Sura ya Kumi na Moja
“Fulizeni Kutafuta Kwanza Ufalme”
1. (a) Kwa nini Yesu aliwahimiza wasikilizaji wake watafute kwanza Ufalme? (b) Ni swali gani tunalopaswa kujiuliza?
KATIKA hotuba aliyotoa huko Galilaya zaidi ya miaka 1,900 iliyopita, Yesu aliwahimiza hivi wasikilizaji wake: “Basi, fulizeni kutafuta kwanza ufalme na uadilifu [wa Mungu].” Kwa nini wafanye hivyo hima-hima? Kristo angetawazwa kuwa Mfalme karne nyingi baadaye, sivyo? Ndivyo, lakini Yehova angeutumia Ufalme wa Kimesiya kutetea enzi yake kuu na pia kutimiza kusudi lake kwa dunia. Kila mtu ambaye alithamini kabisa umuhimu wa mambo hayo angetanguliza Ufalme maishani mwake. Ikiwa jambo hilo lilikuwa muhimu katika karne ya kwanza, si zaidi sana leo kwa sababu Kristo ametawazwa kuwa Mfalme? Kwa hiyo swali ni: Je, maisha yangu yanaonyesha kwamba ninatafuta kwanza Ufalme wa Mungu?—Mathayo 6:33.
2. Watu wengi hutafuta vitu gani kwa bidii?
2 Leo, mamilioni ya watu kotekote ulimwenguni wanatafuta kwanza Ufalme. Wanaunga mkono utawala wa Ufalme kwa kujiweka wakfu kwa Yehova na kutanguliza mapenzi yake maishani mwao. Kwa upande mwingine, wanadamu wengi sana wanatafuta tu vitu vya ulimwengu. Watu hutafuta sana pesa, mali, na anasa. Au wanajitahidi sana kupandishwa cheo kazini. Maisha yao yanaonyesha kwamba wanashughulikia tu mapendezi yao wenyewe, vitu vya kimwili, na anasa. Wengine hawaamini kwamba kuna Mungu, na wale wanaoamini hawamtangulizi maishani.—Mathayo 6:31, 32.
3. (a) Yesu aliwatia moyo wanafunzi wake watafute hazina gani, na kwa nini? (b) Kwa nini hatupaswi kuhangaikia mno vitu vya kimwili?
3 Hata hivyo, Yesu aliwashauri wanafunzi wake hivi: “Komeni kujiwekea akiba ya hazina duniani,” kwa kuwa vitu hivyo havidumu milele. Akasema, “badala ya hivyo, jiwekeeni akiba ya hazina mbinguni” kwa kumtumikia Yehova. Yesu aliwahimiza wafuasi wake wawe na jicho “sahili,” yaani, wazingatie sana mapenzi ya Mungu na kuyafanya kwa nguvu zao zote. Aliwaambia hivi: “Hamwezi kutumikia kama watumwa Mungu na Utajiri.” Lakini vipi kuhusu mahitaji ya kimwili—chakula, mavazi, na makao? Yesu alishauri hivi: ‘Komeni kuhangaika.’ Aliwaambia watazame ndege—Mungu anawalisha. Yesu aliwatia moyo wafuasi wake wajifunze somo kutokana na maua—Mungu anayavisha. Je, watumishi wa Yehova wenye akili si bora kuliko vitu hivyo vyote? Yesu alisema, “basi, fulizeni kutafuta kwanza ufalme na uadilifu wake, na vitu vingine vyote hivi [vya lazima] mtaongezewa.” (Mathayo 6:19-34) Je, matendo yako yanaonyesha kwamba unaamini maneno hayo?
Usiruhusu Ukweli wa Ufalme Usongwe
4. Ikiwa mtu anakazia mno vitu vya kimwili, matokeo yanaweza kuwa nini?
4 Inafaa kuhangaikia mahitaji yako ya kimwili na ya familia yako. Lakini matokeo yanaweza kuwa mabaya sana mtu akihangaikia mno mali. Hata ikiwa mtu anaweza kudai kwamba anauamini Ufalme, kweli ya Ufalme itasongwa ikiwa anatanguliza vitu vingine moyoni mwake. (Mathayo 13:18-22) Kwa mfano, pindi fulani mtawala mmoja kijana aliye tajiri alimwuliza Yesu hivi: “Lazima nifanye nini ili kurithi uhai udumuo milele?” Aliishi maisha yenye maadili na aliwatendea wengine mema, lakini alipenda mno mali. Alishindwa kuacha vitu vya kimwili ili awe mfuasi wa Kristo. Kwa hiyo alipoteza nafasi ambayo ingemwezesha kuwa na Kristo katika Ufalme wa kimbingu. Yesu alisema hivi katika pindi hiyo: “Jinsi litakavyokuwa jambo gumu kwa wale wenye fedha kuingia katika ufalme wa Mungu!”—Marko 10:17-23.
5. (a) Paulo alimtia moyo Timotheo aridhike na nini, na kwa nini? (b) Shetani hutumiaje “kupenda fedha” kama mtego hatari?
5 Miaka mingi baadaye, mtume Paulo alimwandikia Timotheo, ambaye alikuwa Efeso, jiji tajiri la kibiashara. Paulo alimkumbusha hivi: “Hatukuleta kitu katika ulimwengu, wala hatuwezi kupeleka kitu chochote nje. Kwa hiyo, tukiwa na riziki na cha kujifunika, tutakuwa wenye kuridhika na vitu hivi.” Kufanya kazi ili kujipatia wewe na familia yako “riziki na cha kujifunika” ni jambo linalofaa. Lakini Paulo alionya hivi: “Wale waazimiao kuwa matajiri huanguka ndani ya kishawishi na mtego na tamaa nyingi zisizo za akili na zenye kuumiza, ambazo hutumbukiza watu ndani ya uharibifu na uangamizo.” Shetani ni mjanja. Huenda mwanzoni akamshawishi mtu kwa mambo madogo-madogo. Halafu anaweza kumshawishi kwa njia kubwa zaidi, huenda mtu akapata nafasi ya kupandishwa cheo au akapata kazi nzuri yenye mshahara mnono lakini inayomlazimu atumie wakati aliotenga kwa ajili ya mambo ya kiroho. Tusipokuwa waangalifu, “kupenda fedha” kunaweza kusonga mambo muhimu zaidi ya Ufalme. Paulo alisema: “Kwa kujitahidi kufikilia kupenda huku wengine wameongozwa wapotee njia kutoka kwenye imani na wamejichoma wenyewe kotekote kwa maumivu mengi.”—1 Timotheo 6:7-10.
6. (a) Ili tusinaswe na tamaa ya mali, ni lazima tufanye nini? (b) Tunaweza kuwa na uhakika gani licha ya hali mbaya ya kiuchumi ulimwenguni?
6 Paulo alimhimiza hivi ndugu yake Mkristo Timotheo, ambaye alimpenda sana: “Kimbia mambo hayo” na, “Pigana pigano bora la imani.” (1 Timotheo 6:11, 12) Ni lazima tujitahidi sana iwapo tunataka kuepuka kuvutiwa na maisha ya ulimwengu yanayokazia kutafuta mali. Lakini tukijitahidi kabisa kwa imani, Yehova hatatuacha kamwe. Yehova atahakikisha kwamba tuna mahitaji ya lazima licha ya kuongezeka kwa gharama na ukosefu wa kazi. Paulo aliandika: “Acheni namna yenu ya maisha iwe bila upendo wa fedha, huku nyinyi mkiridhika na vitu vilivyopo. Kwa maana yeye [Mungu] amesema: ‘Hakika sitakuacha kwa vyovyote wala kukuachilia mbali kwa vyovyote.’ Ili kwamba tupate kuwa wenye moyo mkuu na kusema: ‘Yehova ni msaidiaji wangu; hakika sitaogopa. Mwanadamu aweza kunifanya nini?’” (Waebrania 13:5, 6) Naye Mfalme Daudi aliandika hivi: “Nalikuwa kijana nami sasa ni mzee, lakini sijamwona mwenye haki ameachwa wala mzao wake akiomba chakula.”—Zaburi 37:25.
Wanafunzi wa Mapema Watuwekea Mfano
7. Yesu aliwapa wanafunzi wake maagizo gani kuhusu kazi ya kuhubiri, na kwa nini yalifaa?
7 Baada ya Yesu kuwazoeza ifaavyo mitume wake, aliwatuma kotekote Israeli ili wahubiri habari njema na kutangaza: “Ufalme wa mbingu umekaribia.” Ulikuwa ujumbe wenye kusisimua sana! Yesu Kristo, Mfalme wa Kimesiya, alikuwa kati yao. Yesu aliwatia moyo mitume wawe na imani kwamba Mungu angewatunza kwa sababu walikuwa wakimtumikia. Kwa hiyo akasema: “Msichukue kitu chochote kwa ajili ya safari, wala fimbo wala mfuko wa chakula, wala mkate wala sarafu ya fedha; wala msiwe na mavazi mawili ya ndani. Lakini popote pale mwingiapo katika nyumba, kaeni hapo na mwondoke kutoka hapo.” (Mathayo 10:5-10; Luka 9:1-6) Yehova angehakikisha kwamba Waisraeli wenzao waliwatimizia mahitaji yao, kwa sababu walikuwa na desturi ya kuwakaribisha wageni.
8. (a) Kwa nini Yesu alitoa maagizo mapya kuhusu kazi ya kuhubiri muda mfupi kabla hajafa? (b) Bado wafuasi wa Yesu walipaswa kutanguliza nini maishani mwao?
8 Baadaye, muda mfupi kabla hajafa, Yesu aliwaonya mitume wake kwamba hali zingebadilika wakati ujao. Kwa sababu ya kupingwa na serikali, huenda hawangekaribishwa kwa urahisi katika Israeli. Muda si muda, wangeanza pia kuhubiri ujumbe wa Ufalme kwa watu wasio Wayahudi. Kwa hiyo walipaswa kubeba “kibeti” na “mfuko wa chakula.” Lakini bado walipaswa kuendelea kutafuta kwanza Ufalme wa Yehova na uadilifu wake, huku wakiwa na hakika kwamba Mungu angebariki jitihada zao za kupata chakula na mavazi.—Luka 22:35-37.
9. Paulo alitangulizaje Ufalme maishani mwake huku akishughulikia mahitaji yake ya kimwili, naye alitoa mashauri gani kuhusu hilo?
9 Mtume Paulo aliweka mfano mzuri katika kufuata shauri la Yesu. Paulo alitanguliza huduma maishani mwake. (Matendo 20:24, 25) Alipokuwa akihubiri, alishughulikia mahitaji yake ya kimwili, hata alijiruzuku kwa kutengeneza mahema. Hakutarajia wengine wamruzuku. (Matendo 18:1-4; 1 Wathesalonike 2:9) Lakini alithamini sana alipoonyeshwa upendo na wengine kwa kukaribishwa na kupewa zawadi. (Matendo 16:15, 34; Wafilipi 4:15-17) Paulo aliwatia moyo Wakristo wasipuuze wajibu wao wa familia ili wahubiri, bali wawe na usawaziko wanapotimiza wajibu wao mbalimbali. Aliwashauri wafanye kazi, wapende familia zao, na kuwasaidia wengine. (Waefeso 4:28; 2 Wathesalonike 3:7-12) Aliwahimiza wamtumaini Mungu, wala si mali, na kuonyesha katika maisha yao kwamba walielewa vizuri mambo yaliyo muhimu. Na kama Yesu alivyofundisha, hilo lilimaanisha kuutafuta kwanza Ufalme wa Mungu na uadilifu wake.—Wafilipi 1:9-11.
Tanguliza Ufalme Maishani Mwako
10. Ni nini maana ya kuutafuta Ufalme kwanza?
10 Sisi hushiriki kwa kadiri gani katika kazi ya kuwahubiria wengine habari njema za Ufalme? Kwa sehemu, hilo lategemea hali zetu na uthamini wetu. Kumbuka kwamba Yesu hakusema, ‘Tafuta Ufalme wakati huna jambo jingine la kufanya.’ Akijua umuhimu wa Ufalme, yeye alionyesha mapenzi ya Baba yake kwa kusema: “Tafuteni ufalme wake kwa kuendelea.” (Luka 12:31) Ijapokuwa ni lazima wengi wetu tufanye kazi ili kushughulikia mahitaji yetu na ya familia zetu, tukiwa na imani, tutatanguliza maishani mwetu kazi ya Ufalme ambayo tumepewa na Mungu. Wakati huohuo, tutatimiza wajibu wetu wa kifamilia.—1 Timotheo 5:8.
11. (a) Yesu alitoa mfano gani kuonyesha kwamba watu wote hawawezi kuhubiri ujumbe wa Ufalme kwa kadiri ileile? (b) Ni mambo gani yanayoamua kadiri tunavyoshiriki katika kazi ya kuhubiri?
11 Baadhi yetu tunaweza kutumia muda mrefu zaidi katika kazi ya kuhubiri habari njema za Ufalme. Lakini katika mfano wake kuhusu aina mbalimbali za udongo, Yesu alisema kwamba wale ambao mioyo yao ni kama udongo ulio bora watazaa matunda. Matunda mengi kadiri gani? Hali za watu zinatofautiana. Inategemea umri, afya, na wajibu wa kifamilia. Lakini ikiwa kila mmoja anathamini kwelikweli habari njema za Ufalme, matokeo yanaweza kuwa mazuri sana.—Mathayo 13:23.
12. Vijana wanatiwa moyo wajiwekee hasa mradi gani wa kiroho?
12 Ni vizuri kuwa na miradi ambayo inaweza kutusaidia kushiriki zaidi katika huduma ya Ufalme. Vijana wanapaswa kutafakari sana mfano bora wa Timotheo, kijana Mkristo mwenye bidii. (Wafilipi 2:19-22) Hakuna mradi ulio bora kuliko mradi wa kushiriki katika huduma ya wakati wote baada ya kumaliza shule. Watu wazima watafaidika pia wakiwa na miradi mizuri ya kiroho.
13. (a) Ni nani anayeamua kadiri tunavyoweza kushiriki katika utumishi wa Ufalme? (b) Ikiwa kwa kweli tunautafuta Ufalme kwanza, tunathibitisha nini?
13 Badala ya kuwalaumu wale ambao tunadhani wanaweza kufanya mengi zaidi, twapaswa kuchochewa na imani tujitahidi kufanya maendeleo ili tuweze kumtumikia Mungu kikamili zaidi kulingana na hali zetu. (Waroma 14:10-12; Wagalatia 6:4, 5) Kama kisa cha Ayubu kinavyoonyesha, Shetani anadai kwamba tunapendezwa hasa na mali, anasa, na faida zetu wenyewe, na kwamba tunamtumikia Mungu kwa sababu ya ubinafsi. Lakini ikiwa kwa kweli tunautafuta kwanza Ufalme, basi tunathibitisha kwamba Ibilisi ni mwongo mkubwa. Tunaonyesha kwamba jambo muhimu maishani mwetu ni kumtumikia Mungu. Na hivyo tunathibitisha kwa maneno na kwa matendo kwamba tunampenda Yehova kwa moyo, tunaunga mkono kwa uaminifu enzi yake kuu, na tunawapenda wanadamu wenzetu.—Ayubu 1:9-11; 2:4, 5; Mithali 27:11.
14. (a) Kwa nini inafaa kuwa na ratiba ya huduma ya shambani? (b) Mashahidi wengi wanashiriki katika huduma ya shambani kwa kadiri gani?
14 Ratiba inaweza kutusaidia kutimiza mengi zaidi. Hata Yehova ‘ameweka wakati maalumu’ wa kutimiza kusudi lake. (Kutoka 9:5, Biblia Habari Njema; Marko 1:15) Ni vizuri kupanga kushiriki katika utumishi wa shambani siku fulani au siku kadhaa kila juma ikiwa inawezekana. Mamia ya maelfu ya Mashahidi wa Yehova ulimwenguni pote wameshiriki katika utumishi wa upainia msaidizi, yaani, wanahubiri habari njema kwa saa mbili hivi kwa siku. Mamia ya maelfu ya wengine ni mapainia wa kawaida, wao huhubiri ujumbe wa Ufalme kwa saa mbili na nusu hivi kila siku. Mapainia wa pekee na mishonari hutumia muda mwingi hata zaidi katika utumishi wa Ufalme. Tunaweza pia kutafuta nafasi za kuwaambia wengine tumaini la Ufalme pindi yoyote inayofaa ikiwa wako tayari kutusikiliza. (Yohana 4:7-15) Tunapaswa kuwa na hamu ya kushiriki kikamili zaidi katika kazi hii kulingana na hali zetu, kwa sababu Yesu alitabiri hivi: “Habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.”—Mathayo 24:14; Waefeso 5:15-17.
15. Kwa nini unahisi kwamba shauri la 1 Wakorintho 15:58 linafaa kabisa kuhusiana na huduma yetu?
15 Kwa umoja, Mashahidi wa Yehova wanashiriki utumishi huo wa pekee kotekote ulimwenguni katika kila nchi wanamoishi. Wanafuata shauri hili la Biblia: “Iweni imara, wasioondoleka, sikuzote mkiwa na mengi ya kufanya katika kazi ya Bwana, mkijua kwamba kazi yenu ya jasho si bure kuhusiana na Bwana.”—1 Wakorintho 15:58.
Mazungumzo ya Kurudia
• Yesu aliposema tufulize “kutafuta kwanza ufalme,” alikuwa akionyesha ni nini kinachopasa kuchukua nafasi ya pili maishani mwetu?
• Tunapaswa kuwa na maoni gani kuhusu kushughulikia mahitaji yetu na ya familia zetu? Mungu atatusaidiaje?
• Tunaweza kushiriki utumishi wa Ufalme katika njia zipi?
[Picha kaitka ukurasa wa 107]
Mashahidi wa Yehova wanahubiri habari njema katika kila nchi leo, kabla ya mwisho kuja