Tajiri Ingawa Maskini—Yawezekanaje?

Karne kadhaa zilizopita mtu mwenye hekima alisali kwamba asiwe maskini. Kwa nini alitoa ombi kama hilo? Kwa sababu alihofu kwamba umaskini ungechochea mitazamo na matendo ambayo yangetisha uhusiano wake na Mungu. Hilo ni dhahiri kutokana na haya maneno yake: “Unilishe chakula kilicho kadiri yangu . . . nisiwe maskini sana nikaiba, na kulitaja bure jina la Mungu wangu.”—MITHALI 30:8, 9.

JE, HILO lamaanisha kwamba haiwezekani maskini kumtumikia Mungu kwa uaminifu? La, hasha! Katika historia yote watumishi wa Yehova Mungu wasiohesabika wamedumisha uaminifu-maadili kwake kujapokuwa shida ambazo umaskini huleta. Na Yehova huwapenda na huwaandalia wale ambao huwa na itibari katika yeye.

Waaminifu wa Zamani za Kale

Mtume Paulo mwenyewe alipatwa na nyakati zenye uhitaji. (2 Wakorintho 6:3, 4) Pia alifafanua “wingu kubwa” la mashahidi waaminifu wa kabla ya Ukristo, ambao baadhi yao “walienda wakizunguka huku na huku katika ngozi za kondoo, katika ngozi za mbuzi, huku wakiwa katika uhitaji . . . Walizurura huku na huku katika majangwa na milima na mapango na mashimo ya dunia.”—Waebrania 11:37, 38; 12:1.

Mmojawapo wa waaminifu hao alikuwa nabii Eliya. Wakati wa ukame wa miaka mitatu na nusu, Yehova alimwandalia chakula kwa ukawaida. Kwanza, Mungu alituma kunguru wamletee huyo nabii mkate na nyama. (1 Wafalme 17:2-6) Baadaye, Yehova alidumisha kimuujiza ugavi wa unga na mafuta ambao kutoka kwavyo mjane fulani alimwandalia Eliya chakula. (1 Wafalme 17:8-16) Hicho chakula kilikuwa cha msingi sana, lakini kiliwaendeleza wakiwa hai, huyo nabii, yule mwanamke, na mwana wake.

Hivyohivyo, Yehova alimtegemeza nabii mwaminifu Yeremia katika nyakati ngumu kiuchumi. Yeremia aliokoka kuzingiwa kwa Yerusalemu na Babiloni, wakati ambapo watu walilazimika ‘kula mkate kwa kuupima, na kwa kuutunza sana.’ (Ezekieli 4:16) Hatimaye, hiyo njaa kuu jijini ikawa kali sana hivi kwamba baadhi ya wanawake walikula nyama ya watoto wao wenyewe. (Maombolezo 2:20) Hata ingawa Yeremia alikuwa chini ya ulinzi kwa sababu ya kuhubiri kwake bila hofu, Yehova alihakikisha kwamba alipewa “mkate mmoja” kila siku “hata mkate wote wa mji ulipokwisha.”—Yeremia 37:21.

Kwa hiyo Yeremia, kama Eliya, alikuwa na chakula kidogo. Maandiko hayatuambii ni nini au ni mara ngapi Yeremia alikula baada ya Yerusalemu kuishiwa na mkate. Lakini, twajua kwamba Yehova alimtegemeza na kwamba aliokoka wakati huo wa njaa kuu yenye kutisha.

Leo, umaskini uko katika kila sehemu ya ulimwengu. Kulingana na Umoja wa Mataifa, umaskini ulio mwingi zaidi wapatikana Afrika. Taarifa iliyotayarishwa na UM mwaka wa 1996 kwa ajili ya vyombo vya habari ilisema hivi: “Angalau nusu ya Waafrika wote ni maskini.” Zijapokuwa hali za kiuchumi zinazozidi kuwa ngumu zaidi, Waafrika wanaoongezeka daima wanatumia kanuni za Biblia maishani na wanamtumikia Mungu kwa uaminifu, wakiwa na hakika kwamba atawategemeza. Fikiria vielelezo fulani kutoka sehemu moja ya ulimwengu wetu wenye taabu.

Kudumisha Uaminifu

Michael,a anayeishi Nigeria, ni mkulima ambaye ana watoto sita wa kutegemeza. “Ni jambo gumu kuwa mwenye kufuatia haki wakati ambapo huna fedha za kutunza familia yako,” yeye asema. “Hata hivyo, ninaposhawishiwa kutofuatia haki, mimi hujikumbusha andiko la Waefeso 4:28, ambalo husema hivi: ‘Mwibaji na asiibe tena, bali acheni afanye kazi ya bidii, akifanya kwa mikono yake kazi iliyo njema.’ Hivyo nikishawishiwa, hujiuliza, ‘Nimefanyia kazi fedha hizi?’”

“Kwa kielelezo,” aongeza Michael, “siku moja nilipokuwa nikitembea, niliona mfuko ukianguka kutoka nyuma ya pikipiki. Sikuweza kumsimamisha mpanda-pikipiki, kwa hiyo nikauchukua mfuko na kupata kwamba ulikuwa umejaa fedha! Nikitumia kitambulisho kilichokuwa mfukoni, nilimpata mwenyewe na kumrudishia huo mfuko.”

Kupambana na Mshuko-Moyo

Mtu fulani katika Afrika Kaskazini alisema hivi: “Umaskini ni [kama] kunaswa katika shimo lenye kina kirefu, na bado ukiwa waweza kuona mwangaza na watu wakitembea kwa uhuru, bali ukiwa huwezi kuomba msaada au ngazi ya kupanda ili utoke.” Haistaajabishi kwamba umaskini mara nyingi huleta hisia za mshuko-moyo na hali ya kukata tamaa! Huenda hata watumishi wa Mungu wakaona mali za wengine na kuanza kufikiri kwamba maisha ya uaminifu-maadili hayafai. (Linganisha Zaburi 73:2-13.) Hisia kama hizo huenda zikashindwaje?

Peter, anayetoka Afrika Magharibi, alistaafishwa baada ya miaka 19 katika utumishi wa serikali. Sasa yeye hujiruzuku hasa kwa malipo kidogo ya uzeeni. “Ninapopatwa na vipindi vyenye kuvunja moyo,” asema Peter, “mimi hujikumbusha yale ambayo nimesoma katika Biblia na vichapo vya Watch Tower Society. Mfumo huu wa kale uko karibu kupitilia mbali, na tunangojea mfumo bora zaidi.

“Mimi pia hufikiria andiko la 1 Petro 5:9, lisemalo hivi: ‘Chukueni msimamo wenu dhidi [ya Shetani], mkiwa thabiti katika imani, mkijua kwamba mambo yaleyale kwa njia ya mateso yanatimizwa katika ushirika mzima wa ndugu zenu katika ulimwengu.’ Kwa hiyo si mimi pekee ninayepatwa na magumu. Vikumbusha hivyo hunisaidia kuachilia mbali mawazo yanayovunja moyo na kushusha moyo.”

“Mbali na hayo,” Peter aongeza, “Yesu alifanya miujiza mingi alipokuwa duniani, ingawa hakumfanya yeyote kuwa tajiri kimwili. Kwa nini nimtazamie anifanye niwe mwenye mali?”

Nguvu ya Sala

Kumkaribia Yehova Mungu katika sala ni njia nyingine ya kupambana na kufikiri hasi. Mary alipopata kuwa mmoja wa Mashahidi wa Yehova mwaka wa 1960, familia yake ilimwacha. Akiwa hajaolewa na sasa akiwa katika miaka yake ya 50, yeye ni dhaifu na hana vitu vingi vya kimwili. Hata hivyo, yeye ni mwenye bidii katika huduma ya Kikristo.

Mary asema hivi: “Nihisipo kuwa nimevunjika moyo, mimi humwendea Yehova katika sala. Najua kwamba hakuna mwingine awezaye kunisaidia zaidi ya vile yeye awezavyo kunisaidia. Nimejifunza kwamba unapokuwa na itibari katika Yehova, yeye hukusaidia. Sikuzote mimi hukumbuka maneno haya ya Mfalme Daudi, yapatikanayo kwenye Zaburi 37:25: ‘Nalikuwa kijana nami sasa ni mzee, lakini sijamwona mwenye haki ameachwa wala mzao wake akiomba chakula.’

“Mimi pia hupata kitia-moyo kutokana na mambo yaliyoonwa ya akina ndugu na dada wenye umri mkubwa zaidi yaliyosimuliwa katika Mnara wa Mlinzi. Yehova Mungu aliwasaidia, hivyo najua kwamba ataendelea kunisaidia pia. Yeye hubariki kazi yangu ndogo ya kuuza fufu [mlo wa muhogo], nami huweza kulipia mahitaji yangu. Nyakati nyingine ninapokuwa na fedha kidogo sana na ninawazia nitakalofanya, Yehova hutuma mtu fulani ambaye hunipa zawadi na kusema, ‘Dada, tafadhali chukua zawadi hii.’ Yehova hajapata kamwe kunitamausha.”

Thamani ya Funzo la Biblia

Mashahidi wa Yehova huthamini funzo la Neno la Mungu, Biblia, na walio maskini kati yao hawawi tofauti. John mwenye umri wa miaka 60 hutumika kutanikoni akiwa painia (mhubiri wa wakati wote wa Ufalme) na mtumishi wa huduma. Anaishi katika jengo lenye orofa mbili lililochakaa ambako familia 13 hukaa. Chumba chake ni sehemu ya ukumbi wa orofa ya kwanza, ambacho kimegawanywa kwa mbao. Ndani yake mna viti viwili vya zamani na meza ambayo juu yake vichapo vya kusaidia kujifunza Biblia vimerundamana. Yeye hulalia mkeka wa nyasi.

John alikuwa akichuma dola moja kwa siku kwa kuuza mkate, lakini uingizaji wa ngano kutoka nje ulipopigwa marufuku, alipoteza njia hii ya kupata riziki. Yeye asema hivi: “Napata maisha kuwa magumu sana nyakati nyingine, lakini ninaendelea kupainia. Yehova ndiye hunitegemeza. Mimi hufanya kazi yoyote niwezayo kupata na sitegemei binadamu yeyote anitegemeze au kunilisha, ingawa ndugu kutanikoni ni wenye kusaidia sana. Wao hunisaidia kutafuta kazi na nyakati nyingine hunipa zawadi za fedha.

“Mimi hutenga wakati wa kusoma Biblia na vichapo vya Watch Tower Society. Mimi hujifunza saa za alfajiri wakati ambapo nyumba ni kimya na husoma baadaye usiku wakati wowote tunapokuwa na stima. Najua lazima niendeleze funzo langu la kibinafsi.”

Kuwazoeza Watoto kwa Ajili ya Uhai Udumuo Milele

Daniel ni mjane mwanamume ambaye ana watoto sita. Katika 1985 alipoteza kazi aliyokuwa ameifanya kwa miaka 25, lakini alipata kazi ya kuuza dukani. “Maisha ni magumu kiuchumi kwa familia,” yeye asema. “Sasa twaweza kula mara moja tu kwa siku. Wakati mmoja tulikosa chakula kwa siku tatu. Tuliweza tu kunywa maji ili tuendelee kuishi.”

Daniel hutumika akiwa mzee kutanikoni. “Sikosi kamwe mikutano ya Kikristo, nami hufuliza kushughulika na migawo ya kitheokrasi,” yeye asema. “Wakati wowote kunapokuwa na kazi ya kufanywa kwenye Jumba la Ufalme, mimi huhakikisha kwamba nipo. Na hali zinapokuwa ngumu, mimi hujikumbusha maneno ya Petro kwa Yesu, yaliyorekodiwa kwenye Yohana 6:68: ‘Bwana, tutaenda zetu kwa nani?’ Nikiacha kumtumikia Yehova, nitaenda wapi? Maneno ya Paulo tupatayo kwenye Waroma 8:35-39 pia hunijaza azimio kwa sababu yaonyesha kwamba hakuna chochote ambacho kitatutenganisha na upendo wa Mungu na Kristo. Huo ndio mtazamo ninaokazia kikiki katika watoto wangu. Mimi huwaambia daima kwamba hatupaswi kamwe kumwacha Yehova.” Bidii ya Daniel, ikiunganishwa na funzo la Biblia la familia la kawaida, limekuwa na uvutano ufaao juu ya watoto wake.

Roho ya Kutoa

Huenda mtu akafikiri kwamba wanaoishi katika ufukara wasingekuwa katika hali ya kuchanga kifedha ili kuendeleza masilahi ya Ufalme. Lakini sivyo ilivyo. (Linganisha Luka 21:1-4.) Mashahidi fulani katika Ghana ambao kazi yao kuu ni kulima mazao ya chakula, hutenga sehemu ya shamba lao ili litumiwe kuendeleza masilahi ya Ufalme wa Mungu. Mazao ya sehemu hiyo ya shamba lao yanapouzwa, fedha hutumiwa kwa kusudi hilo pekee, ambalo hutia ndani kutoa michango kwenye Jumba la Ufalme la Mashahidi wa Yehova.

Joan, anayeishi Afrika ya Kati, ni painia. Ili kutunza mumeye aliyepooza na watu wengine wanne wanaomtegemea, yeye huuza mikate. Kutaniko ambalo yeye huhudhuria lilipohitaji benchi kwa ajili ya Jumba la Ufalme, familia ya Joan iliamua kutoa fedha zote walizokuwa nazo nyumbani. Kufanya hivyo kuliwaacha bila fedha zozote. Hata hivyo, siku iliyofuata, mtu fulani aliwalipa deni la muda mrefu bila kutazamiwa, akiwapa fedha ambazo walikuwa hawana matumaini ya kuzipata kamwe!

Joan ni mwenye uchangamfu na hana wasiwasi wa kupita kiasi juu ya fedha. “Mimi humweleza Yehova hali yangu katika sala, na kisha huenda kwenye huduma ya shambani. Twajua kwamba kuna matumaini kidogo ya hali bora zaidi katika huu mfumo wa mambo. Lakini, twang’amua kwamba Yehova atatuandalia mahitaji yetu.”

Kuonyesha Bidii ya Kazi

Mashahidi wa Yehova wanatambuliwa kwa kupendana. (Yohana 13:35) Walio na fedha huwasaidia Wakristo wenzao wenye uhitaji. Mara nyingi msaada huo huja ukiwa zawadi na nyakati nyingine ukiwa msaada wa kuajiriwa.

Mark, anayeishi Kongo, ana ukoma. Umeharibu umbo la vidole vyake vya mikono na vya miguu. Kwa hiyo, ili kutembea, yeye hutegemea mikongojo. Mark alipoamua kumtumikia Yehova, alianza kufanya mabadiliko makubwa maishani mwake. Badala ya kuomba omba chakula kama alivyofanya hapo zamani, alianza kukuza chakula chake mwenyewe. Alitengeneza pia matofali ya udongo na nyasi, ambayo aliuza.

Ijapokuwa hajiwezi kimwili, Mark aliendelea kufanya kazi kwa bidii. Hatimaye alinunua kipande cha shamba na kujenga nyumba ya kadiri hapo. Leo, Mark hutumikia akiwa mzee wa kutaniko na anastahiwa sana mjini anakoishi. Sasa yeye husaidia wengine walio na uhitaji.

Bila shaka, katika mahali pengi haiwezekani kabisa kupata kazi. Mzee Mkristo ambaye hutumikia kwenye mojawapo ya ofisi za tawi za Watch Tower Society katika Afrika ya Kati aliandika hivi: “Ndugu wengi hapa hawana kazi. Baadhi yao hujaribu kubuni kazi zao wenyewe, lakini jambo hilo ni gumu. Wengi wamesababu kwamba kwa kuwa watateseka hata wakifanya nini, watadhabihu faida za kimwili wakiwa wahudumu mapainia. Kwa kufanya hivyo, wengi hupata kwamba wanabarikiwa kwa wingi zaidi kuliko wakiwa na kazi ya mshahara kidogo au bila mshahara wowote.”

Yehova Hutegemeza Watu Wake

Yesu Kristo alisema hivi juu yake mwenyewe: “Mbweha wana mapango na ndege wa mbinguni wana viota, lakini Mwana wa binadamu hana mahali popote pa kulaza kichwa chake.” (Luka 9:58) Vivyo hivyo, mtume Paulo aliandika hivi: “Hadi kwenye saa hiihii twaendelea kuwa na njaa na pia kuwa na kiu na kuvikwa mavazi kwa uhaba na kupigwa huku na huku na kuwa bila makao.”—1 Wakorintho 4:11.

Yesu na Paulo walichagua kuishi maisha ya vichache kiuchumi ili waweze kufuatia huduma yao kwa ukamili zaidi. Wakristo wengi wa sasa ni maskini kwa sababu hawana chaguo jingine. Hata hivyo, wao hutumia kanuni za Biblia katika maisha na hutafuta kwa bidii kumtumikia Mungu. Wanajua kwamba Yehova anawapenda sana wapatapo kujionea ukweli wa uhakikisho huu wa Yesu: “Basi, fulizeni kutafuta kwanza ufalme na uadilifu wake, na vitu vingine vyote hivi [vitu vya kimwili] mtaongezewa.” (Mathayo 6:25-33) Isitoshe, hawa watumishi wa Mungu walio maskini wana uthibitisho kwamba “baraka ya BWANA hutajirisha.”—Mithali 10:22.

[Maelezo ya Chini]

[Sanduku katika ukurasa wa 6]

“Watekelezaji wa Neno” Ni Nani?

KULINGANA na uchunguzi wa Gallup wa mwaka wa 1994, asilimia 96 ya Wamarekani “huamini Mungu au roho ya ulimwenguni pote.” Pia kuna “makanisa mengi kwa kila mtu aliye Marekani kuliko katika taifa jingine lolote Duniani,” ikasema ripoti ya U.S.News & World Report. Kujapokuwa kuonekana huko mbalimbali kwa uchaji, mtafuta-maoni mwenye uzoefu wa muda mrefu George Gallup, Jr., asema hivi: “Uhakika ulio dhahiri ni kwamba, Wamarekani walio wengi hawajui wanaloamini au sababu ya kuamini kwao.”

Takwimu zaonyesha pia kwamba kuna pengo kubwa kati ya usadikisho mbalimbali wa kidini wa watu wengi na matendo yao. Mathalani, “wanasosiolojia wanaona kwamba baadhi ya maeneo ya nchi yenye uhalifu mwingi sana pia yatukia kuwa maeneo ambamo itikadi na mazoea ya kidini ni yenye nguvu zaidi,” asema mwandikaji Jeffery Sheler.

Hilo halipaswi kushangaza. Kwa nini? Kwa kuwa nyuma sana kufikia karne ya kwanza, mtume Paulo alionya Wakristo wenzake wajihadhari na wale ambao “hutangaza hadharani wamjua Mungu, lakini [ambao] humkana yeye kwa kazi zao.” (Tito 1:16) Kwa kuongezea, Paulo alimwambia mwanamume kijana Timotheo kwamba “siku za mwisho” zingetiwa alama na watu “[wenye] namna ya ujitoaji-kimungu lakini wakithibitika kuwa si kweli kwa nguvu ya hiyo.”—2 Timotheo 3:1, 5.

Hata hivyo, Wakristo wa kweli hufanya yote wawezayo ili kufuata amri ya Yesu Kristo ya ‘kwenda kufanya wanafunzi kutoka kwa watu wa mataifa yote.’ (Mathayo 28:19) Katika njia hiyo wao “[wanakuwa] watekelezaji wa neno, na si wasikiaji tu.”—Yakobo 1:22.

[Picha katika ukurasa wa 7]

Funzo la Biblia huthaminiwa na watu ulimwenguni pote