Maisha na Huduma ya Yesu

Sala, na Kumtumaini Mungu

YESU anapoendelea na mahubiri yake, analaumu vikali unafiki wa watu wanaojionyesha kuwa wanatii Mungu. “Wakati wewe unapoenda kutoa zawadi,” yeye anasema, “usipige tarumbeta mbele yako, sawa na vile wanafiki wanavyofanya.”

“Pia,” Yesu anaendelea kusema, “wakati ninyi mnasali, ni lazima msiwe kama wanafiki; kwa sababu wao wanapenda kusali wakiwa wamesimama katika masinagogi na pembe za njia pana ili waweze kuonekana na wanadamu.” Bali, yeye anaagiza: “Wakati wewe unasali, ingia ndani ya chumba chako cha faragha na, baada ya kufunga mlango wako, sali kwa Baba yako aliye katika siri.” Yesu mwenyewe alitoa sala peupe, kwa hiyo kwa kusema hivyo halaumu hizo. Yeye analaumu vikali sala zinazosemwa ili kuvutia wasikilizaji na kuwafanya wasifu-sifu mtu.

Yesu anaendelea kushauri hivi: “Wakati wa kusali, msiseme mambo yale yale tena na tena, kama vile watu wa mataifa wanafanya.” Yesu hamaanishi kwamba kurudia pekee ni kubaya. Wakati mmoja yeye mwenyewe alirudia-rudia kutumia “neno lile lile” alipokuwa akisali. Lakini jambo ambalo yeye anakataa ni kusema vifungu vya maneno yaliyokaririwa moyoni “tena na tena,” kama wanavyo fanya wale wenye kuhesabu-hesabu shanga kwa vidole vyao wanaporudia-rudia sala zao kama wimbo.

Ili kusaidia wasikilizaji wake wasali, Yesu anatoa sala ya kielelezo inayotia ndani maombi saba. Yale matatu ya kwanza yanatoa kwa kufaa utambuzi kwa enzi kuu ya Mungu na makusudi yake. Hayo ni maombi ya kwamba jina la Mungu litakaswe, Ufalme wake uje, na mapenzi yake yafanywe. Yale manne yaliyobaki ni maombi ya mambo ya kibinafsi, yaani, chakula cha kila siku, kusamehewa dhambi, kutokushawishwa kupita kadiri ya uvumilivu wa mtu, na kuokolewa na mwovu.

Akiendelea, Yesu anataja mtego wa kukazia isivyofaa mali za kimwili. Yeye alihimiza hivi: “Acheni kuweka ghalani kwa ajili yenu wenyewe hazina juu ya dunia, ambapo nondo na kutu vinakula, na ambapo wevi wanavunja na kuiba.” Si kwamba hazina hizo zinaweza kuharibika tu bali pia hazisitawishi ustahili mbele za Mungu.

Kwa sababu hiyo, Yesu anasema: “Bali, wekeni ghalani kwa ajili yenu wenyewe hazina katika mbingu.” Jambo hilo linafanywa kwa kuweka utumishi wa Mungu kwanza katika maisha yako. Hakuna mtu anayeweza kuondoa ustahili uliokusanywa kwa wingi hivyo mbele za Mungu wala thawabu bora. Halafu Yesu anaongezea hivi: “Mahali hazina yako ilipo, hapo ndipo moyo wako utakuwa pia.”

Akiendelea kuutaja mtego wa kufuatia vitu vya kimwili, Yesu anatoa mfano huu: “Taa ya mwili ni jicho. Ikiwa, basi, jicho lako ni rahisi, mwili mzima wako utakuwa mwangavu; lakini ikiwa jicho lako ni ovu, mwili mzima wako utakuwa na giza.” Jicho linalofanya kazi kwa kufaa linakuwa kwa mwili kama taa iliyowashwa mahali penye giza. Lakini ili lione kwa usahihi, ni lazima jicho liwe rahisi, yaani ni lazima litazame kitu kimoja. Jicho lisilotazama mahali pamoja linaongoza kwenye kukadiria mambo kimakosa, kwenye kutanguliza shughuli za mwili mbele ya utumishi kwa Mungu, na matokeo ni “mwili” mzima kuwa na giza.

Yesu anafikisha jambo hilo kwenye upeo kwa mfano huu wenye mkazo mwingi: “Hakuna mtu anayeweza kuwa mtumwa wa mabwana wakubwa wawili; kwa maana ama atachukia mmoja na kupenda yule mwingine, ama atashikamana na mmoja na kudharau yule mwingine. Ninyi hamwezi kutumikia Mungu na Mali.”

Baada ya kutoa shauri hilo, Yesu anahakikishia wasikilizaji wake kwamba hawahitaji kuwa na wasiwasi juu ya mahitaji yao ya kimwili ikiwa wanaweka utumishi wa Mungu kwanza. “Tazameni kwa kukaza sana macho juu ya ndege wa mbinguni,” yeye anasema, “kwa sababu hawapandi mbegu wala hawavuni wala kukusanya ndani ya maghala; na bado Baba yenu wa kimbingu anawalisha wao.” Ndipo anauliza: “Je! ninyi si wenye kima zaidi ya walivyo wao?”

Halafu Yesu anaelekeza kwenye mayungiyungi ya shamba na kusema kwamba “hata Solomoni katika utukufu wake wote hakupambwa kama moja la hayo. Ikiwa, sasa,” yeye anaendelea kusema, “Mungu anavika hivyo mimea ya shamba,. . . je! yeye hataona ni afadhali zaidi avike ninyi, ninyi mlio na imani kidogo?”

Basi Yesu anamalizia hivi: “Msiwe na wasiwasi kamwe na kusema, ‘Tutakula nini?’ au, ‘Tutakunywa nini?’ au, ‘Tutavaa nini?’ . . . Kwa maana Baba yenu wa kimbingu anajua mnahitaji vitu vyote hivyo. Endeleeni, basi, kutafuta kwanza ufalme na uadilifu wake, na hivi vitu vingine vyote vitaongezwa kwenu ninyi.” Mathayo 6:1-34; 26:36-45, NW.

◆ Yesu alitoa maagizo gani juu ya sala?

◆ Sababu gani hazina za kimbingu ni bora, nazo zinapatikanaje?

◆ Ni mifano gani iliyotolewa kusaidia mtu aepuke kufuatia vitu vya kimwili?

◆ Sababu gani Yesu akasema hakuna uhitaji wa kuwa na wasiwasi?