Endelea Kukesha Katika “Wakati wa Mwisho”

“Angalieni, kesheni, [ombeni], kwa kuwa hamjui wakati ule utakapokuwapo.”—MARKO 13:33.

1. Twapaswa kuitikiaje wakati matukio yenye kusisimua yanapofunguka katika huu “wakati wa mwisho”?

MATUKIO yenye kusisimua yanapofunguka katika huu “wakati wa mwisho,” Wakristo wapaswa kuitikiaje? (Daniel 12:4) Wao hawaachwi katika hali ya wasiwasi. Yesu Kristo alitamka ule unabii wa ishara yenye sehemu nyingi ambao umekuwa ukitimizwa katika karne hii ya 20. Alitabiri zile sehemu nyingi ambazo zimekionyesha kipindi hiki cha tangu 1914 kuwa cha pekee sana. Akiwa anafahamu unabii wa Danieli kuhusu “wakati wa mwisho,” Yesu alifuatisha unabii wake mwenyewe mkubwa kwa kuwahimiza wanafunzi wake ‘wakeshe.’—Luke 21:36.

2. Kwa nini kuna uhitaji mkubwa wa kuendelea kukesha kiroho?

² Kwa nini wakeshe? Kwa sababu huu ndio wakati wenye hatari zaidi ya wote katika historia ya kibinadamu. Kujiacha kwa Wakristo wasinzie kiroho wakati huu kungekuwa kwenye msiba. Ikiwa sisi tungeridhika jinsi tulivyo, au kuruhusu mioyo yetu ilemewe na masumbufu ya maisha, tungekuwa katika hatari. Kwenye Luka 21:34, 35, Yesu Kristo alituonya hivi: “Jiangalieni, mioyo yenu isije ikalemewa na ulafi, na ulevi, na masumbufu ya maisha haya; siku ile ikawajia ghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima.”

3, 4. (a) Yesu alimaanisha nini aliposema kwamba siku ya Mungu ya hasira ingewajia watu kwa ghafula “kama mtego”? (b) Kwa kuwa Mungu hategi mtego, ni kwa nini siku hiyo itawanasa watu kwa ujumla kwa ghafula?

³ Ni kwa sababu nzuri Yesu alisema kwamba siku ya Yehova ingetujia “ghafula, kama mtego.” Mtego mara nyingi huwa na tanzi, na hilo hutumiwa kukamata ndege na mamalia (wanyama). Mtego una mtambo, na yeyote atembeaye ndani yao hukwaa mtambo huo. Mtego kisha hufungika, na mhanga kushikwa. Hayo yote hutukia kwa ghafula sana. Kwa njia hiyo hiyo, Yesu alisema, wale wasiotenda kazi kiroho watashangazwa na kunaswa katika “siku ya ghadhabu” ya Mungu.—Mithali 11:4.

⁴ Je! Yehova Mungu ndiye anayetegea watu mtego? La, yeye hasubiri tu ili anase watu ghafula ili awaangamize. Lakini siku hiyo itawanasa watu kwa ujumla kwa sababu wao hawaufikirii kwa uzito sana Ufalme wa Mungu. Wao hujiendea njia yao wenyewe wakifuatilia mambo ya maisha, wakipuuza umaana wa matukio yanayowazunguka. Hata hivyo, hiyo haibadili ratiba ya Mungu. Yeye ana wakati wake mwenyewe uliowekwa wa kutoza hesabu. Na, kwa rehema, yeye hawaachi ainabinadamu bila habari za hukumu yake ijayo.—Marko 13:10.

5, 6. (a) Kwa sababu ya hukumu inayokuja, Muumba amewafanyia viumbe wa kibinadamu uandalizi gani wenye upendo, lakini kukiwa na tokeo lipi la ujumla? (b) Ni nini kitakachoangaliwa kutusaidia tuendelee kukesha?

⁵ Kuonya kimbele huko ni uandalizi wenye upendo kwa upande wa yule Muumba mkuu, anayependezwa na hali njema ya viumbe wa kibinadamu walio hapa kwenye mahali pake pa kuwekea miguu pa ufananisho. (Isaya 66:1) Yeye huwathamini sana wakaaji wa mahali ambapo miguu yake husemwa kuwa inapumzika. Kwa hiyo kupitia mabalozi na wajumbe wake wa kidunia, yeye huwaonya juu ya matukio yaliyo mbele yao. (2 Wakorintho 5:20) Hata hivyo, yajapokuwa hayo maonyo yote ambayo yametolewa, matukio hayo yataijia familia ya kibinadamu kwa ghafula kana kwamba walikuwa wamekanyaga mtego. Kwa nini? Kwa sababu watu walio wengi wanalala usingizi kiroho. (1 Wathesalonike 5:6) Ni idadi ndogo tu kwa kulinganisha wanaotii onyo hilo na watakaookoka kuingia ulimwengu mpya wa Mungu.—Mathayo 7:13, 14.

⁶ Hivyo, basi, sisi twaweza kuendeleaje kukesha katika huu wakati wa mwisho ili tuhesabiwe miongoni mwa wale wataokolewa? Yehova huandaa msaada unaohitajiwa. Acheni tuangalie mambo saba ambayo sisi twaweza kufanya.

Piga Vita Dhidi ya Vikengeusha Fikira

7. Yesu alitoa onyo lipi kuhusu kukengeushwa fikira?

⁷ Kwanza, ni lazima tupige vita dhidi ya vikengeusha fikira. Kwenye Mathayo 24:42, 44, Yesu alisema hivi: “Kesheni basi; kwa maana hamjui ni siku ipi atakayokuja Bwana wenu. Kwa sababu hiyo ninyi nanyi jiwekeni tayari; kwa kuwa katika saa msiyodhani Mwana wa Adamu yuaja.” Ule usemi aliotumia Yesu hapa huonyesha kwamba katika wakati huu wenye hatari, kungekuwako vikengeusha fikira vingi, navyo vikengeusha fikira huongoza kwenye uangamivu. Katika siku ya Noa mambo mengi yaliwashughulisha mno watu. Kama tokeo, watu hao waliokengeushwa fikira ‘hawakutambua’ yaliyokuwa yakitukia, nalo Furiko likawafagilia mbali wote. Kwa hiyo, Yesu alionya hivi: “Ndivyo kutakavyokuwa kuja [kuwapo, NW] kwake Mwana wa Adamu.”—Mathayo 24:37-39.

8, 9. (a) Kufuatia mambo ya kawaida ya maisha kwaweza kukengeushaje fikira zetu kihatari? (b) Paulo na Yesu walitutolea maonyo gani?

⁸ Kumbuka, vilevile, kwamba katika onyo lake kwenye Luka 21:34, 35, Yesu alikuwa akizungumzia mambo ya kawaida ya maisha, kama vile kula, kunywa, na masumbufu ya kutafuta riziki. Ni mambo yaliyo ya kawaida kwa watu wote, kutia na wanafunzi wa Bwana Yesu. (Linganisha Marko 6:31.) Mambo hayo huenda yasiwe na dhara yenyewe, lakini yakiruhusiwa, yaweza kukengeusha fikira zetu, yatushughulishe mno, na hivyo yatokeze ndani yetu usingizi wa kiroho wenye hatari.

⁹ Kwa hiyo, acheni tusikose kujali jambo lililo la umaana mkubwa zaidi ya yote—kupata kibali cha kimungu. Badala ya kujitia sana katika mambo ya kawaida ya maisha, acheni tuyatumie tu kwa kadiri iliyo na mipaka inayohitajiwa ili kututegemeza. (Wafilipi 3:8) Hayapaswi kusonga na kuyaondolea mbali masilahi ya Ufalme. Kama Warumi 14:17 isemavyo, “ufalme wa Mungu si kula wala kunywa, bali ni haki na amani na furaha katika Roho Mtakatifu [roho takatifu, NW].” Kumbuka maneno ya Yesu aliposema hivi: “Utafuteni kwanza ufalme wake, na haki yake; na hayo yote mtazidishiwa.” (Mathayo 6:33) Zaidi ya hayo, kwenye Luka 9:62, Yesu alijulisha wazi hivi: “Mtu aliyetia mkono wake kulima, kisha akaangalia nyuma, hafai kwa ufalme wa Mungu.”

10. Kuna hatari gani ikiwa hatuweki macho yetu yakitazama mbele moja kwa moja kwenye mradi?

¹⁰ Mara tukiisha anza kulima, kusema kwa njia ya mfano, ni lazima tuendelee katika mstari ulionyooka. Mshika plau atazamaye nyuma hatalima mtaro ulionyooka. Anakengeushwa fikira na aweza kwa urahisi kwenda kombo au kusimamishwa na kizuizi fulani. Acheni tusiwe kama mke wa Lutu, aliyetazama nyuma akakosa kabisa kufikia usalama. Sisi twapaswa kuweka macho yetu yakitazama mbele kabisa kwenye mradi. Ili kufanya hivyo ni lazima sisi tupige vita dhidi ya vikengeusha fikira.—Mwanzo 19:17, 26; Luka 17:32.

Kusali kwa Moyo Wote

11. Yesu alikazia nini baada ya kutuonya juu ya hatari ya kukengeushwa fikira?

¹¹ Lakini, kuna mengi zaidi tuwezayo kufanya ili tuendelee kukesha. Jambo la pili lenye maana ni: Kusali kwa moyo wote. Baada ya kutuonya dhidi ya kukengeushwa fikira na mambo ya kawaida ya maisha, Yesu alitoa shauri hili: “Basi, kesheni ninyi kila wakati, mkiomba, ili mpate kuokoka katika hayo yote yatakayotokea, na kusimama mbele za Mwana wa Adamu.”—Luka 21:36.

12. Ni aina gani ya sala inayohitajika, tokeo likiwa nini?

¹² Hivyo, ni lazima tusali daima kuhusu hatari ya hali yetu na uhitaji wetu wa kuwa chonjo. Kwa hiyo acheni tumwendee Mungu kwa sala pamoja na kusihi kwa moyo wa bidii. Paulo asema kwenye Warumi 12:12: “Katika kusali, mkidumu.” Na kwenye Waefeso 6:18, twasoma hivi: “Kwa sala zote na maombi mkisali kila wakati katika Roho, mkikesha kwa jambo hilo na kudumu.” Hiyo haimaanishi kutoa sala tu kana kwamba ni jambo la vivi hivi lisilo na umaana mkubwa. Kuwapo hai kwetu kwenyewe kumo hatarini. Kwa hiyo sisi twahitaji kusihi kwa moyo wa bidii ili tupate msaada wa kimungu. (Linganisha Waebrania 5:7.) Kwa njia hiyo sisi tutajidumisha upande wa Yehova. Hakuna jambo jingine lililo la manufaa zaidi kwetu katika kutusaidia tutimize hilo kuliko ‘kusali kila wakati.’ Ndipo Yehova atatuweka tukiwa katika hali ya kukaa chonjo. Basi, ni jambo la maana kama nini, kudumu katika sala!

Shikamana kwa Ukaribu na Tengenezo la Mungu na Kazi Yalo

13. Ni ushirika wa aina gani unaohitajika ili kuendelea kukesha?

¹³ Sisi twataka kuponyoka mambo hayo yote yatakayoujilia ulimwengu. Twataka kusimama mbele za Mwana wa Adamu, tukiwa na kibali chake. Kwa hiyo, kuna jambo la tatu tuwezalo kufanya: Shikamana na tengenezo la kitheokrasi la Yehova bila kuondoleka. Twahitaji kushirikiana na tengenezo hilo bila masharti na kushiriki katika utendaji walo. Kwa njia hiyo tutajitambulisha bila kukosea kuwa Wakristo wanaokesha.

14, 15. (a) Ni kushiriki katika kazi gani kutakakotusaidia kuendelea kukesha? (b) Ni nani anayeamua wakati kazi ya kuhubiri inapomalizika, na twapaswa kuhisije juu ya kazi hiyo? (c) Baada ya dhiki kubwa, tutatambua nini tunapotazama nyuma kwenye kazi ya kuhubiri iliyofanywa?

¹⁴ Lenye kulingana na hilo kwa ukaribu ni jambo la nne liwezalo kutusaidia kuendelea kukesha. Ni lazima sisi tuwe miongoni mwa wale ambao wanaonya watu juu ya mwisho unaokuja wa mfumo huu wa mambo. Mwisho kamili wa huu mfumo wa mambo wa kale hautatukia mpaka “habari hizi njema za ufalme” ziwe zimehubiriwa kwa kadiri ambayo Mungu Mweza Yote amekusudia. (Mathayo 24:14, NW) Mashahidi wa Yehova sio watakaoamua wakati kazi ya kuhubiri imekamilishwa. Yehova amejiwekea haki hiyo. (Marko 13:32, 33) Lakini, sisi tumeazimia kufanya kazi kwa bidii kadiri tuwezavyo na kwa muda mrefu kadiri inavyohitajiwa katika kuhubiri juu ya ile serikali bora zaidi ambayo ainabinadamu wangeweza kupata, Ufalme wa Mungu. Kufyatuka kwa ile “dhiki kubwa” kutakuja huku tukiwa tungali tunashiriki katika kazi hiyo. (Mathayo 24:21) Katika wakati ujao wote, wale waliookoka wataweza kutazama nyuma na kuhakikisha kwa moyo wote kwamba Yesu Kristo hakuwa nabii mwongo. (Ufunuo 19:11) Kazi ya kuhubiri itakuwa imetimizwa kwa kadiri kubwa zaidi ya vile ilivyotazamiwa na wale wanaoshiriki katika kazi hiyo.

¹⁵ Kwa hiyo, katika wakati huo wenye maana sana kazi hiyo itakapokuwa imekwisha kamilishwa kwa uradhi wa Mungu mwenyewe, yaelekea wengi zaidi watakuwa wakishiriki katika kuhubiri kuliko pindi nyingine yoyote iliyotangulia. Tutakuwa wenye shukrani kama nini kwa kuwa tulipata kuishiriki kazi hiyo tukufu! Mtume Petro atuhakikishia kwamba Yehova “hapendi mtu ye yote apotee, bali wote wafikilie toba.” (2 Petro 3:9) Kwa hiyo, ile kani ya utendaji ya Mungu Mweza Yote inatenda kazi kwa nguvu nyingi zaidi leo kuliko ilivyopata kutenda, na Mashahidi wa Yehova watamani kuendelea na utendaji huo wenye kuendeshwa kwa roho. Kwa hiyo shikamana kwa ukaribu na tengenezo la Yehova, na uwe na shughuli nyingi katika huduma yalo kwa watu wote. Hiyo itakuwa msaada kwako katika kuendelea kukesha.

Jichunguze Mwenyewe

16. Ni kwa nini tujichunguze wenyewe juu ya hali yetu ya kiroho ya sasa?

¹⁶ Kuna jambo la tano tuwezalo kufanya ili kuendelea kukesha. Sisi mmoja mmoja, twapaswa tuchunguze hali yetu ya sasa. Hilo lafaa sasa kuliko ilivyopata kuwa kabla ya hapo. Twahitaji kuthibitisha twasimama imara upande wa nani. Kwenye Wagalatia 6:4, Paulo alisema: “Kila mtu na aipime kazi yake mwenyewe [ilivyo].” Jichunguze mwenyewe kupatana na maneno ya Paulo kwenye 1 Wathesalonike 5:6-8: “Basi tusilale usingizi kama wengine, bali tukeshe, na kuwa na kiasi. Maana walalao usingizi hulala usiku, pia na walewao hulewa usiku. Lakini sisi tulio wa mchana, tuwe na kiasi, hali tukijivika kifuani imani na upendo, na chapeo yetu iwe tumaini la wokovu.”

17. Tunapojichunguza wenyewe, ni maswali gani tupaswayo kujiuliza?

¹⁷ Namna gani sisi? Tunapojichunguza wenyewe kulingana na Maandiko je, tunaona kwamba tunaendelea kukesha, tukiwa na tumaini la wokovu likiwa kama chapeo? Je! sisi ni watu ambao wamejitenga wenyewe kabisa na mfumo wa mambo wa kale na sisi hatukubali tena mawazo yao? Je! kweli kweli sisi tuna roho ya ulimwengu mpya wa Mungu? Je! sisi tuko chonjo kabisa kwa habari ya unakoelekea mfumo huu? Ikiwa ndivyo, siku ya Yehova haitatunasa kana kwamba tulikuwa wezi.—1 Wathesalonike 5:4.

18. Ni maswali gani zaidi tunayohitaji tujiulize wenyewe, na tokeo likiwa nini?

¹⁸ Lakini, namna gani, ikiwa kujichunguza kwetu kwafunua kwamba sisi tunajitahidi kuanzisha njia ya maisha mema, yenye raha nyingi, ya starehe, ya ulegevu? Je! namna gani ikiwa tunagundua kwamba macho yetu ya kiroho yamekuwa mazito sana yakiwa yamejaa kusinzia na usingizi? Je! sisi tuko katika hali ya ndoto, tukifukuzana na kiwazio fulani tu cha kilimwengu? Ikiwa ndivyo, basi na tuamke!—1 Wakorintho 15:34.

Tafakari Juu ya Unabii Mbalimbali Uliotimizwa

19. Ni baadhi ya unabii gani mbalimbali ambao tumeona ukitimizwa?

¹⁹ Sasa twafikia jambo la sita litakalotusaidia kuendelea kukesha: Tafakari juu ya ule unabii mwingi ambao umetimizwa katika wakati huu wa mwisho. Tayari sisi tumepita mwaka wa 77 tangu nyakati zilizowekwa za mataifa ziishe katika 1914. Tutazamapo nyuma muda wa zaidi ya robo tatu za karne, twaweza kuona jinsi unabii mmoja baada ya mwingine umetimizwa—kurudishwa kwa ibada ya kweli; kukombolewa kwa mabaki wapakwa-mafuta, pamoja na waandamani wao, kuingia katika paradiso ya kiroho; kuhubiriwa kwa habari njema za Ufalme kwa kadiri ya tufe lote; kutokea kwa mkutano mkubwa. (Isaya 2:2, 3; sura 35; Zekaria 8:23; Mathayo 24:14; Ufunuo 7:9) Ku_-mekuwako kutukuzwa kwa jina kuu la Yehova na enzi yake kuu ya ulimwengu wote mzima, pamoja na kuongezeka kwa mdogo kuwa elfu na mnyonge kuwa taifa hodari, huku Yehova akilihimiza hilo kwa wakati walo. (Isaya 60:22; Ezekieli 38:23) Na njozi za mtume Yohana katika usimulizi wa Ufunuo sasa zinakaribia upeo wazo.

20. Mashahidi wa Yehova hushiriki usadikisho gani, na wamethibitika kuwa nini kwa kweli?

²⁰ Basi, zaidi ya wakati mwingineo wote, Mashahidi wa Yehova wanasadiki kwa uthabiti juu ya usahihi wa uelewevu wao wa maana ya mambo ya ulimwengu tangu 1914. Wakiwa na usadikisho huo, wamethibitika kuwa vyombo mkononi mwa Mungu Aliye Juu Zaidi. Wao ndio wameaminishwa ujumbe wa kimungu waupeleke katika wakati huu wenye matukio makubwa. (Warumi 10:15, 18) Naam, maneno ya Yehova kwa wakati wa mwisho yametimia. (Isaya 55:11) Hilo, nalo, lapaswa kutuchochea tuendelee mpaka tuone utimizo wa mwisho wa ahadi zote za Mungu kupitia Yesu Kristo.

Wokovu Uko Karibu Zaidi Kuliko Wakati Tulipoanza Kuwa Waamini

21. Tuna msaada gani wa saba wa kuendelea kukesha kiroho?

²¹ Hatimaye, msaada wa saba wa kutusaidia tuendelee kukesha: Kukumbuka sikuzote kwamba wokovu wetu uko karibu zaidi kuliko wakati tulipoanza kuwa waamini. La maana zaidi, kutetewa kwa enzi kuu ya ulimwengu wote mzima ya Yehova na kutakaswa kwa jina lake kumekaribia zaidi. Kwa hiyo uhitaji wa kuendelea kukesha ni wa muhimu zaidi ya ulivyopata kuwa. Mtume Paulo aandika hivi: “Naam, tukiujua wakati, kwamba saa ya kuamka katika usingizi imekwisha kuwadia; kwa maana sasa wokovu wetu u karibu nasi kuliko tulipoanza kuamini. Usiku umeendelea sana, mchana umekaribia.”—Warumi 13:11, 12.

22. Ukaribu wa wokovu wetu wapasa kutuathirije?

²² Wokovu wetu ukiwa umekaribia zaidi sana hivyo, ni lazima sisi tuendelee kukesha! Ni lazima tusikubali mapendezi yoyote ya kibinafsi au ya kilimwengu yawe ya maana zaidi ya uthamini wetu kwa yale ambayo Yehova anafanyia watu wake wakati huu wa mwisho. (Daniel 12:3) Sisi twahitaji kuonyesha uendelevu zaidi ya vile tumepata kufanya ili tusikengeushwe kutoka njia ambayo Neno la Mungu hutuonyesha waziwazi. (Mathayo 13:22) Ushuhuda waonyesha waziwazi kwamba ulimwengu huu umo katika siku zake za mwisho. Karibuni utafutiliwa mbali usiweko milele ili kuupa nafasi ule ulimwengu mpya wa uadilifu.—2 Petro 3:13.

23. Yehova atatusaidia katika njia gani, na kukiwa na tokeo lipi lenye baraka?

²³ Acheni basi, tuendelee kukesha kwa vyovyote. Zaidi ya ulivyopata kufanya, uwe chonjo kuhusu mahali tulipo katika mkondo wa wakati. Kumbuka, Yehova hatalala usingizi kamwe kuhusiana na hilo. Badala ya hivyo, atatusaidia sikuzote tuendelee kukesha katika wakati huu wa mwisho. Usiku umeendelea sana. Mchana unakaribia. Hivyo endelea kukesha! Karibuni sisi tutapata kuona siku iliyo nzuri zaidi ya siku zote, Ufalme wa Kimesiya utimizapo kusudi la Yehova kuelekea dunia!—Ufunuo 21:4, 5.

Majibu Yako Ni Nini?

◻ Yesu alimaanisha nini aliposema kwamba siku ya Mungu ya hasira ingewajilia watu “kama mtego”?

◻ Ni kwa nini ni lazima tupige vita dhidi ya kukengeushwa fikira, na twaweza kufanyaje hivyo?

◻ Ni sala ya aina gani inayohitajika ili kuendelea kukesha?

◻ Ni ushirika wa aina gani ulio wa muhimu?

◻ Kwa nini tujichunguze wenyewe kuhusu hali yetu ya kiroho?

◻ Unabii una sehemu gani katika kuendelea kwetu kukesha?