‘Waliinunua Kweli’!

“INUNUE kweli, wala usiiuze.” (Mithali 23:23) Ndivyo Solomoni mtu mwenye hekima alivyohimiza kwa bidii. Ingawa jambo hilo laweza kusemwa juu ya kweli kwa ujumla, hasa liko hivyo kwa habari ya kweli ipatikanayo katika Neno la Mungu, Biblia. Kweli hiyo yaweza kuongoza kwenye uhai wa milele! (Yohana 17:3, 17) Ingawa hivyo, ona kwamba huwezi kupata kweli hiyo bila gharama. Lazima mtu atake ‘kununua’ kweli hiyo, yaani, adhabihu au aachilie kitu fulani ili aipate. (Linganisha Mathayo 13:45, 46.) Kwa ujumla, watu hawataki kufanya hivyo. Lakini katika nchi nyingi, idadi inayoongezeka ya watu jasiri wanainunua kweli ya Biblia—mara nyingi kwa gharama kubwa za kibinafsi.

Kwa kielelezo, chukua Mashahidi wa Yehova katika nchi ya Afrika Magharibi ya Ghana. Kufikia Juni 1989, kulikuwa na watu zaidi ya 34,000 nchini humo ambao walikuwa wamekubali kweli ya Biblia na walikuwa wakiishiriki kwa bidii pamoja na wengine. Kisha kazi ya kuhubiri hadharani iliwekewa vizuizi. Hata hivyo, wenye moyo wa haki waliendelea ‘kuinunua kweli’—kujapokuwako vizuizi vya kisheria. Hivyo vizuizi viliisha Oktoba 31, 1991, na kufikia katikati ya mwaka wa 1995, miaka mitatu na nusu tu baada ya kuondolewa kwa vizuizi hivyo, idadi ya Mashahidi wa Yehova wenye kutenda katika Ghana ilikuwa imeongezeka kufikia watu 46,104! Na mwaka huu hiyo idadi imekua kufikia zaidi ya 52,800.

Ni nini kimewavuta watu kwenye kweli ya Neno la Mungu? Imewabidi baadhi yao wafanye dhabihu zipi ili ‘kuinunua kweli’? Kwa kujibu, acheni tutazame mambo yaliyoonwa na Wakristo watatu Waghana.

Kuvutiwa na Mafundisho ya Biblia

Acheni kwanza tumfikirie mwanamke aliye katika miaka yake ya mapema ya 20. Babake alikuwa pasta, lakini, alichagua kuiacha dini ya babake. Sababu gani? Kupenda kwake kweli.

Wakati mmoja yeye alieleza hivi: “Mashahidi walikuwa wakija nyumbani kwetu walipofanya ziara zao za kutoka nyumba hadi nyumba. Baada ya mazungumzo machache pamoja nao, niling’amua kwamba waliyofundisha yalikuwa na msingi mzuri wa Biblia. Nilizusha maswali juu ya habari kama vile Utatu, moto wa helo, hali ya kutokufa kwa nafsi, na hasa juu ya uponyaji kwa imani. Niliamini kwa dhati kwamba mafundisho hayo yalitokana na Biblia. Lakini Mashahidi walinisaidia kuona kwamba sivyo ilivyokuwa.”—Ili kuonyesha maoni ya Biblia juu ya habari hizo, tafadhali ona Marko 13:32; Waroma 6:23; Matendo 10:40; na 1 Wakorintho 13:8-10.

Huyo mwanamke mchanga aliongeza kusema hivi: “Bado, kulikuwa na upinzani mkali kutoka kwa familia yangu, hasa baba yangu. Alihisi kwamba nilikuwa nikiongozwa vibaya. Hata hivyo, nilijua kwamba mambo niliyokuwa nikijifunza kutoka kwa Mashahidi wa Yehova yalikuwa ndiyo kweli. Nilijaribu kumfahamisha baba yangu mambo hayo kutoka kwenye Biblia, lakini hakuwa akisikiliza. Kwa kweli, upinzani uliongezeka.

“Ingawa hivyo, sikukata tamaa. Nilijua kwamba ujuzi wa kweli pekee ndio huongoza kwenye uhai wa milele katika Paradiso, nami nilikuwa nimeazimia kuushikilia. Mashahidi wenyeji waliposikia juu ya matatizo niliyokuwa nikikabili, walinisaidia kwa upendo, wakinitia moyo na kuniandalia mahitaji fulani ya lazima. Jambo hilo lilinisaidia kufahamu umaana wa maneno haya ya Yesu yapatikanayo kwenye Yohana 13:35: ‘Kwa hilo wote watajua kwamba nyinyi ni wanafunzi wangu, mkiwa na upendo miongoni mwenu wenyewe.’ Usadikisho wangu kwamba Mashahidi wa Yehova huzoea dini ya kweli uliongezeka. Baadaye, wazazi wangu walipotambua nilikuwa nimebadili maisha yangu yakawa bora zaidi, walipendezwa na yale waliyoona, na mtazamo wao kunielekea ukabadilika—sana hivi kwamba baba yangu aliwaomba Mashahidi wajifunze Biblia pamoja na ndugu yangu mkubwa!”

Kujithibitishia Kweli

‘Kuinunua kweli’ pia ni jambo gumu kwa vijana fulani ambao wamelelewa na wazazi Mashahidi. Vijana fulani ni wenye mwelekeo wa kupuuza kweli ya Biblia. Wakishindwa kuifanya kweli kuwa mali yao wenyewe, imani yao huelekea kuwa dhaifu, ya kijuujuu. (Linganisha Mathayo 13:20, 21.) Nathaniel, mwanamume mmoja Mghana ambaye yuko katika miaka yake ya 30 asema juu ya jinsi ‘alivyoinunua kweli’ alipokuwa bado kijana.

“Wazazi wangu walinifundisha Biblia tangu nilipokuwa kitoto kichanga,” akumbuka. “Nilipokuwa nikikua, niliandamana nao katika kazi ya kuhubiri, lakini sikuwa kwa kweli nimeamua kuwa Shahidi. Baada ya muda, nilikuja kung’amua kwamba nilihitaji kujichunguzia Biblia.

“Kwanza, ilinibidi nisadikishwe kwamba Biblia ndiyo Neno la Mungu, wala si kitabu kitakatifu kingine chochote cha dini. Kupitia funzo la kibinafsi, nilijifunza kwamba Biblia ndiyo kitabu kitakatifu pekee ambacho kina unabii mwingi mbalimbali ulio wazi ambao ulitimizwa kwa usahihi. Pia nilijifunza kwamba Biblia ina kweli kadhaa za kisayansi—kwa mfano, ile kweli kwamba dunia ‘imetundikwa pasipo kitu.’ (Ayubu 26:7) Maneno hayo yaliandikwa maelfu ya miaka kabla ya wanasayansi kujua juu ya mfumo wetu wa jua. Mungu pekee ndiye angeweza kupulizia watu kuandika mambo hayo!a

“Kisha, nikataka kugundua ni dini gani ambayo hufundisha na kuzoea kweli zifundishwazo katika Biblia. Dini zilizo nyingi hufundisha moto wa helo, Utatu, na nafsi isiyoweza kufa inayobaki hai baada ya kifo. Lakini mafundisho hayo hayakueleweka kwangu. Nilisababu hivi: “Je, asingekuwa ni baba mwovu ambaye angeushikilia mkono wa mtoto wake ndani ya sufuria ya maji yanayochemka akimwadhibu? Basi, Mungu wa upendo angewezaje kuwaweka watoto wake katika helo yenye moto na kuwaacha wateseke? Hata hivyo, Mashahidi wa Yehova hufundisha kupatana na maandiko ya Biblia kama Waroma 6:23, ambalo lasema hivi: ‘Mshahara ambao dhambi hulipa ni kifo’—si helo fulani yenye moto. Hilo lilieleweka kwangu.

“Pia nilipata kuona kwamba Mashahidi wa Yehova hutaka kwamba washiriki wote waishi kulingana na viwango vya Biblia na wao hutenga na ushirika wote wale ambao huzoea dhambi bila kutubu. Kwa kufikiria haya yote, nilikata kauli kwamba Mashahidi wa Yehova wana kweli, nikafanya uamuzi wa kibinafsi kuwa mmoja wao. Nilifanya kazi kwa bidii ili nistahili kubatizwa kuwa Shahidi.”—1 Wakorintho 5:11-13.

Mambo aliyojionea Nathaniel yatoa kielelezo kizuri kwamba hata vijana waliolelewa na wazazi Wakristo lazima ‘wainunue kweli.’ Hawapaswi kuhudhuria tu mikutano ya kutaniko na kujikalia tu. Kama Waberea wa kale, wapaswa ‘kuyachunguza Maandiko kila siku juu ya kama mambo hayo yako hivyo.’ (Matendo 17:11) Jambo hilo huchukua wakati na jitihada, lakini laweza kutokeza imani thabiti na usadikisho.—Linganisha Waefeso 3:17-19.

Kuzindushwa na Dini Isiyo ya Kweli

Mwanamume Mghana aitwaye Godwin alikuwa na umri wa karibu miaka 70 alipoacha Kanisa la Presbiteri na Chama cha Siri cha Kusaidiana. “Kulikuwa na mambo yaliyokuwa yakiendelea kanisani ambayo niliyapata kuwa yenye kuchukiza,” asema Godwin. Kwa kielelezo, kulikuwa na ushindani mkali, na bado unaendelea. Nyakati fulani ilibidi polisi waje ili kurudisha amani na utengamano. Sikufikiri hilo kuwa jambo liwafaalo wafuasi wa Kristo. Kisha tatizo likatokea kati ya Mpresbiteri mwenzangu nami. Mahakama ya watu wote ilisikia kesi hiyo na kumhukumu huyo mtu mwingine kuwa na hatia. Hata hivyo, kwa kupendelea mhudumu wa hilo kanisa alimwunga mkono mtu huyo na kujaribu kunilaumu mbele ya kutaniko! Nilimwambia waziwazi maoni yangu juu ya jambo hilo, na kuondoka katika hilo kanisa—nisirudi kamwe.

“Wakati fulani ulipita, na Mashahidi wa Yehova wakanizuru nyumbani kwangu. Mwanzoni, nilisikiliza kwa sababu sikutaka kukataa kukaribisha watu walioongea juu ya Mungu. Lakini nilianza kutambua kwamba hata ingawa nilikuwa Mpresbiteri kwa miongo mingi, kulikuwa na mambo mengi ambayo sikujua juu ya Biblia. Kwa kielelezo, sikujua kamwe kwamba Biblia hutoa tumaini la kuishi milele katika Paradiso duniani.b Na nilipoanza kuhudhuria mikutano ya Mashahidi wa Yehova, adabu, na hasa mavazi na mapambo ya vijana miongoni mwao, yalinivutia sana. Hawa walikuwa watu ambao kwa kweli waliishi kulingana na viwango vya Biblia!”

Bado, ‘kuinunua kweli’ kulimtaka ajitahidi kufanya marekebisho maishani mwake. Godwin akumbuka: “Nilikuwa mshiriki wa chama cha siri cha kusaidiana kiitwacho Masonic Lodge. Na ingawa chajulikana kuwa jamii ya kidugu ambayo huandaa msaada kwa washiriki wake, nilishika desturi zilizohusisha matumizi ya mafuvu ya kichwa na mifupa na za kuita roho. Yadhaniwa roho hizo husaidia wale ambao huingiliana nazo ili wasitawi kiroho.

“Kujifunza kwangu kulinisaidia kuona kwamba Yehova Mungu huchukia sana kuhusika kokote katika uwasiliani-roho kwa sababu jambo hilo laweza kumleta mtu chini ya uvutano wa Shetani na majeshi ya roho wake waovu.c Je, ningeendelea kuwa mshiriki wa hicho chama cha siri cha Masonic Lodge pamoja na mafumbo yake yote, au ningekiacha na kumpendeza Yehova? Nilichagua kumpendeza Yehova. Niliharibu vikorokoro vyote vya hicho chama cha siri cha Masonic Lodge ambavyo nilikuwa navyo, hata suti niliyotumia kwa ajili ya mikutano ya chama cha siri cha Lodge. Nilijionea ukweli wa ahadi ya Yesu aliposema, ‘Kweli itawaweka nyinyi huru’! (Yohana 8:32) Sasa mimi ninashiriki na wengine kwa furaha mambo ambayo nimejifunza. Sijuti kwa vyovyote.”

Maelfu mengi ya watu wenye mioyo ya haki hali kadhalika wametoa dhabihu kubwa ili ‘kuinunua kweli.’ Kama hao Wakristo watatu waliozungumziwa katika makala hii, wao hawana majuto juu ya mabadiliko waliyofanya. Kweli ya Biblia imewapa “msingi bora kwa ajili ya wakati ujao, ili wao wapate kuwa na mshiko imara juu ya uhai ulio halisi.” (1 Timotheo 6:19) “Uhai [huo] halisi” na baraka zote zinazoandamana na huo zaweza pia kuwa zako milele ikiwa ‘utainunua kweli.’

[Maelezo ya Chini]

[Picha katika ukurasa wa 9]

Nathaniel

[Picha katika ukurasa wa 9]

Godwin