Maoni ya Biblia

Una Thamani Machoni pa Mungu!

“NIMEKUWA NIKISUMBULIWA NA HISIA ZA KUTOJISTAHI KATIKA MUDA MWINGI WA MAISHA YANGU,” AKAANDIKA MWANAMKE MMOJA MKRISTO. “HATA NIWE NAMPENDA YEHOVA KADIRI GANI AU NIFANYE JITIHADA KADIRI GANI KUMTUMIKIA, SIKUZOTE MIMI HUHISI HAITOSHI.”

JE, UNAMJUA mtu fulani ambaye hupambana na hisia nyingi sana za kutofaa au kutojistahi? Au je, wewe mwenyewe hupatwa na hisia hizo nyakati fulani? Hisia hizo ni za kawaida hata miongoni mwa watumishi waaminifu wa Mungu. Hakuna mtu asiyepatwa na athari za kuishi katika “nyakati [hizi] za hatari zilizo ngumu kushughulika nazo.” Wengi wamepuuzwa na kutendwa vibaya na watu “wasio na hali ya kujidhibiti, wakali, wasio na upendo wa wema”—tabia ambazo zimeenea sana katika “siku za mwisho.” (2 Timotheo 3:1-5) Mambo hayo yenye kuhuzunisha yaweza kusababisha makovu ya kihisia-moyo, yakisababisha hisia za kutojistahi kabisa.

Katika visa vingine, huenda hisia zisizofaa zikasababishwa na watu kujiwekea viwango vya juu sana. Kutoweza kufikia viwango hivi huimarisha hisia ya kwamba wao kamwe si watoshelevu vya kufaa. Hata sababu iwe ni gani, wale wanaopambana na hisia za kutojistahi huenda wasione kwa urahisi sababu inayomfanya Mungu—au mtu mwingine yeyote, kama ilivyo—awapende. Kwa kweli, huenda hata wakaamini kwamba hawapendeki tu.

Lakini Yehova Mungu hahisi hivyo! Katika Neno lake, Yehova hutuonya tujilinde dhidi ya “mbinu za udanganyifu” za Mpinzani wake, Shetani Ibilisi. (Waefeso 6:11, Jewish New Testament) Shetani hutumia mbinu zake za udanganyifu ili ajaribu kutuzuia kumwabudu Mungu wetu. Kwa sababu hiyo, Shetani huchochea hisia ya kutojistahi, kwamba Yehova hangeweza kamwe kupendezwa nasi. Lakini Shetani ni “mwongo”—kwa hakika, “baba ya uwongo.” (Yohana 8:44) Kwa hiyo, hatupaswi kuongozwa vibaya na mbinu zake za udanganyifu! Katika Biblia, Yehova hujisemea mwenyewe, akituhakikishia jinsi tulivyo wenye thamani machoni pake.

Maoni Yaliyosawazika Kuhusu Thamani Yetu

Biblia huonya juu ya matokeo mabaya yanayoweza kutupata kwa sababu ya kuvunjika moyo. Mithali 24:10 husema: “Ukizimia siku ya taabu, nguvu zako ni chache.” Tunapokuwa na hisia zisizofaa kwa muda mrefu tunaweza kupoteza nguvu, na kuhisi tukiwa dhaifu na kudhurika kimwili. Bila shaka unafahamu kwamba Shetani ajua vema jambo hilo. Inakuwa vigumu sana moyo wetu unapolemewa na hisia za kutojistahi. Hata hivyo, Shetani anapojaribu kutumia kwa faida yake hisia hizo, hali huwa yenye kulemea hata zaidi.

Hivyo basi, ni jambo la maana kwamba tuwe na maoni yanayofaa na yaliyosawazika kuhusu thamani tuliyo nayo. “Naambia kila mtu huko miongoni mwenu,” akasihi sana mtume Paulo, “asijifikirie mwenyewe zaidi kuliko ilivyo lazima kufikiri; bali afikiri ili awe na akili timamu.” (Waroma 12:3) Tafsiri nyingine inafasili maneno haya kama ifuatavyo: “Mimi ningesema kwa kila mmoja wenu asijikadiri mwenyewe kuwa wa juu ya thamani yake halisi, bali afanye ukadirio wa fahamu timamu kuhusu yeye mwenyewe.” (Charles B. Williams) Hivyo, andiko latutia moyo tuwe na maoni yaliyosawazika kujielekea. Kwa upande mmoja, lazima tujilinde dhidi ya kiburi; kwa upande mwingine, tujaribu tusiegemee sana upande ule mwingine, kwa kuwa Paulo adokeza kwamba ili kuwa na akili timamu, ni lazima kufikiri jambo fulani juu yetu wenyewe. Naam, chini ya upulizio wa kimungu Paulo aonyesha kwamba kila mmoja wetu ana thamani machoni pa Yehova.

Maneno ya Yesu pia yadokeza hisia ya kujistahi kwa njia yenye usawaziko aliposema: “Lazima umpende jirani yako kama wewe mwenyewe.” (Mathayo 22:39) Maneno “kama wewe mwenyewe” yaonyesha kwamba lazima uwe na hisia fulani za kuona kuwa una thamani, au kujistahi. Ni kweli kwamba tuna makosa na tunakosea. Lakini tunapojitahidi kumpendeza Mungu, tunaposikitikia kasoro zetu na kumwomba msamaha, bado tunaweza kujistahi kwa kiasi fulani. Huenda mioyo yetu yenye kutuchambua ikachochea hisi zilizo kinyume na hizo, lakini kumbuka kwamba, “Mungu ni mkubwa zaidi kuliko mioyo yetu.” (1 Yohana 3:20) Yaani, Yehova hutuona katika njia ambayo yaweza kuwa tofauti sana na jinsi tunavyojiona.

Mioyo Iliyovunjika, Roho Zilizopondeka

Mtunga-zaburi Daudi aliandika: “BWANA yu karibu nao waliovunjika moyo, na waliopondeka roho huwaokoa.” (Zaburi 34:18) Kikitoa maelezo kuhusu mstari huu, kichapo cha Matthew Henry’s Commentary on the Whole Bible chasema: “Tabia ya waadilifu huwa . . . kwamba wamevunjika moyo na roho yenye majuto, ambayo, imenyenyekezwa na dhambi, na kukosa kujistahi; wao ni wenye kiasi, na hawana uhakika kuhusu wema wao wenyewe.”

Wale ambao “wamevunjika moyo” au “kupondeka roho” huenda wakahisi kuwa Yehova yuko mbali sana nao na kwamba wao ni duni sana kuweza kuhangaikiwa na Yehova. Lakini hivyo sivyo ilivyo. Maneno ya Daudi yanatuhakikishia kwamba Yehova hawaachi wale “wenye kiasi.” Mungu wetu mwenye huruma anajua kwamba katika nyakati hizo tunamhitaji sana kuliko wakati mwingine wowote, na yuko karibu.

Fikiria kielelezo kimoja. Miaka kadhaa iliyopita mama mmoja alimkimbiza mwana wake mwenye umri wa miaka miwili hospitalini kwa sababu alikuwa anaugua ugonjwa mbaya sana wa kifaduro. Baada ya kumchunguza mvulana huyo, madaktari walimweleza mama kwamba angehitaji kulazwa hospitalini usiku huo. Mama huyo alilala wapi usiku huo? Kwenye kiti katika chumba cha hospitali, kando ya kitanda cha mwanawe. Mvulana wake mdogo alikuwa mgonjwa, na alihitaji kuwa karibu naye. Kwa kweli, tunaweza kutarajia mengi zaidi kutoka kwa Baba yetu wa kimbingu mwenye upendo, ambaye tumeumbwa kwa mfano wake! (Mwanzo 1:26; Isaya 49:15) Maneno yenye kugusa hisia ya Zaburi 34:18 yatuhakikishia kwamba tunapokuwa ‘tumevunjika moyo,’ Yehova, kama mzazi mwenye upendo, “yu karibu”—akituchunguza daima, akitupa uangalifu, na tayari kutusaidia.—Zaburi 147:1, 3.

“Nyinyi Ni Bora Zaidi Kuliko Shore Wengi”

Katika huduma yake ya kidunia, Yesu alifunua mengi kuhusu mawazo na hisia za Yehova, kutia ndani jinsi ambavyo Yehova huhisi juu ya watumishi Wake wa kidunia. Yesu aliwahakikishia wanafunzi wake mara nyingi kwamba wana thamani machoni pa Yehova.—Mathayo 6:26; 12:12.

Kwa mfano, akitoa kielezi cha thamani ya kila mmoja wa wanafunzi wake, Yesu alisema: “Je, shore wawili hawauzwi kwa sarafu ya thamani ndogo? Na bado hakuna hata mmoja wao atakayeanguka kwenye ardhi bila Baba yenu kujua. Lakini nywele zenyewe za kichwa chenu zimehesabiwa zote. Kwa hiyo msiwe na hofu: Nyinyi ni bora zaidi kuliko shore wengi.” (Mathayo 10:29-31) Fikiria maneno hayo yalimaanisha nini kwa wasikilizaji wa Yesu wa karne ya kwanza.

Kwa wazi shore walikuwa miongoni mwa ndege wa bei ya chini zaidi waliotumiwa kwa chakula. Kwa kawaida ndege hawa wadogo walikwanyuliwa, wakabanikwa kwenye vijiti, na kuchomwa kama mishikaki. Bila shaka Yesu alikuwa amewaona wanawake maskini huko sokoni wakihesabu sarafu zao kuona ni shore wangapi ambao wangeweza kununua. Ndege hao walionwa kuwa wenye thamani ndogo sana hivi kwamba kwa sarafu ya thamani ndogo (kihalisi asarioni, ya thamani inayopungua senti tano za Marekani), mtu angeweza kununua shore wawili.

Yesu alirudia kutaja kielezi hicho baadaye—lakini kikiwa tofauti kidogo. Kulingana na Luka 12:6, Yesu alisema: “Shore watano huuzwa kwa sarafu mbili za thamani ndogo, sivyo?” Fikiri juu ya hilo. Kwa sarafu ya thamani ndogo mnunuzi alipata shore wawili. Lakini ikiwa alikuwa tayari kutumia sarafu mbili, alipata shore watano badala ya wanne. Ndege wa ziada alikuwa bahashishi katika mapatano hayo ya kibiashara kana kwamba hakuwa na thamani yoyote. “Na bado,” akasema Yesu, “hakuna hata mmoja wao [hata yule aliyetolewa kama bahashishi kwenye mapatano ya kibiashara] hupata kusahaulika mbele ya Mungu.” Akitumia kielezi hicho, Yesu alimalizia: “Nyinyi ni bora zaidi kuliko shore wengi.” (Luka 12:7) Lazima maneno hayo yawe yaliwatia moyo wasikilizaji wake kama nini!

Je, unapata maana ya kielezi cha Yesu chenye kuchangamsha? Ikiwa Yehova huona hata ndege wadogo kuwa wenye thamani, lazima watumishi wake wa kidunia wawe wenye thamani hata zaidi kwake! Kila mmoja wetu ana thamani mbele za Yehova hata tunapokuwa miongoni mwa umati. Kila mmoja wetu ni mwenye thamani kwa Yehova hivi kwamba yeye hujua hata mambo madogo kutuhusu—nywele za vichwa vyetu zimehesabiwa zote.

Bila shaka, Shetani ataendelea kutumia “mbinu [zake] za udanganyifu”—kama vile kujifaidi kwa kutumia hisia za kutojistahi—ili kutufanya tuache kumtumikia Yehova. Lakini usimruhusu Shetani ashinde! Mkumbuke mwanamke Mkristo aliyenukuliwa mwanzoni. Alisaidiwa na makala moja katika gazeti la Mnara wa Mlinzi lililotoa onyo kuhusu jitihada za Shetani za kujifaidi kwa kutumia hisia zetu.a Yeye asema: “Sikuwa nimetambua kamwe kwamba Shetani hujaribu kutumia hisia zangu kunivunja moyo. Kujua jambo hilo hunisaidia kupigana na hisia hizo. Sasa naweza kujilinda dhidi ya mashambulizi haya ya kishetani, nikiwa na uhakika.”

Yehova “ajua mambo yote.” (1 Yohana 3:20) Naam, yeye ajua mambo tunayovumilia sasa. Pia anajua mambo yaliyotupata wakati uliopita ambayo huenda yaliharibu kujistahi kwetu. Kumbuka, jambo la maana ni jinsi Yehova anavyotuona! Hata tufikiri kuwa sisi ni watu wasiopendeka au wasio na thamani kadiri gani, Yehova hutupa uhakikisho kwamba kila mmoja wa watumishi wake ni mwenye thamani kwake. Tunaweza kutumaini neno la Yehova, kwa kuwa, tofauti na Mpinzani wake, Mungu “hawezi kusema uwongo.”—Tito 1:2.

[Maelezo ya Chini]

[Blabu katika ukurasa wa 12]

Kama mzazi mwenye upendo, Yehova yu karibu na wale waliohuzunika moyo

[Picha katika ukurasa wa 13]

Ikiwa Yehova hasahau shore, angewezaje kukusahau?

[Hisani]

Lydekker

Illustrated Natural Historyy