Yehova Atujua Vema!

YEHOVA atujua sisi kikweli, hasa ikiwa sisi ni watumishi wake waaminifu-washikamanifu. Rafiki za karibu, watu wa ukoo, hata wazazi, hawatujui vema kwa kadiri ile yeye atujuavyo. Naam, Mungu atujua vema kuliko vile sisi twajijua wenyewe!

Maarifa makamilifu ya Yehova kuhusu watumishi wake yalionyeshwa vema katika Zaburi 139. Daudi alisema nini katika zaburi hiyo? Na maarifa ya Mungu kuhusu sisi yapasa kuathirije maneno na vitendo vyetu?

Kiasi Ambacho Yehova Ajua!

Kwa kuwa Mungu ndiye Muumba wetu, twapaswa kumtarajia awe na maarifa kamili kuhusu sisi. (Matendo 17:24-28) Kwa sababu hiyo, Daudi angeweza kusema hivi: “O Yehova, umenipekua sehemu zote zangu, nawe wanijua mimi.” (Zaburi 139:1, NW) Maarifa ya Mungu kuhusu Daudi yalikuwa kama yale yenye kupatikana kupitia kuchunguza mambo kabisa kabisa. Kwa kuterema kupekuliwa na Yehova sehemu zake zote, mtunga zaburi alijiachilia kabisa aelekezwe na udhibiti na mwongozo wa Mungu. Vivyo hivyo, kwa njia yenye sala Mashahidi wa Yehova ‘hukunjua njia yao juu ya Yehova, wakimtegemea,’ wakiwa na uhakika kwamba sikuzote yeye atafanya lililo sawa. (Zaburi 37:5) Ndani ya mioyo yetu mna hisia ya usalama wa kiroho kwa sababu sisi twatafuta kuongozwa na hekima ya kimungu, nasi twaunyenyekea kwa nia mwongozo wa kimungu. (Mithali 3:19-26) Kama Daudi, sisi twaweza kuchota faraja kutokana na maarifa ya kwamba Mungu hututazama kwa makini, huelewa matatizo yetu, na sikuzote yuko tayari kutusaidia.

“Wewe mwenyewe umepata kujua kuketi kwangu na kuinuka kwangu,” akakiri mtunga zaburi. (Zaburi 139:2a, NW) Mungu alijua kila jambo kuhusu utendaji wa Daudi, kama vile kuketi kwake mwishoni mwa siku ya kazi na kuinuka kwake baada ya usingizi wa usiku. Ikiwa sisi ni Mashahidi wa Yehova, uwe na uhakikisho wa kwamba Mungu atujua sisi vema kwa kadiri hiyo pia.

Daudi alikiri hivi: “Wewe umefikiria wazo langu kutokea kule mbali.” (Zaburi 139:2b, NW) Ingawa Mungu hukaa katika mbingu mbali sana na mandhari ya kidunia, yeye alijua mambo ambayo Daudi alikuwa akiwaza. (1 Wafalme 8:43) Huo muono-ndani haupasi kutushangaza, kwa maana Yehova “huona moyo ulivyo.” (1 Samweli 16:7, NW; Mithali 21:2) Uhakika wa kwamba Mungu hufikiria mawazo yetu wapasa kutusukuma tufikirie mambo yaliyo safi, yenye nguvu za wema, yenye kustahiki sifa. Tena yafaa kama nini kwamba tuwe tukieleza mawazo yetu kwa ukawaida katika sala yenye kuhisiwa moyoni ili tupate kuwa na mwongozo wa kimungu na “amani ya Mungu”!​—Wafilipi 4:6-9.

Mtunga zaburi aliongeza hivi: “Wewe umepima kufunga kwangu safari na kulala kwangu kirefurefu, nawe umekuwa mwenye kuzoelea hata njia zangu zote.” (Zaburi 139:3, NW) Kwa uwazi kupima kufunga safari kwa Daudi kutoka mahali pamoja hadi mahali pengine na kulala kwake kirefurefu akiwa anapumzika kulimaanisha kwamba Yehova alichunguza sana sana kila jambo alilofanya mtunga zaburi. Ilikuwa kana kwamba Aliye Juu Zaidi alikuwa akipima matendo yote ya Daudi ili aamue hali halisi ya kujiendesha kwake. Mungu alikuwa na maarifa kamili juu ya njia za Daudi, vijia ambavyo alifuata maishani. Wakati Baba yetu wa kimbingu atuchunguzapo sisi vivyo hivyo, na apate kwamba sisi tunamtumikia kwa imani na tunabaki katika “kijia cha uadilifu” ambacho huongoza kwenye uhai wa milele.​—Mithali 12:28.

Kwa kuwa hakuna kitu ambacho Daudi angeweza kusema kingefichika kwa Mungu, yeye alisema hivi: “Kwa maana hata neno moja halijawa bado juu ya ulimi wangu, na kumbe, tazama! O Yehova, wewe tayari walijua lote.” (Zaburi 139:4, NW) Ikiwa sisi tuna mtaabiko mkubwa sana hivi kwamba hatujui la kusema katika sala, roho ya Yehova “hutuombea kwa kuugua kusikoweza kutamkwa.” (Warumi 8:26) Katika maongeo yetu, Mungu hutambua mambo yaliyo katika ncha ya ulimi lakini yenye kuachwa bila kusemwa, kwa maana yeye ajua hisia zetu za kweli. Na ikiwa sisi tuna upendo ambao shina lao ni “imani isiyo na unafiki,” hatutajaribu kamwe kudanganya wengine kwa “maneno laini.”​—1 Timotheo 1:5; Warumi 16:17, 18.

Daudi aliongeza hivi: “Nyuma na mbele yangu, wewe umenizingira mimi; nawe waweka mkono wako juu yangu.” (Zaburi 139:5, NW) Kwa kweli, Yehova ni kama alimsonga Daudi pande zote kama jiji lenye kuzingirwa katika pigano. Yaonekana kwamba mtunga zaburi alijua kwamba kulikuwa na mipaka ya mambo ambayo angeweza kufanya katika muda wa maisha yake. Pia alijua kwamba haikuwezekana kulikimbia jicho la Mungu lenye kukaa chonjo likitazama wala kuukimbia mkono, au udhibiti wake. Bila shaka, Daudi hakujaribu kufanya kimbio hilo, wala sisi hatujaribu. Lakini acheni sikuzote tujiendeshe wenyewe kwa kujua kwamba mkono wa Yehova uko juu yetu tukiwa Mashahidi wake.

Maarifa ya Mungu kuhusu Daudi yalimjaza mshangao wenye hofu nyingi. Hivyo, yeye alijulisha wazi hivi: “Maarifa hayo ni ya ajabu mno kwangu. Yako juu sana hivi kwamba mimi siwezi kuyafikia.” (Zaburi 139:6, NW) Maarifa ya Mungu kuhusu sisi mmoja mmoja ni ya ukamili kabisa hivi kwamba sisi hatuwezi kuyapima hata tufikie mwisho wa kina chayo, hata kama tuna ujuzi au mazoezi gani. Kwa kuwa maarifa hayo hupita uelewevu wa kibinadamu, twaweza kuwa na uhakika kwamba Yehova ajua yaliyo bora zaidi kwetu. Kwa sababu hiyo, tukisali kuomba kitu fulani na jibu lake liwe hapana, acheni sisi tunyenyekee mapenzi yake ya kimungu. Kama vile mtume Yohana alivyoandika: “Hata kiwe ni kitu gani ambacho tunaomba kulingana na mapenzi yake, yeye anatusikia.”​—1 Yohana 5:14, NW.

Hakuna Kuikimbia Roho ya Mungu

Si kwamba Yehova hujibu tu sala za watumishi wake walio waaminifu-washikamanifu bali roho yake hufanya kazi pia kuwaelekea na kuwasaidia wafanye mapenzi yake. Kwa uhakika, Daudi aliuliza hivi: “Ni wapi ambako mimi naweza kwenda kutoka kwenye roho yako, na ni wapi ambako mimi naweza kukimbia nitoke kwenye uso wako?” (Zaburi 139:7, NW) Mtunga zaburi alijua kwamba hangeweza kuikimbia roho, au kani ya utendaji ya Yehova ambayo yaweza kuzifikia hata sehemu zilizo za mbali kabisa za ulimwengu wote mzima. Na hakuna mtu awezaye kuutoroka uso wa Mungu, yaani, kukimbia asitazamwe naye kwa umakini. Ni kweli kwamba ‘Yona aliondoka akimbilie Tarshishi, apate kujiepusha na uso wa Yehova,’ lakini nabii huyo hakuweza ama kuepa yule samaki mkubwa ambaye Mungu alimweka ammeze ama kuepa wajibu wa kutoa hesabu kwa ajili ya mgawo wake wa kimungu. (Yona 1:3, 17; 2:10–3:4) Kwa hiyo acheni sisi tutegemee roho ya Yehova ituwezeshe kutimiza migawo yetu tuliyopewa na Mungu.​—Zekaria 4:6.

Kwa kuwa Daudi alijua kwamba haingewezekana kumponyoka Mungu, yeye alisema hivi: “Kama mimi ningepaa mbinguni, wewe ungekuwa huko; na kama mimi ningepaswa kutandaza kiti-kitanda changu katika Sheoli, tazama! wewe ungekuwa huko.” (Zaburi 139:8, NW) Katika siku ya mtunga zaburi, ‘kupaa mbinguni’ kulimaanisha kwenda juu ndani ya ile milima iliyoinuka, ambayo vilele vyayo huwa mara nyingi vimefichwa na mawingu. Hata hivyo, kama sisi tungekuwa juu ya kilele cha mlima ulio juu zaidi, hatungekuwa mahali pasipoweza kufikiwa na roho ya Mungu. Zaidi ya hilo, hatungeweza kukimbia tusionwe naye kama kiti-kitanda chetu kingekuwa katika Sheoli, jambo ambalo kwa usemi wa kitamathali lamaanisha sehemu za chini kabisa za dunia.​—Linganisha Kumbukumbu 30:11-14; Amosi 9:2, 3.

“Kama mimi ningechukua mabawa ya pambazuko, ili kwamba niweze kukaa katika bahari iliyo mbali zaidi,” akasema Daudi, “humo, pia, mkono wako mwenyewe ungeniongoza na mkono wako wa kulia ungenishika.” (Zaburi 139:9, 10, NW) “Mabawa ya pambazuko” yamaanisha nini? Maneno haya yaeleza kwa njia ya ushairi juu ya jinsi nuru ya pambazuko hutandaa upesi kutoka mashariki hadi magharibi, kana kwamba ina mabawa. Lakini namna gani kama Daudi angeweza kuchukua mabawa ya pambazuko na kufikia bahari au visiwa vilivyo mbali zaidi magharibi? Bado angepasishwa kuwa chini ya mkono, au udhibiti na mwelekezo wa Mungu. Kwa njia ya roho Yake, Yehova angekuwa hapo kumwongoza mtunga zaburi kwa huruma.​—Zaburi 51:11.

Giza Si Tatizo kwa Mungu

Wala umbali wala giza haliwezi kuweka mtu mahali pa mbali asipoweza kufikiwa na Mungu. Kwa hiyo Daudi aongeza hivi: “Na kama mimi ningesema: ‘Kwa uhakika giza lenyewe litanibamba haraka-haraka!’ hapo usiku ungekuwa nuru kunizunguka mimi. Hata giza lenyewe halingethibitika kuwa na ugiza mwingi mno kwako wewe, bali usiku wenyewe ungeng’aa sawa na vile mchana hufanya; hilo giza lingeweza hata kuwa sawa na nuru.” (Zaburi 139:11, 12, NW) Mtu angeweza kufunikwa katika giza tititi, kana kwamba abambwa nalo. Lakini kwa Yehova yeye angeonekana kana kwamba amesimama katika nuru nyangavu ya mchana. Hakuna mtu awezaye kumficha Mungu dhambi zozote zenye kutendwa gizani.​—Isaya 29:15, 16.

Kufichika hakuzuii mtazamo makini wa Muumba wetu. Katika habari hii Daudi alisema hivi: “Kwa maana wewe mwenyewe ulitokeza figo zangu; wewe uliniweka mimi nikiwa nimewekwa mbali katika kisetiri katika tumbo la mama yangu. Mimi nitakuhimidi wewe kwa sababu nimefanyizwa kwa njia ya ajabu yenye kuvuvia hofu. Kazi zako ni za ajabu, kama vile nafsi yangu yajua vema sana. Wewe hukufichwa mifupa yangu wakati mimi nilipofanyizwa katika siri, wakati mimi nilipofumwa katika sehemu za chini kabisa za dunia. Macho yako yaliona hata kiinitete cha mimi, na katika kitabu chako sehemu zacho chote zilikuwa zimeandikwa, kwa habari ya siku ambazo hizo [sehemu za mwili] ziliumbika na kulikuwa hakujawa na hata moja [sehemu ya mwili yenye kupambanuliwa na nyinginezo].”​—Zaburi 139:13-16, NW.

Yehova Mungu, ambaye ajua hisia zetu za kina kirefu zaidi, alifanyiza figo za Daudi. Zikiwa ndani ya kina cha mwili, figo ni miongoni mwa viungo vyenye kufichika zaidi na visivyofikika kwa urahisi, lakini Mungu aweza kuziona. Yeye aweza hata kutazama ndani ya tumbo, au mji wa mimba wa mama. Naam, Yehova aweza kuona ndani ya kiinitete chenye kusitawi! Kule tu kufikiria njia ya ajabu ambayo yeye aliumbwa kwayo katika tumbo la uzazi kulisukuma Daudi asifu Mfanyi wake. Kwa uwazi mtunga zaburi alirejezea mji wa mimba wa mama kwa kuusema kuwa “sehemu za chini kabisa za dunia.” Humo, mifupa, kano, misuli, mishipa ya fahamu, na mishipa ya damu ya kitoto hufumanishwa pamoja, ikiwa imefichika bila kuonekana na mwanadamu lakini ikiwa yaonekana na Mungu.

Kabla sehemu za mwili wa Daudi hazijapambanuka moja kutoka kwa nyingine katika mji wa mimba wa mama yake, sura yake ilijulikana kwa Mungu. Kwa nini? Kwa sababu usitawi wa kiinitete ulifuata kielelezo fulani hususa, kana kwamba ukitii maagizo yaliyoandikwa katika kitabu fulani. Lo, jinsi hiyo yaonyesha hekima na uwezo wa Yehova kuona hata mambo yaliyofichika! Hiyo yapasa pia kutufanya sisi tuthamini kwamba Mungu ndiye aliyeumba jamii ya kibinadamu na ndiye mwenye daraka la kufanyiza ule utaratibu wa kuzaana ambao umetutokeza sisi mmoja mmoja.

Lo, Mawazo ya Mungu Ni ya Thamani Kubwa Kama Nini!

Kufikiria usitawi wa kitoto katika mji wa mimba kulifanya Daudi awaze juu ya hekima ya Mungu. Hivyo, mtunga zaburi alipaaza mshangao huu: “Kwa hiyo, kwangu mimi mawazo yako ni ya thamani kama nini! O Mungu, hayo hujumlika kuwa ya hesabu kubwa kama nini!” (Zaburi 139:17, NW) Daudi alithamini sana mawazo ya Yehova, nayo ni mengi sana hivi kwamba yeye alishangazwa na ‘hesabu kubwa yayo.’ Ikiwa mawazo ya Mungu yana thamani kubwa kwetu, sisi tutakuwa wanafunzi wenye bidii ya uendelevu kuhusu Maandiko. (1 Timotheo 4:15, 16) Mawazo yake yaliyoandikwa ni ‘yenye manufaa kwa kufundisha, kwa kukaripia, kwa kunyoosha mambo, kwa kutia nidhamu katika uadilifu, ili kwamba mtu wa Mungu apate kuwa mweza mambo kikamili, mwenye kutayarika kwa vifaa vya kila kazi njema.’​—2 Timotheo 3:16, 17, NW.

Kuhusu mawazo ya Yehova, Daudi alisema hivi: “Kama mimi ningejaribu kuyahesabu, hayo yazidi hata punje za mchanga. Mimi nimeamka, na bado mimi ningali pamoja na wewe.” (Zaburi 139:18, NW) Kwa kuwa mawazo ya Mungu ni mengi sana kuliko hata punje za mchanga, kama Daudi angeanza kuyahesabu wakati wa pambazuko, hangekuwa amemaliza ulipofika wakati wa kulala. Akiamka asubuhi, angekuwa bado pamoja na Yehova. Yaani, yeye angekuwa bado akihesabu mawazo ya Mungu. Kwa uhakika, kwa kuwa sisi twahitaji mwelekezo wa Yehova, utafakari wenye sala kuhusu mawazo na makusudi yake ungeweza hata kuwa ndilo jambo la mwisho kushughulisha akili zetu usiku na ndilo jambo la kwanza kuzishughulisha asubuhi.​—Zaburi 25:8-10.

Malipo ya Adhabu kwa Waovu

Kwa kuwa Mungu hutoa mwelekezo wa hekima, Daudi alihisije kuhusu wale wenye kukataa mwongozo wa kimungu? Yeye alisali hivi: “O laiti wewe, O Mungu, ungechinja aliye mwovu! Hapo hata wanadamu wenye hatia ya damu kwa uhakika wangeniondokea mimi, ambao husema mambo kuhusu wewe kulingana na wazo lao; wao wamechukua jina lako kwa njia isiyostahiki​—adui zako.” (Zaburi 139:19, 20, NW) Daudi hakujaribu kuua waovu bali alisali kwamba waweza kupata malipo ya adhabu mkononi mwa Yehova. Sisi twapaswa kuwa na mtazamo uo huo. Kwa kielelezo, twaweza kusali tupewe ujasiri wa kunena neno la Mungu wakati ambapo adui zetu watunyanyasa. (Matendo 4:18-21) Lakini hatutafuti kuwaondolea mbali adui zetu, kwa maana twajua kwamba Yehova amesema hivi: “Kisasi ni juu yangu, mimi nitalipa.”​—Waebrania 10:30; Kumbukumbu 32:35.

Kama Mungu angechinja waovu, wanadamu hao wenye hatia ya damu wangemwondokea Daudi. Wao walikuwa na kumbukumbu la matendo ya hatia katika kumwaga damu na pia walisema mambo kuhusu Yehova kulingana na wazo lao, si kupatana na mawazo yake. Zaidi ya hilo, walistahili kifo kwa kuleta suto juu ya jina la Mungu na kwa kulichukua kwa njia isiyostahiki, yawezekana kwa kulitumia walipokuwa wakiendeleza mipango yao miovu. (Kutoka 20:7) Sisi na tusiwe kamwe na hatia ya dhambi kama hizo!

Kwa sababu waovu walikuwa na hatia ya umwagaji damu na ya kuleta suto juu ya jina la Mungu, Daudi alijulisha wazi hivi: “Je! mimi sichukii wale ambao wanakuchukia wewe sana sana, O Yehova, na je! mimi sihisi karaha kwa wale wenye kuasi dhidi yako? Mimi nachukia hao kwa chuki kamili. Wao wamekuwa kwangu kama maadui wa kweli kweli.” (Zaburi 139:21, 22, NW) Daudi alihisi karaha kwa wanadamu hawa kwa sababu wao walimchukia Yehova sana sana na walikuwa wanaasi dhidi Yake. Wao walikuwa adui za mtunga zaburi kwa sababu alikirihi uovu wao, ukosefu wao wa kuhofu Mungu, na uasi dhidi ya Aliye Juu Zaidi.

Acha Mungu Akupekue Wewe Katika Sehemu Zote

Daudi hakutaka kuwa kama wanadamu waovu, lakini alijua kwamba hakupaswa kuwa na uhasama kuwaelekea. Kwa hiyo aliomba sana hivi: “Nipekue mimi katika sehemu zote, O Mungu, na ujue moyo wangu. Nichunguze mimi, na ujue mawazo yangu yenye kuniondolea utulivu, na uone kama ndani yangu mna njia yoyote yenye umivu, na uniongoze mimi katika njia ya wakati usio dhahiri.” (Zaburi 139:23, 24, NW) Kama mtunga zaburi, sisi twapaswa kutaka Mungu apekue mioyo yetu na atambue kama sisi tuna makusudio yasiyofaa. (1 Mambo ya Nyakati 28:9) Twapaswa kumwomba Yehova atuchunguze, ajue mawazo yetu yenye kutuondolea utulivu, na aone kama kuna njia yoyote yenye umivu ndani yetu. Ikiwa sisi tumekazwa sana na hangaiko kuhusu makosa yetu au kuna jambo fulani lenye kuumiza ndani yetu au jambo lenye kosa kuhusu makusudio yetu, acheni tusali kwa unyenyekevu na tuunyenyekee kikamili mwelekezo wa roho ya Mungu na shauri la Neno lake. (Zaburi 40:11-13) Kwa njia hizo, Rafiki yetu aliye bora kabisa, Yehova, aweza kutuongoza sisi katika njia ya wakati usio dhahiri, akitusaidia tufuatie mwendo wa uadilifu unaoongoza kwenye uhai wa milele.

Hivyo Zaburi 139 yaandaa kitia-moyo cha kweli kweli. Yaonyesha kwamba, kwa kuwa hakuna kitu huepuka kutazamwa kwa umakini na Baba yetu wa kimbingu, yeye aweza kutusaidia kila wakati wa uhitaji. (Waebrania 4:16) Zaidi ya hilo, kwa sababu Yehova atujua sisi kuliko vile sisi twajijua wenyewe, tuko salama katika utunzaji wake wenye upendo. (Kumbukumbu 33:27) Tukimwomba kwa unyenyekevu atupekue sisi katika sehemu zote na kuelekeza uangalifu wetu kwenye mambo mbalimbali ya udhaifu wetu binafsi, twaweza kusahihisha mambo kwa msaada wake. Basi, kwa uhakika maarifa ya Mungu kuhusu sisi mmoja mmoja yapasa kuathiri maisha yetu kwa njia njema. Yapasa kutusukuma kuwa watetezi wenye imani wa ibada ya kweli na kutembea kwa unyenyekevu mbele za Yehova, ambaye atujua sisi vema sana.