Kusimama Kwenye Kilele cha Utendaji Mkubwa Zaidi

“HAKUKUWA na roho ya mashindano. Kila mtu alitaka yule mwingine afanikiwe,” wakasema Richard na Lusia, wakifafanua wanafunzi wenzao wa darasa la 105 la Shule ya Biblia ya Gileadi ya Watchtower. “Sisi sote ni tofauti sana, lakini kwetu sisi, kila mwanafunzi ni mwenye thamani.” Mwanadarasa mwenzake, Lowell, akubali akiongeza kusema hivi: “Tofauti zetu zimetuvuta pamoja.”

Darasa hilo, lililohitimu Septemba 12, 1998, kwa kweli lilikuwa na wanafunzi waliokuwa tofauti. Baadhi ya wanafunzi walikuwa wamepainia katika maeneo yaliyo na uhitaji mkubwa wa wahubiri wa Ufalme; wengine walikuwa wametumikia kwa uaminifu karibu na nyumbani kwao. Wachache kama vile Mats na Rose-Marie, iliwabidi wajitahidi kwa muda mrefu na kwa bidii kuboresha Kiingereza chao kabla ya kuja shuleni. Wanafunzi walio wengi walikuwa wamefikiria kuhusu utumishi wa mishonari tangu utotoni. Wenzi wa ndoa fulani walijaza ombi mara 12; walifurahi kama nini walipopokea mwaliko wa darasa la 105!

Majuma 20 ya mafundisho mengi yalipita haraka sana. Kabla ya wanafunzi kutambua jinsi wakati ulivyokuwa umepita mbio sana, walikuwa wamefanya mtihani wao wa mwisho na kutoa ripoti yao ya mwisho ya kusimulia, na siku ya kuhitimu ilikuwa imefika.

Mwenyekiti wa programu hiyo, Albert Schroeder, mshiriki wa Baraza Linaloongoza la Mashahidi wa Yehova, alikumbusha darasa kwamba walikuwa “wakisimama kwenye kilele cha utendaji mkubwa zaidi katika shamba la elimu ya Biblia,” wakifuata wale wengine 7,000 ambao walikuwa wamewatangulia kwenda Gileadi. Alitaja kwamba wakati wa kiangazi, wanafunzi walifurahia fursa ya pekee ya kushirikiana na wamishonari wa muda mrefu walipotembelea makao makuu pamoja na kuhudhuria mikusanyiko ya kimataifa.

Kisha Ndugu Schroeder akamwalika Max Larson wa Halmashauri ya Utendaji ya Betheli. Alizungumza juu ya kichwa “Elimu Iongozayo Kwenye Uhai Udumuo Milele.” Ndugu Larson alinukuu Mithali 1:5, ambayo husema: “Mwenye hekima asikie na kuongezewa elimu, na mwenye ufahamu ayafikie mashauri yenye njia.” Ustadi wahitajiwa ili kuwa mmishonari mwenye matokeo. Watu wenye ustadi husimama mbele za wafalme. (Mithali 22:29) Baada ya kuzoezwa kwa miezi mitano, wanafunzi walikuwa wametayarishwa vizuri kuwakilisha Wafalme wakuu zaidi, Yehova Mungu na Kristo Yesu.

David Olson wa Idara ya Utumishi alifuata kuzungumza juu ya kichwa “Saidia Kufanya Moyo wa Yehova Uwe na Shangwe.” Yeye aliuliza: “Wanadamu wasio wakamilifu wanaweza kufanya nini ili kufanya moyo wa Mungu uwe na shangwe?” Jibu lilikuwa nini? Wanaweza kumtumikia kwa uaminifu, kwa uaminifu-mshikamanifu, na kwa shangwe. Yehova anataka watu wake wafurahie kumtumikia. Tufanyapo mapenzi ya Mungu kwa shangwe, sisi hufurahisha moyo wake. (Mithali 27:11) Ndugu Olson alisoma barua kutoka kwa wamishonari wenzi ambao walihitimu Gileadi katika darasa la 104. Je, wanafurahia mgawo wao mpya? “Tuna wahubiri wapatao 140,” ndivyo walivyoandika kuhusu kutaniko lao, “tukiwa na wastani wa watu 250 hadi 300 wanaohudhuria mikutano. Utumishi wa shambani ndio sehemu bora kabisa. Kila mmoja wetu ana mafunzo manne, na tayari wengine wanahudhuria mikutano.”

Lyman Swingle, wa Baraza Linaloongoza, alizungumza juu ya habari “Wakati wa Kutua na Kuhesabu Baraka Zako.” Mazoezi ya Gileadi yalikuwa yameleta baraka nyingi. Yalikuwa yamewasaidia wanafunzi waongeze ujuzi wao, wakuze uthamini wa tengenezo la Yehova, na kusitawisha sifa muhimu, kama vile unyenyekevu. “Ni jambo la unyenyekevu kuja hapa na kutumia wakati kusikiliza mafundisho,” akasema Ndugu Swingle, akiongezea hivi: “Mwaondoka hapa mkiwa mmetayarishwa vizuri zaidi kumtukuza Yehova.”

“Shangwe Yako Ni Nyingi—Kwa Hiyo kwa Nini Uhangaike?” ndicho kilichokuwa kichwa cha hotuba ya Daniel Sydlik, pia mshiriki wa Baraza Linaloongoza. Matatizo yatokeapo, tafuta mwongozo wa Maandiko, akasihi. Akitumia mistari iliyoteuliwa kutoka sura ya 6 ya Mathayo, Ndugu Sydlik alitoa kielezi cha jinsi jambo hilo liwezavyo kufanywa. Ukosefu wa imani waweza kutufanya tuhangaikie mambo ya kimwili, kama vile chakula na mavazi. Hata hivyo, Yehova anajua tunayohitaji. (Mathayo 6:25, 30) Kuhangaika kutaongezea tu taabu ambazo hutupata kila siku. (Mathayo 6:34) Kwa upande mwingine, ni lazima kuwe na mpango. (Linganisha Luka 14:28.) “Kile ambacho Yesu anakataza si kufikiria kwa uzito wakati ujao, bali kuuhangaikia bila hekima,” akaeleza Ndugu Sydlik. “Kuchukua hatua ni mojawapo ya tiba iliyo bora zaidi ya hangaiko. Tunapohangaika, inafaa tuanze kuzungumza juu ya kweli.”

Shauri la Kuaga Kutoka kwa Wafunzi

Hotuba za washiriki watatu wa kitivo cha Gileadi zilifuata. Karl Adams alizungumza kwanza, juu ya somo “Utamrudishia Yehova Nini?” Hotuba yake ilitegemea Zaburi ya 116, ambayo huenda Yesu aliimba usiku wa kabla ya kifo chake. (Mathayo 26:30, kielezi-chini, NW) Yesu alikuwa akifikiria nini alipoimba maneno haya: “Nimrudishie BWANA [“Yehova,” NW] nini kwa ukarimu wake wote alionitendea”? (Zaburi 116:12) Huenda ikawa alikuwa akitafakari juu ya mwili mkamilifu ambao Yehova alikuwa amemtayarishia. (Waebrania 10:5) Siku iliyofuata, angeutoa mwili huo uwe dhabihu, akithibitisha kina cha upendo wake. Wanafunzi wa darasa la 105 walikuwa wameonja wema wa Yehova kwa miezi mitano iliyopita. Sasa wangeonyesha upendo wao kwa Mungu kwa kufanya bidii katika migawo yao ya umishonari.

Mark Noumair, mfunzi wa pili wa Gileadi kuzungumza, aliwashauri wanafunzi, “Endeleeni Kufanya Lililo Sawa.” Baada ya Yosefu kuuzwa Misri akiwa mtumwa, alivumilia kutendwa isivyo haki kwa miaka 13. Je, aliruhusu makosa ya wengine yamfanye aache kufanya lililo sawa? La, aliendelea kufanya lililo sawa. Kisha, kwa wakati wa Mungu ufaao, Yosefu alikombolewa kutoka katika majaribu yake. Kwa ghafula, hali yake ilibadilika akaacha kuishi jela na kuanza kuishi nyumbani kwa mfalme. (Mwanzo, sura ya 37-50) Mfunzi huyo aliuliza wanafunzi wake hivi: “Matazamio yako yasipotimia katika mgawo wako wa umishonari, je, utaacha? Utakata tamaa? Au utavumilia, kama alivyovumilia Yosefu?”

Mwishowe, msajili wa Shule ya Gileadi, Wallace Liverance, alisimamia mazungumzo yenye kuchangamsha pamoja na washiriki wa darasa, yenye kichwa “Mtangazeni Mfalme na Ufalme.” Baadhi ya wanafunzi walisimulia mambo waliyoona walipokuwa wakihubiri nyumba hadi nyumba, na duka hadi duka, na barabarani. Wengine walisimulia jinsi walivyowahubiria watu ambao walisema lugha nyingine. Na hata wengine walionyesha jinsi ya kuhubiria watu wa dini mbalimbali. Wahitimu wote walikuwa na hamu ya kushiriki katika huduma ya shamba la umishonari.

Wamishonari Wenye Furaha wa Muda Mrefu

Sehemu iliyofuata, yenye kichwa “Matokeo Yenye Shangwe Yatokanayo na Utumishi wa Mishonari,” ilitolewa na Robert Wallen nayo ilikuwa ya kuhoji ndugu wanne watumishi wa makao makuu ambao hivi majuzi walikuwa wamepata kuwa na ushirika wenye kujenga pamoja na wamishonari wazoefu. Wamishonari hao walikubali kwa uharaka kwamba haikuwa rahisi kwao kujifunza lugha mpya, kujipatanisha na tamaduni nyingine, au kuzoea halihewa tofauti. Kisha walikuwa wakabiliane na maumivu ya kutamani nyumbani. Nyakati nyingine, matatizo ya afya yalitokea. Lakini katika yote hayo, wamishonari walidumisha mtazamo ufaao, na kuvumilia kwao kulibarikiwa. Baadhi yao walikuwa wameleta watu wengi kwenye ujuzi unaomhusu Yehova. Wengine walikuwa wamechangia katika njia mbalimbali ongezeko la ujumla la kazi ya Ufalme katika nchi zao.

Aliyekuwa wa mwisho kuongea alikuwa Carey Barber, mshiriki wa Baraza Linaloongoza. Yeye alipitia mambo makuu ya programu ya mkusanyiko “Njia ya Mungu ya Maisha.” “Programu ya mkusanyiko ilikuwa na matokeo gani kwako kuhusu uhusiano wako na Yehova?” aliuliza wasikilizaji. Msemaji huyo alitofautisha matokeo yenye baraka ya kufuata njia ya Mungu na matokeo yenye msiba kwa wale wanaofuata njia ya ulimwengu. Akirejezea makosa ya Musa huko Meriba, alionya hivi: “Hata baada ya mtu kutumikia kwa uaminifu kwa miaka mingi, Yehova hapuuzi hata uvunjaji mdogo wa sheria Zake za haki.” (Hesabu 20:2-13) Watumishi wa Mungu kila mahali na waendelee kushikilia kabisa mapendeleo yao yenye thamani ya utumishi!

Wakati ulikuwa umefika kwa wanafunzi kupokea diploma zao. Kisha, mwakilishi wa darasa akasoma barua ya uthamini kwa ajili ya mafundisho ambayo wanafunzi walikuwa wamepokea. Baada ya wimbo na sala ya kumalizia ya kutoka moyoni, programu ya kuhitimu ilimalizika. Lakini, kwa darasa la 105, huu ulikuwa mwanzo tu, kwa kuwa wamishonari wapya walikuwa “wakisimama kwenye kilele cha utendaji mkubwa zaidi.”

[Sanduku katika ukurasa wa 23]

Takwimu za Darasa

Idadi ya nchi zilizowakilishwa: 9

Idadi ya nchi walikogawiwa: 17

Idadi ya wanafunzi: 48

Idadi ya wenzi wa ndoa: 24

Wastani wa umri: 33

Wastani wa miaka katika kweli: 16

Wastani wa miaka katika huduma ya  wakati wote: 12

[Sanduku katika ukurasa wa 24]

Walichagua Utumishi wa Wakati Wote

“Nilipokuwa mchanga, sikuwa nimepanga kupainia,” asema Ben, mhitimu wa darasa la 105. “Nilikuwa nikifikiri kwamba ni wale wenye uwezo wa pekee na wenye hali zinazofaa tu wawezao kupainia,” akaongezea kusema. “Lakini nilijifunza kupenda utumishi wa shambani. Kisha siku moja niliwaza kwamba kuwa painia humaanisha tu kushiriki zaidi katika huduma. Ndipo nilipotambua kwamba ningeweza kuwa painia.”

“Watumishi wa wakati wote kwa kawaida waliheshimiwa sana nyumbani kwetu,” ndivyo anavyosimulia Lusia. Yeye akumbuka msisimko mwingi uliokuwa kutanikoni pake kila wakati wamishonari walipokuja kutembea. “Nilipokuwa nikikua,” yeye asema, “ilieleweka kwamba utumishi wa wakati wote ungekuwa mojawapo ya mipango yangu.”

Mama ya Theodis alikufa yeye alipokuwa na umri wa miaka 15. “Wakati huo, kutaniko lilinisaidia sana,” yeye asema, “kwa hiyo, nilijiuliza, ‘Naweza kufanya nini ili kuonyesha uthamini wangu?’” Hiyo ilimfanya aingie utumishi wa wakati wote na sasa kazi ya umishonari.

[Picha katika ukurasa wa 25]

Darasa Lenye Kuhitimu la 105 la Shule ya Biblia ya Gileadi ya Watchtower

Katika orodha iliyo chini, safu zimepewa nambari kutoka mbele kuelekea nyuma, na majina yameorodheshwa kuanzia kushoto kuelekea kulia katika kila safu

(1) Sampson M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.