Ile Siku ‘Iwakayo Kama Tanuru’
“Angalieni, siku ile inakuja, inawaka kama tanuru.”—MALAKI 4:1.
1. Ni maswali gani yanayotokea kuhusiana na Malaki 4:1?
KATIKA siku hizi za mwisho, wenye furaha ni wale ambao Yehova achagua kuandika jina lao katika kitabu chake cha ukumbusho. Lakini namna gani wale wanaoshindwa kustahili pendeleo hilo? Wawe ni watawala au ni watu wa kawaida tu, itakuwaje kwao wakidharau wapiga-mbiu wa Ufalme wa Mungu na ujumbe wao? Malaki asema juu ya siku ya kutoza hesabu. Kwenye sura ya 4, mstari wa 1, twasoma hivi: “Kwa maana, angalieni, siku ile inakuja, inawaka kama tanuru; na watu wote wenye kiburi, nao wote watendao uovu, watakuwa makapi; na siku ile inayokuja itawateketeza, asema BWANA wa majeshi; hata haitawaachia shina wala tawi.”
2. Ni ufafanuzi upi wa waziwazi wa hukumu ya Yehova unaotolewa na Ezekieli?
2 Manabii wengine pia hulinganisha kule kuhukumu kwa Yehova mataifa na joto jingi mno la tanuru. Ezekieli 22:19-22 yahusu kwa kufaa kama nini kuhukumu kwa Mungu mafarakano ya Jumuiya ya Wakristo yenye uasi-imani! Lasomwa hivi: “Bwana MUNGU asema hivi; Kwa sababu ninyi nyote mmekuwa taka za fedha, tazama, nitawakusanya . . . Kama vile watu wakusanyavyo fedha, na shaba, na chuma, na risasi, na bati, kati ya tanuu, ili kuvifukutia moto na kuviyeyusha; ndivyo nitakavyowakusanya ninyi katika hasira yangu, na ghadhabu yangu, nami nitawalaza huko, na kuwayeyusha. Naam, nitawakusanya, na kuwafukutia moto wa ghadhabu yangu, nanyi mtayeyushwa kati yake. Kama fedha iyeyushwavyo kati ya tanuu, ndivyo mtakavyoyeyushwa kati yake; nanyi mtajua ya kuwa mimi, BWANA, nimemwaga ghadhabu yangu juu yenu.”
3, 4. (a) Makasisi wamefanya dai jipi la kiunafiki? (b) Ni nini rekodi mbaya sana ya dini?
3 Ni kielezi chenye nguvu kwelikweli! Wale makasisi ambao wamejaribu kuepuka kutumia jina la Yehova, hata kulitukana jina hilo takatifu, lazima wakabili siku hiyo ya kutoza hesabu. Kwa kimbelembele, wao hudai kwamba wao na marafiki zao wa kisiasa watasimamisha Ufalme wa Mungu duniani, au angalau kuifanya dunia iwe mahali pa kufaa kwa ajili ya Ufalme.
4 Jumuiya ya Wakristo yenye uasi imani imejiunga na watawala wa kisiasa katika kupigana vita vya ukatili. Historia yarekodi zile Krusedi za nyakati za enzi ya kati, yale maongofu ya kulazimishwa ya Mahakama ya Kuhukumia Wazushi wa Kidini ya Kihispania, ile Vita ya Miaka Thelathini iliyoangamiza Ulaya katika karne ya 17, na Vita ya Wenyewe kwa Wenyewe ya Kihispania ya miaka ya 1930, iliyopiganwa ili kufanya Hispania iwe mahali salama kwa ajili ya Ukatoliki. Umwagaji wa damu ulio mkubwa zaidi ulikuja wakati wa vile vita viwili vya ulimwengu vya karne yetu, wakati Wakatoliki na Waprotestanti waliposhiriki katika kuchinja waamini wenzao na pia wale wa dini nyinginezo bila kujali. Hivi karibuni zaidi, kumekuwa na pigano katili sana kati ya Wakatoliki na Waprotestanti katika Ireland, kati ya mafarakano ya kidini katika India, na kati ya vikundi vya kidini vya ile iliyokuwa Yugoslavia. Kurasa za historia ya kidini zimetiwa damu pia na kule kuuawa kwa maelfu ya mashahidi wa Yehova waaminifu kwa sababu ya imani yao.—Ufunuo 6:9, 10.
5. Ni hukumu gani inayongojea dini bandia?
5 Twaweza kuthamini kwa utayari uhaki wa ule uangamizo unaokaribia kutoka kwa Yehova juu ya Babiloni Mkubwa, ile milki ya ulimwengu ya dini bandia, pamoja na wale wanaoiunga mkono. Uangamizo huo unafafanuliwa kwenye Ufunuo 18:21, 24: “Malaika mmoja mwenye nguvu akainua jiwe, kama jiwe kubwa la kusagia, akalitupa katika bahari, akisema: Kama hivi, kwa nguvu nyingi, utatupwa Babeli [“Babiloni,” NW], mji ule mkuu, wala hautaonekana tena kabisa. Na ndani yake ilionekana damu ya manabii, na ya watakatifu, na ya wale wote waliouawa juu ya nchi.”
6. (a) Ni nani ambao ni lazima wawe kama makapi, na kwa nini? (b) Kuna uhakikishio upi kwa wale wamhofuo Yehova?
6 Hatimaye, adui wote wa uadilifu, na wale wanaoshikamana nao, ‘lazima wawe kama makapi.’ Siku ya Yehova itawaka moto miongoni mwao kama vile tanuru. “Haitawaachia shina [“mzizi,” NW] wala tawi.” Katika siku hiyo ya kutoza hesabu, watoto wachanga, au matawi, watashughulikiwa kwa haki kulingana na ukaguzi wa Yehova juu ya mizizi, wazazi wao, walio na mamlaka juu ya watoto hao. Wazazi waovu hawatakuwa na wazao wa kuendeleza njia zao mbovu. Lakini wale wadhihirishao imani katika ahadi za Mungu za Ufalme hawatatikiswa. Kwa hiyo Waebrania 12:28, 29 lahimiza hivi: “Na tuwe na neema, ambayo kwa hiyo tumtolee Mungu ibada ya kumpendeza, pamoja na unyenyekevu na kicho; maana Mungu wetu ni moto ulao.”
Je, Yehova Ni Mungu Mkatili?
7. Upendo wa Yehova waingiaje katika hukumu yake?
7 Je, hili lamaanisha kwamba Yehova ni Mungu mkatili, atakaye kulipa kisasi? Sivyo hata kidogo! Kwenye 1 Yohana 4:8, mtume ataja kweli ya msingi: “Mungu ni upendo.” Kisha, katika mstari wa 16 yeye aongeza mkazo, akisema hivi: “Mungu ni upendo, naye akaaye katika pendo, hukaa ndani ya Mungu, na Mungu hukaa ndani yake.” Ni kwa sababu ya kupenda kwake wanadamu kwamba Yehova akusudia kuisafisha dunia hii uovu wote. Mungu wetu mwenye upendo na rehema atangaza hivi: “Kama mimi niishivyo, . . . sikufurahii kufa kwake mtu mwovu; bali aghairi mtu mwovu, na kuiacha njia yake mbaya, akaishi. Ghairini, ghairini, mkaache njia zenu mbaya; mbona mnataka kufa?”—Ezekieli 33:11.
8. Yohana alikaziaje upendo, na bado akajionyesha kuwa Mwana wa Ngurumo?
8 Yohana arejezea a·gaʹpe, upendo wenye kanuni, mara nyingi zaidi ya wale waandikaji wengine watatu wa Gospeli wakiwa pamoja, hata hivyo kwenye Marko 3:17, Yohana mwenyewe anafafanuliwa kuwa ‘Mwana wa Ngurumo.’ Ni kwa upulizio wa Yehova kwamba huyu Mwana wa Ngurumo aliandika ule ujumbe mbalimbali wa kiapokalipsi wa kitabu cha mwisho cha Biblia, Ufunuo, ambacho chamwonyesha Yehova kuwa Mungu atekelezaye haki. Kitabu hicho kimejaa semi za kihukumu, kama vile “shinikizo hilo kubwa la ghadhabu ya Mungu,” “vitasa saba vya ghadhabu ya Mungu,” na “ghadhabu ya hasira ya Mungu Mwenyezi.”—Ufunuo 14:19; 16:1; 19:15.
9. Yesu alitoa maelezo gani juu ya hukumu za Yehova, na unabii wake mwingi ulitimizwaje?
9 Alipokuwa duniani, Bwana yetu Yesu Kristo, ambaye ni “mfano wa Mungu asiyeonekana,” alitangaza hukumu za Yehova kwa ujasiri. (Wakolosai 1:15) Kwa kielelezo, kuna zile ole saba za Mathayo sura ya 23 ambazo alipiga mbiu yazo waziwazi dhidi ya wanafiki wa kidini wa siku yake. Alimalizia hukumu hiyo yenye laana kwa maneno haya: “Ee Yerusalemu, Yerusalemu, uwauaye manabii, na kuwapiga kwa mawe wale waliotumwa kwako! ni mara ngapi nimetaka kuwakusanya pamoja watoto wako, kama vile kuku avikusanyavyo pamoja vifaranga vyake chini ya mabawa yake, lakini hamkutaka! Angalieni, nyumba yenu mmeachiwa hali ya ukiwa.” Miaka 37 baadaye, hukumu ilitekelezwa na jeshi la Kiroma chini ya Jemadari Tito. Hiyo ilikuwa siku yenye hofu, ikitoa unabii juu ya ile itakayokuwa siku yenye kutia hofu zaidi ambayo mwanadamu amepata kuona—siku ya Yehova, iliyo karibu kuja.
“Jua” Laangaza
10. “Jua la uadilifu” lawaleteaje watu wa Mungu shangwe?
10 Yehova ajulisha kwamba kutakuwa waokokaji wa siku yake. Yeye awarejezea hawa kwenye Malaki 4:2, akisema hivi: “Kwenu ninyi mnaolicha [“mnaolihofu,” NW] jina langu, jua la haki [“uadilifu,” NW] litawazukia, lenye kuponya katika mbawa zake.” Jua hilo la uadilifu si mwingine ila Yesu Kristo mwenyewe. Yeye ndiye “nuru [ya kiroho] ya ulimwengu.” (Yohana 8:12) Yeye huangaziaje? Yeye huinuka akiwa na ponyo katika mbawa zake—kwanza ponyo la kiroho, ambalo twaweza kupata hata leo, kisha, katika ulimwengu mpya unaokuja, ponyo la kimwili la watu wa mataifa yote. (Mathayo 4:23; Ufunuo 22:1, 2) Kitamathali, kama vile Malaki alivyosema, wale wanaoponywa ‘watacheza-cheza kama ndama wanono’ waliotoka tu zizini. Ni shangwe iliyoje itakayoonwa pia na wale watakaofufuliwa wanaoinuliwa wakiwa na taraja la kupata ukamilifu wa kibinadamu!
11, 12. (a) Ni mwisho gani unaowangojea waovu? (b) Watu wa Mungu ‘wanawakanyagaje waovu’?
11 Hata hivyo, namna gani waovu? Kwenye Malaki 4:3, twasoma hivi: “Nanyi mtawakanyaga waovu; maana watakuwa majivu chini ya nyayo za miguu yenu; katika siku ile niifanyayo, asema BWANA wa majeshi.” Huku akiwalinda wale wanaompenda, Mungu-Shujaa-wa-Vita wetu atakuwa amefagilia mbali kutoka duniani wale maadui watishao, akiwaangamiza. Shetani pamoja na roho zake waovu watakuwa wamezuiwa.—Zaburi 145:20; Ufunuo 20:1-3.
12 Watu wa Mungu hawashiriki katika kuharibu waovu. Basi, wao ‘wanawakanyagaje waovu’? Wanafanya hivyo kitamathali kwa kushiriki katika sherehe kubwa ya ushindi. Kutoka 15:1-21 lafafanua sherehe ya jinsi hiyo. Ilifuata uharibifu wa Farao na majeshi yake katika Bahari Nyekundu. Kwa utimizo wa Isaya 25:3-9, kuondolewa kwa “watu watishao” kunafuatwa na karamu ya ushindi inayohusianishwa na ahadi ya Mungu: “[Atameza] mauti hata milele; na Bwana MUNGU atafuta machozi katika nyuso zote; na aibu ya watu wake ataiondoa katika ulimwengu wote; maana BWANA amenena hayo. Katika siku hiyo watasema, Tazama, huyu ndiye Mungu wetu . . . Huyu ndiye BWANA tuliyemngoja, na tushangilie na kuufurahia wokovu wake.” Katika shangwe hii, hakuna hali ya kutaka kulipiza kisasi wala kudhihaki, bali kuna mchachawo kwa kuona jina la Yehova likitakaswa na dunia kusafishwa ili ikaliwe kwa amani na wanadamu wenye muungamano.
Programu Tukufu ya Kielimu
13. Ni elimu gani itakayokuwako katika “dunia mpya”?
13 Kwenye Malaki 4:4, Wayahudi walihimizwa ‘wakumbuke torati ya Musa.’ Kwa hiyo leo twahitaji kufuata “sheria ya Kristo,” kama vile itajwavyo kwenye Wagalatia 6:2. Bila shaka waokokaji wa Har–Magedoni wataandaliwa maagizo ya ziada yenye msingi wa sheria hiyo, na huenda sana ikawa hayo yataandikwa katika “hati-kunjo” za Ufunuo 20:12 (NW) zitakazofunguliwa wakati wa ufufuo. Hiyo itakuwa siku tukufu kama nini wakati wafu wanaofufuliwa wanapoelimishwa kufuata mtindo-maisha wa “dunia mpya”!—Ufunuo 21:1, NW.
14, 15. (a) Eliya wa siku ya kisasa anatambulishwaje? (b) Jamii ya Eliya inatimiza daraka jipi?
14 Hiyo itakuwa upanuzi wa kazi ya kielimu inayorejezewa na Yehova, kama vile irekodiwavyo kwenye Malaki 4:5: “Angalieni, nitawapelekea Eliya nabii, kabla haijaja siku ile ya BWANA, iliyo kuu na kuogofya [“yenye kutia hofu,” NW].” Ni nani huyo Eliya wa siku ya kisasa? Kama vile ionyeshwavyo kwenye Mathayo 16:27, 28, katika kurejezea ‘kuja kwake katika ufalme wake,’ Yesu alisema hivi: “Mwana wa Adamu atakuja katika utukufu wa Baba yake pamoja na malaika zake; ndipo atakapomlipa kila mtu kwa kadiri ya matendo yake.” Siku sita baadaye, akiwa juu ya mlima pamoja na Petro, Yakobo na Yohana, “a[li]geuka sura yake mbele yao; uso wake ukang’aa kama jua, mavazi yake yakawa meupe kama nuru.” Je, alikuwa peke yake katika ono hili? La, kwani, “tazama, wakatokewa na Musa na Eliya, wakizungumza naye.”—Mathayo 17:2, 3.
15 Hili lingeweza kumaanisha nini? Lilielekeza kwa Yesu akiwa yule Musa Mkubwa Zaidi aliyetabiriwa wakati wa kuja kwake kwa ajili ya hukumu. (Kumbukumbu la Torati 18:18, 19; Matendo 3:19-23) Wakati huo yeye angeshirikiana na Eliya wa siku ya kisasa ili kutimiza kazi muhimu, ile ya kuhubiri habari hizi njema za Ufalme duniani pote kabla ya ile siku ya Yehova iliyo kuu na yenye kutia hofu kupiga. Likifafanua kazi ya “Eliya” huyu, Malaki 4:6, lasema hivi: “Ataigeuza mioyo ya baba iwaelekee watoto wao, na mioyo ya watoto iwaelekee baba zao, ili nisije nikaipiga dunia kwa laana.” Hivyo, “Eliya” anatambulishwa kuwa jamii ya mtumwa mwaminifu mwenye akili ya Wakristo watiwa-mafuta hapa duniani, ambao Bwana-Mkubwa, Yesu, amewakabidhi utunzaji wa mali Zake zote. Hilo latia ndani kuandalia nyumba ya imani “chakula [cha kiroho kihitajiwacho] kwa wakati wake.”—Mathayo 24:45, 46.
16. Ni matokeo gani yenye furaha ambayo yametokezwa na kazi ya jamii ya Eliya?
16 Ulimwenguni pote leo, twaweza kuona matokeo ya kufurahisha ya programu hiyo ya kulisha. Gazeti Mnara wa Mlinzi, lenye uchapishaji wa nakala 16,100,000 kwa kila toleo katika lugha 120, ambazo kati yazo 97 hutangazwa wakati uleule, linaijaza dunia kwa “habari njema ya ufalme.” (Mathayo 24:14) Vichapo vingine katika lugha nyingi hutumiwa katika sehemu mbalimbali za kazi ya kuhubiri na kufundisha ya Mashahidi wa Yehova. Jamii ya Eliya, iliyo mtumwa mwaminifu mwenye akili, iko macho ili kuandalia kwa wingi wote “wale wenye kufahamu uhitaji wao wa kiroho.” (Mathayo 5:3, NW) Zaidi ya hayo, wale wanaokubali hili tumaini la Ufalme na kutenda kulingana nalo wanafungamanishwa katika muungamano mzuri ajabu wa ulimwenguni pote. Huo watia ndani umati mkubwa “kutoka katika mataifa yote na makabila na vikundi vya watu na ndimi.” (Ufunuo 7:9, NW) Wakati ambapo kazi hii imetimizwa kwa kadiri ambayo Yehova ataka, ndipo mwisho utakapokuja katika ile siku yake iliyo kuu na yenye kutia hofu.
17. Siku ya Yehova yenye kutia hofu itakuja lini?
17 Siku hiyo yenye kutia-hofu itatujia lini hasa? Mtume Paulo ajibu: “Siku ya Bwana yaja kama vile mwivi ajavyo usiku. Wakati [“wao,” NW] wasemapo [labda kwa njia ya kipekee], Kuna amani na salama, ndipo uharibifu uwajiapo kwa ghafula, kama vile utungu umjiavyo mwenye mimba, wala hakika hawataokolewa.”—1 Wathesalonike 5:2, 3.
18, 19. (a) “Amani na salama” inatangazwaje? (b) Watu wa Yehova watapata kitulizo lini?
18 Ni nani “wao” katika unabii huu? Wao ni viongozi wa kisiasa ambao hudai kwamba waweza kujenga utaratibu mpya wenye muungamano kutokana na sehemu zilizogawanyika za ulimwengu huu mjeuri. Mazao yao ya kujivunia, ule Ushirika wa Mataifa na ule Umoja wa Mataifa, yameshindwa kutimiza jambo hili. Kama vile nabii wa Yehova alivyotabiri, hata sasa wao “wa[na]sema, Amani, Amani, wala hapana amani.”—Yeremia 6:14, 8:11; 14:13-16.
19 Kwa sasa, watu wa Yehova huvumilia mibano na minyanyaso ya ulimwengu huu usiomcha Mungu. Lakini karibuni, kama vile isemwavyo kwenye 2 Wathesalonike 1:7, 8, wao watapata kitulizo “wakati wa kufunuliwa kwake Bwana Yesu kutoka mbinguni pamoja na malaika wa uweza wake; katika mwali wa moto; huku akiwalipiza kisasi wao wasiomjua Mungu, na wasioitii Injili ya Bwana wetu Yesu.”
20. (a) Sefania na Habakuki wanatabiri nini juu ya ile siku ‘iwakayo kama tanuru’? (b) Unabii huo mbalimbali unatoa shauri jipi na kitia-moyo kipi?
20 Hilo litatokea karibuni kadiri gani? Wengi wetu tumekuwa tukingojea muda mrefu. Kwa sasa, idadi kubwa ya wasikivu watakaookoka wanajibu ule mwito kwenye Sefania 2:2, 3: “Mtafuteni BWANA . . . itafuteni haki, utafuteni unyenyekevu; huenda mtafichwa katika siku ya hasira ya BWANA.” Kisha, Sefania 3:8 lina himizo hili: “Basi ningojeni, asema BWANA, hata siku ile nitakapoondoka kuteka mateka; maana nimeazimia kuwakusanya mataifa, ili nizikutanishe falme, nipate kuwamwagia ghadhabu yangu; naam, ukali wote wa hasira yangu; kwa maana dunia yote itateketezwa kwa moto wa wivu wangu.” Mwisho uko karibu! Yehova ajua ile siku na saa naye hatabadili ratiba yake ya wakati. Acheni tuvumilie kwa subira. “Maana njozi hii bado ni kwa wakati ulioamriwa, inafanya haraka ili kuufikilia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia [“haitachelewa,” NW].” (Habakuki 2:3) Siku ya Yehova yenye kutia hofu yazidi kukaribia upesi. Kumbuka kwamba siku hiyo haitachelewa!
Kwa Kupitia:
◻ Itakuwaje kwa watawala na wale wanaotawalwa katika siku ya Yehova yenye kutia hofu?
◻ Yehova ni Mungu wa aina gani?
◻ Ni aina gani ya elimu inayofafanuliwa kwa ajili ya watu wa Mungu?
◻ Manabii wa Mungu wanatuhimizaje kwa sababu ya ukaribu wa mwisho?
[Picha katika ukurasa wa 21]
Wakati wa Mahakama ya Kuhukumia Wazushi wa Kidini ya Kihispania wengi walilazimishwa waongoke kwenye Ukatoliki
[Hisani]
The Complete Encyclopedia of Illustration/J. G. Heck