Mambo Makuu ya Biblia Zaburi 42 mpaka 72

Mngojee Yehova

Watumishi wa Yehova wanaweza kukabiliana na majaribu ya imani kwa uvumilivu kwa sababu Mungu ni Kimbilio na Mkombozi wao. Jambo hilo linaonyeshwa kwa njia nzuri kama nini katika Kitabu cha Pili cha Zaburi! Ndiyo, Zaburi 42 mpaka 72 zinathibitisha kwamba tunaweza kuvumilia tukimngojea Yehova kupita sala atende kwa ajili yetu.

‘Mngojee Yehova’

Tafadhali soma Zaburi 42 mpaka 45. Mlawi aliyehamishwa anahuzunika kwa sababu hawezi kwenda kwenye patakatifu pa Yehova, lakini anaridhika na ‘kumngojea Mungu’ atende kama Mkombozi wake. (Zaburi 42, 43, NW) Halafu ombi linatolewa kwa ajili ya taifa lililo hatarini, labda jambo hilo likigusia uvamizi ambao Waashuri walifanya juu ya Yuda katika siku za Mfalme Hezekia. (Zaburi 44) Halafu, wimbo wa arusi wa kifalme unaelekeza kwenye Masihi, Yesu Kristo.​—Zaburi 45, NW.

◆ 42:1—Mtunga Zaburi alikuwaje “kama ayala aoneavyo shauku mito ya maji”?

Kwa sababu fulani, Mlawi huyo alikuwa uhamishoni. Yeye alijisikia akikosa sana ibada katika patakatifu pa Yehova mpaka akajisikia kama ayala au kulungu wa kike ambaye anawindwa, au mwenye kiu, anayetamani sana kupata maji katika nchi isiyozaa, yenye ukame. ‘Aliona kiu’ au alitamani sana Yehova na pendeleo la kumwabudu Mungu kwenye patakatifu Pake.​—Mstari wa 2.

◆ 45:1—Ni “neno jema” jipi lililosukuma moyo wa mtunga Zaburi?

Sehemu ya Zaburi hii ilitumiwa kuhusu Yesu Kristo. (Zaburi 45:6, 7; Waebrania 1:8, 9) Kwa hiyo moyo wa mtunga zaburi uliamshwa na tukio la wakati ujao​—kusimamishwa kwa Ufalme wa Kimasihi katika mwaka 1914. Mashahidi wa Yehova, pia wanasukumwa na moyo kutangaza “neno jema” hilo.

Somo Kwetu Sisi: Jambo lililoonwa na mtunga zaburi akiwa uhamishoni linapasa litusukume sisi tuonyeshe uthamini wenye kina kirefu kwa ushirika ambao tunafurahia sasa pamoja na watu wa Yehova. Ikiwa kuwekwa kizuizini kwa sababu ya mateso kunatuzuia kwa muda tusiwe pamoja nao, tunaweza kutafakari juu ya furaha za wakati uliopita katika utumishi mtakatifu na tunapaswa kusali ili tupate uvumilivu huku ‘tukimngojea Mungu’ aturudishe katika ushirika wenye utendaji pamoja na waabudu wake.​—Zaburi 42:4, 5, 11; 43:3-5, NW.

Kimbilio Letu Lenye Rehema

Soma Zaburi 46 mpaka 51. Yehova, Kimbilio letu, atakomesha vita. (Zaburi 46) Yeye ni ‘Mfalme juu ya dunia yote,’ na Mlinzi huyo asiyeshindika ni Mungu wetu milele. (Zaburi 47, 48) Wanaogandamizwa ni lazima wamngojee Yehova, lakini wote ‘watoao dhabihu za kushukuru’ ‘wataonyeshwa wokovu wa Mungu.’ (Zaburi 49, 50) Tukikosa lakini tuonyeshe toba, kama vile Daudi alivyoonyesha kuhusu dhambi yake na Bathsheba, Mungu atatuokoa na hatia ya damu kwa sababu ‘moyo uliovunjwa na kupondeka hataudharau.’​—Zaburi 51.

◆ 46:2—‘Dunia inaweza kubadilikaje’?

Hata kama milima ingetokomea ndani ya bahari katika msukosuko wa kiasili wa dunia, wale wanaomtumaini Mungu hawangekuwa na jambo la kuwaogopesha. Hata kutukie nini, wao wanaweza kuwa na uhakika usiotikisika katika Yehova akiwa ndiye Kimbilio lao.

◆ 51:5—Daudi alikuwa akirejezea dhambi gani?

Yeye hakumaanisha kwamba uhusiano katika ndoa, mtungo wa mimba na kuzaa ni dhambi; wala hakuwa akimaanisha dhambi fulani ya mama yake. Bali, alikuwa akikubali hali yake mwenyewe ya dhambi akiwa mzao wa Adamu. (Ayubu 14:4; Warumi 5:12) Yehova alimwonyesha Daudi rehema si kwa sababu ya agano la Ufalme tu, bali pia kwa sababu ya toba yake.​—2 Samweli 7:12-16.

Somo Kwetu Sisi: Zaburi 46 ingeufaa sana wakati ambao Yerusalemu ulitishwa na Waashuri. Kwa kujua kwamba ‘Mungu ni kimbilio, msaada utakaoonekana wakati wa mateso,’ Mfalme Hezekia alimpelekea Yehova sala, na mji huo ukakombolewa kwa njia ya muujiza. (2 Wafalme, sura ya 19) Tunapokuwa katika taabu kubwa, sisi pia tunapaswa kufanya Mungu awe Kimbilio letu. Kwa njia gani? Kwa kumtumaini yeye, kushikamana na Neno lake, na kuambatana na tengenezo lake.

Ukombozi Unahakikishwa

Soma Zaburi 52 mpaka 57. Mungu atang’oa mtu mbaya “katika nchi ya walio hai” na ‘ataitawanya mifupa’ ya ye yote anayewapinga watu Wake. (Zaburi 52, 53) Alipowindwa-windwa na Sauli, Daudi alikuwa na uhakika wa kupata ukombozi wa kimungu, na kwa kuwa yeye alitendwa mambo ya udanganyifu, alimtupia Yehova mzigo wake. (Zaburi 54, 55) Mtunga zaburi alitosheka kumngojea Mungu aimalize misiba yake.​—Zaburi 56, 57.

◆ 52:8—Ni katika njia gani mtu mwadilifu anakuwa kama mzeituni?

Mzeituni unaweza kufananisha hali ya kuzaa matunda, urembo, na fahari. (Yeremia 11:16; Hosea 14:6) Katika Zaburi hii, mtu mwenye kutunga hila mbovu ambaye atafikia mwisho mbaya anatofautishwa na mtu ambaye analindwa na kusitawi kama mzeituni wenye kuchanua sana.

◆ 54:1 Kwa sababu gani Daudi alisema, “Kwa jina lako uniokoe”?

Jina la Mungu halina nguvu za kifumbo lakini linaweza kumsimamia Mungu mwenyewe. Kwa hiyo, kwa kutoa ombi hilo, Daudi alikubali kwamba Yehova anaweza kuwaokoa watu Wake. (Kutoka 6:1-8) Ijapokuwa wakaaji wa Zifu walimfunulia Mfalme Sauli mahali alipokuwa Daudi, shambulio la Wafilisti juu ya Israeli lilimkatisha Sauli katika kumtafuta Daudi. (1 Samweli 23:13-29; Zaburi 54, maelezo yaliyo juu ya sura hiyo katika Biblia ya New World Translation) Hivyo Yehova alimwokoa Daudi.

Somo Kwetu Sisi: Maadui wa Daudi walikuwa wamechimba shimo mbele yake ili atumbukie humo. (Zaburi 57:6) Shimo la namna hiyo la kutegea mwanadamu lingemaanisha hali zenye hatari au mipango ya hila yenye kuhatirisha watumishi wa Yehova. Lakini wenye kuwapinga watu wa Mungu wanaweza kunaswa wenyewe na hila zao mbovu. Kwa hiyo tukimtegemea Yehova na kuonyesha tahadhari, tunahakikishiwa kupata ukombozi.​—Mithali 11:21; 26, 67.

‘Kumngojea Katika Kimya’

Soma Zaburi 58 mpaka 64. Kwa kuhangaishwa na udhalimu, Daudi alisali ili adhabu ya kimungu itolewe kwa waovu. (Zaburi 58, 59) Alipotishwa kupatwa na ushinde, yeye alisihi aokolewe na alikuwa na uhakika wa kwamba Mungu angewakanyagia chini maadui. (Zaburi 60) Yehova tayari alikuwa amekwisha kuwa kimbilio kwa Daudi; kwa hiyo yeye angengojea kimya apate wokovu. (Zaburi 61,62) Alipolazimika kwenda nyikani, labda wakati Absalomu alipoasi, Daudi alipata furaha ‘uvulini mwa mabawa ya Mungu.’ (Zaburi 63) Mtungu zaburi alisali pia alindwe na “ghasia ya watu wafanyao maovu” na alikuwa na uhakika wa kwamba mwadilifu angepata kimbilio katika Yehova.​—Zaburi 64.

◆ 58:3-5—Ni katika njia gani waovu ni kama nyoka?

Misemo ya uwongo, uchongezi ya waovu inaweza kuharibu sifa ya mtu, sawa na vile sumu ya nyoka inaweza kudhuru sana. (Zaburi 140:3; Warumi 3:13; Yakobo 3:8) Tena, waovu ni kama “fira kiziwi azibaye sikio lake,” kwa maana wanakataa kusikia na kukubali mwelekezo.

◆63:3—Ni katika njia gani fadhili za upendo wa Mungu ‘ni njema kuliko uhai’?

Maisha yanakosa kusudi la kweli yasipokuwa ya kutegemea Mungu. Lakini upendo mshikamanifu ambao Yehova alimwonyesha Daudi ulileta maana ya kweli katika maisha yake. Uhusiano wa kindani sana na Mungu unafanya sikuzote maisha yawe na maana kwa watumishi wake waliokubaliwa, unawahakikishia msaada wa kimungu na mwongozo, na unawawezesha kutazama mbele kwenye umilele wa maisha yenye furaha.

Somo Kwetu Sisi: Daudi alitosheka ‘kumngojea Mungu katika kimya’ ili atende kwa ajili yake. (Zaburi 62:1-7) Akiwa amejitiisha kwa mapenzi ya Yehova, alijisikia akiwa salama na alikuwa na uhakika katika Mungu kwa kunyamaza. Tukiwa na tumaini la namna hiyo katika Yehova, “amani ya Mungu” itahifadhi mioyo yetu na nguvu za akili zetu huku tukingojea kupata ukombozi wa kimungu kati ya adui zetu na dhiki.​—Wafilipi 4:6, 7; Zaburi 33:20.

Msifuni Mkombozi Wetu

Soma Zaburi 65 mpaka 72. Yehova anasifiwa kuwa Chanzo cha mimea iliyo mingi, manyunyu mengi, malisho yenye kusitawi sana, na makundi yenye kumiminika. (Zaburi 65) Muziki mtamu unapasa kuimbwa kwa “utukufu wa jina lake.” (Zaburi 66) Yeye anapasa kushukuriwa, na anasifiwa kama “Mungu wa matendo ya kuokoa.” (Zaburi 67, 68) Mateso ya Masihi yanatabiriwa, na Yehova anahimidiwa kama “Mwokozi” ambaye mtunga zaburi atangojea msaada wake. (Zaburi 69-71) Tumaini la namna hiyo litathawabishwa, kwa maana usitawi wa duniani pote na ukombozi kutoka katika hali ya kugandamizwa vinahakikishwa wakati wa utawala wa Masihi wenye baraka.​—Zaburi 72.

◆ 68:11—Ni nani walio “jeshi kubwa” la wanawake?

Baada ya Yehova kutumia wanaume wenye kupigana wa Israeli washinde adui, wanawake Waisraeli walitangaza habari njema za ushindi kupitia muziki, nyimbo, na dansi. (1 Samweli 18:6, 7; Linganisha Kutoka 15:20,21.) Kwa kutii “usemi” au amri ya Mungu, wanaume wa Israeli walipigana na mataifa ya maadui waliokuwa katika Nchi ya Ahadi wakayashinda. Jambo hilo liliwapa wanawake Waisraeli habari njema za kutangaza katika sherehe za ushindi. Leo, wahudumu wanawake wana daraka kubwa wakiwa watangazaji Ufalme wakieleza habari njema zinazohusiana na “usemi” wa Yehova, ambao unatia ndani kuwapa onyo mataifa ya kwamba karibuni watatiishwa chini ya Mfalme wa Kimasihi, Yesu Kristo.

◆ 69:23—Kwa sababu gani Mungu aliombwa atetemeshe viuno vya maadui?

Misuli yenye nguvu katika viuno inapokazwa, inaweza kuwa na nguvu sana. Lakini ukosefu wa nguvu unatokea wakati viuno vinapotikisika au kutetemeka, labda kwa sababu ya woga. Katika ombi hili la kuomba ukombozi, Daudi alimwomba Mungu awanyime maadui wake nguvu zao walizotumia kwa njia mbaya.

◆ 72:16—Uzaaji huo unaonyesha nini?

‘Matunda kama yale katika Lebanoni’ yanaweza kumaanisha nafaka yenye kukua karibu sana na juu mpaka yanakuwa kama vile vichaka vyenye majani mazuri-mazuri yenye kusitawi sana ya Lebanoni. Labda yakisitawi sana na kupanda juu milimani, mashina marefu mengi yakiwa pamoja yakitegemeza nafaka nyingi yanaweza kulinganishwa na mierezi mirefu sana yenye kusongamana ya Lebanoni. Hiyo inaelekeza kwa mavuno mengi sana yasiyo ya kawaida wakati wa utawala wa Masihi. Na uhakika wa kwamba ‘watu wa mjini watasitawi kama majani ya nchi’ unaonyesha kwamba raia za kidunia wenye kusimamiwa na Yesu watakuwa wengi ajabu.

Somo Kwetu Sisi: Mtunga zaburi alisali: ‘Kwa maana umenionyesha mateso mengi na, mabaya, utanihuisha tena [Yehova].’ (Zaburi 71:20) Ingawa Mungu haleti magumu ya namna hiyo, anaturuhusu tujaribiwe na kutoa jibu kwa Mlaumu wake, Ibilisi. (Yakobo 1:13; Mithali 27:11) Yehova haruhusu kamwe tujaribiwe kupita tuwezavyo na anaweza kutusaidia tuyashinde majaribu yetu kwa kuwa na imani yenye nguvu. (1 Wakorintho 10:13; 1 Petro 1:6, 7) Wakristo wapakwa-mafuta waliona “mateso mengi, na mabaya” walipoteswa wakati wa upeo wa Vita ya Ulimwengu ya Kwanza. Lakini Yehova ‘aliwahuisha tena’ katika mwaka 1919, nao wakasonga mbele katika utumishi wa Ufalme, baadaye wakiungwa mkono na “mkutano mkubwa.” (Ufunuo 7:9) Kweli sifa inapasa kumwendea Mkombozi Mkuu kwa matokeo ya jinsi hiyo.

Imani inahitajiwa ili kumngojea Mungu atende kwa ajili yetu. Huenda tukalazimika tungojee katika kimya kwa sababu hatuna la kufanya kubadili hali zetu zenye magumu. Hata hivyo, tutaweza kuvumilia, kama walivyofanya watunga zaburi, ikiwa tumetosheka kumngojea Yehova.