Sura 13
Serikali ya Mungu ya Amani
1. Serikali za wanadamu zimeshindwa kufanya nini?
JE! WEWE umeona kwamba serikali za kibinadamu, hata zile zenye makusudi mazuri, zimeshindwa kutosheleza mahitaji makubwa ya watu? Zote hazikuweza kutatua matatizo ya uhalifu na chuki ya ubaguzi wa rangi wala kutoa chakula cha kufaa na nyumba za kuwafaa raia wote. Hazikuwaondoa kabisa raia hao katika magonjwa. Wala hakuna serikali yo yote ambayo imeweza kuzuia kuzeeka wala kufa na kuwafufua wafu. Hakuna hata moja ambayo imeletea raia zake amani na usalama wenye kudumu. Serikali za wanadamu haziwezi kabisa kutatua matatizo makubwa yanayowapata watu.
2. Ujumbe mkuu wa Biblia ni nini?
2 Muumba wetu anajua tunahitaji sana sana serikali yenye uadilifu itakayowezesha watu wote wawe na uzima kamili wenye furaha. Hiyo ndiyo sababu Biblia inaeleza habari za serikali itakayoongozwa na Mungu. Kwa kweli, serikali hiyo iliyoahidiwa na Mungu ndio ujumbe mkuu wa Biblia.
3. Isaya 9:6, 7 inasema nini juu ya serikali ya Mungu?
3 Lakini labda utauliza hivi: ‘Ni wapi ambapo Biblia inataja serikali ya Mungu?’ Mahali pamoja ni Isaya 9:6, 7. Kulingana na Biblia ya King James Version, mistari hiyo inasema hivi: “Kwa maana kwetu sisi mtoto amezaliwa, kwetu sisi mtoto wa kiume amepewa: na ile serikali itakuwa juu ya bega lake: na jina lake ataitwa Waajabu, Mshauri, Yule Mungu mwenye nguvu, Yule Baba wa milele, Yule Mwana-Mfalme wa Amani. Kwa habari ya ongezeko la serikali yake na amani hakutakuwa na mwisho.”
4. Mtoto anayekuwa mtawala wa serikali ya Mungu ni nani?
4 Hapa Biblia inasema juu ya kuzaliwa kwa mtoto, mwana-mfalme. Baadaye huyu ‘mwana-mfalme’ alipaswa kuwa mtawala mkuu, “Yule Mwana-Mfalme wa Amani.” Yeye angesimamia serikali nzuri ajabu. Serikali hiyo italetea dunia nzima amani, na amani hiyo itadumu milele. Mtoto huyo ambaye kuzaliwa kwake kulitabiriwa katika Isaya 9:6, 7 alikuwa Yesu. Alipokuwa akimtangazia Mariamu msichana bikira kuzaliwa kwa mtoto huyo, malaika Gabrieli alisema hivi juu ya Yesu: “Yeye atatawala akiwa mfalme . . . na hakutakuwa na mwisho wa ufalme wake.”—Luka 1:30-33, NW.
KUKAZIA UMAANA WA ULE UFALME
5. (a) Ubora wa huo Ufalme unaonyeshwaje katika Biblia? (b) Ufalme wa Mungu ni nini, nao utafanya nini?
5 Walipokuwa hapa duniani, kazi kubwa ya Yesu Kristo na wenye kumwunga mkono ilikuwa kuhubiri na kufundisha juu ya ufalme wa Mungu unaokuja. (Luka 4:43; 8:1) Katika Biblia wameutaja ufalme huo mara zipatazo 140. Yesu hata alifundisha wafuasi wake kumwomba Mungu hivi katika sala: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Je! ufalme huo ambao Wakristo wanaomba ni serikali ya kweli kweli? Labda hujafikiria ni ya kweli, lakini ndivyo ilivyo. Mwana wa Mungu, Yesu Kristo, ndiye Mfalme wa Ufalme huo. Na dunia nzima ndilo eneo atakalotawala. Itakuwa vizuri kama nini wakati watu hawatagawanyika katika mataifa mengi yenye kupingana, bali wanadamu wote wataungana katika amani wakiwa chini ya serikali ya Mungu ya Ufalme!
6. Yesu alipokuwa hapa duniani, sababu gani Ufalme huo ulisemwa kuwa “umekaribia” na “u katikati yenu”?
6 Yohana Mbatizaji alianza kuhubiri juu ya serikali hiyo, akiwaambia watu hivi: “Tubuni; kwa maana ufalme wa mbinguni umekaribia.” (Mathayo 3:1, 2) Sababu gani Yohana aliweza kusema hivyo? Kwa sababu Yesu, yeye ambaye angekuwa mtawala wa serikali ya Mungu ya kimbingu, alikuwa karibu kubatizwa naye na kupakwa mafuta kwa roho takatifu ya Mungu. Basi unaweza kufahamu sababu gani baadaye Yesu aliwaambia Mafarisayo hivi: “Tazama! ule ufalme wa Mungu u katikati yenu.” (Luka 17:21, NW) Ni kwa sababu Yesu, ambaye Mungu alikuwa ameweka awe mfalme, alikuwa hapo pamoja nao. Wakati wa miaka yake mitatu na nusu ya kuhubiri na kufundisha, Yesu alionyesha haki yake ya kuwa mfalme kwa uaminifu wake kwa Mungu mpaka kufa.
7. Ni nini kinachoonyesha kwamba Ufalme huo ulikuwa suala kubwa Yesu alipokuwa hapa duniani?
7 Ili kuonyesha kwamba ufalme wa Mungu ulikuwa ndilo suala kubwa wakati wa huduma ya Kristo, ebu tuchunguze yaliyotukia siku ya mwisho kabla ya kufa kwake. Biblia inatuambia kwamba watu walimshtaki Yesu, wakisema: “Tumemwona huyu akipotosha taifa letu, na kuwazuia watu wasimpe Kaisari kodi, akisema kwamba yeye mwenyewe ni Kristo, mfalme.” Aliposikia hayo, gavana wa Roma Pontio Pilato alimwuliza Yesu hivi: “Wewe ndiwe mfalme wa Wayahudi?”—Luka 23:1-3.
8. (a) Yesu alijibuje alipoulizwa kama yeye alikuwa mfalme? (b) Yesu alimaanisha nini aliposema kwamba ufalme wake haukuwa “wa hapa”?
8 Yesu hakujibu ulizo la Pilato moja kwa moja, bali alisema: “Ufalme wangu sio wa ulimwengu huu. Kama ufalme wangu ungekuwa wa ulimwengu huu, watumishi wangu wangenipigania, nisije nikatiwa mikononi mwa Wayahudi. Lakini ufalme wangu sio wa hapa.” Yesu alijibu hivyo kwa sababu ufalme wake haungekuwa wa kidunia. Yeye alipaswa kutawala akiwa mbinguni, si akiwa mwanadamu katika kiti fulani cha enzi hapa duniani. Kwa kuwa lile suala lilikuwa la kama Yesu alikuwa au hakuwa na haki ya kutawala akiwa mfalme, Pilato alimwuliza Yesu tena: “Wewe u mfalme basi?”
9. (a) Ni kweli gani ya ajabu ambayo Yesu alijulisha? (b) Ni nini yaliyo maulizo makubwa leo?
9 Ni wazi Yesu alikuwa akihukumiwa uhai wake kwa sababu alikuwa amekuwa akihubiri na kufundisha juu ya serikali mpya. Hivyo Yesu alimjibu Pilato hivi: “Wewe wasema, kwa kuwa mimi ni mfalme. Mimi nimezaliwa kwa ajili ya haya, na kwa ajili ya haya mimi nalikuja ulimwenguni, ili niishuhudie kweli.” (Yohana 18:36, 37) Ndiyo, Yesu alikuwa ametumia maisha yake hapa duniani akiwaambia watu kweli nzuri ajabu juu ya serikali ya Mungu ya Ufalme. Ulikuwa ndio ujumbe wake mkuu. Na Ufalme huo ungali ndilo suala la maana zaidi leo. Walakini, bado kunabaki maulizo haya: Ni serikali gani iliyo ya maana zaidi katika maisha ya mtu? Je! ni serikali fulani ya wanadamu, au ni serikali ya Mungu, Kristo akiwa mtawala?
KUFANYA MPANGO KUWE SERIKALI MPYA YA DUNIA
10. (a) Ni wakati gani Mungu alipoona uhitaji wa kuwa na serikali mpya? (b) Mtajo wa kwanza wa serikali hiyo uko wapi katika Biblia? (c) Ni nani anayefananishwa na yule nyoka?
10 Shetani aliposhawishi Adamu na Hawa wajiunge naye katika uasi wake, hapo ndipo Yehova alipoona uhitaji wa kuwa na serikali mpya ya kutawala wanadamu. Basi mara hiyo Mungu akaeleza kusudi lake la kusimamisha serikali ya namna hiyo. Alitaja serikali hiyo alipotamka hukumu juu ya yule nyoka, kwa hakika akimwambia Shetani Ibilisi kwamba: “Nitaweka uadui kati yako na huyo mwanamke, na kati ya uzao wako na uzao wake; huo utakuponda kichwa, na wewe utamponda kisigino.”—Mwanzo 3:14, 15.
11. Chuki ingekuwa kati ya nani?
11 Lakini labda utauliza hivi: ‘Liko wapi lo lote linalosemwa hapa juu ya serikali?’ Ebu tuchunguze kwa uangalifu usemi huo na tutaona. Andiko hilo linasema kwamba kungekuwako uadui, au chuki, kati ya Shetani na “huyo mwanamke.” Isitoshe, kungekuwako chuki kati ya “uzao” au watoto wa Shetani na “uzao” au watoto wa mwanamke. Kwanza, tunahitaji kujua “huyo mwanamke” ni nani.
12. Ni nini linalosemwa juu ya “yule mwanamke” katika Ufunuo sura ya 12?
12 Yeye si mwanamke wa kidunia. Shetani hajapata kuwa na chuki yo yote ya pekee kuelekea mwanamke ye yote wa kibinadamu. Badala yake, huyo ni mwanamke wa mfano. Yaani, anafananisha kitu kingine. Jambo hilo limeonyeshwa katika kitabu cha mwisho cha Biblia, Ufunuo, ambapo habari zaidi zinatolewa juu ya mwanamke huyo. Humo “huyo mwanamke” anasimuliwa kuwa “amepambwa kwa jua, akisimama juu ya ule mwezi, akiwa na zile nyota kumi na mbili juu ya kichwa chake.” Ili kutusaidia tujue huyo “mwanamke” anafananisha nini, ebu angalia yanayoendelea kusemwa na Ufunuo juu ya mtoto wake: “Yule mwanamke akaleta mtoto wa kiume katika ulimwengu, mwana aliyepaswa kuyatawala mataifa yote kwa fimbo ya chuma ya kifalme, na mtoto huyo akachukuliwa moja kwa moja juu kwa Mungu na kwenye kiti cha ufalme wake.”—Ufunuo 12:1-5, The Jerusalem Bible.
13. Yule “mtoto wa kiume” na “yule mwanamke” wanafananisha nani au nini?
13 Kujifunza “mtoto wa kiume” huyo ni nani au ni nini kutatusaidia tujue “yule mwanamke” anafananisha nani au nini. Mtoto huyo si mtu halisi, kama vile mwanamke huyo asivyo mwanamke halisi wa kibinadamu. Andiko hilo linaonyesha kwamba “mtoto wa kiume” huyo ‘anapaswa kuyatawala mataifa yote.’ Hivyo “mtoto” huyo anafananisha serikali ya Mungu, Yesu Kristo akiwa ndiye mfalme. mwenye kutawala. Kwa hiyo, “yule mwanamke” anafananisha tengenezo la Mungu la viumbe viaminifu vya kimbingu. Kama vile “mtoto wa kiume” alivyotokana na “yule mwanamke,” ndivyo yule Mfalme, Yesu Kristo, alivyotokana na tengenezo la kimbingu, baraza ya viumbe wa kiroho walio washikamanifu mbinguni wanaofanya kazi pamoja ili kutimiza kusudi la Mungu. Wagalatia 4:26 inalitaja tengenezo hilo kuwa “Yerusalemu wa juu.” Hivyo, basi, Adamu na Hawa walipouasi kwanza utawala wa Mungu, Yehova Mungu alifanya mipango ya kuwa na serikali ya Ufalme ambayo ingekuwa tumaini la wapendao uadilifu.
YEHOVA ANAIKUMBUKA AHADI YAKE
14. (a) Yehova alionyeshaje kwamba aliikumbuka ahadi yake juu ya “uzao” ambao ungemponda Shetani? (b) “Uzao” huo ulioahidiwa ni nani?
14 Yehova hakuisahau ahadi yake ya kutuma “uzao” ambao ungekuwa mtawala wa serikali ya Mungu. Mtawala huyo angemharibu Shetani kwa kuponda kichwa chake. (Warumi 16:20; Waebrania 2:14) Baadaye, Yehova alisema kwamba uzao huo ulioahidiwa ungekuja kupitia Abrahamu mwaminifu. Yehova alimwambia Abrahamu hivi: “Na katika uzao wako mataifa yote ya dunia watajibarikia.” (Mwanzo 22:18) Ni nani “uzao” huo ulioahidiwa kuja kupitia ukoo wa Abrahamu? Biblia inatoa jibu baadaye, ikisema: “Basi ahadi zilinenwa kwa [Abrahamu] na kwa mzao wake. Hasemi, Kwa wazao, kana kwamba ni wengi, bali kana kwamba ni mmoja, Kwa mzao wako, yaani, Kristo.” (Wagalatia 3:16) Vilevile Yehova alimwambia Isaka mwana wa Abrahamu na Yakobo mjukuu wake kwamba “uzao” huo wa “mwanamke” wa Mungu ungekuja kupitia ukoo wao.—Mwanzo 26:1-5; 28:10-14.
15, 16. Ni nini kinachothibitisha kwamba “uzao” huo ulipaswa kuwa mfalme anayetawala?
15 Akionyesha wazi kwamba “uzao” huo ungekuwa mfalme anayetawala, Yakobo alimwambia Yuda mwanawe maneno haya: “Ile fimbo ya kifalme [au, mamlaka ya kutawala] haitageukia kando kutoka kwa Yuda, wala gongo la mwenye kutoa amri kutoka kati ya miguu yake, mpaka Shilo aje; na kwake yeye utii wa mataifa yote utakuwa.” (Mwanzo 49:10, NW) Yesu Kristo alitokana na kabila la Yuda. Akawa ndiye “Shilo” ambaye kwake “utii wa mataifa yote utakuwa.”—Waebrania 7:14.
16 Miaka karibu 700 baada ya kumwambia Yuda hivyo, Yehova alisema hivi juu ya Daudi wa kabila la Yuda: “Mimi nimeona Daudi mtumishi wangu . . . Nami bila shaka nitasimamisha uzao wake milele na kiti cha enzi chake kama zile siku za mbingu.” (Zaburi 89:20, 29, NW) Mungu anaposema “uzao” wa Daudi utasimamishwa “milele” na kwamba “kiti cha enzi chake” kitakaa kwa muda mrefu “kama zile siku za mbingu,” ana maana gani? Yehova Mungu anamaanisha kwamba serikali ile ya Ufalme mikononi mwa Yesu Kristo, mtawala wake mwekwa, itadumu milele. Tunajuaje?
17. Tunajuaje kwamba mtawala huyo aliyeahidiwa ni Yesu Kristo?
17 Basi, kumbuka maneno ambayo Gabrieli malaika wa Yeho-va alimwambia Mariamu juu ya mtoto ambaye angezaa. Alisema hivi: “Utamwita Yesu.” Lakini Yesu hangeendelea kuwa mtoto tu, wala hata binadamu tu hapa duniani. Gabrieli aliendelea kusema hivi: “Huyo atakuwa mkuu, ataitwa mwana wa Aliye juu, na [Yehova] Mungu atampa kiti cha enzi cha Daudi, baba yake. Ataimiliki nyumba ya Yakobo hata milele, na ufalme wake utakuwa hauna mwisho.” (Luka 1:31-33) Je! si jambo zuri kweli kweli kwamba Yehova amefanya mipango ya kusimamisha serikali yenye uadilifu ili kufaidi milele wale wanaompenda na kumtumaini?
18. (a) Biblia inasimuliaje mwisho wa serikali za kidunia? (b) Serikali ya Mungu itafanyia watu nini?
18 Sasa wakati umekaribia serikali ya Ufalme wa Mungu ichukue hatua ya kuharibu serikali zote za ulimwengu. Ndipo Yesu Kristo atakapochacha (atatumia nguvu) akiwa Mfalme mshindi. Ikisimulia pigano hilo, Biblia inasema hivi: “Katika siku za wafalme hao Mungu wa mbinguni atausimamisha ufalme ambao hautaangamizwa milele, . . . utavunja falme hizi zote vipande vipande na kuziharibu, nao utasimama milele na milele.” (Daniell 2:44; Ufunuo 19:11-16) Serikali nyingine zote zikiisha kuondoka, serikali ya Mungu itatosheleza mahitaji halisi ya watu. Yule Mtawala, Yesu Kristo, atahakikisha kwamba hakuna raia wake mwaminifu atakayekuwa mgonjwa, kuzeeka wala kufa. Uhalifu, makao (nyumba) yasiyofaa, njaa na matatizo mengine yote kama hayo yatatatuliwa. Kutakuwako amani ya kweli na usalama wa kweli duniani kote. (2 Petro 3:13; Ufunuo 21:3-5) Walakini, inatupasa tujifunze zaidi juu ya wale watakaokuwa watawala katika serikali hiyo ya Ufalme wa Mungu.
[Picha katika ukurasa wa 112, 113]
Yesu alituma wafuasi wake wakaifanye kazi ya maana ya kuhubiri juu ya ufalme wa Mungu
[Picha katika ukurasa wa 114]
Alipokuwa akihukumiwa uhai wake, Yesu aliendelea kuhubiri ufalme wa Mungu
[Picha katika ukurasa wa 119]
Wewe una maoni gani juu ya Yesu—kuwa ni mfalme mshindi au kitoto kisichoweza kitu?