Amani Itakuja Wakati Gani Hasa?

“VITA ni moja ya kawaida za historia, nayo haikupungua kwa ustaarabu au demokrasi,” wakaandika Will na Ariel Durant katika kitabu chao The Lessons of History. “Amani ni usawa usio imara, ambao unaweza kuhifadhiwa tu kwa kukiri kwamba kuna mamlaka kuu au uwezo ulio sawa.”

Kwa kweli, ijapokuwa juhudi nyingi, amani ya kudumu imewaepuka wanadamu mpaka sasa. Kwa nini? Sababu ni kwamba sababu za vita zina msingi wenye kina kirefu kuliko mashindano ya kisiasa, ya kieneo, au ya kijamii ambayo tunaona kwa juujuu. Akina Durant walionelea hivi: “Sababu za vita ni sawa na sababu za mashindano kati ya watu mmoja mmoja: tamaa ya kupata vitu, kutaka vita, na kiburi; tamaa ya chakula, ya ardhi, ya vifaa, ya viwashia-moto, ya ubwana.”

Hata hivyo, Biblia hasa inatambulisha sababu ya msingi ya ugomvi na vita kati ya watu mmoja mmoja na kwa kadiri kubwa zaidi. Tunasoma hivi: “Vita vyatoka wapi, na mapigano yaliyoko kati yenu yatoka wapi? Si humu, katika tamaa zenu zifanyazo vita katika viungo vyenu? Mwatamani, wala hamna kitu; mwaua na kuona wivu, wala hamwezi kupata. Mwafanya vita na kupigana.”—Yakobo 4:1, 2.

Kwa hiyo, suala hasa lajumlika kuwa hili: Ili amani ya kweli ije ni lazima tuondoe si dalili zenyewe tu—vita, machafuko, mapinduzi, maasi—bali sababu za msingi pia—kushuku, pupa, chuki, uadui—katika wanadamu wote. Mahali pa hizo papasa pachukuliwe na vitendo vinavyopatana na sifa zisizo za ubinafsi kama upendo, fadhili, tumaini, na ukarimu. Je, kuna yeyote ambaye aweza kutimiza hilo? Ikiwa jambo hilo linategemea wanadunia wenye kufa wasio wakamilifu, jibu litapasa kuwa sivyo. Kuna mtu fulani ambaye kwake hilo si jambo gumu mno. Huyo ni yule ambaye analo jibu la swali hili: Amani itakuja wakati gani hasa?

Yule Anayeweza Kuleta Amani

Karne 28 hivi zilizopita, nabii Isaya alipuliziwa roho kujulisha rasmi hivi: “Kwa ajili yetu mtoto amezaliwa, tumepewa mtoto mwanamume; na uweza wa kifalme utakuwa begani mwake; naye ataitwa jina lake, Mshauri wa ajabu, Mungu mwenye nguvu, Baba wa milele, Mfalme wa amani [Mwana-mfalme wa Amani, NW]. Maongeo ya enzi yake na amani hayatakuwa na mwisho kamwe.”—Isaya 9:6, 7.

Utambulisho wa huyu ambaye ataleta amani bila mwisho ulifunuliwa baadaye kuwa si mwingine ila Yesu Kristo, “Mwana wa Aliye juu.” (Luka 1:30-33; Mathayo 1:18-23) Lakini kwa nini huyo atafaulu mahali ambapo wana-wafalme na watawala wengine wote wameshindwa? Kwanza yapaswa kuangaliwa kwamba, “mtoto” aliyeahidiwa hangebaki kuwa mtoto mchanga asiyeweza kujisaidia, kama vile wengine wangemwona kuwa. Bali, yeye angetumia “enzi yake” akiwa “Mwana-mfalme wa Amani,” iwe kwa baraka ya milele ya ainabinadamu.

Utawala wa Yesu unatia ndani zaidi. Akiwa “Mshauri wa ajabu,” aliye na ufahamu usio wa kawaida wa asili ya kibinadamu na uwezo wa kupita wote, ataweza kuingia kwenye kiini cha masuala yaliyo magumu na kwa hiyo kupata suluhisho la matatizo makali yanayowakabili na kuwavuruga watawala wa ulimwengu leo. (Mathayo 7:28, 29; Marko 12:13-17; Luka 11:14-20) Halafu, akiwa “Mungu mwenye nguvu,” Yesu Kristo mfufuliwa aliye wa kimungu, ambaye sasa amekwezwa mbinguni akiwa Mfalme wa Kimesiya, atafanya kazi kwa ajili ya amani kwa kufanya tena kwa kadiri kubwa zaidi yale ambayo alikuwa ameyafanya duniani—kuponya wale walio na magonjwa yasiyoponyeka, kuwaandalia wengi sana chakula na kinywaji, hata kudhibiti hali ya anga. (Mathayo 14:14-21; Marko 4:36-39; Luka 17:11-14; Yohana 2:1-11) Akiwa “Baba wa milele,” Yesu ana uwezo wa kurudisha kwenye uhai wale waliopotea katika kifo na kuwapa uhai wa milele. Naye mwenyewe ataishi milele, hivyo akihakikisha kwamba utawala wake na amani hiyo hazitakuwa na mwisho.—Mathayo 20:28; Yohana 11:25, 26; Warumi 6:9.

Akiwa ametayarishwa hivyo, kwa wazi Yesu Kristo ndiye anao uwezo wa kushughulika na sababu zenye vina virefu za vita na ugomvi. Yeye hatafanya mkataba wa amani tu au mpango kwa ajili ya kule kunakoitwa eti kuwako pamoja kwa mataifa kwa amani, upate tu kuvunjwa-vunjwa na vita nyingine. Bali, ataondoa kila kutokusawazika kwa kisiasa, kwa kieneo, kwa kijamii, na kwa kiuchumi kwa kuleta ainabinadamu wote chini ya utawala mmoja, ule wa Ufalme wake wa Kimesiya. Kwa kuwaongoza watu wote katika ibada ya yule Mungu mmoja wa kweli, Yehova, ataondoa ile iliyo mara nyingi sababu ya msingi ya vita—dini bandia. Hakuna shaka kwamba Yesu Kristo, Mwana-mfalme wa Amani, atatimiza hayo yote. Swali ni, Wakati gani?

Matukio Yaongozayo Kwenye Amani ya Kudumu

Baada ya ufufuo wake na kupaa kwake mbinguni katika 33 W.K., Yesu alipaswa aungojee wakati uliowekwa ili aanze kutenda. Hiyo ililingana na amri hii ya Yehova: “‘Keti upande wangu wa kulia, mpaka niwafanye adui zako, kama kibao cha kuegemea miguu yako.’ Toka Sioni Mwenyezi-Mungu [Yehova, NW] ataeneza enzi yako. Asema: ‘Tawala juu ya adui zako!’” (Zaburi 110:1, 2, HNWW; Luka 22:69; Waefeso 1:20; Waebrania 10:12, 13) Hiyo inatokea wakati gani? Kwa zaidi ya miaka 70, Mashahidi wa Yehova wamekuwa wakipiga mbiu ya habari njema kuzunguka ulimwengu kwamba Yesu Kristo alianza kutawala katika Ufalme wa Mungu mbinguni katika mwaka wa 1914.a

Lakini huenda ukasema, ‘Hakujawa na amani tangu 1914. Tofauti na hiyo, hali zimezidi kuwa mbaya tangu wakati huo.’ Uko sahihi kabisa. Hiyo kwa kweli inathibitisha kwamba matukio yanatendeka kama vile yalivyotabiriwa. Biblia inatuambia kwamba wakati ule ule ‘Ufalme wa dunia ulikwisha kuwa ufalme wa Bwana wetu na wa Kristo wake, mataifa walikasirika.’ (Ufunuo 11:15, 18) Badala ya kujitiisha kwa utawala wa Yehova Mungu na Mwana-Mfalme wake, mataifa wa-lijiingiza katika mashindano ya kichaa kwa ajili ya utawala wa ulimwengu na walionyesha kasirani hasa dhidi ya Wakristo waliokuwa wakishuhudia juu ya Ufalme wa Mungu uliosimamishwa.

Kitabu cha Ufunuo kinafunua pia kwamba wakati Yesu alipopata mamlaka ya Ufalme, ndipo alipochukua hatua ya kumwondoa Shetani na roho waovu wake kutoka mbinguni: “Sasa kumekuwa wokovu, na nguvu, na ufalme wa Mungu wetu, na mamlaka ya Kristo wake; kwa maana ametupwa chini mshitaki wa ndugu zetu, yeye awashitakiye mbele za Mungu wetu, mchana na usiku.” Tokeo likawa nini? Usimulizi unaendelea hivi: “Kwa hiyo shangilieni, enyi mbingu, nanyi mkaao humo. Ole wa nchi na bahari! kwa maana yule Ibilisi ameshuka kwenu mwenye ghadhabu nyingi, akijua ya kuwa ana wakati mchache tu.”—Ufunuo 12:10, 12.

Ishara ya Mwisho

Hiyo inatupa mwono-ndani juu ya sababu gani mataifa hawajaweza kuleta amani ijapokuwa juhudi zao zote. Kasirani kubwa ya Ibilisi, inayoonyeshwa katika kasirani ya mataifa yenyewe, imeweka ulimwengu katika hali ya kufadhaishwa na katika machafuko kwa jinsi isivyokuwako kamwe katika historia ya wanadamu. Hayo yote yatakwisha wakati gani? Biblia inaanda alama hii ya maana: “Wakati wasemapo, Kuna amani na salama, ndipo uharibifu uwajiapo kwa ghafula.”—1 Wathesalonike 5:3.

Je, wewe unathamini umaana wa onyo hilo? Matukio ya ulimwengu kama yale tumeeleza kwa mambo mengi katika makala iliyotangulia yanaonyesha kwamba watu wengi wanaanza kuona kwamba amani ya ulimwengu iko karibu kupatikana. Wengine huona kwamba kukiwa na mwisho wa Vita ya Maneno, tisho la uharibifu wa kinyukilia ni jambo la zamani. Mataifa yamekuwa yakisema mengi juu ya amani na salama. Lakini je, hali ya ulimwengu kwa kweli inasogea upande huo? Kumbuka, Yesu alisema hivi juu ya wale watakaoishi kupitia muda wa siku za mwisho, zenye kuanza 1914: “Amin, nawaambia, Kizazi hiki hakitapita, hata hayo yote yatakapotimia.” (Mathayo 24:34) Ndiyo, amani itakuja hasa katika kizazi hiki lakini si kupitia juhudi za mataifa. Amani yenye kusimamishwa imara, yenye haki, na yenye uadilifu iliyoahidiwa na Yehova Mungu inaweza kuja kupitia tu utawala unaokuja wa Mwana-mfalme wa Amani wake, Yesu Kristo.—Isaya 9:7.

Ikiwa unatamani kuona siku ambayo amani itakuja hasa na kuiona pamoja na wapendwa wako, basi tumaini katika Mwana-Mfalme wa Amani na ukumbuke vizuri maneno yake haya yenye kutia moyo: “Basi, kesheni ninyi kila wakati, mkiomba, ili mpate kuokoka katika hayo yote yatakayotokea, na kusimama mbele za Mwana wa Adamu [Mwana wa binadamu, NW].—Luka 21:36.

[Maelezo ya Chini]

[Sanduku katika ukurasa wa 6]

AMANI YAELEZWA

Leo watu walio wengi huona amani kuwa kutokuwako kwa vita au ugomvi. Hata hivyo, hilo ni elezo lenye maana pungufu sana la neno hilo. Katika nyakati za Biblia neno “amani” (Kiebrania, sha·lohmʹ) au usemi ‘Amani na iwe kwako!’ lilitumiwa kuwa namna ya kawaida ya salamu. (Waamuzi 19:20; Danieli 10:19; Yohana 20:19, 21, 26) Kwa wazi, hairejezei tu kutokuwako kwa vita. Angalia jambo ambalo kitabu The Concept of Peace kinasema juu ya wazo hili: “Wakati neno shalom linapotumiwa kuhusu amani, wazo la waliolitumia mwanzoni lilikuwa hali ya ulimwengu au ya jamii ya wanadamu ambamo mna ukamili, umoja, ukamilifu, utimilifu. . . . Mahali palipo amani, amani yenyewe na sehemu zayo zinakuwa zimefikia upeo na ubora kamili wa kuwapo kwazo.” Wakati Mungu anapoleta amani, wanadamu hawataacha tu ‘kujifunza vita tena’ bali pia ‘kila mtu ataketi chini ya mzabibu wake na chini ya mtini wake.’—Mika 4:3, 4.

[Picha katika ukurasa wa 7]

Ukosefu wa amani umeonwa sana tangu Vita ya Ulimwengu