Mweneo Mkubwa Ajabu wa Wema wa Mungu
MUNGU ni mwema! Ni mara ngapi wewe umesikia maneno hayo au hata ukayatumia wewe mwenyewe? Lakini je! ulipata kufikiria kwa ukamili mweneo mkubwa ambao wema wa Mungu umekuwa nao kwa ajili yako? Utafakari huo waongeza kina cha uthamini wetu kuhusu aina ya Mungu ambaye sisi twaabudu.
Ingawa hivyo, twahitaji kuelewa wema ni nini. Bila shaka, wema ni ile sifa ya kuwa mwema kinyume cha kuwa mwovu. Lakini wema ni zaidi ya hilo. Ni sifa yenye utendaji. Mtu mwema hufanya mema. Na Mungu, katika wema wake, hutufanyia sisi mambo mengi mema hivi kwamba mioyo yetu humchangamkia yeye.
Upana wa wema wa Mungu waonwa katika maneno yake kwa Musa akiwa katika jangwa la Sinai. Huko, yeye alimwahidi hivi mtumishi wake mwenye imani: “Mimi mwenyewe nitasababisha wema wangu wote upite mbele ya uso wako.” Akitimiza ahadi hiyo na kutumia jina lake mwenyewe, Mungu asema zaidi hivi: “Yehova, Yehova, Mungu mwenye rehema na neema, wa polepole kuwa na kasirani na mwingi katika fadhili-upendo na ukweli, akihifadhi fadhili-upendo kwa ajili ya maelfu, akiwia radhi kosa na mvunjo wa amri na dhambi, lakini kwa vyovyote yeye hatatoa mwepuko wa adhabu.”—Kutoka 33:19; 34:6, 7, NW.
Kwa hiyo, wema wa Mungu wahusisha ndani rehema yake na pia neema yake, fadhili-upendo alizo nazo, na ukweli wake. Kwa kuongezea, wema wake waonwa katika jambo la kwamba yeye ni “wa polepole kuwa na kasirani,” ni mstahimilivu. Ingawa hivyo, hiyo haimaanishi kwamba yeye ni kama mzazi mwenye uendekevu wa kupita kiasi, akiruhusu dhambi iendelee milele bila kuzuiwa. “Kwa vyovyote yeye hatatoa mwepuko wa adhabu” kwa watenda dhambi wasiotubu. Mungu mwema hawezi kuruhusu uovu uwepo bila kuzuiwa.
Wingi wa Wema wa Mungu
Sasa, fikiria baadhi ya njia ambazo Mungu ameonyesha wema wake. Kwanza, yeye alikuwa mwema kwa wanadamu alipoumba dunia kwanza. Hakuandaa mahitaji yaliyo ya msingi tu kwa uhai wa kibinadamu. Bali, aliipa sayari vipawa vya kufanya kuwe na upendezi halisi kuishi humo. Alitoa chakula na kinywaji kwa unamna-namna mkubwa. Alifanyiza wanyama na nyuni mbalimbali wenye uvutio mwingi, na aliumba maua ambayo huongezea urangirangi na uzuri kwenye mazingira yetu. Tena, alifanyiza aina nyingi tofauti za mandhari ambazo hupendeza macho. Naam, kila wakati tuonapo machweo yenye utukufu au mfanyiko wa wingu la kutazamisha sana, hapo sisi huwa tukiona ushuhuda wa wema wa Mungu!
Alipoumba mwanamume na mwanamke, wema wa Mungu ulionwa tena. Yeye aliwapa Adamu na Hawa miili mikamilifu yenye afya na kuwapa mwanzo tayari katika bustani ya Edeni. Ndipo alipowapa agizo la kusisimua lililo na wito wa ushindani: “Jazeni dunia na kuitiisha.” Hivyo, yeye aliweka mbele yao tazamio la kuwa na shangwe ya milele kuhusu maisha katika dunia-paradiso wakiwa miongoni mwa wazao wao wengi. (Mwanzo 1:26-28; 2:7-9) Lo, zawadi ya arusi iliyo nzuri kama nini kwa mume na mke wa kwanza wa kibinadamu!
Hata wakati Adamu na Hawa walipoasi, Mungu hakuwaacha kabisa kabisa. Kwenye hatua hiyo, kama yeye angaliwaadhibu kwa kifo cha dakika ile ile, angalikuwa akifanya jambo la haki kabisa. Hata hivyo, yeye alikuwa mwema kwa wanadamu wawili ambao sasa walikuwa wenye dhambi. Aliwaruhusu waendelee kuwa hai kwa kitambo na kupata watoto. —Mwanzo 5:1-5.
Zaidi ya hilo, wema wa Mungu umeendelea kuelekezwa kwenye aina ya binadamu yenye dhambi tangu wakati huo. Kama alivyosema Mfalme Daudi: “Bwana [Yehova, AW] ni mwema kwa watu wote, na rehema zake zi juu ya kazi zake zote.” (Zaburi 145:9) Yeye hutoa maandalizi mengi ili uhai wa kibinadamu uweze kuendelea katika mali yake, dunia. Yesu aliwaambia hivi Wayahudi wa siku yake: “Baba yenu aliye katika mbingu . . . hufanya jua lake lichomoze juu ya watu waovu na wema na hufanya mvua inyeshe juu ya watu waadilifu na wasio waadilifu.” (Mathayo 5:45, NW) Njaa au ukosefu wowote uliopo si kwa sababu Mungu ameshindwa kuandalia aina ya binadamu. Ni kwa sababu wanadamu wana ufisadi, ukatili, na hawatekelezi mambo vizuri.
Mungu pia aruhusu aina ya binadamu watumie utajiri wa madini za dunia ili kujifaidi, naye hajaweka kisetiri ili wasiwe na uelewevu wa kadiri fulani kuhusu mbingu zenye nyota na umbo la kimwili la vitu. Kwa kweli, Yehova ni mwema kwa aina ya binadamu, hata ingawa wengi hunyeta wakisema kwamba hakuna Mungu, na wengine hutumia vibaya wema wake kwa makusudi yao ya ubinafsi, hata kwa kadiri ya kuonea wanadamu wenzao.—Zaburi 14:1.
Wema wa Mungu kwa Waamini
Ingawa hivyo, ikiwa Mungu amekuwa mwema kwa aina ya binadamu kwa ujumla, shughuli zake pamoja na waamini huchangamsha moyo kikweli. Jambo moja ni kwamba, Adamu na Hawa walipoasi hapo kwanza, Mungu alitoa unabii kwamba ingetokea “mbegu” ambayo hatimaye ingeshinda athari mbaya za dhambi yao. (Mwanzo 3:15) Kwa kadiri wakati ulivyopita, wengi wa wazao wa Adamu waliabudu Mungu kwa imani japo hali yao ya kutokamilika, na unabii huu wa mapema uliwapa tumaini la kupata wakati ujao ulio bora. Mmoja wa waabudu hawa waaminifu, Abrahamu, hata aliitwa “rafiki ya Yehova.”—Yakobo 2:23, NW.
Mungu alimwahidi Abrahamu kwamba wazao wake wangekua wawe mataifa mengi na kwamba ukoo mkuu wa wazao wake ungerithi bara la Kanaani. Kwa utimizo wa jambo hili, Waisraeli, wakiwa wazao wa Abrahamu, walipangwa kitengenezo baadaye wakawa taifa. (Mwanzo 17:3-8; Kutoka 19:6) Tena, Mungu alikuwa mwema kwa taifa jipya hili, akiwakomboa kutoka utumwani Misri, akiwalinda jangwani, akiwaandalia fungu la sheria na ukuhani, na mwishowe akiwapa bara la Kanaani lenye rutuba ili liwe urithi.
Hatimaye, Israeli ukawa ufalme, na Yehova akaagiza mfalme wao wa tatu wa kibinadamu, Sulemani, ajenge hekalu katika Yerusalemu liwe kitovu cha ulimwengu cha ibada Yake. Hekalu lilipomalizwa, kukawa na sherehe kubwa ajabu ya wakfu na sikukuu yenye shangwe. Baada ya hapo, maandishi yasema kwamba, Waisraeli “walianza kumbariki mfalme na kwenda kwenye makao yao, wakishangilia na kuhisi wakiwa na ufurahifu wa moyo kuhusu wema wote ambao Yehova alikuwa amefanya.” (1 Wafalme 8:66, AW) Kulikuwako pindi nyinginezo pia ambapo mioyo ya Waisraeli ilifurika kwa sababu ya wema wa Mungu kwao.
Ingawa hivyo, jambo lisilofurahisha ni kwamba hawakuthamini sikuzote pendeleo la kuwa waabudu wa yule Mungu mmoja wa kweli. Hatimaye, Waisraeli kwa ujumla wakawa wasio na imani, na katika 607 K.W.K., Yehova akawaruhusu wapelekwe wakawe watekwa Babuloni. Kama Mungu alivyokuwa amemwambia Musa, kwa sababu ya ule wema Wake wenyewe “kwa vyovyote yeye hatatoa mwepuko wa adhabu.”—Kutoka 34:7, NW.
Hata hivyo, baada ya miaka 70 Mungu alirudisha mabaki ya Waisraeli wenye imani kwenye bara lao wenyewe. Ni jambo gani lililomsukuma kufanya hivyo? Ni wema wake. Yeremia aliandika kwa unabii juu ya kurudi kwa Waisraeli kutoka Babuloni: “Kwa uhakika wao watakuja na kupaaza kilio cha shangwe wakiwa juu ya kimo cha Sayuni na watang’aa furaha kuhusu wema wa Yehova.” Nabii huyo aliendelea kusema: “‘Watu wangu mwenyewe watashiba wema wangu,’ ndilo tamko la Yehova.”—Yeremia 31:12, 14, NW.
Hatimaye, Yesu alikuja duniani akathibitika kuwa ndiye “mbegu” aliyetabiriwa katika unabii uliotamkwa kule nyuma katika Edeni. (Mwanzo 3:15) Biblia yasema hivi: “Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Kifo cha Yesu kiliandaa ukombozi wa kununua wanadamu kutoka kwenye dhambi na kuwarudisha kwenye ukamilifu. Hivyo, athari mbaya za dhambi ya Adamu zingeshindwa baadaye. Kama vile Paulo alivyoandikia Waroma: “Kupitia kutotii kwa mwanadamu mmoja wengi walifanyizwa kuwa watenda dhambi, vivyo hivyo pia kupitia utii wa mtu mmoja wengi watafanyizwa kuwa waadilifu.” (Warumi 5:19, NW) Asante kwa wema wa Mungu, wanadamu wenye mioyo ifaayo sasa wakawa na tumaini la kupata uhai wa milele. Wangeweza hata kuwa rafiki za Mungu, kama Abrahamu.
Mungu aendelea kuwaonyesha wema hata leo wale ambao humwabudu yeye. Yeye hutoa mashauri kupitia Biblia ili kuwasaidia washughulikie matatizo yao. (Zaburi 119:105) Yeye hutoa zawadi ya bure ya roho yake ili kuwasaidia wafikie viwango vyake vya uadilifu. Na hufunua makusudi yake, hivi kwamba Wakristo wa kweli watazama mbele kwenye ulimwengu mpya wa uadilifu ambao utaletwa hima baada ya ulimwengu huu wa zamani kupitilia mbali. (Mithali 4:18; 2 Petro 3:13) Wakristo wana uhakika kuhusu mambo hayo kwa sababu Mungu, katika wema wake, ameyafunua katika Neno lake lisilokosea.—2 Timotheo 3:16.
Ndiyo, kwa uhakika ufikirio wa wema wa Mungu wachangamsha mioyo yetu kumwelekea yeye. Lakini watokeza pia swali fulani:
Wewe Utanufaika Kadiri Gani na Wema wa Mungu?
Kwa uhakika, hata wewe uwe u nani, tayari wanufaika na wema wa Mungu. Wewe wapumua, wala, wanywa, waona shangwe ya maisha—zote hizo zikiwa ni zawadi kutoka kwa Mungu. Lakini je! wewe wanufaika kikamili kwa kadiri iwezekanavyo? Kumbuka kwamba, wema wa Mungu kwa Adamu na Hawa uliwekewa mipaka baada ya wao kutenda dhambi. Vivyo hivyo, yeye atatuwekea sisi mipaka ya kupata utele wake tusipoitikia fadhili zake kwa njia ifaayo. Twaweza kufanyaje hivyo?
Mtunga zaburi alisali hivi: “Nifundishe mimi mambo yenyewe hasa ya wema, utumizi timamu wa akili na maarifa, kwa maana katika amri zako mimi nimejizoeza imani.” (Zaburi 119:66, NW) Hiyo yapasa kuwa sala yetu pia. Kwa kuwa Mungu ni mwema, sisi twahitaji kujifunza kuwa wema kama yeye. Paulo alihimiza hivi: “Iweni wafuataji wa mfano wa Mungu, kama watoto wapendwa.”—Waefeso 5:1, NW.
Sisi hufanya hivi, kwanza kwa kujifunza Biblia ili tujue wema ni nini. Halafu, sisi huomba msaada wa Mungu katika kukuza sifa hii. Wema ni tunda la roho, pamoja na “upendo, shangwe, amani, ustahimilivu, fadhili, .. . imani, upole, [na] kujidhibiti.” (Wagalatia 5:22, 23, NW) Twaweza kusitawisha sifa zote hizi kwa kutegemea roho ya Mungu, kujifunza Biblia iliyovuviwa na Mungu, kumpelekea sala ili atusaidie, na kushirikiana na Wakristo wenye akili kama yetu.—Zaburi 1:1-3; 1 Wathesalonike 5:17; Waebrania 10:24, 25.
Pia Biblia yasema hivi: “Kwa mtajo wa wingi wa wema wako watabubujika furaha, na kwa sababu ya uadilifu wako watapaaza kilio cha shangwe.” (Zaburi 145:7, NW) Ndiyo, Mungu atutarajia tuambie wengine kuhusu wema wake. Twapaswa kuongea kwa uhuru kuhusu Baba yetu wa kimbingu.
Mwisho, hatupasi kujichukulia kwamba twaweza kutumia wema wa Mungu vyovyote tutakavyo. Ni kweli kwamba Yehova husamehe watenda dhambi. Mfalme Daudi alikuwa na uhakika wa kupata jibu lenye kupendeleka aliposali hivi: “Usiyakumbuke makosa ya ujana wangu, wala maasi yangu. Unikumbuke kwa kadiri ya fadhili zako, Ee BWANA [Yehova, NW], kwa ajili ya wema wako.” (Zaburi 25:7) Je! hiyo yamaanisha kwamba twaweza kujiruhusu tutende dhambi kwa tarajio hakika la kupata msamaha wa Mungu? Sivyo kamwe. Kumbuka kwamba, wema wa Mungu wamaanisha kwamba “kwa vyovyote yeye hatatoa mwepuko wa adhabu” kwa watenda dhambi wasiotubu.
Kuona Shangwe Kuhusu Wema wa Mungu
Mara tukiisha kuupata kikamili wema wa Mungu, mioyo yetu humchangamkia ajabu! Twatiwa moyo kufuata shauri zuri la mtume Paulo: “Endeleeni kutembea kama watoto wa nuru, kwa maana tunda la nuru lina kila namna ya wema na uadilifu na ukweli.”—Waefeso 5:8, 9, NW.
Kila siku, sisi twajua Mungu atuhangaikia kwa upendo. Hata tukiwa chini ya hali zilizo ngumu zaidi, twajua hawaachi wale wampendao. Ndiyo, twapata amani ya akilini iliyo nyingi ajabu ya mtunga zaburi: “Hakika wema na fadhili zitanifuata siku zote za maisha yangu; nami nitakaa nyumbani mwa Bwana [Yehova, NW] milele.”—Zaburi 23:6.