Sura 12
Unahusika Katika Suala la Maana Sana!
1, 2. (a) Sababu gani ni jambo la maana ufikirie namna unavyoishi? (b) Ni akina nani pia wanaofikiria namna unavyoishi, na kwa sababu gani?
NI JAMBO la maana ufikirie namna unavyoishi. Itamaanisha kwako tumaini la wakati ujao wenye furaha ama wenye huzuni. Mwishowe jambo hilo litaamua kama wewe utapita pamoja na ulimwengu huu au utaokoka mwisho wake uingie katika taratibu mpya ya Mungu yenye uadilifu ambamo unaweza kuishi milele.—1 Yohana 2:1; 2 Petro 3:13.
2 Lakini namna unavyoishi haikuhusu wewe tu. Wengine wanahusika. Unayotenda yanawahusu wao vilevile. Kwa mfano, ikiwa wazazi wako wako hai, yale unayotenda yanaweza ama kuwaletea heshima ama aibu. Biblia inasema: “Mwana mwenye hekima ni yule anayefanya baba afurahi, na mwana mpumbavu ni huzuni nyingi ya mama yake.” (Mithali 10:1, NW) Jambo la maana zaidi, namna unavyoishi inahusu Yehova Mungu. Inaweza ama kumfanya afurahi ama kumfanya ahuzunike. Sababu gani? Kwa sababu ya suala la maana sana ambalo wewe unahusika nalo.
JE! WANADAMU WATAKUWA WAAMINIFU KWA MUNGU?
3. Ni dai gani la upinzani ambalo Shetani alimtolea Yehova?
3 Suala hilo lilitokezwa na Shetani Ibilisi. Alilitokeza wakati alipoweza kuwashawishi Adamu na Hawa wavunje sheria ya Mungu na hivyo wajiunge naye katika kumwasi Mungu. (Mwanzo 3:1-6) Hilo lilimpa Shetani sababu za kumtolea Yehova dai hili la upinzani: ‘Watu wanakutumikia wewe tu kwa sababu ya vitu wanavyopokea kutoka kwako. Wewe nipe tu nafasi nami nitaweza kumwondoa kila mtu kwako.’ Ijapokuwa maneno hayo yenyewe hayaonekani katika Biblia, ni wazi kwamba Shetani alimwambia Mungu jambo linalofanana na hilo. Hilo linaonyeshwa katika kitabu cha Biblia cha Ayubu.
4, 5. (a) Ayubu alikuwa nani? (b) Ni nini lililotendeka mbinguni siku za Ayubu?
4 Ayubu alikuwa mtu aliyeishi karne nyingi baada ya kutokea uasi katika bustani ya Edeni. Alikuwa mtumishi mwadilifu na mwaminifu wa Mungu. Lakini je! uaminifu wa Ayubu ulistahili kukaziwa fikira na Mungu au na Shetani au haukuwa jambo la maana? Biblia inaonyesha ulistahili. Inatuambia Shetani alijitokeza mbele za Yehova katika baraza za mbinguni. Ebu angalia habari ya mazungumzo yao:
5 “Ilikuwa siku moja ambayo hao wana wa Mungu walikwenda kujihudhurisha mbele za [Yehova], Shetani naye akaenda kati yao. [Yehova] akamwuliza Shetani, Umetoka wapi wewe? Ndipo Shetani akamjibu [Yehova], na kusema, Natoka katika kuzunguka-zunguka duniani, na katika kutembea huku na huku humo. Kisha [Yehova] akamwuliza Shetani, Je! umemwangalia huyo mtumishi wangu Ayubu? kwa kuwa hapana mmoja aliye kama yeye duniani, mtu mkamilifu na uelekevu, mwenye kumcha Mungu na kuepukana na uovu.”—Ayubu 1:6-8.
6. Ni suala gani ambalo Biblia inaonyesha lilikuwako siku za Ayubu?
6 Sababu gani Yehova alimwambia Shetani kwamba Ayubu alikuwa mtu mnyofu? Kwa wazi, kulikuwako suala la kama Ayubu angeendelea au hangeendelea kuwa mwaminifu kwa Yehova. Ebu fikiria ulizo hili la Mungu, “Umetoka wapi wewe?” na jibu la Shetani, “Natoka katika kuzunguka-zunguka duniani, na katika kutembea huku na huku humo.” Ulizo hilo na jibu la Shetani lilionyesha kwamba Yehova alikuwa akimruhusu Shetani awe na uhuru wa kutimiza dai lake la upinzani kwamba yeye angeweza kuondoa mtu ye yote upande wa Mungu. Basi, Shetani alimpa Yehova jibu gani juu ya uaminifu wa Ayubu?
7, 8. (a) Shetani alisema Ayubu alitumikia Mungu kwa sababu gani? (b) Yehova alifanya nini ili ajibu suala hilo?
7 “Ndipo Shetani akamjibu [Yehova], na kusema, Je! huyo Ayubu yuamcha [Yehova] bure? Wewe hukumzingira kwa ukigo pande zote, pamoja na nyumba yake, na vitu vyote alivyo navyo? kazi za mikono yake umezibarikia, nayo mali yake imeongezeka katika nchi. Lakini nyosha mkono wako sasa, uyaguse hayo yote aliyo nayo, naye atakukufuru mbele za uso wako.” —Ayubu 1:9-11.
8 Kwa jibu lake Shetani alikuwa akitoa kisababu kisichofaa juu ya kilichomfanya Ayubu awe mwaminifu kwa Mungu. ‘Ayubu anakutumikia wewe,’ Shetani akabisha, ‘kwa sababu ya vitu unavyompa, si kwa sababu anakupenda wewe.’ Vilevile Shetani alilalamika kwamba Yehova alikuwa akitumia uwezo wake mkubwa zaidi isivyofaa. ‘Sikuzote umemlinda yeye,’ akasema. Basi, ili kujibu suala hilo, Yehova alisema hivi: “Tazama, yote aliyo nayo yamo katika uwezo wako; lakini usinyoshe mkono wako juu yake yeye mwenyewe.”—Ayubu 1:12.
9. Ni taabu gani ambayo Shetani alimfanyia Ayubu, na matokeo yalikuwa nini?
9 Mara hiyo Shetani akaanza kumtaabisha Ayubu. Alifanya mpango mifugo yote ya Ayubu ikauawa au ikaibwa. Kisha akahakikisha kwamba watoto 10 wa Ayubu wameuawa. Ayubu alipoteza karibu kila kitu, hata hivyo akaendelea kuwa mwaminifu kwa Yehova. Yeye hakumtukana Mungu. (Ayubu 1:2, 13-22) Lakini jambo hilo halikumalizikia hapo.
10. Ni nini kinachoonyesha kwamba Shetani hakuchoka?
10 Shetani alijitokeza tena mbele za Yehova akiwa kati ya malaika wale wengine. Tena Yehova akamwuliza Shetani ikiwa ameuona uaminifu wa Ayubu, akisema: “Naye hata sasa anashi-kamana na utimilifu wake.” Ndipo Shetani akajibu: “Ngozi kwa ngozi, naam, yote aliyo nayo mtu atayatoa kwa ajili ya uhai wake. Lakini sasa nyosha mkono wako, uuguse mfupa wake na nyama yake, naye atakukufuru mbele za use wako.”—Ayubu 2:1-5.
11. (a) Ni majaribu gani zaidi ambayo Shetani alimfanyia Ayubu? (b) Matokeo yalikuwa nini?
11 Katika kujibu, Yehova alimpa Shetani ruhusa ya kumfanyia Ayubu lo lote aliloweza, ijapokuwa Mungu alisema hivi: ‘Usimwue.’ (Ayubu 2:6) Basi Shetani akampiga Ayubu kwa ugonjwa mbaya sana. Mateso ya Ayubu yalikuwa makubwa sana hata akaomba afe. (Ayubu 2:7; 14:13, 14) Mkewe mwenyewe alimgeuka akisema hivi: “Umkufuru Mungu, ukafe.” (Ayubu 2:9) Lakini Ayubu alikataa kufanya hivyo. “Mpaka nikate pumzi sitajiondolea mbali ukamilifu wangu!” akasema. (Ayubu 27:5, NW) Ayubu aliendelea kuwa mwaminifu kwa Mungu. Basi ilionyeshwa kwamba Shetani alikuwa na kosa kwa kudai kwamba Ayubu alimtumikia Mungu ili apate faida za kimwili wala si kwa sababu ya upendo. Vilevile ilionyeshwa kwamba Shetani hangeweza kuondoa kila mtu asimtumikie Mungu.
12. (a) Ni jibu gani kwa dai la upinzani wa Shetani ambalo Ayubu alimpa Mungu? (b) Uaminifu wa Yesu kwa Mungu ulionyesha nini?
12 Wewe unadhani mwendo wa uaminifu wa Ayubu ulimfanya Yehova aoneje? Ulimfurahisha sana! Neno la Mungu linasihi hivi: “Mwanangu, uwe na hekima na kunifurahisha moyo wangu; ili nipate kumjibu anilaumuye.” (Mithali 27:11) Ni Shetani anayemlaumu (anayemcheka-cheka) Yehova. Na kwa mwendo wake wa uaminifu Ayubu alifurahisha moyo wa Mungu. Hilo lilimpa Mungu jibu kwa lawama la Shetani la kujisifu au kwa dai lake la upinzani kwamba wanadamu hawangemtumikia Yehova wakiwa katika majaribu. Wengine wengi pia wamempa Mungu jibu lilo hilo. Mfano ulio mkubwa kuliko yote ni yule mwanadamu mkamilifu Yesu. Yeye alishikilia sana ushikamanifu wake kwa Mungu yajapokuwapo majaribu yote na taabu zote ambazo Shetani alimletea. Hilo lilionyesha kwamba yule Adamu mkamilifu angaliweza kufanya vivyo hivyo kama angalitaka, na kwamba Mungu alikuwa na haki kutaka utii mkamilifu kutoka kwa wanadamu.
WEWE UKO UPANDE GANI?
13. (a) Namna yako ya kuishi inahusuje lile suala? (b) Tunawezaje kumfurahisha Mungu au kumhuzunisha?
13 Namna gani maisha yako? Huenda ukadhani kwamba ni mamoja tu ukiishi vyo vyote. Lakini si mamoja. Kwamba unajua au hujui, maisha yako yanaunga mkono ama upande wa Mungu wa lile suala ama upande wa Shetani. Yehova anakujali, naye anataka kuona ukimtumikia kisha uishi milele katika dunia ya paradiso. (Yohana 3:16) Waisraeli walipomwasi Mungu, aliona uchungu au akasikitika. (Zaburi 78:40, 41) Je! mwendo wako wa maisha unamfurahisha Mungu au unamhuzunisha? Bila shaka, ili umfurahishe Mungu inakupasa ujifunze sheria zake na kuzitii.
14. (a) Kwa habari ya ngono, ni sheria gani ambazo lazima tutii ili tumfurahishe Mungu? (b) Kwa sababu gani kuvunja sheria hizo ni kosa?
14 Shabaha (nia) kubwa ya Shetani ni kuwafanya watu wavunje sheria za Mungu zinazoongoza matumizi ya nguvu zao za uzazi, na mpango wake wa ndoa na jamaa. Sheria za Mungu zinazolinda furaha yetu zinasema kwamba watu wasiooana hawapaswi kufanya ngono (kulalana), na kwamba watu waliooana hawapaswi kufanya ngono na mtu mwingine ye yote asiye mwenzi wao wa ndoa. (1 Wathesalonike 4:3-8; Waebrania 13:4) Sheria ya Mungu inapovunjwa, mara nyingi kunazaliwa watoto wasio na wazazi wa kuwapenda na kuwataka. Huenda akina mama hata wakatoa mimba, wakaua watoto kabla hawajazaliwa. Isitoshe, wengi ambao wanafanya uasherati wanapatwa na magonjwa ya kaswende na kisonono yanayoweza kuharibu miili ya watoto ambao huenda wakazaa. Kufanya ngono na mtu ambaye hukuoana naye ni tendo la kutokuaminika, ni kumkosea Mungu. Ayubu alisema hivi: “Kama moyo wangu ulishawishwa kwa mwanamke, nami nimeotea mlangoni pa jirani yangu . . . hilo lingekuwa kosa kuu; naam, lingekuwa ni uovu wa kuadhibiwa na waamuzi.”—Ayubu 31:1, 9, 11.
15. (a) Tukifanya uasherati, tunafurahisha nani? (b) Sababu gani ni jambo la hekima kutii sheria za Mungu?
15 Haitupasi kushangaa kwa vile ulimwengu huu unaotawalwa na Ibilisi ungefanya lionekane kuwa jambo zuri na linalofaa kwako kufanya ngono na mtu ambaye hukuoana naye. Lakini ukifanya hivyo, unapendeza nani? Ni Shetani, si Yehova. Ili umfurahishe Mungu, ni lazima ‘ukimbie uasherati.’ (1 Wakorintho 6:18, NW) Ni kweli kwamba si rahisi sikuzote kuwa mwaminifu kwa Mungu. Haikuwa rahisi wala kwa Ayubu. Lakini kumbuka, ni jambo la hekima kutii sheria za Mungu. Sasa utakuwa mwenye furaha zaidi ukifanya hivyo. Lakini, jambo la maana zaidi ni kwamba utakuwa ukiunga mkono upande wa Mungu wa lile suala na utamfurahisha. Naye atakubariki kwa kukupa uzima wa milele katika furaha hapa duniani.
16. (a) Ayubu alibarikiwa namna gani kwa uaminifu wake? (b) Ni nini linaloweza kusemwa juu ya umizo analotokeza Shetani, kama vile kuua watoto 10 wa Ayubu?
16 Kweli, Shetani aliweza kumfanya Ayubu awe maskini na kuua watoto wake 10. Hakuna shaka kwamba hiyo ilikuwa hasara kubwa kwa Ayubu. Lakini Ayubu alipokuwa mwaminifu, Mungu alimbariki kwa kumpa vitu mara mbili kuliko vile alivyokuwa navyo kabla Shetani hajaruhusiwa kumjaribu. Vilevile Ayubu akawa baba wa watoto 10 zaidi. (Ayubu 42:10-17) Tena, tunaweza kuwa na hakika kwamba watoto 10 wa Ayubu waliouawa na Shetani watarudishwa kwenye uzima katika ufufuo wa wafu. Kweli kweli, Baba yetu mwenye upendo, Yehova, atamaliza katika wakati wake mwenyewe umizo au taabu yo yote ambayo Shetani anaruhusiwa kutokeza.
17. Sababu gani ni jambo la maana sana kufikiria namna tunavyoishi?
17 Basi sikuzote itakupasa kukumbuka kwamba ni jambo la maana sana ufikirie namna unavyoishi. Ni jambo la maana linalofikiriwa hasa na Yehova na Shetani Ibilisi. Hiyo ni kwa sababu wewe unahusika katika lile suala la kama wanadamu watakuwa au hawatakuwa waaminifu kwa Mungu.
[Picha katika ukurasa wa 106]
Ayubu alikanusha dai la upinzani la shetani la kwamba hakuna mtu ambaye angeendelea kuwa mwaminifu kwa Mungu akijaribiwa
[Picha katika ukurasa wa 110]
Kufanya ngono na mtu ambaye hukuoana naye ni kumkosea Mungu
[Picha katika ukurasa wa 111]
Yehova alimbariki Ayubu kwa uaminifu wake kwa kumpa vitu vingi kuliko vile alivyotangulia kuwa navyo