Ifanye Mikono Ya Milele ya Yehova Iwe Utegemezo Wako

“Mungu wa milele ni kao lako, na mikono ya milele iko chini.”—KUMBUKUMBU LA TORATI 33:27. American Standard Version.

1, 2. Kwa nini watu wa Yehova waweza kuwa na hakika katika utegemezo wake?

YEHOVA hujali watu wake. Kwa mfano, katika mateso yote ya Waisraeli, “yeye aliteswa”! Katika upendo na huruma, yeye ‘aliwainua, akawachukua.’ (Isaya 63:7-9) Kwa hiyo tukiwa waaminifu kwa Mungu, twaweza kuwa na hakika katika utegemezo wake.

² Nabii Musa alisema hivi: “Mungu wa milele ndiye makazi yako, na mikono ya milele i chini yako.” (Kumbukumbu la Torati 33:27) Tafsiri nyingine yasema hivi: “Mungu wa milele ni kao lako, na mikono ya milele iko chini.” (American Standard Version) Lakini mikono ya Mungu hutegemezaje watumishi wake?

Kwa Nini Kuna Shida Nyingi Sana?

 3. Ainabinadamu watiifu wataonea shangwe kikamili “uhuru wa utukufu wa watoto wa Mungu” wakati gani?

³ Kumtumikia Yehova hakutukingi na shida zilizo kawaida kwa wanadamu wasiokamilika. Mtumishi wa Mungu Ayubu alisema hivi: “Mwanadamu aliyezaliwa na mwanamke siku zake za kuishi si nyingi, naye hujaa taabu.” (Ayubu 14:1) Kuhusu “siku za miaka yetu,” mtunga zaburi alisema hivi: “Kiburi chake ni taabu na ubatili.” (Zaburi 90:10) Maisha yatakuwa hivyo mpaka ‘viumbe vyenyewe navyo viwekwe huru na kutolewa katika utumwa wa uharibifu, hata viingie katika uhuru wa utukufu wa watoto wa Mungu.’ (Warumi 8:19-22) Hilo litatukia wakati wa Utawala wa Kristo wa Miaka Elfu. Kwa msingi wa dhabihu ya Yesu ya fidia, raia wa kibinadamu wa Ufalme wakati huo watapata ukombozi katika dhambi na kifo. Mwishoni mwa mileani, Kristo na wafalme-makuhani wenzake watakuwa wamesaidia wanadamu watiifu wafikie ukamilifu, na majina ya wale watakaokuwa washikamanifu kwa Mungu wakati wa jaribu la mwisho la Shetani na roho wake waovu yataandikwa kwa kudumu katika “kitabu cha uzima.” (Ufunuo 20:12-15) Kisha wataonea shangwe kikamili uhuru mtukufu wa watoto wa Mungu.

 4. Badala ya kulalamikia hali yetu ya maisha, twapaswa kufanya nini?

⁴ Wakati wa sasa, badala ya kulalamikia hali zetu za maisha, acheni tumtumaini Yehova. (1 Samweli 12:22; Yuda 16) Acheni pia tuwe na shukrani kwa ajili ya Kuhani Mkuu wetu, Yesu, ambaye kupitia yeye twaweza kumkaribia Mungu “ili tupewe rehema, na kupata neema [fadhili zisizostahiliwa, NW] ya kutusaidia wakati wa mahitaji.” (Waebrania 4:14-16) Tusiwe kamwe kama Adamu. Kwa kweli, alimshtaki Mungu kimakosa kuwa alimpa mke mbaya, akisema hivi: “Huyo mwanamke uliyenipa awe pamoja nami ndiye aliyenipa matunda ya mti huo, nikala.” (Mwanzo 3:12) Mungu hutoa vitu vizuri naye hatuletei shida. (Mathayo 5:45; Yakobo 1:17) Taabu mara nyingi hutokezwa na ukosefu wetu wenyewe wa hekima au na makosa ya mtu mwingine. Huenda pia zikatujia kwa sababu sisi ni wenye dhambi na tunaishi katika ulimwengu ulio chini ya utawala wa Shetani. (Mithali 19:3; 1 Yohana 5:19) Hata hivyo, sikuzote mikono ya milele ya Yehova hutegemeza watumishi wake washikamanifu ambao humtegemea kwa sala na ambao hutumia kibinafsi shauri la Neno lake.—Zaburi 37:5; 119:105.

Kutegemezwa Wakati wa Ugonjwa

 5. Wagonjwa waweza kupata kitia-moyo gani kwenye Zaburi 41:1-3?

⁵ Ugonjwa nyakati nyingi husababisha taabu kwa wengi wetu. Hata hivyo, Daudi alisema hivi: “Mwenye furaha ni ye yote anayemtendea mnyonge kwa huruma; katika siku ya msiba Yehova atamtorosha. Yehova mwenyewe atamlinda na kumhifadhi hai. Atatangazwa kuwa mwenye furaha duniani; nawe huwezi kumpeleka kwenye nafsi ya adui zake. Yehova mwenyewe atamtegemeza akiwa mgonjwa kitini. Kitanda chake chote utakibadili kwa hakika wakati wa ugonjwa wake.”—Zaburi 41:1-3, NW.

6, 7. Mungu alimsaidiaje Daudi alipokuwa mgonjwa kitandani, na hilo laweza kutiaje moyo watumishi wa Yehova leo?

⁶ Mtu mwenye ufikirio humsaidia mwenye uhitaji. “Siku ya msiba” yaweza kuwa pindi yoyote ya msiba au muda mrefu wa shida unaodhoofisha mtu. Yeye humtumaini Mungu amlinde wakati wa ugonjwa, na wengine ‘watamtangaza kuwa mwenye furaha’ kwa kueneza habari za jinsi Mungu anavyoshughulika naye kwa rehema. Mungu alimtegemeza Daudi ‘alipokuwa mgonjwa kitini,’ labda katika ile pindi ya shida wakati mwana wa Daudi Absalomu alipojaribu kutwaa kiti cha ufalme cha Israeli.—2 Samweli 15:1-6.

⁷ Kwa kuwa Daudi alikuwa ameonyesha ufikirio kwa wanyonge, alihisi kwamba Mungu angemtegemeza alipokuwa hoi kitandani. (Zaburi 18:24-26) Ingawa alikuwa na ugonjwa hatari, alikuwa na hakika kwamba Mungu ‘angekibadili kitanda chake,’ si kwa kuondoa ugonjwa wake kimuujiza, bali kwa kumwimarisha kwa fikira zenye kufariji. Ingekuwa kana kwamba Mungu alikuwa anakibadili kitanda chake kiwe cha kupatia nafuu badala ya cha ugonjwa. Vivyo hivyo, ikiwa tunateswa na ugonjwa tukiwa watumishi wa Mungu, mikono ya milele ya Yehova itatutegemeza.

Faraja kwa Wenye Kushuka Moyo

 8. Mkristo mmoja aliye mgonjwa ameonyeshaje kumtegemea Mungu?

⁸ Ugonjwa huenda ukasababisha mshuko wa akili. Mkristo mmoja aliye mgonjwa sana ambaye nyakati nyingine hukosa nguvu ya kutosha hata kuweza kusoma, asimulia hivi: “Hilo hunifanya nipatwe na hisiamoyo nyingi za mshuko wa moyo, hisia za kutostahili, na hata machozi,” yeye asema. Akijua kwamba Shetani ataka kumlemea kwa huzuni kwa kutumia hisia zake mwenyewe za kuvunjika moyo, yeye hupiga vita, akitambua kwamba kwa msaada wa Yehova hawezi kushindwa. (Yakobo 4:7) Mwanamume huyo ni kitia-moyo kwa wengine wanaojua kwamba anatumaini Mungu. (Zaburi 29:11) Hata akiwa hospitalini, yeye huwapigia simu wagonjwa na wengine ili kuwajenga kiroho. Yeye mwenyewe hujengwa kwa kusikiliza mirekodio ya nyimbo za Ufalme na ya makala katika jarida hili na gazeti jenzi Amkeni!, na kwa kushirikiana na Wakristo wenzake. Ndugu huyo asema hivi: “Mimi huongea na Yehova katika sala kwa kawaida, nikimwomba anipe nguvu, mwongozo, faraja na msaada ili nivumilie.” Ikiwa wewe ni Mkristo aliye na matatizo makubwa ya afya, mtumaini Yehova sikuzote na kufanya mikono yake ya milele iwe tegemezo lako.

 9. Ni mifano ipi inayoonyesha kwamba mshuko wa akili nyakati nyingine hutatiza watu wenye kumhofu Mungu?

⁹ Mshuko wa moyo ni tatizo la zamani. Alipokuwa chini ya jaribu, Ayubu alisema kama mtu mwenye kuhisi kwamba ameachwa na Mungu. (Ayubu 29:2-5) Kuhangaikia hali ya kuharibika ya Yerusalemu na kuta zake kulimfanya Nehemia kuwa mwenye huzuni, na Petro alishuka moyo sana kwa sababu ya kumkana Kristo hivi kwamba alilia kwa majonzi. (Nehemia 2:1-8; Luka 22:62) Epafrodito alishuka moyo kwa sababu Wakristo katika Filipi walisikia kwamba alikuwa mgonjwa. (Wafilipi 2:25, 26) Mshuko wa moyo uliwatatiza Wakristo wengine katika Thesalonike, kwa kuwa Paulo aliwahimiza ndugu huko ‘waseme kwa kuzifariji nafsi zilizoshuka moyo.’ (1 Wathesalonike 5:14, NW) Kwa hiyo Mungu husaidiaje watu kama hao?

10. Ni nini huenda kikasaidia katika kujaribu kukabiliana na mshuko wa akili?

¹⁰ Uamuzi wa kibinafsi lazima ufanywe kuhusu utibabu wa mshuko mkali wa moyo.a (Wagalatia 6:5) Pumziko la kutosha na utendaji wenye usawaziko huenda ukasaidia. Badala ya kuona matatizo mengi pamoja kuwa tatizo moja kubwa, mtu mwenye kushuka moyo huenda akaona inasaidia kusuluhisha tatizo moja moja. Msaada wenye kufariji kutoka kwa wazee wa kundi huenda ukawa na manufaa sana, hasa ikiwa tatizo hilo la kihisiamoyo linasababisha hangaiko la kiroho. (Yakobo 5:13-15) Zaidi ya yote, ni muhimu kumtegemea Yehova, ‘tukimtwika yeye fadhaa zetu zote, kwa maana yeye hujishughulisha sana na mambo yetu.’ Sala ya kuendelea na ya moyoni yaweza kumletea mtu ‘amani ya Mungu ipitayo akili zote, itakayohifadhi moyo na nia katika Kristo Yesu.’—1 Petro 5:6-11; Wafilipi 4:6, 7.

Yehova Hutusaidia Tuvumilie Huzuni ya Kufiwa

11-13. Ni nini chaweza kusaidia kupunguza huzuni juu ya kifo cha mpendwa?

¹¹ Jambo jingine lenye kutaabisha ni kifo cha mpendwa. Abrahamu aliomboleza kifo cha mkewe, Sara. (Mwanzo 23:2) Mwanawe Absalomu alipokufa, Daudi alielemewa na huzuni. (2 Samweli 18:33) Hata mwanadamu mkamilifu Yesu ‘alilia machozi’ juu ya kifo cha rafiki yake Lazaro! (Yohana 11:35) Kwa hiyo kunakuwa na huzuni kifo kinapochukua mpendwa. Lakini ni nini chaweza kupunguza huzuni kama hiyo?

¹² Mungu husaidia watu wake wavumilie huzuni nyingi mno ya kufiwa. Neno lake husema kwamba kutakuwako ufufuo. Kwa hiyo, sisi ‘hatuhuzuniki kama wengine wasio na matumaini.’ (1 Wathesalonike 4:13; Matendo 24:15) Roho ya Yehova hutusaidia kuwa na amani na imani na kutafakari juu ya wakati ujao mzuri ajabu ulioahidiwa katika Neno lake, hivi kwamba hatuelemewi kabisa na mafikira yenye kuhuzunisha kuhusu mpendwa aliyekufa. Faraja yaja pia kwa kusoma Maandiko na kusali kwa “Mungu wa faraja yote.”—2 Wakorintho 1:3, 4; Zaburi 68:4-6.

¹³ Tunaweza kupata faraja katika tumaini la ufufuo kama Ayubu mwenye kumhofu Mungu alivyofanya, aliyeinua sauti akisema hivi: “Laiti [Yehova] ungenificha kuzimuni [Sheoli, NW] ukanilinda kwa siri, hata ghadhabu zako zitakapopita, na kuniandikia muda ulioamriwa, na kunikumbuka! Mtu akifa, je atakuwa hai tena? Mimi ningengoja siku zote za vita vyangu, hata kufunguliwa kwangu kunifikilie. Wewe ungeita, nami ningekujibu; ungekuwa na tamaa ya kazi ya mikono yako.” (Ayubu 14:13-15) Hatupati huzuni sana wakati rafiki mpendwa anaposafiri, kwa kuwa tunatazamia kumwona tena. Huzuni yenye kina kirefu inayosababishwa na kifo cha mpendwa yaweza kupunguzwa kidogo tukiona kifo cha Mkristo mwaminifu kwa njia hiyo hiyo. Ikiwa alikuwa na tumaini la kidunia, ataamshwa atoke katika usingizi wa kifo hapa duniani wakati wa Utawala wa Kristo wa Miaka Elfu. (Yohana 5:28, 29; Ufunuo 20:11-13) Na ikiwa tunatumaini kuishi duniani milele, huenda tukawa hapa kumpokea mpendwa wetu aliyefufuliwa.

14. Wajane Wakristo wawili walikabilianaje na kifo cha waume wao?

¹⁴ Baada ya kifo cha mume wake, dada mmoja alijua kwamba alipaswa kuendelea na utendaji wake mbalimbali katika utumishi wa Mungu. Zaidi ya kuendelea kuwa na shughuli katika “kutenda kazi ya Bwana,” alishona firashi (tandiko la juu ya kitanda) yenye sehemu 800. (1 Wakorintho 15:58) “Huo ulikuwa mradi mzuri,” asema, “kwa sababu wakati wote nilipokuwa nikifanya hiyo kazi nilikuwa nikisikiliza nyimbo za Ufalme na kanda za Biblia, zilizoipa akili yangu kazi.” Yeye akumbuka kwa upendo ziara ya mzee mwenye ujuzi pamoja na mke wake. Mzee huyo alionyesha kwa Biblia, kwamba Mungu hujali wajane kweli kweli. (Yakobo 1:27) Mwanamke mwingine Mkristo hakujiacha ashindwe na kujisikitikia mume wake alipokufa. Yeye alithamini tegemezo la marafiki akaanza kupendezwa zaidi na wengine. “Nilisali mara nyingi zaidi nikasitawisha uhusiano na Yehova wenye ukaribu zaidi,” yeye asema. Na ni baraka kama nini kuwa na tegemezo la mikono ya milele ya Mungu!

Msaada Tunapokosa

15. Ni nini maana ya maneno ya Daudi kwenye Zaburi 19:7-13?

¹⁵ Ijapokuwa tunapenda sheria ya Yehova, nyakati nyingine tunakosa. Bila shaka hilo latutaabisha, kama lilivyomtaabisha Daudi, ambaye kwake sheria, makumbusho, amri, na maamuzi ya kihukumu ya Mungu vilikuwa vyenye kutamanika kuliko dhahabu. Alisema hivi: “Mtumishi wako huonywa kwazo, katika kuzishika kuna thawabu nyingi. Ni nani awezaye kuyatambua makosa yake? Unitakase na mambo ya siri. Umzuie mtumishi wako asitende mambo ya kiburi [vitendo vya kimbelembele, NW], yasinitawale mimi. Ndipo nitakapokuwa kamili, nami nitakuwa safi, sina kosa lililo kubwa.” (Zaburi 19:7-13) Acheni tuyachanganue maneno hayo.

16. Kwa nini tuepuke kimbelembele?

¹⁶ Vitendo vya kimbelembele ni vyenye uzito sana kuliko makosa. Sauli alikataliwa kuwa mfalme kwa ajili ya kutoa dhabihu kimbelembele na kwa ajili ya kuhifadhi uhai wa Agagi mfalme wa Waamaleki na kuhifadhi hai nyara zile bora zaidi, ingawa Mungu alikuwa ameamuru kwamba Waamaleki waangamizwe. (1 Samweli 13:8-14; 15:8-19) Mfalme Uzia alipigwa kwa ukoma kwa kutwaa shughuli za kikuhani kimbelembele. (2 Mambo ya Nyakati 26:16-21) Sanduku la agano lilipokuwa likipelekwa Yerusalemu na wale ng’ombe waliokuwa wakiliburuta gari wakawa karibu kuliangusha, Mungu alimpiga Uza akafa kwa ajili ya kushika Sanduku lile kulitegemeza isivyopasa. (2 Samweli 6:6, 7) Kwa hiyo, ikiwa hatujui jambo la kufanya au kama tunapewa ruhusa kufanya jambo fulani, twapaswa kuonyesha kiasi na kuuliza shauri kutoka kwa wale wenye utambuzi. (Mithali 11:2; 13:10) Bila shaka, ikiwa tumekuwa wenye kimbelembele wakati wowote, twapaswa kusali ili kupata msamaha na kumwomba Mungu atusaidie tujilinde na kimbelembele katika wakati ujao.

17. Dhambi zilizofichwa zaweza kuathirije mtu, hata hivyo, msamaha na kitulizo vyaweza kupatikanaje?

¹⁷ Dhambi zilizofichwa zaweza kusababisha taabu. Kulingana na Zaburi 32:1-5, Daudi alijaribu kuficha dhambi yake, lakini alisema hivi: “Niliponyamaza mifupa yangu ilichakaa kwa kuugua kwangu mchana kutwa. Kwa maana mchana na usiku mkono wako ulinilemea. Jasho langu likakauka hata nikawa kama nchi kavu wakati wa kaskazi.” Kujaribu kutuliza dhamiri yenye hatia kulimchokesha Daudi, na maumivu makali yalipunguza nguvu yake kama mti unavyopoteza umajimaji wenye kutoa uhai wakati wa ukame au katika joto kavu ya kaskazi. Yaonekana aliathiriwa vibaya kiakili na kimwili na kupoteza shangwe kwa sababu ya kukosa kuungama. Ungamo kwa Mungu ndio tu lingeweza kuleta msamaha na kitulizo. Daudi alisema hivi: “Heri [Mwenye furaha, NW] aliyesamehewa dhambi, na kusitiriwa makosa yake. . . . Nalikujulisha dhambi yangu, wala sikuuficha upotovu wangu. Nalisema, Nitayakiri maasi yangu kwa BWANA [Yehova, NW]. Nawe ukanisamehe upotovu wa dhambi yangu.” Msaada wenye upendo kutoka kwa wazee Wakristo waweza kusaidia kuendeleza hali ya kupata nafuu kiroho.—Mithali 28:13; Yakobo 5:13-20.

18. Kuna ushuhuda gani kwamba dhambi yaweza kuwa na matokeo yenye kudumu kwa muda mrefu, lakini nini chaweza kuwa chanzo cha faraja katika hali kama hizo?

¹⁸ Dhambi yaweza kuwa na matokeo ya kudumu kwa muda mrefu. Ilikuwa hivyo kwa Daudi, aliyefanya uzinzi pamoja na Bath-sheba, akafanya hila ili mume wake afe, akamwoa mjane mwenye mimba. (2 Samweli 11:1-27) Ingawa Mungu alionyesha rehema kwa sababu ya agano la Ufalme, toba ya Daudi, na jinsi Daudi alivyotendea wengine kwa rehema, Daudi alipatwa na ‘uovu katika nyumba yake.’ (2 Samweli 12:1-12) Mtoto wa uzinzi alikufa. Mwana wa Daudi Amnoni alimlala kwa nguvu Tamari dada-nusu yake naye akauawa kwa amri ya Absalomu ndugu ya Tamari. (2 Samweli 12:15-23; 13:1-33) Absalomu alimtia aibu Daudi kwa kulala na masuria wa Daudi. Yeye alijaribu kujitwalia kiti cha ufalme lakini akauawa. (2 Samweli 15:1–18:33) Dhambi bado ina matokeo mabaya. Kwa mfano, mtenda mabaya aliyetengwa na ushirika huenda akatubu na kurudishwa kundini, lakini huenda ikachukua miaka mingi kujipatia tena ile sifa iliyoharibiwa na kushinda maumivu ya kihisiamoyo yaliyotokezwa na dhambi. Kwa wakati wa sasa, inafariji kama nini kuwa na msamaha wa Yehova na tegemezo la mikono yake ya milele!

Kuponyoshwa Katika Mikazo Tuliyo Nayo

19. Roho ya Mungu yaweza kusaidiaje tunapojaribiwa vikali?

¹⁹ Tunapojaribiwa vikali, huenda tukakosa hekima na nguvu za kutosha kufanya uamuzi na kuutekeleza. Katika hali kama hiyo, roho ya Mungu “hutusaidia udhaifu wetu, kwa maana hatujui kuomba jinsi itupasavyo; lakini Roho mwenyewe [roho yenyewe, NW] hutuombea kwa kuugua kusikoweza kutamkwa.” (Warumi 8:26) Yehova akisababisha badiliko la hali, twapaswa tushukuru. Hata hivyo, mkono wake huenda ukatuokoa katika njia nyingine. Tukisali tupate hekima, huenda Yehova akatuonyesha kupitia roho yake kile tunachopaswa kufanya na kuandaa nguvu inayohitajiwa kukifanya. (Yakobo 1:5-8) Kwa msaada wake, twaweza kuvumilia ‘tunapohuzunishwa kwa majaribu ya namna mbalimbali’ na kuyapita tukiwa na imani iliyojaribiwa na kuimarishwa.—1 Petro 1:6-8.

20. Tutaonea shangwe nini tukifanya mikono ya milele ya Yehova iwe utegemezo wetu kweli kweli?

²⁰ Acheni tusichoke kamwe kumwendea Mungu kwa sala. “Macho yangu humwelekea BWANA [Yehova, NW] daima, naye atanitoa miguu yangu katika wavu,” akasema Daudi. “Uniangalie na kunifadhili, maana mimi ni mkiwa na mteswa. Katika shida za moyo wangu unifanyie nafasi, na kunitoa katika dhiki zangu. Utazame teso langu na taabu yangu; Unisamehe dhambi zangu zote.” (Zaburi 25:15-18) Kama Daudi, tutaonea shangwe ukombozi, upendeleo, na msamaha wa kimungu tukifanya mikono ya milele ya Yehova iwe utegemezo wetu kweli kweli.

[Maelezo ya Chini]

Ungeitikiaje?

◻ Yehova husaidiaje watumishi wake walio wagonjwa?

◻ Ni nini chaweza kusaidia tunapojaribu kukabiliana na mshuko wa akili?

◻ Ni nini chaweza kupunguza huzuni juu ya kifo cha mpendwa?

◻ Wale wanaoficha dhambi zao wanaweza kupataje kitulizo?

◻ Kuna msaada gani wakati watu wa Yehova wanapojaribiwa vikali?

[Picha katika ukurasa wa 16, 17]

Twaweza kupata faraja katika tumaini la ufufuo, kama alivyopata Ayubu