Sura 19
“Vita ya Siku Ile Kuu ya Mungu Mwenyezi” Inayokaribia Sana
1. (a) Karibuni mataifa yatamwajibisha Mungu Mwenye Nguvu Zote aandike nini katika “kitabu cha Vita vya Yehova,” na kitabu hicho kilikuwa nini? (b) Ni kwa njia gani kitabu hicho kitafika kwenye upeo wacho wenye fahari?
MWISHOWE mataifa yamefikia wakati ambapo yanamwajibisha Mungu Mwenyezi kuandika ukomo kabisa wenye fahari katika “kitabu cha Vita vya Yehova.” (Hesabu 21:14, NW) Kitabu hicho halisi kilikuwa ni maandishi ya vita ambavyo Yehova alipigana kwa ajili ya watu wake. Kwa wazi Musa alikisoma. Huenda mwanzo wa kitabu hicho ukawa ni wakati Abrahamu alipopiga vita na kushinda juu ya wale wafalme waliomteka Loti, Yehova akiwa anampigania Abrahamu. (Mwanzo 14:1-16, 20) Karibuni sasa, hicho “kitabu cha vita vya Yehova” kitaletwa kwenye upeo wenye fahari kukiwa na sura mpya iliyoongezwa—masimulizi ya ushindi wake wenye utukufu zaidi ya wote. Huo utakuwa ni “vita ya siku ile kuu ya Mungu Mwenyezi” kwenye Har–Magedoni, ukomo kabisa wa huu mfumo wa mambo. (Ufunuo 16:14, 16) “Kitabu” chote hicho kitaonyesha kwamba Mungu Mwenye Nguvu Zote hajapata kamwe kushindwa katika pigano lo lote, au pambano.
2, 3. (a) Tangu mwanzo wa Ukristo, ukweli umekuwa nini kwa habari ya Yehova kupiga “vita” vya kijeshi? (b) Ni nini kitakachomchokoza Yehova apiganie watumishi wake katika wakati wetu?
2 Kweli, tangu mwanzo wa Ukristo mpaka sasa, Yehova amewalinda watu wake kwa njia tofauti, si kwa vita vyenye kutumia majeshi. Yehova hajapata kamwe kupigania mashahidi wake wa Kikristo kama alivyofanya kwa ajili ya Israeli chini ya Torati ya Musa. Lakini muda utakuja katika wakati ujao ulio karibu atakapopigana kwa kutumia majeshi kwa ajili ya watumishi waliojitoa kwake wa nyakati za kisasa. Ni kitu gani kitakachochokoza vita hiyo kwenye Har–Magedoni?
3 Kabla ya kutokea vita ya Mungu, Babuloni Mkuu, ile milki ya ulimwengu ya dini ya uwongo, itakuwa imekwisha haribiwa. Shetani Ibilisi na wale waharabu wa kisiasa wasioshika dini wa Babuloni Mkuu watakasirishwa na uhakika wa kwamba Mashahidi wa Yehova ndio peke yao watakaokuwa kikundi cha kidini chenye kuokoka. Watawala wa ulimwengu hawatakuwa wamejipatia mradi wao wa kuwa na ulimwengu unaomkana Mungu kabisa. Hivyo, sasa, mbele na wasonge wote kuwashambulia kabisa waabudu wa Yehova, ambaye enzi yake kuu ya ulimwengu mzima wanakana na kukaidi! Kwa njia hiyo, kwa kweli watakuwa wakipigana na Mungu.—Ufunuo 17:14, 16; linganisha Matendo 5:39.
“[Yehova] wa Majeshi” Aanza Tena Shughuli za Kijeshi
4. (a) Yehova anaitikiaje shambulio la Gogu? (b) Itikio hilo litathibitika kuwa nini, kulingana na jina “[Yehova] wa majeshi”?
4 Shetani Ibilisi, yule Gogu wa Magogu ndiye atakayeongoza shambulio hili juu ya watu wa Yehova. Wakati Gogu atumiapo majeshi yake yanayokana kuwapo kwa Mungu kushambulia watu wa Yehova, kuteka nyara na kuwaangamiza, Yehova atajiingiza na kupigania watu wake, kama ilivyotabiriwa katika Ezekieli 38:2, 12, 18-20. Itikio la Yehova lilitabiriwa pia katika Zekaria 14:3: “Hapo ndipo atakapotokea [Yehova], naye atapigana na mataifa hayo, kama vile alivyopigana zamani siku ya vita.” Katika njia hiyo Mungu wa Biblia atayapa mataifa yote ya kisasa ushuhuda wa kwamba yeye angali ni Mungu Shujaa-wa-Vita, kama alivyokuwa katika siku za Israeli wa kale, wakati, kama vile imeandikwa katika Maandiko ya Kiebrania, yeye aliposimuliwa mara 260 kuwa “[Yehova] wa majeshi.”—Zaburi 24:10; 84:12.
5, 6. (a) Ni vita gani inayotokea sasa, na ni nani anaongoza majeshi ya kimbingu katika pigano? (b) Ni masimulizi gani anayotoa mtume Yohana juu ya majeshi ya kimbingu yakiingia katika pigano?
5 Ifikapo “siku ile kuu ya Mungu Mwenyezi,” utakuwa ndio wakati wa ile “vita” itakayoonyesha hiyo siku. Yehova anamtolea ishara Amiri-jeshi Mkuu wake, Yesu Kristo. Katika jina la Yehova, yeye pamoja na majeshi ya kimbingu ya maelfu ya malaika wanaingia kwa nguvu katika pigano, kana kwamba wanapanda farasi wa vita. (Yuda 14, 15) Kama mwandikaji wa habari za vita, mtume Yohana anatutolea masimulizi ya mapema juu ya ushindi mkubwa ambao Amiri-jeshi Mkuu wa Yehova atajipatia katika “vita ya siku ile kuu ya Mungu Mwenyezi”:
6 “Nikaona mbingu zimefunuka, na tazama, farasi mweupe, na yeye aliyempanda, aitwaye Mwaminifu na Wa-kweli, naye kwa haki ahukumu na kufanya vita. Na macho yake yalikuwa kama mwali wa moto, na juu ya kichwa chake vilemba vingi . . . Na majeshi yaliyo mbinguni wakamfuata, wamepanda farasi weupe na kuvikwa kitani nzuri, nyeupe, safi. Na upanga mkali hutoka kinywani mwake ili awapige mataifa kwa huo. Naye atawachunga kwa fimbo ya chuma, naye anakanyaga shinikizo la mvinyo ya ghadhabu ya hasira ya Mungu Mwenyezi. Naye ana jina limeandikwa katika vazi lake na paja lake, MFALME WA WAFALME, NA BWANA WA MABWANA.”—Ufunuo 19:11-16.
7. Kukanyagwa kwa shinikizo la mvinyo la mfano la ghadhabu ya Mungu lamaanisha nini kwa mataifa?
7 Yule Amiri-jeshi Mkuu wa kifalme, Yesu Kristo, aongoza majeshi ya kimbingu kwenye shambulio lenye ushindi dhidi ya maadui wote walioungana kwenye Har–Magedoni. Yeye ageuza huo uwanja wa pigano kuwa shinikizo kubwa la mvinyo! Kwa kuwa Mfalme wa wafalme pia “anakanyaga shinikizo la mvinyo ya ghadhabu ya hasira ya Mungu Mwenyezi,” hilo laonyesha kwamba mataifa watapondwa-pondwa kabisa. Watatupwa kama vile zabibu zilizoiva kwenye lile “shinikizo la mvinyo,” ambamo “ghadhabu ya hasira ya Mungu Mwenyezi” itamwagwa juu yao ikiwalemea matokeo yakiwa ni kupondwa-pondwa kabisa. Yale majeshi ya kimbingu yatajiunga katika kukanyaga-kanyaga “shinikizo hilo kubwa la ghadhabu ya Mungu.”—Ufunuo 14:18-20.
8. Yehova anaelezaje mbinu zake za vita?
8 Mashahidi wa Yehova duniani hawainui “upanga” dhidi ya vikosi vya Gogu, lakini Yehova anafanya hivyo. Vita ni yake! Na sasa mwishowe mataifa ya huu ulimwengu ulioendelea sana kisayansi yatamwona akipigana! Sikiliza anapoeleza mbinu zake za vita. “Nami nitaita upanga, uje juu yake [Gogu] katika milima yangu yote, asema Bwana [Yehova]; nao upanga wa kila mtu utakuwa juu ya ndugu yake. Nami nitamhukumu kwa tauni, na kwa damu; nami nitanyesha mvua ifurikayo, na mvua ya mawe makubwa sana, na moto na kiberiti juu yake, na vikosi vyake, na watu wa kabila nyingi walio pamoja naye. Nami nitajitukuza, na kujitakasa, na kujidhihirisha, mbele ya macho ya mataifa mengi; nao watajua ya kuwa mimi ndimi [Yehova].”—Ezekieli 38:21-23.
Silaha za Kimungu Zatumiwa Dhidi ya Adui
9. Ni nini baadhi ya silaha za vita ambazo Yehova atatumia dhidi ya maadui wake?
9 Zikiwa silaha za vita, Yehova atatumia nguvu za uumbaji: mabubujiko ya mawingu ya mvua yenye mafuriko, mvua ya mawe makubwa yenye kuua, moto na kiberiti wenye kunya kama mvua, maji yenye kububujika toka kilindi cha dunia, na umeme wenye mlio wa mpasuko. Kwa mmweko wa njia za kifo za Mungu kwa maadui wake, nuru itakuwa kubwa sana mchana na usiku hivi kwamba jua na mwezi vya asili vitaonekana kana kwamba havihitajiwi tena kutoa mwangaza. Itakuwa kana kwamba vimesimama kabisa, bila kufanya kazi ya kutoa nuru lakini vikiacha makombora yenye nuru ya Yehova yaonyeshe uwezo wayo wa kuangaza. (Habakuki 3:10, 11) Yehova ana wingi wa vitu ajabu vya asili ambavyo ni tayari kutumiwa katika vita.—Yoshua 10:11; Ayubu 38:22, 23, 29.
10. Kulingana na Zekaria 14:12, ni kitu gani kingine ambacho Yehova atatumia katika ile “siku ya pigano” inayokuja?
10 Katika ile “siku ya pigano” ijayo, vilevile Yehova atatumia magonjwa ya kipuku na “pigo.” Nabii Zekaria aliandika hivi juu ya hilo: “Na hili ndilo litakalothibitika kuwa pigo ambalo kwa hilo Yehova atapiga vikundi vya watu vyote ambavyo vitafanya hasa utumishi wa kivita dhidi ya Yerusalemu: Kutakuwako kuoza kwa nyama ya mtu, hali mtu amesimama kwa nyayo za mtu, na macho yenyewe ya mtu yataoza katika vitundu vyayo, na ulimi wenyewe wa mtu utaoza katika kinywa cha mtu.”—Zekaria 14:12, NW.
11. Ni kitu gani kitatukia wakati “pigo” litakapopiga wapiga-vita wanaoshambulia watu wa Yehova?
11 Iwe “pigo” hilo litakuwa halisi au la, litanyamazisha vinywa vilivyofunguliwa kutoa vitisho vyenye kuogofya! Ndimi zimeoza! Uwezo wa kuona utakoma, hivi kwamba washambuliaji wenye macho makali wanaweza tu kupiga upofu-upofu. Macho yameoza! Misuli ya wapiga-vita mashujaa yatapoteza nguvu hali wakisimama juu ya nyayo zao—si wakiwa wanalala chini wakiwa maiti. Nyama ifunikayo mifupa yao imeoza!—Linganisha Habakuki 3:5.
12. “Pigo” hilo litakuwa na matokeo gani juu ya kambi za kijeshi na vifaa vya maadui?
12 “Pigo” lapiga ghafula kwenye kambi zao za kijeshi. Vifaa vyenye mwendo vya kushambulia vinasimamishwa bila mwendo visiwe na msaada wo wote! (Zekaria 14:15; linganisha Kutoka 14:24, 25.) Yanayoonyesha namna vifaa vyao vya kijeshi vitakavyokuwa kazi bure ni maneno haya ya Zekaria 14:6, NW: “Ni lazima itukie katika siku hiyo kwamba itathibitika kuwa hakuna nuru yenye thamani kubwa—vitu vitagandamana.” Hakutakuwa na nuru ya kimbingu ya kibali cha kimungu itakayoangaza juu yao. Taa-bandia za sayansi ya kisasa hazitaondoa giza la kukosa kibali cha kimungu. Vitu vya shughuli za kivita vitasimamishwa bila mwendo, kana kwamba vimefanywa na baridi kuwa ngumu—vikagandamana.
13. Ni nini kitakachoongezea woga ambao Yehova atachochea miongoni mwa washambuliaji hao?
13 Yote hayo yanaogopesha kweli! Lakini kuongezea woga huo ni mvurugo ambao Mungu ataleta miongoni mwa washambuliaji hao. Umoja wao wa tendo dhidi ya Mashahidi wa Yehova utavunjwa. Kama wapiganaji wa michezo ya kutumia panga ili kutumbuiza watu, wenye kofia vichwani zenye kuwapofusha katika wanja za michezo za Waroma, watapigana bila kuonana. Mvurugo huo wenye kuleta kifo utaenea kadiri watakavyoendelea kuchinjana.—Zekaria 14:13.
14. (a) Machinjo yataenea kote kote kadiri gani wakati huo, na ndege na wanyama watashirikije faida za ushindi wa Yehova? (b) Waokokaji watakuwa na mwelekeo gani juu ya wale ‘watakaouawa na Yehova’?
14 Mauaji ya chungu nzima siku hiyo ya siku zote yatakuwa makubwa mno, kwa kuwa majeshi yenye kujipanga foleni upande wa Gogu katika vita hiyo yatakuwa mengi kemkemu. (Ufunuo 19:19-21) Kweli kweli hilo litakuwa pambano la duniani pote, kwa kuwa hakuna sehemu ya dunia itakayoepuka uharibifu huo. Isitoshe, wale watakaouawa kwenye Har–Magedoni hawatalazwa makaburini yaliyo na alama za kuwakumbuka. Ndege wa kila aina na wanyama wa kondeni watashiriki faida za ushindi wenye shangwe wa Mungu na, wakati uo huo, wasaidie kuisafisha dunia kwa kuiondolea mizoga mingi itakayokuwa imetapanywa uku na huku juu ya nchi kama samadi, bila kuombolezwa, bila kuzikwa, ikichukiwa sana na waokokaji. (Ezekieli 39:1-5, 17-20; Ufunuo 19:17, 18) “Waliouawa na [Yehova]” watakuwa wamejiletea wenyewe aibu ya milele.—Yeremia 25:32, 33; Isaya 66:23, 24.
Jina la Yehova Lafanywa Kuwa Zuri
15. Ni tukio gani lenye kutokeza litakalokuwa limekwisha timizwa wakati huo, na kukiwa na matokeo gani juu ya jina la Yehova?
15 Hivyo, “[Yehova] wa majeshi” kupitia Amiri-jeshi Mkuu wake, Yesu Kristo, atajipatia utukufu usiokufa. Tukio lililo kuu zaidi katika historia ya ulimwengu mzima litakuwa limekwisha timizwa—kuondolewa malawama kwa enzi kuu ya ulimwengu mzima ya Yehova na kutakaswa kwa jina lake takatifu. (Ezekieli 38:23; 39:6, 7) Yehova atajifanyia jina lipitalo cho chote kilichoelezwa katika “kitabu cha Vita vya Yehova” na katika Maandiko ya Kiebrania ya Biblia Takatifu. (Linganisha Isaya 63:12-13.) Ni jina zuri kama nini ambalo Yehova atajifanyia kupitia ushindi wake wenye kutia woga katika “vita ya siku ile kuu ya Mungu Mwenyezi”! Kwa furaha yenye shangwe ndipo wote wanaolipenda jina hilo watalisifu milele, wakiimba sifa zalo!
16. Kwa sababu ya “vita ya siku ile kuu ya Mungu Mwenyezi” inayokaribia sana, ni sala gani inayotolewa kwa ajili ya “mkutano mkubwa”?
16 Basi, songa mbele, uingie katika tendo la vita, O Yehova wa majeshi, Mwanao wa kifalme, Yesu Kristo akiwa upande wako! (Zaburi 110:5, 6) Acha mashahidi wako waaminifu duniani wawe mashahidi wa furaha wenye kujionea wenyewe ushindi wako usio na kifani kupitia Mfalme wako Yesu Kristo kwenye “vita ya siku ile kuu ya Mungu Mwenyezi.” Acha “mkutano mkubwa” kwa shangwe ‘watoke katika dhiki ile iliyo kuu’ wawe mashahidi wako wa kidunia milele. (Ufunuo 7:14) Chini ya uangalizi wako wenye upendo, acha waokoke waingie katika Utawala wa Mileani usio na vita wa “Mwana-Mfalme wa Amani” mshindi. Acha wawe ushahidi uonekanao kwa wafu watakaofufuliwa kwa ondoleo la malawama juu ya enzi kuu ya ulimwengu mzima ambayo ni haki yako wewe juu ya ulimwengu wote mzima. Asante kwa kuandika ukomo kabisa wenye fahari katika kile “kitabu cha Vita vya Yehova.” Kwa umilele wa wakati, acha masimulizi hayo ya ushindi wako usio na kifani yabaki katika maandishi ya habari za matukio ya historia ya ulimwengu mzima!
[Picha katika ukurasa wa 156, 157]
‘Yehova wa Majeshi’ atapiga vita dhidi ya mataifa