Sura 18
Kufanye Kumtumikia Mungu Milele Kuwe Lengo Lako
1, 2. Ni nini kinachotakiwa zaidi ya kuwa na ujuzi juu ya Mungu?
EBU wazia kwamba umesimama mbele ya mlango uliofungwa kufuli uongozao kwenye chumba chenye hazina nyingi. Tuseme kwamba mtu fulani mwenye mamlaka amekupa wewe ufunguo na amekuambia ujitwalie vitu hivyo vyenye thamani. Ufunguo huo hautakufaidi usipoutumia. Vivyo hivyo, ni lazima utumie ujuzi ikiwa utakunufaisha.
2 Ni hivyo hasa kwa habari ya ujuzi juu ya Mungu. Kwa kweli, ujuzi sahihi juu ya Yehova Mungu na Yesu Kristo humaanisha uhai udumuo milele. (Yohana 17:3) Hata hivyo, taraja hilo haliwezi kufikiwa kwa kuwa tu na ujuzi huo. Kama vile ungetumia ufunguo unaothaminiwa, wewe wahitaji kutumia ujuzi juu ya Mungu maishani mwako. Yesu alisema kwamba wale wafanyao mapenzi ya Mungu ndio ‘wangeingia katika ufalme.’ Watu hao wangekuwa na pendeleo la kumtumikia Mungu milele!—Mathayo 7:21; 1 Yohana 2:17.
3. Mapenzi ya Mungu ni nini kwetu?
3 Baada ya kujifunza mapenzi ya Mungu ni nini, ni muhimu kuyafanya. Je, unafikiri mapenzi ya Mungu ni nini kwako? Yangeweza kujumlishwa kwa maneno haya: Mwige Yesu. Petro wa Kwanza 2:21 latuambia hivi: “Kwa sababu ndio mlioitiwa; maana Kristo naye aliteswa kwa ajili yenu, akawaachia kielelezo, mfuate nyayo zake [“kwa ukaribu,” NW].” Basi, ili kufanya mapenzi ya Mungu, wewe wahitaji kufuata kielelezo cha Yesu kwa ukaribu zaidi iwezekanavyo. Hivyo ndivyo unavyoutumia ujuzi juu ya Mungu.
JINSI YESU ALIVYOTUMIA UJUZI JUU YA MUNGU
4. Sababu gani Yesu anajua mengi sana juu ya Yehova, naye ametumiaje ujuzi huu?
4 Yesu Kristo ana ujuzi wenye ukaribu zaidi juu ya Mungu kuliko wengine. Yeye aliishi na kufanya kazi pamoja na Yehova Mungu mbinguni kwa enzi nyingi kabla ya kuja duniani. (Wakolosai 1:15, 16) Na Yesu alifanya nini na ujuzi huo wote? Yeye hakutosheka na kuwa nao tu. Yesu aliishi kulingana nao. Hiyo ndiyo sababu alikuwa mwenye fadhili, mwenye subira, na mwenye upendo sana katika kushughulika kwake na wanadamu wenzake. Hivyo ndivyo Yesu alivyokuwa akimwiga Baba yake wa kimbingu na kutenda kwa kupatana na ujuzi wake juu ya njia na utu wa Yehova.—Yohana 8:23, 28, 29, 38; 1 Yohana 4:8.
5. Sababu gani Yesu alibatizwa, naye aliishije kulingana na maana ya ubatizo wake?
5 Ujuzi ambao Yesu alikuwa nao ulikuwa umemsukuma pia achukue hatua ya maana. Yeye alitoka Galilaya kwenda kwenye Mto Yordani, ambako Yohana alimbatiza. (Mathayo 3:13-15) Ubatizo wa Yesu ulifananisha nini? Akiwa Myahudi, yeye alizaliwa ndani ya taifa lililokuwa limewekwa wakfu kwa Mungu. Kwa hiyo, Yesu alikuwa amejiweka wakfu tangu azaliwe. (Kutoka 19:5, 6) Kwa kujitiisha kwenye ubatizo, alikuwa akijitokeza kwa Yehova ili kufanya mapenzi ya kimungu aliyotakiwa ayafanye wakati huo. (Waebrania 10:5, 7) Na Yesu aliishi kulingana na maana ya ubatizo wake. Alijitahidi sana katika utumishi wa Yehova, akishiriki na watu ujuzi juu ya Mungu kwenye kila fursa. Yesu alipata furaha katika kufanya mapenzi ya Mungu, hata akisema kwamba kufanya hivyo kulikuwa kama chakula kwake.—Yohana 4:34.
6. Yesu alijikana kwa njia gani?
6 Yesu aling’amua kikamili kwamba kufanya mapenzi ya Yehova kungekuwa jambo la kugharimu sana—kwamba kungemgharimu hata uhai wake. Hata hivyo, Yesu alijikana, akiweka mahitaji yake ya kibinafsi katika mahali pa pili. Kufanya mapenzi ya Mungu kulitangulia sikuzote. Kwa habari hiyo, sisi twaweza kufuataje kielelezo kikamilifu cha Yesu?
HATUA ZIONGOZAZO KWENYE UHAI WA MILELE
7. Ni nini baadhi ya hatua ambazo ni lazima mtu achukue ili astahili kubatizwa?
7 Tofauti na Yesu, sisi si wakamilifu na tunaweza kufikia hatua ya ubatizo baada tu ya kuchukua hatua nyingine ya muhimu. Hilo huanza kwa kutwaa ndani ya moyo wetu ujuzi sahihi juu ya Yehova Mungu na Yesu Kristo. Kufanya hivyo hutufanya tudhihirishe imani na kumpenda Mungu sana. (Mathayo 22:37-40; Warumi 10:17; Waebrania 11:6) Kutii sheria, kanuni, na viwango vya Mungu kunapaswa kutusukume tutubu, tukionyesha huzuni ya kimungu juu ya dhambi zetu za wakati uliopita. Hili huongoza kwenye mgeuko, yaani, kugeuka kabisa na kuacha mwendo wowote tuliofuata tulipokuwa hatuna ujuzi juu ya Mungu. (Matendo 3:19) Kwa asili, ikiwa bado tunazoea dhambi fulani kisiri badala ya kufanya yaliyo ya uadilifu, sisi hatujageuka kwa kweli, wala hatujamdanganya Mungu. Yehova huona unafiki wote.—Luka 12:2, 3.
8. Ni hatua gani upaswayo kuchukua unapotamani kushiriki katika utendaji wa kuhubiri Ufalme?
8 Sasa kwa kuwa umekuwa ukitwaa ujuzi juu ya Mungu, je, haifai ufikirie mambo ya kiroho kwa njia ya kibinafsi sana? Labda una hamu ya kuwaambia watu wako wa ukoo, rafiki zako, na wengine juu ya yale unayojifunza. Kwa kweli, huenda ukawa umekuwa ukifanya hivyo tayari, sawa na vile Yesu alivyoshiriki habari njema na wengine katika hali zisizo rasmi. (Luka 10:38, 39; Yohana 4:6-15) Sasa huenda ukataka kufanya zaidi. Wazee Wakristo watafurahi kuongea nawe ili waamue kama unastahili na unaweza kushiriki kadiri fulani katika utendaji wa Mashahidi wa Yehova wa kuhubiri Ufalme. Ikiwa unastahili, wazee watafanya mipango ili uweze kuandamana na Shahidi fulani katika huduma. Wanafunzi wa Yesu walifuata maagizo yake ili kutimiza huduma yao kwa njia yenye utaratibu. (Marko 6:7, 30; Luka 10:1) Utanufaika kutokana na msaada kama huo unaposhiriki katika kueneza ujumbe wa Ufalme nyumba kwa nyumba na kwa njia nyinginezo.—Matendo 20:20, 21.
9. Mtu hujiwekaje wakfu kwa Mungu, na wakfu unaathirije maisha ya mtu?
9 Kuhubiri habari njema kwa watu wa aina zote katika eneo la kutaniko ni njia ya kupata wale wenye mwelekeo mwadilifu na ni miongoni mwa matendo mema yanayothibitisha kwamba una imani. (Matendo 10:34, 35; Yakobo 2:17, 18, 26) Kuhudhuria mikutano ya Kikristo kwa ukawaida na kushiriki sehemu ya maana katika kazi ya kuhubiri pia ni njia za kuonyesha kwamba umetubu na kugeuka kabisa na kwamba sasa umeazimia kuishi kulingana na ujuzi juu ya Mungu. Ni hatua gani inayofaa kufuata? Ni kujiweka wakfu kwa Yehova Mungu. Hilo humaanisha kwamba katika sala ya kuhisiwa moyoni, unamwambia Mungu kwamba unamtolea maisha yako kwa hiari na kwa moyo wote ili ufanye mapenzi yake. Hii ndiyo njia ya kujiweka wakfu kwa Yehova na kukubali nira yenye fadhili ya Yesu Kristo.—Mathayo 11:29, 30.
UBATIZO—UNACHOMAANISHA KWAKO
10. Sababu gani unapaswa kubatizwa baada ya kujiweka wakfu kwa Yehova?
10 Kulingana na Yesu, ni lazima wale wote wanaokuwa wanafunzi wake wabatizwe. (Mathayo 28:19, 20) Sababu gani jambo hili ni la lazima baada ya wewe kujiweka wakfu kwa Mungu? Kwa kuwa umejiweka wakfu kwa Yehova, yeye ajua kwamba wampenda. Lakini bila shaka utataka kuchukua hatua ya ziada ili kujulisha wengine upendo wako kwa Mungu. Basi, ubatizo unakupa fursa ya kujulisha wakfu wako kwa Yehova Mungu hadharani.—Warumi 10:9, 10.
11. Ni nini maana ya ubatizo?
11 Ubatizo unajaa mengi katika maana yenye ufananisho. Unapozamishwa, au ‘kuzikwa,’ chini ya maji, ni kana kwamba umekufa kwa habari ya mwendo wako wa maisha wa zamani. Unapotoka majini, ni kana kwamba unaibuka kuja kwenye maisha mapya, yanayoongozwa na mapenzi ya Mungu si yako mwenyewe. Bila shaka, hilo halimaanishi kwamba hutafanya makosa tena, kwani sisi sote si wakamilifu na hivyo tunatenda dhambi kila siku. Hata hivyo, ukiwa mtumishi wa Yehova aliyejiweka wakfu na kubatizwa, utakuwa umeingia katika uhusiano wa pekee pamoja naye. Kwa sababu ya toba yako na ujitiisho wako mnyenyekevu kwa ubatizo, Yehova yu tayari kusamehe dhambi zako kwa msingi wa dhabihu ya fidia ya Yesu. Hivyo ubatizo huongoza kwenye dhamiri safi mbele ya Mungu.—1 Petro 3:21.
12. Humaanisha nini kubatizwa (a) “katika jina la Baba”? (b) ‘katika jina la Mwana’? (c) ‘katika jina la roho takatifu’?
12 Yesu aliamuru wafuasi wake wabatize wanafunzi wapya “katika jina la Baba na la Mwana na la roho takatifu.” (Mathayo 28:19, NW) Yesu alimaanisha nini? Ubatizo “katika jina la Baba” waonyesha kwamba mtu anayebatizwa anamkubali Yehova Mungu kwa moyo wote kuwa Muumba na mwenye haki ya Enzi Kuu ya ulimwengu wote mzima. (Zaburi 36:9; 83:18; Mhubiri 12:1) Kubatizwa ‘katika jina la Mwana’ humaanisha kwamba mtu huyo amkiri Yesu Kristo—na hasa dhabihu Yake ya fidia—kuwa njia pekee ya wokovu inayoandaliwa na Mungu. (Matendo 4:12) Ubatizo ‘katika jina la roho takatifu’ humaanisha kwamba yule anayetaka kubatizwa anaitambua roho takatifu ya Yehova, au kani ya utendaji, kuwa njia ya Mungu ya kutimiza makusudi Yake na ya kutia nguvu watumishi Wake ili wafanye mapenzi Yake ya uadilifu kwa ushirikiano na tengenezo Lake lenye kuelekezwa kwa roho.—Mwanzo 1:2; Zaburi 104:30; Yohana 14:26; 2 Petro 1:21.
JE, UKO TAYARI KWA UBATIZO?
13, 14. Sababu gani hatupaswi kuogopa kuchagua kumtumikia Yehova Mungu?
13 Kwa kuwa ubatizo ni wenye kujaa maana hivyo na ni hatua ya maana zaidi maishani mwa mtu, je, ni hatua ambayo unapaswa kuhofu? Sivyo hata kidogo! Ingawa uamuzi wa kubatizwa haupaswi kuchukuliwa kwa mchezo, pasipo shaka huo ni uamuzi wenye hekima zaidi ambao yawezekana wewe ungeweza kufanya.
14 Ubatizo hutoa uthibitisho wa uamuzi wako wa kumtumikia Yehova Mungu. Fikiria watu unaokutana nao. Je, kila mmoja wao hatumikii bwana-mkubwa kwa njia moja au nyingine? Watu fulani hutumikia mali. (Mathayo 6:24) Wengine hufuatia kwa bidii kazi-maisha zao au hujitumikia kwa kufanya utimizo wa tamaa zao wenyewe kuwa jambo kuu maishani. Wengine bado hutumikia miungu bandia. Lakini wewe umechagua kumtumikia Mungu wa kweli, Yehova. Hakuna yeyote aonyeshaye fadhili, huruma, na upendo mwingi hivyo. Mungu huheshimu wanadamu kwa kuwapa kazi ya maana inayowaelekeza kwenye wokovu. Yeye huwathawabisha watumishi wake na uhai udumuo milele. Kwa hakika, kufuata kielelezo cha Yesu na kumtolea Yehova maisha yako si mwendo wa kuhofu. Kwa kweli, huu ndio mwendo pekee umpendezao Mungu na ulio wa busara kabisa.—1 Wafalme 18:21.
15. Ni nini baadhi ya mambo ya kawaida yanayozuia ubatizo?
15 Hata hivyo, ubatizo si hatua ya kuchukuliwa kwa sababu ya kusongwa na watu wengine. Ni jambo la kibinafsi kati yako na Yehova. (Wagalatia 6:4) Kadiri ambavyo umefanya maendeleo ya kiroho, huenda ukawa umejiuliza hivi: “Ni nini kinachonizuia nisibatizwe?” (Matendo 8:35, 36) Labda jiulize hivi, ‘Je, ni upinzani wa familia unaonizuia? Je, ningali nahusika katika hali isiyo ya kimaandiko au zoea lenye dhambi? Je, ingeweza kuwa kwamba ninaogopa kupoteza upendeleo wa jumuiya?’ Hayo ni baadhi ya mambo ya kufikiriwa, lakini yafikirie kwa njia ya kihalisi.
16. Utanufaikaje kutokana na kumtumikia Yehova?
16 Si jambo la kihalisi kufikiria gharama bila kufikiria manufaa za kumtumikia Yehova. Kwa mfano, fikiria jambo la upinzani wa familia. Yesu aliahidi kwamba hata ikiwa wanafunzi wake wangepoteza watu wao wa ukoo kwa sababu ya kumfuata, wao wangepata familia ya kiroho iliyo kubwa zaidi. (Marko 10:29, 30) Hao waamini wenzako watakuonyesha upendo wa kidugu, watakusaidia uvumilie mnyanyaso, na watakutegemeza katika barabara iongozayo kwenye uhai. (1 Petro 5:9) Wazee hasa wanaweza kukusaidia ukabiliane na matatizo na kukabili magumu mengine kwa mafanikio. (Yakobo 5:14-16) Kwa habari ya kupoteza upendeleo wa ulimwengu, unaweza kujiuliza hivi, ‘Ni nini kiwezacho kulinganishwa na kuwa na kibali cha Muumba wa ulimwengu wote mzima, kumfanya ashangilie juu ya mwendo wa maisha ambao nimechagua?’—Mithali 27:11.
KUISHI KULINGANA NA WAKFU NA UBATIZO WAKO
17. Sababu gani unapaswa kuuona ubatizo kuwa mwanzo badala ya mwisho?
17 Ni jambo la maana kukumbuka kwamba ubatizo si mwisho wa maendeleo yako ya kiroho. Huo unatia alama mwanzo wa utumishi wa muda mrefu kwa Mungu ukiwa mhudumu mwagizwa-rasmi na mmoja wa Mashahidi wa Yehova. Ingawa ubatizo ni jambo la maana sana, si uhakikishio wa wokovu. Yesu hakusema: ‘Kila mtu ambaye amebatizwa ataokoka.’ Badala ya hivyo, alisema: “Mwenye kuvumilia hata mwisho, ndiye atakayeokoka.” (Mathayo 24:13) Kwa hiyo, ni muhimu kwamba uutafute Ufalme wa Mungu kwanza kwa kuufanya uwe ndilo jambo kuu maishani mwako.—Mathayo 6:25-34.
18. Baada ya ubatizo, ni nini baadhi ya miradi ya kufuatia?
18 Ili kuvumilia katika utumishi wako kwa Yehova, utahitaji kujiwekea miradi ya kiroho. Mradi mmoja unaofaa ni kuongeza ujuzi wako juu ya Mungu kupitia funzo la kibinafsi la kawaida la Neno lake. Panga kusoma Biblia kila siku. (Zaburi 1:1, 2) Hudhuria mikutano ya Kikristo kwa ukawaida, kwani ushirika unaopata huko utakusaidia kukupa nguvu ya kiroho. Kwa upande wako, sababu gani usifanye mradi wako uwe kutoa maelezo kwenye mikutano ya kutaniko na hivyo kumsifu Yehova na kujaribu kujenga wengine? (Warumi 1:11, 12) Mradi mwingine waweza kuwa kuboresha sala zako.—Luka 11:2-4.
19. Roho takatifu inaweza kukusaidia uonyeshe sifa zipi?
19 Ikiwa utaishi kulingana na maana ya ubatizo wako, unahitaji kuelekeza fikira daima kwenye yale unayofanya, ukiruhusu roho takatifu ya Mungu itokeze ndani yako sifa kama vile upendo, shangwe, amani, ustahimilivu, fadhili, wema, imani, upole, na kujidhibiti. (Wagalatia 5:22, 23; 2 Petro 3:11) Kumbuka, Yehova hutoa roho takatifu yake kwa wote wanaoomba kuipata na kumtii Mungu wakiwa watumishi wake waaminifu. (Luka 11:13; Matendo 5:32) Kwa hiyo mwombe Mungu akupe roho yake na umwombe msaada ili kuonyesha sifa zinazompendeza. Sifa hizo zitakuwa dhahiri zaidi katika usemi na mwenendo wako kadiri unavyoitikia uvutano wa roho ya Mungu. Bila shaka, kila mtu katika kutaniko la Kikristo anajitahidi kukuza “utu mpya” ili kuwa kama Kristo zaidi. (Wakolosai 3:9-14) Kila mmoja wetu hukabili magumu tofauti-tofauti katika kufanya hivyo kwa sababu tumo katika hatua mbalimbali za maendeleo ya kiroho. Kwa kuwa wewe si mkamilifu, ni lazima ujitahidi kuwa na utu ulio kama wa Kristo. Lakini usikate tamaa kamwe kwa habari hii, kwani inawezekana kwa msaada wa Mungu.
20. Unaweza kumwiga Yesu kwa njia zipi katika huduma?
20 Kuiga kwa ukaribu zaidi kielelezo cha Yesu chenye shangwe kunapaswa kuwe miongoni mwa miradi yako ya kiroho. (Waebrania 12:1-3) Yeye alipenda huduma. Ikiwa una pendeleo la kushiriki katika utendaji wa kuhubiri Ufalme, basi, usiliruhusu liwe jambo la vivi hivi tu. Jaribu kupata uradhi katika kufundisha wengine juu ya Ufalme wa Mungu kama vile Yesu alivyofanya. Tumia maagizo ambayo kutaniko huandaa ili kukusaidia ufanye maendeleo kuwa mwalimu. Na uhakikishiwe kwamba Yehova anaweza kukupa nguvu ya kutimiza huduma yako.—1 Wakorintho 9:19-23.
21. (a) Tunajuaje kwamba Yehova huhazini watu waaminifu waliobatizwa? (b) Ni nini kinachoonyesha kwamba ubatizo ni jambo la maana kwa habari ya kuokoka kwetu utekelezaji hukumu wa Mungu juu ya mfumo huu wa mambo ulio mwovu?
21 Mtu aliyejiweka wakfu na kubatizwa anayejitahidi kwa uaminifu kumfuata Yesu ni wa pekee kwa Mungu. Yehova huchunguza maelfu ya mamilioni ya mioyo ya kibinadamu na anajua jinsi watu wa jinsi hiyo walivyo wenye thamani sana. Yeye huwaona kuwa hazina, “vitu vinavyotamaniwa.” (Hagai 2:7) Unabii mwingi wa Biblia huonyesha kwamba Mungu huwaona watu wa jinsi hiyo kuwa wenye kutiwa alama ili kuokoka utekelezaji wa hukumu yake ulio karibu kuja juu ya mfumo huu wa mambo ulio mwovu. (Ezekieli 9:1-6; Malaki 3:16, 18) Je, una “mwelekeo ufaao kwa ajili ya uhai udumuo milele”? (Matendo 13:48, NW) Je, unatamani sana kutiwa alama kuwa mmoja anayemtumikia Mungu? Wakfu na ubatizo ni sehemu ya alama hiyo, na mambo hayo ni ya muhimu kwa wokovu.
22. “Umati mkubwa” waweza kutazamia mataraja gani?
22 Baada ya Furiko la duniani pote, Noa na familia yake walitoka katika safina kuingia ndani ya ulimwengu uliosafishwa. Vivyo hivyo leo, “umati mkubwa” wanaotumia ujuzi juu ya Mungu maishani mwao na kupata kibali cha Yehova wana taraja la kuokoka mwisho wa mfumo huu wa mambo ulio mwovu na kufurahia uhai udumuo milele juu ya dunia iliyosafishwa daima. (Ufunuo 7:9, 14, NW) Uhai huo utakuwaje?
TAHINI UJUZI WAKO
Yehova akutaka utumieje ujuzi wako juu yake?
Ni nini baadhi ya hatua zinazoongoza kwenye ubatizo?
Sababu gani ubatizo si mwisho bali ni mwanzo?
Tunaweza kuishije kulingana na wakfu na ubatizo wetu?
[Picha katika ukurasa wa 172]
Je, umejiweka wakfu kwa Mungu katika sala?
[Picha katika ukurasa wa 174]
Ni nini kinachokuzuia usibatizwe?