Kutembea kwa Moyo Ulioungamanishwa

“Unifunze mimi, Ee Yehova . . . Ungamanisha moyo wangu kuhofu jina lako.”—ZABURI 86:11, “NW.”

1. Yehova huwathawabishaje waaminifu-washikamanifu wake?

‘EE YEHOVA, wewe ndiye Mungu, wewe peke yako.’ (Zaburi 86:8, 10, NW) Daudi alimsifu Mungu kutoka moyo uliojaa sana uthamini. Hata kabla ya Daudi kuwa mfalme juu ya Israeli wote, Yehova alikuwa amemwokoa kutoka kwa Sauli na kutoka kwa Wafilisti. Kwa hiyo, angeweza kuimba hivi: “BWANA [Yehova, NW] ndiye jabali langu, na ngome yangu, na mwokozi [Mwandalizi wa wokovu, NW] wangu. Kwa mtu mwenye fadhili [mwaminifu-mshikamanifu, NW] utakuwa mwenye fadhili [utatenda katika uaminifu-mshikamanifu, NW].” (2 Samweli 22:2, 26) Yehova alikuwa amemhifadhi mtumishi wake mwaminifu-mshikamanifu kupitia majaribu mengi. Daudi angeweza kuweka tumaini na uhakika wake katika Mungu wake mwaminifu-mshikamanifu, lakini alihitaji mwongozo wa kuendelea. Sasa Daudi alimwomba Mungu hivi: “Unifunze mimi, Ee Yehova, juu ya njia yako.”—Zaburi 86:11, NW.

2. Yehova amefanyaje uandalizi ili tufundishwe na yeye?

² Daudi alitaka kuepuka kabisa mawazo na falsafa za kilimwengu. Alitaka “kufundishwa na Yehova,” kama vile nabii wa Mungu alivyosema baadaye. (Isaya 54:13, NW) Yaelekea Daudi angeweza kutafakari juu ya vitabu tisa tu vya Biblia vilivyopatikana katika siku yake. Hata hivyo, mafundisho hayo kutoka kwa Yehova yalikuwa yenye thamani kubwa kwake! Katika kufundishwa, sisi leo twaweza kujilisha sana kutokana na vitabu vyote 66 vya Biblia, pamoja na wingi wa fasihi za Ufalme zinazoandaliwa kupitia “mtumwa mwaminifu mwenye akili.” (Mathayo 24:45) Kama vile Daudi, acheni tumwitie Yehova, ili roho yake iweze kutusaidia tutafute-tafute katika “mambo ambayo Mungu aliwaandalia wampendao . . . hata mafumbo ya Mungu.”—1 Wakorintho 2:9, 10.

3. Mafundisho ya Biblia yanaweza kutunufaishaje?

³ Biblia ina jibu kwa kila swali na tatizo ambalo huenda likatokea maishani mwetu. “Kwa kuwa yote yaliyotangulia kuandikwa yaliandikwa ili kutufundisha sisi; ili kwa saburi na faraja ya maandiko tupate kuwa na tumaini.” (Warumi 15:4) Kutumia mafundisho yote kabisa kutoka kwa Yehova kutatuimarisha ili tuvumilie magumu, kutatufariji katika nyakati za mshuko wa moyo, na kutaendeleza tumaini la Ufalme likiwa linawaka kwa uangavu mioyoni mwetu. Na tupate furaha katika kusoma Neno la Mungu na katika kutafakari juu yalo “mchana na usiku,” kwani hekima yenye msingi wa Biblia huwa “mti wa uzima kwao wa[i]shikao sana; ana heri [furaha, NW] kila mtu ashikamanaye naye.”—Zaburi 1:1-3; Mithali 3:13-18; ona pia Yohana 17:3.

4. Kuhusu matendo yetu, Yesu alituwekea mfano gani?

⁴ Mwana wa Mungu, Yesu, anayeitwa pia “Mwana wa Daudi,” alimwendea Yehova sikuzote ili kupata mafundisho. (Mathayo 9:27)a Alisema hivi: “Mwana hawezi kutenda neno mwenyewe ila lile ambalo amwona Baba ana-litenda; kwa maana yote ayatendayo yeye, ndiyo ayatendayo Mwana vile vile.” “Sifanyi neno kwa nafsi yangu, ila kama Baba alivyonifundisha ndivyo ninenavyo.” (Yohana 5:19; 8:28) Yesu alituachia kiolezo ‘ili tufuate nyayo zake kwa ukaribu.’ (1 Petro 2:21) Ebu fikiria hilo! Tukijifunza kama vile ambavyo ni lazima iwe Yesu alifanya, katika hali yoyote tutaweza kutenda kama vile ambavyo Yehova angependa tutende. Njia ya Yehova ndiyo njia ifaayo sikuzote.

5. “Kweli” ni nini?

⁵ Kisha Daudi ajulisha wazi hivi: “Nitatembea katika kweli yako.” (Zaburi 86:11, NW) Miaka elfu moja baadaye, Pilato, akisema na Mwana wa Daudi, Yesu, aliuliza hivi: “Kweli ni nini?” Lakini Yesu alikuwa ametoka tu kujibu swali hilo, akimwambia Pilato hivi: “Ufalme wangu sio [si sehemu, NW] ya ulimwengu huu,” akiongeza hivi: “Wewe wasema, kwa kuwa mimi ni mfalme. Mimi nimezaliwa kwa ajili ya haya na kwa ajili ya haya mimi nalikuja ulimwenguni, ili niishuhudie kweli.” (Yohana 18:33-38) Hivyo Yesu alijulisha ya kwamba kweli inakazia Ufalme wa Kimesiya. Kwa kweli, kichwa kikuu chote cha Biblia ni utakaso wa jina la Yehova kupitia Ufalme huo.—Ezekieli 38:23; Mathayo 6:9, 10; Ufunuo 11:15.

6. Katika kutembea katika kweli, tunapaswa kujihadhari na nini?

⁶ Kutembea katika kweli kunamaanisha nini? Kunamaanisha kufanya tumaini la Ufalme kuwa jambo kuu maishani mwetu. Ni lazima tuishi kulingana na kweli ya Ufalme. Ni lazima tusigawanyike katika kuweka masilahi ya Ufalme kwanza, tukiwa na bidii kulingana na nafasi zetu katika kushuhudia kweli ya Ufalme, kwa kufuata kielelezo cha Yesu. (Mathayo 6:33; Yohana 18:37) Hatuwezi kutembea katika kweli kwa sehemu ya wakati, tukitoa utumishi wa kijuujuu tu kisha tukijipendeza kwa kwenda upande ili kujifurahisha katika tafrija nyingi au kuingia kazi-maisha yenye kuchukua wakati mwingi au ‘kutumikia mali.’ (Mathayo 6:24) Tungeweza kupotelea mbali katika mojawapo njia hizo za upande, tusiweze kamwe kupata njia ya kurudi kwenye ‘barabara nyembamba inayoongoza kwenye uhai.’ Tusipotelee mbali kutoka kwa barabara hiyo! (Mathayo 7:13, 14, NW) Mfunzi wetu Mtukufu, Yehova, kupitia Neno na tengenezo lake, huimulikia barabara hiyo, akisema hivi: “Njia ni hii, ifuateni [enyi watu, NW] mgeukapo kwenda mkono wa kulia, na mgeukapo kwenda mkono wa kushoto.”—Isaya 30:21.

Hofu Ifaayo

7. Tunaweza ‘kuungamanishaje’ mioyo yetu?

⁷ Sala ya Daudi yaendelea katika mstari 11, NW: “Ungamanisha moyo wangu kuhofu jina lako.” Kama vile Daudi, tunapaswa tutake mioyo yetu isigawanyike, iwe kamili, katika kufanya mapenzi ya Mungu. Hilo linapatana na shauri hili la Musa: “Na sasa, Israeli, BWANA [Yehova, NW], Mungu wako, anataka nini kwako, ila umche BWANA [Yehova, NW], Mungu wako, na kwenda katika njia zake zote, na kumpenda, na kumtumikia BWANA [Yehova, NW], Mungu wako, kwa moyo wako wote, na kwa roho yako yote; kuzishika amri za BWANA [Yehova, NW] na sheria zake, ninazokuamuru leo, upate uheri [faida, NW]?” (Kumbukumbu la Torati 10:12, 13) Kwa kweli, ni kwa faida yetu kwamba tunatoa moyo na nafsi yetu katika kumtumikia Yehova. Hivyo tunaonyesha hofu ifaayo ya jina lake mashuhuri. Jina la Yehova lamaanisha kihalisi “Yeye Anafanya Iwe,” hasa kuhusiana na kutimiza makusudi yake matukufu. Linawakilisha pia mamlaka yake kuu zaidi juu ya ulimwengu wote mzima. Tukitumikia tukiwa na hofu ya fahari ya Mungu, hatutakengeushwa na hofu ya mwanadamu awezaye kufa. Mioyo yetu haitagawanyika. Bali, tutahofu kufanya lolote ambalo lisingempendeza Yehova, aliye Hakimu Mkuu Zaidi na Bwana Mwenye Enzi kuu, ashikaye maisha zetu mkononi mwake.—Isaya 12:2; 33:22.

8, 9. (a) Inamaanisha nini kuwa “si sehemu ya ulimwengu”? (b) Tunapaswa kuchukua hatua zipi kwa sababu sisi ni “tamasha”?

⁸ Hata tukikabili shutumu na mnyanyaso, tutafuata kielelezo cha Yesu bila woga katika kutokuwa sehemu ya ulimwengu mbovu unaotuzunguka. (Yohana 15:17-21) Hiyo haimaanishi kwamba wanafunzi wa Yesu wanapaswa waishi wakiwa wapweke au wakiwa wamejificha katika makao ya kitawa. Yesu alisema hivi katika sala kwa Baba yake: “Mimi siombi kwamba uwatoe katika ulimwengu; bali uwalinde na yule mwovu. Wao si wa [sehemu ya, NW] ulimwengu, kama mimi nisivyo wa [sehemu ya] ulimwengu. Uwatakase kwa ile kweli; neno lako ndiyo kweli. Kama vile ulivyonituma mimi ulimwenguni, nami vivyo hivyo naliwatuma hao ulimwenguni.” (Yohana 17:15-18) Kama vile Yesu, sisi tunatumwa kupiga mbiu ya kweli ya Ufalme. Yesu alikaribika. Watu waliburudishwa na njia yake ya kufundisha. (Linganisha Mathayo 7:28, 29; 11:28, 29; Yohana 7:46.) Inapasa iwe hivyo na sisi.

⁹ Urafiki wetu wa wazi, mapambo na sura yetu yenye kupendeza, mazungumzo yetu yenye fadhili na yaliyo safi, yanapaswa yatufanye sisi na ujumbe wetu ukubalike kwa watu wenye mioyo ifaayo. Ni lazima tuepuke kujivalia ovyoovyo, mavazi yasiyo na kiasi, mashirika yawezayo kuongoza kwenye mahusiano ya kilimwengu, na njia ya maisha yenye ulegevu isiyo na kanuni tunayoona katika ulimwengu unaotuzunguka. Tukiwa “tumekuwa tamasha kwa dunia; kwa malaika na wanadamu,” tuna wajibu wa muda wa saa 24 kila siku wa kutumikia na kuishi tukiwa Wakristo wenye mfano mzuri. (1 Wakorintho 4:9; Waefeso 5:1-4; Wafilipi 4:8, 9; Wakolosai 4:5, 6) Ni lazima moyo wetu uungamanishwe kwa kusudi hilo.

10. Yehova huwakumbukaje wale wanaoungamanisha mioyo yao katika utumishi mtakatifu?

¹⁰ Sisi tunaoungamanisha mioyo yetu kuhofu jina la Yehova, tukitafakari juu ya makusudi yake matukufu na kuzijaza maisha zetu na utumishi mtakatifu, tutakumbukwa na Yehova. “Macho ya BWANA [Yehova, NW] hukimbia-kimbia duniani mwote, ili ajionyeshe mwenye nguvu kwa ajili ya hao, waliokamilika moyo kuelekea kwake.” (2 Mambo ya Nyakati 16:9) Likielekeza kwenye siku yetu kiunabii, Malaki 3:16, husomwa hivi: “Ndipo wale waliomcha BWANA [Yehova, NW] waliposemezana wao kwa wao. Naye BWANA [Yehova, NW] akasikiliza, akasikia; na kitabu cha ukumbusho kikaandikwa mbele zake, kwa ajili ya hao waliomcha BWANA [Yehova, NW] na kulitafakari jina lake.” Mioyo yetu na iungamanishwe katika hofu hiyo ifaayo ya Yehova!

Fadhili-Upendo za Yehova

11. Fadhili-upendo za Yehova zitaonyeshwaje kuelekea waaminifu-washikamanifu?

¹¹ Sala ya Daudi ni yenye bidii kama nini! Yeye aendelea hivi: “Ninakusifu wewe, Ee Yehova Mungu wangu kwa moyo wangu wote, nami nitalitukuza jina lako hadi wakati usiojulikana, kwa sababu fadhili-upendo zako ni kuu kuelekea mimi, na umeiokoa nafsi yangu kutoka Sheoli, mahali payo pa chini kabisa.” (Zaburi 86:12, 13, NW) Kwa mara ya pili katika zaburi hii, Daudi anamsifu Yehova kwa ajili ya fadhili-upendo zake—upendo wake mwaminifu-mshikamanifu. Upendo huo ni mkuu sana hivi kwamba unaweza kuokoa katika hali zionekanazo kuwa haziwezekani. Sauli alipokuwa akimwinda jangwani, huenda ikawa Daudi alihisi kutambaa katika kona na kufa. Ilikuwa kana kwamba ni kukabiliana na Sheoli ya chini kabisa—vina vya kaburi. Lakini Yehova alimwokoa! Katika njia iyo hiyo, mara nyingi Yehova amewaletea watumishi wake wa ki-siku-hizi kitulizo katika njia nzuri ajabu, na pia amewategemeza washika uaminifu-maadili ambao wamevumilia kwa uaminifu hadi kifo. Waaminifu-washikamanifu wote watapata thawabu yao, hata kwa ufufuo ikiwa lazima.—Linganisha Ayubu 1:6-12; 2:1-6, 9, 10; 27:5; 42:10; Mithali 27:11; Mathayo 24:9, 13; Ufunuo 2:10.b

12. Makasisi wamekuwaje wenye kimbelembele na wadhalimu, na thawabu yao itakuwa nini?

¹² Daudi alia hivi kuhusu wanyanyasi: “Ee Mungu, walio kimbelembele wenyewe wameinuka dhidi yangu; na kusanyiko lenyewe la wadhalimu wametafuta nafsi yangu, na hawajakuweka mbele yao wenyewe.” (Zaburi 86:14, NW) Leo, wanyanyasi wametia ndani makasisi wa Jumuiya ya Wakristo. Hao hudhania kumwabudu Mungu lakini huweka jina la cheo “Bwana” mahali pa jina lake takatifu na humwonyesha kuwa Utatu wa kifumbo ambao hautajwi popote katika Biblia. Hicho ni kimbelembele kama nini! Kuongezea hilo, wanajaribu kuwabembeleza wenye mamlaka za kisiasa wapige marufuku na kutia gerezani Mashahidi wa Yehova, kama vile ingali ikifanywa katika idadi kubwa yenye kushangaza ya nchi kuzunguka dunia. Hao wakufuru wa jina la Mungu wenye mavazi marefu watavuna thawabu yao, pamoja na sehemu zote za Babuloni Mkubwa zilizo kama kahaba.—Ufunuo 17:1, 2, 15-18; 19:1-3.

13. Yehova huonyesha sifa zipi katika kujulisha wema wake?

¹³ Kwa tofauti yenye furaha sala ya Daudi yaendelea hivi: “Lakini wewe, Ee Yehova, ni Mungu mwenye rehema na neema, wa polepole kukasirika na mwingi katika fadhili-upendo na ukweli.” (Zaburi 86:15, NW) Sifa hizo za Mungu wetu ni bora mno kwelikweli. Maneno hayo huturudisha nyuma hadi Mlima wa Sinai wakati Musa alipoomba kuona utukufu wa Yehova. Yehova alijibu hivi: “Nitapitisha wema wangu wote mbele yako, nami nitalitangaza jina la BWANA [Yehova, NW] mbele yako.” Lakini alimwonya Musa hivi: “Huwezi kuniona uso wangu, maana mwanadamu hataniona akaishi.” Baadaye, Yehova alikuja chini katika wingu, akitangaza hivi: “Yehova, Yehova, Mungu mwenye rehema na neema, wa polepole kukasirika na mwingi katika fadhili-upendo na kweli.” (Kutoka 33:18-20; 34:5, 6, NW) Daudi alinukuu maneno hayo katika sala yake. Sifa hizo za Yehova humaanisha mengi zaidi kwetu kuliko sura ya kimwili! Kutokana na yale tumejionea wenyewe, je, hatuthamini wema wa Yehova kama ilivyotolewa kielelezo katika sifa hizo nzuri?

“Ishara Inayomaanisha Wema”

14, 15. Yehova huwafanyiaje watumishi wake “ishara inayomaanisha wema”?

¹⁴ Daudi aomba baraka ya Yehova tena, akisema hivi: “Nigeukie na kunionyesha upendeleo. Mpe mtumishi wako nguvu zako, na umwokoe mwana wa mjakazi wako. Nifanyie ishara inayomaanisha wema, ili wale wanichukiao waweze kuiona na kuaibika. Kwa sababu wewe mwenyewe, Ee Yehova, umenisaidia na kunifariji.” (Zaburi 86:16, 17, NW) Daudi atambua kwamba akiwa ‘mwana wa mjakazi wa Yehova,’ ni lazima yeye pia awe mali ya Yehova. Ni vivyo hivyo kwa sisi sote leo ambao tumeweka wakfu maisha zetu kwa Yehova na ambao tunatumikia katika utumishi wake. Tunahitaji nguvu za Yehova za kuokoa kupitia roho takatifu yake. Kwa hiyo, tunamwomba Mungu wetu atufanyie “ishara inayomaanisha wema.” Wema wa Yehova unatia ndani zile sifa nzuri ambazo tumetoka tu kuzungumzia. Kwa msingi huo, ni ishara, au dalili gani tunayomtazamia Yehova atupe sisi?

¹⁵ Yehova ni Mpaji wa “kila zawadi njema na kila upaji kamilifu” na ni mkarimu, kama vile Yesu anavyotuhakikishia, katika kutoa “roho takatifu kwa wale wanaomwomba.” (Yakobo 1:17; Luka 11:13, NW) Roho takatifu—hiyo ni zawadi yenye thamani kubwa kama nini kutoka kwa Yehova! Kupitia roho takatifu, Yehova huandaa shangwe ya moyo, hata katika wakati wa mnyanyaso. Hivyo, mitume wa Yesu, walipokuwa jaribuni kwa ajili ya maisha yao, wangeweza kujulisha wazi kwa shangwe kwamba Mungu huwapa roho takatifu wale wanaomtii kuwa mtawala. (Matendo 5:27-32) Shangwe ya roho takatifu iliwafanyia “ishara inayomaanisha wema.”

16, 17. (a) Yehova alimpa Paulo na Barnaba ishara gani ya wema Wake? (b) Wathesalonike walionyanyaswa walipewa ishara gani?

¹⁶ Katika safari yao ya mishonari kupitia Esia Ndogo, Paulo na Barnaba walikabili magumu, hata mnyanyaso mkali. Walipohubiri katika Antiokia ya Pisidia, Wayahudi walikatalia mbali ujumbe wao. Kwa hiyo, waliwarudia watu wa mataifa. Tokeo likawa nini? “Wale wa mataifa waliposikia hayo, walianza kushangilia na kutukuza neno la Yehova, na wote wale waliokuwa na mwelekeo wenye kufaa kwa ajili ya uhai wa milele wakawa waamini.” Lakini Wayahudi walisababisha ghasia nyingi sana, hivi kwamba wale wamishonari walitupwa nje ya nchi hiyo. Je! wao na wale waamini wapya walipondeka roho kwa sababu ya hayo? Sivyo hata kidogo! bali, “wanafunzi waliendelea kujazwa na shangwe na roho takatifu.” (Matendo 13:48, 52, NW) Yehova aliwapa ile ishara ya wema wake.

¹⁷ Baadaye, lile kundi jipya katika Thesalonike lilipatwa na mnyanyaso. Hilo lilimwongoza Paulo aandike barua ya faraja, akipongeza uvumilivu wao chini ya dhiki. Walikuwa ‘wamelipokea neno katika dhiki nyingi, pamoja na shangwe ya roho takatifu.’ (1 Wathesalonike 1:6, NW) “Shangwe ya roho takatifu” iliendelea kuwaimarisha ikiwa ishara ya wazi kutoka kwa yule Mungu mwenye rehema na neema, wa polepole kukasirika, na mwingi katika fadhili-upendo na ukweli.

18. Ndugu zetu katika Ulaya ya Mashariki wameonyeshaje uthamini kwa ajili ya wema wa Yehova?

¹⁸ Katika nyakati za hivi karibuni, Yehova ameonyesha wema wake kuelekea ndugu zetu waaminifu katika Ulaya ya Mashariki, akiwaaibisha wale waliowachukia—wanyanyasi wao wa zamani. Ingawa hivi karibuni wamepata kitulizo kutoka katika uonevu wa muda wa miongo mingi, ndugu hao wapendwa wanahitaji bado kuvumilia, kwani wengi wanakabili magumu makali ya kiuchumi. Hata hivyo, “shangwe [yao] ya roho takatifu” huwafariji. Wangeweza kuwa na shangwe gani kubwa zaidi ya kutumia uhuru wao mbalimbali uliopatikana hivi karibuni katika kupanua utoaji wa ushahidi? Watu wengi wanawasikiliza, kama vile ripoti juu ya mikusanyiko na mabatizo hufunua.—Linganisha Matendo 9:31; 13:48.

19. Tunaweza kufanyaje maneno ya Zaburi 86:11 yawe yetu wenyewe?

¹⁹ Yote ambayo yamezungumziwa katika makala hii na ile inayotangulia yanarudia sala ya Daudi kwa Yehova yenye bidii: “Unifunze mimi, Ee Yehova . . . Ungamanisha moyo wangu kuhofu jina lako.” (Zaburi 86:11, NW) Acheni tufanye maneno hayo ya andiko-mwaka la 1993 yawe yetu wenyewe kabisa tunapojitahidi kwa moyo wote katika utegemezo wa masilahi ya Ufalme na katika uthamini wa wema usioisha wa Mungu wetu mmoja, Bwana Mwenye Enzi Kuu Yehova.

[Maelezo ya Chini]

Ungejibuje?

◻ Tunaonyesha nini kwa kusali, “Unifunze mimi, Ee Yehova”?

◻ Ni nini kinachomaanishwa na mioyo yetu kuungamanishwa kuhofu jina la Yehova?

◻ Yehova ataonyeshaje fadhili-upendo zake kuelekea wote walio waaminifu-washikamanifu?

◻ Yehova hutufanyiaje “ishara inayomaanisha wema”?

[Sanduku katika ukurasa wa 16]

Andiko-mwaka la 1993: “Unifunze mimi, Ee Yehova . . . Ungamanisha moyo wangu kuhofu jina lako.” —Zaburi 86:11.

[Picha katika ukurasa wa 15]

Yehova ni jabali na ngome kwa wale watembeao kwa unyoofu katika kweli

[Picha katika ukurasa wa 18]

Kwenye “Wachukuaji Nuru” Mkusanyiko wa Kimataifa wa Mashahidi wa Yehova katika St. Petersburg, Urusi, katika Juni, 46,214 walihudhuria na 3,256 wakabatizwa. Hao wanajinufaisha vizuri ajabu kama nini kutokana na wema wa Yehova, wakiwa na “shangwe ya roho takatifu”!