“Wakati wa Amani” Umekaribia!
“Kwa kila jambo kuna majira yake [“wakati uliowekwa,” “NW”], . . . wakati wa vita, na wakati wa amani.”—MHUBIRI 3:1, 8.
1. Ni hali gani ya kushangaza ambayo imeendelea kuwepo katika karne ya 20 kuhusu vita na amani?
WATU wengi wanatamani sana amani, na kwa sababu nzuri. Amani imekuwa haba katika karne ya 20 kuliko karne nyingine yoyote katika historia. Na jambo hilo lashangaza kwa sababu jitihada za kuleta amani zimekuwa nyingi sana wakati huu kuliko wakati mwingine wowote uliopita. Katika mwaka wa 1920 Ushirika wa Mataifa ulianzishwa. Katika mwaka wa 1928 Mwafaka wa kati ya Kellogg na Briand, ambao kitabu kimoja cha marejezo huuita “jitihada kubwa zaidi kati ya mfululizo wa jitihada za kudumisha amani baada ya Vita ya Ulimwengu ya Kwanza,” uliidhinishwa na “karibu mataifa yote ya ulimwengu . . . yakikubali kuacha kabisa kutumia vita kuwa njia ya kutekeleza sera ya kitaifa.” Kisha, mwaka wa 1945 shirika la Umoja wa Mataifa likaanzishwa kuchukua mahali pa Ushirika wa Mataifa usiotenda kazi.
2. Umoja wa Mataifa unadai kuwa na lengo gani, nao umefanikiwa kwa kadiri gani?
2 Kama Ushirika wa Mataifa, Umoja wa Mataifa pia hudai kuwa na mradi wa kuleta amani ulimwenguni. Lakini mafanikio yake yamekuwa machache. Ni kweli kwamba hakuna vita inayopiganwa popote pale ulimwenguni ambayo inatoshana na vita ya kwanza na ya pili ya ulimwengu. Hata hivyo, vita vingi vidogo-vidogo vingali vinafanya maelfu ya watu wakose amani ya akili, wapoteze mali zao, na mara nyingi uhai wao wenyewe. Je, twaweza kuthubutu kutumaini kwamba Umoja wa Mataifa waweza kugeuza karne ya 21 kuwa “wakati wa amani”?
Msingi wa Amani ya Kweli
3. Kwa nini amani ya kweli haiwezi kupatana na chuki?
3 Amani kati ya watu na pia kati ya mataifa huhitaji mengi zaidi ya kuvumiliana tu. Je, kweli yeyote anaweza kuwa na amani na mtu ambaye anachukia? Si kulingana na 1 Yohana 3:15: “Kila mtu ambaye huchukia ndugu yake ni muua-binadamu-kikatili.” Kama vile historia ya karibuni inavyothibitisha, chuki kubwa huongezeka kwa urahisi na kutokeza matendo ya jeuri.
4. Ni nani pekee wawezao kupata amani, na kwa nini?
4 Kwa kuwa Yehova ndiye “Mungu apaye amani,” wale wanaompenda Mungu na kustahi sana kanuni zake za uadilifu ndio watu pekee wawezao kupata amani. Ni wazi kwamba Yehova hampi kila mtu amani. “Hapana amani kwa wabaya; asema Mungu wangu.” Hiyo ni kwa sababu waovu hukataa kuongozwa na roho takatifu ya Mungu, ambayo hutokeza tunda la amani.—Waroma 15:33; Isaya 57:21; Wagalatia 5:22.
5. Wakristo wa kweli hawawezi kufanya nini kamwe?
5 Wakristo wa kweli hawawezi kamwe kupigana na wanadamu wenzao—kama vile ambavyo wale waitwao eti Wakristo wamefanya mara nyingi, hasa katika karne ya 20. (Yakobo 4:1-4) Ni kweli kwamba wao hupiga vita dhidi ya mafundisho yanayopotosha juu ya Mungu, lakini hiyo ni vita inayokusudiwa kuwasaidia watu, si kuwadhuru. Ni kinyume kabisa na Ukristo wa kweli kuwanyanyasa wengine kwa sababu ya tofauti za kidini au kuwadhuru watu kwa sababu za kizalendo. “Ikiwezekana, kwa kadiri itegemeavyo nyinyi,” Paulo akawaagiza Wakristo Waroma, “iweni wenye kufanya amani na watu wote.”—Waroma 12:17–19; 2 Timotheo 2:24, 25.
6. Ni wapi pekee ambapo amani ya kweli yaweza kupatikana leo?
6 Leo, amani inayotolewa na Mungu hupatikana tu miongoni mwa waabudu wa kweli wa Yehova Mungu. (Zaburi 119:165; Isaya 48:18) Hakuna tofauti za kisiasa zinazoharibu umoja wao, kwa kuwa popote walipo wao hawaungi mkono upande wowote katika siasa. (Yohana 15:19; 17:14) Kwa kuwa “[wame]unganishwa kwa kufaa katika akili ileile na katika mstari uleule wa fikira,” hakuna tofauti za kisiasa zinazotisha amani yao. (1 Wakorintho 1:10) Amani ambayo Mashahidi wa Yehova hufurahia ni muujiza wa siku hizi, na ni amani ambayo Mungu anatokeza kwa kupatana na ahadi yake: “Nitawafanya wasimamizi wako wawe amani, na hao wakutozao fedha kuwa haki.”—Isaya 60:17; Waebrania 8:10.
Kwa Nini Uwe “Wakati wa Vita”?
7, 8. (a) Licha ya msimamo wao wa amani, Mashahidi wa Yehova huuonaje wakati wa sasa? (b) Ni nini iliyo silaha kuu katika shughuli ya vita ya Mkristo?
7 Licha ya msimamo wao wa amani, Mashahidi wa Yehova hata hivyo huuona wakati wa sasa kuwa hasa “wakati wa vita.” Bila shaka hii si shughuli ya vita halisi, kwa kuwa, kuwalazimisha wengine wakubali ujumbe wa Biblia kwa kutumia nguvu kungekuwa kinyume cha mwaliko wa Mungu wa “[ku]acha yeyote atakaye achukue maji ya uhai bure.” (Ufunuo 22:17) Watu hawalazimishwi kugeuza imani! Shughuli ya vita ya Mashahidi wa Yehova hasa ni ya kiroho. Paulo aliandika: “Silaha za shughuli yetu ya vita si za kimwili, bali zenye nguvu kupitia Mungu kwa ajili ya kupindua mambo yaliyotiwa kwa nguvu sana katika mahandaki.”—2 Wakorintho 10:4; 1 Timotheo 1:18.
8 “Upanga wa roho, yaani, neno la Mungu,” ndio silaha kuu kati ya “silaha za shughuli yetu ya vita.” (Waefeso 6:17) Upanga huo una nguvu. “Neno la Mungu liko hai na hukazia nguvu na ni lenye makali zaidi kuliko upanga wowote wenye makali kuwili na hudunga hata kufikia kugawanya nafsi na roho, na viungo na uloto wavyo, na ni lenye kuweza kufahamu fikira na makusudio ya moyo.” (Waebrania 4:12) Kwa kutumia upanga huo, Wakristo wanaweza kupindua “mawazowazo na kila jambo lililoinuka sana lililoinuliwa dhidi ya ujuzi wa Mungu.” (2 Wakorintho 10:5) Huo huwawezesha kufichua mafundisho yasiyo ya kweli, mazoea yenye kudhuru, na falsafa zinazoonyesha hekima ya mwanadamu badala ya hekima ya Mungu.—1 Wakorintho 2:6-8; Waefeso 6:11-13.
9. Kwa nini hatuwezi kulegea katika vita yetu dhidi ya mwili wenye dhambi?
9 Aina nyingine ya shughuli ya vita ya kiroho ni ile inayopigwa dhidi ya mwili wenye dhambi. Wakristo hufuata kielelezo cha Paulo, aliyekiri: “Napiga-piga mwili wangu ngumi na kuuongoza kama mtumwa, ili, baada ya mimi kuwa nimewahubiria wengine, mimi mwenyewe nisiwe mwenye kukataliwa kwa njia fulani.” (1 Wakorintho 9:27) Wakristo katika Kolosai walishauriwa kufisha “viungo vya mwili [wao] vilivyo juu ya dunia kwa habari ya uasherati, ukosefu wa usafi, hamu ya ngono, tamaa yenye kuumiza, na tamaa, ambako ni ibada ya sanamu.” (Wakolosai 3:5) Naye mwandishi wa Biblia, Yuda, akawahimiza Wakristo kwa bidii “[wa]fanye pigano kali kwa ajili ya imani ambayo ilikabidhiwa mara moja kwa wakati wote kwa watakatifu.” (Yuda 3) Kwa nini tufanye hivyo? Paulo ajibu: “Ikiwa mwaishi kupatana na mwili hakika nyinyi mtakufa; bali mkiua mazoea ya mwili kwa roho, mtaishi.” (Waroma 8:13) Kwa kuzingatia taarifa hiyo iliyo wazi, hatuwezi kulegea katika vita yetu dhidi ya mielekeo mibaya.
10. Ni jambo gani lililotukia mwaka wa 1914, nalo litaongoza kwenye nini hivi karibuni?
10 Kukaribia kwa “siku ya kisasi cha Mungu wetu” ni sababu nyingine pia inayoweza kufanya wakati wa sasa uonekane kuwa wakati wa vita. (Isaya 61:1, 2) Katika mwaka wa 1914, wakati wa Yehova uliowekwa ulikuwa umefika wa kusimamisha Ufalme wa Kimesiya na wa kuupa mamlaka ya kupiga vita mfumo wa Shetani. Wakati ambao wanadamu walipewa wafanyie majaribio tawala za kibinadamu bila Mungu kuingilia uliisha wakati huo. Badala ya kukubali Mtawala wa Mungu wa Kimesiya, watu wengi huendelea kumkataa, kama vile wengi walivyomkataa katika karne ya kwanza. (Matendo 28:27) Basi, kwa sababu ya upinzani dhidi ya Ufalme, Kristo amelazimika “kwenda hali akishinda katikati ya adui [zake].” (Zaburi 110:2, linganisha NW.) Inafurahisha kwamba andiko la Ufunuo 6:2 laahidi kwamba “[ata]kamilisha ushindi wake.” Atafanya hivyo wakati wa ‘vita ya siku kubwa ya Mungu Mweza-Yote, iitwayo katika Kiebrania Har–Magedoni.’—Ufunuo 16:14, 16.
“Wakati wa Kunena” Umefika
11. Kwa nini Yehova amekuwa na subira sana, lakini ni nini kitakachokuja hatimaye?
11 Miaka 85 imepita tangu mwaka wa 1914 ulioleta mabadiliko makubwa katika mambo ya wanadamu. Yehova amekuwa mwenye subira sana kuelekea wanadamu. Amewafahamisha Mashahidi wake kikamili uharaka wa wakati huu. Uhai wa mamilioni ya watu umo hatarini. Hao wote wastahili kuonywa kwa sababu “Yehova . . . hataki yeyote aangamizwe bali hutaka wote wafikie toba.” (2 Petro 3:9) Hata hivyo, karibuni utakuja “ufunuo wa Bwana Yesu kutoka mbinguni pamoja na malaika zake wenye nguvu.” Ndipo wale wote ambao wameukataa ujumbe wa Ufalme wa Mungu watapatwa na “kisasi” ambacho Yesu ataleta “juu ya wale wasiomjua Mungu na wale wasiotii habari njema juu ya Bwana wetu Yesu.”—2 Wathesalonike 1:6-9.
12. (a) Kwa nini hainufaishi kukisia wakati ambapo dhiki kubwa huenda ikaanza? (b) Yesu alionya dhidi ya hatari gani kuhusiana na jambo hilo?
12 Subira ya Yehova itaisha lini? Hainufaishi kukisia wakati ambapo “dhiki kubwa” yaweza kuanza. Yesu alisema waziwazi hivi: “Kuhusu siku hiyo na saa hiyo hakuna mtu ajuaye.” Kwa upande mwingine yeye alishauri: “Fulizeni kulinda kwa sababu hamjui ni siku gani Bwana yenu anakuja. . . . Jithibitisheni wenyewe kuwa tayari, kwa sababu kwenye saa msiyoifikiri kuwa hiyo, Mwana wa binadamu anakuja.” (Mathayo 24:21, 36, 42, 44) Kwa kusema wazi, hilo lamaanisha kwamba yatupasa kuendelea kuwa macho kila siku kuhusu matukio ya ulimwengu na kuzingatia kufyatuka kwa dhiki kubwa. (1 Wathesalonike 5:1-5) Ni hatari kama nini kufikiri kwamba tunaweza kupunguza mwendo, tukiishi yale yaitwayo eti maisha ya kawaida tu, huku tukingoja kuona jinsi mambo huenda yakatukia! Yesu alisema: “Kazieni uangalifu kwa nyinyi wenyewe kwamba mioyo yenu isiwe kamwe yenye kulemewa na kula kupita kiasi na kunywa sana na mahangaiko ya maisha, na kwa ghafula siku hiyo iwe juu yenu mara hiyo kama mtego.” (Luka 21:34, 35) Tunaweza kuwa na uhakika kuhusu jambo hili: “Pepo nne” za uharibifu ambazo wakati huu zinashikiliwa na “malaika wanne” hazitashikiliwa milele.—Ufunuo 7:1-3.
13. Watu wapatao milioni sita wametambua nini?
13 Kwa sababu ya siku hiyo inayokuja kwa kasi, maneno ya Solomoni kuhusu kuwako kwa “wakati wa kunena” yanakuwa na maana ya pekee. (Mhubiri 3:7) Wakiwa wametambua kwamba sasa ndio wakati wa kunena, Mashahidi wa Yehova wapatao milioni sita wanazungumza kwa bidii kuhusu utukufu wa ufalme wa Mungu na kuonya juu ya siku yake ya kisasi. Wao hujitoa kwa hiari katika siku hii ya kampeni ya kijeshi ya Kristo.—Zaburi 110:3; 145:10-12.
Wale Wasemao “Amani; Wala Hapana Amani”
14. Ni manabii gani wasio wa kweli waliokuwako katika karne ya saba K.W.K.?
14 Katika karne ya saba K.W.K., manabii wa Mungu, Yeremia na Ezekieli, walitoa ujumbe wa Mungu wa hukumu dhidi ya Yerusalemu kwa sababu ya mwenendo wake wa ukaidi wa kutomtii Mungu. Uharibifu waliotabiri ulitokea mwaka wa 607 K.W.K., hata ingawa wajumbe wa Mungu walipingwa na viongozi maarufu wa kidini wenye uvutano mkubwa. Viongozi hao wakawa ndio “manabii wajinga [ambao] . . . wa[li]shawishi watu [wa Mungu], wakisema, Amani; wala hapana amani.”—Ezekieli 13:1-16; Yeremia 6:14, 15; 8:8-12.
15. Je, leo kuna manabii wasio wa kweli kama hao? Eleza.
15 Kama “manabii wajinga” wa wakati huo, leo viongozi wengi wa kidini hukosa pia kuonya watu juu ya siku ya Mungu ya hukumu inayokuja. Badala yake, wao hutokeza hali yenye matumaini kwamba vikundi vya kisiasa vitaleta amani na usalama hatimaye. Wakihangaikia zaidi kuwapendeza wanadamu badala ya kumpendeza Mungu, wao huwaambia waumini wao kile watakacho kusikia badala ya kueleza kwamba Ufalme wa Mungu umesimamishwa na kwamba karibuni Mfalme wa Kimesiya atakamilisha ushindi wake. (Danieli 2:44; 2 Timotheo 4:3, 4; Ufunuo 6:2) Kama manabii wasio wa kweli, wao pia husema juu ya “amani; wala hapana amani.” Lakini usadikisho wao utageuka ghafula kuwa hofu kuu watakapolazimika kukabili ghadhabu ya Yule ambaye wamepotosha watu juu yake na ambaye wamefanya jina lake liwekewe lawama sana. Viongozi wa milki ya ulimwengu ya dini isiyo ya kweli, inayofafanuliwa katika Biblia kuwa mwanamke asiye na adili, watapata pigo huku wakitoa matangazo yao yenye kupotosha ya amani.—Ufunuo 18:7, 8.
16. (a) Mashahidi wa Yehova wamejulikana waziwazi kuwa watu wa aina gani? (b) Wao wanatofautianaje na wale watangazao “amani; wala hapana amani”?
16 Ingawa viongozi wengi maarufu na wenye uvutano mkubwa huendelea kutoa ahadi yao ya unafiki juu ya amani, hilo halidhoofishi uhakika wa wale walio na imani katika ahadi ya Mungu ya kuleta amani ya kweli. Kwa zaidi ya karne moja, Mashahidi wa Yehova wamejulikana waziwazi kuwa watetezi waaminifu-washikamanifu wa Neno la Mungu, wapinzani wenye ujasiri wa dini isiyo ya kweli, na waungaji mkono thabiti wa Ufalme wa Mungu. Badala ya kuzubaisha watu kwa maneno matamu juu ya amani, wao hujitahidi kwa bidii kuwazindua waelewe kwamba leo ni wakati wa vita.—Isaya 56:10-12; Waroma 13:11, 12; 1 Wathesalonike 5:6.
Yehova Aacha Kunyamaza
17. Inamaanisha nini kwamba karibuni Yehova ataacha kukaa kimya?
17 Solomoni pia alisema: “Mungu atawahukumu wenye haki na wasio haki; kwa kuwa kuna wakati huko kwa kila kusudi.” (Mhubiri 3:17) Naam, Yehova ana wakati uliowekwa wa kutekeleza hukumu dhidi ya dini isiyo ya kweli na juu ya “wafalme wa dunia wana[o]jipanga . . . juu ya BWANA, na juu ya masihi wake.” (Zaburi 2:1-6; Ufunuo 16:13-16) Mara tu wakati huo ufikapo, siku za Yehova za “kunyamaza” zitakuwa zimekwisha. (Zaburi 83:1; Isaya 62:1; Yeremia 47:6, 7, linganisha NW.) Kupitia Yesu Kristo, Mfalme wake wa Kimesiya aliyetawazwa, yeye ‘atanena’ katika lugha pekee ambayo yaelekea wapinzani wake wanaielewa: “BWANA atatokea kama shujaa; ataamsha wivu kama mtu wa vita; atalia, naam, atapiga kelele; atawatenda adui zake mambo makuu. Siku nyingi nimenyamaza kimya; nimenyamaza, nikajizuia; sasa nitapiga kelele kama mwanamke aliye katika kuzaa; nitaugua na kutweta pamoja. Nitaharibu milima na vilima, nitavikausha vyote vimeavyo; nitaifanya mito ya maji kuwa visiwa, na kuyakausha maziwa ya maji. Nitawaleta vipofu kwa njia wasiyoijua; katika mapito wasiyoyajua nitawaongoza; nitafanya giza kuwa nuru mbele yao; na mahali palipopotoka kuwa pamenyoka. Haya nitayatenda wala sitawaacha.”—Isaya 42:13-16, italiki ni zetu.
18. Watu wa Mungu ‘watanyamaza’ karibuni kwa njia gani?
18 Yehova ‘atakaponena kwa sauti’ kutetea Uungu wake, watu wake hawatahitaji tena kunena kwa sauti kujitetea. Utakuwa wakati wao wa “kunyamaza.” Maneno haya yatatumika kama yalivyotumika nyakati zilizopita kuhusu watumishi wa Mungu: “Hamtahitaji kupigana vita, jipangeni, simameni, mkauone wokovu wa BWANA.”—2 Mambo ya Nyakati 20:17.
19. Ndugu wa kiroho wa Kristo watakuwa na pendeleo gani karibuni?
19 Shetani na tengenezo lake watashindwa vibaya kama nini! Ndugu za Kristo wenye kutukuzwa watashiriki katika ushindi wenye kutokeza kwa ajili ya uadilifu, kwa kupatana na ahadi hii: “Kwa upande wake, Mungu apaye amani atamponda-ponda Shetani chini ya miguu yenu upesi.” (Waroma 16:20) Hatimaye, wakati wa amani ambao umengojewa kwa muda mrefu umekaribia.
20. Karibuni utakuwa wakati wa nini?
20 Yatabarikiwa kama nini maisha ya wote duniani watakaookoka udhihirisho huo mkubwa wa nguvu za Yehova! Muda mfupi baadaye, wanaume na wanawake waaminifu wa zamani ambao wakati wao uliowekwa wa kufufuliwa utakuwa umefika, watajiunga nao. Utawala wa Miaka Elfu wa Kristo utakuwa kwa kweli “wakati wa kupanda . . . , wakati wa kupoza . . . , wakati wa kujenga . . . , wakati wa kucheka . . . , wakati wa kucheza . . . , wakati wa kukumbatia na . . .wakati wa kupenda.” Naam, utakuwa “wakati wa amani” wenye kudumu milele!—Mhubiri 3:1-8; Zaburi 29:11; 37:11; 72:7.
Ungejibuje?
◻ Ni nini ulio msingi wa amani ya kudumu?
◻ Kwa nini Mashahidi wa Yehova huuona wakati wa sasa kuwa “wakati wa vita”?
◻ Watu wa Mungu ‘hunena’ lini, nao ‘hunyamaza’ lini?
◻ Yehova ataacha kunyamaza lini na jinsi gani?
[Sanduku/Picha katika ukurasa wa 13]
Yehova Ana Wakati Uliowekwa wa
◻ kumvuta Gogu ashambulie watu wa Mungu.—Ezekieli 38:3, 4, 10-12;
◻ kutia katika mioyo ya watawala wa kibinadamu wazo la kumharibu Babiloni Mkubwa.—Ufunuo 17:15-17; 19:2;
◻ kufungisha ndoa ya Mwana-Kondoo.— Ufunuo 19:6, 7;
◻ kuanzisha vita ya Har–Magedoni.—Ufunuo 19:11-16, 19-21;
◻ kumfunga Shetani ili kuanzisha Utawala wa Miaka Elfu wa Yesu. —Ufunuo 20:1-3.
Matukio hayo yameorodheshwa tu kulingana na mfuatano wake katika Maandiko. Tunaweza kuwa na uhakika kwamba matukio yote matano yatatokea katika utaratibu ambao Yehova anaamua na hasa wakati anapoamua.
[Picha katika ukurasa wa 15]
Utawala wa Miaka Elfu wa Kristo utakuwa kwa kweli wakati wa . . .
kucheka . . .
kukumbatia . . .
kupenda . . .
kupanda . . .
kucheza . . .
kujenga . . .