Kumsikiliza Yehova Kadiri Ule Mwisho Ukaribiavyo

“Mwenye furaha ni mtu ambaye anasikiliza kwangu mimi . . . kwa maana yeye aliyenipata mimi kwa hakika atapata uzima.—MITHALI 8:34, 35, NW.

 1, 2. (a) Ijapokuwa ukosefu wa amani katika muda wote wa historia ya wanadamu, wengine wanasema nini sasa? (b) Ni kwa sababu gani amani ya kweli kupitia jitihada za binadamu haiwezekani?

IJAPOKUWA ukosefu wa amani katika muda wote wa historia, hasa katika hii karne ya 20, wengine wanasema kwamba mataifa yanachukua hatua kumaliza magumu yao. Wanaelekeza kwenye uhakika wa kwamba viongozi wa ulimwengu wanafanya mikutano ya kuzungumzia amani na wanatia sahihi mapatano mbalimbali. Kwani, hata Umoja wa Mataifa ulitangaza mwaka jana kuwa “Mwaka wa Amani ya Kimataifa”! Ilitumainiwa kwamba hilo lingeona mwanzo wa jitihada za ziada kwa upande wa mataifa za kuendeleza amani, kukiwa na uwezekano wa mafanikio katika wakati ujao ulio karibu.

² Hata hivyo, katika historia yote je! jitihada za namna hiyo zimeleta amani yenye kudumu? Ikiwa hilo lingewezekana kwa jitihada za wanadamu, kungalipaswa kuwe na amani muda mrefu uliopita—muda mrefu kabla hakujakuwa na watu bilioni tano waliogawanyika katika mataifa zaidi ya 160, yakiwa na tofauti zisizohesabika za kisiasa, kiuchumi, na falsafa za kidini. Lakini hakujakuwa na amani kamwe. Wala amani haitatokea kamwe kutokana na jitihada za viongozi wa ulimwengu huu. Kwa sababu gani sivyo? Sababu moja ni kwamba, matatizo ya wanadamu ni magumu sana sasa hivi kwamba hayawezi kutatuliwa kwa jitihada za kibinadamu peke yazo. Kama Yeremia 10:23 linavyosema kwa usahihi sana: “Kuelekeza hatua zake si katika uwezo wa mwanadamu.”

Sababu kwa Nini Jitihada za Kibinadamu Haziwezi Kufaulu

 3. Ni kwa sababu gani nyingine kwa nini wanadamu na mataifa hayataweza kamwe kuleta amani ya kweli?

³ Kuna sababu nyingine kwa nini jitihada za wanadamu na mataifa haziwezi kamwe kuleta amani ya kweli. Biblia inarejeza kwenye 1 Yohana 5:19, NW, ikisema: “Ulimwengu mzima umo katika uwezo wa yule mwovu.” Ufunuo 12:9 unamtambulisha kuwa yule “aitwaye Ibilisi na Shetani, audanganyaye ulimwengu wote.” Wakorintho wa Pili 4:4, NW, humwita “mungu wa huu mfumo wa mambo.” Hivyo, mfumo wote uliopo wa utawala wa kisiasa, kiuchumi, na kidini ambao umetokeza ujeuri mwingi sana, ni mazao ya utawala wa Shetani, si utawala wa Mungu. Ndiyo sababu, linapozungumza juu ya hekima inayotoka kwa Mungu, andiko la 1 Wakorintho 2:8, NW, linasema: “Hekima hii hapana mmoja wa watawala wa huu mfumo wa mambo alipata kujua.”—Luka 4:5, 6.

 4. Matokeo yalikuwa nini baada ya wazazi wetu wa kwanza kuacha kumsikiliza Yehova?

⁴ Shetani alipoasi dhidi ya Mungu, yeye alishawishi wazazi wetu wa kwanza wamsikilize yeye badala ya kumsikiliza Mungu. Kama matokeo, wao wakaiacha njia yao ya utii kwa Mungu nao wakailetea jamaa ya kibinadamu miaka 6,000 yenye maumivu makali. Kama vile Biblia inavyotuambia wazi-wazi, Shetani aliwashawishi wanadamu waamini kwamba wangefanya vema zaidi kwa kutokumsikiliza Muumba wao. (Mwanzo 3:1-5) Katika hekima yake, Yehova ameacha ulimwengu wa wanadamu kwa ujumla ujiendeshe wenyewe, pasipo uongozi wake, hadi leo hii. Na hakika, kwa karne zote hizi, imethibitishwa vya kutosha kwamba utawala wa kibinadamu umeshindwa.—Kumbukumbu 32:5; Mhubiri 8:9.

 5. Hata kama amani ingeweza kuletwa na jitihada za kibinadamu, ni mambo gani ambayo bado yangebaki pamoja nasi?

⁵ Zaidi ya hilo, Adamu na Hawa walipoacha kumsikiliza Yehova, Chanzo cha uhai mkamilifu, wakawa wasiokamilika na hatimaye wakafa. Hivyo, wazao wao wote, walizaliwa wakiwa wasiokamilika. Magonjwa, uzee, na kifo yamekuwa fungu la wanadamu. (Warumi 5:12) Kwa hiyo, hata kama wanadamu wangeweza kufanikiwa katika kuleta amani, bado hawangeweza kuponya kutokamilika kulikorithiwa. Bado tungeendelea kuwa wagonjwa, kuzeeka, na kufa. Kwa kuwa Shetani ndiye mwenye kuleta hayo, Yesu alisema hivi juu yake: “Yeye alikuwa mwuaji tangu mwanzo; wala hakusimama katika kweli.” (Yohana 8:44) Kwa kweli, unapofikiria mabilioni ambao waliishi na kufa wakati uliopita, ni kana kwamba Shetani aliwaua wote hao.

 6. Waharabu wa amani ni akina nani, na lazima jambo gani litokee kwao?

⁶ Shetani alishawishi pia viumbe vingine wa kiroho wajiunge pamoja naye katika kuasi na kukataa kumsikiliza Yehova aliposema. Kwa hiyo ni Shetani, mashetani wake, na binadamu waasi ambao wameuleta ulimwengu huu kwenye hali yao ya sasa. Ni lazima wao wote waondolewe, ili kukomesha majaribio haya yenye msiba ya miaka 6,000 ya kutomtegemea Mungu. “Yule Mungu atoaye amani,” lahakikisha Warumi 16:20, NW, “atamponda Shetani . . . karibuni” pamoja na mashetani wake na binadamu wote wanaokataa kusikiliza Mungu asemapo.—Mathayo 25:41.

Uhitaji Mkubwa Zaidi wa Kusikiliza Sasa

 7. Ni kwa sababu gani inatupasa tuzidishe jitihada zetu za kumtumikia Yehova sasa?

⁷ Sasa tumo ndani sana ya ile sehemu ya kumalizia ya hizi “siku za mwisho.” (2 Timotheo 3:1-5) Kama matokeo, kuna uhitaji mkubwa hata zaidi wa kusikiliza yale ambayo Yehova anasema kwetu sisi. Kuna uhitaji unaolingana na huo kuzidisha kujitoa kwetu kwa moyo wa kupenda kufanya dhahibu ili kumtumikia yeye. Kwa nini tuzidishe jitihada zetu? Kwa sababu Shetani anajua ya kwamba “ana wakati mchache tu” unaobaki. (Ufunuo 12:12) Kwa hiyo hakika yeye atazidisha jitihada zake za kuchafua na kuharibu.

 8. (a) Ni kwa sababu gani kazi ya kuhubiri haiwezi kukomeshwa na maadui wayo? (b) Ni lazima tufanye nini ili tuwe na utegemezo wa kimungu?

⁸ Hasa Shetani angependa kuwazuia Mashahidi wa Yehova wasihubiri zile habari njema za Ufalme. Lakini hawezi, kwa kuwa Yehova amewaahidi hivi: “Kila silaha itakayofanyika juu yako haitafanikiwa.” (Isaya 54:17) Wale wanaopinga watumishi wake ‘wataonekana kuwa wanapigana na Mungu.’ (Matendo 5:38, 39) Kwa hiyo, wakiwa na utegemezo wenye nguvu wa roho ya Yehova, Kristo Yesu, na umati wa majeshi ya kimalaika, utangazaji wa Ufalme unakua katika nguvu kila mwaka. Ili kuendelea kuwa na utegemezo huo wa kimungu, watumishi wa Yehova wanakuwa waangalifu kutii shauri kwenye Yakobo 4:7 na 8: “Basi mtiini Mungu. Mpingeni Shetani, naye atawakimbia. Mkaribieni Mungu, naye atawakaribia.”

 9. Ni kwa sababu gani hatupaswi kumkadiria kidogo Shetani?

⁹ Usiukadiri kidogo uwezo wa Shetani wa kudanganya na kudhuru. Neno la Mungu linatuonya hivi: “Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze. Nanyi mpingeni huyo, mkiwa thabiti katika imani.” (1 Petro 5:8, 9) Kama ungejua kwamba simba mwenye kichaa anazunguka-zunguka katika ujirani, ungejihadhari ili ujilinde wewe mwenyewe na jamaa yako. Shetani anapohusika ni lazima tuwe chonjo hata zaidi, kwa kuwa yeye anaweza kutudhuru milele. Kwa kuhuzunisha, watu walio wengi hawana ulinzi kwa sababu wao hata hawajui kwamba Shetani yuko. Kwa sababu gani hivyo? Kwa sababu wao wanachagua kutosikiliza Neno la Yehova. Na ni nini litakalokuwa matokeo ya uchaguzi huo mbaya? “Cho chote apandacho mtu, ndicho atakachovuna.”—Wagalatia 6:7.

Waliapo “Amani na Usalama!”

10, 11. (a) Ni unabii gani wa Biblia unaohusu mataifa kutafuta amani katika wakati wetu? (b) Amani yo yote ya namna hiyo itadumu kwa muda gani?

¹⁰ Usikutwe umesinzishwa na mafanikio ya muda mfupi ambayo huenda mataifa yakawa nayo katika kuleta amani. Sikuzote kumbuka kwamba Yehova hatumii cho chote cha vyombo vya ulimwengu huu kuelekea mwisho huu. Yehova ana njia yake mwenyewe ya kuleta amani na usalama, na njia hiyo ni kupitia tu Ufalme wake chini ya Kristo. Kwa hiyo fanikio lo lote la muda mfupi ambalo huenda mataifa yakapata katika kuimarisha amani, litakuwa fupi na la bandia tu. Hakuna kitu kitakachokuwa kimebadilika kweli kweli. Uhalifu, ujeuri, vita, njaa, umaskini, kuvunjika kwa jamaa, ukosefu wa adili, magonjwa, kifo, na Shetani na mashetani wake watakuwa wangali pamoja nasi mpaka Yehova aondoe vyote hivyo. “[Yehova] asipoijenga nyumba wajengao wafanya kazi bure.”—Zaburi 127:1.

¹¹ Unabii wa Biblia unaonyesha kwamba mataifa yangejitahidi sana yapate amani katika wakati wetu. Unasema hivi: “Ninyi wenyewe mwajua sana kwamba siku ya Yehova inakuja sawasawa kama mwivi usiku. Wakati wo wote wanaposema: ‘Amani na usalama!’ ndipo uharibifu wa ghafula utakapokuwa juu yao papo kwa hapo sawasawa na utungu juu ya mwanamke mwenye mimba; nao hawataokoka kwa vyo vyote.” (1 Wathesalonike 5:2, 3, NW) Kilio hicho cha ‘Amani na usalama!’ hakitamaanisha kwamba ulimwengu huu umegeuka na kuacha kuharibika. Timotheo wa Pili 3:13 husema kwamba “watu wabaya na wadanganyaji wataendelea, na kuzidi kuwa waovu.” Ukweli bado utakuwa kama vile kiongozi wa tengenezo la mazingira alivyosema: “Tatizo kuu linalopata jamii ya watu ni kwamba imekuwa isiyotawalika.”

12. Watumishi wa Yehova wanajua nini juu ya umaana halisi wa kile kilio kinachokuja cha ‘amani na usalama’?

¹² Watu wengi ulimwenguni watadanganywa na matumaini yasiyofaa kitu katika wakati unaokuja wa kilio cha “Amani na usalama!” Lakini watumishi wa Yehova hawatadanganywa, kwa kuwa wanasikiliza Mungu asemapo. Hivyo wanajua kutokana na Neno lake kwamba tangazo kama hilo halitaleta amani ya kweli na usalama. Badala yake, kwa kweli litakuwa ishara ya mwisho kwamba ‘uharibifu wa ghafula utakuwa juu yao papo kwa hapo.’ Itatangaza mwanzo unaokaribia sana wa ile “dhiki kubwa” ambayo Yesu alitabiri kwa wakati wetu. Yeye alisema: “Kwa kuwa wakati huo kutakuwa dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.”—Mathayo 24:21.

13. Biblia inaelezaje mwisho wa tawala za kibinadamu?

¹³ Wakati wa hiyo “dhiki kubwa,” utawala wa kibinadamu utakomeshwa. Zaburi 2:2-6 husema: “Wafalme wa dunia wanajipanga, na wakuu wanafanya shauri pamoja, juu ya [Yehova], na juu ya masihi wake, [wakisema:] Na tuvipasue vifungo vyao, na kuzitupia mbali nasi kamba zao. Yeye aketiye mbinguni anacheka, [Yehova] anawafanyia dhihaka. Ndipo atakaposema nao kwa hasira yake, na kuwafadhaisha kwa ghadhabu yake [akisema:] Nami nimemweka mfalme wangu juu ya Sayuni, [wa kimbingu], mlima wangu mtakatifu.” Zaburi 110:5 na 6 inaongezea hivi: “[Yehova]. . . ataseta wafalme, siku ya ghadhabu yake. Atahukumu kati ya mataifa.” Mipango yote ya kisiasa itakoma, kwa kuwa Isaya 8:9 na 10 husema hivi: “Jikazeni viuno, nanyi mtavunjwa vipande vipande; jikazeni viuno, nanyi mtavunjwa vipande vipande. Fanyeni shauri pamoja, nalo litabatilika; semeni neno, lakini halitasimama; kwa maana Mungu yu pamoja nasi.”

Uhakika wa Kuokoka

14. Ni kwa sababu gani tuna uhakika kwamba kutakuwako waokokaji wa mwisho wa ulimwengu huu?

¹⁴ Sisi tuna uhakika kwamba Yehova ataendelea kuwapasha habari vya kutosha watu wake ili kwamba wachukue hatua zinazofaa ili kuokoka ile “dhiki kubwa” inayokuja. Tunawezaje kuwa na uhakika hivyo? Kwa sababu unabii katika Ufunuo 7:9 na 14 huonyesha kwamba “mkutano mkubwa” kweli kweli utaokoka. Kwa sababu gani? Kwa sababu wao wanasikiliza Yehova anaposema, nao wanashauriwa ifaavyo. Kwa njia hiyo wao wanaweza kufanya yale yanayosemwa na Ufunuo 7:15. “Wanamtumikia mchana na usiku katika hekalu lake.” Hivyo, wanafanya mapenzi ya Mungu, wanapata kibali yake, nao wanalindwa waokoke mwisho wa ulimwengu huu. —l Yohana 2:15-17.

15. Yoeli anaelezaje kupondwa-pondwa kwa mfumo huu, lakini kukiwa na matokeo gani kwa watumishi wa Mungu?

¹⁵ Yoeli 3:13 hadi 16 pia hurejeza kwenye kuokolewa kwa watumishi wa Mungu wakati mfumo huu unapopondwa-pondwa kama zabibu katika shinikizo la divai. Husema hivi: “Haya! utieni mundu, maana mavuno yameiva;... mapipa nayo yanafurika; kwani uovu wao ni mwingi sana. Makutano makubwa, makutano makubwa, wamo katika bonde la kukata maneno! kwa maana siku ya [Yehova] i karibu, katika bonde la kukata maneno. Jua na mwezi vimetiwa giza, na nyota zimeacha kuangaza. Naye [Yehova] atanguruma toka Sayuni [wa kimbingu], . . . na mbingu na [dunia] zitatetemeka; lakini [Yehova] atakuwa kimbilio la watu wake.”

16. Ni unabii gani mwingine mbalimbali unaoonyesha kwamba Yehova atahifadhi watu wake kupitia uharibifu wa ulimwengu?

¹⁶ Vivyo hivyo, kwenye Isaya 26:20 na 21 Yehova anatuambia juu ya wakati huo unaokuja, akisema: “Njoni, watu wangu, ingia wewe ndani ya vyumba vyako, ukafunge mlango nyuma yako ujifiche kitambo kidogo, mpaka ghadhabu hii itakapopita. Kwa maana, tazama, [Yehova] anakuja kutoka mahali pake, ili kuadhibu wakaao duniani, kwa sababu ya uovu wao.” Hivyo, Sefania 2:2 na 3 hutuhimiza hivi: “[Kabla] haijawajilia siku ya hasira ya [Yehova]. Mtafuteni [Yehova], enyi nyote mlio wanyenyekevu wa dunia, ninyi mliozitenda hukuma zake; itafuteni haki, utafuteni unyenyekevu; huenda mtafichwa katika siku ya hasira ya [Yehova].”

‘Kumkimbilia’ Yehova

17. (a) Ni lazima jambo gani lifanywe ili kupata ulinzi wa Yehova? (b) Ni kosa gani walilofanya watu katika ulimwengu uliotangulia Gharika?

¹⁷ Mithali 18:10 husema: “Jina la [Yehova] ni ngome imara; mwenye haki huikimbilia, akawa salama.” Je! wewe ‘unamkimbilia’ Yehova? Kumbuka aliyosema Yesu kuhusu watu katika siku za Noa. Walikuwa “wakila na kunywa, wanaume wakioa na wanawake wakipewa katika ndoa, mpaka siku ile Noa aliyoingia ndani ya safina; nao hawakujali mpaka gharika ikaja, na kuwafagilia mbali wote.” (Mathayo 24:38, 39, NW) Kosa walilofanya ni kujishughulisha sana na mambo mengine hata wasisikilize Mungu aliposema kupitia mjumbe wake, Noa, “mhubiri wa uadilifu.” (2 Petro 2:5, NW) Kwa sababu hawakusikiliza, wakati Gharika ilipokuja ‘ikawafagilia mbali wote’ kwenye uharibifu.

18. Ni kwa sababu gani kuwa kwao “watu wazuri” tu hakukuokoa wale walioharibiwa katika Gharika?

¹⁸ Wengi wa hao waliokufa katika hiyo Gharika bila shaka walijifikiria kuwa “watu wazuri,” ambao hawakuhusika katika jeuri iliyokuwa imejaa katika jamii ya watu siku hizo. Lakini kuwa kwao wazuri tu hakukuwaokoa. Kwa ubaridi wao waliachilia maovu ya siku zao. Jambo la maana sana ni kwamba wao ‘hawakumkimbilia’ Yehova; hawakusikiliza wakati mtumishi wa Mungu aliposema. Kwa hiyo wao hawakuchukua hatua zifaazo ili waokolewe. Kwa upande mwingine, wale waliosikiliza waliokoka.

19. Ni manufaa gani nzuri ajabu ambazo watumishi wa Yehova wanavuna hata sasa, na kwa sababu gani?

¹⁹ Leo Mungu anasema amani kwa wale wanaomsikiliza. Kukiwa na matokeo gani kwao? Isaya 54:13 husema: “Watoto wako wote watafundishwa na [Yehova]; na amani ya watoto wako itakuwa nyingi.” Ndiyo, “[Yehova] atawabariki watu wake kwa amani.” (Zaburi 29:11) Hivyo, katikati ya ulimwengu huu wenye jeuri Mashahidi wa Yehova wana amani ya kweli, isiyovunjika miongoni mwao. Wana udugu wa kimataifa wenye upendo ambao viongozi wa ulimwengu, mataifa yao, na dini zao haziwezi kuiga. Kwa sababu gani? Kwa sababu hawasikilizi kweli kweli Mungu anaposema. Kwa hiyo hawatendi juu ya yale anayosema. Lakini Mashahidi wa Yehova wanamsikiliza Mungu. Wanachukua kwa uzito maneno kwenye Mhubiri 12:13: “Mche Mungu, nawe uzishike amri zake, maana kwa jumla ndiyo impasayo mtu.”

20. Ni lazima kila mtu afanye nini ili aokoke na kuingia katika ulimwengu mpya wa Mungu?

²⁰ Hilo ndilo kila mtu—ndiyo, wote wanaotaka kuishi katika ulimwengu mpya wa Mungu—lazima wafanye. Ni lazima wao ‘wamkimbilie’ Yehova bila kuchelewa. Kweli kweli, ni lazima wao ‘waongozwe’ na hekima anayotoa Mungu ambayo inafananishwa ikisema: “Sikilizeni kwangu mimi; ndiyo, wenye furaha ndio wale wanaoshika njia zangu wenyewe. Sikilizeni nidhamu mwe na hekima, na msionyeshe uzembe wo wote. Mwenye furaha ni mtu ambaye anasikiliza kwangu mimi... Kwa maana yeye anayenipata mimi kwa hakika atapata uzima.”—Mithali 8:32-35, NW.

Wewe Ungeitikiaje?

◻ Ni kwa nini jitihada za kibinadamu hazitafaulu kamwe katika kuleta amani?

◻ Ni kwa nini sasa kuna uhitaji mkubwa zaidi wa kumsikiliza Yehova?

◻ Kilio kinachokuja cha “Amani na Usalama!” kwa kweli kitamaanisha nini?

◻ Ni lazima tufanye nini ikiwa tunataka kuokoka tuingie ndani ya mfumo mpya wa Mungu?

[Picha katika ukurasa wa 17]

Kama simba angurumaye, Shetani anazidisha jitihada zake za kuchafua na kuharibu

[Picha katika ukurasa wa 18]

Mfumo huu unapopondwa-pondwa kama zabibu katika shinikizo la divai, “[Yehova] atakuwa kimbilio la watu wake”