Yesu Alimaanisha Nini Aliposema—“Uwe Mfuasi Wangu”?

1, 2. Ni mwaliko gani bora zaidi ambao mwanadamu anaweza kupata, na tunaweza kujiuliza swali gani?

NI MWALIKO gani bora zaidi uliowahi kupata? Huenda ni wakati ulipoalikwa kuhudhuria tukio la pekee, kama vile harusi ya watu unaowapenda sana. Au huenda ni siku uliyokaribishwa kufanya kazi muhimu. Ikiwa umewahi kupata mialiko kama hiyo, bila shaka ulifurahi na uliliona kuwa pendeleo kubwa sana. Hata hivyo, ukweli ni kwamba umepata mwaliko bora hata zaidi. Kila mmoja wetu amepata mwaliko huo. Na maisha yetu hutegemea sana ikiwa tunaukubali au kuukataa. Huo ndio uamuzi muhimu zaidi tutakaofanya maishani.

² Ni mwaliko gani huo? Ni mwaliko kutoka kwa Yesu Kristo, Mwana mzaliwa-pekee wa Mungu Mweza Yote, Yehova, nao unapatikana katika Biblia. Yesu alisema hivi katika Marko 10:21: ‘Njoo uwe mfuasi wangu.’ Huo ni mwaliko wa Yesu kwa kila mmoja wetu. Tunapaswa kujiuliza, ‘Nitaitikiaje mwaliko huo?’ Huenda jibu likaonekana kuwa wazi. Ni nani anayeweza kukataa mwaliko mzuri kama huo? Jambo la kushangaza ni kwamba watu wengi huukataa. Kwa nini?

3, 4. (a) Mtu aliyemwendea Yesu kuuliza kuhusu uzima wa milele alikuwa na mambo gani ambayo watu wangeweza kuyaonea wivu? (b) Huenda Yesu aliona sifa gani nzuri za kijana huyo tajiri mwenye mamlaka?

³ Kwa mfano, mfikirie mwanamume mmoja aliyepata mwaliko huo moja kwa moja miaka 2,000 hivi iliyopita. Aliheshimiwa sana. Alikuwa na angalau mambo matatu ambayo wanadamu huyatamani, au hata kuyaonea wivu—ujana, mali, na mamlaka. Biblia inamtaja kuwa “mwanamume kijana,” aliyekuwa “tajiri sana,” na “mtawala.” (Mathayo 19:20; Luka 18:18, 23) Hata hivyo, kijana huyo alikuwa na sifa nyingine muhimu zaidi. Alikuwa amesikia kumhusu Mwalimu Mkuu, Yesu, naye alipenda mambo aliyosikia.

⁴ Watawala wengi wa siku hizo hawakumpa Yesu heshima aliyostahili. (Yohana 7:48; 12:42) Lakini mtawala huyo alitenda kwa njia tofauti. Biblia inatuambia hivi: “[Yesu] alipokuwa akiondoka, mwanamume fulani akamkimbilia, akapiga magoti mbele yake na kumuuliza: ‘Mwalimu Mwema, ninapaswa kufanya nini ili niurithi uzima wa milele?’” (Marko 10:17) Ona jinsi ambavyo kijana huyo alivyotamani sana kuzungumza na Yesu, hata alimkimbilia Yesu hadharani, kama tu jinsi ambavyo maskini na watu wa hali ya chini wangefanya. Isitoshe, alipiga magoti kwa heshima mbele ya Kristo. Hivyo, kwa kadiri fulani alikuwa mnyenyekevu na alitambua uhitaji wake wa kiroho. Yesu alithamini sifa hizo nzuri. (Mathayo 5:3; 18:4) Basi, haishangazi kwamba ‘Yesu alimtazama na kumpenda.’ (Marko 10:21) Yesu alimjibu kijana huyo jinsi gani?

Mwaliko wa Pekee

5. Yesu alimjibu kijana huyo tajiri jinsi gani, na kwa nini “jambo moja” alilokosa si umaskini? (Ona pia maelezo ya chini.)

⁵ Yesu alionyesha kwamba tayari Baba yake alikuwa amejibu swali hilo muhimu kuhusu kupata uzima wa milele. Alirejelea Maandiko, naye kijana huyo akasisitiza kwamba alikuwa akitii Sheria ya Musa kwa uaminifu. Hata hivyo, kwa kuwa alikuwa na utambuzi wa pekee, Yesu angeweza kuona mambo yaliyokuwa moyoni mwa kijana huyo. (Yohana 2:25) Alitambua kwamba mtawala huyo ana tatizo kubwa la kiroho. Hivyo, Yesu akamwambia: “Bado unahitaji kufanya jambo moja.” Ni “jambo” gani hilo? Yesu alimwambia: “Nenda ukauze vitu ulivyo navyo, uwape maskini.” (Marko 10:21) Je, Yesu alimaanisha kwamba ni lazima mtu awe maskini ili amtumikie Mungu? Hapana.a Kristo alikuwa akifunua jambo fulani muhimu.

6. Yesu alitoa mwaliko gani, na jibu la kijana huyo tajiri lilifunua jambo gani lililokuwa katika moyo wake?

⁶ Ili kuonyesha waziwazi jambo ambalo kijana huyo alikosa, Yesu alimpa mwaliko huu wa pekee: ‘Njoo uwe mfuasi wangu.’ Hebu wazia—Mwana wa Mungu Aliye Juu Zaidi alimwalika mwanamume huyo uso kwa uso, ili amfuate! Pia, Yesu aliahidi kumthawabisha kwa njia kubwa sana. Alimwambia: “Utakuwa na hazina mbinguni.” Je, kijana huyo tajiri alikubali mwaliko huo wa pekee? Masimulizi hayo yanasema: “Akasikitishwa na jibu hilo, akaenda zake akiwa na huzuni, kwa maana alikuwa na mali nyingi.” (Marko 10:21, 22) Hivyo, maneno hayo ya Yesu yasiyotazamiwa yalifunua tatizo lililokuwa katika moyo wa mwanamume huyo. Alipenda sana mali zake, na bila shaka alipenda pia umaarufu na mamlaka aliyopata kwa sababu ya mali hizo. Inasikitisha kwamba alipenda sana vitu hivyo kuliko alivyompenda Kristo. Basi, “jambo moja” ambalo kijana huyo alikosa ni kumpenda Yehova na Yesu kwa moyo wake wote. Kwa kuwa mwanamume huyo kijana hakuwa na upendo huo, alikataa mwaliko huo wa pekee! Hata hivyo, mwaliko huo unakuhusu wewe jinsi gani?

7. Kwa nini tunaweza kuwa na uhakika kwamba mwaliko wa Yesu unatuhusu sisi pia leo?

⁷ Mwaliko wa Yesu haukuwa kwa ajili ya mwanamume huyo tu wala watu wachache. Yesu alisema: “Mtu yeyote akitaka kunifuata, . . . na aendelee kunifuata.” (Luka 9:23) Ona kwamba “mtu yeyote” anaweza kuwa mfuasi wa Kristo ikiwa kwa kweli ‘anataka.’ Mungu anawavuta watu wenye mioyo minyoofu kwa Mwana wake. (Yohana 6:44) Si matajiri, maskini, watu wa jamii au taifa fulani, au wale walioishi katika kipindi chake cha wakati, bali watu wote wanapewa nafasi ya kukubali mwaliko wa Yesu. Hivyo, maneno ya Yesu ‘Njoo uwe mfuasi wangu,’ yanakuhusu wewe pia. Hata hivyo, kwa nini utake kumfuata Kristo? Na kumfuata kunahusisha nini?

Kwa Nini Uwe Mfuasi wa Kristo?

8. Wanadamu wote wana uhitaji gani, na kwa nini?

⁸ Lazima tutambue jambo hili: Tuna uhitaji wa uongozi mzuri. Si wanadamu wote wanaokubali kwamba wana uhitaji huo, lakini uhitaji huo upo. Nabii wa Yehova, Yeremia, aliongozwa na roho kuandika jambo hili ambalo sikuzote limeonekana kuwa kweli: “Ninajua vema, Ee Yehova, kwamba njia ya mwanadamu haimo katika uwezo wake. Mwanadamu anayetembea hana uwezo wa kuongoza hatua yake.” (Yeremia 10:23) Wanadamu hawana uwezo wala haki ya kujiongoza. Kwa kweli, tunapotazama historia ya serikali za kibinadamu tunaona wazi kwamba wameshindwa kuongoza vizuri. (Mhubiri 8:9) Katika siku za Yesu, viongozi waliwakandamiza watu, waliwatendea isivyo haki, na kuwapotosha. Yesu alifafanua vizuri hali ya watu wa kawaida aliposema kwamba walikuwa “kama kondoo wasio na mchungaji.” (Marko 6:34) Leo, wanadamu wako katika hali hiyohiyo. Tukiwa kikundi na mtu mmoja-mmoja, tunahitaji kiongozi tunayeweza kumwamini na kumheshimu. Je, Yesu anaweza kutimiza uhitaji huo? Fikiria sababu kadhaa zinazoonyesha kwamba anaweza kufanya hivyo.

9. Ni nini kinachomfanya Yesu awe tofauti kabisa na viongozi wengine?

⁹ Kwanza, Yesu alichaguliwa na Yehova Mungu. Viongozi wengi huchaguliwa na wanadamu wenzao wasio wakamilifu, ambao mara nyingi hudanganywa na kufanya maamuzi yasiyofaa. Yesu ni kiongozi tofauti. Hata jina lake la cheo linaonyesha hivyo. Neno “Kristo,” kama vile neno “Masihi,” linamaanisha “Mtiwa-Mafuta.” Yesu alitiwa mafuta au kuwekwa katika cheo chake kitakatifu na Bwana Mwenye Enzi Kuu ya ulimwengu wote. Yehova Mungu alisema hivi kumhusu Mwana wake: “Tazama! Mtumishi wangu niliyemchagua, mpendwa wangu, ambaye nimemkubali! Nitaweka roho yangu juu yake.” (Mathayo 12:18) Ni Muumba wetu pekee anayejua vizuri zaidi aina ya kiongozi tunayehitaji. Kwa kuwa Yehova ana hekima isiyo na mipaka, tuna kila sababu ya kuamini kwamba uchaguzi wake ndio unaofaa.​—Methali 3:5, 6.

10. Kwa nini mfano wa Yesu ndio mfano bora ambao wanadamu wanapaswa kufuata?

¹⁰ Pili, Yesu alituwekea mfano mkamilifu na wenye kuchochea. Kiongozi mzuri ana sifa ambazo raia wake wanaweza kuvutiwa nazo na kuziiga. Anawawekea mfano mzuri unaowachochea kuboresha utu wao. Ni sifa gani za kiongozi zinazokuvutia zaidi? Je, ni ujasiri? Hekima? Au huruma? Namna gani ustahimilivu chini ya hali ngumu? Unapojifunza kuhusu maisha ya Yesu alipokuwa duniani, utaona kwamba alikuwa na sifa zote hizo na nyingine nyingi. Kwa kuwa alimwiga kikamili Baba yake wa mbinguni, Yesu alikuwa na sifa zote alizo nazo Mungu. Kwa kweli, alikuwa mwanadamu mkamilifu. Kwa hiyo, katika kila jambo alilofanya, katika kila neno alilosema, na katika hisia zake zote, alituwekea mfano tunaoweza kufuata. Biblia inasema alituwekea ‘kielelezo ili tufuate hatua zake kwa ukaribu.’​—1 Petro 2:21.

11. Yesu alithibitishaje kwamba yeye ni “mchungaji mwema”?

¹¹ Tatu, Kristo aliishi kulingana na maneno yake kwamba yeye “ndiye mchungaji mwema.” (Yohana 10:14) Watu walioishi nyakati za Biblia wangeweza kuelewa vizuri mfano huo. Kwa kawaida wachungaji walifanya kazi ngumu ya kutunza kondoo wao. “Mchungaji mwema” alitanguliza usalama na hali nzuri ya kondoo wake. Kwa mfano, babu ya Yesu, Daudi, alikuwa mchungaji alipokuwa kijana, na nyakati nyingine alihatarisha uhai wake ili kuwaokoa kondoo wake wasiangamizwe na wanyama wakali wa mwituni. (1 Samweli 17:34-36) Yesu alifanya mengi hata zaidi kwa ajili ya wafuasi wake. Alikufa kwa ajili yao. (Yohana 10:15) Ni viongozi wangapi walio na roho kama hiyo ya kujidhabihu?

12, 13. (a) Ni katika njia gani mchungaji anawajua kondoo wake, na ni katika njia gani kondoo wanamjua? (b) Kwa nini unataka kuongozwa na Mchungaji Mwema?

¹² Yesu alikuwa “mchungaji mwema” katika njia nyingine. Alisema: “Ninawajua kondoo wangu nao kondoo wangu wananijua.” (Yohana 10:14) Fikiria maneno hayo ya Yesu. Kwa mtu wa kawaida, huenda kundi la kondoo likaonekana tu kuwa wanyama wenye manyoya mengi. Hata hivyo, mchungaji anamjua kila kondoo. Anajua ni majike gani ambayo hivi punde yatahitaji msaada wake baada ya kuzaa, ni wana-kondoo gani ambao bado wanahitaji kubebwa kwa sababu hawawezi kutembea umbali mrefu kwa kuwa ni wadogo na dhaifu, na ni kondoo gani waliokuwa wagonjwa au kuumia hivi karibuni. Kondoo pia wanamjua mchungaji wao. Wanaitambua sauti yake, nao hawawezi kufuata sauti ya mchungaji mwingine yeyote. Sauti ya mchungaji inapoonyesha kuna hatari au uhitaji wa kuharakisha, wanamfuata mara moja. Wanamfuata popote anapoenda. Naye anajua mahali panapowafaa. Anajua mahali penye nyasi nzuri, vijito vya maji safi, na malisho salama. Anapowachunga, kondoo wanahisi wakiwa salama.​—Zaburi 23.

¹³ Je, hungependa kuwa na kiongozi kama huyo? Mchungaji mwema amekuwa akiwatendea wafuasi wake kwa njia hiyo. Anaahidi kwamba atakuongoza ili upate furaha na maisha yenye kuridhisha, sasa na hata milele! (Yohana 10:10, 11; Ufunuo 7:16, 17) Basi, tunahitaji kujua mambo yanayohusika katika kumfuata Kristo.

Maana ya Kuwa Mfuasi wa Kristo

14, 15. Ili kuwa mfuasi wa Kristo, kwa nini kudai kuwa Mkristo au kuhisi kwamba mtu anampenda Yesu hakutoshi?

¹⁴ Kwa sababu wanajiita Wakristo, huenda mamilioni ya watu leo wanafikiri kwamba tayari wameukubali mwaliko wa Kristo. Huenda wao ni wafuasi wa dini ambazo walibatizwa wakiwa watoto. Au huenda wanadai kwamba wanampenda Yesu na wanamkubali kuwa Mwokozi wa maisha yao. Lakini je, mambo hayo yanawafanya wawe wafuasi wa Kristo? Je, hivyo ndivyo Yesu alivyomaanisha alipotualika tuwe wafuasi wake? Mengi zaidi yanahusika.

¹⁵ Fikiria mataifa ambayo raia wake wengi wanadai kuwa wafuasi wa Kristo. Je, watu wa mataifa hayo wanafuata mafundisho ya Yesu Kristo? Au, tunaona chuki, uonevu, uhalifu, na ukosefu wa haki katika mataifa hayo kama ilivyo katika sehemu nyingine za ulimwengu?

16, 17. Mara nyingi watu wanaodai kuwa Wakristo wanakosa nini, na ni nini kinachowatofautisha na wafuasi wa kweli wa Kristo?

¹⁶ Yesu alisema kwamba wafuasi wake wa kweli hawangetambuliwa kwa maneno yao au jina lao tu, lakini hasa kwa matendo yao. Kwa mfano, alisema hivi: “Si kila mtu anayeniambia, ‘Bwana, Bwana,’ atakayeingia katika Ufalme wa mbinguni, bali yule anayefanya mapenzi ya Baba yangu aliye mbinguni ndiye atakayeingia.” (Mathayo 7:21) Kwa nini watu wengi sana wanaodai kwamba Yesu ni Bwana wao wanashindwa kufanya mapenzi ya Baba yake? Mkumbuke yule mtawala kijana aliyekuwa tajiri. Mara nyingi, watu hao wanaodai kuwa Wakristo wanakosa “jambo moja”​—upendo wa nafsi yote kwa Yesu na Yule aliyemtuma.

¹⁷ Hilo linawezekanaje? Hilo linashangaza kwa sababu wale wanaojiita Wakristo hudai kwamba wanampenda Kristo. Hata hivyo, kumpenda Yesu na Yehova kunatia ndani mengi zaidi ya maneno tu. Yesu alisema: “Ikiwa yeyote ananipenda, atalishika neno langu.” (Yohana 14:23) Pia, akizungumza kama mchungaji, alisema hivi: “Kondoo wangu husikiliza sauti yangu, nami ninawajua, nao hunifuata.” (Yohana 10:27) Ndiyo, upendo wetu kwa Kristo unaonekana si katika maneno yetu au hisia zetu tu bali hasa katika matendo yetu.

18, 19. (a) Kujifunza kumhusu Yesu kunapaswa kutuchochea kufanya nini? (b) Kitabu hiki kina kusudi gani, na kitawapa msaada gani wale ambao kwa muda mrefu wamejiona kuwa wafuasi wa Kristo?

¹⁸ Hata hivyo, matendo yetu hayajitokezi yenyewe tu. Yanatokana na utu wetu. Basi, kwanza tunahitaji kushughulikia utu wetu. Yesu alisema hivi: “Uzima wa milele ndio huu, wakujue wewe, Mungu wa pekee wa kweli, na yule uliyemtuma, Yesu Kristo.” (Yohana 17:3) Tukipata ujuzi sahihi kumhusu Yesu na kuutafakari, mioyo yetu itachochewa. Tutampenda zaidi na zaidi na kutamani sana kumfuata kila siku.

¹⁹ Hilo ndilo kusudi la kitabu hiki. Hakijakusudiwa kutoa muhtasari kamili wa maisha na huduma ya Yesu, bali kutusaidia kuona jinsi tunavyoweza kumfuata.b Kitatusaidia kujichunguza kupitia Maandiko kama vile tunavyoweza kujitazama katika kioo, na kujiuliza, ‘Je, kweli ninamfuata Yesu?’ (Yakobo 1:23-25) Huenda kwa muda mrefu umejiona kuwa kondoo aliye chini ya uongozi wa yule Mchungaji Mwema. Hata hivyo, je, si kweli kwamba sikuzote kuna mambo tunayohitaji kuboresha? Biblia inatuhimiza hivi: “Endeleeni kujijaribu kama mko katika imani, endeleeni kuthibitisha jinsi ninyi wenyewe mlivyo.” (2 Wakorintho 13:5) Tunapaswa kufanya yote tuwezayo ili kuhakikisha kwamba kwa kweli tunaongozwa na Yesu, Mchungaji wetu Mwema mwenye upendo, ambaye amewekwa na Yehova mwenyewe ili atuongoze.

20. Tutachunguza nini katika sura inayofuata?

²⁰ Tunatumaini kwamba kujifunza kitabu hiki kutakusaidia kuzidisha upendo wako kwa Yesu na Yehova. Upendo huo unapokuongoza maishani, utapata amani na kuwa na maisha yenye kuridhisha sana katika ulimwengu huu, nawe utamsifu Yehova milele kwa kutupatia Mchungaji Mwema. Hata hivyo, tunapaswa kuwa na msingi unaofaa tunapojifunza kumhusu Kristo. Basi, inafaa kwamba katika Sura ya 2 tutachunguza jukumu la Yesu katika kusudi la Yehova.