Kuchunga kwa Wororo Kondoo za Yehova Wenye Thamani Kubwa
WAZEE wa kutaniko walisikiliza kwa uangalifu sana. Walikuwa wamesafiri karibu kilometa 50 kutoka Efeso hadi Mileto ili kupokea maagizo kutoka kwa mtume Paulo. Sasa walihuzunishwa kusikia kwamba hiyo ingekuwa mara ya mwisho ambayo wangemwona. Kwa hiyo walijua kwamba maneno ambayo yangefuata yangekuwa ya maana zaidi: “Jitunzeni nafsi zenu, na lile kundi lote nalo, ambalo Roho Mtakatifu [roho takatifu, NW] [i]mewaweka ninyi kuwa waangalizi ndani yake, mpate kulilisha [kulichunga, NW] kanisa [kutaniko, NW] lake Mungu, alilolinunua kwa damu [ya Mwana, NW] [w]ake mwenyewe.”—Matendo 20:25, 28, 38.
Kwa hakika rejezo fupi la Paulo kwa wachungaji liliwasilisha habari nyingi kwa wale wazee wa kutaniko la Efeso. Walifahamu kazi ya kuwachunga kondoo katika mashamba yaliyokuwa karibu na hapo. Pia waliyafahamu yale marejezo mengi kwa wachungaji katika Maandiko ya Kiebrania. Na walijua kwamba Yehova alijifananisha mwenyewe kuwa Mchungaji wa watu wake.—Isaya 40:10, 11.
Paulo alisema juu yao kuwa “waangalizi” miongoni mwa “kundi,” na kuwa “wachungaji” wa “kutaniko.” Hali neno “waangalizi” laonyesha mgawo wao ni nini, neno ‘kuchunga’ lasimulia jinsi ambavyo wanapaswa kutekeleza uangalizi huo. Naam, waangalizi walipaswa watunze kila mshiriki wa kutaniko kwa njia ileile yenye upendo kama vile mchungaji angetunza kundi lake la kondoo.
Leo, wazee wa kutaniko wachache wana ujuzi wa kujionea wenyewe wa kuwachunga kondoo halisi. Lakini Biblia hufanya marejezo mengi sana kwa kondoo na wachungaji pia, hasa kwa maana ya kitamathali, hivi kwamba maneno ya Paulo yana umaana unaohusu wakati wowote ule. Na mtu aweza kujifunza mengi kutokana na masimulizi juu ya wachungaji ambao Mungu aliwapendelea katika nyakati za kale. Vielelezo vyao vyenye kutokeza vyaweza kuwasaidia wazee wa kutaniko wa siku ya leo waone ni sifa zipi wanazohitaji kusitawisha ili kulichunga kutaniko la Mungu.
Daudi Mchungaji Asiye na Hofu
Tunapowafikiria wachungaji wa nyakati za Biblia, yaelekea sana kwamba tutamkumbuka Daudi, kwani yeye alianza akiwa mchungaji wa kondoo. Mojawapo masomo ya kwanza tunayojifunza kutoka kwa maisha ya Daudi ni lile la kwamba kuwa mchungaji si cheo chenye umashuhuri. Kwa kweli, nabii Samweli alipowasili akampake mafuta mwana mmoja wa Yese kuwa mtawala wa Israeli wa wakati ujao, mwanzoni Daudi mchanga alipuuzwa kabisa. Ni baada tu ya Yehova kuwakataa ndugu zake saba wenye umri mkubwa zaidi kwamba Daudi alitajwa, aliyekuwa nje kondeni ‘akiwachunga kondoo.’ (1 Samweli 16:10, 11) Hata hivyo, miaka ambayo Daudi alitumia akiwa mchungaji ilimtayarisha kwa ajili ya ile kazi kubwa ya kulichunga taifa la Israeli. “[Yehova] akamchagua Daudi, mtumishi wake, akamwondoa katika mazizi ya kondoo . . . awachunge Yakobo watu wake,” yasema Zaburi 78:70, 71. Kwa kufaa, Daudi aliandika ile Zaburi ya 23 iliyo nzuri na inayojulikana sana, akianza kwa maneno: “BWANA [Yehova, NW] ndiye mchungaji wangu.”
Kama vile Daudi, wazee katika kutaniko la Kikristo wanapaswa watumikie wakiwa wachungaji wa chini walio wanyenyekevu na hawapaswi kutafuta umashuhuri usiofaa. Kama vile mtume Paulo alivyomwandikia Timotheo, wale wanaofikia daraka hilo la kuchunga ‘wanatamani kazi nzuri,’ si umashuhuri.—1 Timotheo 3:1, NW.
Ingawa kazi ya Daudi akiwa mchungaji halisi ilikuwa ya hali ya chini, nyakati nyingine ilihitaji ujasiri mwingi. Kwa kielelezo, wakati kondoo kutoka katika kundi la baba yake walipochukuliwa pindi moja na simba na pindi nyingine na dubu, Daudi aliwakabili bila hofu na kuwaua wanyama hao wawindaji. (1 Samweli 17:34-36) Hilo lilikuwa wonyesho wa ajabu wa ujasiri wakati mtu anapokumbuka kwamba simba aweza kuwaua wanyama wakubwa sana kuliko yeye mwenyewe. Na dubu wa Siria wa rangi ya kahawia aliokuwa akiishi Palestina, mwenye uzito wa kufikia kilo 140, angeweza kumwua mnyama kama paa kwa pigo moja tu la mguu wake wenye nguvu.
Hangaiko la Daudi lenye ujasiri kwa ajili ya kondoo za baba yake ni kielelezo kizuri kwa wachungaji waliomo katika kutaniko la Kikristo. Mtume Paulo aliwaonya wazee wa kutaniko la Efeso juu ya “mbwa-mwitu waonevu” ambao ‘hawangelitendea kundi kwa wororo.’ (Matendo 20:29, NW) Katika nyakati za kisasa pia, pindi zitatokea ambamo wachungaji Wakristo watapaswa kuonyesha ujasiri ili kulinda hali njema ya kiroho ya kondoo za Yehova.
Ingawa kondoo wanapaswa kulindwa kwa ujasiri, wanapaswa pia kutendewa kwa wororo mwingi sana, kwa kumwiga yule mchungaji mwenye upendo Daudi na yule Mchungaji Mwema, Yesu Kristo. (Yohana 10:11) Wakijua kwamba kundi ni mali ya Yehova, wazee wa kutaniko hawapaswi kamwe kuwa wakali bila huruma kwa kondoo, ‘wakijifanya mabwana juu ya mitaa yao, urithi wa Mungu.’—1 Petro 5:2, 3; Mathayo 11:28-30; 20:25-27.
Kutozwa Hesabu
Mzee wa ukoo Yakobo alikuwa mchungaji mwingine aliyejulikana sana. Alijiona mwenyewe kuwa na daraka la kibinafsi kwa kila kondoo mmoja mmoja aliyekabidhiwa kwenye utunzaji wake. Alikuwa ametunza kwa uaminifu sana yale makundi ya baba-mkwe wake, Labani, hivi kwamba miaka 20 baadaye katika utumishi wake, Yakobo angeweza kusema hivi: “Kondoo zako wala mbuzi zako wake hawakuharibu mimba, wala waume katika wanyama wako sikuwala. Kilichoraruliwa na hayawani sikukuletea, mimi mwenyewe nimetwaa hasara yake, wewe umekidai katika mkono wangu, ikiwa kilichukuliwa mchana, au ikiwa kilichukuliwa usiku.”—Mwanzo 31:38, 39.
Waangalizi Wakristo huonyesha hangaiko kubwa hata zaidi kwa ajili ya kondoo ambao Mchungaji wa nafsi zetu, Yehova Mungu, ‘alinunua kwa damu ya Mwana wake mwenyewe.’ (Matendo 20:28; 1 Petro 2:25; 5:4) Paulo alikazia daraka hilo lenye umaana alipowakumbusha Wakristo Waebrania kwamba wanaume wanaoongoza katika kutaniko “wanakesha kwa ajili ya roho zenu, kama watu watakaotoa hesabu.”—Waebrania 13:17.
Kielelezo cha Yakobo chaonyesha pia kwamba kazi ya mchungaji haina mipaka ya wakati. Ni kazi ya mchana na usiku na mara nyingi hutaka kujidhabihu. Alimwambia Labani hivi: “Hii ilikuwa hali yangu; mchana jua likanipata, na baridi usiku, usingizi ukanitoka machoni mwangu.”—Mwanzo 31:40.
Hilo kwa hakika ni kweli kuhusu wazee wengi Wakristo wa kutaniko leo, kama vile ono lifuatalo linavyoonyesha. Ndugu mmoja alilazwa kwenye chumba cha utibabu wa dharura cha hospitali moja, baada ya upasuaji wa kutoa kivimbe fulani ndani ya ubongo wake kuleta matatizo. Familia yake ilipanga kuwa karibu na yeye katika hospitali mchana na usiku. Ili kuunga mkono na kutoa kitia-moyo, mmoja wa wazee wa kutaniko la mahali hapo alifanyia marekebisho ratiba yake yenye shughuli nyingi ili aweze kumtembelea mtu huyo mgonjwa na familia yake kila siku. Lakini, kwa sababu ya utaratibu wa utibabu wa dharura wa hospitali, haikuwezekana kwake sikuzote kumtembelea wakati wa mchana. Hilo lilimaanisha kwamba mzee huyo wa kutaniko alihitaji mara nyingi kuwa kwenye hospitali hiyo saa za usiku sana. Lakini alifurahia kwenda huko kila usiku. “Niling’amua kwamba ningalipaswa kumtembelea mgonjwa wakati uliomfaa, si wakati ulionifaa,” akasema mzee huyo wa kutaniko. Ndugu huyo alipokuwa amepona vya kutosha aweze kuhamishwa hadi eneo jingine la hospitali, mzee huyo wa kutaniko aliendelea na ziara zake zenye kutia moyo.
Mambo Ambayo Musa Alijifunza Akiwa Mchungaji
Biblia humsimulia Musa kuwa “mpole sana zaidi ya wanadamu wote waliokuwa juu ya uso wa nchi.” (Hesabu 12:3) Hata hivyo, rekodi yaonyesha kwamba hali haikuwa imekuwa hivyo sikuzote. Akiwa kijana, alikuwa amemwua Mmsiri mmoja kwa sababu alikuwa amempiga Mwisraeli mwenzake. (Kutoka 2:11, 12) Hilo bila shaka halikuwa tendo la mtu mpole! Hata hivyo, baadaye Mungu alimtumia Musa kuongoza taifa la mamilioni ya watu kupitia jangwa hadi Bara Lililoahidiwa. Kwa wazi, basi, Musa alihitaji mazoezi zaidi.
Ingawa Musa alikuwa tayari amepokea mazoezi ya kilimwengu katika “hekima yote ya Wamisri,” mengi zaidi yalihitajiwa ili aweze kulichunga kundi la Yehova. (Matendo 7:22) Mazoezi hayo ya ziada yangekuwa ya namna gani? Kwa muda wa miaka 40 Mungu alimruhusu Musa atumikie akiwa mchungaji mwenye hali ya chini katika bara la Midiani. Alipokuwa akiyatunza makundi ya baba mkwe wake, Yethro, Musa alisitawisha sifa nzuri kama vile subira, upole, unyenyekevu, ustahimilivu, hali ya upole, na kujidhibiti. Alijifunza pia kumngojea Yehova. Naam, kuwatunza kondoo halisi kulimpa Musa sifa za kustahili kuwa mchungaji mwenye uwezo wa taifa la Israeli.—Kutoka 2:15–3:1; Matendo 7:29, 30.
Je! hizo si sifa hasa ambazo mzee wa kutaniko ahitaji ili kuwatunza watu wa Mungu leo? Ndiyo, kwani Paulo alimkumbusha Timotheo kwamba “mtumwa wa Bwana . . . [apaswa] kuwa mwanana kwa watu wote, awezaye kufundisha, mvumilivu; akiwaonya kwa upole wao washindanao naye.”—2 Timotheo 2:24, 25.
Huenda kukawa nyakati ambapo mzee wa kutaniko ahisi kukata tamaa kwa sababu anapata ugumu wa kusitawisha sifa hizo kikamili. Hata hivyo, hapaswi kukata tamaa. Kama vile Musa, huenda ikachukua muda mrefu kusitawisha kikamili sifa zinazohitajiwa ili mtu awe mchungaji mwema. Hata hivyo, baadaye, bidii hiyo nyingi itathawabishwa.—Linganisha 1 Petro 5:10.
Ukiwa mzee wa kutaniko, labda hutumiwi kikamili kama wengine. Je! yaweza kuwa kwamba, kama vile Musa, Yehova anakuruhusu usitawishe sifa fulani kikamili zaidi? Usisahau kamwe kwamba Yehova ‘hujishughulisha sana kwa mambo yako.’ Hata hivyo, twapaswa kukumbuka pia uhitaji wa ‘kujifunga unyenyekevu, tupate kuhudumiana; kwa sababu Mungu huwapinga wenye kiburi, lakini huwapa wanyenyekevu neema.’ (1 Petro 5:5-7) Ukijitahidi na kukubali mazoezi ambayo Yehova huruhusu, waweza kuwa mwenye mafaa zaidi kwake, kama vile Musa alivyokuwa.
Kondoo Wote wa Yehova Ni Wenye Thamani Kubwa
Wachungaji wenye upendo, waliotegemeka, wa nyakati za Biblia walichukua daraka kuelekea kila kondoo mmoja mmoja. Ndivyo inavyopaswa kuwa kwa habari ya wachungaji wa kiroho. Hilo laonyeshwa wazi kutokana na maneno haya ya Paulo: ‘Angalieni kundi lote.’ (Matendo 20:28, NW) Ni nani wangetiwa ndani katika “kundi lote”?
Yesu alitoa kielezi juu ya mtu mmoja aliyekuwa na kondoo mia moja lakini akamtafuta kwa haraka kondoo mmoja aliyekuwa amepotea ili amrudishe kwenye kundi. (Mathayo 18:12-14; Luka 15:3-7) Mwangalizi apaswa kuhangaikia kila mshiriki wa kutaniko kwa njia iyo hiyo. Kutotenda katika huduma au katika kuhudhuria mikutano ya Kikristo hakumaanishi kwamba kondoo huyo si sehemu ya kundi tena. Huyo aendelea kuwa sehemu ya “kundi lote” ambalo ni lazima wazee ‘watoe hesabu’ kwa Yehova.
Baraza moja la wazee lilikuja kuhangaika sana kwamba wengine waliokuwa wameshiriki na kutaniko hilo walikuwa wamepeperuka wasiwe wenye kutenda tena. Orodha ya watu hao mmoja mmoja ilitayarishwa, na jitihada ya pekee ikafanywa ya kuwatembelea na kuwasaidia warudi kwenye zizi la kondoo la Yehova. Wazee hao walimshukuru Mungu kama nini kwamba katika kipindi cha miaka miwili na nusu, waliweza kuwasaidia watu zaidi ya 30 kuwa watendaji tena katika utumishi wa Yehova. Mmoja wa wale waliosaidiwa hivyo alikuwa asiyetenda kwa karibu miaka 17!
Uzito wa daraka hilo unakazwa zaidi juu ya waangalizi kwa jambo la kwamba kondoo ‘walinunuliwa kwa damu ya mwana wa Mungu mwenyewe.’ (Matendo 20:28, NW) Hakuna bei ya juu zaidi ambayo ingeweza kulipwa kwa ajili ya kondoo hao wenye thamani kubwa. Na ebu fikiria ule wakati wote na ile jitihada yote inayotumiwa katika huduma ili kupata na kusaidia kila mtu mmoja mmoja aliye mfano wa kondoo! Je! jitihada iyo hiyo haihitajiwi ili kuwahifadhi hao wote wakiwa katika zizi la kondoo la Mungu? Kwa hakika, kila kondoo katika kutaniko ni mwenye thamani kubwa.
Hata wakati mshiriki mmoja wa kundi anapohusika katika kosa zito, daraka la wazee halibadiliki. Wanaendelea kuwa wachungaji wenye kuhangaika, wakijitahidi kwa wororo na kwa upole kumwokoa mkosaji huyo kadiri inavyowezekana. (Wagalatia 6:1, 2) Kwa kusikitisha, katika visa fulani inakuwa wazi kwamba mshiriki wa kutaniko hana majonzi ya kimungu kwa ajili ya dhambi nzito ambazo amefanya. Basi wachungaji wenye upendo wana daraka la Kimaandiko la kulinda wengine katika kundi dhidi ya uvutano huo wenye kuchafua.—1 Wakorintho 5:3-7, 11-13.
Hata hivyo, Yehova Mungu huweka kielelezo kikamilifu cha kuwaonyesha rehema kondoo wanaopotea njia. Mchungaji wetu mwenye huruma asema: “Nami nitawatafuta waliopotea, nitawarudisha waliofukuzwa, nitawafunga waliovunjika, nitawatia nguvu wagonjwa.” (Ezekieli 34:15, 16; Yeremia 31:10) Kwa kuiga kielelezo hicho kizuri sana, mpango wenye upendo umefanywa ili wachungaji wa kiroho wa ki-siku-hizi wawatembelee watu waliotengwa na ushirika, ambao sasa huenda wakaitikia msaada wao. Jitihada hizo zenye rehema za kuwapata tena kondoo hao waliopotea zimekuwa na matokeo mazuri. Dada mmoja aliyerudishwa alisema hivi: “Wazee waliponitembelea, hicho kilikuwa ndicho kitia-moyo nilichohitaji ili nirudi.”
Bila shaka maneno ya Paulo kwa wazee wa kutaniko la Efeso huko Mileto yalijaa umaana—kwao na kwa waangalizi leo. Marejezo yake kwa wachungaji yalikuwa ukumbusho wa sifa zenye kuvutia zinazopaswa kuwa dhahiri katika waangalizi—sifa kama vile unyenyekevu na ujasiri, kama zilivyotolewa kielelezo na mfalme-mchungaji Daudi; hisi ya kibinafsi ya kuwa na daraka na ya utunzaji wenye ulinzi, uliokuwa dhahiri katika utumishi wa Yakobo wa mchana na usiku; na nia ya kukubali mazoezi zaidi kwa subira, kama ilivyoonyeshwa na Musa. Kwa kweli, vielelezo hivyo vya Kibiblia vitawasaidia wazee wa kutaniko wasitawishe na kuonyesha sifa zinazohitajiwa ili waweze “kulichunga [kwa wororo] kundi la Mungu, ambalo alinunua kwa damu ya Mwana wake mwenyewe” (NW).