Daudi alijiwekea mwenyewe mzigo mzito kwa kufanya dhambi mbaya sana dhidi ya viwango vyenye uadilifu vya Yehova. Katika pindi hii Daudi alikuwa ameacha daraka lake la kuongoza wanaume wake vitani. Alibaki Yerusalemu hao walipoenda kupigana. Hilo lilitokeza tatizo zito.—2 Samweli 11:1.
Mfalme Daudi aliona Bath-sheba mrembo akioga. Akalala naye, akapata mimba. (2 Samweli 11:2-5) Ili kujaribu kufunika utovu huo wa tabia, alipanga mume wake, Uria, arudi Yerusalemu kutoka uwanja wa vita. Uria alikataa kulala na mke wake Israeli lilipokuwa likipigana. (2 Samweli 11:6-11) Sasa Daudi alitumia njia zenye uovu na hila ili kufunika dhambi yake. Alipanga wanajeshi wenzi wa Uria wamwache mahali pabaya zaidi vitani ili auawe. Ni dhambi mbaya yenye uovu sana!—2 Samweli 11:12-17.
Bila shaka, hatimaye dhambi ya Daudi ilimfikia, akafunuliwa. (2 Samweli 12:7-12) Ebu jaribu kuwazia uzito wa huzuni na hatia ambayo ni lazima Daudi alihisi wakati alipofahamu uzito wa yale aliyokuwa amefanya kwa sababu ya tamaa yake. Inawezekana alikuwa amelemewa na hisia yake mwenyewe ya kushindwa, hasa kwa sababu yaelekea alikuwa mtu mwenye hisia nyingi na aliye mwepesi kuguswa hisia. Huenda alihisi yeye hafai kitu kabisa!
Hata hivyo, upesi Daudi alikiri kosa lake upesi akikubali hivi mbele ya nabii Nathani: “Nimemfanyia BWANA dhambi.” (2 Samweli 12:13) Zaburi 51 hutuambia jinsi alivyohisi na jinsi alivyomsihi Yehova Mungu amsafishe na kumsamehe. Yeye alisali hivi: “Unioshe kabisa na uovu wangu, unitakase dhambi zangu. Maana nimejua mimi makosa yangu.” (Zaburi 51:2, 3) Kwa sababu alitubu kikweli, aliweza kujenga tena uhusiano wenye nguvu na ulio karibu pamoja na Yehova. Daudi hakukazia akili hisia za sikitiko na za kujiona hafai kitu. Alimtwika Yehova mzigo wake kwa kukiri kwa unyenyekevu hatia yake, akaonyesha toba yake ya kweli, na kusali kwa bidii apate msamaha wa Yehova. Alipata tena upendeleo wa Mungu.—Zaburi 51:7-12, 15-19.
Kukabiliana na Usaliti
Hili latuleta kwenye kisa kilichofanya Daudi aandike Zaburi 55. Alikuwa na mkazo mkubwa sana wa kihisia-moyo. “Moyo wangu unaumia ndani yangu,” akaandika, “na hofu za mauti zimeniangukia.” (Zaburi 55:4) Ni nini kilichotokeza maumivu hayo? Absalomu, mwana wa Daudi, alifanya hila ya kumnyang’anya Daudi ufalme. (2 Samweli 15:1-6) Usaliti huo uliofanywa na mwana wake mwenyewe ulikuwa mgumu sana kuvumilia, lakini jambo lililofanya liwe mbaya hata zaidi ni kwamba mshauri wa Daudi aliyetumainiwa zaidi, mtu fulani aitwaye Ahithofeli, alijiunga na huo uhaini dhidi ya Daudi. Ni Ahithofeli anayefafanuliwa na Daudi kwenye Zaburi 55:12-14. Kwa sababu ya huo uhaini na usaliti, Daudi alilazimika kutoroka Yerusalemu. (2 Samweli 15:13, 14) Ni lazima hilo lilimletea huzuni kama nini!
Na bado hakuruhusu hisia-moyo zake za ndani na huzuni zidhoofishe tumaini lake na uhakika wake kwa Yehova. Alisali kwa Yehova avuruge mipango ya hao wahaini. (2 Samweli 15:30, 31) Tena twaona kwamba Daudi hakungoja tu bila kufanya lolote ili Yehova afanye kila kitu. Mara fursa ilipojitokeza, alifanya kadiri alivyoweza kukabiliana na uhaini dhidi yake. Alituma mwingine wa washauri wake, Hushai, arudi Yerusalemu ajifanye kwamba amejiunga na uhaini huo, ingawa, kwa hakika alienda kuudhoofisha. (2 Samweli 15:32-34) Kwa utegemezo wa Yehova, mpango huu ukafaulu. Hushai aliokoa wakati wa kutosha kwa Daudi kujikusanya na kujipanga ili ajikinge.—2 Samweli 17:14.
Jinsi Daudi alivyothamini kwa maisha yake yote ule utunzi pamoja na subira na utayari wa Yehova wa kusamehe! (Zaburi 34:18, 19; 51:17) Akiwa ameona mambo haya yote Daudi atutia moyo akiwa na uhakika tumwendee Yehova kwa msaada wakati wa taabu, ‘kumtwika BWANA mzigo wetu.’—Linganisha 1 Petro 5:6, 7.
Jenga na Udumishe Uhusiano Wenye Nguvu na Wenye Utumainifu Pamoja na Yehova
Tutapataje aina hiyo ya uhusiano ambao Yehova na Daudi walikuwa nayo, uhusiano uliomdumisha Daudi katika nyakati za majaribu makubwa na dhiki? Sisi hujenga uhusiano huo kwa kuwa wanafunzi wenye bidii wa Neno la Mungu, Biblia. Sisi humruhusu atufundishe kuhusu sheria, kanuni, na utu wake. (Zaburi 19:7-11) Tutafakaripo juu ya Neno la Mungu, sisi humkaribia zaidi na zaidi nasi hujifunza kumtumaini kabisa. (Zaburi 143:1-5) Sisi huongeza na kuimarisha uhusiano huo tunaposhirikiana na waabudu wenzetu ili tufundishwe zaidi na Yehova. (Zaburi 122:1-4) Sisi huimarisha uhusiano wetu pamoja na Yehova kupitia sala ya kutoka moyoni.—Zaburi 55:1.
Ni kweli kwamba kama sisi, Daudi alikuwa na vipindi vya kushuka moyo wakati uhusiano wake pamoja na Yehova haukuwa wenye nguvu kama ulivyopasa kuwa. Udhalimu waweza kutufanya ‘tutende kana kwamba tuna kichaa.’ (Mhubiri 7:7, NW) Lakini Yehova huona yale yatendekayo, naye ajua yaliyo moyoni mwetu. (Mhubiri 4:1; 5:8) Twahitaji kufanya bidii ili kudumisha uhusiano wenye nguvu pamoja na Yehova. Ndipo, tukilazimika kubeba mizigo yoyote ile, twaweza kumtegemea Yehova atuondolee mkazo au atupe nguvu ya kukabiliana na hali yetu. (Wafilipi 4:6, 7, 13) Jambo muhimu ni kukaa karibu na Yehova. Daudi alipofanya hivyo, alihisi akiwa salama salimini.
Basi, hata uwe na hali zipi, asema Daudi, sikuzote umtwike Yehova mzigo wako. Ndipo tutaona ukweli wa ahadi hii: “Naye atakutegemeza, hatamwacha mwenye haki aondoshwe milele.”—Zaburi 55:22.