Maisha na Huduma ya Yesu

Kuonea Shangwe Uhusiano wa Karibu

KUFUATIA chakula cha ukumbusho, Yesu amekuwa akiwatia moyo mitume wake kwa hotuba isiyo rasmi ya kufunuliana yaliyomo moyoni. Yaweza kuwa ni baada ya usiku-kati. Kwa hiyo Yesu asihi hivi: “Ondokeni, twendeni zetu.” Hata hivyo, kabla hawajaondoka, Yesu, kwa kusukumwa na upendo wake kwa ajili yao, aendelea kunena, akiandaa kielezi chenye kuchochea.

“Mimi ndimi mzabibu wa kweli, na Baba yangu ndiye mkulima,” aanza. Mkulima Mkuu, Yehova Mungu, alipanda mzabibu huo wa mfano alipompaka mafuta Yesu kwa roho takatifu wakati wa ubatizo wake katika vuli ya 29 W.K. Lakini Yesu aendelea kuonyesha kwamba mzabibu huo wafananisha zaidi ya yeye tu, akionelea hivi:

“Kila tawi ndani yangu lisilozaa huliondoa; na kila tawi lizaalo hulisafisha, ili lizidi kuzaa. . . . Kama vile tawi lisivyoweza kuzaa peke yake, lisipokaa ndani ya mzabibu; kadhalika nanyi, msipokaa ndani yangu. Mimi ni mzabibu; ninyi ni matawi.”

Penye Pentekoste, siku 51 baadaye, mitume na wengine wawa matawi ya mzabibu huo wakati roho takatifu inapomwagwa juu yao. Hatimaye watu 144,000, wawa matawi ya mzabibu wa kitamathali. Pamoja na shina la mzabibu, Yesu Kristo, wao wajumlika kuwa mzabibu wa mfano unaozaa matunda ya Ufalme wa Mungu.

Yesu afafanua ufunguo wa kuzaa matunda: “Akaaye ndani yangu nami ndani yake, huyo huzaa sana; maana pasipo mimi ninyi hamwezi kufanya neno lo lote.” Hata hivyo, ikiwa mtu anashindwa kuzaa matunda, Yesu asema, “hutupwa nje kama tawi na kunyauka; watu huyakusanya na kuyatupa motoni yakateketea.” Kwa upande mwingine, Yesu aahidi hivi: “Ninyi mkikaa ndani yangu, na maneno yangu yakikaa ndani yenu, ombeni mtakalo lote nanyi mtatendewa.”

Yesu aendelea kuonyesha mitume wake kinachomtukuza Baba, yaani, ‘kuzaa sana na kuwa wanafunzi wangu.’ Matunda anayotamani Mungu kutoka kwa matawi hayo ni udhihirisho wao wa sifa kama za Kristo, hasa upendo. Zaidi ya hayo, kwa kuwa Kristo alikuwa mpiga mbiu wa Ufalme wa Mungu, tunda lenye kutamanika latia ndani pia utendaji wao wa kufanya wanafunzi sawa na alivyofanya yeye.

“Kaeni katika pendo langu,” sasa asihi Yesu. Hata hivyo, mitume wake wawezaje kufanya hivyo? “Mkizishika amri zangu,” yeye asema, “mtakaa katika pendo langu.” Akiendelea, Yesu aeleza hivi: “Amri yangu ndiyo hii, Mpendane, kama nilivyowapenda ninyi. Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake.”

Baada ya saa chache, Yesu atadhihirisha upendo huu unaozidi kwa kutoa uhai wake kwa ajili ya mitume wake, na pia kwa ajili ya wengine wote watakaozoea imani katika yeye. Kielelezo chake chapasa kusukuma wafuasi wake wawe na upendo uo huo wa kujidhabihu kwa ajili ya mmoja na mwenzake. Upendo huo utawatambulisha, kama alivyosema Yesu mapema zaidi: “Hivyo watu wote watatambua ya kuwa ninyi mmekuwa wanafunzi wangu, mkiwa na upendo ninyi kwa ninyi.”

Akitambulisha walio marafiki wake, Yesu asema: “Ninyi mmekuwa rafiki za-ngu, mkitenda niwaamuruyo. Siwaiti tena watumwa; kwa maana mtumwa hajui atendalo bwana wake; lakini ninyi nimewaita rafiki; kwa kuwa yote niliyoyasikia kwa Baba yangu nimewaarifu.”

Huo ni uhusiano ulio na thamani kama nini kuwa nao—kuwa marafiki wa karibu wa Yesu! Lakini ili kuendelea kuonea shangwe uhusiano huo, wafuasi wake wapaswa kuendelea ‘kuzaa.’ Wakifanya hivyo, Yesu asema, “lo lote mmwombalo Baba kwa jina langu a[ta]wapeni.” Hakika, hiyo ni thawabu tukufu kwa ajili ya matunda ya Ufalme!

Baada ya kuwahimiza tena mitume wake ‘wapendane,’ Yesu aeleza kwamba ulimwengu utawachukia. Hata hivyo, yeye awafariji hivi: “Iwapo ulimwengu ukiwachukia, mwajua ya kuwa umenichukia mimi kabla ya kuwachukia ninyi.” Kisha Yesu afunua ni kwa nini ulimwengu huchukia wafuasi wake, akisema hivi: “Kwa kuwa ninyi si wa [si sehemu ya, NW] ulimwengu, bali mimi naliwachagua katika ulimwengu, kwa sababu hiyo ulimwengu huwachukia.”

Akiendelea kufafanua sababu ya chuki ya ulimwengu, Yesu aendelea kusema hivi: “Haya yote watawatenda kwa ajili ya jina langu, kwa kuwa hawamjui yeye [Yehova Mungu] aliyenipeleka.” Kazi za kimwujiza za Yesu, kama ilivyo, zawahukumu wale wanaomchukia yeye, kama asemavyo: “Kama nisingalitenda kwao kazi asizozitenda mtu mwingine, wasingalikuwa na dhambi; lakini sasa wametuona mimi na Baba yangu na kutuchukia.” Kwa hiyo, kama alivyosema Yesu, andiko limetimizwa: “Walinichukia bure.”

Kama alivyofanya mapema, kwa mara nyingine Yesu awafariji kwa kuahidi kupeleka msaidizi, roho takatifu, ambayo ni kani ya utendaji ya Mungu yenye uwezo. “Yeye atanishuhudia [hiyo itatoa ushahidi juu yangu mimi, NW]. Nanyi pia mnashuhudia.” Yohana 14:31–15:27; 13:3, 35; Wagalatia 6:16; Zaburi 35:19; 69:4.

▪ Yehova alipanda lini mzabibu wa mfano, na ni lini na jinsi gani wengine wanakuwa sehemu ya mzabibu huo?

▪ Hatimaye, mzabibu wa mfano wawa na matawi mangapi?

▪ Mungu atamani matunda gani kutoka kwa matawi hayo?

▪ Twawezaje kuwa marafiki wa Yesu?

▪ Ni kwa nini ulimwengu wachukia wafuasi wa Yesu?