Badiliko la Utawala Karibuni!

WATU walio wengi wamesahau kuangalia jambo lililo la maana kabisa. Ndilo hili: Katika kung’ang’ania uongozi wa ulimwengu, mataifa yenye kushindana yameshindwa kutambua kwamba kuna mamlaka na nguvu kubwa kuliko ile yao. Wao wanapuuza jambo la kwamba “Aliye juu [anamiliki] katika ufalme wa wanadamu, naye humpa yeye amtakaye, awaye yote.” (Danieli 4:25) Ni nani huyu ambaye Mungu Mwenye Nguvu Zote anachagua awe Mfalme juu ya dunia? Ni wakati gani yeye anapopokea uongozi wa ulimwengu?

Bado Kuna Mfalme Mwingine

Kabla ya kutoa unabii juu ya ‘mfalme wa kaskazini na mfalme wa kusini,’ Danieli alipata njozi hii ya kiunabii kuhusu mfalme aliyechaguliwa na Mungu: “Mmoja aliye mfano wa mwanadamu akaja pamoja na mawingu ya mbingu akamkaribia huyo mzee wa siku [Yehova Mungu], wakamleta karibu naye . . . Naye akapewa mamlaka, na utukufu, na ufalme ili watu wa kabila zoe, na taifa zote, na lugha zote, wamtumikie; mamlaka yake . . . haitapita kamwe, na ufalme wake ni ufalme usioweza kuangamizwa.​—Danieli 7:13, 14

Njozi hiyo ilisonga mbele ikazifananisha na wanyama serikali za ulimwengu zenye kufuatana mfululizo. Na, kwa kweli, “mwanadamu ametawala mwanadamu kwa kumdhuru” akitumia ukatili wa kinyama. (Mhubiri 8:9, NW) Wanadamu wametawala pia chini ya uongozi wa kinyama wa wakuu ambao ni roho waasi, yule mkubwa kati yao akiwa ni Shetani mwenyewe. (Danieli 7:17; 10:13; Linganisha Ufunuo 12:9; 13:2-4.) Tofauti na hivyo, “mmoja aliye mfano wa mwanadamu” anapokea mamlaka ya kutawala kutoka kwa Yehova Mungu. Mtawala huyo aliyewekwa rasmi na Mungu ana sifa zinazofaa mtu mwenye kutawala wanadamu ambao hapo kwanza walifanywa “kwa mfano wa Mungu.” (Mwanzo 1:27) Lakini yeye ni nani?

Yesu aliutumia mtajo “mwanadamu” kuhusu yeye mwenyewe alipokuwa duniani miaka 1,900 iliyopita. Akiwa mwanadamu wakati huo, kwa uhalisi yeye alikuwa “Mwana wa Adamu,” naye alionyesha kwa ukamilifu sifa nzuri kama vile upendo, huruma, na haki. Pia alitoa uhai wake akomboe wanadamu, hivyo akatimiza kile cheo cha kuwa mtu wa ukoo aliye na uhusiano wa karibu zaidi na wanadamu​—“Mwana wa Adamu kweli kweli.”​—Mathayo 20:28 Waebrania 2:11-17.

Akiendelea kuutumia unabii wa Danieli, Yesu alisema: “Nao watamwona Mwana wa Adamu akija juu ya mawingu ya mbinguni pamoja na nguvu na utukufu mwingi.” Baadaye alijifananisha mwenyewe akiwa katika hali kama hiyo, akisema: “Hapo atakapokuja Mwana wa Adamu katika utukufu wake, . . . ndipo atakapoketi katika kiti cha utukufu wake.” (Mathayo 24:30; 25:31) Leo Yesu si mwanadamu wa kawaida tu duniani. Tangu kufa na kufufuliwa kwake mwaka 33 W.K., yeye amekuwa roho wa kimbingu aliye katika mfano wa Mungu. Tofauti na watawala wa kibinadamu, yeye tu ndiye Mfalme ambaye “hapatikani na mauti, amekaa katika nuru isiyoweza kukaribiwa; wala hakuna mwanadamu aliyemwona, wala awezaye kumwona.” (1 Timotheo 6:16) Utawala wa Ufalme wake hautakuwa na zile sifa za kinyama za roho waovu ambao wameingiza uvutano wao katika serikali za kibinadamu.

Hivyo Yesu ndiye peke yake Mfalme aliyewekwa rasmi na Mungu awe Masihi Wake, au Kristo, na aliyepewa mamlaka ya kutawala dunia nzima. (Danieli 7:14) Hivyo inamaanisha kwamba serikali zote za kibinadamu, kutia na “mfalme wa kaskazini” na “mfalme wa kusini,” ni lazima zifikie mwisho na mahali pazo pachukuliwe na Ufalme wa Mungu ukiwa chini ya utawala wa Kristo.​—Danieli 2:44; Linganisha Zaburi 2:7, 8, 12.

Yule “Mwana-Mfalme” Anapata Mamlaka

Lakini, Yesu hakuanza utawala wake juu ya wanadamu mwaka 33 W.K. Alikuwa na kipindi cha kungoja. Ni baada ya hapo tu kwamba Yehova alimpa uwezo wa ‘kwenda hali akitiisha katikati ya adui zake.’ (Zaburi 110:1, 2; Matendo 2, 32-36, NW) Akitabiri jambo hilo, Danieli alisema: “Wakati huo Mikaeli atasimama, mwana-mfalme . . . na kwa hakika kutatukia na wakati wa dhiki, kama ile ambayo haijafanywa kutukia tangu kulipokuja kuwako taifa mpaka wakati huo.”​—Danieli 12:1, NW.

Unabii huo ulitolewa baada ya Danieli kuonyesha kwamba kule kung’ang’ana kati ya “mfalme wa kaskazini” na “mfalme wa kusini” katika “wakati wa mwisho” uliopo sasa kungekuwa kukiendelea kufikia upeo. Kufikia hatua hiyo, mmoja wa ‘wafalme’ hao ‘angesonga mbele akiwa amewaka hasira kuu’ ili kuangamiza watu wengi. (Danieli 11:40, 44, 45, NW) Hapo ndipo Mikaeli “asimamaye upande wa” watu wa Mungu mwenyewe, angechukua hatua ya kukata maneno ili watu hao waweze kuokoka.​—Linganisha Danieli 11:2, 3, 7, 20, 21; 12:1.

Ingawa hivyo, jambo hilo linahusianaje na Yesu? Kumbuka kwamba Yeye alitia ndani unabii wa Danieli pamoja na dai lake mwenyewe la kuwa Mfalme katika wakati ambao ungekuja. Katika habari hii alisema pia juu ya “dhiki kubwa” isiyo na ulinganifu. (Mathayo 24:21, 29-31) Kwa wazi yeye alikuwa akielekeza kwenye “wakati wa dhiki” ambao Danieli alitaja kuhusiana na Mikaeli. (Linganisha Mathayo 24:15; Danieli 11:31.) Hivyo Yesu alijitambulisha kuwa ndiye Mikaeli ambaye angesimama atawale.

Yesu na Danieli walitoa unabii huo wakieleza matukio ambayo yangetendeka “wakati wa mwisho.” Matukio hayo yametimizwa kwa njia ya kustaajabisha tangu mwaka 1914. Wakati huo Yesu alipata mamlaka katika mbingu akiwa Mfalme, naye amekuwa akitawala katikati ya adui zake.​—Mathayo 24:3, 7-12.

Paradiso ya Duniani Pote—Karibuni!

Labda wewe unajua kwamba mataifa yamekataa kuutambua ule Ufalme wa Kristo. Yanaukataa ujumbe unaohusu kusimamishwa kwa Ufalme huo na wanaendelea kudai kwamba wana enzi zao wenyewe. Ujumbe huo ni upumbavu kwao. Hivyo “wenye kuitawala dunia hii hawaijui hata mmoja” ile hekima ya Mungu katika kuchagua Kristo awe Mfalme. Kwa kupofushwa na mfumo unaoongozwa na Shetani, na wakuu wake walio roho waasi, wao wanajikuta wakipinga ule Ufalme wa Kimasihi.​—1 Wakorintho 2:8; linganisha Luka 4:5, 6; 1 Wakoritho 4:4.

Kwa hiyo, kama vile Yesu alivyotabiri, wale wanaohubiri Ufalme wake kwa uaminifu wanateswa. Na bado watapatwa na shambulio lililo kubwa zaidi. (Mathayo 24:9, 14; Danieli 11:44, 45; linganisha Ezekieli 34:14-16.) Ingawa hivyo, Yesu atatokeza akiwa ‘Mfalme wa wafalme na Bwana wa mabwana’ ili apigane kwa ajili ya watu wake. Pigano hilo litafikia mwisho kwa kupata ushindi kamili kwa ajili ya Mfalme mchaguliwa wa Mungu. Wenye kushambulia watu wake ‘watakuja njia yote hiyo wafikie mwisho wao, wala hakutakuwa na msaidiaji kwa ajili yao.’ Na ‘wafalme’ wengine wote watakuwa wameangamizwa.​—Ufunuo 11:15, 18; 19:11, 16, 19-21; Zaburi 2:1-3, 6-9.

Kwa kuwa “wakati wa mwisho” ulianza mwaka wa 1914, sasa umesonga mbele sana. Yesu alisema kwamba kizazi kilichouona mwanzo wa wakati huo kingeuona pia mwisho wake. (Mathayo 24:32-24) Basi, Tunakaribia, kwa haraka sana ule wakati mtukufu ambapo Kristo Yesu atachukua kwa ukamili utawala wa mambo ya dunia kisha aunganishe katika umoja wanadamu wote watiifu chini ya serikali yake moja.

Ndiyo, kutakuwa na mabadiliko ya utawala karibuni. Lakini jambo hilo litamaanisha nini kwako wewe? Lingeweza kumaanisha kwamba wakati ujao utamalizika pamoja na serikali za sasa za kibinadamu na wenye kuziunga mkono. Au, ikitegemea mwendo utakaochukua, lingeweza kumaanisha uzima wa milele na usalama katika paradiso ya kidunia, yenye kuendelezwa na kuongozwa na Ufalme wa Mungu. Inaweza kuwa hivyo ikiwa unaunga mkono kwa ushikaminifu utawala wa Kristo pamoja na mamilioni ya Mashahidi wa Yehova ulimwenguni pote.