Maswali Kutoka kwa Wasomaji

“Mnara wa Mlinzi” la Novemba 1, 1995, lilikazia kile alichosema Yesu juu ya “kizazi hiki,” kama tusomavyo kwenye Mathayo 24:34. Je, hilo lamaanisha kwamba kuna tashwishi juu ya kama Ufalme wa Mungu ulianzishwa mbinguni katika 1914?

Maelezo hayo katika Mnara wa Mlinzi hayakutoa badiliko hata kidogo katika fundisho letu la msingi juu ya mwaka wa 1914. Yesu alitoa ishara ya kutia alama kuwapo kwake katika mamlaka ya Ufalme. Tuna uthibitisho wa kutosha kwamba ishara hii imekuwa katika mwendo wa kutimizwa tangu 1914. Mambo ya hakika juu ya vita, njaa kuu, tauni, matetemeko ya dunia, na uthibitisho mwingine mbalimbali unahakikisha kwamba tangu 1914, Yesu amekuwa akitenda akiwa Mfalme wa Ufalme wa Mungu. Hilo laonyesha kwamba tangu wakati huo tumekuwa katika umalizio wa mfumo wa mambo.

Basi, Mnara wa Mlinzi lilikuwa likisahihisha nini? Jambo kuu lilikuwa njia ambayo Yesu alitumia neno “kizazi” kwenye Mathayo 24:34. Fungu hilo lasema hivi: “Kweli nawaambia nyinyi kwamba kizazi hiki hakitapitilia mbali kwa vyovyote mpaka mambo yote haya yatukie.” Yesu alimaanisha nini kwa neno “kizazi,” katika siku yake na vilevile siku yetu?

Maandiko mengi huhakikisha kwamba Yesu hakutumia “kizazi” kuhusiana na kikundi kidogo au cha kipekee, akimaanisha viongozi wa Kiyahudi tu au wanafunzi wake waaminifu-washikamanifu tu. Badala ya hivyo, alitumia neno “kizazi” katika kushutumu matungamano ya Wayahudi waliomkataa. Ingawa hivyo, kwa kufurahisha, watu mmoja-mmoja wangeweza kufanya kile alichosihi sana mtume Petro kwenye siku ya Pentekoste, tubuni ‘mpate kuokolewa kutokana na kizazi hiki kilicho kombo.’—Matendo 2:40.

Katika taarifa hiyo, ni wazi kwamba Petro hakuwa akitaja kihususa enzi yoyote fulani au urefu wa wakati, wala hakuwa akihusianisha “kizazi” na tarehe yoyote fulani. Yeye hakusema kwamba watu walipaswa kuokolewa kutokana na kizazi kilichozaliwa katika mwaka uleule aliozaliwa Yesu au kizazi kilichozaliwa katika 29 W.K. Petro alikuwa akisema juu ya Wayahudi wasioamini wa kipindi hicho—baadhi yao labda wakiwa wachanga kidogo, wengine wakiwa na umri mkubwa—waliokuwa wamejulishwa fundisho la Yesu, waliokuwa wameona miujiza yake au kusikia juu yayo, na ambao hawakuwa wamemkubali kuwa Mesiya.

Bila shaka hivyo ndivyo Petro alivyoelewa utumizi wa Yesu wa neno “kizazi” wakati yeye na mitume wengine watatu walipokuwa pamoja na Yesu kwenye Mlima wa Mizeituni. Kulingana na taarifa ya Yesu ya kiunabii, Wayahudi wa kipindi hicho—wakiwa kwa msingi, watu walioishi wakati mmoja na Yesu—wangesikia au wangepatwa na vita, matetemeko ya dunia, njaa kuu, na uthibitisho mwingine mbalimbali wa kwamba mwisho wa mfumo wa Kiyahudi ulikuwa karibu. Kwa hakika, kizazi hicho hakikupitilia mbali kabla ya mwisho kuja katika 70 W.K.—Mathayo 24:3-14, 34.

Ni lazima tukiri kwamba sikuzote hatujayaelewa maneno ya Yesu kwa njia hiyo. Kuna mwelekeo kwa wanadamu wasiokamilika kutaka kuwa mahususi juu ya tarehe ambayo mwisho utakuja. Kumbuka kwamba hata mitume walitafuta mambo zaidi ya kimahususi, wakiuliza: “Bwana, je, wakati huu unarudishia Israeli ufalme?”—Matendo 1:6.

Wakiwa na nia zizo hizo za moyo mweupe, watumishi wa Mungu katika nyakati za kisasa wamejaribu kupata kutokana na alichosema Yesu juu ya “kizazi” wakati mahususi uliokadiriwa kutokana na mwaka wa 1914. Mathalani, njia moja ya kusababu imekuwa kwamba kizazi chaweza kuwa na urefu wa miaka 70 au 80, kikiwa cha watu wenye umri wa kutosha kuelewa umaana wa vita ya ulimwengu ya kwanza na matukio mengine; hivyo twaweza kukadiria kwa msingi kadiri mwisho ulivyo karibu.

Hata kusababu huko kuwe kulikuwa na nia njema kadiri gani, je, kulipatana na shauri ambalo Yesu aliendelea kutoa? Yesu alisema hivi: “Kuhusu siku hiyo na saa hiyo hakuna mtu ajuaye, wala hao malaika wa mbingu wala Mwana, ila Baba tu. . . . Kwa hiyo, fulizeni kulinda kwa sababu hamjui ni siku gani Bwana yenu anakuja.”—Mathayo 24:36-42.

Kwa hiyo habari ya hivi majuzi katika Mnara wa Mlinzi juu ya “kizazi hiki” haikubadili uelewevu wetu juu ya kile kilichotukia mwaka wa 1914. Lakini ilitupa sisi uelewevu wa wazi zaidi juu ya utumizi wa Yesu wa neno “kizazi,” ikitusaidia kuona kwamba utumizi wake haukuwa msingi wa kukadiria wakati—tukihesabu kutoka 1914—jinsi tulivyo karibu na mwisho.