Ufanisi Waweza Kutahini Imani Yako

UFANISI waweza kutahini imani ya mtu mnyoofu. Kujitahidi kuwa mwenye ufanisi kimwili kwaweza kuongoza kwenye kupoteza imani. (1 Timotheo 6:9, 10) Lakini ufanisi waweza pia kutahini imani katika njia nyingine. Mtu mwadilifu anapoona kwamba watu wengi wasio waadilifu wanafanikiwa kimwili huku yeye akiteseka, huenda akashawishwa kufuatia mwendo usio wenye kumcha Mungu. Kwani, hilo limewaongoza hata baadhi ya watumishi wa Yehova watilie shaka thamani ya kufuatia maisha manyoofu!

Hilo lilimpata yule mwanamuziki Mlawi Asafu wakati wa utawala wa mfalme wa Israeli Daudi. Asafu alitunga zaburi zilizotumiwa katika ibada ya watu wote. Pamoja na Hemani na Yeduthuni, alitoa unabii pia, akimpa Yehova Mungu sifa na shukrani kwa kufuatana na muziki. (1 Mambo ya Nyakati 25:1; 2 Mambo ya Nyakati 29:30) Ingawa Asafu alikuwa na pendeleo hilo, Zaburi 73 inaonyesha kwamba ufanisi wa kimwili wa watu waovu ulithibitika kuwa mtihani mkubwa kwa imani yake.

Mtazamo wa Asafu Wenye Hatari

“Hakika Mungu ni mwema kwa Israeli, kwa hao walio safi mioyo yao. Nami miguu yangu ilikuwa karibu na kupotoka, hatua zangu zilikuwa karibu na kuteleza.” (Zaburi 73:1, 2) Kwa maneno hayo, Asafu alikiri kwamba Yehova alikuwa mwema kwa taifa la Israeli. Ndivyo ilivyokuwa hasa kwa wale “walio safi mioyo yao,” kwani tamaa yao ilikuwa kumpa Mungu ujitoaji usiotia mwingine ndani na kuchangia utakasaji wa jina lake takatifu. Tukiwa na mtazamo huo, tutambariki Yehova kwa kusema vema juu yake hata tukijaribiwa vikali na ufanisi wa waovu au na hali nyingine yoyote.—Zaburi 145:1, 2.

Ingawa Asafu alijua juu ya wema wa Yehova, miguu yake ilikuwa karibu kupotoka kutoka kwenye kijia cha uadilifu. Ilikuwa kana kwamba inateleza kwenye ardhi yenye barafu wakati wa mashindano ya mbio ndefu yenye kuchosha. Kwa nini imani yake ilikuja kuwa dhaifu hivyo? Alieleza hivi: “Maana naliwaonea wivu wenye kujivuna, nilipoiona hali ya amani ya wasio haki. Maana hawana maumivu katika kufa kwao, na mwili wao una nguvu. Katika taabu ya watu hawamo, wala hawapati mapigo pamoja na wanadamu.”—Zaburi 73:3-5.

Ufanisi wa kimwili wa wasio waadilifu ulimfanya Asafu awaonee wivu. Ilionekana kana kwamba walifurahia amani, hata ingawa walikusanya utajiri kwa njia za udanganyifu. (Linganisha Zaburi 37:1.) Ijapokuwa matendo yao maovu, kwa nje walionekana kuwa wenye usalama. Kwani, uhai wao ulionekana kukoma bila maumivu! Nyakati nyingine walikufa kwa amani na wakiwa wanajiamini, bila ufahamu wowote wa uhitaji wa kiroho. (Mathayo 5:3) Kwa upande ule mwingine, baadhi ya watumishi wa Mungu wanateseka kwa magonjwa na kifo chenye maumivu, lakini yeye huwategemeza, nao wana lile tumaini zuri ajabu la ufufuo.—Zaburi 43:1-3; Yohana 5:28, 29.

Watu wengi waovu hawana matatizo ya afya yanayowazuia wasifurahie ugavi wao mwingi wa chakula. “Mwili wao una nguvu [vitambi vyao vimenenepa, NW],” matumbo yao makubwa yakitokeza. Zaidi ya hayo, “katika taabu ya watu hawamo,” kwani tofauti na ainabinadamu kwa ujumla, hawahitaji kung’ang’ania mahitaji ya kila siku. Asafu alimalizia kwamba waovu “hawapati mapigo pamoja na wanadamu.” Wao hasa huepuka majaribu ambayo watu wenye kumcha Mungu hupata kwa sababu hao wa pili hufuata viwango vya Yehova vyenye uadilifu katika ulimwengu mwovu wa Shetani.—1 Yohana 5:19.

Kwa sababu waovu hufanikiwa, Asafu aliendelea kusema hivi juu yao: “Hivyo kiburi kimekuwa mkufu shingoni mwao, jeuri huwavika kama nguo. Macho yao hutokeza kwa kunenepa, wameipita kadiri ya mawazo ya mioyo yao. Hudhihaki, husimulia mabaya, husimulia udhalimu kana kwamba wako juu. Wameweka kinywa chao mbinguni, na ulimi wao hutanga-tanga duniani.”—Zaburi 73:6-9.

Waovu huvaa kiburi kama “mkufu,” na matendo yao ya jeuri ni mengi sana hivi kwamba ‘wanavikwa nayo kama nguo.’ Wakiazimia kufuata njia yao wenyewe, wanawakandamiza wengine. Macho ya waovu hayadidimii kutokana na ukosefu wa chakula bali “hutokeza kwa kunenepa,” yakitokeza kwa sababu ya unene kutokana na ulafi. (Mithali 23:20) Mipango yao hufanikiwa sana hivi kwamba “wameipita kadiri ya mawazo ya mioyo yao.” Wao husema juu ya udanganyifu wao kwa njia ya kiburi, “kana kwamba wako juu.” Kwani, ‘wanaweka kinywa chao mbinguni, na ulimi wao hutanga-tanga duniani’! Wakikosa staha kwa yeyote mbinguni au duniani, wao humkufuru Mungu na kuwanena vibaya wanadamu.

Yaonekana, si Asafu pekee aliyeathiriwa vibaya na yale aliyoona. Alisema hivi: “Kwa hiyo watu wake [Mungu] hugeuka huko, na maji yaliyojaa humezwa nao. Nao husema, Mungu ajuaje? Yako maarifa kwake aliye juu?” (Zaburi 73:10, 11) Huenda maandishi ya Kiebrania yakamaanisha kwamba kwa sababu waovu huonekana wakifanikiwa, wengine miongoni mwa watu wa Mungu huwa na maoni yasiyofaa na wanaletwa kwenye hali ileile ya wenye kutofuata sheria, wakisema: ‘Mungu hajui kinachotukia naye hatatenda dhidi ya uvunjaji-sheria.’ Kwa upande ule mwingine, kuwaona watu wabaya wakivunja sheria na kuonekana kana kwamba hawaadhibiwi ni kama kulazimika kunywa kinywaji kichungu, kinachowasukuma wanyoofu kuuliza hivi: ‘Mungu anaweza kuvumiliaje mambo haya? Je! haoni yanayotukia?’

Akizilinganisha hali zake na zile za waovu, Asafu alisema hivi: “Fahamu, ndivyo walivyo wasio haki, na kwa kustarehe sikuzote wamepata mali nyingi. Hakika nimejisafisha moyo wangu bure, nimenawa mikono yangu kwa kutokukosa. Maana mchana kutwa nimepigwa, na kuadhibiwa kila asubuhi.” (Zaburi 73:12-14) Asafu alihisi kwamba kuishi maisha manyoofu hakukufaa. Watu waovu walifanikiwa, yaelekea ‘wakipata mali nyingi’ kwa njia za udanganyifu. Walionekana kana kwamba waliponyoka adhabu kwa kosa baya zaidi, lakini Asafu alipigwa “mchana kutwa”—tangu alipoamka mpaka alipolala usingizi usiku. Alihisi kwamba Yehova alikuwa akimwadhibu kila asubuhi. Kwa kuwa hilo halikuonekana kuwa jambo la haki, lilitahini imani ya Asafu.

Kurekebishwa Fikira

Aking’amua mwishoni kwamba fikira zake hazikufaa, Asafu alisema hivi: “Kama ningalisema, Nitasimulia kama hayo; kumbe! ningaliwadanganya kizazi cha wana wako. Nami nalifikiri jinsi ya kufahamu hayo; ikawa taabu machoni pangu; hata nilipoingia katika patakatifu pa Mungu, nikautafakari mwisho wao. Hakika Wewe huwaweka penye utelezi, huwaangusha mpaka palipoharibika. Namna gani wamekuwa ukiwa mara! Wametokomea na kutoweshwa kwa utisho. Ee Bwana, kama ndoto wakati wa kuamka, uondokapo utaidharau sanamu yao.”—Zaburi 73:15-20.

Ni vema kwamba Asafu hakulalamika waziwazi, kwani kusema hadharani kwamba kumtumikia Yehova hakufai kungaliweza kuwavunja moyo washiriki wa familia yake ya waabudu au kungaliweza kudhoofisha imani yao. Ni afadhali kama nini kuendelea kuwa kimya na kufanya vile Asafu alivyofanya! Ili kuona kwa nini inaonekana kwamba waovu hufanya kosa bila kuadhibiwa huku wanyoofu wakiteseka, alienda kwenye patakatifu pa Mungu. Mazingira hayo yalimruhusu Asafu atafakari kwa upole miongoni mwa waabudu wa Yehova, na fikira zake zikarekebishwa. Kwa hiyo leo, tukitatanishwa na yale tunayoona, acheni sisi vilevile tujaribu kupata majibu kwa maswali yetu kwa kushirikiana na watu wa Mungu badala ya kujitenga wenyewe.—Mithali 18:1.

Asafu alikuja kung’amua kwamba Mungu alikuwa amewaweka waovu “penye utelezi.” Kwa sababu maisha yao yanategemea vitu vya kimwili, wana hatari ya kupatwa na anguko la ghafula. Mwisho kabisa, watakufa wanapozeeka, na utajiri waliopata kwa njia isiyofaa hautawapa maisha marefu zaidi. (Zaburi 49:6-12) Ufanisi wao utakuwa kama ndoto inayopita upesi. Huenda hata hukumu ikawafikia kabla yao kuzeeka wanapovuna walichopanda. (Wagalatia 6:7) Kwa kuwa wamempuuza kimakusudi Yule pekee awezaye kuwasaidia, wanaachwa hoi, bila tumaini. Yehova anapotenda dhidi yao, ataiona “sanamu” yao—fahari na cheo chao—kwa madharau.

Linda Itikio Lako

Kwa sababu ya kutoitikia ifaavyo yale aliyoona, Asafu alikiri hivi: “Moyo wangu ulipoona uchungu, viuno vyangu viliponichoma, nalikuwa kama mjinga, sijui neno; nalikuwa kama mnyama tu mbele zako. Walakini mimi ni pamoja nawe daima, umenishika mkono wa kuume. Utaniongoza kwa shauri lako, na baadaye utanikaribisha kwa utukufu.”—Zaburi 73:21-24.

Kukazia fikira ufanisi wa kimwili wa waovu na kuteseka kwa wanyoofu kwaweza kuutia moyo wa mtu uchungu au chuki. Ndani kabisa—katika mafigo yake—kufadhaika kwa Asafu juu ya hali hiyo kulimsababishia maumivu mengi. Kwa maoni ya Yehova, alikuwa kama mnyama asiyesababu anayeitikia kwa msingi wa hisia za kimwili tu. Hata hivyo, Asafu ‘alikuwa na Mungu daima, aliyekuwa ameushika mkono wake wa kuume.’ Tukikosea katika fikira zetu lakini tujaribu kupata shauri la Yehova kama vile Asafu alivyofanya, Mungu ataushika mkono wetu, ili kututegemeza na kutuongoza. (Linganisha Yeremia 10:23.) Ni kwa kutumia shauri lake tu ndipo tuwezapo kuongozwa kuingia ndani ya wakati ujao wenye furaha. Huenda tukatahayarishwa kwa muda fulani, lakini Yehova atapindua mambo, ‘akitukaribisha kwa utukufu,’ au heshima.

Akithamini uhitaji wa kumtegemea Yehova, Asafu aliongeza hivi: “Ni nani niliye naye mbinguni, wala duniani sina cha kupendeza ila Wewe. Mwili wangu na moyo wangu hupunguka, bali Mungu ni mwamba wa moyo wangu na sehemu yangu milele. Maana wajitengao nawe watapotea; umewaangamiza wote waliokuacha Wewe. Nami kumkaribia Mungu ni kwema kwangu; nimefanya kimbilio kwa Bwana MUNGU, niyahubiri matendo yako yote.”—Zaburi 73:25-28.

Kama vile Asafu, hatuna yeyote ila Yehova wa kumtegemea ili kupata usalama na faraja ya kweli. (2 Wakorintho 1:3, 4) Kwa hiyo badala ya kutamani mali za kidunia za yeyote, acheni tumtumikie Mungu na kujiwekea hazina mbinguni. (Mathayo 6:19, 20) Kuwa na msimamo uliokubaliwa na Yehova kwapasa kuwe furaha yetu kubwa zaidi. Hata kama viungo vyetu na moyo wetu vinashindwa, atatuimarisha na kuupa moyo wetu uthabiti ili tusipoteze tumaini na ujasiri miongoni mwa misiba. Ukaribu na Yehova ni mali yenye thamani kubwa zaidi. Kuiacha kungemaanisha msiba kwetu pamoja na wote wanaomwacha. Basi, kama vile Asafu, acheni tumkaribie Mungu na kumtwika mahangaiko yetu yote. (1 Petro 5:6, 7) Hilo lachochea hali njema yetu ya kiroho na latusukuma kuwaambia wengine juu ya kazi za Yehova nzuri ajabu.

Endelea Kuwa Mwaminifu-Mshikamanifu kwa Yehova

Asafu alisumbuka kwa sababu aliwaona waovu wakifanikiwa katika Israeli, nchi yake. Miongoni mwa watumishi wa Yehova waaminifu-washikamanifu, mlikuwa watu “wasio haki” wenye hatia ya kujivuna, kiburi, jeuri, kudhihaki, na udhalimu, na waliokana kwamba Mungu hakujua yale waliyokuwa wakiyafanya. (Zaburi 73:1-11) Hilo ni onyo lililoje! Ili kumpendeza Yehova Mungu, ni lazima tuepuke kuonyesha vitabia kama vile kiburi, jeuri, kudhihaki, na kutokufuatia yaliyo haki. Kama vile Asafu, acheni watumishi wote wa Yehova ‘waingie katika patakatifu pa Mungu’ kwa kukusanyika kwa ukawaida na waabudu Wake waaminifu-washikamanifu. Kwa kweli, acheni wote wampendao Yehova ‘wamkaribie Mungu,’ wakimtegemea awategemeze miongoni mwa mateso, haidhuru yale ambayo huenda wengine wakasema au kufanya.—Zaburi 73:12-28; 3 Yohana 1-10.

Ni kweli, ufanisi wa kimwili wa waovu huenda ukatahini imani yetu, kama ulivyotahini imani ya Asafu. Lakini, tunaweza kuvumilia jaribu hilo tukifanya utumishi wa Yehova uwe jambo kuu maishani mwetu. Tutathawabishwa kwa ajili ya kufanya hivyo kwa sababu ‘Mungu si dhalimu hata aisahau kazi yetu, na pendo lile tulilolidhihirisha kwa jina lake.’ (Waebrania 6:10) Majaribu yetu yatakuwa “ya muda wa kitambo tu” kwa kulinganishwa na thawabu yetu. (2 Wakorintho 4:17) Hata miaka 70 au 80 ya kuteseka ni kama pulizio tu inapolinganishwa na yale maisha ya milele yenye furaha ambayo Yehova awaahidi watumishi wake waaminifu-washikamanifu.—Zaburi 90:9, 10.

Tusiruhusu kamwe ufanisi wa kimwili wa waovu kwa kulinganishwa na mateso yetu kwa ajili ya uadilifu utuzuie tusionyeshe imani ambayo ni tunda la roho takatifu ya Mungu. (Wagalatia 5:22, 23; 1 Petro 3:13, 14) Shetani angefurahi kama tungewaiga waovu, ambao mara nyingi hufanikiwa kwa sababu wao si wanyoofu. Badala ya hivyo, acheni tuliheshimu jina la Yehova kwa kukinza vishawishi vya kuacha viwango vyake vyenye uadilifu. (Sefania 2:3) Tusitiwe uchungu na kule kufanikiwa kwa waovu, kwani, zaidi ambayo wanaweza kutimiza ni ufanisi wa kimwili tu. Nao una thamani gani? Hauwezi kulinganishwa hata kidogo na ufanisi wa kiroho unaofurahiwa na wale wanaozoea imani katika Bwana Mwenye Enzi Kuu Yehova.