Maisha na Huduma ya Yesu

Uhakika Katika Siku za Mwisho

JUMANNE, Nisani 11, ikaribiapo kumalizika, Yesu yu pamoja na mitume wake juu ya Mlima wa Mizeituni. Hivi karibuni tu wameondoka kwenye eneo la hekalu, ambalo wao waweza kuliona chini, na Yesu amekuwa akizungumza nao ishara ya kuwapo kwake katika mamlaka ya Ufalme na ya mwisho wa mfumo wa mambo.

Akiendelea na maelezo yake, Yesu awaonya juu ya kukimbilia Makristo wa bandia. Yeye asema majaribio yatafanywa ‘kuwapoteza, kama yamkini, hata walio wateule.’ Lakini, kama tai wenye kuona mbali, wateule hawa watakusanyika mahali palipo na chakula cha kiroho kilicho cha kweli, yaani, pamoja na Kristo wa kweli kwenye kuwapo kwake kusikoonekana. Hawatakengeushwa na kukusanywa pamoja kwenye Kristo wa bandia.

Makristo wa bandia waweza kutokea kwa njia yenye kuonekana tu. Tofauti na hivyo, kuwapo kwa Yesu kutakuwa kusikoonekana. Kutatukia wakati wa kuogopesha sana katika historia ya kibinadamu, kama alivyosema Yesu: “Jua litatiwa giza, na mwezi hautatoa mwanga wake.” Ndiyo, hiki kitakuwa ndicho kipindi chenye giza lililo jeusi kupita vyote vya kuwako kwa ainabinadamu itakuwa kana kwamba jua limetiwa giza wakati wa mchana, na kana kwamba mwezi haukutoa nuru yao wakati wa usiku.

Yesu aendelea kusema, “Nguvu za mbinguni zitatikisika.” Hivyo aonyesha kwamba mbingu halisi zitakuwa na sura yenye dalili za matazamio mabaya. Mbingu hazitakuwa milki ya nyuni tu, bali zitajawa na ndege za vita, roketi, vipekuzi vya anga za juu. Hofu na jeuri itazidi kitu chochote kilichoonwa katika historia iliyotangulia ya kibinadamu.

Yesu asema tokeo la jambo hilo ni kwamba kutakuwako “dhiki ya mataifa wakishangaa kwa uvumi wa bahari na msukosuko wake; watu wakivunjika mioyo kwa hofu, na kwa kutazamia mambo yatakayoupata ulimwengu.” Kweli kweli, kipindi hiki kilicho na giza jeusi kuliko vyote vya kuwako kwa kibinadamu kitaongoza kwenye wakati ambao, kama alivyosema Yesu, “ndipo itakapoonekana ishara yake Mwana wa Adamu mbinguni; ndipo mataifa [makabila, NW] yote ya ulimwengu watakapoomboleza.”

Lakini si wote watakaokuwa wanaomboleza wakati ‘Mwana wa Adamu ajapo na nguvu’ kuharibu mfumo huu mbovu wa mambo “Wateule,” wale 144,000 watakaoshiriki pamoja na Kristo katika Ufalme wake wa kimbingu, hawataomboleza, wala waandamani wao, wale ambao mapema kidogo Yesu aliwaita “kondoo wengine” wake. Wajapokuwa wanaishi katika kipindi kilicho na giza jeusi kuliko vyote vya historia ya kibinadamu, hawa huitikia kitiamoyo cha Yesu: “Mambo hayo yaanzapo kutokea, changamkeni, mkaviinue vichwa vyenu, kwa kuwa ukombozi wenu umekaribia.”

Ili wanafunzi wake ambao wangekuwa wanaishi katika siku za mwisho waweze kupambanua ukaribu wa mwisho, Yesu atoa kielezi hiki: “Utazameni mtini na miti mingine yote. Wakati iishapo kuchipuka, mwaona na kutambua wenyewe ya kwamba majira ya mavuno yamekwisha kuwa karibu. Nanyi kadhalika, mwonapo mambo hayo yanaanza kutokea, tambueni ya kwamba ufalme wa Mungu u karibu. Amin, nawaambieni, Kizazi hiki hakitapita hata hayo yote yatimie.”

Hivyo, wanafunzi waonapo zile sehemu nyingi tofauti-tofauti za ishara zikitimizwa, yawapasa wang’amue kwamba mwisho wa mfumo wa mambo uko karibu na kwamba karibuni Ufalme wa Mungu utafutilia mbali uovu wote. Kwa uhakika, mwisho utatukia katika muda-maisha wa watu waonao utimizo wa mambo ambayo Yesu atabiri! Akishauri wanafunzi wale ambao wangekuwa hai wakati wa siku za mwisho zenye umaana mkubwa, Yesu asema:

“Jiangalieni, mioyo yenu isije ikalemewa na ulafi, na levi, na masumbufu ya maisha haya; siku ile ikawaghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima. Basi, kesheni ninyi kila wakati, mkiomba, ili mpate kuokoka katika hayo yote yatakayotokea, na kusimama mbele za Mwana wa Adamu.” Mathayo 24:23-51; Marko 13:21-37; Luka 21:25-36; Ufunuo 14:1, 3; Yohana 10:16.

◆ Ni hali gani za ulimwengu ambazo zatia alama kuwapo kwa Kristo?

◆ Ni wakati gani ‘mataifa yote ya ulimwengu yataomboleza,’ lakini wafuasi wa Kristo watakuwa wanafanya nini?

◆ Yesu aandaa kielezi gani kusaidia wanafunzi wake wa wakati ujao kufahamu wakati mwisho uko karibu?

◆ Ni shauri gani ambalo Yesu aandaa kwa ajili ya wale ambao kati ya wanafunzi wake wangekuwa wanaishi katika siku za mwisho?