Maswali Kutoka kwa Wasomaji

■ Je! ni jambo la hekima kwa Mkristo ambaye mwenzi wake wa ndoa amekufa kubaki akiwa mseja kwa tumaini la kuunganishwa tena wakati ujao?

Ni jambo bora jinsi gani kwamba Mkristo ahisi upendo kwa mwenzi wake wa ndoa hata baada ya huyo kufa! Wengine walio katika hali hiyo wamebaki wakiwa waseja, si kwa sababu ya kuridhika na useja, bali wakiwa na matumaini ya kuirudia ndoa yao baada ya ufufuo. Hata hivyo, ingawa hatutaki kuwa wasio na huruma kuhusu hisia za kibinadamu zinazosababisha matumaini hayo, tunawatia moyo watu wa aina hiyo wafikirie mambo fulani ya Kibibilia.

Kwa mfano, yanayohusiana na habari hii ni maneno ya mtume Paulo: “Mwanamke hufungwa maadamu mumewe yu hai, lakini ikiwa mumewe[amekufa],yu huru kuolewa na mtu ye yote amtakaye; katika Bwana tu. Lakini [ni mwenye furaha] zaidi akikaa kama alivyo.” 1 Wakorintho 7:39, 40) Jambo hilo linaonyesha kwamba kifungo cha ndoa kinakoma mwenzi mmoja anapokufa. Ilikuwa fadhili kwa Mungu kuwajulisha Wakristo jambo hili, kwa maana kwa njia hiyo wajane wa kike na wa kiume wanaweza kufikiria mahitaji yao ya kimoyoni na mengine katika kuamua kama wataoa au kuolewa tena; wao hawafungwi kwa yule aliyekufa.​—1 Wakorintho 7:8, 9.

Ingawa hivyo, je! Biblia inaonyesha kama wale watakaofufuliwa wataweza kuoa au kurudia ndoa ya zamani ambayo ilikomeshwa na kifo? Usimulizi mmoja unaonekana kuwa unahusiana na swali hili. Unawahusu Masadukayo ambao, huku wakiwa hata hawausadiki ufufuo, walimjia Yesu wakijaribu kumtega. Wao walitokeza tatizo hili kuhusu ndoa ya kishemeji: “Kulikuwa na ndugu saba. Wa kwanza alioa mke, akafa hana mtoto; na wa pili... hata wa tatu akamwoaa na kadhalika wote saba, wakafa, wasiache watoto. Mwisho akafa yule mke naye. Basi, katika ufufuo atakuwa mke wa yupi?”​—Luka 20:27-33; Mathayo 22:23-28.

Wakristo hawako chini ya Sheria, lakini tatizo linalofanana na hilo lingeweza kutokezwa kuwahusu. Kwa mfano: Ndugu na Dada C​——​ walikuwa wamefunga ndoa na wakawa na watoto wawili. Kisha Ndugu huyo akafa. Dada C​——​ alimpenda na kumkosa sana, lakini alihisi uhitaji wa mwandamani, utegemezo wa kifedha, wonyesho wa kingono, na msaada wa watoto. Kwa hiyo akaolewa na Ndugu M​——, mwungano ambao ulikuwa wa Kimaandiko kama ule wa kwanza. Baadaye mume akawa mgonjwa akafa. Ikiwa wenzi hao wa kwanza wangefufuliwa na ndoa iwezekane, mke huyo angeolewa na nani?

Lifikirie jibu la Yesu kwa Masadukayo: “Wana wa ulimwengu huu huoa na kuolewa; lakini, wale wahesabiwao kuwa wamestahili kuupata ulimwengu ule, na kule kufufuka katika wafu, hawaoi wala hawaolewi; wala hawawezi kufa tena; kwa sababu huwa [kama] malaika, nao ni wana wa Mungu, kwa vile walivyo wana wa ufufuo. Lakini, ya kuwa wafu hufufuliwa, hata na Musa alionyesha . . . alipomtaja [Yehova] kuwa ni Mungu wa Ibrahimu, na Mungu wa Isaka, na Mungu wa Yakobo. Naye si Mungu wa wafu, bali wa walio hai; kwa kuwa wote huishi kwake“——Luka 20:34-38; Mathayo 22:29-32.

Wengine wamehisi kwamba hapa Yesu alikuwa akielekeza kwenye ufufuo wa kimbingu7. Hata hivyo kuna sababu za kusadiki kwamba jibu lake lilihusu ufufuo wa kidunia katika “ulimwengu” (“mfumo wa mambo,” NW) unaokuja. Ni sababu zipi ambazo ni msingi wa maoni haya? Wale waliokuwa wakimhoji Yesu hawakuwa wenye kumsadiki wala hawakujua kuhusu ufufuo wa kimbingu. Wao waliuliza kuhusu jamaa fulani ya Kiyahudi chini ya Sheria. Kwa kujibu Yesu alielekeza kwa Abrahamu, Isaka, na Yakobo, wanaume ambao walitumaini kupata tena uzima duniani. (Mwanzo 42:38; Ayubu 14:13-15; linganisha Waebrania 11:19.) Wazee hao wa ukoo, na mamilioni ya wengine, ambao wanafufuliwa duniani na wanathibitika kuwa waaminifu watakuwa “[kama] malaika.” Ijapokuwa wana nafsi inayoweza kufa, hawatakufa mara tu Mungu akiisha kuwatangaza rasmi kuwa waadilifu ili wapate uzima usio na kikomo.

Leo maono ya moyoni ya kibinadamu huenda yakafanya jambo hili kuwa gumu kukubali. Lakini inapasa kuangaliwa kwamba hakuna mahali po pote Biblia inaposema kwamba kufufua kwa Mungu wale walio waaminifu kunamaanisha kurudisha hali yao ya ndoa. Kwa sababu hiyo, hakuna mtu anayesadiki kwamba ikiwa Akila na Prisila wamepata uzima mbinguni, wameirudia ndoa yao. (Matendo 18:2) Wala Yusufu na Mariamu hawatarudia ndoa yao, ambao kwa wazi wataishi katika milki tofauti-tofauti—Yusufu duniani na Mariamu mbinguni. (Yohana 19:26; Matendo 1:13, 14) Kwa kuwa hakuna mmoja wetu amepata kuishi mbinguni, hatuwezi kusema ni hisia gani ambazo Akila, Prisila, na Mariamu huenda wakawa nazo, hata hivyo tunaweza kuwa na uhakika kwamba wao watapata uradhi kamili katika utumishi wao wa kimbingu.

Vivyo hivyo, sisi hatujapata kamwe kuishi kama wanadamu wakamilifu. Hivyo hatuwezi kuwa na uhakika tutakavyohisi kuhusu husiano zilizopita tukipata au tupatapo uzima mkamilifu wa kibinadamu katika paradiso. Ni jambo zuri kwetu kukumbuka kwamba wakati Yesu alipoyasema maneno hayo yeye alikuwa mwanadamu mkamilifu na hivyo alikuwa katika hali nzuri kuliko yetu kuthamini hisia za wale ambao “wamehesabiwa kuwa wanastahili kuupata ulimwengu ule.” Pia tunaweza kutumaini kwamba Yesu anaweza ‘kuchukuana nasi katika mambo yetu ya udhaifu.’ (Waebrania 4:15) Hivyo Mkristo akiliona kuwa jambo gumu kukubali neno-mkataa la kwamba watakaofufuliwa hawataoa au kuolewa, anaweza kuwa na uhakika kwamba Mungu na Kristo ni wenye ufahamu. Naye anaweza kungojea tu aone litakalotokea.

Sasa hakuna sababu ya kukazia habari hii kupita kiasi. Mtunga zaburi aliandika: “Jueni kwamba [Yehova] ndiye Mungu; ndiye aliyetuumba na sisi tu watu wake; tu watu wake, na kondoo wa malisho yake. . . . Mshukuruni, lihimidini jina lake; kwa kuwa [Yehova] ni mwema”(Zaburi 100:3-5) Hakika Mungu wetu mwema ataandaa mahitaji yetu ya kweli kwa wingi ikiwa ‘tutahesabiwa kuwa tunastahili kupata ulimwengu ule.’​—Ayubu 34:10-12; Zaburi 104:28; 107:9.

Pia wema wa Mungu unaonyeshwa katika kutujulisha sisi kwamba kifo cha mwenzi kinaimalizia ndoa. (Warumi 7:2) Hivyo mtu ye yote ambaye amepoteza mwenzi anaweza kujua kwamba yeye yu huru kuoa au kuolewa tena sasa, ikiwa jambo hilo linaonekana kuwa linahitajiwa au ndilo bora zaidi. Wengine wameoa au kuolewa tena, jambo hilo likasaidia kutimiza mahitaji ya kisasa yao wenyewe na yale ya jamaa yao. (1 Wakorintho 7:36-38; Waefeso 6:1-4) Kwa hiyo, Mkristo ambaye mwenzi wake amekufa asihisi kuwa na wajibu wa kubaki bila mwenzi sasa kwa kuwa na tazamio kuhusu mfumo unaokuja kwamba waliokuwa wenzi wa ndoa wataunganishwa tena katika ufufuo wa uzima hapa duniani.

[Maelezo ya Chini]