Je! Wewe Una Nia ya Kumsikiliza Mungu?
TUSOMAPO Biblia, sisi hung’amua haraka kwamba hali ya watu katika karne ya kwanza ilifanana na hali yetu leo kwa njia nyingi. Kulikuwako ukosefu mwingi wa adili na ukosefu wa kufuata haki, hasa miongoni mwa majirani wafasiki wa Israeli, ambao kwao ukosefu wa adili ulikuwa sehemu ya dini mara nyingi. Maskini walikosa uhakika katika maisha, na kulikuwako matatizo ya kisiasa. Kufikia mwaka 66 W.K., Israeli na Roma zilihusika katika vita kamili. Siku hizo, kama ilivyo sasa, watu walihitaji msaada.
Ni mambo mengi yenye kufanana kidini kati ya siku hizo na wakati wetu. Viongozi Wayahudi wa kidini walikuwa wanafiki. (Mathayo 23:15; Luka 20:46, 47) Katika ulimwengu wa wasio Wayahudi, mielekeo ya kidini ilitofautiana kwa kadiri kubwa sana kuanzia hali ya kudharau-dharau mambo hadi kuwa na hofu ya kishirikina na juhudi ya ushupavu mkali wa kidini. (Linganisha Matendo 14:8-13; 19:17, 28.) Hata katika kundi la Kikristo ambalo kwa kadiri fulani lilikuwa jipya, si mambo yote yaliyokuwa sawa. Mwishoni mwa karne hiyo, mtume Yohana alionya hivi: “Wadanganyifu wengi wametokea duniani.” (2 Yohana 7) Ndiyo, huko nyuma pia, mashauri mengi ya bandia yalitolewa kuhusu habari ya dini. Hata hivyo msaada wenye kutegemeka ulikuwapo.
Je! Wewe Ungalimsikiliza Yesu?
Yesu alikuwa mmoja aliyetoa shauri timamu siku hizo. Lilivuta watu sana kwa usadikishi hivi kwamba twasoma habari hii juu ya tokeo lalo: “Makutano walishangaa mno kwa mafundisho yake.” (Mathayo 7:28) Lakini ni wachache miongoni mwa umati wa watu hao waliosikiliza kikweli aliyoyasema. Yesu alifanya kazi za kimuujiza na kuweka kielelezo kizuri sana cha maisha na mwenendo wa kumcha Mungu. Ingawa hivyo, hata viongozi waliodhaniwa kuwa ndio wenye elimu bora walikataa kuona thamani ya mambo aliyoyasema. Kwa nini?
Kwa kadiri kubwa, ilikuwa ni kwa sababu ya maoni mabaya ya kutangulia kuamua mambo bila uchunguzi. Watu fulani walimdharau Yesu kwa sababu alitoka Nazareti. Wengine walimkataa kwa sababu hakuwa amehudhuria hata moja ya shule zao na hakuwa na uhusiano na jamii ya watawala. (Yohana 1:46; 7:12, 15, 47, 48) Zaidi ya hilo, si sikuzote ambapo Yesu alisema mambo ambayo watu walitaka kuyasikia. Yeye alinena ukweli tu, na kwa kielelezo, Mafarisayo waliudhiwa mara nyingi na maneno yake. (Mathayo 15:12-14) Kweli kweli, baada ya yeye kuwa amehubiri kwa miaka mitatu na nusu, viongozi Wayahudi wa kidini walifanya auawe. (Luka 23:20-35) Wao walikosa fursa iliyoje, kwa maana Yesu alikuwa na “semi za uhai wa milele”!—Yohana 6:68, NW.
Kama wewe ungaliishi katika Yerusalemu wakati huo, je! ungalifuata viongozi wa kidini na umati ule mwingine? Au ungalifunga akili yako vya kutosha ili uishike maana ya mambo ambayo Yesu alikuwa akisema? Ikiwa ndivyo, wewe ungalikuwa kama mwanamke mmoja wa kusifika ambaye Yesu alikutana naye katika safari zake.
Mmoja Aliyesikiliza
Yeye alikutana na mwanamke huyu alipokuwa anasafiri kupitia Samaria. Alikuwa ameketi kando ya kisima ili apumzike, na mwanamke huyo akaja kuteka maji Yesu akiwapo. Sisi hatujui jina la mwanamke huyo, lakini maandishi ya Biblia yasema kwamba ijapokuwa Yesu alikuwa amechoka, alitumia fursa hiyo kuongea na mwanamke huyo kuhusu dini.—Yohana 4:5-15.
Sasa, kulikuwako sababu nyingi ambazo zingaliweza kufanya mwanamke huyu apuuze mfikio wa Yesu. Mwanamke huyo alikuwa wa dini tofauti—njia ya ibada ya Kisamaria ilikuwa tofauti na ile ya Kiyahudi. Pia, Wayahudi waliwadharau Wasamaria na kukataa kushirikiana nao. Halafu, pia, kwa kawaida wanaume Wayahudi hawakusema na wanawake wasiowajua. (Yohana 4:9, 27) Zaidi ya hilo, mwanamke huyo Msamaria alikuwa akiishi maisha ya ukosefu wa adili, naye angaliweza kuogopa sana uwezekano wa kuchambuliwa au kufichuliwa dhambi zake.—Yohana 4:18.
Hata hivyo, yeye hakutenda hivyo. Bali, aliuliza maswali ya kutumia akili kwa kujibu mfikio wa Yesu wenye busara na wenye kuamsha upendezi. Maongezi yalipoendelea, mwanamke huyo alijasiria kujiingiza katika habari ngumu, akigusia faraka ya kidini iliyokuwapo kati ya Wayahudi na Wasamaria. Yesu alijibu kwa fadhili lakini kwa kutoboa wazi, akimwambia hivi mwanamke huyo: “Ninyi mnaabudu msichokijua; sisi tunaabudu tukijuacho.” (Yohana 4:19-22) Lakini mwanamke huyo hakuudhika. Akili yake iliyofunguka ilikuwa tayari kusikia mengi zaidi.
Kwa hiyo Yesu akaendelea na ujulisho wa maana. “Lakini saa inakuja, nayo sasa ipo, ambayo waabuduo halisi watamwabudu Baba katika roho na kweli. Kwa maana Baba awatafuta watu kama hao wamwabudu. Mungu ni Roho, nao wamwabuduo yeye imewapasa kumwabudu katika roho na kweli.” (Yohana 4:23, 24) Baadaye, mwanamke huyu mwenye akili iliyofunguka kupokea mawazo mapya alionyesha uthamini kwa kuwaambia jirani zake kwa hamu nyingi mambo aliyokuwa amejifunza. Wao, nao, walitafuta habari zaidi kwa kusikiliza maneno ya Yesu.—Yohana 4:39-42.
Twaweza kujifunza nini kutokana na jambo hili? Ni kwamba, ikiwa sisi twaishi katika eneo lenye maoni mabaya sana ya kubagua rangi, utaifa, au dini, sisi huitikiaje tukifikiwa na mtu wa rangi, utaifa, au dini tofauti? Je! sisi hujikunyata tusitake kusikiliza wakati yanapozungumzwa mambo ambayo yangeweza kuonyesha sisi ni wenye makosa? Au sisi huwa na nia ya angalau kuongea, kama yule mwanamke Msamaria?
Je! Wewe Ungalimsikiliza Paulo?
Mwingine aliyetoa shauri zuri sana katika karne ya kwanza alikuwa mtume Paulo. Wakati mmoja Paulo pia alikuwa na akili iliyofungika. Yeye aliungama hivi: “Hapo kwanza nalikuwa mtukanaji, mwenye kuudhi watu, mwenye jeuri; lakini nalipata rehema kwa kuwa nalitenda hivyo kwa ujinga, na kwa kutokuwa na imani.” (1 Timotheo 1:13) Hata hivyo, aliukubali ukweli kuhusu Yesu Kristo na kutupilia mbali maoni yake mabaya ya kuamua mambo bila uchunguzi. Kielelezo chake chaonyesha kwamba ukweli wa Biblia waweza kusaidia ‘kupindua vitu vilivyozungushiwa handaki’ katika moyo ikiwa vitu hivyo vina madhara kwa masilahi yetu.—2 Wakorintho 10:4, NW.
Paulo alipokwisha kuwa Mkristo, alijiendea kijasiri kueneza habari njema alizokuwa amejifunza. Na kama vile ambavyo ingetarajiwa, alikuta hali ya aina ile ile ya kufunga akili ambayo yeye mwenyewe alikuwa amekuwa nayo—lakini si kila mara. Katika Beroya, kaskazini mwa Ugiriki, alipata watu fulani wenye mioyo ya upole waliokuwa kielelezo kizuri sana cha jinsi ya kusikiliza shauri. Hawa waliyatambua maneno ya Paulo kuwa ukweli. Kwa sababu hiyo, “walilipokea lile neno kwa uelekevu wa moyo.” Lakini walikuwa na akili zilizofunguka, wala si watu wa kupumbazwa kwa urahisi tu. “Wakayachunguza maandiko [kwa uangalifu, NW] kila siku, waone kwamba mambo hayo ndivyo yalivyo.” (Matendo 17:11, NW) Walifurahishwa na mambo waliyosikia, ingawa waliyachunguza waone kama Biblia iliyathibitisha kuwa kweli kabla ya kuyakubali kikamili.
‘Hakikisha Mambo Yote’
Katika siku yetu, Mashahidi wa Yehova hutumia wakati mwingi wakijitahidi kushiriki habari njema za Ufalme pamoja na majirani zao wa dini nyinginezo. Mashahidi hupata itikio gani? Watu wengi wenye urafiki hufurahi kuwapokea. Lakini hesabu fulani hukataa, na baadhi yao hata hukasirika kwa sababu Mashahidi huwatembelea.
Hili ni jambo la kuhuzunisha, kwa maana zile ambazo Mashahidi wa Yehova hutaka kuongea huitwa “habari njema” katika Biblia. (Mathayo 24:14) Zaidi ya hilo, wao hutia moyo kuwa na mwelekeo wa mtume Paulo, aliyesema hivi: “Hakikisheni mambo yote; shikeni sana lililo zuri sana.” (1 Wathesalonike 5:21, NW) Hata ikiwa mtu fulani ana kauli kali, hakika mtu huyo apaswa kuwa na akili iliyofunguka vya kutosha ili aongee na wengine kuhusu Mungu, kama Waberoya na yule mwanamke Msamaria.
Kwa Nini Kuwa na Akili Iliyofunguka?
Kwa kufurahisha, mamia ya maelfu ya watu hufanya hivyo hasa kila mwaka. Wengi hujifunza kuitambua hekima iliyo katika Biblia, na tokeo huwa mabadiliko halisi ya kudumu katika maisha zao. Hapo kwanza watu fulani walikuwa kama Janet, mwanamke kijana mwenye historia ndefu ya kutumia vibaya dawa za kulevya na kileo ambaye mwishowe alikazwa sana na tamaa ya kujaribu kujiua. Leo, Janet ni Mkristo mwenye furaha. Funzo lake la Biblia lilimsaidia apate imara ya kufuata shauri hili la Paulo: “Na tujitakase nafsi zetu na uchafu wote wa mwili na roho.”—2 Wakorintho 7:1.
Vernon alikuwa mzoelevu wa kileo, na ndoa yake ilikuwa katika hatari ya kuvunjika. Lakini kufuata shauri la Biblia kulimwezesha kushinda ovu hili na kufanya mapatano na mke wake. (1 Wakorintho 6:11) Debra alikuwa na maoni mabaya sana ya ubaguzi wa rangi. Lakini funzo la Biblia na ushirika pamoja na Wakristo lilimsaidia kurekebisha kufikiri kwake. (Matendo 10:34, 35) Tena ni nani angaliyaamini mabadiliko ambayo yangetukia katika maisha ya malaya kijana katika Uholanzi wakati ambapo, siku moja, alikubali kujifunza Biblia na Mashahidi wa Yehova? Muda si muda, akawa ni Mkristo aliyebatizwa mwenye kuishi maisha safi na kutunza watoto wake kwa kujali madaraka yampasayo.
Mambo hayo hutukia mara nyingi watu wasikilizapo mambo yenye kusemwa na Biblia. Maisha zao huwa na maendeleo katika njia ambazo wengi wao hawakufikiri kamwe zingewezekana. La maana zaidi ni kwamba, wao hupata uhusiano na Mungu, ili waweze kumpelekea sala kwa bidii ya moyoni kwa kumwita ‘Baba yetu aliye mbinguni.’ (Mathayo 6:9) Nao hupata tumaini hakika lisilovunjika la wakati ujao wa kujionea wenyewe ukweli wa maneno ya Yesu: “Hii ndiyo maana ya uhai wa milele, kutwaa kwao maarifa juu ya wewe, Mungu mmoja tu wa kweli, na juu ya mmoja ambaye wewe ulituma, Yesu Kristo.”—Yohana 17:3, NW.
Hii ndiyo aina ya habari ambayo Mashahidi wa Yehova hutaka kuzungumza wakati wafuatiapo huduma yao na kuwazuru majirani zao. Yaelekea kwamba, muda si muda watakuzuru wewe tena. Je! wewe utakuwa na akili iliyofunguka kuwasikiliza?
[Picha katika ukurasa wa 7]
Yule mwanamke Msamaria hakuacha maoni mabaya ya kuamua mambo bila uchunguzi yamzuie kumsikiliza Yesu. Je! wewe umefunguka akili hivyo hivyo?