“Yehova Amefanya Alilokuwa Nalo Akilini”

 1. Baada ya uharibifu wa Yerusalemu, Yeremia alisema nini kuhusu unabii wa Yehova?

JIJI la Yerusalemu ni magofu. Moshi wa moto uliokuwa umewashwa na Wababiloni ungali ukifuka. Yeremia akumbuka vilio vya watu waliochinjwa. Alikuwa amejulishwa kitakachotokea, na yote ambayo Mungu alikuwa amesema yalitukia vivyo hivyo. “Yehova amefanya alilokuwa nalo akilini,” akasema Yeremia kwa kuomboleza. Yerusalemu lilipatwa na msiba mkubwa kama nini!—Soma Maombolezo 2:17.

 2. Yeremia alishuhudia kutimizwa kwa unabii gani uliotolewa karne nyingi mapema?

² Yeremia alishuhudia kutimizwa kwa mambo mengi yaliyotabiriwa kuhusu watu wa Mungu, kutia ndani unabii mbalimbali uliotolewa zamani. Karne nyingi mapema, Musa aliwaambia Waisraeli kwamba ikiwa wangemtii Mungu wangepata “baraka,” na ikiwa wangekosa kumtii, wangepata “laana.” Yehova aliwatakia baraka watu wake. Hata hivyo, laana ya kutotii ingekuwa yenye kuogofya. Musa aliwapa onyo ambalo pia Yeremia alilirudia baadaye, kwamba wale wanaompuuza na kumpinga Yehova hata wangekula “nyama ya wana wao na nyama ya binti zao.” (Kum. 30:19, 20; Yer. 19:9; Law. 26:29) Huenda wengine walijiuliza: ‘Je, kweli jambo kama hilo lenye kutisha lingeweza kutokea?’ Ukweli ni kwamba, wakati Wababiloni walipolizingira jiji la Yerusalemu na kukawa na upungufu mkubwa wa chakula, ndivyo ilivyotokea. Yeremia aliandika: “Mikono ya wanawake wenye huruma imetokosa watoto wao wenyewe. Wamekuwa kama mkate wa kufariji mtu wakati wa kuvunjika kwa binti ya watu wangu.” (Omb. 4:10) Msiba ulioje!

 3. Kwa nini Mungu aliwatuma manabii kwa watu wake?

³ Kusudi la Yehova la kuwatuma manabii kama Yeremia halikuwa tu kutangaza uharibifu uliokuwa karibu. Mungu alitaka watu wake walioasi wamrudie. Alitaka watenda-dhambi watubu. Ezra alisema: “Yehova Mungu wa mababu zao akaendelea kutuma juu yao kupitia kwa wajumbe wake, akatuma tena na tena, kwa sababu aliwahurumia watu wake na makao yake.”—2 Nya. 36:15; soma Yeremia 26:3, 12, 13.

 4. Yeremia alihisi namna gani kuhusu ujumbe aliotangaza?

⁴ Kama Yehova, Yeremia pia aliwahurumia watu wa taifa lake. Hilo linaonekana kutokana na maneno ya Yeremia baada ya kuanguka kwa Yerusalemu. Alihangaishwa sana na msiba uliokuwa ukikaribia. Msiba huo ungeweza kuepukwa kwa kusikiliza na kutii ujumbe wa Yeremia! Wazia hisia za Yeremia alipokuwa akitangaza ujumbe wa Mungu. Aliomboleza hivi: “Matumbo yangu, matumbo yangu! Nina maumivu makali katika kuta za moyo wangu. Moyo wangu umechafuka ndani yangu. Siwezi kunyamaza kimya, kwa maana nafsi yangu imesikia sauti ya baragumu, king’ora cha vita.” (Yer. 4:19) Hangeweza kunyamaza kuhusiana na msiba huo uliokuwa unakaribia.

 5. Kwa nini Yeremia alikuwa na uhakika kuhusu ujumbe aliotangaza?

⁵ Kwa nini Yeremia alikuwa na uhakika kabisa kwamba yale aliyotabiri yangetukia? (Yer. 1:17; 7:30; 9:22) Alikuwa mwanamume mwenye imani aliyekuwa amejifunza Maandiko na kujua kwamba Yehova ni Mungu wa unabii wa kweli. Kutokana na historia, alikuwa amejionea uwezo wa Yehova wa kutabiri matukio ambayo kwa maoni ya wanadamu hayangewezekana, kama vile kukombolewa kwa Waisraeli kutoka utumwani Misri. Yeremia alifahamu masimulizi ya kitabu cha Kutoka na maneno ya mtu mmoja aliyejionea mambo hayo. Yoshua alikuwa amewakumbusha Waisraeli wenzake: “Mnajua vema kwa mioyo yenu yote na kwa nafsi zenu zote kwamba halikukosa kutimia hata neno moja kati ya maneno yote mema ambayo Yehova Mungu wenu amewaambia ninyi. Yote yametimia kwenu. Halikukosa kutimia hata neno moja kati ya hayo.”—Yos. 23:14.

6, 7. (a) Kwa nini tupendezwe na unabii mbalimbali ambao Yeremia alitangaza? (b) Ni nini kitakachokusaidia kuwa na uhakika katika ujumbe ambao unahubiri?

⁶ Kwa nini tunapaswa kuendelea kutilia maanani unabii wa Yeremia? Kwanza, kwa sababu alikuwa na uhakika wenye msingi mzuri wa kwamba maneno ya Yehova sikuzote hutimia. Pili, kwa sababu baadhi ya mambo ambayo Yeremia alitangaza yanatimizwa leo, nasi tunatazamia kuona mengine yakitimia. Tatu, Yeremia alikuwa mtumishi wa Mungu asiye na kifani, kwa sababu ya jumla ya mambo ambayo alitangaza kwa jina la Mungu na bidii yake katika kuyatangaza. “Hata kwa kulinganishwa na manabii wengine, Yeremia hana kifani,” asema msomi mmoja. Yeremia alionwa kuwa nabii muhimu sana katika historia ya watu wa Mungu hivi kwamba Yesu alipokuwa akizungumza, baadhi ya watu waliokuwa wakimsikiliza walidhani ni Yeremia.—Mt. 16:13, 14.

⁷ Kama Yeremia, leo tunaishi wakati ambapo unabii mbalimbali muhimu katika Biblia unatimizwa. Na kama Yeremia, tunapaswa kuwa na uhakika kwamba ahadi za Mungu zitatimia. (2 Pet. 3:9-14) Tunaweza kufanya hivyo jinsi gani? Kwa kuendelea kujenga imani katika Neno la Mungu la kinabii linalotegemeka kabisa. Kwa hiyo, katika sura hii tutachunguza unabii mbalimbali ambao Yeremia alitangaza na ambao aliona ukitimizwa. Baadhi ya mambo aliyotabiri yalitimizwa baadaye. Mengine yanatimia leo, na mengine yatatimia wakati ujao pia. Kuchunguza unabii huo mbalimbali na kuimarishe imani yetu katika Neno la Yehova la kinabii, nasi tusadikishwe hata zaidi kwamba Yehova ‘atafanya alilo nalo akilini.’—Omb. 2:17.

8, 9. Ni kwa njia gani Biblia haina kifani?

⁸ Wataalamu wa uchumi, wanasiasa, watu wanaowasiliana na roho, na watabiri wa hali ya hewa wamejaribu kutabiri wakati ujao. Bila shaka, unajua kwamba si rahisi kutabiri kwa usahihi hata mambo madogo yatakayotokea siku au majuma machache yajayo. Hata hivyo, kuhusu kutoa unabii sahihi, Biblia haina kifani. (Isa. 41:26; 42:9) Mambo yote aliyotabiri Yeremia, iwe yangetimia muda mfupi baadaye au miaka mingi baadaye, yalikuwa sahihi. Mengi yalihusu watu mmoja-mmoja na mataifa. Na tuchunguze unabii mbalimbali uliotimizwa katika siku za Yeremia.

⁹ Ni nani leo anayeweza kutabiri jinsi hali ya ulimwengu itakavyokuwa mwaka mmoja au miwili ijayo? Ni mtaalamu gani wa mambo ya kimataifa anayeweza kutabiri kwa usahihi ikiwa kutakuwa na mabadiliko ya kiserikali? Hata hivyo, akiongozwa na roho ya Mungu, Yeremia alitabiri kupanuka kwa milki ya Babiloni. Alisema kwamba Babiloni ni “kikombe cha dhahabu” ambacho Yehova angekitumia kumimina ghadhabu yake juu ya Yuda na juu ya majiji mengi ya karibu na jamii za watu, na kuwafanya watumwa. (Yer. 51:7) Yeremia na watu walioishi siku zake walijionea mambo hayo yakitimia barabara.—Linganisha Yeremia 25:15-29; 27:3-6; 46:13.

10. Yehova alitabiri nini kuhusu wafalme wanne wa Yuda?

¹⁰ Pia, Yehova alimtumia Yeremia kutangaza mambo ambayo yangewapata wafalme wanne wa Yuda. Kuhusu Yehoahazi, au Shalumu, mwana wa Mfalme Yosia, Mungu alitabiri kwamba atapelekwa uhamishoni na hatarudi tena Yuda. (Yer. 22:11, 12) Hilo lilitimia. (2 Fal. 23:31-34) Mungu alitangaza kwamba Yehoyakimu, aliyetawala baada ya Yehoahazi, angezikwa “kwa maziko ya punda-dume.” (Yer. 22:18, 19; 36:30) Biblia haitaji jinsi alivyokufa au jinsi alivyozikwa, hata hivyo, inaeleza kwamba mwana wake Yehoyakini alianza kutawala mahali pake wakati wa mazingiwa. Yeremia alitabiri kwamba Yehoyakini (anayeitwa pia Konia au Yekonia) angepelekwa uhamishoni Babiloni na kufia huko. (Yer. 22:24-27; 24:1) Hilo lilitimia. Namna gani mfalme wa mwisho, Sedekia? Yeremia alitabiri kwamba Sedekia atatiwa mikononi mwa adui zake wasio na huruma. (Yer. 21:1-10) Ikawaje? Alitekwa na adui. Waliwaua wana wake mbele ya macho yake, wakampofusha, na kumpeleka Babiloni, naye akafia huko. (Yer. 52:8-11) Ndiyo, mambo yote hayo yalitimia.

11. Hanania alikuwa nani, na Yehova alitabiri nini kumhusu?

¹¹ Kulingana na Yeremia sura ya 28, wakati wa utawala wa Sedekia, Hanania, yule nabii wa uwongo alipinga tangazo la Yehova kupitia Yeremia kwamba Yerusalemu litatawaliwa na Babiloni. Akipuuza Neno la Mungu, Hanania alidai kwamba nira ya utumwa ambayo Nebukadneza alikuwa ameweka juu ya Yuda na mataifa mengine, ingevunjwa. Hata hivyo, akiongozwa na Yehova, Yeremia alifunua uwongo wa Hanania, na kutangaza tena kwamba mataifa mengi yatalazimika kuwatumikia Wababiloni. Kisha akamwambia nabii huyo mwongo kwamba atakufa mwaka huohuo. Na hivyo ndivyo ilivyokuwa.—Soma Yeremia 28:10-17.

12. Wengi wa watu wa siku za Yeremia waliuonaje unabii wake kuhusu Yerusalemu?

¹² Unabii ambao Mungu alimwagiza Yeremia atangaze ulikuwa hasa kuhusu kuanguka kwa Yerusalemu. Yeremia alionya tena na tena kwamba jiji hilo lingeanguka Wayahudi wasipotubu na kuacha kuabudu sanamu, ukosefu wa haki, na jeuri. (Yer. 4:1; 16:18; 19:3-5, 15) Watu wengi walioishi siku za Yeremia walifikiri kwamba Yehova hangeweza kamwe kufanya jambo kama hilo. Hekalu la Mungu lilikuwa Yerusalemu. Hangeweza kuruhusu kamwe mahali hapo patakatifu paharibiwe! Walifikiri kwamba jiji hilo haliwezi kamwe kuharibiwa. Hata hivyo, tunajua kwamba Yehova hasemi uwongo. Alifanya lile alilokuwa nalo akilini.—Yer. 52:12-14.

13. (a) Kuna ulinganifu gani kati ya siku zetu na siku za Yeremia? (b) Kwa nini tupendezwe na ahadi ambazo Mungu aliwapa watu fulani walioishi siku za Yeremia?

¹³ Watu wa Mungu leo wako katika hali kama ile ya watu waliokuwa washikamanifu kwa Yehova katika siku za Yeremia. Tunajua kwamba hivi karibuni Mungu ataleta msiba juu ya wote wasiotii maonyo yake. Hata hivyo, tunaweza kutiwa moyo na ahadi zake za kinabii, kama vile Wayahudi waliobaki katika ibada safi siku za Yeremia walivyotiwa moyo. Kwa sababu Warekabu walikuwa waaminifu kwa Yehova na kwa amri za babu yao, Mungu alisema kwamba wataokoka uharibifu wa Yerusalemu. Nao kwa kweli waliokoka. Kutajwa kwa “Malkiya mwana wa Rekabu,” ambaye alisaidia kurekebisha Yerusalemu, Nehemia alipokuwa gavana, ni uthibitisho wa kuokoka kwao. (Neh. 3:14; Yer. 35:18, 19) Yehova alimwahidi Ebed-meleki pia kwamba ataokoka kwa sababu alimtegemea Mungu na kumuunga mkono Yeremia. (Yer. 38:11-13; 39:15-18) Vivyo hivyo, Mungu alimwahidi Baruku kwamba ataipokea ‘nafsi yake kuwa nyara.’ (Yer. 45:1, 5) Unapoona jinsi unabii huo mbalimbali ulivyotimizwa, unaweza kukata kauli gani? Unafikiri Yehova atakutendea jinsi gani ukiendelea kuwa mwaminifu?—Soma 2 Petro 2:9.

14. Kwa nini unabii wa Mungu juu ya Babiloni ulikuwa wenye kushangaza?

¹⁴ Mungu alitabiri kwamba mbali na Yuda, Nebukadneza angeshinda Misri pia. (Yer. 25:17-19) Huenda hilo lilionwa kuwa jambo lisilowezekana kwa sababu Misri ilikuwa na nguvu nyingi, hata ilitawala Yuda. (2 Fal. 23:29-35) Baada ya Yerusalemu kuanguka, Wayahudi waliobaki walipanga kwenda Misri kutafuta usalama. Waliazimia kwenda huko ijapokuwa Yehova alikuwa amewaonya wasifanye hivyo na kuwaambia kwamba angewabariki ikiwa wangebaki Yuda. Kwa upande mwingine, ikiwa wangekimbilia Misri, upanga waliouogopa ungewafikia huko. (Yer. 42:10-16; 44:30) Yeremia hakuandika ikiwa alishuhudia Wababiloni wakishambulia Misri au hapana. Vyovyote vile, Waisraeli waliokimbilia Misri walikumbwa na msiba uliotabiriwa Wababiloni waliposhinda Misri mapema katika karne ya sita K.W.K.—Yer. 43:8-13.

15, 16. Neno la Mungu kuhusu kukombolewa kwa watu wake lilitimizwa jinsi gani?

¹⁵ Yeremia alitabiri pia kuhusu Babiloni. Karne moja mapema, Yeremia alitabiri kwa usahihi kwamba Babiloni lingeanguka ghafula. Jinsi gani? Yeremia alitabiri kwamba maji yake ‘yangekaushwa,’ nao wanaume wake wenye nguvu hawangepigana. (Yer. 50:38; 51:30) Unabii huo ulitimizwa kikamili wakati Wamedi na Waajemi walipogeuza mkondo wa maji ya Mto Efrati, wakavuka na kuingia jijini, na kuwashambulia Wababiloni ghafula. Jambo lingine la ajabu lililotabiriwa ni kwamba jiji hilo lingebaki magofu, yasiyokaliwa. (Yer. 50:39; 51:26) Mpaka leo hii, hali ya ukiwa ya Babiloni ambalo wakati mmoja lilikuwa lenye nguvu, ni uthibitisho kamili wa unabii wa Mungu.

¹⁶ Yehova alitangaza kupitia Yeremia kwamba Wayahudi wangewatumikia Wababiloni kwa miaka 70. Kisha Mungu angewarudisha watu wake katika nchi yao. (Soma Yeremia 25:8-11; 29:10.) Danieli alikuwa na uhakika kuhusu unabii huo, naye aliutumia kukadiria wakati ambapo “ukiwa wa Yerusalemu” ungefikia mwisho. (Dan. 9:2) Ezra alisema kwamba “ili neno la Yehova kwa kinywa cha Yeremia litimizwe, Yehova aliiamsha roho ya Koreshi mfalme wa Uajemi” aliyekuwa ameshinda Babiloni, awarudishe Wayahudi katika nchi yao. (Ezra 1:1-4) Wayahudi ambao wangerudi wangefurahia amani katika nchi yao na kurudisha ibada safi huko, kama Yeremia alivyokuwa ametabiri.—Yer. 30:8-10; 31:3, 11, 12; 32:37.

17. Eleza jinsi maneno ya Yeremia kuhusu “kilio” huko Rama huenda yakarejelea pindi mbili tofauti.

¹⁷ Pia, Yeremia aliandika unabii mbalimbali ambao ungetimizwa wakati ujao. Alisema: “Yehova amesema hivi, ‘Katika Rama sauti inasikiwa, maombolezo na kilio cha uchungu; Raheli akiwalilia wanawe. Amekataa kufarijiwa juu ya wanawe, kwa sababu hawako tena.’” (Yer. 31:15) Inaonekana kwamba baada ya Yerusalemu kuharibiwa mwaka wa 607 K.W.K., mateka Wayahudi walikusanyika katika jiji la Rama, kilomita nane hivi upande wa kaskazini wa Yerusalemu. Huenda hata wafungwa fulani waliuawa huko Rama. Huenda hilo lilikuwa utimizo wa kwanza wa unabii huo, kana kwamba Raheli ndiye aliyekuwa akiwaombolezea “wanawe” waliokufa. Hata hivyo, zaidi ya karne sita baadaye, Mfalme Herode aliagiza watoto wote wachanga huko Bethlehemu wauawe. Mathayo, mwandikaji wa Injili, alieleza kwamba Yeremia alitabiri uchungu mwingi ambao ungesababishwa na mauaji hayo.—Mt. 2:16-18.

18. Unabii wa Mungu kuhusu Edomu ulitimizwa jinsi gani?

¹⁸ Unabii mwingine pia ulitimizwa katika karne ya kwanza W.K. Mungu alitabiri kupitia Yeremia kwamba Edomu lingeshambuliwa na Babiloni. (Yer. 25:15-17, 21; 27:1-7) Hata hivyo, unabii huo ulitabiri mengi zaidi. Edomu lingekuwa kama Sodoma na Gomora, yaani, halingekaliwa kamwe, halingekuwa tena taifa. (Yer. 49:7-10, 17, 18) Hivyo ndivyo ilivyokuwa. Majina Edomu na Waedomu yako wapi leo? Kwenye ramani yoyote ya kisasa? Hapana. Yanapatikana katika vitabu vya kale na vinavyozungumzia historia ya Biblia au kwenye ramani zinazoonyesha maeneo ya wakati huo. Flavio Yosefo anasimulia kwamba Waedomu walilazimishwa kujiunga na dini ya Kiyahudi katika karne ya pili K.W.K. Baadaye, Yerusalemu lilipoharibiwa mwaka wa 70 W.K., taifa hilo likatoweka kabisa.

19. Kitabu cha Yeremia kinafunua nini kuhusu uwezo wa Mungu wa kutimiza unabii?

¹⁹ Ni wazi kwamba kitabu cha Yeremia kimejaa unabii mbalimbali kuhusu watu na mataifa. Unabii mwingi tayari umetimia. Kujua hilo hutuchochea kujifunza kitabu cha Yeremia kwa makini, kwa kuwa kinatuthibitishia jambo fulani kuhusu Mungu wetu mkuu. Yehova amefanya alilokuwa nalo akilini, na bado atafanya hivyo. (Soma Isaya 46:9-11.) Hilo linaweza kuimarisha imani yetu katika mambo ambayo Biblia inatabiri. Unabii fulani ambao Yeremia aliandika una utimizo ambao unatuhusu na unahusu wakati wetu ujao. Acheni tuchunguze baadhi ya unabii huo katika sehemu inayobaki ya sura hii.

20-22. Kwa nini tunaweza kusema kwamba unabii mbalimbali wa Biblia kutia ndani ulio katika kitabu cha Yeremia, una utimizo zaidi ya mmoja? Toa mfano.

²⁰ Unabii wa Biblia unaweza kuwa na zaidi ya utimizo mmoja. Ndivyo ilivyo kuhusu jibu ambalo Yesu aliwapa wanafunzi wake walipomuuliza kuhusu ishara ya ‘kuwapo kwake na ya umalizio wa mfumo wa mambo.’ (Mt. 24:3) Kulikuwa na utimizo katika mwaka wa 66 mpaka mwaka wa 70 W.K. Hata hivyo, ni wazi kwamba kwa njia fulani unabii huo utatimizwa wakati wa “dhiki kuu” itakayokuja juu ya mfumo huu mbovu wa mambo. Itakuwa dhiki “ambayo haijapata kutukia tangu mwanzo wa ulimwengu mpaka sasa, hapana, wala haitatukia tena.” (Mt. 24:21) Yeremia pia alitabiri mambo kama hayo. Baadhi ya mambo hayo yalitimizwa mwaka wa 607 K.W.K. Hata hivyo, unabii huo ungetimizwa pia baadaye, kama tulivyoona kuhusiana na “Raheli akiwalilia wanawe.” (Yer. 31:15) Baadhi ya mambo ambayo Yeremia alitabiri yanatimia leo, nayo yanatuhusu kibinafsi.

²¹ Kitabu cha Ufunuo kinaonyesha hilo. Akiongozwa na roho ya Mungu, mtume Yohana alirejelea unabii mbalimbali ambao Yeremia alikuwa ametoa kuhusu kuharibiwa kwa Babiloni mwaka wa 539 K.W.K. Katika kitabu cha Ufunuo tunaona ulinganifu kati ya utimizo huo wa kwanza na mambo yatakayotukia hivi karibuni kwa kiwango kikubwa zaidi. Moja kati ya mambo ambayo Yeremia alitabiri na ambayo yatatimizwa katika siku zetu ni kuanguka kwa milki kubwa—milki ya ulimwengu ya dini ya uwongo, “Babiloni Mkubwa.” (Ufu. 14:8; 17:1, 2, 5; Yer. 50:2; 51:8) Lazima watu wa Mungu ‘watoke kwake’ ili wasije wakapatwa na msiba utakaompata. (Ufu. 18:2, 4; Yer. 51:6) Maji ya jiji hilo, yanayowakilisha watu wake au wafuasi wake, ‘yatakauka.’—Yer. 51:36; Ufu. 16:12.

²² Bado tunatazamia utimizo wa unabii huo wakati ujao, Mungu atakapolipiza kisasi juu ya dini ya uwongo kwa sababu ya kuwatendea isivyofaa watu wake. Yehova ‘atamlipa kulingana na . . . yote ambayo ametenda.’ (Yer. 50:29; 51:9; Ufu. 18:6) Nazo nchi za mfano za dini ya uwongo zitakuwa magofu yasiyokaliwa.—Yer. 50:39, 40.

23. Ni hali gani nzuri ya kiroho ambayo Yeremia alitabiri, ambayo ilitimia katika karne ya 20?

²³ Kama ambavyo huenda tayari umeona, unabii mbalimbali wa Yeremia una ujumbe wenye tumaini. Alitabiri kurudishwa kwa ibada ya kweli duniani katika siku zetu. Kuachiliwa kwa mateka Wayahudi kutoka katika jiji la kale la Babiloni kunalingana na kuachiliwa kwa watu wa Mungu leo kutoka katika Babiloni Mkubwa baada ya Ufalme kusimamishwa mbinguni. Kwa njia ya kiroho, Yehova aliwarudisha watu wake kwenye ibada safi, hali iliyowaletea shangwe nyingi. Amebariki jitihada zao za kuwasaidia wengine wamwabudu na kulishwa vizuri kiroho. (Soma Yeremia 30:18, 19.) Pia, umejionea jinsi ambavyo Yehova ametimiza ahadi yake ya kuwapa watu wake wachungaji, yaani, wanaume wakomavu ambao wanatunza na kulinda kondoo.—Yer. 3:15; 23:3, 4.

24. Ni mambo gani aliyosema Yeremia ambayo bado hayajatimizwa?

²⁴ Maneno ya Yeremia kwa watu wa kale wa Mungu yalitia ndani ahadi ya mambo mazuri kwa ajili ya waaminifu na onyo la kuharibiwa kwa wale wasiothamini uhusiano wao pamoja na Yehova. Ndivyo ilivyo leo pia. Bila shaka tunaona umuhimu wa kutii onyo lililo katika maneno haya: “Wale waliouawa na Yehova siku hiyo hakika watakuwa kutoka mwisho mmoja wa dunia mpaka mwisho wa pili wa dunia. Hawataombolezewa, wala kukusanywa wala kuzikwa. Watakuwa kama mbolea juu ya uso wa nchi.”—Yer. 25:33.

25. Watu wa Mungu leo wana jukumu gani?

²⁵ Ndiyo, kama Yeremia, tunaishi nyakati hatari. Kama ilivyokuwa katika siku zake, kuendelea kuwa hai au kufa kunategemea jinsi ambavyo watu wanaitikia ujumbe wa Yehova. Watu wa Mungu leo si manabii. Yehova hajatupa mgawo wa kuongezea maneno yake yenye kutegemeka yaliyo katika Biblia. Hata hivyo, tumepewa utume wa kutangaza habari njema za Ufalme sikuzote mpaka mwisho wa mfumo huu wa mambo. (Mt. 28:19, 20) Bila shaka, hatutaki ‘kuiba maneno ya Yehova,’ kwa kutowaambia watu mambo yatakayotokea hivi karibuni. (Soma Yeremia 23:30.) Tumeazimia kutopunguza kamwe uzito wa maneno yake. Mengi ya mambo ambayo Mungu alimwagiza Yeremia atabiri, yametimizwa tayari. Nasi tuna hakika kabisa kwamba yanayosalia yatatimia. Lazima tuwaambie watu kwamba Mungu hatakosa kufanya ‘alilo nalo akilini na aliloamuru tangu siku za kale.’—Omb. 2:17.

26. Ni unabii gani zaidi utakaozungumziwa?

²⁶ Hatuwezi kukamilisha uchanganuzi wa kazi ya Yeremia ya kutoa na pia ujumbe wake pasipo kuzungumzia ahadi kuu za Yehova kuhusu “agano jipya” pamoja na watu wake, agano ambalo sheria zake ataziandika katika moyo wao. (Yer. 31:31-33) Unabii huo na utimizo wake, ambao unatuhusu moja kwa moja, ndio utakaozungumziwa katika sura inayofuata.