Ugomvi wa Yehova na Mataifa

“Mshindo utafika hata mwisho wa dunia, maana BWANA [Yehova, NW] ana [ugomvi] na mataifa.”—YEREMIA 25:31.

1, 2. (a) Ni nini kilichotukia Yuda baada ya kifo cha Mfalme Yosia? (b) Ni nani aliyekuwa mfalme wa mwisho wa Yuda, naye alitesekaje kwa ajili ya ukosefu wake wa uaminifu?

BARA la Yuda lilikabili nyakati za hatari zilizo ngumu kushughulika nazo. Mfalme mmoja mzuri, Yosia, alikuwa amekawisha kwa muda hasira kali ya Yehova. Lakini ni nini kilichofuata wakati Yosia alipouawa katika 629 K.W.K.? Wafalme waliofuata baada yake walikosa kumheshimu Yehova.

² Mfalme wa mwisho wa Yuda, Sedekia, mwana wa nne wa Yosia, aliendelea, kama vile 2 Wafalme 24:19 lisemavyo, ‘kufanya yaliyo mabaya machoni pa Yehova, sawasawa na yote aliyoyafanya [kaka yake] Yehoyakimu.’ Tokeo lilikuwa nini? Nebukadreza alikuja dhidi ya Yerusalemu, akamkamata Sedekia, akachinja wanawe mbele ya macho yake, akampofusha, na kumpeleka Babiloni. Zaidi ya hayo, Wababiloni waliteka nyara vyombo vilivyotumiwa katika ibada ya Yehova, wakachoma moto hekalu na jiji. Waokokaji wakawa mateka katika Babiloni.

3. Ni kipindi kipi kilichoanza na uharibifu wa Yerusalemu katika 607 K.W.K., na nini kilichokuwa karibu kutukia mwishoni mwa kipindi hicho?

³ Mwaka huo, 607 K.W.K., ulitia alama si mwisho wa kufanywa ukiwa kwa Yerusalemu tu bali pia mwanzo wa “nyakati zilizowekwa za mataifa,” zinazorejezewa kwenye Luka 21:24, NW. Kipindi hicho cha miaka 2,520 kilikwisha katika karne yetu, katika mwaka 1914. Kufikia hapo wakati ulikuwa umefika wa Yehova kutangaza na kutekeleza hukumu juu ya ulimwengu mfisadi, kupitia Mwanae aliyetawazwa, Yesu Kristo, ambaye ni mkuu zaidi ya Nebukadreza. Hukumu hiyo yaanza na ulingano wa ki-siku-hizi wa Yuda, ulingano unaodai kumwakilisha Mungu na Kristo duniani.

4. Ni maswali gani yanayotokea sasa kuhusiana na unabii wa Yeremia?

⁴ Je! sisi twaona ufanano kati ya ule msukosuko wa wakati wa miaka ya mwisho-mwisho ya Yuda chini ya wafalme walo—pamoja na matukio ya uharibifu yaliyoathiri mataifa jirani pia—na ule msukosuko ulio katika Jumuiya ya Wakristo leo? Kwa hakika twaona! Basi, unabii wa Yeremia waonyesha nini kuhusu jinsi Yehova atakavyoshughulikia mambo leo? Acheni tuone.

5, 6. (a) Tangu 1914, hali ya Jumuiya ya Wakristo imefananaje na ile katika Yuda kabla tu ya uharibifu walo? (b) Yeremia wa kisasa ameipelekea Jumuiya ya Wakristo ujumbe gani?

⁵ Mwanahisabati na mwanafalsafa Mwingereza Bertrand Russell alitoa maelezo haya karibu miaka 40 iliyopita: “Tangu 1914, kila mtu anayejua maelekeo yaliyo katika ulimwengu amehangaishwa sana na ule ambao umeonekana kuwa kama mwendo wenye tukio baya na uliokusudiwa kimbele kuelekea msiba unaozidi kuwa mkubwa.” Na waziri wa serikali Mjerumani Konrad Adenauer alisema hivi: “Usalama na utulivu vimetoweka katika maisha ya watu tangu 1914.”

⁶ Leo, kama vile katika siku za Yeremia, kukaribia kwa mwisho wa mfumo wa mambo kumetiwa alama na umwagikaji mwingi wa damu ya wasio na hatia, hasa katika vita viwili vya ulimwengu vya karne hii. Kwa sehemu kubwa, vita hivyo vilipiganwa na mataifa ya Jumuiya ya Wakristo, yanayodai kumwabudu Mungu wa Biblia. Huo ni unafiki ulioje! Haishangazi kwamba Yehova amewatuma Mashahidi wake kwao akisema, katika maneno ya Yeremia 25:5, 6: “Rudini sasa, kila mtu na aiache njia yake mbaya; uacheni uovu wa matendo yenu . . . wala msiwafuate miungu mingine, ili kuwatumikia na kuwasujudia, wala msinikasirishe kwa kazi ya mikono yenu; basi, [nisije nikaleta msiba kwenu, NW].”

7. Kuna ithibati gani kwamba Jumuiya ya Wakristo imepuuza maonyo ya Yehova?

⁷ Hata hivyo, mataifa ya Jumuiya ya Wakristo yameshindwa kugeuka. Hilo limedhihirishwa katika kutoa kwao dhabihu zaidi kwa mungu wa vita katika Korea na Vietnam. Wao waendelea kugharimia wauzaji kifo, watengenezaji silaha. Mabara ya Jumuiya ya Wakristo yalitoa sehemu kubwa zaidi kati ya karibu dola trilioni moja zilizotumiwa kununua silaha kila mwaka wakati wa miaka ya 1980. Kuanzia 1951 hadi 1991, matumizi ya kijeshi ya United States pekee yalipita jumla ya faida za mashirika yote ya Amerika yakiwa pamoja. Tangu mwisho wa Vita Baridi uliotangazwa sana, silaha za nyukilia zisizo za ki-siku-hizi zimepunguzwa, lakini zana kubwa zenye silaha hatari zaidi zadumu na kuendelea kusitawishwa. Huenda hizo zikatumiwa siku moja.

Hukumu Dhidi ya Makao ya Jumuiya ya Wakristo Yenye Uendekevu

8. Maneno ya Yeremia 25:8, 9 yatatimizwaje juu ya Jumuiya ya Wakristo?

⁸ Maneno zaidi ya Yehova, yapatikanayo kwenye Yeremia 25:8, 9, sasa yatumika hasa kwa Jumuiya ya Wakristo, ambayo imeshindwa kujipatanisha na viwango vya Kikristo vya uadilifu: “Basi BWANA, [Yehova, NW] wa majeshi asema hivi, Kwa kuwa hamkuyasikiliza maneno yangu, angalieni, nitapeleka watu na kuzitwaa jamaa zote za upande wa kaskazini, asema BWANA, [Yehova, NW], nami nitatuma ujumbe kwa Nebukadreza, mfalme wa Babeli, mtumishi wangu, nami nitawaleta juu ya nchi hii, na juu yao wakaao ndani yake, na juu ya mataifa haya yote yaliyopo pande zote; nami nitawaangamiza kabisa, na kuwafanya kitu cha kushangaza, na kitu cha kuzomewa, na ukiwa wa daima.” Hivyo, dhiki kubwa itaanzia na watu wanaodai kuwa wa Mungu, yaani Jumuiya ya Wakristo, hatimaye ikienea dunia yote, kwa ‘mataifa yote yaliyo pande zote.’

9. Ni katika njia zipi hali ya kiroho ya Jumuiya ya Wakristo imekuwa mbaya zaidi katika wakati wetu?

⁹ Kulikuwa na wakati ambapo Biblia iliheshimiwa katika Jumuiya ya Wakristo, wakati ambapo maisha ya ndoa na familia yalionwa kuwa chanzo cha furaha karibu kila mahali, wakati ambapo watu waliamka mapema na kupata uradhi na kazi yao ya kila siku. Wengi walijiburudisha kwa kusoma na kujifunza Neno la Mungu jioni-jioni. Lakini leo, ngono za ovyo-ovyo, talaka, matumizi mabaya ya dawa za kulevya na ulevi, utovu wa nidhamu, pupa, tabia za uzembe kazini, uzoelefu wa kutazama televisheni, na mabaya mengineyo yamefisidi maisha kwa kiwango cha kusikitisha. Hayo ni mambo ya utangulizi kabla ya uharibifu ambao Yehova Mungu yuko karibu kutekeleza juu ya milki yenye uendekevu ya Jumuiya ya Wakristo.

10. Fafanua hali ya Jumuiya ya Wakristo baada ya kutekelezwa kwa hukumu za Yehova.

¹⁰ Yehova ajulisha hivi, kama tusomavyo kwenye Yeremia sura ya 25, mstari wa 10 na 11: “Tena, nitawaondolea sauti ya kicheko, na sauti ya furaha, sauti ya bwana arusi, na sauti ya bibi arusi, sauti ya mawe ya kusagia, na nuru ya mishumaa. Na nchi hii yote pia itakuwa ukiwa, na kitu cha kushangaza.” Kwa kweli itashangaza wakati mahekalu makubwa na majumba ya kifalme yenye starehe ya Jumuiya ya Wakristo yatakapoporomoka katika uharibifu wayo. Uharibifu huo utaendelea kwa kipindi gani? Katika wakati wa Yeremia, kufanywa ukiwa kwa Yuda na mataifa jirani kuliendelea kwa miaka 70, ambayo Zaburi 90:10 yaeleza kuwa muda wa maisha wa kawaida. Tekelezo la hukumu ya Yehova leo litakuwa kamili, la milele.

Hukumu Dhidi ya Babiloni Mkubwa

11. Ni nani atakayetumiwa katika kuiharibu Jumuiya ya Wakristo? Kwa nini?

¹¹ Kama ilivyotabiriwa kwenye Ufunuo 17:12-17, wakati utakuja ambapo Yehova ataanza tendo lake geni kwa kutia mioyoni mwa zile “pembe kumi”—washirika wa kivita wa Umoja wa Mataifa—‘ili kutekeleza kusudi lake’ la kufanya ukiwa milki ya ulimwengu ya dini bandia. Hilo litatukiaje? Kuna njia nyingi ambazo kwazo zile “pembe kumi” za Ufunuo sura ya 17 zaweza kuja ‘kumchukia kahaba na kumchoma kabisa kwa moto,’ kulingana na maneno ya mstari wa 16. Ni kweli, silaha za nyukilia zimeongezeka sana na bado zinazidi kuongezeka katika sehemu nyingi za dunia ambako hali si ya usalama. Lakini ni lazima tungoje ili tuone jinsi Yehova atakavyoweka katika mioyo ya watawala wa kisiasa wazo la kutekeleza kisasi chake.

12. (a) Ni nini kilichopata Babiloni baada ya kuharibu Yerusalemu? (b) Ni nini kitakachopata mataifa baada ya uharibifu wa Jumuiya ya Wakristo?

¹² Katika nyakati za kale ilikuwa zamu ya Babiloni kupatwa na hasira kali ya Yehova. Kwa hiyo, kuanzia na Yeremia sura ya 25, mstari wa 12, unabii huo watazama mambo kwa msimamo wa baadaye, uliobadilika. Akiwa hayuko tena katika fungu la kuwa Mtekelezaji-Hukumu wa Yehova, Nebukadreza na Babiloni sasa watiwa ndani miongoni mwa mataifa yote ya kilimwengu. Hiyo yafanana na hali ya leo. “Pembe kumi” za Ufunuo sura ya 17 zitafanya dini bandia kuwa ukiwa, lakini baadaye hizo zenyewe zitapatwa na uharibifu pamoja na “wafalme” wengineo wote wa dunia, kama inavyoelezwa katika Ufunuo sura ya 19. Yeremia 25:13, 14 yaeleza jinsi Babiloni, kutia na “mataifa haya yote” ambayo yamewatumia kichoyo watu wa Yehova, yapata hukumu. Yehova alikuwa amemtumia Nebukadreza kuwa mfishaji katika kuadhibu Yuda. Lakini yeye na pia wafalme wa baadaye wa Babiloni walikuja kujitukuza wenyewe kwa kiburi dhidi ya Yehova mwenyewe, kama ilivyoonyeshwa, kwa kielelezo, na kuchafuliwa kwa vyombo vya hekalu la Yehova. (Danieli 5:22, 23) Na wakati Wababiloni walipoharibu Yerusalemu, mataifa jirani ya Yuda—Moabu, Amoni, Tiro, Edomu, na mengineyo—yalishangilia na kuwadhihaki watu wa Mungu. Hayo pia ni lazima yavune yale yanayoyastahili kutoka kwa Yehova.

Hukumu Dhidi ya “Mataifa Haya Yote”

13. Ni nini kinachomaanishwa na “‘kikombe cha divai ya ghadhabu,” na ni nini kinachowapata wale ambao wakinywea kikombe hicho?

¹³ Kwa hiyo, Yeremia ajulisha hivi, kama ilivyorekodiwa kwenye sura ya 25, mstari wa 15 na 16: “Maana BWANA, [Yehova, NW], Mungu wa Israeli, aniambia hivi, Pokea kikombe cha divai ya ghadhabu hii mkononi mwangu, ukawanyweshe mataifa yote, ambao nitakupeleka kwao; nao watakunywa, na kulewa-lewa, na kufanya wazimu, kwa sababu ya upanga nitakaoupeleka kati yao.” Kwa nini hicho ni ‘kikombe cha divai ya ghadhabu ya Yehova’? Kwenye Mathayo 26:39, 42 na Yohana 18:11, Yesu alisema juu ya “kikombe” kuwa kilifananisha mapenzi ya Mungu kuelekea yeye. Vivyo hivyo, kikombe chatumiwa kufananisha mapenzi ya Yehova kuelekea mataifa kwamba yanywe kisasi chake cha kimungu. Yeremia 25:17-26 yaorodhesha vikundi hivyo vya kitaifa ambavyo vilifananisha kimbele mataifa leo.

14. Kulingana na unabii wa Yeremia, ni nani wapatao kukinywea kikombe cha divai ya ghadhabu ya Yehova, na hilo lafananisha nini kwa siku zetu?

¹⁴ Baada ya Jumuiya ya Wakristo kufanywa ‘mahali palipo ukiwa, kitu cha kushangaza, na kitu cha kuzomewa, na ukiwa wa daima,’ kama Yuda, uharibifu wangojea milki ya ulimwengu mzima ya dini bandia. Kisha ulimwengu mzima, kama unavyofananishwa na Misri, lazima ukinywee kikombe cha divai ya hasira ya Yehova! Ndiyo, “wafalme wote wa kaskazini, walio mbali na walio karibu, wote pamoja; na wafalme wote wa dunia, wakaao juu ya uso wa dunia” ni lazima wanywe. Hatimaye, “mfalme wa Sheshaki atakunywa baada yao.” Na huyu “mfalme wa Sheshaki” ni nani? Sheshaki ni jina la ufananisho, fumbo, au neno la siri, kumaanisha Babiloni. Kama vile Shetani alivyokuwa mfalme asiyeonekana wa Babiloni, ndivyo alivyo “[mtawala, NW] wa ulimwengu” hadi leo hii, kama ilivyoonyeshwa na Yesu. (Yohana 14:30) Hivyo, Yeremia 25:17-26, yafanana na Ufunuo sura ya 18 hadi 20 katika kufanya mfuatano wa matukio uwe wazi wakati kikombe cha hasira ya Yehova kinapopitishwa. Kwanza, milki ya ulimwengu ya dini bandia ni lazima iharibiwe, halafu ifuatiwe na tawala za kisiasa, kisha Shetani mwenyewe atatiwa katika abiso.—Ufunuo 18:8; 19:19-21; 20:1-3.

15. Ni nini kitakachotukia wakati kilio cha “amani na usalama” kinaposikiwa?

¹⁵ Kumekuwa na mazungumzo mengi juu ya amani na usalama tangu Vita Baridi iliposemekana imekwisha, huku utawala mmoja tu wenye nguvu nyingi sana ukibaki. Kama ilivyosemwa kwenye Ufunuo 17:10, utawala huo wenye nguvu nyingi sana, kichwa cha saba cha hayawani mwitu, lazima ‘kikae muda mchache.’ Lakini ‘muda huo mchache’ wakaribia kwisha. Karibuni, vilio vyote vya kisiasa vya “amani na usalama” vitamalizia kwenye “uharibifu [utakaowajia] kwa ghafula.” Ndivyo mtume Paulo asemavyo.—1 Wathesalonike 5:2, 3.

16, 17. (a) Wowote wakijaribu kuepa hukumu ya Yehova, tokeo litakuwa nini? (b) Mapenzi ya Yehova yatatendeka karibuni duniani kwa njia gani yenye uharibifu?

¹⁶ Mfumo mzima wa ulimwengu wa Shetani, kuanzia na Jumuiya ya Wakristo, ni lazima ukinywee kikombe cha kisasi cha Yehova. Amri yake zaidi kwa Yeremia, iliyorekodiwa kwenye sura ya 25, mstari 27 hadi 29, waonyesha hilo: “Nawe utawaambia hivi, BWANA, [Yehova, NW] wa majeshi, Mungu wa Israeli, asema hivi, Nyweni, na kulewa, na kutapika, na kuanguka msiinuke tena, kwa sababu ya upanga nitakaoupeleka kati yenu. Tena itakuwa, kama wakikataa kukipokea kikombe kile mkononi mwako, wanywe, ndipo utakapowaambia, BWANA, [Yehova, NW] wa majeshi asema hivi, Lazima mtakunywa. Maana, angalieni, ninaanza kutenda mabaya katika mji uitwao kwa jina langu, je! mtaachiliwa ninyi msiadhibiwe? Hamtaachiliwa msiadhibiwe; kwa maana nitauita upanga ule uwapige wote wakaao katika dunia, asema BWANA, [Yehova, NW] wa majeshi.”

¹⁷ Hayo ni maneno yenye nguvu—kwa kweli, maneno yenye kutia hofu, kwa maana yasemwa na Bwana Mwenye Enzi Kuu ya ulimwengu wote mzima, Yehova Mungu. Wakati wa maelfu mengi ya miaka, yeye amevumilia kwa subira makufuru, suto, na chuki ambazo zimerundikwa juu ya jina lake takatifu. Lakini hatimaye wakati umefika ili aweze kujibu sala ambayo Mwanae mpendwa, Yesu Kristo, alifundisha wanafunzi wake alipokuwa hapa duniani: “Basi ninyi salini hivi; Baba yetu uliye mbinguni, jina lako litukuzwe, Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10) Ni mapenzi ya Yehova kwamba Yesu atende akiwa upanga Wake katika kutekeleza kisasi.

18, 19. (a) Ni nani aendeshaye farasi ili kushinda katika jina la Yehova, naye angojea nini kabla ya kukamilisha ushindi wake? (b) Malaika waachiliapo upepo wa dhoruba wa ghadhabu ya Yehova, ni matukio gani yenye kuhofisha yatakayotukia duniani?

¹⁸ Kwenye Ufunuo sura ya 6, twasoma kwanza juu ya Yesu akiendesha farasi mweupe, ‘ili kushinda na kukamilisha ushindi wake.’ (Mstari wa 2) Hilo lilianza na kutawazwa kwake kuwa Mfalme wa kimbingu katika 1914. Farasi na wapanda farasi wengine wamfuata, kuonyesha vita, njaa, na magonjwa ya kipuku yaliyo kamili ambayo yamekumba dunia yetu tangu wakati huo. Lakini msukosuko huo wote utakwisha lini? Ufunuo sura ya 7 yatuambia kwamba malaika wanne wazuia “pepo nne za [dunia, NW]” hadi Israeli la kiroho na umati mkubwa kutoka katika mataifa yote wawe wamekusanywa kwa ajili ya wokovu. (Mstari wa 1) Kisha nini?

¹⁹ Yeremia sura ya 25, mstari wa 30 na 31, waendelea kusema: “BWANA, [Yehova, NW] atanguruma toka juu, naye atatoa sauti yake toka patakatifu pake; atanguruma sana juu ya zizi lake; Atapiga kelele kama mtu akanyagaye zabibu, juu ya wenyeji wote wa dunia. Mshindo utafika hata mwisho wa dunia; maana BWANA, [Yehova, NW] ana [ugomvi] na mataifa, atateta na watu wote wenye mwili; na waovu atawatoa wauawe kwa upanga, asema BWANA, [Yehova, NW].” Hakuna taifa litakaloepa kukinywea kikombe cha hasira ya Yehova kwa njia hiyo. Basi, ni jambo la haraka, kwamba watu wote wenye moyo mnyoofu wajitenganishe na uovu wa mataifa kabla ya wale malaika wanne kuachilia upepo wa dhoruba wenye tufani wa hasira ya Yehova. Wenye tufani kwelikweli, kwani unabii wa Yehova waendelea kusema hivi kwenye mstari 32 na 33:

20. Ni mandhari gani inayokazia ukali wa hukumu ya Yehova, lakini kwa nini tendo hilo ni la lazima?

²⁰ “BWANA, [Yehova, NW] wa majeshi asema hivi, Tazama, uovu utatokea toka taifa hata taifa, na tufani kuu itainuliwa toka pande za mwisho wa dunia. Na waliouawa na BWANA, [Yehova, NW] siku ile watakuwapo, toka upande mmoja wa dunia hata upande wa pili; hawataliliwa, wala kukusanywa, wala kuzikwa; watakuwa samadi juu ya uso wa nchi.” Hiyo ni mandhari yenye kukirihika kwelikweli, lakini hayo ni ya lazima ili kuuondoa uovu wote duniani kabla ya kuleta Paradiso ya ahadi ya Mungu.

Wachungaji Wapiga Yowe na Kulia

21, 22. (a) Kwenye Yeremia 25:34-36, ni nani waliokuwa “wachungaji” wa Israeli, na kwa nini walilazimika kupiga yowe? (b) Ni wachungaji gani wa kisasa wanaostahili hasira ya Yehova, na kwa nini waistahili kikamili?

²¹ Mstari wa 34 hadi 36 husema zaidi juu ya hukumu ya Yehova, kwa kusema: “Pigeni yowe, enyi wachungaji, na kulia; na kugaagaa katika majivu, enyi mlio hodari katika kundi; maana siku za kuuawa kwenu zimetimia kabisa, nami nitawavunja vipande vipande, nanyi mtaanguka kama chombo cha anasa. Nao wachungaji watakuwa hawana njia ya kukimbia, wala walio hodari katika kundi hawataokoka. Sauti ya kilio cha wachungaji, na sauti ya kupiga yowe kwao walio hodari katika kundi, kwa maana BWANA, [Yehova, NW] anayaharibu malisho yao.”

²² Wachungaji hao ni nani? Wao si viongozi wa kidini, ambao tayari wamekunywa hasira ya Yehova. Wao ni wachungaji wa kivita, wanaofafanuliwa pia kwenye Yeremia 6:3, ambao wakusanya majeshi yao katika vikundi kwa kumpinga Yehova. Wao ni watawala wa kisiasa, ambao wametajirika kwa kuwanyonya watawaliwa. Wengi wao ni walaghai, wakuu wa ufisadi. Wametenda kwa polepole kumaliza njaa ambayo imeua vikundi vizima vya watu katika nchi zenye taabu. Wao hutajirisha “walio hodari katika kundi,” kama vile wauzaji silaha na waharabu wa mazingira wenye pupa, huku wakikosa kuandaa msaada wa kitiba na chakula chenye kushibisha ambacho kwa gharama ndogo sana kingeweza kuokoa makumi ya mamilioni ya watoto wanaokufa.

23. Fafanua hali ya milki ya Shetani baada ya matendo ya Yehova yenye uharibifu.

²³ Haishangazi kwamba Yeremia sura ya 25 yamalizia, katika mstari wa 37 na 38, kwa kusema juu ya hao ambao kwa pupa wajitafutia amani kwa ajili yao wenyewe pekee: “Na mazizi yenye amani yamenyamazishwa, kwa sababu ya hasira kali ya BWANA, [Yehova, NW]. Ameacha mahali pake pa kujificha, kama simba; maana nchi yao imekuwa kitu cha kushangaza, kwa sababu ya ukali wa upanga uoneao, na kwa sababu ya hasira yake kali.” Ni jambo la kushangaza kwelikweli! Na bado, hasira ya Yehova yenye kuwaka itaonyeshwa kwa uhakika kupitia Yule anayefafanuliwa kwenye Ufunuo 19:15, 16, kuwa “Mfalme wa wafalme na Bwana wa mabwana” anayewachunga mataifa kwa fimbo ya chuma. Na ni nini kinachofuata?

24. Uharibifu wa dini bandia na wa sehemu ile nyingineyo ya ulimwengu wa Shetani utaletea ainabinadamu yenye uadilifu baraka zipi?

²⁴ Je! umewahi kupatwa na kimbunga au tufani? Hilo laweza kuwa ono lenye kuogofya sana. Lakini katika asubuhi inayofuata, ingawa huenda ukaona uharibifu kotekote, mara nyingi hewa huwa imetakata sana na ule utulivu unakuwa wenye kuburudisha sana hivi kwamba waweza kumshukuru Yehova kwa ajili ya siku yenye uzuri usio wa kawaida. Vivyo hivyo, wakati pepo za dhoruba za dhiki kubwa zitakapotulia, waweza kutazama dunia ukiwa mwenye shukrani kwamba uko hai na tayari kushiriki katika kazi zaidi ya Yehova ya kufanya dunia iliyosafishwa kuwa paradiso yenye utukufu. Ugomvi wa Yehova na mataifa utakuwa umeletwa kwenye mwisho wao mtukufu, hilo likitakasa jina lake na kufungua njia ili mapenzi yake yatimizwe duniani chini ya Utawala wa Mileani wa Ufalme wa Kimesiya. Ufalme huo na uje karibuni!

Kupitia mafungu 5-24 ya makala hii

◻ Ni njia zipi za kinafiki za Jumuiya ya Wakristo ambazo zimekuja kuhukumiwa?

◻ Yeremia 25:12-38 laonyesha maoni gani mapana juu ya hukumu?

◻ Ni kikombe kipi cha kisasi kinachopitishwa kwa mataifa yote?

◻ Ni nani wachungaji wanaopiga yowe na kulia, na kwa nini wana wasiwasi?

[Picha katika ukurasa wa 18]

Yehova amechagua chombo cha kuharibia Jumuiya ya Wakristo

[Picha katika ukurasa wa 23]

Baada ya pepo za dhoruba za dhiki kubwa, dunia iliyosafishwa itatokea