Alitimiza Tamaa ya Moyo Wake

JE! NI tamaa ya moyo wako kuona Ufalme wa Kimesiya ukimiliki dunia yote? Ikiwa ndivyo, watamani na kusali kwa ajili ya baraka za kidunia zilizoahidiwa chini ya Ufalme huo wa kimbingu. Basi uwe mwenye subira, kwani “haja ya mtu ikipatikana, ni mti wa uzima.”—Mithali 13:12; Yakobo 5:7, 8.

Karibu miaka 2,000 iliyopita, katika Yerusalemu paliishi mtu ‘mwadilifu na mcha Mungu’ aliyeitwa Simeoni. Yeye alikuwa na imani katika unabii mwingi wa Kimesiya na alikuwa “akiitarajia faraja ya Israeli” kwa subira.—Luka 2:25.

Unabii Mwingi wa Kimesiya Huleta Tumaini

Yehova ndiye aliyetoa unabii wa kwanza wa Kimesiya—ule ulioipa tumaini ainabinadamu yenye dhambi na yenye kufa. Mungu alitabiri kuja kwa Mbegu ya “mwanamke” wake, au tengenezo la ulimwengu wote mzima.—Mwanzo 3:15.

Huyo alitambuliwa kuwa mbegu ya Abrahamu, na Yakobo alitabiri juu ya kuja kwake. (Mwanzo 22:17, 18; 49:10) Mambo matukufu ya Ufalme wa Mesiya yalitukuzwa katika zaburi. (Zaburi 72:1-20) Isaya alitabiri kwamba yule Mbegu angezaliwa na bikira, naye Mika alitoa unabii kwamba angezaliwa katika Bethlehemu. (Isaya 7:14; Mika 5:2) Huo ni unabii mchache kati ya unabii mwingi wa Kimesiya.

Bado Mesiya Hajaja!

Fikiria juu ya zamani za kale, na uwazie kwamba karne ya kwanza W.K. inakaribia. Unabii wa Kimesiya wa awali wa Mungu sasa umefikia miaka 4,000. Wayahudi wameona kuharibiwa kwa hekalu la Yehova, kufanywa ukiwa kwa nchi yao, uhamisho wa miaka 70 Babiloni, na miaka 500 zaidi ya ujitiisho kwa watawala wasio Wayahudi. Bado Mesiya hajaja!

Jinsi Wayahudi wenye kumhofu Mungu walivyotamani kuja kwa Mesiya! Kutoka kwake baraka zingewamiminikia wao na mataifa yote.

Mtu Mwenye Kumcha Mungu

Miongoni mwa Wayahudi wanaotamani na kusali kwa ajili ya kuja kwa Mesiya ni Simeoni, mtumishi mwaminifu wa Yehova aliye mzee-mzee anayeishi katika jiji kuu la Yudea. Jambo la pekee limempata Simeoni.

Mungu ameweka roho takatifu yake juu ya Simeoni na amemthawabisha kwa kumpa ufunuo. Simeoni hatakufa hadi atakapoona Yule atakayekuwa Mesiya. Lakini siku na miezi inapita. Simeoni anazeeka na hawezi kutazamia kuishi muda mrefu zaidi. Je! ahadi ya Mungu kwake itatimizwa?

Siku moja (katika 2 K.W.K.), mume na mke wachanga wenye mtoto waja kwenye hekalu kutoka Bethlehemu. Roho takatifu yamfunulia Simeoni kwamba hiyo ndiyo siku iliyongojewa kwa muda mrefu. Yeye aenda kwenye hekalu, ambapo atamwona Yule ambaye manabii wameandika juu yake. Akiharakisha kadiri mwili wake uliozeeka unavyoruhusu, amwona Yusufu, Mariamu, na yule mtoto.

Simeoni amchukua mtoto Yesu mikononi mwake kwa furaha kama nini! Huyu ndiye atakayekuwa Mesiya aliyeahidiwa—“Kristo wa Bwana [Yehova, NW].” Akiwa na umri mkubwa hivyo, Simeoni hawezi kutumaini kumwona Yesu akitimiza kusudi Lake la kidunia. Lakini, ni jambo zuri ajabu kumwona akiwa kitoto. Unabii mwingi wa Kimesiya unaanza kutimizwa. Simeoni ni mwenye furaha kama nini! Sasa ataridhika kulala katika kifo hadi ufufuo.—Luka 2:25-28.

Maneno ya Kiunabii ya Simeoni

Simeoni ainuapo sauti yake kumsifu Yehova, twamsikia akisema: “Sasa, Bwana, wamruhusu mtumishi wako, kwa amani, kama ulivyosema; kwa kuwa macho yangu yameuona wokovu wako, uliouweka tayari machoni pa watu wote; Nuru ya kuwa mwangaza wa Mataifa, na kuwa utukufu wa watu wako Israeli.” Baba mlezi wa Yesu, Yusufu, na mama Yake, Mariamu, waendelea kushangaa juu ya maneno hayo.—Luka 2:29-33.

Sura ya Simeoni ni nyangavu anapombariki Yusufu na Mariamu, yaonekana akiwatakia baraka za Yehova katika kutimiza madaraka yao kuelekea mtoto yule. Halafu uso wa mwanamume huyo aliyezeeka waonyesha uzito. Akielekeza maneno yake kwa Mariamu pekee, yeye aongeza: “Tazama, huyu amewekwa kwa kuanguka na kuinuka wengi walio katika Israeli, na kuwa ishara itakayonenewa. Nawe mwenyewe, upanga utaingia [utapenyezwa, NW] moyoni mwako ili yafunuliwe mawazo ya mioyo mingi.”—Luka 2:34, 35.

Maneno ya Simeoni kwa Mariamu

Wazia jinsi Mariamu alivyohisi. Simeoni alimaanisha nini? Baadhi ya watu wangemkubali Kristo na wainuliwe kutoka kwenye ile hali ambayo tayari ni yenye dhambi. Hata hivyo, wengine wangemkataa, wajikwae kwa ajili yake, na waanguke. Kama ilivyotabiriwa, Yesu alithibitika kuwa jiwe la kujikwaa kwa Wayahudi wengi. (Isaya 8:14; 28:16) Maneno ya Simeoni hayamaanishi kwamba Waisraeli mmoja-mmoja kwanza wangeanguka kwa kutoamini halafu wainuke kwa kuamini kwa kumkubali Yesu. Badala ya hivyo, watu wangeitikia kwa njia mbalimbali, ikifunua mawazo ya mioyo mingi na kuwaongoza kwenye hukumu ya Mungu kwa ajili ya mema au mabaya. Kwa wasioamini, yeye angekuwa kama ishara, au kitu cha kudharauliwa. Kwa kutia imani katika yeye, wengine wangeinuliwa kutoka hali ya kuwa wafu katika makosa na dhambi na wangekuja kufurahia msimamo mwadilifu pamoja na Mungu. Matendo ya watu kuelekea Mesiya yangeonyesha yale yaliyokuwa mioyoni mwao.

Vipi juu ya maneno haya ya Simeoni: “Nawe mwenyewe, upanga utaingia [utapenyezwa, NW] moyoni mwako”? Maandiko hayaonyeshi kwamba Mariamu alipenyezwa kwa upanga halisi. Lakini, kukataliwa kwa Yesu na walio wengi kungemtaabisha. Na lilikuwa jambo lenye kutia uchungu kama nini kwa Mariamu kumwona Yesu ametundikwa kwenye mti! Ilikuwa ni kana kwamba Mariamu alipenyezwa upanga.

Simeoni Atumia Unabii Mwingi wa Kimesiya

Roho ya Mungu ilikuwa imemsukuma Simeoni atumie unabii mwingi wa Kimesiya kumhusu Yesu. Simeoni angeweza kufa kwa amani, au kwa utulivu, ‘kwa kuwa macho yake yaliuona wokovu wa Mungu, ambao Yeye aliuweka tayari machoni pa watu wote; nuru ya kuwa mwangaza kwa Mataifa, na kuwa utukufu wa watu Wake Israeli.’ (Luka 2:30-32) Hayo yalitumika vema kama nini kwa maneno ya kiunabii ya Isaya!

Nabii huyo alitabiri hivi: “Utukufu wa BWANA [Yehova, NW] utafunuliwa, na wote wenye mwili watauona pamoja.” “Mimi [Yehova] pia nimekutoa wewe [Mesiya] kuwa nuru kwa mataifa, ili wokovu wangu ufikie miisho ya dunia.” (Isaya 40:5; 42:6; 49:6, NW; 52:10) Maandiko ya Kigiriki ya Kikristo na mambo hakika yenye kuonekana yamethibitisha kwamba Mesiya, Yesu Kristo, ndiye nuru ya kweli ya mataifa, Yule ambaye ataondoa shela ya giza la kiroho na kuletea watu wokovu.

Neno la Mungu halisemi mengi zaidi juu ya Simeoni mzee-mzee. Yaonekana alikufa kabla ya Kristo kufungua njia ya uhai wa kimbingu. Basi, kabla ya muda mrefu, Simeoni atafufuliwa aje kwenye uhai duniani. Yeye—na wewe—mwaweza kupata furaha iliyoje katika ulimwengu mpya chini ya Ufalme wa Kimesiya wa Mungu!