Jina Liongozalo Kwenye Imani ya Kweli

“NYINYI hammwamini Yesu na damu yake yenye kukomboa,” mwanamke mmoja akamwambia mmoja wa Mashahidi wa Yehova. Mwanamume mmoja alisisitiza hivi: “Nyinyi hujiita Mashahidi wa Yehova, bali mimi ni shahidi wa Yesu.”

Maoni kwamba Mashahidi wa Yehova hawamwamini Yesu au hawampi umaarufu wa kutosha ni ya kawaida sana. Ingawa hivyo, mambo ya hakika ni yapi?

Ni kweli kwamba Mashahidi wa Yehova huchukulia kwa uzito jina la Mungu, Yehova.a Itamar, Shahidi mmoja wa Brazili akumbuka: “Wakati wa kufanya badiliko kubwa maishani mwangu ulifika nilipojua jina la Mungu. Nilipolisoma kwa mara ya kwanza, ilikuwa kana kwamba nimeamka kutoka katika usingizi mzito sana. Jina Yehova lilinichochea na kunigusa; liligusa hisia zangu za ndani kabisa.” Hata hivyo, yeye aongeza: “Moyo wangu wafurika kwa kumpenda Yesu vilevile.”

Naam, Mashahidi wa Yehova hutambua kwamba ili wapate uhai udumuo milele, ni lazima waweke imani “katika jina la Mwana wa Mungu,” Yesu. (1 Yohana 5:13) Lakini usemi ‘katika jina la Yesu’ wamaanisha nini?

Kile Kimaanishwacho na Jina la Yesu

Usemi “katika jina la Yesu” na semi zifananazo na usemi huo zapatikana kotekote katika Maandiko ya Kigiriki ya Kikristo, au “Agano Jipya.” Kwa kweli, neno “jina” ambalo limetumiwa kurejezea daraka la Yesu laonekana zaidi ya mara 80 na mara 30 hivi katika kitabu cha Matendo pekee. Wakristo wa karne ya kwanza walibatiza katika jina la Yesu, wakaponya katika jina lake, wakafundisha katika jina lake, wakaliitia jina lake, wakateseka kwa ajili ya jina lake, na kulitukuza jina lake.—Matendo 2:38; 3:16; 5:28; 9:14, 16; 19:17.

Kulingana na kamusi moja ya Biblia, neno la Kigiriki litafsiriwalo “jina” hutumiwa mara nyingi katika Biblia “kuhusu yale yote ambayo jina humaanisha, kuhusu mamlaka, sifa, cheo, ukuu, nguvu, utukufu, n.k., kuhusu kila kitu ambacho jina humaanisha.” Kwa hiyo jina la Yesu humaanisha ukuu na mamlaka makubwa ya utekelezaji aliyokabidhiwa na Yehova Mungu. Yesu mwenyewe alisema: “Nimepewa mamlaka yote mbinguni na juu ya dunia.” (Mathayo 28:18) Baada ya Petro na Yohana kumponya mwanamume kilema, viongozi wa kidini Wayahudi waliuliza: “Ni kwa nguvu gani au ni katika jina la nani nyinyi mlifanya hilo?” Kisha kwa ujasiri Petro akaonyesha imani yake katika mamlaka na nguvu zilizowakilishwa na jina la Yesu alipojulisha kwamba ilikuwa “katika jina la Yesu Kristo Mnazareti, . . . kwa yeye mtu huyu asimama hapa akiwa timamu mbele yenu.”—Matendo 3:1-10; 4:5-10.

Imani Katika Yesu au Katika Kaisari?

Hata hivyo, haingekuwa rahisi kudai kuwa na imani kama hiyo katika jina la Yesu. Kama vile Yesu alivyokuwa ametabiri, wanafunzi wake wangekuwa ‘vitu vya kuchukiwa na mataifa yote kwa sababu ya jina lake.’ (Mathayo 24:9) Kwa nini? Kwa sababu jina la Yesu huwakilisha wadhifa wake akiwa Mtawala aliyewekwa rasmi na Mungu, Mfalme wa wafalme, ambaye mataifa yote wapaswa kujitiisha kwake, jambo ambalo hawako tayari wala hawapendi kulifanya.—Zaburi 2:1-7.

Viongozi wa kidini wa wakati wa Yesu pia hawakutaka kujitiisha kwa Yesu. Walisema: “Sisi hatuna mfalme ila Kaisari,” hivyo wakimkataa Mwana wa Mungu. (Yohana 19:13-15) Badala yake, waliweka imani yao katika jina—nguvu na mamlaka—ya Kaisari na serikali yake kubwa. Hata waliamua kwamba Yesu alipaswa kufa ili waweze kuhifadhi nyadhifa na vyeo vyao.—Yohana 11:47-53.

Katika karne zilizofuata kifo cha Yesu, wengi waliodai kuwa Wakristo walikuwa na mtazamo sawa na ule wa viongozi Wayahudi. Hao waitwao eti Wakristo waliweka imani yao katika nguvu na mamlaka ya Serikali na kujihusisha na mapambano yake. Kwa mfano, katika karne ya 11, baada ya kanisa kuwaandaa wapiganaji wasiokuwa na kazi kuwa militia Christi, au mashujaa wa Kikristo, “mamlaka za kilimwengu za Jumuiya ya Wakristo zilipokonywa daraka la kuongoza vita vya haki na badala yake, daraka hilo likatwaliwa na kanisa kwa kutumia mashujaa wake wa Kikristo.” (The Oxford History of Christianity) Simulizi hilo laongeza kusema kwamba matangazo fulani ya papa yalifanya walio wengi wa wapiganaji hao waamini kwamba kwa kushiriki vita hivyo, “walikuwa wamefanya mapatano na Mungu na walikuwa na uhakika wa kuwako katika Paradiso.”

Huenda wengine wakabisha kwamba inawezekana kuwa mwaminifu-mshikamanifu kwa Yesu na wakati uleule kushiriki katika mambo ya kisiasa, na vilevile katika vita vya mataifa. Huenda wakahisi kwamba ni wajibu wa Mkristo kupambana na uovu popote pale upatikanapo, na kwamba hilo latia ndani kupigana vita ikiwa lazima. Lakini je, Wakristo wa mapema walikuwa na maoni kama hayo?

“Wakristo wa mapema kabisa hawakutumikia katika majeshi yenye silaha,” yasema makala moja katika gazeti la The Christian Century. Yaeleza kwamba hadi kufikia mwongo wa 170-180 W.K., hakuna uthibitisho wowote kwamba Wakristo walitumikia katika majeshi. Kisha makala hiyo yaongeza: “Wakristo waliacha kupinga utumishi wa kijeshi hatua kwa hatua tu.”

Matokeo yamekuwa nini? “Labda hakuna kitu chochote ambacho kimeuaibisha Ukristo zaidi kuliko zoea lake la kuchukua msimamo ulio sawa kabisa na ule wa wasio Wakristo kuhusu kupigana vita,” yasema makala ya The Christian Century. “Kwa kuunga mkono imani ya Mwokozi mwanana kwa upande mmoja na kwa upande ule mwingine kuunga mkono kwa bidii vita vya kidini au vya kitaifa, Wakristo wameuharibu sana Ukristo.”

Kuwaiga Wakristo wa Mapema Leo

Je, inawezekana kwa Wakristo leo kuiga kielelezo bora cha Wakristo wa mapema? Mashahidi wa Yehova katika karne hii wameonyesha kwamba inawezekana. Akizungumza kuwahusu, mhariri wa jarida la Holocaust Educational Digest alisema: “Hakuna Shahidi wa Yehova yeyote atakayeenda vitani kamwe. . . . Ikiwa kila mtu ulimwenguni aliye na wadhifa wa mamlaka angekuwa na imani hiyo, [Vita ya Ulimwengu ya Pili] haingetokea kamwe.”

Jambo sawa na hilo laweza kusemwa kuhusu mapambano ya kimkoa ya hivi karibuni zaidi, kama lile lililochacha huko Ireland ya Kaskazini. Miaka kadhaa iliyopita, mmoja wa Mashahidi wa Yehova alikuwa akihubiri kutoka nyumba hadi nyumba katika eneo la Waprotestanti katika jiji la Belfast. Baada ya kujua kwamba huyo Shahidi alikuwa Mkatoliki zamani, mwenye nyumba mmoja alimwuliza: “Ulipokuwa Mkatoliki, je, uliunga mkono IRA [Jeshi la Jamhuri ya Ireland]?” Shahidi huyo aling’amua kwamba huyo mwanamume angeweza kubadilika kuwa mwenye jeuri kwa sababu alikuwa amezuiliwa baada ya kukamatwa akiwa na bunduki akiwa njiani kwenda kumuua Mkatoliki na alikuwa ametoka tu kuachiliwa. Kwa hiyo Shahidi huyo alijibu: “Mimi si Mkatoliki sasa. Mimi ni mmoja wa Mashahidi wa Yehova. Nikiwa Mkristo wa kweli, singeweza kumuua yeyote kwa ajili ya serikali yoyote ile wala kwa ajili ya mtu yeyote yule.” Aliposikia hayo, mwenye nyumba huyo alimsalimia kwa mkono na kusema: “Kuua kwote ni kubaya. Nyinyi watu mnafanya kazi nzuri. Endeleeni vivyo hivyo.”

Kinachomaanishwa na Kuweka Imani Katika Jina la Yesu

Hata hivyo, kuweka imani katika jina la Yesu humaanisha zaidi ya kujiepusha tu na vita. Kwamaanisha kutii amri zote za Kristo. Kwa kuwa Yesu alisema: “Nyinyi ni marafiki wangu ikiwa mwafanya lile ninalowaamuru nyinyi,” nayo mojawapo ya amri zake ni kwamba ‘tupendane.’ (Yohana 15:14, 17) Upendo hutafuta kufanyia wengine mema. Huondolea mbali ubaguzi wote wa kitaifa, kidini, na kijamii. Yesu alionyesha jinsi ya kufanya hivyo.

Wayahudi wa wakati wa Yesu waliwachukia Wasamaria. Kinyume cha hilo, Yesu alizungumza na mwanamke Msamaria na tokeo likawa kwamba, yeye na wengine wengi waliweka imani katika jina la Yesu. (Yohana 4:39) Yesu pia alisema kwamba wanafunzi wake wangekuwa mashahidi wake “katika Yerusalemu na pia katika Yudea yote na Samaria na hadi sehemu ya mbali zaidi sana ya dunia.” (Matendo 1:8) Ujumbe wake wenye kutoa uhai haungetolewa kwa Wayahudi pekee. Kulingana na hilo, Petro aliagizwa amzuru Kornelio, akida wa jeshi la Kiroma. Ingawa ilikuwa kinyume cha sheria kwa Myahudi kumzuru mtu wa jamii nyingine, Mungu alimwonyesha Petro kwamba ‘hakupaswa kuita mtu yeyote kuwa najisi au asiye safi.’—Matendo 10:28.

Kwa kumwiga Yesu, Mashahidi wa Yehova husaidia watu wote kwa hiari—hata wawe wametoka katika jamii, dini, au hali ya kiuchumi ya aina gani—ili wajifunze juu ya wokovu ambao huja kupitia jina la Yesu. Imani katika jina la Yesu huwachochea ‘kutangaza hadharani kwamba Yesu ni Bwana.’ (Waroma 10:8, 9) Twakutia moyo ukubali msaada wao ili uweze kujifunza kuweka imani katika jina la Yesu.

Jina la Yesu lapaswa kuchochea kwa kweli hisia za heshima, staha, na utii. Mtume Paulo alisema: “Katika jina la Yesu kila goti likunjwe la wale walio mbinguni na wale walio duniani na wale walio chini ya ardhi, na kila ulimi ukiri waziwazi kwamba Yesu Kristo ni Bwana kwa utukufu wa Mungu Baba.” (Wafilipi 2:10, 11) Hata ingawa huenda wakazi wa dunia walio wengi wasiwe tayari kujitiisha chini ya utawala wa Yesu, Biblia yaonyesha kwamba wakati umekaribia ambapo watu wote watalazimika kufanya hivyo au waangamie. (2 Wathesalonike 1:6-9) Kwa hiyo, sasa ndio wakati wa kuweka imani katika jina la Yesu kwa kutii amri zake zote.

[Maelezo ya Chini]

[Picha katika ukurasa wa 6]

Mamilioni wameua na kuuawa katika jina la Yesu

[Picha katika ukurasa wa 7]

Yesu hakubagua. Je, wewe unabagua?