Sura 14
Ni Nani Wanaoenda Mbinguni, na kwa Sababu Gani?
1. Watu wengi wanajibuje ulizo hili, Ni nani wanaokwenda mbinguni, na kwa sababu gani wanaenda huko?
WATU WENGI wanasema, ‘Watu wote wazuri wanakwenda mbinguni.’ Walakini, wanapoulizwa sababu gani wanakwenda mbinguni, huenda wakasema hivi: ‘Ili wakawe pamoja na Mungu,’ au, ‘Hiyo ndiyo thawabu ya kuwa mtu mzuri.’ Biblia inafundisha nini juu ya hilo?
2, 3. (a) Sababu gani tunaweza kuwa na hakika kwamba wanadamu fulani wataenda mbinguni? (b) Ni ulizo gani linalopasa kujibiwa?
2 Biblia inaonyesha wazi kwamba Yesu alifufuliwa katika wafu na kwamba alikwenda mbinguni. Vilevile, inasema kwamba wanadamu wengine wangepelekwa huko. Usiku ule uliotangulia kufa kwake, Yesu aliwaambia mitume wake waaminifu hivi: “Nyumbani mwa Baba yangu mna makao mengi; kama sivyo, ningaliwaambia; maana naenda kuwaandalia mahali. Basi mimi nikienda na kuwaandalia mahali, nitakuja tena niwakaribishe kwangu; ili nilipo mimi, nanyi mwepo.”—Yohana 14:1-3.
3 Ni wazi Yesu alikuwa akiwaambia mitume wake kwamba wangechukuliwa waende mbinguni wakawe naye. Mtume Paulo aliwaambia mara nyingi Wakristo wa kwanza juu ya tumaini hilo lililo zuri ajabu. Kwa mfano, aliandika hivi: “Kwa habari yetu, uraia wetu uko katika zile mbingu, kutoka mahali ambako pia sisi tunangojea kwa hamu mwokozi, yule Bwana Yesu Kristo.” (Wafilipi 3:20, 21, NW; Warumi 6:5; 2 Wakorintho 5:1, 2) Wakitegemea ahadi hizo, mamilioni ya watu wamekaza mioyo yao juu ya uzima wa kimbingu. Lakini je! watu wote wazuri watakwenda mbinguni?
JE! WATU WOTE WAZURI WANAENDA MBINGUNI?
4, 5. Kuna ushuhuda gani wa kwamba Daudi na Ayubu hawakwenda mbinguni?
4 Upesi baada ya kufufuliwa kwa Yesu katika wafu, mtume Petro aliyaambia makutano ya Wayahudi hivi: “Baba yetu mkuu, Daudi, . . . alifariki akazikwa, na kaburi lake liko kwetu hata leo. Maana Daudi hakupanda mbinguni.” (Matendo 2:29, 34) Basi yule mtu mzuri Daudi hakwenda mbinguni. Namna gani yule Ayubu mwadilifu?
5 Alipokuwa akiteseka, Ayubu alimwomba Mungu hivi: “0 laiti ungenificha mimi katika Sheol’ [kaburi], laiti ungeniweka katika siri mpaka hasira yako irudi nyuma, laiti ungeniwekea wakati wenye kikomo na kunikumbuka mimi!” Ayubu alitazamia kwamba, akifa, angekuwa kaburini bila fahamu. Alijua hangeenda mbinguni. Lakini alikuwa na tumaini, kama alivyoeleza: “Ikiwa mtu hodari anakufa anaweza kuishi tena? Siku zote za utumishi wangu wa lazima [wakati uliowekwa wa kuwa kaburini] nitangojea, mpaka faraja yangu ije. Utaita, nami mwenyewe nitakujibu.”—Ayubu 14:13-15, NW.
6, 7. (a) Ni nini kinachoonyesha kwamba hakuna mtu aliyekufa kabla ya Kristo aliyeenda mbinguni? (b) Itakuwaje kwa waaminifu wote waliokufa kabla ya Kristo?
6 Yohana, aliyembatiza Yesu, alikuwa mtu mzuri vilevile. Hata hivyo Yesu alisema hivi: “Aliye mdogo katika ufalme wa mbinguni ni mkuu kuliko yeye.” (Mathayo 11:11) Iko hivyo kwa sababu Yohana Mbatizaji hataenda mbinguni. Yesu alipokuwa hapa duniani miaka zaidi ya 4,000 baada ya kuasi kwa Adamu na Hawa, alisema hivi: “Hakuna mtu aliyepaa mbinguni, ila yeye aliyeshuka kutoka mbinguni, yaani, Mwana wa Adamu.”—Yohana 3:13.
7 Kwa hiyo, kulingana na maneno ya Yesu mwenyewe, kufikia siku zake hizo hakuna mtu aliyekuwa amekwenda mbinguni muda wote huo wa miaka 4,000 va historia ya kibinadamu. Daudi, Ayubu na Yohana Mbatizaji watapokea ufufuo wa uzima hapa duniani. Kwa kweli, wanaume na wanawake wote waaminifu waliokufa kabla ya Yesu kufa walikuwa na tumaini la kuishi tena hapa duniani, si mbinguni. Watafufuliwa wawe kati va raia za kidunia za ufalme wa Mungu.—Zaburi 72:7, 8; Matendo 17:31.
SABABU WAAMINIFU WACHACHE WANAENDA MBINGUNI
8. Ni maulizo gani ambayo majibu yake ni ya maana, na kwa sababu gani?
8 Sababu gani Yesu alienda mbinguni? Ni kazi gani anayofanya huko? Majibu va maulizo hayo ni ya maana. Ni kwa sababu wale wanaoenda mbinguni watashiriki kazi hiyo pamoja na Yesu. Wanaenda mbinguni kwa kusudi lilo hilo.
9, 10. Kulingana na Danieli, ni nani zaidi ya Kristo watakaotawala katika serikali ya Mungu?
9 Tulikwisha kujifunza katika sura zilizotangulia kwamba Yesu atatawala juu ya dunia mpya ya paradiso akiwa mfalme wa serikali ya Mungu ya kimbingu. Zamani kabla ya Yesu kuja hapa duniani, kitabu cha Biblia cha Danieli kilitabiri kwamba yule “mwanadamu” ‘angepewa mamlaka.’ Huyo “Mwana wa Adamu” ni Yesu Kristo. (Marko 14:41, 62) Naye Danieli anaendelea kusema hivi: “Mamlaka yake ni mamlaka ya milele, ambayo haitapita kamwe, na ufalme wake ni ufalme usioweza kuangamizwa.”—Danieli 7:13, 14.
10 Walakini, ni jambo la maana kuangalia kwamba hapa katika kitabu cha Danieli hapasemi huyo “mwanadamu” atatawala peke yake. Biblia inasema hivi: “Na ufalme huo na utawala huo . . . walipewa wale watu walio watakatifu wa Yule Mkuu. Ufalme wao ni ufalme wenye kudumu muda usiojulikana.” (Danieli 7:27, NW) Semi hizo “wale watu” na “ufalme huo” zinatujulisha kwamba wengine watatawala pamoja na Kristo katika serikali ya Mungu.
11. Ni nini kinachoonyesha kwamba wafuasi wa kwanza wa Kristo watatawala pamoja naye?
11 Katika usiku ule wa mwisho ambao Yesu alikaa pamoja na mitume wake waaminifu 11 alionyesha kwamba wangekuwa watawala pamoja naye katika ufalme wa Mungu. Aliwaambia hivi: “Ninyi ndinyi mmeshikamana nami katika majaribu yangu; nami nafanya agano pamoja nanyi, kwa ajili ya ufalme.” (Luka 22:28, 29, NW) Baadaye, mtume Paulo na Timotheo walitiwa katika agano hilo, au mapatano hayo, kwa ajili ya ufalme. Kwa sababu hiyo Paulo alimwandikia Timotheo hivi: “Tukiendelea kuvumilia, tutatawala pia pamoja tukiwa wafalme.” (2 Timotheo 2:12, NW) Vilevile, mtume Yohana aliandika juu ya wale ‘watakaotawala wakiwa wafalme juu ya dunia’ pamoja na Yesu Kristo.—Ufunuo 5:9, 10; 20:6, NW.
12. Ni uhakika gani juu ya “uzao” wa Abrahamu unaofunua kwamba Kristo atakuwa na watawala washirika?
12 Basi wale wanaoenda mbinguni wanaenda huko wakatumikie wakiwa watawala washirika wa Kristo katika serikali ya Mungu ya kimbingu. Ijapokuwa Yesu ndiye ule “uzao” wa ahadi, Mungu anachagua wengine katika wanadamu wakatawale pamoja na Yesu katika ufalme huo. Kwa njia hiyo wanakuwa sehemu ya ule “uzao,” kama Biblia inavyosema: “Kama ninyi ni wa Kristo, basi, mmekuwa uzao wa Ibrahimu, na warithi sawasawa na ahadi.”—Wagalatia 3:16, 29; Yakobo 2:5.
NI WANGAPI WANAOENDA MBINGUNI?
13. (a) Sababu gani vitoto vichanga havitaenda mbinguni? (b) Yesu alielezaje hesabu ya wanaopokea Ufalme huo?
13 Kwa kuwa watatawala dunia, ni wazi kwamba wale wanaokwenda mbinguni watakuwa wafuasi wa Kristo waliokwisha kujaribiwa. Maana yake ni kwamba vitoto au watoto wachanga, ambao bado kujaribiwa kikamilifu wakati wa miaka ya utumishi wa Kikristo, hawatachukuliwa waende mbinguni. (Mathayo 16:24) Walakini, hao watoto wachanga wanaokufa wana tumaini la kufufuliwa kwenye uzima hapa duniani. (Yohana 5:28, 29) Basi jumla ya wale wanaoenda mbinguni itakuwa ndogo inapolinganishwa na wengi wa wale watakaopokea uzima hapa duniani chini ya utawala wa Ufalme. Yesu aliwaambia wanafunzi wake hivi: “Msiogope, enyi kundi dogo; kwa kuwa Baba yenu ameona vema kuwapa ule Ufalme.”—Luka 12:32.
14. Ni wangapi walio washiriki wa “kundi dogo” wanaoenda mbinguni?
14 Hesabu ya jamii hiyo ya watawala wa Ufalme itakuwa ndogo kadiri gani? Je! mitume na wafuasi wengine wa kwanza wa Yesu ndio watakaokuwa katika hesabu hiyo peke yao? Hapana, Biblia inaonyesha kwamba katika hilo “kundi dogo” watakuwamo watu wengine zaidi. Katika Ufunuo 14:1, 3 Biblia inasema hivi: “Nikaona, na tazama, huyo Mwana-Kondoo [Yesu Kristo] amesimama juu ya mlima Sayuni [wa kimbingu], na watu mia na arobaini na nne elfu pamoja naye . . . walionunuliwa [au, waliochukuliwa] katika nchi.” Angalia ya kwamba hapo panasema ni watu 144,000 peke yao wanaoonwa wakiwa pamoja na Mwana-Kondoo, Yesu Kristo, juu ya Mlima Sayuni wa kimbingu. (Waebrania 12:22) Basi badala ya watu wote wazuri kwenda mbinguni, Biblia inafunua kwamba watu 144,000 peke yao waliojaribiwa na walio waaminifu ndio watakaopelekwa huko wakatawale pamoja na Kristo.
SABABU ILIYOFANYA WACHAGULIWE KATIKA DUNIA
15. Sababu gani Mungu anawachagua watawala wa Ufalme kati ya wanadamu?
15 Lakini sababu gani Mungu anachagua watawala hao katika wanadamu? Sababu gani asichague malaika watawale pamoja na Kristo? Ni kwa sababu hapa duniani ndipo haki ya Yehova ya kutawala ilipopingiwa. Hapa ndipo uaminifu wa wanadamu kwa Mungu ungeweza kujaribiwa ukiwa chini ya upinzani wa Ibilisi. Hapa ndipo Yesu alipoonyesha ushikamanifu wake kamili kwa Mungu akiwa chini ya jaribu, akatoa uhai wake uwe ukombozi kwa ajili ya wanadamu. Basi Yehova alifanya mpango wa kuchukua duniani “kundi dogo” la watu wa kushirikiana pamoja na Mwanawe katika ufalme wa kimbingu. Hao ndio wamekuwa na uaminifu kwa Mungu, wakaonyesha ni la uongo lile shtaka la Ibilisi la kwamba wanadamu wanamtumikia Mungu kwa sababu za kichoyo tu. Kwa hiyo, inafaa kwamba Yehova anawatumia wanadamu hao kwa utukufu wake.—Waefeso 1:9-12.
16. Sababu gani tunaweza kushukuru kwa vile watawala hao wa Ufalme wamepata kuishi duniani?
16 Vilevile, ebu fikiri itakuwa vizuri kama nini kutawalwa na watu ambao wamekuwa waaminifu kwa Mungu hapa duniani, na wengi wao hata wakatoa uhai wao kwa ajili ya Ufalme huo. (Ufunuo 12:10, 11; 20:4) Malaika hawajapata majaribu ya aina hiyo. Wala hawajapata matatizo yanayowapata wanadamu. Hivyo hawangefahamu kabisa shida za mwanadamu mwenye dhambi wala kufahamu namna tunavyojisikia tukiwa na matatizo. Lakini wale 144,000 watafahamu kwa sababu watakuwa wamekwisha kupatwa na matatizo ayo hayo. Wengine kati yao wamelazimika kujikaza waache mazoea makubwa yenye dhambi, nao wanajua namna ilivyo vigumu kuacha mazoea hayo. (1 Wakorintho 6:9-11) Kwa hiyo, watashughulika na raia zao za kidunia kwa kufahamu hali yao.—Waebrania 2:17, 18.
LILE KUNDI LA MUNGU
17. Neno “kundi” lina maana gani?
17 Biblia inatuambia kwamba Kristo ndiye kichwa cha kundi la Mungu, na kwamba washiriki walo wanamtii Yesu. (Waefeso 5:23, 24) Basi neno hili “kanisa,” au “kundi la Mungu,” halina maana ya jengo fulani. Badala yake, lina maana ya kikundi cha Wakristo. (1 Wakorintho 15:9) Leo tunaweza kusema juu ya kundi la Wakristo tunaoshirikiana nao. Katika njia iyo hiyo, tunasoma katika Biblia juu ya “lile kundi la Walaodikia,” na, katika barua ya mtume Paulo kwa Filemoni, tunasoma juu ya ‘kundi lililokuwa katika nyumba yake.’—Wakolosai 4:16; Filemoni 2, NW.
18. (a) Ni nani walio sehemu ya “lile kundi la Mungu aliye hai”? (b) Kundi hilo linatajwa kwa maneno gani mengine katika Biblia?
18 Walakini, Biblia inaposema juu ya “kundi la Mungu aliye hai,” ina maana ya kikundi fulani cha wafuasi wa Kristo. (1 Timotheo 3:15, NW) Vilevile wanaitwa “kundi la wale wazaliwa wa kwanza ambao wameandikwa orodhani katika mbingu.” (Waebrania 12:23, NW) Basi washiriki wa hilo “kundi la Mungu” ni Wakristo wote duniani walio na tumaini la kupata uzima wa kimbingu. Mwishowe, jumla ya watu 144,000 tu ndio watakaokuwa washiriki wa hilo “kundi la Mungu.” Leo ni wachache tu wa hao, mabaki, ambao bado wapo duniani. Wakristo wanaotumaini kuishi milele hapa duniani wanategemea uongozi wa kiroho unaotoka kwa washiriki wa hilo “kundi la Mungu aliye hai.” Vilevile Biblia inataja kundi hilo la washiriki 144,000 kwa semi hizi, “Bibi-arusi, mke wa Mwana-Kondoo,” “mwili wa Kristo,” “hekalu la Mungu,” “Israeli wa Mungu,” na “Yerusalemu Mpya.”—Ufunuo 21:9; Waefeso 4:12; 1 Wakorintho 3:17; Wagalatia 6:16; Ufunuo 21:2, NW.
JAMBO LILILO JIPYA KATIKA KUSUDI LA MUNGU
19. Ni jambo gani jipya ambalo Mungu alitokeza ili atimize kusudi lake la kwanza kwa dunia hii?
19 Yehova Mungu hakubadili kusudi lake kwa dunia na wanadamu walio juu yake baada ya Adamu kuanzisha jamii ya wanadamu wakiwa katika njia ya dhambi na kifo. Kama Mungu angalifanya hivyo, ingalikuwa na maana ya kwamba hakuwa na uwezo wa kutimiza kusudi lake la kwanza. Kusudi lake tangu mwanzo lilikuwa kuifanya paradiso ya duniani pote ijawe na watu wenye furaha, wenye afya. Kusudi hilo bado lipo. Jambo lililo jipya peke yake ambalo Mungu alitokeza ni mpango wake wa kuwa na serikali mpya ya kutimiza kusudi lake. Kama tulivyokwisha kuona, Mwanawe, Yesu Kristo, ndiye mtawala mkuu katika serikali hiyo, na watu 144,000 watachukuliwa katika wanadamu ili wakatawale mbinguni pamoja naye.—Ufunuo 7:4.
20. (a) Ni nani ambao ndio “mbingu mpya” na “dunia mpya”? (b) Ni lazima ufanye nini ili uwe sehemu ya “dunia mpya”?
20 Watawala hao mbinguni watakuwa ndizo “mbingu mpya” za taratibu mpya ya Mungu. Hata hivyo ni wazi kwamba iwapo kutakuwako watawala hao waadilifu wa dunia, basi ni lazima kuwe na watu ambao watawatawala. Biblia inawataja watu hao kuwa “dunia mpya.” (2 Petro 3:13; Ufunuo 21:1-4, NW) Hao ni pamoja na Ayubu, Daudi na Yohana Mbatizaji—ndiyo, waaminifu wote walioishi kabla ya Kristo kuja hapa duniani. Lakini watakuwako wengine wengi watakaokuwa “dunia mpya,” kutia na watu watakaookoka mwisho wa hii taratibu ( mfumo) mbovu ya mambo. Je! wewe utakuwa mmoja wa waokokaji hao? Je! unataka kuwa raia wa serikali ya Mungu? Ikiwa ndivyo, kuna matakwa ambayo lazima uyatimize.
[Picha katika ukurasa wa 121]
Je! watu hawa wazuri walienda mbinguni?
Mfalme Daudi
Ayubu
Yohana yule Mbatizaji
[Picha katika ukurasa wa 122]
Katika usiku wake wa mwisho kuwa pamoja na mitume wake, Yesu alisema wangekuwa watawala pamoja naye katika ufalme wa Baba yake