“Mungu wa Amani” Huwajali Wenye Taabu

BIBLIA yaonyesha wazi kwamba Daudi wa kale alipatwa na taabu. Kwa miaka kadhaa aliishi akiwa mtoro, akifuatwa bila kukoma na mfalme mwovu mwenye kiburi, aliyeazimia kumwua. Katika kipindi hicho cha taabu, Daudi alijificha mahali mbalimbali palipo pekee. Lakini alifanya jambo jingine zaidi. Alisali kwa Yehova kwa bidii juu ya janga lake. “Kwa sauti yangu nitamlilia BWANA,” akaandika baadaye kwa habari ya masaibu yake. “Nitafunua mbele yake malalamiko yangu, shida yangu nitaitangaza mbele zake.”—Zaburi 142:1, 2.

Leo, watu fulani wangefanyia mzaha kumtegemea Mungu kwa Daudi. Wangesema kwamba sala ni mbinu tu ya kiakili ya kudumisha mtazamo wa amani ya akilini na kwamba kihalisi kutoa sala ni kupoteza wakati. Hata hivyo, uhakika wa Daudi katika Mungu ulikuwa jambo linalofaa, kwa kuwa adui zake walishindwa hatimaye. Akifikiria mambo aliyojionea, Daudi aliandika hivi: “Maskini huyu aliita, BWANA akasikia, akamwokoa na taabu zake zote.” (Zaburi 34:6) Mungu wa kweli ambaye Daudi aligeukia anaitwa kwingineko “Mungu wa amani.” (Wafilipi 4:9; Waebrania 13:20) Je, ataleta kitulizo kutoka taabu, ikitokeza amani kwetu?

Yehova Hukujali

Yehova hayuko mbali kwa habari ya majanga ya watu wake. (Zaburi 34:15) Yeye ni mwangalifu kwa mahitaji ya watumishi wake wakiwa kikundi na pia kwa mahitaji ya kila mtu mmoja-mmoja anayemhofu. Alipokuwa akiweka wakfu hekalu katika Yerusalemu la kale, Solomoni alimwomba sana Yehova asikilize “yo yote atakayoyaomba na kusihi mtu awaye yote, au watu wako Israeli wote pamoja, watakaojua kila mtu pigo lake mwenyewe, na msiba wake mwenyewe.” (2 Mambo ya Nyakati 6:29, italiki ni zetu.) Kama vile Solomoni alivyokiri, kila mtu mmoja-mmoja ana taabu yake mwenyewe ya pekee ya kuvumilia. Kwa mtu mmoja yaweza kuwa ugonjwa wa kimwili. Kwa mwingine, msononeko wa kihisia-moyo. Wengine huenda wakataabishwa na kifo cha mpendwa. Ukosefu wa kazi ya kuajiriwa, magumu ya kiuchumi, na matatizo ya familia pia ni taabu za kawaida katika nyakati hizi ngumu.

Hebu fikiri kidogo juu ya ‘pigo lako mwenyewe na msiba wako mwenyewe.’ Labda nyakati nyingine umehisi kama alivyohisi mtunga-zaburi, Daudi, aliyeandika hivi: “Nikangoja aje wa kunihurumia, wala hakuna; na wa kunifariji, wala sikumwona mtu.” Hata hivyo, waweza kuwa na hakika kwamba Mungu hujali hali yako, kwa kuwa katika zaburi iyo hiyo Daudi aliandika hivi: “BWANA huwasikia wahitaji, wala hawadharau wafungwa wake.”—Zaburi 69:20, 33.

Tukitumia maneno ya Daudi katika maana pana, twaweza kuwa na hakika kwamba Muumba wa wanadamu husikiliza sala za wale waliofungwa kitamathali, katika taabu zao. Zaidi ya hilo, yeye huitikia hali yao mbaya. Fikiria taarifa zifuatazo zinazofunua huruma ya Yehova kwa wenye taabu.

“Usimtese mjane ye yote aliyefiwa na mumewe, wala mtoto yatima. Ukiwatesa watu hao katika neno lo lote, nao wakanililia mimi, hakika yangu nitasikia kilio chao, na hasira yangu itawaka moto.”—Kutoka 22:22-24.

“Je, Mungu hatasababisha haki ifanywe kwa ajili ya wachaguliwa wake ambao wampaazia kilio mchana na usiku, hata ingawa yeye ni mwenye ustahimilivu kuwaelekea?”—Luka 18:7.

“Atamkomboa mhitaji aliapo, na mtu aliyeonewa iwapo hana msaidizi. Atamhurumia aliye dhaifu na maskini, na nafsi za wahitaji ataziokoa. Atawakomboa nafsi zao na kuonewa na udhalimu, na damu yao ina thamani machoni pake.”—Zaburi 72:12-14.

“Yeye awagusaye ninyi [watu wa Mungu walio duniani] aigusa mboni ya jicho langu.”—Zekaria 2:8.

Vielelezo hivyo vichache vyatolea kielezi kuhangaikia sana kwa Muumba wetu hali njema ya watu wake. Kwa sababu hiyo, tuna sababu nzuri ya kufuata onyo hili la upole la mtume Petro: ‘Tupeni hangaiko lenu lote juu yake, kwa sababu yeye huwajali nyinyi.’ (1 Petro 5:7) Lakini Mungu atatusaidiaje katika nyakati za taabu?

Jinsi Ambavyo Mungu Husaidia Wenye Taabu

Kama vile tumeona, Daudi alipopatwa na taabu, alisali kwa Mungu kwa bidii ili apate mwongozo. Wakati huohuo, alichukua hatua ya kwanza kuondoa hiyo hali, akitumia ubuni kuwaponyoka waliokuwa wakimfuatia. Hivyo, kumtegemea Yehova pamoja na jitihada ya kibinafsi zilimwezesha Daudi avumilie janga lake. Twaweza kujifunza nini kutokana na hilo?

Tunapokabiliwa na taabu, bila shaka si kosa kwetu kuchukua hatua ya kwanza ifaayo ili kusuluhisha hilo tatizo. Kwa kielelezo, ikiwa Mkristo ajikuta bila kazi ya kuajiriwa, je, hatajitahidi kutafuta kazi? Au ikiwa anaugua ugonjwa wa kimwili, je, hatatafuta matibabu? Kwa kweli hata Yesu, aliyekuwa na nguvu za kuponya aina zote za magonjwa, alikiri kwamba ‘wenye kuugua wahitaji tabibu.’ (Mathayo 9:12; linganisha 1 Timotheo 5:23.) Bila shaka, majanga fulani hayawezi kuondolewa; lazima yavumiliwe tu. Hata hivyo, Mkristo wa kweli haoni kuteseka kwenyewe kuwa wema wa adili, kama waonavyo wengine. (Linganisha 1 Wafalme 18:28.) Badala ya hivyo, yeye huchukua hatua zozote awezazo ili kukabiliana na taabu yake.

Hata hivyo, yafaa wakati uo huo kumpelekea Yehova hilo jambo katika sala. Kwa nini? Kwanza, kwa kumtegemea Muumba wetu, tunasaidiwa “kuhakikisha mambo yaliyo ya maana zaidi.” (Wafilipi 1:10) Mathalani, tunapotafuta kazi ya kuajiriwa, kumtegemea Mungu kwa sala kutatusaidia tusikubali kazi inayohitilafiana na kanuni za Biblia. Pia tutaepuka ‘kuongozwa tupotee njia kutoka kwenye imani’ na hali ya kupenda fedha. (1 Timotheo 6:10) Kwa kweli, tufanyapo maamuzi mazito—kwa habari ya kazi ya kuajiriwa au upande mwingine wowote wa maisha—twahitaji kufuata onyo hili la upole la Daudi: “Umtwike BWANA mzigo wako naye atakutegemeza, hatamwacha mwenye haki aondoshwe milele.”—Zaburi 55:22.

Sala pia hutusaidia kudumisha usawaziko wetu wa kiakili, hivi kwamba taabu yetu haitulemei. Mtume Paulo aliandika hivi: “Katika kila jambo kwa sala na dua pamoja na utoaji-shukrani acheni maombi yenu ya bidii yajulishwe kwa Mungu.” Kukiwa na tokeo jipi? “Amani ya Mungu izidiyo fikira yote kwa ubora italinda mioyo yenu na nguvu zenu za akili kwa njia ya Kristo Yesu.” (Wafilipi 4:6, 7) Ndiyo, amani, amani ya Mungu. Amani hiyo ‘huzidi fikira yote,’ hivi kwamba yaweza kutusawazisha tunapolemewa na mzigo wa hisia zenye kusononesha. Hiyo ‘italinda mioyo yetu na nguvu zetu za akili,’ hivyo ikitusaidia kuepuka kuitikia haraka-haraka na bila hekima, jambo ambalo lingeongeza taabu yetu.—Mhubiri 7:7.

Sala yaweza kufanya mengi zaidi. Yaweza kubadili jinsi hali inavyoendelea. Fikiria kielelezo cha Biblia. Mtume Paulo alipokuwa amefungwa gerezani Roma, aliwatia moyo Wakristo wenzake wasali kwa niaba yake. Kwa nini? “Nawahimiza kwa bidii hasa zaidi mfanye hilo,” akawaandikia, “ili nipate kurudishwa kwenu karibuni zaidi.” (Waebrania 13:19) Paulo alijua kwamba sala zenye kuendelea za waamini wenzake zingeweza kubadili wakati ambao angeachiliwa.—Filemoni 22.

Je, sala itabadili tokeo la taabu yako? Yaweza. Ingawa hivyo, twapaswa kutambua kwamba Yehova hajibu sikuzote sala zetu katika njia tunayotarajia. Kwa kielelezo, Paulo alisali tena na tena kwa habari ya “mwiba katika mwili”—labda tatizo la kimwili lililohusiana na uwezo wake wa kuona. Badala ya kuondoa taabu hiyo, Mungu alimwambia Paulo hivi: “Fadhili yangu isiyostahiliwa yakutosha wewe; kwa maana nguvu yangu inafanywa kamilifu katika udhaifu.”—2 Wakorintho 12:7-9.

Kwa hiyo nyakati nyingine majanga yetu hayataondolewa. Badala ya hivyo, tutakuwa na fursa ya kuthibitisha kumtegemea kwetu Muumba wetu. (Matendo 14:22) Zaidi ya hayo, twaweza kuwa na hakika kwamba hata ikiwa Yehova haondoi taabu, “ataifanya pia njia ya kutokea kusudi [tu]weze kuvumilia hilo.” (1 Wakorintho 10:13) Ndiyo, Yehova anaitwa kwa kustahili “Mungu wa faraja yote, ambaye hutufariji katika dhiki yetu yote.” (2 Wakorintho 1:3, 4) Yeye hutupa tunachohitaji ili kuvumilia tukiwa na kiasi kikubwa cha amani.

Karibuni—Ulimwengu Usio na Taabu!

Muumba aahidi kwamba kupitia Ufalme wake, karibuni ataondolea mbali taabu za wanadamu. Atatimizaje hilo? Kwa kumwondoa Shetani Ibilisi, mchochezi mkuu wa taabu na adui wa kwanza kabisa wa amani, ambaye Biblia humtambulisha kuwa “mungu wa huu mfumo wa mambo.” (2 Wakorintho 4:4) Lakini karibuni uongozi wake juu ya wanadamu utakoma. Kuondolewa kwake kutafungulia njia baraka nyingi ziwajie wale wamhofuo Mungu. Biblia huahidi kwamba Yehova “atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.”—Ufunuo 21:1-4.

Je, ulimwengu usio na taabu wasikika kuwa mzuri sana usiweze kuwa kweli? Tumezoea sana kuishi pamoja na janga hivi kwamba hatuwezi kuwazia kutokuwapo kwalo. Lakini uhuru kutoka hofu, hangaiko, na afa ndilo jambo hasa ambalo Mungu alikusudia kwa ajili ya wanadamu wakati wa uumbaji, na kusudi lake litafanikiwa.—Isaya 55:10, 11.

Hilo ndilo tumaini walilopata Sonia, Fabiana, na Ana, waliotajwa katika makala ya ufunguzi. Sonia, ambaye wana wake wawili walikufa kutokana na UKIMWI, alipata amani tele kutokana na tumaini ambalo Biblia hutoa—ufufuo wa waadilifu na wasio waadilifu. (Matendo 24:15) “Jambo moja ni hakika,” asema, “tumaini letu lapita maumivu yoyote yale.”

Akiwa bado anaishi katika nyumba ya kutunza na kulea yatima, Ana alitembelewa na mmoja wa Mashahidi wa Yehova. “Alinionyesha jina la Yehova katika Biblia,” asema Ana, “nami nikalia kwa shangwe. Nilihitaji sana msaada, nikajifunza kwamba kuna Mungu anayetujali.” Baada ya kutoka katika nyumba ya kutunza na kulea yatima, Ana alikubali funzo la Biblia, akajifunza zaidi juu ya ahadi za Yehova. Kisha akaweka maisha yake wakfu kwa Yehova na kuonyesha hilo kwa kubatizwa. “Tangu wakati huo, nimeendelea kumtegemea Yehova kupitia sala, nami ninafarijiwa na ule uhakikishio wa kwamba atanisaidia.”

Fabiana pia amepata faraja na amani nyingi ya akilini katika taabu yake kwa kujifunza juu ya ahadi za Mungu za wakati ujao. “Kujifunza kweli kutoka Biblia ni sawa na kutoka mahali penye giza na huzuni nyingi na kuingia chumba kilicho wazi, changavu, na kipendezacho.”—Linganisha Zaburi 118:5.

Lakini amani halisi tufeni pote itakuja vipi na lini? Acheni tuone katika makala zifuatazo.

[Sanduku katika ukurasa wa 6]

Zile Pande Nyingi za Taabu

▪ Karibu robo ya wakazi wa ulimwengu wanaishi katika ufukara, na mamilioni zaidi ya watu wanaishi katika hali zisizowafaa wanadamu zinazohatarisha kusalimika kwao.

▪ Watoto zaidi ya milioni 200 hawapati chakula cha kutosha.

▪ Kila mwaka ugonjwa wa kuhara huua watoto wapatao milioni tatu wenye umri unaopungua miaka mitano.

▪ Maradhi yenye kuambukiza yaliua watu wapatao milioni 16.5 katika 1993 pekee. Kwa kuwa nchi mbalimbali huweka magonjwa katika vikundi tofauti-tofauti, idadi ya kweli huenda ikawa ya juu zaidi sana.

▪ Watu wanaokadiriwa kuwa milioni 500 wanaathiriwa na aina fulani ya matatizo ya akili.

▪ Viwango vya kujiua kimakusudi vinaongezeka upesi zaidi miongoni mwa vijana kuliko katika rika lingine lolote.

▪ “Njaa na ukosefu wa kazi ya kuajiriwa zimekuwa mawaa ulimwenguni,” lataarifu The Unesco Courier. “Kuna watu milioni 35 wasio na kazi ya kuajiriwa katika yale mataifa saba yenye utajiri zaidi ulimwenguni, na katika Brazili pekee kuna wafanyakazi milioni 20 ambao kwao kuwa na kazi hakumaanishi hata kwamba watakuwa na chakula cha kutosha.”

[Picha katika ukurasa wa 7]

Sala yaweza kutusaidia kukazia fikira ahadi ya Mungu ya ulimwengu usio na taabu