Walifanya Mapenzi ya Yehova

Yule Mtu Mkuu Zaidi Afanya Utumishi wa Unyenyekevu

YESU alijua kwamba wakati wake wa mwisho pamoja na mitume wake ungekuwa wenye thamani. Karibuni, angekamatwa, na imani yake ingejaribiwa zaidi ya vile ilivyokuwa imewahi kujaribiwa hapo awali. Yesu pia alijua kwamba angepata baraka kubwa baadaye. Karibuni angekwezwa kwenye mkono wa kuume wa Mungu na kupewa “jina lililo juu ya kila jina jingine, ili katika jina la Yesu kila goti likunjwe la wale walio mbinguni na wale walio duniani na wale walio chini ya ardhi.”—Wafilipi 2:9, 10.

Hata hivyo, Yesu hakukengeushwa na hangaiko kuhusu kifo chake kilichokuwa kikikaribia, wala kukengeushwa na hamu yake ya kupata thawabu aliyokuwa ameahidiwa asifikirie mahitaji ya mitume wake. Baadaye Yohana alirekodi katika Gospeli yake kwamba, Yesu “aliwapenda hadi mwisho.” (Yohana 13:1) Na katika wakati huo muhimu wa mwisho wa maisha yake akiwa binadamu mkamilifu, Yesu alifunza mitume wake somo la maana.

Somo la Unyenyekevu

Mitume walikuwa pamoja na Yesu katika chumba cha juu huko Yerusalemu kusherehekea Sikukuu ya Kupitwa. Hapo awali, Yesu alikuwa amewasikia wakibishana juu ya ni nani aliyekuwa mkubwa zaidi miongoni mwao. (Mathayo 18:1; Marko 9:33, 34) Alikuwa amezungumza nao juu ya jambo hilo, na alikuwa amejaribu kusahihisha maoni yao. (Luka 9:46) Hata hivyo, sasa Yesu alikazia masomo hayo akitumia mfikio tofauti. Aliamua kuzungumza nao kuhusu unyenyekevu na vilevile kuuonyesha.

Yesu “aliinuka kutoka penye mlo wa jioni na kuweka kando mavazi yake ya nje,” Yohana aandika. “Akichukua taulo, akajifunga mwenyewe kiuno. Baada ya hilo akatia maji ndani ya beseni akaanza kuosha miguu ya wanafunzi na kuikausha kwa taulo ambayo kwayo alikuwa amefungwa kiuno.”—Yohana 13:4, 5.

Katika tabia ya nchi ya Mashariki ya Kati ya kale ambayo ni yenye joto, watu walivaa makubazi walipotembea katika barabara zenye vumbi. Baada ya kuingia katika nyumba ya mtu wa kawaida, wangesalimiwa na mkaribishaji, ambaye angewapa vyombo na maji ili waweze kuosha miguu yao. Katika nyumba zenye utajiri zaidi, mtumwa ndiye angefanya kazi hiyo ya kuosha miguu.—Waamuzi 19:21; 1 Samweli 25:40-42.

Katika chumba hicho cha juu, Yesu na mitume wake hawakuwa wageni-waalikwa wa yeyote. Hakukuwa na mkaribishaji wa kuwapa vyombo, na hakukuwa watumwa wa kuwaosha miguu. Yesu alipoanza kuwaosha miguu, mitume waliaibika. Hapa Yule aliyekuwa mkuu zaidi kati yao alifanya kazi ya hali ya chini zaidi!

Mwanzoni, Petro alimkataza Yesu asioshe miguu yake. Lakini Yesu akamwambia: “Isipokuwa nikuoshe, wewe huna sehemu pamoja na mimi.” Yesu alipomaliza kuosha miguu ya mitume wote, alisema: “Je, mwalijua ambalo nimewafanyia nyinyi? Nyinyi huniita, ‘Mwalimu,’ na, ‘Bwana,’ nanyi mwasema sawasawa, kwa maana mimi ni wa namna hiyo. Kwa hiyo, ikiwa mimi, nijapokuwa Bwana na Mwalimu, niliosha miguu yenu, nyinyi pia mwapaswa kuoshana miguu. Kwa maana mimi niliweka kiolezo kwa ajili yenu, ili, kama vile nilivyowafanyia nyinyi, nyinyi mpaswe kufanya pia.”—Yohana 13:6-15.

Yesu hakuwa akianzisha desturi ya kuosha miguu. Badala yake, alikuwa akiwasaidia mitume wake wawe na mtazamo mpya—mtazamo wa unyenyekevu na utayari wa kufanya kazi zilizo za chini zaidi kwa niaba ya ndugu zao. Kwa wazi, walielewa jambo hilo. Hebu fikiria yaliyotokea miaka kadhaa baadaye wakati suala kuhusu tohara lilipozuka. Ingawa “bishano kubwa” lilitukia, waliokuwepo walidumisha utaratibu mzuri, wakasikiliza maoni ya mmoja na mwenzake kwa heshima. Isitoshe, yaonekana kwamba yule aliyesimamia mkutano huo alikuwa mwanafunzi Yakobo—wala sio mmoja wa mitume, kama ambavyo tungetarajia, kwa kuwa walikuwepo. Habari hiyo iliyosimuliwa katika kitabu cha Matendo yaonyesha kwamba mitume walikuwa wamefanya maendeleo makubwa katika kuonyesha unyenyekevu.—Matendo 15:6-29.

Somo Kwetu

Kwa kuosha miguu ya wanafunzi wake, Yesu aliandaa somo muhimu sana la unyenyekevu. Kwa wazi, Wakristo hawapaswi kufikiri kwamba wao ni wa maana sana hivi kwamba wengine wapaswa kuwatumikia sikuzote, wala hawapaswi kung’ang’ania kupata nyadhifa za heshima na fahari. Badala yake, wapaswa kufuata kiolezo kilichowekwa na Yesu, “[aliye]kuja si kuhudumiwa, bali kuhudumu na kutoa nafsi yake kuwa fidia katika kubadilishana kwa ajili ya wengi.” (Mathayo 20:28) Naam, wafuasi wa Yesu wapaswa kuwa tayari kutumikiana katika kazi zilizo za chini zaidi.

Kwa sababu nzuri Petro aliandika: “Jifungeni hali ya akili ya kujishusha chini kuelekea mtu na mwenzake, kwa sababu Mungu hupinga wenye kiburi, lakini huwapa wanyenyekevu fadhili isiyostahiliwa.” (1 Petro 5:5) Neno la Kigiriki litafsiriwalo ‘funga’ latokana na neno limaanishalo “aproni ya mtumwa,” ambayo chini yake vazi jingine lilifungwa bila kukazwa. Je, Petro alikuwa akirejezea tendo la Yesu la kujifunga kiuno kwa taulo na kuosha miguu ya mitume wake? Hatuwezi kwa uhakika kusema hivyo. Hata hivyo, utumishi wa Yesu wa unyenyekevu uligusa moyo wa Petro asiweze kuusahau, kama vile wapaswa kugusa mioyo ya wote ambao wangetaka kuwa wafuasi wa Kristo.—Wakolosai 3:12-14.