Maisha na Huduma ya Yesu
Yesu Amaliza Yote Ambayo Mungu Amwomba Afanye
WAKATI Shujaa wa Vita Mfalme Yesu Kristo amwondoshapo Shetani na ulimwengu wake usio mwadilifu, kutakuwa na sababu nzuri kama nini ya kushangilia! Mwishowe ule Utawala wa Miaka Elfu wenye amani wa Yesu waanza!
Chini ya mwelekezo wa Yesu na wafalme washirika wake, waokokaji wa Har–Magedoni wataondolea mbali magofu yalioachwa na vita hiyo ya uadilifu. Yaelekea waokokaji wa kidunia watazaa watoto pia kwa muda fulani, na hao watashiriki katika ile kazi yenye kupendeza ya kuilima dunia na kuigeuza iwe shamba lenye kupendeza sana mfano wa bustani.
Kwa wakati Yesu atatoa mamilioni yasiyokadiriwa kutoka makaburi yao waionee shangwe Paradiso hiyo nzuri. Atafanya hivyo katika kutimiza uhakikishio wake mwenyewe: “Saa yaja, ambayo watu wote waliomo makaburini . . . watatoka.”
Miongoni mwa hao wafufuliwao na Yesu atakuwamo yule aliyekuwa hapo kwanza mtenda maovu aliyekufa kando yake juu ya mti wa mateso. Kumbuka kwamba Yesu alimwahidi hivi: “Kweli kweli mimi nakuambia wewe leo, Wewe utakuwa na mimi katika Paradiso.” Hapana, mtu huyo hatachukuliwa mbinguni akatawale akiwa mfalme pamoja na Yesu, wala Yesu hatakuja tena awe binadamu na kuishi katika Paradiso hiyo duniani pamoja naye. Badala ya hivyo, Yesu atakuwa pamoja na huyo aliyekuwa hapo kwanza mtenda maovu katika maana ya kwamba Yeye atamfufua aishi katika Paradiso na kuhakikisha kwamba atimiziwa mahitaji yake, ya kimwili na ya kiroho, kama picha inavyoonyesha katika ukurasa huu.
Ebu fikiria hilo! Chini ya uangalizi wenye upendo wa Yesu, familia yote ya kibinadamu—waokokaji wa Har–Magedoni, wazao wao, na wale maelfu ya mamilioni ya wafu wafufuliwa wanaomtii—watakua kuelekea ukamilifu wa kibinadamu. Yehova, kwa njia ya Mwana wake wa kifalme, Yesu Kristo, atakaa kiroho pamoja na aina ya kibinadamu. “Na,” kama vile ile sauti aliyosikia Yohana isemavyo, “naye atafuta kila chozi katika macho yao, wala mauti haitakuwapo tena; wala maombolezo, wala kilio, wala maumivu hayatakuwapo tena.” Hakuna mtu duniani atateseka au kuwa mgonjwa.
Kufikia mwisho wa Utawala wa Miaka Elfu wa Yesu, hali itakuwa kama vile Mungu alivyokusudia mwanzoni wakati alipowaambia wenzi wa ndoa wa kwanza Adamu na Hawa, waongezeke na kui-jaza dunia. Ndiyo, dunia itajawa na jamii yenye uadilifu ya binadamu wakamilifu. Hiyo ni kwa sababu faida za dhabihu ya ukombozi ya Yesu zitakuwa zimetumiwa kwa kila mmoja. Kifo kwa sababu ya dhambi ya Adamu hakitakuwako tena!
Hivyo, Yesu atakuwa amekwisha timiza yote ambayo Yehova alimwomba afanye. Kwa hiyo, mwishoni mwa ile miaka elfu, atampa Baba yake Ufalme na familia ya kibinadamu iliyofanywa kuwa kamilifu. Ndipo Mungu atamwachilia Shetani na mashetani wake watoke katika abiso ya kutotenda iliyo mfano wa kifo. Kwa kusudi gani?
Basi, kufikia mwisho wa ile miaka elfu, walio wengi wa wale wanaoishi katika Paradiso watakuwa wale waliofufuliwa ambao imani yao haijajaribiwa kamwe. Kabla ya kufa, hawakuwa wamejua kamwe juu ya ahadi za Mungu na hivyo hawangeweza kuonyesha imani yao katika ahadi hizo. Halafu, baada ya kufufuliwa na kufundishwa kweli za Biblia, ilikuwa rahisi kwao kumtumikia Mungu katika Paradiso, bila upinzani wowote. Lakini kama Shetani angepewa fursa ajaribu kuwazuia wasiendelee kumtumikia Mungu, je! wangethibitisha ushikamanifu wao chini ya jaribu? Ili kuamua swali hilo, Shetani ataachiliwa.
Ufunuo aliopewa Yohana hufunua kwamba baada ya Utawala wa Miaka Elfu wa Yesu, Shetani atafaulu katika kugeuza hesabu ya watu wasiojulikana waache kumtumikia Mungu. Kisha, jaribu la mwisho likiisha malizika, Shetani, mashetani wake, na wale wote ambao atafaulu kuwapotosha wataharibiwa milele. Kwa upande mwingine, waokokaji waliojaribiwa kikamili wataendelea kuishi waonee shangwe baraka za Baba yao wa kimbingu kwa umilele wote.
Kwa wazi, Yesu ametimiza, na ataendelea kutimiza, fungu muhimu katika kutimiza makusudi matukufu ya Mungu. Lo, ni wakati ujao mtukufu kama nini tunaoweza kuuonea shangwe kama tokeo la yote atakayotimiza akiwa Mfalme mkuu wa kimbingu wa Mungu! Hata hivyo, sisi hatuwezi kusahau yote ambayo alifanya alipokuwa duniani akiwa binadamu.
Kwa moyo wa kupenda Yesu alikuja duniani na kutufundisha juu ya Baba yake. Zaidi ya hilo yeye alitoa kielelezo cha sifa zenye thamani kubwa za Mungu. Mioyo yetu inasukumwa wakati tufikiriapo ujasiri wake ulio bora sana na uanaume wake, hekima yake isiyolinganika, uwezo wake mwingi sana akiwa mwalimu, uongozi wake wa ujasiri, huruma zake nyororo na hisia zenye kusikitikia wengine. Tukumbukapo jinsi alivyoteseka kwa njia isiyoweza kuelezeka alipokuwa akitoa ukombozi, ambao kwa huo pekee twaweza kupata uhai, hakika mioyo yetu inasukumwa imthamini!
Kweli kweli, ni mtu wa namna gani tumeona katika funzo hili la maisha ya Yesu! Ukuu wake waonekana wazi nao ni mkubwa mno hata washinda fahamu zetu. Twasukumwa turudie maneno haya ya gavana Mroma Pontio Pilato: “Tazama, mtu huyu!”
Tukikubali uandalizi wa dhabihu yake ya ukombozi, ule mzigo wenye kulemea wa dhambi na kifo tulivyorithi kutoka kwa Adamu twaweza kuondolewa, na Yesu aweza kuwa “Baba wa Milele” wetu. Wale wote ambao wangependa kupata uhai wa milele lazima watwae maarifa ya kumjua si Mungu tu bali pia na Mwana wake, Yesu Kristo. Ni tumaini letu kwamba kusoma na kujifunza kwako mfululizo huu wa makala juu ya maisha na huduma ya Yesu kutakuwa kumekusaidia utwae maarifa hayo yenye kutoa uhai! 1 Yohana 2:17; 1:7; Yohana 5:28, 29; 3:16; 17:3; 19:5; Luka 23:43, NW; Mwanzo 1:28; 1 Wakorintho 15:24-28; Ufunuo 20:1-3, 6-10; 21:3, 4; Isaya 9:6.
◼ Ni nini litakalokuwa pendeleo lenye furaha la waokokaji wa Har–Magedoni na watoto wao?
◼ Ni nani wengine wataonea shangwe Paradiso kuongezea waokokaji wa Har–Magedoni na watoto wao, na ni katika maana gani Yesu atakuwa pamoja nao?
◼ Hali itakuwaje mwishoni mwa ile miaka elfu, na Yesu atafanya nini wakati huo?
◼ Ni kwa nini Shetani ataachiliwa kutoka katika abiso, na mwishowe atapatwa na nini?
◼ Yesu awezaje kuwa “Baba wa Milele” wetu?