Ripoti ya Ulimwenguni Pote
ASIA NA MASHARIKI YA KATI
IDADI YA NCHI 47
IDADI YA WATU 3,930,343,401
IDADI YA WAHUBIRI 591,750
IDADI YA MAFUNZO YA BIBLIA 477,609
Japani
Miho alipokaribia wakati wake wa kujifungua, hakuweza kushiriki katika kazi ya kuhubiri kama kawaida. Kwa sababu alitaka kuendelea na upainia, alimwomba mwangalizi wa utumishi anwani za watu wanaoishi katika ghorofa zenye ulinzi mkali au nyumba nyingine ambamo wahubiri hawawezi kuingia. Alipewa anwani 100 hivi, naye akawapigia simu watu wengi iwezekanavyo. Mara ya kwanza hakuna hata mmoja aliyetaka kusikiliza, na alimaliza kuwapigia wote simu kwa dakika 30 tu. Baadaye, alipiga simu kwanza, kisha akaandika barua. Alipoandika barua alirejelea habari zozote zile alizopata alipopiga simu, kama vile mtoto aliyelia nyumbani kwa yule aliyempigia. Aliruhusu muda kupita ili barua ifike, kisha akapiga simu tena na kuzungumzia faida ya kufuata mwongozo wa Biblia aliokuwa ametaja katika barua. Mwanamke fulani alikataa kuzungumza naye kwa simu, hata hivyo Miho alimtumia barua. Miho alipopiga simu tena, binti yake tu ndiye aliyekuwa nyumbani. Msichana huyo aliye mwanafunzi wa shule alikuwa amesoma barua hiyo. Miho alimhubiria na kumwahidi angemwandikia mashauri ya Biblia yanayoweza kuwasaidia wanafunzi shuleni. Alipanga pia kumpigia simu tena. Mama yake alijibu simu wakati huo na kumwambia Miho kwamba binti yake amekuwa na matatizo shuleni na mashauri ambayo Miho alimpa yamemsaidia. Baada ya kupigiwa simu na kuandikiwa mara kadhaa, mama huyo na binti yake walianza kujifunza.
Nepal
Mwalimu mmoja anayeitwa Prem alikuwa ametafuta kweli kwa muda mrefu. Alisoma Biblia na kuhudhuria ibada katika kanisa lililo karibu na shule alikofundisha. Hata hivyo, hakujibiwa maswali yake na aliudhika kwa sababu kasisi aliomba sadaka saa zote. Prem alimwomba Mungu amwongoze kupata kanisa ambalo lingemsaidia kujua kweli. Prem alipohama na kuanza kufundisha katika shule nyingine, aliwaomba majirani wake wamwelekeze kwenye kanisa. Mvulana wa shule ambaye mama yake alikuwa amehudhuria mikutano michache katika Jumba la Ufalme aliishi katika jengo lilelile alimoishi Prem. Basi, mvulana huyo akampeleka kwenye Jumba la Ufalme. Hotuba ya watu wote ambayo Prem alisikiliza ilihusu Ufalme wa Mungu, habari ambayo Prem alitaka kuelewa hasa. Funzo lilianzishwa. Prem anafurahi sana kupata majibu ya maswali yake hatimaye, na sasa anahudhuria mikutano kwa ukawaida pamoja na familia yake. Wametuma barua ya kuomba majina yao yaondolewe katika orodha ya kanisa lao kwa sababu wanataka kuwa Mashahidi wa Yehova.
Taiwan
Wanafunzi wa shule fulani ya msingi waliombwa kuandika insha kwa ajili ya mashindano ya uandishi ya kila mwaka. Kichwa kilikuwa “Kitabu Ninachopenda Sana.” Weizhen mwenye miaka kumi aliandika kwamba anapenda Biblia kuliko kitabu kingine chochote. Aliandika kuhusu usahihi wa unabii wa Biblia na mwongozo bora unaopatikana katika Neno la Mungu. Pia, alieleza kwamba Biblia inajibu maswali ambayo mwalimu wake na wanafunzi wenzake walishindwa kujibu vizuri. Weizhen aliandika: “Mwalimu wetu alituambia kwamba mababu wetu walitokana na nyani. Nilijiuliza: ‘Ikiwa wanadamu walitokana na nyani, je, hatupaswi kuwaheshimu na kuwathamini nyani kwa moyo? Kwa nini, basi, tunawafunga katika bustani za wanyama? Je, hilo si kosa zito?’ Lakini Biblia inaonyesha wazi kwamba nyani si mababu wetu. Badala yake, mababu wetu wa kwanza waliumbwa na Mungu kwa mfano wake, kutoka mavumbini.” Alimalizia insha yake kwa maneno haya: “Siku za kale ilisemekana kwamba ‘Kusoma kitabu ni kama kufungua sanduku lenye hazina.’ Kwa maoni yangu, Biblia ina thamani kubwa kuliko dhahabu. Kwa hiyo, hicho ndicho kitabu ninachopenda kusoma kuliko kitabu kingine chochote.” Ingawa wanafunzi wa darasa la tano hadi nane walishiriki katika mashindano hayo, yeye alishinda ingawa yuko katika darasa la nne. Aliposimulia jambo hilo, alinukuu Waebrania 4:12, kisha akasema: “Sifa zote zimwendee Yehova Mungu.”
Mongolia
Bolortsetseg ni dada aliyebatizwa hivi majuzi nchini Mongolia. Alipopata habari kwamba mtu wa jamaa yake alikuwa amekufa, alimtumia mjane wake aliyehuzunika sana vitabu vyetu vyote vinavyopatikana katika Kimongolia. Yule mjane, Evsanaa, alivisoma vyote usiku mmoja. Kesho yake alimpigia Bolortsetseg simu na kumwomba aje kwake mara moja ili waongee. Bolortsetseg aliandamana na dada mwingine alipomtembelea Evsanaa, aliyekuwa ameandika maswali mengi. Alisikiliza kwa makini alipopata majibu ya Biblia. Baada ya mazungumzo marefu, dada hao walimweleza Evsanaa kwamba angefaidika hata zaidi kama wangezungumzia habari moja tu katika kila pindi. Walipendekeza ajifunze Biblia. Evsanaa alikubali mara moja kujifunza mara tatu kwa juma. Baada ya mwezi mmoja alikuwa ametupa sanamu zake zote na alikuwa akihudhuria mikutano. Miezi miwili baada ya kuwa mhubiri ambaye hajabatizwa, alikuwa tayari kuwa painia-msaidizi, lakini akaambiwa ni lazima abatizwe kwanza. Hakuvunjika moyo, bali aliazimia kutumia muda wa saa 50 kila mwezi katika kazi ya kuhubiri, na anangojea kusanyiko ili abatizwe.
Kazakhstan
Katika jiji la Rudny, painia fulani alikutana na mtu anayeitwa Nikolay ambaye alisema anataka kujifunza Biblia. Lakini, kulikuwa na tatizo. Nikolay na familia yake waliishi katika kijiji cha mbali, na alikuja Rudny mara chache tu kuwatembelea watu wa jamaa yake. Ndugu huyo alimuuliza Nikolay kama angetaka amtembelee nyumbani kwake, lakini Nikolay akamweleza kwamba kijiji chao kiko umbali wa kilomita 200 kutoka Rudny na ni vigumu kukifikia.
Hata hivyo, ndugu huyo aliandika maelekezo ya kufika kwake na kumwahidi wangekutana tena. Alipanga kutembelea kijiji hicho na akaalika ndugu mmoja na dada wawili waandamane naye. Majuma mawili baadaye walipanda gari-moshi. Walipofikia kituo cha gari-moshi kilicho karibu na kijiji cha Nikolay, waligundua kwamba walikuwa umbali wa kilomita 18 kutoka kijiji hicho, na hakukuwa na magari ya umma. Walilazimika kutembea. Hilo halikuwa jambo rahisi kwa sababu ilikuwa majira ya baridi kali na upepo ulikuwa ukivuma. Punde, tingatinga lililokuwa likisafirisha tangi la maziwa liliwapita na kusimama. Dereva aliwaambia angeweza kuwabeba ndani ya tangi! Wahubiri hao walifikiri mtu huyo anawafanyia mzaha, lakini tangi lilikuwa tupu na safi, kwa hiyo wakaingia ndani. Ijapokuwa tangi lilikuwa na baridi, angalau walikingwa na ule upepo mkali. Dereva aliwaambia angewashusha umbali wa kilomita saba kutoka kile kijiji walichokuwa wakielekea. Kutoka hapo ingewabidi kutembea kwa miguu. Iliwachukua muda wa saa mbili kutembea zile kilomita saba zilizobaki hadi kijiji cha Nikolay.
Nikolay na mkewe Valya walishangaa na kufurahi walipowaona ndugu na dada hao mlangoni. Waliwasaidia wageni hao kupata joto na wakawapa chakula. Kisha wakazungumzia Biblia. Baada ya majuma mawili, ndugu hao kutoka Rudny walirudi kijijini humo. Yule painia anasema hivi: “Nikolay alikuja kutuchukua kwenye kituo cha gari-moshi. Wanakijiji wengi walitaka kuongea na ‘wale watu waliosafiri katika tangi la maziwa.’ Kwa hiyo, Nikolay alipanga ratiba ili wote waliopendezwa wapate nafasi ya kuzungumza nasi. Wote walioorodheshwa walifuata mpango huo na wakakubali kujifunza Biblia.” Hatimaye, karibu wote walioanza kujifunza Biblia katika kijiji hicho walifanya maendeleo ya kiroho. Miaka miwili baadaye, Nikolay na Valya walibatizwa. Sasa wana wao wawili ni wahubiri ambao hawajabatizwa, na hivi majuzi Nikolay aliwekwa kuwa mzee katika kikundi hicho cha mbali.
Georgia
Mapainia wamekuwa wakihubiri katika maeneo ya mbali ya milimani nchini Georgia. Dada wawili mapainia walitembea kwa miguu kilomita nane hadi kwenye kijiji kilicho mahali ambapo barabara ya milimani inaishia, na wakaanza kuhubiri nyumba kwa nyumba. Punde mzee mmoja wa kijiji alimsimamisha Ketevan, mmoja wa dada hao, na kumuuliza kwa ukali kwa nini anahubiri hali yeye si mfuasi wa Kanisa Othodoksi. Alijaribu kumweleza lakini akakataa kusikiliza. Kisha akamwangusha chini na kumpiga kwa bakora yake. Watu wengi waliona kipigo hicho, na habari hiyo ilienea kijijini. Baadaye Ketevan alirudi kuhubiri kijijini humo. Mwanamke aliyepinga hapo awali, alimwona na kusema kwa mshangao: “Umerudi tena baada ya kipigo kile! Huo ni ujasiri ulioje! Tafadhali, njoo nyumbani kwangu unieleze zaidi.” Baada ya kusikiliza, alimwambia Ketevan kwamba amekaribishwa kumtembelea wakati wowote na kumhubiria.
Afrika
IDADI YA NCHI 57
IDADI YA WATU 802,232,357
IDADI YA WAHUBIRI 1,043,396
IDADI YA MAFUNZO YA BIBLIA 1,903,665
Rwanda
Wakati fulani uliopita, wapita-njia waliokota barabarani kitabu Unaweza Kuishi Milele Katika Paradiso Duniani. Walikipeleka kwa mzee wa kanisa lao la Kiprotestanti. Mzee huyo alikisoma kitabu hicho na kikampendeza sana. Aliwatafuta Mashahidi na akaanza kujifunza Biblia pamoja nao. Ujuzi wake kuhusu kweli ya Biblia uliongezeka, kwa hiyo akaacha kanisa lake na kubatizwa. Wakati huohuo, aliwahubiria kwa bidii waumini wengine katika kanisa lake la zamani kuhusu kweli. Waumini 25 waliacha kanisa hilo na kuwa Mashahidi wa Yehova. Mtu aliyechukua mahali pake kama mzee wa kanisa alianza kujifunza Biblia na Mashahidi, naye pia akaacha kanisa hilo. Sasa anahudhuria mikutano ya Kikristo na anataka kuwa mhubiri. Mke wake alibatizwa kwenye kusanyiko la pekee lililofanywa hivi majuzi. Ajabu ni kwamba watu hao wote wamejifunza kweli kwa sababu ya kitabu kilichookotwa barabarani!
Côte d’Ivoire
Alipokuwa njiani kwenda katika utumishi wa shambani katika mji mkuu Abidjan, kijana mmoja Shahidi aitwaye Berenger alimwona mwanamke aliyekuwa akiuza mikate. Bila kujua, mwanamke huyo aliangusha faranga 5,000 (dola 10 za Marekani). Berenger alipoziokota ili ampelekee, mwanamke mwingine alitokea upande ule mwingine na kusema kwa sauti kubwa, “Nipe pesa hizo; ni zangu!” Lakini Berenger alipouliza ni ngapi, mwanamke huyo akakasirika na kwenda zake. Kisha Berenger akakimbia amfikie yule mwanamke aliyeangusha pesa hizo. Berenger alishangaa mwanamke huyo aliposema si yeye aliyeangusha pesa hizo na kuongeza kwamba hiyo ni mbinu ya kumwibia. Hata hivyo, alipoona jinsi Berenger alivyomsihi kwa unyoofu, mwanamke huyo alichunguza na kugundua kuwa amepoteza faranga 5,000, bei ya mikate 50.
Berenger alisema: “Nilimpa pesa hizo na kumweleza kwamba nilifanya hivyo kwa sababu Mungu wangu, Yehova, huwafundisha watumishi wake wawe wanyoofu. Alinishukuru na kusema: ‘Kama kila mtu angejiendesha kama Mashahidi wa Yehova, watu wote wangekuwa marafiki. Hii ni mara yangu ya kwanza kuona kijana akitenda jinsi ulivyotenda.’ Nilimpa trakti, naye akaahidi kwamba kuanzia wakati huo, atawasikiliza Mashahidi wa Yehova. Siku hiyo nilikuwa na faranga 50 (dola 0.1 za Marekani) mfukoni, lakini nilifurahi nilifanya lililo sawa.”
Jamhuri ya Kidemokrasia ya Kongo
Eugene ambaye ni mzee wa kutaniko, ni mtunzaji na mlinzi katika duka moja la kununua na kuuza almasi. Anasema: “Jioni moja, mtu alikuja kwenye duka hilo akitaka kuuza almasi zenye thamani ya dola 22,000 za Marekani. Lakini, kifurushi cha almasi hizo kilikuwa kimeanguka kutoka mfukoni mwake. Kwa wasiwasi, alitafuta kila mahali lakini hakukipata. Kesho yake, mkubwa wake na mfanyakazi mwingine walikitafuta kila mahali barabarani, lakini wapi! Baadaye nilianza kufagia nje ya duka letu, na amini usiamini, nikapata kile kifurushi cha almasi! Nilikiokota na kumkimbizia mkubwa wangu, ambaye ni Mbelgiji. Hakuamini macho yake. Nilimwambia mimi ni Shahidi wa Yehova na ninamheshimu na kumwogopa Mungu wangu. Mwenye almasi hizo alivutiwa sana na unyoofu wangu na kusema, ‘Siamini jambo hili!’
“Mmoja wa wafanyakazi wenzangu aliniambia, ‘Umeokoa jina letu, Eugene!’
“‘Asante! Lakini Yehova ndiye anayestahili kusifiwa, kwa sababu yeye ndiye aliyenifunza kuwa mnyoofu,’ nikamjibu.”
Angola
Alipokuwa akitembelea eneo fulani la mashambani, João ambaye ni mmishonari na mwangalizi wa mzunguko alitaka kuwaonyesha ndugu na watu wenye kupendezwa wa eneo hilo DVD kumhusu Noa (Noah Walked With God—David Trusted in God). Ndugu huyo alibeba jenereta ndogo, vipaza sauti viwili, petroli, na kompyuta ndogo. Katika kijiji cha kwanza, alikaa katika nyumba ndogo ya matope. Alipanga kuonyesha DVD hiyo baadaye jioni. Alisema: “Nilishangaa kuwaona watu 38 waliofika wakiwa wamebeba viti, benchi, mawe, mikebe ya maziwa, na vitu vingine vya kukalia. Hakukuwa na nafasi ya kutosha katika nyumba hiyo hata kwa nusu ya watu waliofika, kwa hiyo tukalazimika kutazama DVD hiyo tukiwa nje. Huku nyota zikimeremeta angani, niliweka kompyuta yangu juu ya matofali, na wengi waliohudhuria walikalia vitambaa vyenye kuvutia walivyotandika chini.” Habari zilienea haraka katika eneo hilo, na wengi walifika katika vijiji ambavyo João alitembelea. “Nilipomaliza kuonyesha DVD hiyo, hakuna aliyetaka kuondoka,” João anasema. “Wengi walisema kwamba hiyo ndiyo jioni ambayo wamefurahia zaidi katika maisha yao, nao wakamshukuru Yehova kwa maandalizi hayo ya kiroho.” Katika majuma matatu ambayo João alitembelea akina ndugu huko mashambani, watu 1,568 walitazama DVD hiyo!
Ghana
Vida anayeuza vyakula huko Accra, alisita kuleta mboga kwenye ofisi ya tawi ya Ghana. Kwa nini? Kasisi wake alimwambia Mashahidi wanawachukia watu wasio Mashahidi. Kwa hiyo, Vida alipoleta mboga kwa mara ya kwanza, alishangaa kwa kuwa ndugu wanaofanya kazi jikoni walimkaribisha kwa uchangamfu na kumshukuru kwa upole. Katika majuma yaliyofuata, alifahamiana na wafanyakazi wa kujitolea wa ofisi hiyo. Alitambua kwamba kasisi wake alikuwa amemdanganya kwa kuwa kila mmoja wa wafanyakazi hao alikuwa mwenye fadhili.
Vida alitaka kujua mengi zaidi, hivyo akaomba afundishwe Biblia, ingawa hakujua kusoma. Katika muda wa miezi sita, Vida alijua kusoma Biblia yake mwenyewe, naye alibatizwa kwenye kusanyiko la wilaya hivi majuzi. Licha ya kudhihakiwa na watu wa familia na marafiki wake wa zamani, Vida amemsaidia binamu yake kuwa mhubiri ambaye hajabatizwa.
Sudan
Alipokuwa akihubiri nyumba kwa nyumba, dada mmoja alikaribishwa na wasichana wawili. Dada huyo alishangaa kwamba wasichana hao hawakumruhusu awasaidie kutafuta maandiko katika Biblia yao. Kumbe kasisi wa eneo hilo alikuwa amewaonya wasichana hao kuwa Shahidi wa Yehova akigusa Biblia yao, maandiko yatabadilika mara moja yapatane na mafundisho ya Mashahidi. Wasichana hao hata walikataa kumsalimu dada huyo kwa mkono. Lakini, waliposoma maandiko katika Biblia yao, yalipatana na yale ambayo dada huyo alisema. Walitambua kwamba yule kasisi alikuwa amewadanganya, nao wakaamua kujifunza Biblia. Jambo hilo lilimshtua kasisi huyo, hivyo akaahidi kuwapa pesa za kununulia chakula ikiwa wangeacha kujifunza Biblia. Walisemaje? “Hatutaki kujaza matumbo yetu chakula. Heri tujazwe neno la Mungu.” Sasa wasichana hao wanahudhuria mikutano ya kutaniko.
Ethiopia
Licha ya mke wake kuwa Shahidi kwa miaka kumi hivi, Awoke hakupendezwa sana na kweli. Hata hivyo, aliposafiri kwenda katika sehemu nyingine ya nchi hiyo kwa mafunzo fulani ya miezi miwili, aliamua kuwatafuta Mashahidi. Alipofika, alielekezwa kwenye ofisi fulani ambapo mmoja wa dada zetu anafanya kazi. Dada huyo alikuwa amesali ndugu fulani aje kusaidia kutaniko lao. Alipoambiwa kuna mtu anayewatafuta Mashahidi wa Yehova, alikumbuka sala zake. Alipomwona Awoke, aliyekuwa amejipamba na kuvalia vizuri, alifikiri sala zake zimejibiwa, na kwa haraka akaenda kumsalimu akiwa mwenye furaha sana. Kwa sababu dada huyo alifurahi sana, Awoke alishindwa kumwambia kwamba yeye si ndugu. Pia hakutaka kumvunja moyo wakati alipomjulisha kwa akina ndugu. Alipokuwa huko, Awoke alihudhuria mikutano yote. Alipomaliza mafunzo yake na wakati wa kuondoka ukafika, dada fulani walimwalika kwa chakula cha mchana, nao wakamwomba atoe sala. Alikumbuka kwamba mke wake anaposhukuru kwa chakula nyumbani, akiwa amefunika kichwa, anafanya hivyo kupitia jina la Yesu. Kwa hiyo, alisali na wakala. Awoke aliguswa moyo na fadhili alizoonyeshwa alipokuwa huko, naye akaamua kuwa ndugu kikweli. Aliporudi nyumbani, alianza kujifunza, na akabatizwa kwenye kusanyiko lililofanywa hivi majuzi. Mke wake amefurahi, naye Awoke anangoja siku atakapowaeleza ndugu katika kutaniko alilotembelea ukweli wa mambo.
Ulaya
IDADI YA NCHI 46
IDADI YA WATU 730,776,667
IDADI YA WAHUBIRI 1,506,019
IDADI YA MAFUNZO YA BIBLIA 744,319
Ukrainia
Fundi mmoja wa umeme alienda kwenye Jumba la Ufalme kutengeneza mita ya umeme. Fundi huyo alikuwa mlevi mwenye sifa mbaya kijijini mwake. Alipokuwa akitengeneza mita hiyo, aliona andiko la mwaka: “Mkaribieni Mungu, naye atawakaribia ninyi.” (Yak. 4:8) Alitua kidogo na kumuuliza ndugu mmoja hivi: “Je, kweli inawezekana kumkaribia Mungu? Je, watenda-dhambi wanaweza kumkaribia Mungu?” Ndugu huyo alitumia Biblia kumjibu na akamwalika kwenye mkutano. Jumapili, fundi huyo aliamua kwenda mkutanoni lakini katika kijiji kingine, kwa kuwa hakutaka majirani wake wamwone akienda kwenye Jumba la Ufalme. Hata hivyo, katika kutaniko alikoenda, alikuta kwamba mwenye kutoa hotuba ni mzee wa kutaniko kijijini mwao. Alipomwona alijaribu kujificha. Lakini mzee huyo akamtambua na kumkaribisha kwa uchangamfu. Fundi huyo aliamua kuhudhuria mikutano kijijini mwao. Alianza kujifunza Biblia, na akabatizwa baada ya mwaka mmoja.
Wakati huo, mke wa fundi huyo alikuwa akifanya kazi katika nchi ya kigeni na hakuamini kwamba mume wake ameacha ulevi na kuwa Shahidi wa Yehova. Alirudi nyumbani kujionea mwenyewe. Alifurahi mume wake alikuwa ameacha ulevi na alikuwa akiwatunza watoto wao, lakini hakufurahi kwamba amekuwa Shahidi wa Yehova. Hata hivyo, siku moja mume wake alimwomba waende kwenye Jumba la Ufalme pamoja kama familia, naye akakubali. Alianza kujifunza Biblia, na baada ya muda mfupi, yeye pamoja na binti zao watatu wakabatizwa. Hivyo, mstari mmoja tu wa Biblia uliwasaidia watu watano kumkaribia Mungu.
Ugiriki
Ndugu mmoja ambaye hupita njia ileile kila siku akienda kazini, alimwona mwanamke aliyetembelea kikanisa fulani kwa ukawaida. Vikanisa hivyo viko kando-kando ya barabara nchini Ugiriki kuonyesha mahali ambapo mtu alikufa katika msiba. Ili kumsaidia mwanamke huyo, ndugu huyo aliandika barua fupi na kuonyesha Maandiko yanayozungumza kuhusu hali ya wafu na tumaini la ufufuo. Baada ya kuandika jina na namba yake ya simu, ndugu huyo aliweka barua hiyo ndani ya kikanisa hicho. Siku iliyofuata, mwanamke huyo alimpigia simu na kusema anapendezwa sana na habari njema. Sasa mwanamke huyo anatembelewa kwa ukawaida.
Norway
Baada ya utumishi wa shambani, dada sita walienda kwenye mkahawa fulani. Walizungumzia hotuba nzuri waliyokuwa wameisikia siku mbili mapema kuhusu tumaini la ufufuo kwenye Jumba la Ufalme. Baada ya muda, mwanamke fulani aliyekuwa akiwasikiliza akaja mezani mwao. Aliomba kuketi nao ili asikilize jambo walilokuwa wakizungumzia. Aliwaambia alifiwa na wazazi wake hivi majuzi. Mazungumzo yaliyofuata yalikuwa yenye kujenga. Dada hao walimwomba mwanamke huyo awape namba yake ya simu, na baadaye mmoja wao akamtembelea na kuanzisha funzo la Biblia.
Lithuania
Olga ambaye ni mweneza-Injili wa wakati wote alianza kujifunza Biblia na mwanamke Mrusi kwenye mlango wake. Katika mojawapo ya mazungumzo yao ya kwanza, mwanamke huyo alimwomba kijana Olga amweleze maana ya “siku za mwisho.” (2 Tim. 3:1) Olga aliahidi kufanya hivyo atakapomtembelea tena. Kwa muda wa mwezi mmoja hivi, Olga hakumpata mwanamke huyo nyumbani, ingawa alienda huko mara nyingi. Na ijapokuwa hakuna mtu aliyefungua mlango, Olga alitambua kwamba mtu fulani alikuwa akimwangalia kupitia kitundu cha kuchungulia. Olga anasema: “Sikuamini mwanamke huyo hakutaka tuendelee na mazungumzo ya Biblia. Labda ni mtu mwingine aliyekuwa akinichungulia. Kwa hiyo, nikaamua kumwandikia barua na kumweleza kuhusu jambo lililomhangaisha. Siku tatu baadaye, nilienda kwake tena, kuona kama yuko nyumbani. Nilifurahi kama nini alipofungua mlango! Aliguswa moyo sana na barua yangu na jinsi nilivyomjali.”
Mwanamke huyo alimshukuru Olga na kusema: “Nilisoma barua yako mara kadhaa na nilielewa kila kitu.” Kwa hiyo, funzo ambalo mwanzoni lilifanyiwa mlangoni, likawa funzo la Biblia la kawaida. Wanajifunza kitabu Biblia Inafundisha. Na sasa, kila mara Olga anapoenda kujifunza naye, mwanamke huyo mwenye kupendezwa humkaribisha kwa furaha.
Uswisi
Huko Geneva, ambalo ni jiji lenye watu kutoka nchi mbalimbali, dada mmoja aitwaye Marie alizungumza na mwanamke kutoka Mashariki ya Kati. Kwa kuwa Marie anajifunza Kiarabu, alitumia lugha hiyo kuzungumza na mwanamke huyo. Marie alisema anaamini kuna Mungu mmoja tu wa kweli. Aliposikia hilo, mwanamke huyo alimkumbatia na kumbusu na kusema kuwa ana huzuni na alikuwa akisali wakati Marie alipozungumza naye. Mwanamke huyo alisema atarudi nchini kwao siku iliyofuata. Marie alifungua Biblia, akasoma 1 Petro 3:7, na kumweleza kwamba Mungu anawajali sana wanawake. Kisha akamwambia Yehova anataka kila mume amheshimu mke wake. Mwanamke huyo aliuliza hivi kwa mshangao: “Je, wewe ni malaika au binadamu? Nasikitika mume wangu hafanyi vile Mungu anavyosema katika andiko hili. Mimi humwomba Mungu kwa ukawaida anisaidie. Nawe umefungua kitabu hiki na kunisomea andiko hili.” Mwanamke huyo alimwomba Marie amwandikie andiko hilo kwenye karatasi. Alisema ataibeba ili kuwaonyesha watu wa familia yake, na kuwaeleza kuhusu tukio hilo. Marie alisikitika kwamba mwanamke huyo alihitaji kurudi kwao, lakini wakakubaliana kuwa watawasiliana.
Uholanzi
Jijini Rotterdam kuna mojawapo ya bandari kubwa zaidi ulimwenguni. Mizigo inayofika kwa meli hupakiwa kwenye malori na kupelekwa katika nchi za Muungano wa Ulaya na nchi nyingine za mbali. Hivyo, malori mengi sana hupitia nchi hii. Katika barabara moja kuu ya kwenda nchi jirani ya Ujerumani, kuna kituo kimoja kikubwa cha malori. Kwa wastani malori 1,500 hupitia kituo hicho katika muda wa saa moja. Kwa kuwa ni lazima madereva wengi wapumzike kidogo hapo, ndugu zetu hutumia nafasi hiyo kuwahubiria. Wao huzungumza na madereva kutoka Ulaya, Mashariki ya Kati, na karibu nchi zote zilizokuwa sehemu ya muungano wa Sovieti zamani. Madereva hao hufurahia sana magazeti yetu. Mwaka uliopita, ndugu walihubiri mara 82 kwenye kituo hicho cha malori na kuwaachia madereva zaidi ya magazeti 10,000 katika lugha 35.
Amerika
IDADI YA NCHI 56
IDADI YA WATU 883,782,291
IDADI YA WAHUBIRI 3,256,287
IDADI YA MAFUNZO YA BIBLIA 3,111,358
Peru
Jorge ni painia wa kawaida naye hufanya kazi ya uchoraji. Alimhubiria mchoraji mwingine aitwaye Hubert, aliyekubali kujifunza Biblia. Licha ya upinzani mkali kutoka kwa familia, marafiki, na majirani, Hubert alimaliza kujifunza kitabu Ujuzi Uongozao Kwenye Uhai Udumuo Milele katika muda wa miezi sita tu. Katika sala zake, alimwomba Yehova asaidie familia yao kujifunza kweli. Alishangaa na kufurahi wakati kaka yake Jhon alipoanza kujifunza na kuhudhuria mikutano. Juma lililofuata, Cesar, shemeji yake alianza kujifunza pia. Na ingawa mke wake alimpinga mwanzoni, yeye pia alianza kujifunza. Baadaye, Reynaldo aliyesomea shule moja na Hubert, alitaka kujifunza. Kwa sababu ya upinzani mkali alilazimika kujifunzia nyumbani kwa Hubert. Muda mfupi baadaye, Milton, ndugu mdogo wa Hubert, alianza kujifunza. Baada ya kujifunza mara moja tu, Milton aliwahubiria wanafunzi wawili, Darwin na Christian, ambao alisoma nao shuleni na wakaanza kujifunza na kuhudhuria mikutano. Hubert ana kaka wengine wawili, Ronald na Martin. Ronald alihudhuria funzo la Hubert akiwa na orodha ndefu ya maswali ya Biblia. Jorge alimweleza kuwa atajibiwa maswali hayo yote akijifunza Biblia, naye akakubali. Martin naye alianza kujifunza na binti zake wawili wakajiunga naye. Hubert na Jhon walibatizwa kwenye Kusanyiko la Wilaya la “Ukombozi Unakaribia!” Habari za karibuni zinaonyesha kwamba watu 18 wamejifunza kumhusu Yehova kwa sababu ya ule ushahidi wa kwanza uliotolewa na Jorge.
Brazili
Paulo anaishi kwenye shamba la mifugo kaskazini mwa nchi hiyo. Mwanamke aliyeishi naye, na ambaye alimwoa baadaye, alikuwa akijifunza Biblia, kwa hiyo akaamua kujifunza ili tu ampendeze. Wakati huo, wachungaji wa ng’ombe kwenye shamba hilo walifukuza na hatimaye wakamuua chui aliyekuwa akiwaua ng’ombe. Wachungaji hao walitaka kunufaika kutokana na tukio hilo. Hivyo wakampigia simu mwenye shamba hilo na kumwomba pesa za kumlipa mwindaji stadi wa chui. Paulo alikubaliana na njama hiyo, na hata akamwambia mkubwa wake kwamba wachungaji hao walisema kweli. Hata hivyo, dhamiri yake ilimsumbua kwa sababu ya mambo aliyokuwa amejifunza katika Biblia. Alimpigia mkubwa wake simu na kumwambia ukweli, ijapokuwa alijua angeweza kupoteza kazi yake na wafanyakazi wenzake wangekasirika. Baadaye, Paulo alipandishwa cheo akawa msimamizi wa shamba hilo kwa sababu ya unyoofu wake. Sasa Paulo na mke wake ni wahubiri wa habari njema waliobatizwa. Inafurahisha kama nini kumwona mwanamume huyo mnyoofu akiendesha tingatinga lake kuja kwenye Jumba la Ufalme, akiwa amembeba mke wake na watoto wao wawili!
Mexico
María ni painia wa kawaida mwenye bidii. Alipokuwa kwenye mkutano wa wazazi na walimu katika shule ambako binti zake wawili wanasomea, alitambua kwamba walimu walihangaika kuhusu mtazamo wa uasi na ukosefu wa maadili wa baadhi ya wanafunzi. Mwalimu mmoja alisema: “Wazazi, ikiwa hamtaki mtoto mwingine awe mhalifu wa mitaani, tafadhali tusaidieni. Zungumzeni na watoto wenu. Wanunulieni kitabu fulani. Wasaidieni kwa sababu wana maswali mengi. Msiruhusu wapate majibu mitaani.” Baadaye, María alimuuliza mkuu wa shule kuhusu mwenendo wa binti zake, naye akasema wana mwenendo mzuri. Kisha María akamweleza kwamba kitabu Maswali Ambayo Vijana Huuliza—Majibu Yafanyayo Kazi kinaweza kuwasaidia vijana. Mkuu huyo alimsikiliza kwa makini, na akamwomba amletee kitabu hicho. María alipomletea siku iliyofuata, mkuu huyo alikikagua kwa uthamini kisha akamwomba amletee mtaalamu wa mambo ya akili wa shule hiyo nakala moja. Baada ya kukisoma, mtaalamu huyo alipendekeza kitabu hicho kitumiwe katika masomo ya shule. Mkuu huyo aliomba nakala moja kwa kila mmoja wa walimu wake 12, na nakala 50 kwa ajili ya maktaba ya shule.
Uruguai
Siku moja kabla ya mapambazuko, mtu mmoja alikuwa safarini kwenda nyumbani nchini Uruguai kutoka nchi jirani ya Argentina. Alipokuwa anataka kuingia katika feri inayovuka Río de la Plata, msichana mdogo alimkaribia na kumpa gazeti la Amkeni! la Januari 2006. Gazeti hilo lina kichwa, “Tutazamie Nini Wakati Ujao?” Msichana huyo alikuwa mwenye urafiki, na mtu huyo alichukua gazeti hilo kwa furaha. Walipofika Montevideo, wasafiri walipelekwa kwenye kituo cha basi. Mtu huyo alishangaa Shahidi mwingine alipomkaribia huku akitembea kwa mkongojo. Shahidi huyo mzee alimpa gazeti lilelile, naye akalichukua. Punde alipofika nyumbani jioni, alisikia mlango ukibishwa. Ulibishwa na mmoja wa Mashahidi wa Yehova. Baada ya kusikiliza ujumbe mfupi, mtu huyo alichukua gazeti lilelile kwa mara ya tatu siku hiyo! Shahidi huyo alipomweleza anaweza kutoa mchango kwa ajili ya kazi ya ulimwenguni pote, mtu huyo alisema anajua jambo hilo naye akaingia ndani ya nyumba kuchukua pesa. Alirudi na yale magazeti mawili aliyokuwa amechukua mapema siku hiyo. Akirejelea kile kichwa “Tutazamie Nini Wakati Ujao?” mtu huyo alitabasamu na kusema: “Jambo moja ni hakika: Mmoja wa Mashahidi wa Yehova atanitembelea wakati ujao!”
Puerto Riko
Dada mmoja alikuwa amemtembelea binti yake wakati wezi wawili wenye bastola walipoingia nyumbani. Walitaka pesa, lakini dada hao waliposema hawana pesa zozote, mwizi mmoja akaanza kupekua nyumba huku yule mwingine akiwaelekezea bastola. Mara moja dada hao walianza kusali kwa Yehova. Mwizi huyo akawauliza, “Mnafanya nini?” Wakasema wao ni Mashahidi wa Yehova na wanasali kwa Mungu wao Yehova. Dada hao walipokuwa wakimhubiria mwizi huyo mwenye bastola, yule mwingine alirudi na kusema amepata kadi ya kutoa pesa katika benki. Muda si muda, wote waliingia katika gari la mama ya yule dada na kwenda kwenye benki. Dada hao waliendelea kuwahubiria wezi hao na kuongea nao kwa heshima. Mama alimwomba yule mwizi mwenye bastola airudishe mahali pake, na alishangaa alipoirudisha na kumwambia kuwa anavutiwa na utulivu wake. Dada huyo alimwambia ana mwana mwenye umri karibu sawa na wa wezi hao, lakini yeye anatarajia maisha yenye furaha wakati ujao. Aliwahimiza wezi hao waishi kupatana na njia za Yehova ili wao nao wawe na maisha mazuri wakati ujao. Hatimaye wote walifika kwenye benki, na binti ya dada huyo akatoa pesa. Wezi hao waliwapeleka dada zetu kwenye kichochoro fulani na kuwaachilia. Mwizi mmoja alitaka kuwafunga, lakini yule mwenye bastola akakataa. Aliwaambia dada hao wanalindwa na mtu fulani mwenye nguvu sana. Mapema katika eneo hilo, wezi hao walikuwa wameibia watu wengine, na hata kuwafunga na kuwapiga.
Oceania
IDADI YA NCHI 30
IDADI YA WATU 35,914,649
IDADI YA WAHUBIRI 94,323
IDADI YA MAFUNZO YA BIBLIA 49,667
Papua New Guinea
Tom aliyekuwa askari zamani anajua ukatili wa vita. Alipokutana na Mashahidi katika kijiji anamoishi, aliguswa moyo na ahadi ya Biblia ya ulimwengu usio na vita. Tom alijifunza Biblia na akafanya maendeleo ya kiroho, lakini imani yake ikajaribiwa alipoamua kuhudhuria Ukumbusho. Awali, baba yake alikuwa kasisi wa kanisa linaloitwa United, na wakati huo Tom alikuwa mwenyekiti wa kanisa hilo lililokuwa karibu sana na Jumba la Ufalme. Alipokuwa akiingia katika Jumba la Ufalme, Tom aliwaona waumini wa kanisa hilo—marafiki wake wa karibu, watu aliofanya kazi nao zamani, na pia kasisi—wakimkodolea macho. Tom alitaka kujificha, lakini akawaza: ‘Kwa nini nijifiche? Sasa ndio wakati wa kuwajulisha watu kwamba nitakuwa Shahidi wa Yehova.’ Baada ya sikukuu ya Ista, alimwendea kasisi wa kanisa hilo na kumuuliza, “Je, uliniona katika Jumba la Ufalme?”
“Ndiyo, nilikuona,” kasisi huyo akajibu, halafu wote wawili wakacheka.
Tom naye akasema: “Rafiki yangu, niliamini mkahawa fulani wa zamani una chakula kizuri, lakini nikapata habari kwamba chakula hicho kina sumu. Kisha nikapata mkahawa mwingine, wenye chakula bora na chenye kujenga mwili. Ningewezaje kurudi katika ule mkahawa wa zamani baada ya kuonja chakula hicho kizuri?”
Kasisi huyo alielewa mfano huo, kisha akamwambia, “Tom, usimwambie mtu yeyote, lakini mimi husoma gazeti la Amkeni! kwa ukawaida.” Tom aliacha kanisa hilo, na licha ya majaribu kadhaa akawa mtumishi wa Yehova aliyejiweka wakfu.
Visiwa vya Solomon
Wahubiri 58 waliokuwa wakijifunza Lugha ya Ishara ya Australia walihitimu mnamo Februari 18, 2006. Masomo hayo yalipangwa na ofisi ya tawi ya Mashahidi wa Yehova. Tangu wakati huo, viziwi kumi wamekubali kujifunza Biblia na wanahudhuria mikutano ya kutaniko. Moses ni mmoja wao. Jirani yake alisema Moses ni “mtu mwenye kuwaka hasira upesi na ni vigumu sana kujadiliana naye.” Hata hivyo, wakati Shahidi mmoja wa jamaa yake aliyehudhuria masomo hayo alipomuuliza kama angependa kujifunza Biblia, Moses alikubali mara moja. Mwezi mmoja baadaye, alihudhuria mkutano kwa mara ya kwanza kwenye Jumba la Ufalme. Alikuwa na ndevu zisizotunzwa, nywele ndefu, na mavazi yasiyo nadhifu. Aliguswa moyo na kweli “alizosikia” na jinsi alivyokaribishwa. Moses alishangaa kujifunza katika Biblia kwamba mtu humtukuza Mungu kwa kutunza mavazi na sura yake. Alipoingia kwenye Jumba la Ufalme juma lililofuata, ndugu hawakumtambua. Alikuwa amenyolewa nywele na ndevu, na alikuwa amevalia vizuri. Utu wake ulikuwa umebadilika pia. Jirani yake alisema: “Sasa yeye ni safi na anatabasamu kila wakati.” Moses anafanya maendeleo ya kiroho na anawasaidia viziwi wengine kujua habari njema.
Tahiti
Makemo ni kisiwa kidogo cha matumbawe kilicho umbali wa kilomita 600 kutoka Tahiti na kina wakaaji 720. Mwanamke mmoja aitwaye Ravahere alijua kweli kwa kadiri fulani alipokuwa akikaa na watu wa jamaa yake kisiwani Tahiti. Aliporudi Makemo, alianza kujifunza Biblia kupitia barua, kisha faksi, na baadaye simu. Ravahere alihalalisha ndoa yake na kufanya mabadiliko mengine ili aishi kupatana na viwango vya Yehova. Alifanya hivyo licha ya mkazo kutoka kwa baadhi ya watu wa familia yao ambao hawakutaka aache dini ya Mormon. Mwishowe, Ravahere alistahili kuwa mhubiri ambaye hajabatizwa alipotembelea kutaniko fulani huko Tahiti. Anapokea barua kutoka kwa wahubiri wengine katika kutaniko hilo kila baada ya majuma mawili.
Mnamo Juni 2006, mwangalizi wa mzunguko na mke wake walimtembelea Ravahere. Mwangalizi huyo alieleza kwamba Ravahere huhubiri nyumba kwa nyumba kila Jumamosi na Jumapili. Amechora ramani ya eneo lake na ameanzisha mafunzo kadhaa ya Biblia. Yeye huweka magazeti yetu kwenye duka lake dogo, mahali ambapo watu wanaweza kuyaona. Pia anaongoza funzo la kitabu, na mume wake huhudhuria.
Fiji
Matthew ni mzee wa kutaniko na mmishonari aliyehudhuria Shule ya Gileadi, naye hujifunza na wanafunzi wanne kwenye chuo fulani cha ualimu kila juma. Katika chuo hicho makasisi wa dini mbalimbali huwahubiria waumini wa dini zao jioni. Kusudi la mpango huo ni kuwasaidia wakuu wa chuo hicho kupambana na mwenendo mbaya ambao umeenea chuoni.
Jioni moja, Matthew aliona wanafunzi wengi—wapatao 250—wakiwa wameketi kimya kwenye chumba cha kulia wakiwa na Biblia, vitabu vya kuandikia, na kalamu. Walikuwa wakimngojea kasisi wa madhehebu fulani kubwa ambaye alikuwa aongoze ibada. Lakini kasisi huyo hakufika, kwa hiyo Matthew akaombwa awahutubie. Badala ya nyimbo na hotuba kali ambazo wengine walikuwa wakitoa, Matthew alitoa hotuba tofauti sana akitumia Maandiko. Katika hotuba hiyo ambayo hakuwa ameitayarisha, Matthew aliwatia moyo wanafunzi wamkumbuke Muumba wao wakiwa vijana. Baadaye wanafunzi wote walipanga mstari kumsalimu Matthew kwa mkono na kumshukuru. Sasa anatarajia kwa hamu kuwasaidia wale waliochochewa na hotuba hiyo kutaka kujua zaidi.
Australia
Walipokuwa wakihubiri nyumba kwa nyumba, dada wawili walimkuta mwanamke mgonjwa. Aliwaambia ana kansa isiyoweza kupona na ana shughuli nyingi za kupakia vitu vyake kwenye masanduku na kuviondoa ili atakapokufa, wengine wasisumbuke kuvihusu. Mwanamke huyo alisema hana marafiki wala familia, na kwamba ni mpweke sana. Pia aliwaeleza kuna mambo fulani ambayo hayakumfurahisha katika dini nyingine na anahisi kwamba Mungu amemwacha. Baadaye mmoja wa dada hao alimpelekea maua, na kwa kuwa mwanamke huyo hakuwa nyumbani, dada huyo aliyaacha mlangoni pamoja na ujumbe mfupi. Siku hiyo alasiri, mwanamke huyo alipiga simu na kushukuru sana kwa kitendo hicho cha fadhili. Alisema hakuna mtu ambaye amewahi kumtendea kwa fadhili hivyo au kumpa maua na akaomba msamaha kwa kutopatikana nyumbani. Dada walipomtembelea tena, alikuwa anawangoja. Alionyeshwa kitabu Biblia Inafundisha na funzo la Biblia likaanzishwa.
[Picha katika ukurasa wa 43]
Miho
[Picha katika ukurasa wa 47]
Tulisafiri katika tangi la maziwa
[Picha katika ukurasa wa 47]
Ketevan
[Picha katika ukurasa wa 48]
Baadhi ya watu waliokuwa waumini wa lile kanisa
[Picha katika ukurasa wa 55]
Olga
[Picha katika ukurasa wa 55]
Marie
[Picha katika ukurasa wa 57]
Hubert, Jorge, na Jhon
[Picha katika ukurasa wa 58]
Paulo na familia yake
[Picha katika ukurasa wa 63]
Ravahere akiwa katika duka lake dogo huko Makemo
[Picha katika ukurasa wa 63]
Matthew