‘Ee Nafsi Yangu, Umhimidi Yehova’

“KATIKA miezi ya karibuni huduma yangu haijawa yenye kupendeza wala yenye shangwe,” asema Nancy.a Kwa miaka kumi hivi, ametumikia akiwa painia, mpiga-mbiu wa wakati wote wa habari njema. Hata hivyo, aongezea kusema hivi: “Sipendi jambo linalonipata. Yaonekana kana kwamba natoa ujumbe wa Ufalme bila shauku na bila kutoka moyoni. Nifanye nini?”

Fikiria pia mfano wa Keith, mzee katika kutaniko la Mashahidi wa Yehova. Alishtuka kama nini mke wake alipomwambia hivi: “Kuna jambo linalokusumbua. Katika sala uliyoitoa, umeshukuru kwa ajili ya chakula, hata ingawa huu si wakati wa mlo!” Keith akiri hivi: “Naona kwamba nimekuwa nikisali bila kufikiria.”

Bila shaka, wewe hutaki semi zako za kumsifu Yehova Mungu ziwe bila hisia na zisizofikiriwa. Kinyume na hilo, unataka ziwe zenye kuhisiwa moyoni, zinazotokana na hisia za shukrani. Hata hivyo, huwezi kuvaa na kuvua hisia kama vazi. Ni lazima zitoke ndani ya mtu. Mtu awezaje kuhisi shukrani moyoni? Zaburi ya 103 hutufahamisha kwa kina habari hii.

Mfalme Daudi wa Israeli la kale alitunga Zaburi ya 103. Yeye aanza kwa maneno: “Ee nafsi yangu, umhimidi BWANA [“Yehova,” NW], naam, vyote vilivyo ndani yangu vilihimidi jina lake takatifu.” (Zaburi 103:1) “Neno himidi, litumiwapo kumhusu Mungu,” chasema kitabu kimoja cha marejezo, “linamaanisha kusifu, likidokeza kuwa na shauku nyingi sikuzote kwake na vilevile kuwa na shukrani.” Akitaka kumsifu Yehova kwa moyo uliojaa upendo na uthamini, Daudi aihimiza nafsi yake mwenyewe—yeye mwenyewe—‘imhimidi Yehova.’ Lakini ni nini kinachochochea hisia hii changamfu kwenye moyo wa Daudi kumwelekea Mungu anayemwabudu?

Daudi aendelea kusema: “Usizisahau fadhili [“matendo,” NW] zake [Yehova] zote.” (Zaburi 103:2) Kuwa mwenye shukrani kumwelekea Yehova kunahusiana na kutafakari kwa uthamini “matendo yake.” Ni matendo gani hususa ya Yehova anayofikiria Daudi? Kutazama uumbaji wa Yehova Mungu, kama vile anga lililojaa nyota kwenye usiku mwangavu, kwaweza kujaza moyoni shukrani kwa Muumba. Mbingu zenye nyota zilimgusa sana Daudi. (Zaburi 8:3, 4; 19:1) Ingawa hivyo, katika Zaburi ya 103, Daudi akumbuka utendaji wa Yehova wa aina nyingine.

Yehova ‘Husamehe Maovu Yako Yote’

Katika zaburi hii, Daudi anasimulia matendo ya Mungu ya fadhili-upendo. Akirejezea la kwanza na lenye kutokeza kati ya matendo hayo, yeye aimba hivi: ‘Yehova husamehe maovu yako yote.’ (Zaburi 103:3) Kwa hakika Daudi alitambua hali yake mwenyewe ya dhambi. Baada ya nabii Nathani kumfikia kuhusiana na uzinzi alioufanya na Bath-sheba, Daudi alikiri hivi: “Nimekutenda dhambi Wewe [Yehova] peke yako, na kufanya maovu mbele za macho yako.” (Zaburi 51:4) Akiwa amevunjika moyo, alisihi hivi: “Ee Mungu, unirehemu, sawasawa na fadhili zako. Kiasi cha wingi wa rehema zako, uyafute makosa yangu. Unioshe kabisa na uovu wangu, unitakase dhambi zangu.” (Zaburi 51:1, 2) Lazima Daudi alishukuru kama nini kwa ajili ya kusamehewa! Akiwa mwanadamu asiye mkamilifu, alitenda dhambi nyinginezo maishani mwake, lakini hakukosa kamwe kutubu, kukubali karipio, na kusahihisha makosa yake. Kutafakari juu ya matendo ya fadhili na yenye kustaajabisha ya Mungu kulimchochea Daudi ambariki Yehova.

Sisi pia ni wenye dhambi, sivyo? (Waroma 5:12) Hata mtume Paulo aliomboleza hivi: “Kwa kweli napendezwa na sheria ya Mungu kulingana na mtu niliye kwa ndani, lakini mimi naona katika viungo vyangu sheria nyingine ikifanya vita dhidi ya sheria ya akili yangu na kunichukua mateka kwa sheria ya dhambi iliyo katika viungo vyangu. Mwenye taabu mimi! Ni nani ataniokoa kutoka katika mwili unaopatwa na kifo hiki?” (Waroma 7:22-24) Tunashukuru kama nini kwamba Yehova haweki hesabu ya ukiukaji-sheria wetu! Kwa furaha yeye huufuta tunapotubu na kuomba msamaha.

Daudi ajikumbusha hivi: ‘Yehova akuponya magonjwa yako yote.’ (Zaburi 103:3) Kwa kuwa kuponya ni tendo la kurudisha afya, linatia ndani mengi zaidi ya kusamehe kosa. Kunahusisha kuondolewa kwa “magonjwa”—matokeo mabaya ya makosa yetu. Kwa kweli Yehova ataondoa kabisa matokeo yaonekanayo ya dhambi, kama vile ugonjwa na kifo katika ulimwengu wake mpya. (Isaya 25:8; Ufunuo 21:1-4) Hata hivyo, Mungu anaponya ugonjwa wetu wa kiroho leo. Kwa wengine, huu unatia ndani dhamiri mbaya na uhusiano uliovunjika kati yao na Yehova. “Usisahau” yale ambayo tayari Yehova amemfanyia kila mmoja wetu binafsi kuhusu maponyo ya kiroho.

Yeye ‘Anakomboa Uhai Wako’

‘Yehova anakomboa uhai wako na kaburi,’ aimba Daudi. (Zaburi 103:4) Hili ni “kaburi” la kawaida la wanadamu—Sheoli, au Hadesi. Hata kabla ya kuwa mfalme wa Israeli, Daudi alipatwa na hatari ya kifo. Kwa mfano, Mfalme Sauli wa Israeli alisitawisha chuki ya kumwua Daudi naye alijaribu kumwua kwenye pindi mbalimbali. (1 Samweli 18:9-29; 19:10; 23:6-29) Wafilisti walitaka pia kumwua Daudi. (1 Samweli 21:10-15) Lakini kila mara, Yehova alimwokoa kutoka kwa “kaburi.” Lazima Daudi awe alihisi shukrani kama nini alipokumbuka matendo haya ya Yehova!

Namna gani wewe? Je, Yehova amekutegemeza nyakati unaposhuka moyo au unapokuwa umefiwa? Au je, unajua baadhi ya visa ambavyo katika hivyo Yehova amekomboa Mashahidi wake waaminifu na kaburi au Sheoli katika nyakati zetu? Labda umeguswa moyo kwa kusoma habari za matendo yake ya ukombozi katika gazeti hili. Mbona usitumie muda kutafakari kwa uthamini matendo haya ya Mungu wa kweli? Na bila shaka, sisi sote tuna sababu ya kuwa wenye shukrani kwa Yehova kwa ajili ya tumaini la ufufuo.—Yohana 5:28, 29; Matendo 24:15.

Yehova hutupa uhai na vitu vinavyoleta shangwe na kufanya maisha yapendeze. Mtunga-zaburi atangaza kwamba Mungu ‘hukutia taji ya fadhili [“fadhili-upendo,” NW] na rehema.’ (Zaburi 103:4) Tunapokuwa na uhitaji, Yehova hatuachi lakini yeye hutusaidia kupitia tengenezo lake linaloonekana na wazee waliowekwa rasmi, au wachungaji, katika kutaniko. Msaada wa namna hii hutuwezesha kushughulika na hali yenye kujaribu bila kupoteza staha na adhama yetu. Wachungaji wa Kikristo hutunza sana kondoo. Wao hutia moyo walio wagonjwa na wenye kushuka moyo na kufanya kila wawezalo kuwasaidia waliofanya dhambi warudie hali nzuri. (Isaya 32:1, 2; 1 Petro 5:2, 3; Yuda 22, 23) Roho ya Yehova huwachochea wachungaji hawa wawe wenye rehema na wenye upendo kwa kondoo. Kwa kweli “fadhili-upendo na rehema” zake ni kama taji inayoturembesha na kutupa adhama! Bila kusahau kamwe matendo yake, acheni tumbariki Yehova na jina lake takatifu.

Anapoendelea kujipa onyo la upole, mtunga-zaburi Daudi aimba hivi: ‘Yehova aushibisha mema uzee wako, ujana wako aurejeza kama tai.’ (Zaburi 103:5) Yehova hutupa uhai wenye kuridhisha na wenye kuleta shangwe. Kwani, ujuzi wenyewe juu ya kweli ni hazina isiyo na kifani na chanzo cha shangwe tele! Fikiria jinsi ambavyo kazi tuliyopewa na Yehova inaturidhisha sana, kazi ya kuhubiri na kufanya wanafunzi. Ni jambo la kufurahisha kama nini kukutana na mtu anayependa kujifunza juu ya Mungu wa kweli na kisha kuweza kumsaidia mtu huyo amjue Yehova na kumbariki! Lakini, iwapo mtu yeyote katika eneo letu anatusikiliza au la, ni pendeleo kubwa kushiriki katika kazi inayohusiana na kutakaswa kwa jina la Yehova na kutetewa kwa enzi yake kuu.

Tunapoendelea katika kazi ya kupiga mbiu ya Ufalme wa Mungu, ni nani asiyechoka? Lakini Yehova huwapa nguvu mpya watumishi wake, akiwafanya kuwa ‘kama tai’ walio na mabawa yenye nguvu na wanaopanda juu sana angani. Jinsi tulivyo na shukrani kwamba Baba yetu wa kimbingu mwenye upendo huandaa “nguvu” kama hiyo ili tuweze kutimiza huduma yetu kwa uaminifu siku baada ya siku!—Isaya 40:29-31.

Kwa mfano: Clara hufanya kazi ya kuajiriwa ya wakati wote na kutumikia kwa saa 50 kila mwezi kwenye huduma ya shambani pia. Yeye asema: “Nyakati fulani mimi huchoka, na kujilazimisha kwenda kwenye utumishi wa shambani kwa sababu tu ya kwamba huwa nimepanga kuhubiri na mtu fulani. Lakini mara niwapo kwenye utumishi, sikuzote mimi huhisi nimetiwa nguvu.” Huenda hata wewe ukawa umehisi nguvu zitokanazo na utegemezo wa kimungu kwenye huduma ya Kikristo. Basi na uchochewe kusema, kama alivyosema Daudi katika maneno yake ya ufunguzi ya zaburi: “Ee, nafsi yangu, umhimidi BWANA [“Yehova,” NW], naam, vyote vilivyo ndani yangu vilihimidi jina lake takatifu.”

Yehova Awakomboa Watu Wake

Mtunga-zaburi aimba hivi pia: “BWANA ndiye afanyaye mambo ya haki, na hukumu kwa wote wanaoonewa. Alimjulisha Musa njia zake, wana wa Israeli matendo yake.” (Zaburi 103:6, 7) Yawezekana kwamba Daudi alikuwa akifikiria juu ya ‘kuonewa’ kwa wana wa Israeli walipokuwa chini ya waonezi Wamisri katika siku za Musa. Kutafakari jinsi Yehova alivyomjulisha Musa njia zake za ukombozi lazima kuwe kulichochea hisia ya shukrani ndani ya moyo wa Daudi.

Tunaweza pia kuchochewa kuwa na hisia kama hizo tukitafakari jinsi ambavyo Mungu alishughulika na Waisraeli. Tusiache kamwe kufikiria kwa uzito mambo yaliyoonwa ya watumishi wa Yehova wa wakati huu, kama yale yanayotajwa katika sura ya 29 na 30 ya kitabu Mashahidi wa Yehova—Wapiga-Mbiu wa Ufalme wa Mungu. Mambo yanayosimuliwa ndani yake na katika vichapo vingine vya Watch Tower Society hutuwezesha tuone jinsi ambavyo Yehova amewasaidia watu wake katika nyakati za kisasa wavumilie vifungo, ghasia ya umati, kupigwa marufuku, kambi za mateso, na kambi za kazi ngumu. Kumekuwa na majaribu katika nchi zinazokumbwa na vita, kama vile Burundi, Liberia, Rwanda, na ile iliyokuwa Yugoslavia. Wakati wowote mnyanyaso uzukapo, mkono wa Yehova umewategemeza sikuzote watumishi wake waaminifu. Kufikiria kwa makini matendo haya ya Mungu wetu mkuu, Yehova, kunaweza kutufanya tuhisi jinsi alivyohisi Daudi alipofikiria kwa uzito yale masimulizi ya kukombolewa kutoka Misri.

Fikiria pia jinsi Yehova anavyotukomboa kwa wororo kutoka kwa mzigo wenye kulemea wa dhambi. Ameandaa “damu ya Kristo” ili ‘isafishe dhamiri zetu kutoka kazi zilizokufa.’ (Waebrania 9:14) Tunapotubu dhambi zetu na kuomba msamaha kwa msingi wa damu ya Kristo iliyomwagwa, Mungu huweka dhambi zetu mbali nasi—“kama mashariki ilivyo mbali na magharibi”—na kutuonyesha upendeleo wake tena. Fikiria pia maandalizi ya Yehova ya mikutano ya Kikristo, ushirika wenye kujenga, wachungaji kutanikoni, na vichapo vinavyotegemea Biblia tunavyopokea kutoka kwa “mtumwa mwaminifu na mwenye busara.” (Mathayo 24:45) Je, matendo hayo yote ya Yehova hayatusaidii kuimarisha uhusiano wetu naye? Daudi alitangaza hivi: “BWANA amejaa huruma na neema, haoni hasira upesi, ni mwingi wa fadhili. . . . Hakututenda sawasawa na hatia zetu, wala hakutulipa kwa kadiri ya maovu yetu.” (Zaburi 103:8-14) Kutafakari juu ya utunzaji wenye upendo wa Yehova kunaweza kwa hakika kutuchochea tumtukuze na kulitukuza jina lake takatifu.

‘Mhimidini Yehova, Enyi Kazi Zake Zote’

Kwa kulinganisha na hali ya kutoweza kufa ya Yehova, yule “Mungu wa milele,” siku za “binadamu awezaye kufa” ni chache sana—‘ni kama majani.’ Lakini akiwa na uthamini Daudi asema: “Fadhili za BWANA zina wamchao tangu milele hata milele, na haki yake ina wana wa wana; maana, wale walishikao agano lake, na kuyakumbuka maagizo yake ili wayafanye.” (Mwanzo 21:33; Zaburi 103:15-18, linganisha NW.) Yehova hasahau wale wanaomhofu. Katika wakati ufaao atawapa uhai udumuo milele.—Yohana 3:16; 17:3.

Katika kuonyesha uthamini wake kwa umaliki wa Yehova, Daudi asema hivi: “BWANA ameweka kiti chake cha enzi mbinguni, na ufalme wake unavitawala vitu vyote.” (Zaburi 103:19) Ijapokuwa umaliki wa Yehova ulionyeshwa kwa wakati fulani kupitia ufalme wa Israeli, kwa kweli kiti chake cha ufalme kiko mbinguni. Kwa sababu ya Uumbaji wake, Yehova ndiye mtawala Mwenye Enzi Kuu ya ulimwengu wote mzima ambaye hutekeleza mapenzi yake mbinguni na duniani kwa kupatana na makusudi yake mwenyewe.

Daudi pia ahimiza viumbe vya kimalaika vya kimbingu. Yeye aimba hivi: ‘Mhimidini BWANA enyi malaika zake, ninyi mlio hodari, mtendao neno lake, mkiisikiliza sauti ya neno lake. Mhimidini BWANA, enyi majeshi yake yote, ninyi watumishi wake mfanyao mapenzi yake. Mhimidini BWANA, enyi kazi zake zote, mahali pote pa milki yake. Ee nafsi yangu, umhimidi BWANA.’ (Zaburi 103:20-22) Je, kutafakari kwetu juu ya matendo ya Yehova ya fadhili-upendo kwetu hakupaswi kutuchochea tumbariki pia? Bila shaka! Na tunaweza kuwa na uhakika kwamba sauti yetu ya kutoa sifa ya binafsi kwa Mungu haitafifishwa na korasi kuu ya wasifaji inayotia ndani ile ya malaika waadilifu. Na tumsifu kwa moyo wote Baba yetu wa kimbingu, huku tukisema vema juu yake sikuzote. Kwa kweli, acheni tutie moyoni maneno ya Daudi, ‘Ee nafsi yangu, umhimidi Yehova.’

[Maelezo ya Chini]

[Picha katika ukurasa wa 23]

Daudi alitafakari juu ya matendo ya Yehova ya fadhili-upendo. Je, wewe hufanya hivyo?