Kikiwa kielelezo, jaribu kutafakari juu ya maneno ya Paulo yapatikanayo kwenye 2 Wakorintho 7:1: “Kwa hiyo, kwa kuwa tuna ahadi hizi, wapendwa, acheni tujisafishe wenyewe kila unajisi wa mwili na wa roho, tukikamilisha utakatifu katika hofu ya Mungu.” Pata maana ya maneno hayo. Jiulize mwenyewe, ‘Ni “ahadi [gani] hizi” ambazo Paulo anarejezea?’ Kwa kusoma muktadha, utaona kwamba mistari inayotangulia yasema hivi: “‘“Tokeni miongoni mwao, na jitengeni wenyewe,” asema Yehova, “na komeni kugusa kitu kisicho safi”’; ‘“na hakika mimi nitawakaribisha ndani.”’ ‘“Na mimi nitakuwa baba kwenu, na nyinyi mtakuwa wana na mabinti kwangu,” asema Yehova Mweza-Yote.’”—2 Wakorintho 6:17, 18.

Amri ya Paulo kwamba ‘tujisafishe wenyewe kila unajisi’ sasa ina nguvu zilizoongezeka! Kikiwa kichocheo chenye nguvu cha kufanya hivyo, Mungu hutuahidi ‘kutukaribisha ndani,’ yaani, kutuweka chini ya ulinzi wake. ‘Je, mimi ningefurahia uhusiano wa karibu naye—kama ule wa mwana au binti na baba?’ huenda ukajiuliza mwenyewe. Je, si lenye kuvutia sana lile wazo la ‘kukaribishwa ndani’ au kupendwa na Mungu mwenye hekima na mwenye upendo? Ikiwa wazo hilo laonekana geni kwako, chunguza njia ambayo akina baba wenye upendo huwaonyesha watoto wao upendo na shauku. Sasa wazia kifungo kama hicho kikiwapo kati yako na Yehova! Kadiri uzidipo kutafakari juu ya hilo, ndivyo tamaa ya kuwa na uhusiano kama huo ikuavyo.

Lakini ona: Ukaribu na Mungu wawezekana tu ikiwa ‘unakoma kugusa kitu kisicho safi.’ Jiulize mwenyewe hivi: ‘Je, uraibu wa tumbaku si miongoni mwa ‘vitu visivyo safi’ ambavyo Mungu hushutumu? Je, kuitumia kungekuwa “unajisi wa mwili,” nikijiachilia mwenyewe kupatwa na namna zote za hatari za kiafya? Kwa kuwa Yehova ni Mungu safi, au “mtakatifu,” je, yeye angeweza kukubali hali yangu ya kujitia mwenyewe unajisi kimakusudi kwa njia hiyo?’ (1 Petro 1:15, 16) Ona kwamba Paulo pia huonya dhidi ya ‘kujitia roho unajisi,’ au mwelekeo wa akilini. Jiulize mwenyewe hivi: ‘Je, uraibu huu hutawala kufikiri kwangu? Je, nitafanya kila linalowezekana ili kutosheleza tamaa yangu, labda kwa kuhatarisha afya yangu, familia yangu, au hata msimamo wangu pamoja na Mungu? Nimeruhusu kwa kadiri gani uraibu wangu wa tumbaku uharibu maisha yangu?’ Huenda kukabili maswali hayo yenye kufadhaisha kukakupatia moyo mkuu wa kuacha!

Kabla ya kujifunza kweli, akina Lin walikuwa wamepanda michikichi ya tambuu 1,300 katika shamba lao. Ijapokuwa miti hiyo ingechukua muda wa miaka mitano kuleta faida, wakati ambapo ingetokeza mazao kikamili, akina Lin wangetarajia kujipatia dola 77,000 kwa mwaka. Wakati wa kuvuna mara ya kwanza ulipokaribia, akina Lin walilazimika kufanya uamuzi wa maana. Walikuwa wamejifunza kupitia funzo lao la Biblia kwamba lazima Wakristo wajisafishe “wenyewe kila unajisi wa mwili na wa roho” kwa kuepuka kutumia, au kuendeleza mazoea yasiyo safi kama vile kuvuta tumbaku, matumizi mabaya ya madawa, na kutafuna tambuu. (2 Wakorintho 7:1) Wangefanya nini?

Chini ya msongo wa dhamiri yenye kusumbua, Bw. Lin aliamua kuacha kujifunza. Wakati uleule, Bi. Lin aliuza tambuu kutoka michikichi yao iliyokuwa ya zamani zaidi na kupata faida ya zaidi ya dola 3,000. Hizo zilikuwa mwonjo tu wa kimbele wa faida ambayo wangepata ikiwa wangehifadhi miti yao. Hata hivyo, dhamiri ya Bw. Lin iliendelea kumchoma.

Alipambana na hilo suala hadi siku moja akawauliza Mashahidi wa huko kwao wakate hiyo michikichi ya tambuu kwa niaba yake. Hao Mashahidi walimweleza kwamba huo ulikuwa uamuzi wake kufanya; kwa hiyo, angelazimika ‘kuchukua mzigo wake mwenyewe’ na akate hiyo miti mwenyewe. (Wagalatia 6:4, 5) Walimtia moyo akumbuke ahadi iliyo kwenye 1 Wakorintho 10:13, isemayo hivi: “Hakuna kishawishi ambacho kimewapata nyinyi ila kilicho kawaida kwa watu. Lakini Mungu ni mwaminifu, naye hatawaacha nyinyi mshawishwe kupita vile mwezavyo kuhimili, bali pamoja na hicho kishawishi ataifanya pia njia ya kutokea kusudi mweze kuvumilia hilo.” Mashahidi pia walisababu naye, wakisema: “Ikiwa tutakata miti yako kwa niaba yako, huenda ukajuta na kutulaumu kwa sababu ya hiyo hasara.” Muda mfupi baadaye, Bi. Lin aliamshwa asubuhi moja na sauti ya msumeno wa mnyororo. Mumewe na watoto walikuwa wakikata hiyo michikichi ya tambuu!

Bw. Lin alitambua kwamba Yehova hutimiza ahadi Yake. Alipata kazi ambayo ilimwacha akiwa na dhamiri safi, ikimwezesha kuwa msifaji wa Yehova. Alibatizwa kwenye kusanyiko la mzunguko la Mashahidi wa Yehova katika Aprili 1996.