‘Je! Nibatizwe?’

KATI ya maamuzi yote tunayohitaji kufanya maishani, labda hakuna mmoja ulio na maana zaidi ya huu: ‘Je! Nibatizwe?’ Kwa nini huo ni wa maana sana? Kwa sababu uamuzi wetu kuhusu swali hilo unaathiri moja kwa moja si mwendo wetu wa maisha tu bali pia hali njema yetu ya milele.

Je! unakabili uamuzi huo? Labda umekuwa ukijifunza Biblia pamoja na Mashahidi wa Yehova kwa muda fulani. Au wazazi wako wamekuwa wakikufundisha Maandiko kutoka utoto. Sasa umefikia hatua ambayo ni lazima uamue lile utakalofanya. Ili ufanye uamuzi ufaao, utahitaji kuelewa kile kinachohusika katika ubatizo na ni nani apaswaye kubatizwa.

Kinachohusika Katika Ubatizo

Kama vile arusi, ubatizo ni sherehe inayoadhimisha uhusiano fulani. Kwa habari ya arusi, mwanamume na mwanamke wanaohusika tayari wamesitawisha uhusiano wa karibu. Sherehe ya arusi huonyesha tu waziwazi kile ambacho kimeafikiwa kwa faragha, yaani, kwamba hao wawili wanataka sasa kuuingia muungano wa ndoa hasa. Hilo pia hufungua mapendeleo ya kufurahiwa na wenzi hao wa ndoa nalo huleta madaraka ambayo ni lazima watimize katika maisha yao wakiwa pamoja.

Hali hiyo hufanana sana na ubatizo. Tunapojifunza Biblia, tunajifunza juu ya mambo yenye upendo ambayo Yehova ametufanyia. Ametupa sisi si uhai tu na kila kitu tunachohitaji ili kuutegemeza bali pia Mwana wake mzaliwa wa pekee ili aifungulie njia ainabinadamu yenye dhambi iweze kuwa na uhusiano na Yeye na kupata uhai wa milele kwenye dunia-paradiso. Tunapofikiria hayo yote, je, hatuchochewi kufanya jambo fulani?

Tunaweza kufanya nini? Mwana wa Mungu, Yesu Kristo, atuambia hivi: “Mtu ye yote akitaka kunifuata, na ajikane mwenyewe, ajitwike msalaba [mti wa mateso, NW] wake, anifuate.” (Mathayo 16:24) Naam, twaweza kuwa wanafunzi wa Yesu Kristo, tukifuata mfano wake katika kutumikia masilahi ya Baba yake, Yehova. Hata hivyo, ili kufanya hivyo tunahitaji ‘tujikane’ wenyewe, yaani, kuazimia kwa hiari kuweka mapenzi ya Mungu mbele ya mapenzi yetu wenyewe; hilo latia ndani kutoa, au kuweka wakfu, maisha yetu ili kufanya mapenzi yake. Ili kujulisha wazi uamuzi huo wa hiari na wa faragha, sherehe ya waziwazi inafanywa. Sherehe hiyo ni ubatizo wa maji ili kufananisha waziwazi wakfu wetu kwa Mungu.

Ni Nani Apaswaye Kubatizwa?

Yesu Kristo aliwaagiza wafuasi wake ‘waenende, wakafanye mataifa yote kuwa wanafunzi, wakiwabatiza kwa jina la Baba, na Mwana, na roho takatifu, na kuwafundisha kuyashika yote aliyowaamuru.’ (Mathayo 28:19, 20) Kwa wazi, kadiri fulani ya ukomavu wa akilini na moyoni inahitajiwa kwa wale watakaobatizwa. Kupitia funzo lao la kibinafsi la Neno la Mungu, wamekuja kuthamini uhitaji wa ‘kutubu na kugeuka’ kutoka mwendo wao wa maisha ya zamani. (Matendo 3:19, NW) Halafu, wameona uhitaji wa kuanza ile kazi ya kueneza evanjeli iliyofanywa na Yesu Kristo, ikiwafanya wawe wanafunzi wake. Yote hayo yametukia kabla ya ile hatua ya ubatizo.

Je! umefikia hatua hiyo katika ukuzi wako wa kiroho? Je! unatamani kumtumikia Mungu? Ikiwa ndivyo, fikiria kwa sala ule usimulizi wa Biblia wa yule towashi Mwethiopia, kama ilivyorekodiwa katika Matendo sura ya 8. Mwanamume huyo alipofafanuliwa unabii mwingi juu ya Yesu Mesiya, alichunguza akili na moyo wake kisha akauliza: “Ni nini kinachonizuia nisibatizwe?” Yaonekana hakukuwa lolote lililokuwa likimzuia; kwa hiyo alibatizwa.—Matendo 8:26-38.

Leo wengi wanauliza swali ilo hilo: “Ni nini kinachonizuia nisibatizwe?” Likiwa tokeo 300,945 waliojiweka wakfu hivi karibuni walibatizwa katika 1991. Hilo liliwaletea watu wote wa Yehova shangwe nyingi, na wazee katika makundi wanafurahia kuwasaidia wengine wenye mioyo ifaayo wafanye maendeleo na kupata sifa zinazohitajiwa ili kubatizwa.

Hata hivyo, huenda ikawa kwamba wazee katika kundi lenu wanadokeza kwamba ungoje. Au, ukiwa kijana, wazazi wako huenda wakakuelekeza ungoje. Iweje basi? Usivunjike moyo. Kumbuka kwamba kuingia katika uhusiano wa kibinafsi na Aliye Juu Zaidi ni jambo zito sana. Ni lazima kuishi kulingana na viwango vya juu na kuvidumisha. Kwa hiyo sikiliza madokezo yanayotolewa na uyafuate kwa moyo wote. Usipoelewa kikamili sababu zinazotolewa, usiwe na haya, lakini uliza maswali mpaka uelewe kwa kweli yale matayarisho unayohitajiwa kufanya.

Kwa upande ule mwingine, watu wengine huenda wakasita kuchukua ile hatua kubwa, kama wanavyoiita. Je! wewe ni mmoja wao? Bila shaka, huenda kukawa sababu hususa kwa nini ni lazima uahirishe wakfu na ubatizo. Lakini ikiwa unastahili na ungali unasita, ni vizuri kujiuliza mwenyewe hivi: “Ni nini kinachonizuia nisibatizwe?” Changanua hali yako kwa sala na kuona ikiwa kwa kweli una sababu nzuri ya kuahirisha kuitikia mwaliko wa Yehova wa kuingia katika uhusiano wa kibinafsi na yeye.

‘Ningali Mchanga’

Ikiwa wewe ni kijana, huenda ikawa unafikiri, ‘Ningali mchanga.’ Ni kweli kwamba maadamu vijana wanabaki watiifu na wenye kuitikia wazazi wao Wakristo na kutumia Maandiko vizuri wawezavyo, wanaweza kuwa na uhakika kwamba Yehova huwaona kuwa “watakatifu.” Kwa kweli, Biblia hutuambia kwamba kibali cha kimungu kwa wazazi waadilifu huenea kwa watoto wanaowategemea. (1 Wakorintho 7:14) Hata hivyo, kikomo cha umri hakitolewi na Biblia kwa habari ya wakati kipindi hicho cha kuwategemea kinapoisha. Kwa hiyo, ni jambo la maana kwa vijana Wakristo kuchunguza kwa uzito swali hili: ‘Je! nibatizwe?’

Biblia huwatia moyo vijana ‘wamkumbuke Muumba wao siku za ujana wao.’ (Mhubiri 12:1) Kwa habari hiyo, tuna mfano wa Samweli mchanga, ambaye “alikuwa akitumika mbele za BWANA [Yehova, NW] naye alikuwa kijana.” Pia kuna mfano wa Timotheo, ambaye kutoka utoto alizingatia moyoni kweli aliyofundishwa na mama yake na nyanya yake.—1 Samweli 2:18; 2 Timotheo 1:5; 3:14, 15.

Leo vilevile, vijana wengi wameziweka wakfu maisha zao ili kumtumikia Yehova. Akifusa mwenye umri wa miaka 15, alisema kwamba sehemu fulani katika Mkutano wa Utumishi ilimsaidia afanye uamuzi wake kubatizwa. Ayumi alibatizwa alipokuwa na umri wa miaka kumi. Alitaka kumtumikia Yehova kwa sababu alikuja kumpenda sana. Sasa ana miaka 13 na hivi karibuni alipata kumwona mwanafunzi wake wa Biblia, aliyekuja kumpenda Yehova pia, akibatizwa akiwa na umri wa miaka 12. Hikaru ndugu mchanga zaidi wa Ayumi alibatizwa pia akiwa na umri wa miaka kumi. “Wengine walisema nilikuwa mchanga mno,” akumbuka, “lakini Yehova alijua nilivyohisi. Niliazimia kubatizwa mara nilipoamua kuweka wakfu maisha yangu ili nimtumikie kwa kutumia yote niliyokuwa nayo.”

Mfano wa wazazi ni kichocheo kingine, kama iwezavyo kuonwa kutokana na ono la dada mmoja mchanga. Baba yake alimkataza mama yake asijifunze Biblia na msichana huyo na ndugu na dada yake. Alikuwa akiwachapa na kuvichoma vitabu vyao. Lakini kwa sababu ya uvumilivu na imani ya mama huyo, watoto waliweza kuona umaana wa kumtumikia Yehova Mungu. Msichana huyo mchanga alibatizwa akiwa na miaka 13, na ndugu na dada yake wachanga zaidi wamefuata mfano wake.

‘Mimi Ni Mzee Sana’

Mtunga zaburi alisema hivi: “Wazee, na watoto; na walisifu jina la BWANA [Yehova, NW].” (Zaburi 148:12, 13) Naam, ni lazima wale walio wazee-wazee watambue uhitaji wa kuchukua msimamo wao upande wa Yehova. Hata hivyo, baadhi ya watu wenye umri mkubwa zaidi, huelekea kuepuka kufanya mabadiliko. Wanahisi kwamba ni vigumu kwa wazee-wazee kujifunza mambo mapya. Hata hivyo, kumbuka kwamba Abrahamu mwaminifu alikuwa na umri wa miaka 75 wakati Yehova alipomwambia: “Toka katika nchi yako na katika jamaa zako, ukaende hata nchi nitakayokuonyesha.” (Matendo 7:3; Mwanzo 12:1, 4) Musa alikuwa na miaka 80 wakati Yehova alipompa yeye utume huu: “Upate kuwatoa watu wangu . . . katika Misri.” (Kutoka 3:10) Wanaume hao na wengine walikuwa wamezoea njia yao ya maisha wakati Yehova alipowaomba waonyeshe upendo na wakfu wao kwake. Hawakusita kuuitikia mwito wa Yehova.

Namna gani leo? Shizumu alikuwa amekuwa mfuasi wa dini ya Buddha kwa muda wa miaka 78 alipoanza funzo la Biblia. Familia yake ilimpinga, hata wasimruhusu ajifunze katika nyumba yake mwenyewe. Baada ya muda wa mwaka mmoja tu, aliona uhitaji wa kujiweka wakfu kwa Yehova, naye akabatizwa. Kwa nini alifanya badiliko hilo? Alisema hivi: “Kwa miaka mingi nilikuwa nimedanganywa na dini bandia, na nilitaka kuendelea kupokea kweli kutoka kwa Yehova milele.”

‘Unaowaokoa Nyinyi Siku Hizi’

Wakati unaisha. Uhai, kutia na wako, umo hatarini. Ni jambo la uharaka ufikirie kwa uzito jambo la kujiweka wakfu kwa Yehova na kuufananisha kwa ubatizo wa maji. Mtume Petro alikazia hilo kwa kusema: “Ubatizo, unaowaokoa ninyi pia siku hizi.” Alieleza zaidi kwamba ubatizo “siyo kuwekea mbali uchafu wa mwili,” (mtu angalikuwa tayari amefanya hivyo kabla ya kustahili kubatizwa) “bali jibu la dhamiri safi mbele za Mungu [ombi linalofanywa kwa Mungu kwa ajili ya dhamiri njema, NW].”—1 Petro 3:21.

Akiwa ametimiza matakwa ya Yehova mwanafunzi aliyebatizwa hupokea dhamiri njema. Kwa kuendelea kujitahidi kadiri awezavyo katika kumtumikia Yehova, yeye huonea shangwe amani ya akilini na uradhi. (Yakobo 1:25) Zaidi ya hayo yote, yeye aweza kwa uhakika kutazamia baraka kutoka kwa Yehova zisizo na mwisho katika mfumo mpya unaokuja. Na iwe hivyo na wewe unapoitikia swali hili ifaavyo: ‘Je! nibatizwe?’

[Picha katika ukurasa wa 21]

Akiwa mvulana Samweli alitumika mbele za Yehova

[Picha katika ukurasa wa 22]

Musa alikuwa na miaka 80 alipopewa utume na Yehova

[Picha katika ukurasa wa 23]

Leo vijana na wazee-wazee pia wanaobatizwa wanaweza kutazamia baraka zisizo na mwisho katika mfumo mpya wa Mungu