Fanya Tangazo la Hadharani kwa Ajili ya Wokovu

“Kila mtu aitiaye jina la Yehova ataokolewa.”—WAROMA 10:13.

1. Katika historia, ni maonyo gani yametolewa?

HISTORIA yafafanua ‘siku kadhaa za Yehova.’ Lile Furiko la siku ya Noa, kuangamizwa kwa Sodoma na Gomora, na kuharibiwa mbalimbali kwa Yerusalemu mwaka wa 607 K.W.K. na mwaka wa 70 W.K. zilikuwa siku za Yehova zilizo kubwa na zenye kutia hofu. Zilikuwa siku za kutekeleza haki dhidi ya waliomwasi Yehova. (Malaki 4:5; Luka 21:22) Siku hizo, watu wengi waliangamia kwa sababu ya uovu wao. Lakini baadhi yao walibaki hai. Yehova alisababisha maonyo yatolewe, akiwaarifu waovu juu ya msiba uliokuwa ukikaribia na kuwapa watu wenye mioyo minyoofu fursa ya kupata wokovu.

2, 3. (a) Ni onyo gani la kiunabii lililonukuliwa kwenye Pentekoste? (b) Tangu Pentekoste 33 W.K., ni nini lililotakiwa katika kuliitia jina la Yehova?

² Uharibifu wa Yerusalemu mwaka wa 70 W.K. ni kielelezo chenye kutokeza cha hilo. Akitabiri juu ya tukio hilo karibu miaka 900 mapema, nabii Yoeli aliandika hivi: “Nitaonyesha mambo ya ajabu katika mbingu na katika dunia, damu, na moto, na minara ya moshi. Jua litageuzwa kuwa giza, na mwezi kuwa damu, kabla haijaja hiyo siku ya BWANA iliyo kuu na itishayo.” Mtu awaye yote angeweza kubakije hai wakati wenye kuogofya hivyo? Yoeli aliandika hivi chini ya upulizio: “Itakuwa ya kwamba mtu awaye yote atakayeliita jina la BWANA [“Yehova,” NW] ataponywa; kwa kuwa katika mlima Sayuni na katika Yerusalemu watakuwako watu watakaookoka, kama BWANA alivyosema; na katika mabaki, hao awaitao BWANA.”—Yoeli 2:30-32.

³ Kwenye Pentekoste 33 W.K., mtume Petro alihutubia umati wa Wayahudi na wageuzwa-imani katika Yerusalemu, akanukuu unabii wa Yoeli, akionyesha kwamba wasikilizaji wake wangeweza kutarajia utimizo fulani siku yao: “Hakika nitatoa mambo ya ajabu mbinguni juu na ishara juu ya dunia chini, damu na moto na ukungu wa moshi; jua litageuzwa kuwa giza na mwezi kuwa damu kabla ya siku kubwa na yenye adhama ya Yehova kuwasili. Na kila mtu aitiaye jina la Yehova ataokolewa.” (Matendo 2:16-21) Umati wote uliokuwa ukimsikiliza Petro ulikuwa chini ya Sheria ya Kimusa, na kwa hiyo walilijua jina la Yehova. Petro alifafanua kwamba, tangu wakati huo, kuliitia jina la Yehova kungehusisha jambo fulani zaidi. Kwa kutokeza zaidi, hilo lilitia ndani kubatizwa katika jina la Yesu, yule ambaye alikuwa ameuawa kisha akafufuliwa na kupata uhai wa kimbingu usioweza kufa.—Matendo 2:37, 38.

4. Wakristo walitangaza kotekote ujumbe gani?

⁴ Kuanzia Pentekoste na kuendelea, Wakristo walieneza neno juu ya Yesu aliyefufuliwa. (1 Wakorintho 1:23) Walijulisha kwamba wanadamu wangeweza kuasilishwa wawe wana wa kiroho wa Yehova Mungu na kuwa sehemu ya “Israeli [jipya la] Mungu,” taifa la kiroho ambalo ‘lingetangaza kotekote sifa bora kabisa za Yehova.’ (Wagalatia 6:16; 1 Petro 2:9) Walioendelea kuwa waaminifu hadi kifo wangerithi uhai wa kimbingu usioweza kufa wakiwa warithi wenzi wa Yesu katika Ufalme wa kimbingu. (Mathayo 24:13; Waroma 8:15, 16; 1 Wakorintho 15:50-54) Isitoshe, Wakristo hao walipaswa kutangaza kuja kwa siku ya Yehova iliyo kubwa na yenye kutia hofu. Walipaswa kuuonya ulimwengu wa Kiyahudi kwamba ungepatwa na dhiki ipitayo chochote ambacho kilipata kukumba Yerusalemu na waliodaiwa kuwa watu wa Mungu kufikia wakati huo. Hata hivyo, kungekuwako watu ambao wangebaki hai. Nani? Walioliitia jina la Yehova.

“Katika Siku za Mwisho”

5. Ni utimizo gani mbalimbali wa unabii ambao umetukia leo?

⁵ Katika njia nyingi, hali za nyuma huko zilitangulia kuonyesha mambo tuonayo leo. Tangu mwaka wa 1914, mwanadamu amekuwa akiishi katika kipindi cha wakati wa pekee kirejezewacho katika Biblia kuwa “wakati wa mwisho,” “umalizio wa mfumo wa mambo,” na “siku za mwisho.” (Danieli 12:1, 4; Mathayo 24:3-8; 2 Timotheo 3:1-5, 13) Katika karne yetu mambo kama vita vikatili, ujeuri usiozuilika, na kuharibiwa kwa jamii na mazingira, yameandaa utimizo wenye kutokeza wa unabii wa Biblia. Yote hayo ni sehemu ya ishara iliyotabiriwa na Yesu, akionyesha kwamba wanadamu wanakaribia kujionea siku ya Yehova ya mwisho yenye kutia hofu, na ya kukata maneno. Hiyo yafikia upeo kwenye pigano la Har–Magedoni, upeo wa “dhiki kubwa ya namna ambayo haijapata kutukia tangu mwanzo wa ulimwengu hadi sasa, la, wala haitatukia tena.”—Mathayo 24:21; Ufunuo 16:16.

6. (a) Yehova amekuwa akitendaje ili kuwaokoa wasikivu? (b) Ni wapi tupatapo shauri la Paulo juu ya jinsi ya kubaki hai?

⁶ Siku ya kuangamizwa kabisa yakaribia daima, Yehova anatenda kwa ajili ya wokovu wa wasikivu. “Wakati [huu] wa mwisho,” amekusanya wale wa mwisho wa Israeli la Mungu la kiroho na kugeuzia uangalifu wake watumishi wake wa kidunia, kuanzia mwaka wa 1930 na kuendelea, katika kukusanya “umati mkubwa, ambao hakuna mtu a[na]yeweza kuuhesabu, kutoka katika mataifa yote na makabila na vikundi vya watu na lugha.” Wakiwa kikundi, hao ‘watoka katika dhiki kubwa’ wakiwa hai. (Ufunuo 7:9, 14) Lakini kila mtu aweza kuhakikishaje kubaki hai kwake? Mtume Paulo ajibu swali hilo. Katika Waroma sura ya 10, atoa shauri zuri juu ya kubaki hai—shauri lililotumika katika siku yake na litumikalo tena katika siku yetu.

Sala kwa Ajili ya Wokovu

7. (a) Ni tumaini gani litambulishwalo kwenye Waroma 10:1, 2? (b) Kwa nini Yehova angeweza kufanya “habari njema” ihuburiwe zaidi sana sasa?

⁷ Paulo alipoandika kitabu cha Waroma, tayari Yehova alikuwa amekataa Israeli likiwa taifa. Bado, huyo mtume alithibitisha hivi: “Nia njema ya moyo wangu na dua yangu kwa Mungu kwa ajili yao, kwa kweli, ni kwa ajili ya wokovu wao.” Tumaini lake lilikuwa kwamba Wayahudi mmoja-mmoja wangeweza kupata ujuzi sahihi juu ya mapenzi ya Mungu, ukiongoza kwenye kuokolewa kwao. (Waroma 10:1, 2) Isitoshe, Yehova angewatakia wokovu wale wote walio katika ulimwengu mzima wa wanadamu ambao wadhihirisha imani, kama ionyeshwavyo kwenye Yohana 3:16: “Kwa maana Mungu aliupenda ulimwengu sana hivi kwamba akatoa Mwana mzaliwa-pekee wake, ili kila mtu anayedhihirisha imani katika yeye asipate kuangamizwa bali awe na uhai udumuo milele.” Dhabihu ya fidia ya Yesu iliufungulia njia wokovu huo mkubwa. Kama ilivyokuwa katika siku ya Noa na siku nyingine za hukumu zilizofuata, Yehova amefanya “habari njema” itangazwe, ikiashiria njia ya wokovu.—Marko 13:10, 19, 20.

8. Kufuatia kiolezo cha Paulo, leo Wakristo wa kweli huonyesha nani nia njema, na jinsi gani?

⁸ Akionyesha nia njema yake kwa Wayahudi na pia Wasio Wayahudi, Paulo alihubiri kwenye kila fursa. “Alikuwa akishawishi Wayahudi na Wagiriki.” Aliwaambia hivi wazee wa Efeso: “Sikuepuka kuwaambia nyinyi lolote kati ya mambo yaliyokuwa yenye kuleta faida wala kuwafundisha nyinyi hadharani na kutoka nyumba hadi nyumba. Lakini nilitoa ushahidi kikamili kwa Wayahudi na Wagiriki pia juu ya toba kuelekea Mungu na imani katika Bwana wetu Yesu.” (Matendo 18:4; 20:20, 21) Vivyo hivyo, Mashahidi wa Yehova leo hujitoa wenyewe katika kuhubiri, si kwa watu wa Jumuiya ya Wakristo tu bali kwa watu wa aina zote, hata kufikia “sehemu ya mbali zaidi sana ya dunia.”—Matendo 1:8; 18:5.

Kuungama “‘Neno’ la Imani”

9. (a) Waroma 10:8, 9 hutia moyo imani ya aina gani? (b) Twapaswa kuungama imani yetu lini na jinsi gani?

⁹ Imani yenye kuvumilia yahitajika kwa ajili ya wokovu. Akinukuu Kumbukumbu la Torati 30:14, Paulo alijulisha wazi hivi: “‘Lile neno liko karibu nawe, katika kinywa chako mwenyewe na katika moyo wako mwenyewe’; yaani, ‘neno’ la imani, ambalo sisi tunahubiri.” (Waroma 10:8) Tuhubiripo “‘neno’ [hilo] la imani,” hilo hupata kusisitizwa zaidi na zaidi mioyoni mwetu. Ilikuwa hivyo kwa habari ya Paulo, na maneno yake yafuatayo yaweza kulitia nguvu azimio letu la kuwa kama yeye katika kushiriki imani hiyo na wengine: “Ukitangaza hadharani lile ‘neno katika kinywa chako mwenyewe,’ kwamba Yesu ni Bwana, na kudhihirisha imani moyoni mwako kwamba Mungu alimfufua kutoka kwa wafu, utaokolewa.” (Waroma 10:9) Ungamo hilo halifanywi mbele ya wengine wakati wa ubatizo tu lakini lapaswa kuwa ungamo linaloendelea, ushuhuda wenye bidii wa hadharani juu ya pande tukufu zote za ile kweli. Kweli hiyo hukazia fikira jina lenye thamani la Bwana Mwenye Enzi Kuu Yehova; Mfalme wetu wa Kimesiya na Mfidi, Bwana Yesu Kristo; na ahadi za Ufalme zenye fahari.

10. Kupatana na Waroma 10:10, 11, twapaswa kulishughulikiaje “‘neno’ [hilo] la imani”?

¹⁰ Hakuna wokovu kwa wowote wasiokubali na kutumia “‘neno’ [hilo] la imani,” kama vile mtume aendeleavyo kutaarifu: “Kwa moyo mtu hudhihirisha imani kwa ajili ya uadilifu, lakini kwa kinywa mtu hufanya tangazo la hadharani kwa ajili ya wokovu. Kwa maana Andiko lasema: ‘Hakuna yeyote awekaye imani yake juu ya yeye atakayekatishwa tamaa.’” (Waroma 10:10, 11) Lazima tupate ujuzi sahihi wa “‘neno’ [hilo] la imani” na kuendelea kulisitawisha mioyoni mwetu ili tuchochewe kuwaambia wengine neno hilo. Yesu mwenyewe atukumbusha hivi: “Awaye yote yule mwenye kuaibika juu yangu na maneno yangu katika kizazi hiki chenye uzinzi na chenye dhambi, Mwana wa binadamu ataaibika juu yake pia awasilipo katika utukufu wa Baba yake pamoja na malaika watakatifu.”—Marko 8:38.

11. Habari njema yapaswa kuhubiriwa sana kadiri gani, na kwa nini?

¹¹ Kama ilivyotabiriwa na nabii Danieli, katika wakati huu wa mwisho, “walio na hekima” waonekana waking’aa “kama mwangaza wa anga,” huku ushahidi wa Ufalme ukipanuka kufikia miisho ya dunia. ‘Hao waongoza wengi kutenda uadilifu,’ na ujuzi wa kweli kwa kweli umekuwa mwingi, kwa kuwa Yehova anatoa nuru nyangavu zaidi na zaidi juu ya unabii mbalimbali unaohusu wakati huu wa mwisho. (Danieli 12:3, 4) Hapa kuna ujumbe wa wokovu ulio muhimu kwa ajili ya kubaki hai kwa wote wapendao kweli na uadilifu.

12. Andiko la Waroma 10:12 lahusianaje na utume wa malaika ufafanuliwao kwenye Ufunuo 14:6?

¹² Mtume Paulo aendelea kusema hivi: “Hakuna tofauti yoyote kati ya Myahudi na Mgiriki, kwa maana kuna Bwana yuleyule juu ya wote, aliye tajiri kwa wote wale wanaomwita.” (Waroma 10:12) Lazima “habari njema” ihubiriwe leo kwa kiwango cha tufeni kilicho kikubwa hata zaidi—kwa watu wote, kufikia miisho yenyewe ya dunia. Malaika wa Ufunuo 14:6 aendelea kuruka katika mbingu ya kati, akituaminisha “habari njema idumuyo milele ili aitangaze kuwa taarifa za mteremo kwa wale wakaao juu ya dunia, na kwa kila taifa na kabila na lugha na watu.” Hilo litawanufaishaje waitikiao?

Kuitia Jina la Yehova

13. (a) Andiko letu la mwaka wa 1998 ni jipi? (b) Kwa nini andiko hilo la mwaka lafaa zaidi leo?

¹³ Akinukuu Yoeli 2:32, Paulo ajulisha wazi hivi: “Kila mtu aitiaye jina la Yehova ataokolewa.” (Waroma 10:13) Yafaa kama nini kwamba maneno hayo yamechaguliwa kuwa andiko la mwaka wa 1998 la Mashahidi wa Yehova! Haijapata kamwe kuwa jambo la maana zaidi kama ilivyo sasa kusonga mbele kwa kumtumaini Yehova, kujulisha jina lake na makusudi yake matukufu yawakilishwayo na hilo jina! Kama ilivyokuwa katika karne ya kwanza, katika siku za mwisho za mfumo wa mambo mfisadi uliopo, sauti kuu yenye kuenea pote yasema hivi: “Pateni kuokolewa kutokana na kizazi hiki kilicho kombo.” (Matendo 2:40) Ni mwaliko wa kitarumbeta kwa wote wanaomhofu Mungu ulimwenguni pote wamwitie Yehova ili awaruhusu waokoke, wao na wale wasikilizao tangazo lao la hadharani la habari njema.—1 Timotheo 4:16.

14. Ni mwamba upi tupaswao kuitia kwa ajili ya wokovu?

¹⁴ Ni nini kitakachotokea siku kuu ya Yehova ilipukapo duniani? Wengi hawatamtegemea Yehova ili wapate wokovu. Wanadamu kwa ujumla “wa[ta]fuliza kuiambia milima na matungamo-miamba: ‘Tuangukieni mtufiche kutoka uso wa Yeye aketiye juu ya hicho kiti cha ufalme na kutoka hasira ya kisasi ya Mwana-Kondoo.’” (Ufunuo 6:15, 16) Tumaini lao litakuwa katika matengenezo na mashirika ya mfumo huu wa mambo yaliyo kama milima. Ingawa hivyo, jinsi ingekuwa afadhali ikiwa wangetumaini Mwamba mkubwa kuliko yote, Yehova Mungu! (Kumbukumbu la Torati 32:3, 4) Kuhusu yeye, Mfalme Daudi alisema hivi: “BWANA ni jabali langu, na boma langu, na mwokozi wangu.” Yehova ni “mwamba wa wokovu wetu.” (Zaburi 18:2; 95:1) Jina lake ni “ngome imara,” “ngome” pekee iliyo imara vya kutosha kutulinda wakati wa tatizo linalokuja. (Mithali 18:10) Kwa sababu hiyo, ni muhimu kwamba watu wengi iwezekanavyo kati ya wanadamu wapatao bilioni sita walio hai leo wafundishwe kuitia jina la Yehova katika uaminifu na unyoofu.

15. Andiko la Waroma 10:14 laonyesha nini juu ya imani?

¹⁵ Kwa kufaa, mtume Paulo aendelea kuuliza hivi: “Hata hivyo, watamwitiaje ambaye hawajaweka imani katika yeye?” (Waroma 10:14) Kuna halaiki za watu ambao bado waweza kusaidiwa kufanya “‘neno’ la imani” liwe lao wenyewe, ili wamwitie Yehova kwa ajili ya wokovu. Imani ni muhimu. Paulo ataarifu hivi katika barua nyingine: “Bila imani haiwezekani kumpendeza [Mungu] vema, kwa maana amkaribiaye Mungu lazima aamini kwamba yeye yuko na kwamba yeye huwa mthawabishaji wa wale wanaomtafuta kwa bidii.” (Waebrania 11:6) Ingawa hivyo, mamilioni mengi zaidi ya watu watakujaje kuweka imani katika Mungu? Katika barua kwa Waroma, Paulo aliuliza hivi: “Nao watawekaje imani katika yeye ambaye hawajasikia?” (Waroma 10:14) Je, Yehova huwaandalia njia wasikie? Kwa hakika yeye hufanya hivyo! Sikiliza maneno ya Paulo yanayoendelea: “Nao watasikiaje bila mtu fulani kuhubiri?”

16. Katika mpango wa Mungu, kwa nini wahubiri ni muhimu?

¹⁶ Kutokana na hoja ya Paulo ni wazi kwamba wahubiri wahitajiwa. Yesu alionyesha kwamba ingekuwa hivyo, hadi “umalizio wa mfumo wa mambo.” (Mathayo 24:14; 28:18-20) Kuhubiri ni sehemu muhimu ya mpango wa kimungu wa kuwasaidia watu waitie jina la Yehova ili wapate kuponyoka. Hata katika Jumuiya ya Wakristo walio wengi hawafanyi lolote ili kuliheshimu jina la Mungu lenye thamani. Wengine hawawezi kabisa kumtofautisha Yehova na wale washiriki wengine wawili katika fundisho lisiloelezeka la Utatu. Pia, wengi wako katika kikundi kizungumziwacho kwenye Zaburi 14:1 na 53:1 hivi: “Mpumbavu amesema moyoni, Hakuna Mungu.” Wahitaji kujua kwamba Yehova ndiye Mungu aliye hai, na lazima waelewe yote ambayo jina lake huwakilisha ikiwa wataponyoka dhiki kubwa inayokaribia.

‘Miguu Yenye Kupendeza’ ya Wahubiri

17. (a) Kwa nini yafaa Paulo anukuu unabii wa kurudishwa? (b) Ni nini kihusishwacho katika kuwa na ‘miguu yenye kupendeza’?

¹⁷ Mtume Paulo ana swali jingine zaidi lililo muhimu: “Nao watahubirije isipokuwa wawe wametumwa? Kama vile imeandikwa: ‘Jinsi ilivyo yenye kupendeza miguu ya wale watangazao habari njema ya mambo mema!’” (Waroma 10:15) Hapa Paulo anukuu andiko la Isaya 52:7, ambalo ni sehemu ya unabii wa kurudishwa ambao umetumika kuanzia mwaka wa 1919. Leo, kwa mara nyingine tena, Yehova atuma “aletaye habari njema, yeye aitangazaye amani, aletaye habari njema ya mambo mema, yeye autangazaye wokovu.” Kwa kutii, “walinzi” watiwa-mafuta wa Mungu na waandamani wao wafuliza kupaaza sauti zao kwa shangwe. (Isaya 52:7, 8) Leo huenda miguu ya watangazao wokovu ikachoka, hata ikapata vumbi, watembeapo kutoka nyumba hadi nyumba, lakini jinsi nyuso zao zing’aavyo kwa shangwe! Wanajua kwamba wamepewa utume na Yehova wa kutangaza habari njema ya amani na kuwafariji wanaoomboleza, wakiwasaidia waitie jina la Yehova wakitazamia wokovu.

18. Andiko la Waroma 10:16-18 lasema nini kuhusu tokeo la mwisho la kuvumishwa kwa habari njema?

¹⁸ Kama watu “[wa]weka imani katika jambo lililosikiwa” au wachagua kutolitii, maneno ya Paulo ni ya kweli: “Wao hawakukosa kusikia, sivyo? Kwani, kwa kweli, ‘mvumo wao ulitoka ukaenda kuingia katika dunia yote, na matamko yao hadi ncha za mwisho za dunia inayokaliwa.’” (Waroma 10:16-18) Kama vile “mbingu zauhubiri utukufu wa Mungu,” kama ionyeshwavyo katika kazi zake za uumbaji, ndivyo Mashahidi wake walio duniani walazimikavyo kutangaza “mwaka wa BWANA uliokubaliwa, na siku ya kisasi cha Mungu wetu . . . kuwafariji wote waliao.”—Zaburi 19:1-4; Isaya 61:2.

19. Tokeo litakuwa nini kwa wale ‘wanaoliitia jina la Yehova’ leo?

¹⁹ Siku ya Yehova iliyo kuu na yenye kutia hofu yakaribia daima. “Ole wake siku hii! Kwa maana siku ya BWANA inakaribia, nayo itakuja kama uangamivu utokao kwake aliye Mwenyezi.” (Yoeli 1:15; 2:31) Twasali kwamba halaiki zaidi za watu wataitikia kwa hima habari njema, wakiingia kwa makundi katika tengenezo la Yehova. (Isaya 60:8; Habakuki 2:3) Kumbuka kwamba siku nyingine za Yehova ziliwaletea waovu uangamizo—katika siku ya Noa, katika siku ya Loti, na katika siku za Israeli na Yuda lililoasi. Twakaribia kabisa dhiki kubwa kuliko zote, wakati ambapo tufani ya Yehova itafagilia mbali uovu kutoka katika uso wa dunia, ikifungulia njia paradiso ya amani ya milele. Je, wewe utakuwa mmoja wa wale ‘waitiao jina la Yehova’ kwa uaminifu? Ikiwa ndivyo, shangilia! Una ahadi ya Mungu mwenyewe kwamba utaokolewa.—Waroma 10:13.

Ungejibuje?

◻ Ni mambo gani mapya yaliyotangazwa kufuatia Pentekoste 33 W.K.?

◻ Wakristo wapaswa kutoleaje uangalifu “‘neno’ la imani”?

◻ Ni nini limaanishwalo na ‘kuliitia jina la Yehova’?

◻ Wajumbe wa Ufalme wana ‘miguu yenye kupendeza’ katika maana gani?

[Picha katika ukurasa wa 18]

Watu wa Mungu wanatangaza sifa zake katika Puerto Riko, Senegal, Peru, Papua New Guinea—ndiyo, tufeni pote