“Ninampenda Baba”

1, 2. Mtume Yohana alifunua nini kuhusu jioni ya mwisho ambayo mitume walikuwa pamoja na Yesu?

MWANAMUME mwenye umri mkubwa anatia kalamu yake katika wino naye anakumbuka mambo mengi. Jina lake ni Yohana. Yeye ndiye mtume wa mwisho aliye hai kati ya mitume wote wa Yesu Kristo. Sasa Yohana ana umri wa miaka 100 hivi, naye anakumbuka yaliyotukia jioni moja isiyosahaulika miaka 70 hivi iliyopita. Hiyo ilikuwa jioni ya mwisho ambayo yeye na mitume wenzake walikuwa pamoja na Yesu kabla ya kifo Chake. Roho takatifu ya Mungu inamwezesha Yohana kukumbuka na kuandika matukio ya jioni hiyo kwa undani.

² Usiku huo, Yesu alitaja waziwazi kwamba muda mfupi baadaye angeuawa. Yohana tu ndiye anayefunua ni kwa nini Yesu alisema angekubali kufa kifo chenye maumivu makali: “Ili ulimwengu ujue kwamba ninampenda Baba, ninafanya kama vile Baba alivyoniamuru. Simameni tuondoke hapa.”​—Yohana 14:31.

3. Yesu alionyeshaje kwamba anampenda Baba yake?

³ “Ninampenda Baba.” Hilo lilikuwa jambo kuu zaidi maishani mwa Yesu. Haimaanishi kwamba alikuwa akiyarudia-rudia maneno hayo. Katika Biblia nzima, ni andiko la Yohana 14:31 tu linalomnukuu Yesu akitaja moja kwa moja kwamba anampenda Baba yake. Hata hivyo, maisha ya Yesu yalithibitisha ukweli wa maneno hayo. Kila siku alionyesha kwamba anampenda Yehova. Ujasiri, utii, na uvumilivu wa Yesu ni sifa zilizothibitisha kwamba anampenda Mungu. Huduma yake yote ilichochewa na upendo huo.

4, 5. Biblia inazungumzia upendo wa aina gani, nasi tunaweza kusema nini kuhusu jinsi Yesu alivyompenda Yehova?

⁴ Leo, huenda wengine wakafikiri kwamba kuonyesha upendo ni udhaifu. Labda wanafikiri ni upendo unaoimbwa katika mashairi na nyimbo za mapenzi au wanafikiri ni hisia zenye msisimko ambazo nyakati nyingine zinakuwa kati ya watu wenye upendo wa kimahaba. Ni kweli kwamba Biblia inazungumzia upendo wa kimahaba, hata hivyo, inauzungumzia kwa njia ya heshima. (Methali 5:15-21) Lakini Neno la Mungu linazungumzia sana upendo wa aina nyingine. Upendo huo si msisimuko tu au hisia za muda; wala si utaalamu wa kushughulika na watu wengine bila hisia zozote, bali unahusisha moyo na akili. Upendo huo unatoka moyoni, unaongozwa na kanuni za juu, na unaonyeshwa kupitia matendo yenye kujenga. Si wa kijuujuu tu. Neno la Mungu linasema kwamba “upendo haushindwi kamwe.”​—1 Wakorintho 13:8.

⁵ Kati ya wanadamu wote ambao wameishi, Yesu ndiye aliyempenda Yehova zaidi. Hakuna yeyote aliyemzidi Yesu kwa kuishi kulingana na maneno ambayo yeye mwenyewe alinukuu kuwa amri ya Mungu iliyo kuu zaidi: “Lazima umpende Yehova Mungu wako kwa moyo wako wote na kwa nafsi yako yote na kwa akili yako yote na kwa nguvu zako zote.” (Marko 12:30) Yesu alisitawishaje upendo huo? Alipokuwa duniani, ni nini kilichomwezesha kuendelea kumpenda sana Mungu? Nasi tunawezaje kumwiga?

Kifungo cha Muda Mrefu Zaidi na Chenye Nguvu Zaidi cha Upendo

6, 7. Ni nini kinachoonyesha kwamba andiko la Methali 8:22-31 linamfafanua Mwana wa Mungu, bali si sifa ya hekima tu?

⁶ Je, umewahi kufanya kazi fulani pamoja na rafiki yako na kadiri muda ulivyopita urafiki wenu ukazidi kukua? Ikiwa umewahi, unaweza kuelewa upendo uliositawi kati ya Yehova na Mwana wake mzaliwa-pekee. Tumetaja andiko la Methali 8:30 mara kadhaa, lakini acheni tuuchunguze zaidi mstari huo tukizingatia muktadha wake. Katika mstari wa 22 hadi 31, tunapata ufafanuzi ulioongozwa na roho wa hekima inayozungumziwa kana kwamba ni mtu. Ni nini kinachoonyesha kwamba maneno hayo yanamhusu Mwana wa Mungu?

⁷ Katika mstari wa 22, hekima inasema: “Yehova aliniumba mwanzoni mwa njia yake, mwanzo kabisa wa kazi zake za zamani za kale.” Kinachozungumziwa hapa si sifa ya hekima tu, kwa sababu sifa hiyo ‘haikutokezwa.’ Haina mwanzo kwa kuwa Yehova hana mwanzo, naye amekuwa na hekima sikuzote. (Zaburi 90:2) Hata hivyo, Mwana wa Mungu ni “mzaliwa wa kwanza wa viumbe vyote.” Aliumbwa; yeye ndiye wa kwanza katika uumbaji wote wa Yehova. (Wakolosai 1:15) Mwana huyo alikuwako kabla ya dunia na mbingu, kama kitabu cha Methali kinavyosema. Na akiwa Neno, Msemaji wa Mungu mwenyewe, basi angeweza kuonyesha hekima ya Yehova kikamili.​—Yohana 1:1.

8. Mwana alikuwa akifanya nini kabla ya kuja duniani, na tunaweza kufikiria uhusiano gani tunapostaajabia uumbaji?

⁸ Mwana huyo alikuwa akifanya nini kwa muda mrefu sana kabla ya kuja duniani? Mstari wa 30 unatuambia kwamba alikuwa kando ya Mungu akiwa “mfanyakazi stadi.” Hilo linamaanisha nini? Andiko la Wakolosai 1:16 linasema: “Kupitia kwake vitu vingine vyote viliumbwa mbinguni na duniani . . . Vitu vingine vyote vimeumbwa kupitia kwake na kwa ajili yake.” Hivyo basi, Yehova, Muumba, alimtumia Mwana wake, Mfanyakazi Stadi, kuumba uumbaji mwingine wote—viumbe wa roho walio mbinguni, ulimwengu mzima, dunia yenye mimea na wanyama wa aina mbalimbali, na viumbe wa hali ya juu zaidi duniani, yaani, wanadamu. Tunaweza kulinganisha uhusiano huo kati ya Baba na Mwana na ule wa msanifu majengo na mjenzi mwenye ustadi wa kujenga majengo kulingana na ubunifu wa msanifu majengo. Tunapostaajabia uumbaji fulani, kwa kweli tunamsifu Msanifu Majengo Aliye Mkuu Zaidi. (Zaburi 19:1) Hata hivyo, hatusahau ushirikiano wa muda mrefu na wenye furaha kati ya Muumba na ‘mfanyakazi wake stadi.’

9, 10. Ni nini kilichofanya uhusiano kati ya Yehova na Mwana wake uwe imara? (b) Ni nini kinachoweza kuimarisha kifungo chako pamoja na Baba yako wa mbinguni?

⁹ Wanadamu wawili wasio wakamilifu wanapofanya kazi pamoja, nyakati nyingine wanaweza kukosana. Haikuwa hivyo kati ya Yehova na Mwana wake! Mwana alifanya kazi kwa muda mrefu sana pamoja na Baba yake, naye ‘alishangilia mbele zake wakati wote.’ (Methali 8:30) Ndiyo, alifurahia kuwa pamoja na Baba yake, na Baba yake alifurahi pia. Kama inavyotarajiwa, Mwana huyo alizidi kuwa kama Baba yake, akijifunza kuiga sifa za Mungu. Basi, haishangazi kwamba kifungo kati ya Baba na Mwana kilikuwa imara zaidi! Kifungo hicho kinastahili kuitwa kifungo cha muda mrefu zaidi na chenye nguvu zaidi cha upendo ulimwenguni.

¹⁰ Hata hivyo, hilo linamaanisha nini kwetu? Huenda ukahisi huwezi kamwe kuwa na uhusiano wa karibu hivyo pamoja na Yehova. Ni kweli kwamba hakuna yeyote kati yetu aliye na cheo kikubwa kama Mwana. Hata hivyo, tuna pendeleo la pekee. Kumbuka kwamba Yesu alimkaribia Baba yake kwa kufanya kazi pamoja Naye. Kwa upendo, Yehova anatupatia nafasi ya kuwa “wafanyakazi wenzi” pamoja naye. (1 Wakorintho 3:9) Tunapofuata mfano wa Yesu katika huduma, sikuzote tunapaswa kukumbuka kwamba sisi ni wafanyakazi wenzi wa Mungu. Hivyo, kifungo cha upendo kinachotuunganisha na Yehova kinazidi kuwa imara. Hilo ni pendeleo kubwa, sivyo?

Kilichomwezesha Yesu Kuendelea Kumpenda Sana Yehova

11-13. (a) Kwa nini tuuone upendo kama kitu kilicho hai, na Yesu alipokuwa mvulana, alifanya nini ili upendo wake kwa Yehova uendelee kuwa imara? (b) Mwana wa Mungu alionyeshaje kwamba alipenda kujifunza kumhusu Yehova kabla ya kuja duniani na hata baadaye alipokuwa mwanadamu?

¹¹ Inafaa kuuona upendo ulio moyoni mwetu kama kitu kilicho hai. Kama vile maua mazuri kwenye bustani, upendo unahitaji kutiwa mbolea na kutunzwa ili ukue na kusitawi. Ukipuuzwa na usipotunzwa, utadhoofika na kufa. Yesu hakupuuza upendo wake kwa Yehova. Aliuimarisha na kuendelea kuukuza wakati wote alipokuwa duniani. Acheni tuone jinsi alivyofanya hivyo.

¹² Fikiria tena pindi ambayo Yesu alizungumza kwa ujasiri hekaluni huko Yerusalemu alipokuwa mtoto. Kumbuka jinsi alivyowaambia wazazi wake waliokuwa na wasiwasi: “Kwa nini mlikuwa mkinitafuta? Je, hamkujua kwamba ninapaswa kuwa katika nyumba ya Baba yangu?” (Luka 2:49) Alipokuwa mvulana, huenda Yesu hangeweza kukumbuka maisha yake kabla ya kuja duniani. Hata hivyo, alimpenda sana Yehova, Baba yake. Alijua kwamba angeweza kuonyesha upendo huo katika ibada. Kwa hiyo, hakuna mahali popote duniani ambapo pangempendeza zaidi Yesu kuliko nyumba ya ibada safi ya Baba yake. Alitamani sana kuwa humo, naye hakutaka kuondoka. Isitoshe, hakuwa mtazamaji tu. Alikuwa na hamu ya kujifunza kumhusu Yehova na kuzungumzia mambo aliyoyajua. Yesu alianza kuwa na tamaa hiyo alipokuwa na umri wa miaka 12 na iliendelea maisha yake yote.

¹³ Kabla ya kuja duniani, Mwana huyo alikuwa amejifunza kwa makini kutoka kwa Baba yake. Unabii ulio katika Isaya 50:4-6 unaonyesha kwamba Yehova alimpa Mwana wake elimu ya pekee kuhusu jukumu lake akiwa Masihi. Ingawa elimu hiyo ilitia ndani kujifunza baadhi ya hali ngumu ambazo zingempata Mtiwa-Mafuta wa Yehova, bado Mwana huyo alikuwa na hamu ya kujifunza. Baadaye, baada ya Yesu kuja duniani na kuwa mtu mzima, aliendelea kuwa na hamu ya kwenda kwenye nyumba ya Baba yake na kushiriki katika ibada na elimu ambayo Yehova alitaka iendelezwe humo. Hivyo, Biblia inaeleza jinsi Yesu alivyokuwa na mazoea ya kwenda hekaluni na katika sinagogi. (Luka 4:16; 19:47) Ikiwa tunataka kuendelea kumpenda Yehova, tunahitaji kuhudhuria mikutano ya Kikristo kwa ukawaida, ambako tunamwabudu Yehova, tunajifunza mengi zaidi kumhusu, na kuendelea kumthamini.

14, 15. (a) Kwa nini nyakati nyingine Yesu alitafuta nafasi ya kuwa peke yake? (b) Ni kwa njia gani sala za Yesu kwa Baba yake zilionyesha heshima na uhusiano wa karibu waliokuwa nao?

¹⁴ Pia, kusali kwa ukawaida kulimwezesha Yesu kuendelea kumpenda Yehova. Ingawa alikuwa mtu mwenye urafiki na mchangamfu, nyakati nyingine aliona faida ya kuwa peke yake. Kwa mfano, andiko la Luka 5:16 linasema: “Mara kwa mara alienda mahali pasipo na watu ili kusali.” Vivyo hivyo, andiko la Mathayo 14:23 linasema: “Baada ya kuuaga umati, akapanda mlimani akiwa peke yake ili kusali. Ilipofika jioni, alikuwa peke yake huko.” Nyakati nyingine, Yesu alipenda kuwa peke yake mahali pasipo na watu si kwa sababu hakupenda kuwa na watu au alichukia ushirika wa wengine, bali kwa sababu alitaka kuwa peke yake pamoja na Yehova ili azungumze na Baba yake kwa uhuru katika sala.

¹⁵ Nyakati nyingine, Yesu aliposali alitumia maneno “Abba, Baba.” (Marko 14:36) Katika siku za Yesu, “Abba” ni neno lililotumiwa katika familia ambalo lilimaanisha “baba,” nalo lilionyesha uhusiano wa karibu kati ya baba na mtoto. Mara nyingi, lilikuwa miongoni mwa maneno ya kwanza ambayo mtoto alijifunza kutamka. Hata hivyo, lilikuwa neno la heshima. Ingawa neno hilo lilionyesha uhusiano wa karibu wa Mwana anayezungumza na Baba yake mpendwa, lilionyesha pia heshima kubwa kwa mamlaka ya Yehova akiwa baba. Tunaona uhusiano huo wa karibu na pia heshima katika sala zote za Yesu zilizo katika Biblia. Kwa mfano, katika Yohana sura ya 17, mtume Yohana aliandika sala ndefu ya kutoka moyoni ambayo Yesu alitoa katika usiku wake wa mwisho. Tunachochewa kujifunza kuhusu sala hiyo, na ni muhimu kwetu kuiga, si kwa kurudia-rudia maneno ya Yesu, bali kwa kutafuta njia za kuongea na Baba yetu wa mbinguni kutoka moyoni mara nyingi iwezekanavyo. Kufanya hivyo kutatusaidia kuendelea kumpenda sana.

16, 17. (a) Maneno ambayo Yesu alisema yalionyeshaje kwamba anampenda Baba yake? (b) Yesu alionyeshaje ukarimu kama wa Baba yake?

¹⁶ Kama tulivyoona mapema, Yesu hakurudia-rudia kusema “Ninampenda Baba.” Hata hivyo, mara nyingi maneno yake yalionyesha kwamba anampenda Baba yake. Jinsi gani? Yesu mwenyewe alisema: “Ninakusifu hadharani, Baba, Bwana wa mbingu na dunia.” (Mathayo 11:25) Katika Sehemu ya 2 ya kitabu hiki, tuliona kwamba Yesu alipenda kumsifu Baba yake kwa kuwasaidia watu wamjue Yeye. Kwa mfano, alimlinganisha Yehova na baba aliyekuwa tayari sana kumsamehe mwana wake aliyepotoka hivi kwamba alimsubiri kijana huyo aliyetubu, na alipomwona kutoka mbali akakimbia ili kumlaki na akamkumbatia. (Luka 15:20) Ni nani anayeweza kusoma simulizi hilo bila kuguswa moyo na jinsi Yesu anavyoufafanua upendo na msamaha wa Yehova?

¹⁷ Mara nyingi, Yesu alimsifu Baba yake kwa ukarimu Wake. Alitumia mfano wa wazazi wasio wakamilifu kuonyesha jinsi tunavyoweza kuwa na uhakika kwamba Baba yetu atatupatia roho takatifu tunayohitaji. (Luka 11:13) Pia, Yesu alizungumzia tumaini ambalo Baba anatoa kwa ukarimu. Yesu alizungumzia kwa hamu tumaini lake mwenyewe la kuketi tena kando ya Baba yake mbinguni. (Yohana 14:28; 17:5) Aliwaambia wafuasi wake kuhusu tumaini ambalo Yehova anawapa “kundi dogo” la Kristo—kuishi na kutawala pamoja na Mfalme wa Kimasihi mbinguni. (Luka 12:32; Yohana 14:2) Naye alimfariji mhalifu aliyekuwa akikaribia kufa kwa kumpa tumaini la kuishi katika Paradiso. (Luka 23:43) Bila shaka, kuzungumzia ukarimu mwingi wa Baba yake katika njia hizo kulimsaidia Yesu kuendelea kumpenda sana Yehova. Wafuasi wengi wa Kristo wameona kwamba kuzungumza kumhusu Yehova na tumaini ambalo anawapa wale wanaompenda ndilo jambo linalowasaidia kuendelea kumpenda na kumwamini hata zaidi.

Je, Utamwiga Yesu Katika Kumpenda Yehova?

18. Tunapaswa kumwiga Yesu katika jambo gani muhimu, na kwa nini?

¹⁸ Tunapaswa kumwiga Yesu katika jambo hili muhimu: Ni lazima tumpende Yehova kwa moyo, nafsi, akili, na kwa nguvu zetu zote. (Luka 10:27) Upendo huo hauonyeshwi tu kwa kuwa na hisia nyingi bali pia kwa matendo yetu. Yesu hakuridhika tu kwa kuhisi kwamba anampenda Baba yake wala kwa kusema tu, “Ninampenda Baba.” Alisema: “Lakini, ili ulimwengu ujue kwamba ninampenda Baba, ninafanya kama vile Baba alivyoniamuru.” (Yohana 14:31) Shetani alikuwa amedai kwamba hakuna mwanadamu anayeweza kumtumikia Yehova kwa kuchochewa na upendo usio na ubinafsi. (Ayubu 2:4, 5) Ili kutoa jibu linalofaa dhidi ya uchongezi wa Shetani, Yesu alichukua hatua kwa ujasiri na kuuonyesha ulimwengu jinsi alivyompenda sana Baba yake. Alitii hata kufikia hatua ya kutoa uhai wake. Je, utamwiga Yesu? Je, utauonyesha ulimwengu kwamba kwa kweli unampenda Yehova Mungu?

19, 20. (a) Kwa nini ni muhimu kuhudhuria mikutano ya Kikristo kwa ukawaida? (b) Tunapaswa kuzionaje pindi za kujifunza kibinafsi, kutafakari, na kusali?

¹⁹ Tuna uhitaji mkubwa wa kiroho wa kuonyesha upendo kama huo. Yehova amefanya mpango ili tumwabudu kwa njia ambayo upendo tulio nao kumwelekea utaendelea kukua na kuimarika. Unapohudhuria mikutano ya Kikristo, jitahidi kukumbuka kwamba umeenda kumwabudu Mungu wako. Ibada hiyo inatia ndani kuungana na wengine katika sala ya kutoka moyoni, kuimba nyimbo za sifa, kusikiliza kwa makini, na kushiriki kutoa maelezo inapowezekana. Mikutano hiyo pia hukupa nafasi ya kuwatia moyo Wakristo wenzako. (Waebrania 10:24, 25) Kumwabudu Yehova kwa ukawaida kwenye mikutano ya Kikristo kutakusaidia kumpenda Mungu hata zaidi.

²⁰ Vivyo hivyo, tutampenda Yehova hata zaidi kwa kujifunza kibinafsi, kutafakari, na kusali. Zione hizo kuwa pindi za kuwa peke yako pamoja na Yehova. Unapojifunza Neno la Mungu lililoandikwa na kulitafakari, Yehova anakujulisha mawazo yake. Unaposali, unamfunulia yaliyo moyoni mwako. Kumbuka kwamba sala si kumwomba tu Mungu akupe kitu fulani, au kukufanyia jambo fulani. Pia, sala hukupatia nafasi ya kumshukuru Yehova kwa baraka ambazo umepata na kumsifu kwa kazi zake zenye kustaajabisha. (Zaburi 146:1) Isitoshe, kumsifu Yehova hadharani kwa shangwe na shauku ni njia nzuri ya kumshukuru Yehova na kumwonyesha kwamba unampenda.

21. Kwa nini ni muhimu kumpenda Yehova, na ni nini kitakachozungumziwa katika sura zinazofuata?

²¹ Kumpenda Mungu kutakuwezesha kupata furaha ya milele. Hilo tu ndilo jambo ambalo Adamu na Hawa walihitaji kufanya ili wafanikiwe, na walishindwa kulifanya. Upendo wetu kwa Mungu ndilo jambo muhimu zaidi tunalohitaji ili kupinga na kushinda kishawishi au kuvumilia jaribu lolote la imani. Kumpenda Mungu ndio msingi wa kuwa mfuasi wa Yesu. Bila shaka, kumpenda Mungu kunatia ndani kuwapenda wanadamu wenzetu. (1 Yohana 4:20) Katika sura zinazofuata, tutachunguza jinsi Yesu alivyowapenda watu. Katika sura inayofuata, tutazungumzia kwa nini watu wengi sana walikuwa huru kumkaribia Yesu.