Maisha na Huduma ya Yesu

Kunyamazisha Dhoruba Inayotisha

MCHANA wa Yesu umekuwa umejawa na utendaji, kutia ndani kufundisha makutano ya watu katika ufuo wa bahari na baadaye kueleza wanafunzi wake mifano kwa faragha. Jioni inapokuja, yeye anasema: “Acheni tuvuke kwenye ukingo ule mwingine.”

Ng’ambo ile nyingine ya ukingo wa mashariki wa Bahari ya Galilaya liko jimbo linaloitwa Dekapoli, kutokana na neno la Kigiriki de’ka, maana yalo “kumi,” na neno po’lis, likimaanisha “mji.” Miji ya Dekapoli ni kitovu cha utamaduni wa Kigiriki, ingawa bila shaka miji hiyo pia ndiyo makao ya Wayahudi wengi. Hata hivyo, utendaji wa Yesu katika jimbo hilo ni mchache sana. Hata katika ziara hii, kama tutakavyoona baadaye, yeye anazuiliwa kukaa sana.

Wakati Yesu anapoomba kwamba waondoke kwenda ukingo ule mwingine, wa-nafunzi wanaenda naye kwenye mashua. Hata hivyo, kuondoka kwao hakupiti bila kujulikana. Upesi wengine wanapanda mashua zao ili waambatane nao. Si mwendo wa mbali sana kufika ng’ambo ile nyingine. Kwa kweli, Bahari ya Galilaya ni ziwa kubwa tu la urefu wa karibu kilometa 21 (maili 13) na upana usiozidi kilometa 12 (maili 7 1/2).

Inaeleweka kwamba Yesu amechoka. Kwa hiyo, upesi baada ya wao kung’oka, yeye analala katika sehemu ya nyuma ya mashua, analaza kichwa chake juu ya mto, na kulala fofofo. Baadhi ya mitume ni mabaharia wenye ujuzi, kwa maana wamekwisha kuvua sana samaki katika Bahari ya Galilaya. Kwa hiyo wao wanalitwaa daraka la kuisafirisha mashua baharini.

Lakini hii haitakuwa safari rahisi. Kwa sababu joto ni jingi zaidi kwenye uso wa ziwa ulio karibu kilometa 210 (futi 700) chini ya usawa wa bahari, na kwa sababu hewa ni baridi zaidi katika milima ya karibu-karibu, nyakati nyingine pepo zenye nguvu zinavuma kuteremka chini na kufanyiza dhoruba kali-kali za ghafula juu ya ziwa. Hilo ndilo jambo linalotukia sasa. Upesi mawingu yanaanza kukumba-kumba mashua na kurusha maji ndani, hivi kwamba inakaribia kujawa kabisa na maji. Hata hivyo, Yesu anaendelea kulala!

Wanaume wale walio mabaharia wenye ujuzi wanafanya juu-chini kuiendesha ma-shua. Bila shaka wao wamewahi kutumia maarifa wakapita dhoruba za namna hiyo. Lakini wakati huu nguvu na akili zimewaishia. Wakiogopa kupoteza maisha zao, wanamwamsha Yesu. ‘Bwana, wewe hujali? Sisi tunazama!’ wao wanapaaza sauti. ‘Tuokoe, tutakufa maji!’

Akijiinua, Yesu anaamuru upepo na bahari hivi: ‘Shi-i-i! kaeni kimya!’ Na upepo ule wenye kuvuma kwa fujo unakoma nayo bahari inatulia. Akiwageukia wanafunzi wake, anauliza: ‘Mbona ninyi ni wenye kuogopa sana? Je! mpaka sasa hamna imani yo yote?’

Kuona hivyo, woga usio wa kawaida una-abamba wanafunzi. ‘Kwa kweli mwana-mume huyu ni nani?’ wao wanaulizana. “Kwa maana yeye anaagiza hata pepo na maji, nazo zinamtii yeye.’

Lo! ni uwezo kama nini anaouonyesha Yesu! Inatupa uhakikisho kama nini kujua kwamba Mfalme wetu ana uwezo juu ya vitu vya kiasili na kwamba fikira zake kamili zitakapoelekezwa kwenye dunia yetu wakati wa utawala wake wa Ufalme, watu wote watakaa katika usalama wa kutokupatwa na mabaa ya kiasili yanayoogopesha sana!

Muda fulani baada ya dhoruba kushuka chini, Yesu na wanafunzi wake wanafika salama kwenye ukingo wa mashariki. Labda mashua zile nyingine ziliepushwa zisipatwe na uzito ule mwingi wa dhoruba zikarudi salama makwao. Marko 4:35–5:2; Mathayo 8:18, 23-28; Luka 8:22-27, NW.

◆ Dekapoli ni nini, nayo iko wapi?

◆ Ni mambo gani ya kimwili yanayosababisha dhoruba kali-kali juu ya Bahari ya Galilaya?

◆ Wakati ustadi wao wa kusafiri baharini unapokuwa hauwezi kuwaokoa, wanafunzi wanafanya nini?

[Picha ya ukurasa mzima katika ukurasa wa 8]