Kristo kwa Kutenda Aongoza Kundi Lake

“Mungu wa Bwana yetu Yesu Kristo . . . alimfanya yeye kuwa kichwa juu ya vitu vyote kwa kundi.”—WAEFESO 1:17, 22, NW.

 1. Baadhi ya washiriki wa makanisa ya Jumuiya ya Wakristo wangejibuje swali ‘Ni nani kiongozi wenu?’ lakini Mashahidi wa Yehova wanajibuje?

MASHAHIDI WA YEHOVA hawamtambui mtu ye yote kuwa kiongozi wao. Muundo wao wa kitengenezo hauna mtu anayelingana na papa wa Kanisa Katoliki la Roma, maaskofu wakuu wa Makanisa ya Othordoksi ya Mashariki, au viongozi wa makanisa mengine na madhehebu za Jumuiya ya Wakristo. Utii wao ni kwa Yesu Kristo, Kichwa cha kundi la Kikristo, aliyesema: “Kiongozi wenu ni mmoja, naye ndiye Kristo.”—Mathayo 23:10.

 2. Ni kwa sababu gani Mashahidi wa Yehova wanamtambua Kristo kuwa Kichwa cha kundi la Kikristo, lakini ni maswali gani ambayo huenda yakaulizwa?

² Kwenye Pentekoste mtume Petro alishuhudia hivi: “Daudi hakupanda mbinguni; bali yeye mwenyewe anasema, [Yehova, NW] alimwambia Bwana wangu, Keti upande wangu wa kuume. Hata nitakapowaweka adui zako chini ya miguu yako. Basi nyumba yote ya Israeli na wajue yakini ya kwamba Mungu amemfanya Yesu huyo [mliyemtundika, NW] kuwa Bwana na Kristo.” (Matendo 2:34-36) Lakini hali tukitambua kwamba katika 33 W.K. Yesu alifanywa kuwa Bwana na Kichwa cha kundi, je! sisi tuna elekeo la kumfikiria yeye kuwa aliketi bila kufanya lo lote kwenye mkono wa kuume wa Yehova, akingojea kutawazwa kwake katika 1914? Je! sisi tunafahamu kabisa kwamba tangu mwanzo wenyewe Kristo kwa kutenda aliongoza kundi lake?

Njia za Kimungu kwa Kuongoza kwa Kutenda

 3. Yesu aliahidi kuwapelekea wanafunzi wake nini, na twajuaje kwamba yeye hakuwa akisema juu ya mtu?

³ Jioni iliyotangulia kifo chake, Yesu alisema kwa mitume wake waaminifu: “Ni kwa manufaa yenu mimi naenda. Kwa kuwa ikiwa mimi siendi, yule msaidizi hatakuja kwenu ninyi kwa vyo vyote; lakini ikiwa mimi naenda zangu, mimi nitamtuma yeye kwenu.” (Yohana 16:7, NW) Yeye hakuwa amtume mtu bali kani ya utendaji. Yeye alieleza hilo wazi kabla tu ya kupaa mbinguni, akisema kwa wanafunzi wake waliokusanyika: “Mimi natuma juu yenu kile ambacho kimeahidiwa na Baba yangu. Ninyi, ingawa hivyo, kaeni katika mji mpaka ninyi mvikwe uwezo kutoka juu.”—Luka 24:49, NW.

 4. Roho takatifu ilitumiwaje tangu Pentekoste na kuendelea?

⁴ Wanafunzi waaminifu wa Yesu walikaa katika eneo la Yerusalemu mpaka Pentekoste. Siku hiyo wao “wakajawa na roho takatifu,” kama walivyoahidiwa. Petro alishuhudia: “Kwa sababu yeye [Yesu] alikwezwa kwenye mkono wa kuume wa Mungu na akapokea ile roho takatifu iliyoahidiwa kutoka kwa Baba, yeye amemimina hiki ambacho ninyi mnaona na kusikia.” (Matendo 2:4, 33, NW) Kwa njia hiyo Yehova aliwazaa hawa wanafunzi wa kwanza wakiwa wana wake wa kiroho. (Wagalatia 4:6) Pia, Yesu alipokea roho kutoka kwa Baba yake ikiwa njia ya kutawala kwa kutenda kundi lake lililopo duniani kutoka cheo chake cha kimbingu kwenye mkono wa kuume wa Mungu.

5, 6. (a) Ni njia gani nyingine aliyopewa Kristo kumwezesha kuongoza kundi lake duniani? (b) Toa mifano iliyo wazi ya jinsi Yesu alitumia njia hii kwa ajili ya wanafunzi wake na katika kutegemeza kazi ya kuhubiri.

⁵ Zaidi ya hilo, mtume Petro aliandika hivi kuhusu Yesu: “Yeye yuko mkono wa kuume wa Mungu, maana yeye alikwenda zake mbinguni; na malaika na mamlaka na uwezo walitiishwa kwake.” (1 Petro 3:22, NW) Kwa hiyo, malaika, ni njia nyingine ambayo Yehova aliweka chini ya amri ya Kristo ili kuongoza kwa kutenda kundi la Kikristo.

⁶ Kwa hiyo, tunaposoma katika kitabu cha Matendo kwamba “malaika wa Yehova” au “malaika mmoja wa Mungu” alitenda katika kutegemeza kazi ya kuhubiri ya Kikristo au alijiingiza katika mambo kwa ajili ya washiriki wa kundi la Kikristo, kuna kila sababu ya kuamini kwamba malaika hao walitenda chini ya usimamizi wa Kristo Yesu. (Matendo 5:19; 8:26; 10:3-7, 22; 12:7-11; 27:23, 24, NW) Akiwa “Mikaeli, malaika mkuu,” malaika wamo chini ya amri ya Kristo, naye aliwatumia katika kuongoza kwa kutenda kundi la Kikristo katika karne ya kwanza W.K.—Yuda 9; 1 Wathesalonike 4:16.

Baraza Linaloongoza Lionekanalo

 7. Ni njia gani nyingine aliyotumia Kristo kutoa mwelekeo kwa kundi lake, na ni maandiko gani yanayosema juu ya “usimamizi” huu?

⁷ Maandiko yanaonyesha pia kwamba Yesu Kristo alitumia kikundi cha wanaume kikiwa baraza lenye kuongoza kundi lake duniani. Kwanza, inaonekana kuwa washiriki wa hili baraza lenye kuongoza walikuwa wale mitume 11 tu. Walipokuwa wakitafuta penzi la Yehova katika kuchagua mtu ambaye angechukua mahali pa Yuda Iskariote, Petro alitumia maneno ya Zaburi 109:8, ambayo yanasema hivi: “Usimamizi wake na atwae mtu mwingine.” Kisha, katika sala yao kwa Yehova, Petro na wenzake walimwomba Mungu awaonyeshe yule mwanamume aliyemchagua “ashike mahali katika huduma hii na utume huu, aliyekosa Yuda.” Mathiya aliwekwa atumike “pamoja na mitume kumi na mmoja.”​—Matendo 1:20, 24-26.

 8. Ni mifano gani miwili ya kwanza-kwanza inayoonyesha jinsi Kristo alivyotumia washiriki wa baraza lenye kuongoza lionekanalo?

⁸ Mfano wa kwanza ulioandikwa wa hawa mitume 12 wakitenda katika “usimamizi” huu wakiwa baraza lenye kuongoza ulikuwa wakati walipoweka wanaume waliostahili kiroho watumikie ndugu zao katika kundi la kwanza. (Matendo 6:1-6) Kisa cha pili kilikuwa wakati Filipo alipoanza kuhubiri Kristo kwa Wasamaria. Kama matokeo ya hilo, “mitume waliokuwako Yerusalemu . . . wakawapelekea Petro na Yohana.” Ni baada tu ya wawakilishi hawa wa washiriki wa baraza lenye kuongoza walipoweka mikono yao juu ya Wasamaria ndipo wao ‘wakaanza kupokea roho takatifu.’—Matendo 8:5, 14-17.

Uongozi wa Kibinafsi wa Kristo

 9. Je! sikuzote Kristo alitenda kupitia malaika au baraza lenye kuongoza? Toa mfano.

⁹ Hivyo, tangu mwanzo kabisa wa kundi la Kikristo, Kristo alikuwa na roho takatifu, malaika, na baraza lenye kuongoza lionekanalo chini ya amri yake kumwezesha yeye kuongoza kwa kutenda wanafunzi wake duniani. Katika pindi fulani yeye hata alitenda binafsi. Kwa mfano, Kristo mwenyewe alimfanya Sauli wa Tarso kuwa mwongofu. (Matendo 9:3-6) Siku tatu baadaye Yesu alisema moja kwa moja kwa “mwanafunzi” fulani jina lake Anania. Akimfunulia utume wa namna tatu aliokuwa nao akilini kwa ajili ya Sauli, Yesu alisema: “[Mtu] huyu ni chombo kiteule kwangu, alichukue Jina langu mbele ya Mataifa, na wafalme, na wana wa Israeli.” (Matendo 9:10-15) Kristo alimwita Sauli kwa ajili ya kazi maalumu. Hivyo, Sauli akawa mtume, au mmoja aliyetumwa, akijulikana vizuri zaidi kama mtume Paulo.

10. Kristo alisimamiaje kibinafsi kazi ya kuhubiri?

¹⁰ Kristo mwenyewe aliongoza kazi ya kuhubiri. Kwa njia ya roho takatifu iliyopokewa kutoka kwa Baba yake Yehova, yeye alianzisha safari za umisionari za Paulo na akaonyesha kupendezwa kibinafsi nazo. Tunasoma hivi: “Roho takatifu ikasema: ‘Katika watu wote wekeni kando Barnaba na Sauli kando kwa ajili yangu mimi kwa ajili ya kazi ambayo kwayo mimi nimewaita wao.’. . . Kwa hiyo wanaume hao, waliotumwa nje na roho takatifu, walishuka Silikia, na kutoka huko wakasafiri kwa merikebu” katika safari yao ya kwanza ya umisionari. (Matendo 13:2-4, NW) Bila shaka, roho takatifu, kani ya utendaji ya Yehova, haingeweza ama ‘kusema’ kitu wala ‘kutuma nje’ mtu yenyewe. Yule aliyetumia roho kuelekeza mambo kwa wazi alikuwa Kristo, aliye Kichwa cha kundi.

11. Ni jambo gani lililotukia wakati wa safari ya pili ya umisionari ya Paulo, na hilo linaonyeshaje wazi kwamba Yesu alitumia roho katika kuelekeza kazi ya kuhubiri?

¹¹ Utumiaji huu wa Yesu wa roho alipoongoza kwa kutenda Wakristo wa kwanza unaonyeshwa kwa wazi katika simulizi la safari ya pili ya umisionari ya Paulo. Baada ya kuwa ametembelea tena makundi katika Likaonia (jimbo la Esia Ndogo) ambayo yalikuwa yameanzishwa wakati wa safari ya kwanza ya umisionari, Paulo na wasafiri wenzake kwa wazi walikusudia kuelekea magharibi kupitia mkoa wa Kiroma wa Esia. Ni kwa sababu gani hawakuendelea na mpango wao? “Kwa sababu wao walikatazwa na roho takatifu kusema lile neno katika wilaya ya Esia.” (Matendo 15:36, 40, 41; 16:1-6, NW) Lakini ni nani aliyekuwa akitumia roho takatifu ya Yehova kuwaongoza? Mstari unayofuata unajibu. Unaonyesha walipoelekea kaskazini, wakikusudia kuhubiri katika Bithinia, “roho ya Yesu haikuruhusu wao.” (Matendo 16:7, NW) Ndiyo, Yesu Kristo alikuwa akitumia roho aliyokuwa amepokea kutoka kwa Baba yake kuelekeza kazi ya kuhubiri kwa kutenda. Yeye pamoja na Baba yake Yehova walitaka habari njema zienee na kuingia Ulaya, hivyo Paulo akapokea njozi kuhusu jambo hilo.—Matendo 16:9, 10.

Yesu Aunga Mkono Washiriki wa Baraza Lenye Kuongoza

12, 13. Wakati wa ziara ya kwanza ya Paulo katika Yerusalemu akiwa Mkristo, ni jambo gani lililotukia ambalo lilionyesha jinsi Kristo alivyounga mkono maamuzi yaliyofanywa na ndugu wenye madaraka katika mji huo?

¹² Wakati wa mtume Paulo kukutana kwa mara ya kwanza na wanafunzi katika Yerusalemu, kwa kufahamika wao hawakutaka kuonana naye. “Lakini Barnaba akamtwaa, akampeleka kwa mitume.” (Matendo 9:26, 27) Paulo alitumia siku 15 pamoja na mtume Petro. Pia yeye alikutana na Yakobo ndugu-nusu ya Yesu, ambaye kufikia wakati huo alikuwa mmoja wa wazee wa kundi la Yerusalemu. (Wagalatia 1:18, 19) Mafungu ya maneno yanayofuata katika Matendo huonyesha kwamba wazee wa Yerusalemu walipata kuwa sehemu ya baraza lenye kuongoza la kundi la kwanza la Kikristo, pamoja na wale mitume 12.—Matendo 15:2; 21:18.

¹³ Wakati wa kukaa kwake katika Yerusalemu kwa majuma mawili, Paulo alitoa ushuhuda kwa Wayahudi wenye kusema Kigiriki, lakini wao “wakajaribu kumwua.” Luka anaongeza kwamba “ndugu walipopata habari [hiyo] wakamchukua mpaka Kaisaria, wakampeleka aenda Tarso.” (Matendo 9:28-30) Lakini ni nani aliyeongoza uamuzi huo wenye hekima? Miaka mingi baadaye, alipokuwa akisimulia kisa icho hicho katika maisha yake, Paulo alisema kwamba Yesu alikuwa amemtokea na kumwagiza aondoke Yerusalemu kwa haraka. Paulo alipokataa, Yesu aliongeza hivi: “Enenda zako; kwa kuwa mimi nitakutuma uende mbali kwa watu wa Mataifa.” (Matendo 22:17-21) Kristo alikuwa akifuatia mambo karibu-karibu kutoka juu na alitenda kwa njia ya ndugu wenye madaraka katika Yerusalemu na pia kwa kusema moja kwa moja na Paulo.

14. Ni ulinganifu gani kati ya masimulizi katika Matendo na Wagalatia unaoonyesha kwamba Kristo alikuwa akielekeza mambo kuhusiana na mkutano wa baraza lenye kuongoza ulioshughulikia suala la tohara?

¹⁴ Vivyo hivyo, kusoma Maandiko kwa uangalifu kunaonyesha wazi kwamba Kristo aliongoza ule mkutano wenye maana wa baraza lenye kuongoza uliofanywa kuamua suala la kama Wakristo wa Mataifa wapaswa kujitiisha kwenye tohara na Sheria ya Musa au la. Kitabu cha Matendo kinasema kwamba wakati suala hilo lilipozuka, “ndugu [bila shaka washiriki wenye madaraka, au wazee, wa kundi la Antiokia] wakaamuru kwamba Paulo na Barnaba na wengine miongoni mwao wapande kwenda Yerusalemu kwa mitume na wazee kwa habari ya swali hilo. (Matendo 15:1, 2) Lakini wakati Paulo anaposimulia hali ambazo ziliongoza kwenye kwenda kwake Yerusalemu kupeleka suala la tohara liamuliwe, yeye anaeleza hivi: “Nami nalikwenda kwa kuwa nalifunuliwa.” (Wagalatia 2:1-3; linganisha 1:12.) Akiwa Kichwa cha kundi chenye kutenda, Kristo alitaka jambo hili lenye maana la kimafundisho liamuliwe na baraza lote lenye kuongoza lionekanalo. Kwa njia ya roho takatifu, yeye aliongoza akili za wanaume hawa wenye kujitoa katika kufanya uamuzi wao.—Matendo 15:28, 29.

Uamuzi Usio wa Kawaida

15, 16. (a) Baraza lenye kuongoza lilimtaka Paulo afanye nini baada ya kurudi kutoka safari yake ya tatu ya umisionari? (b) Ni kwa sababu gani huenda agizo hili likaonekana kuwa si la kawaida, na ni kwa sababu gani Paulo alilitii? (c) Ni swali gani linalozuka?

¹⁵ Mfano mwingine wenye kupendeza wa mwelekezo wenye kutenda wa mambo wa Kristo kutoka mbinguni ni jambo lililotukia baada ya safari ya tatu ya umisionari ya Paulo. Luka anasimulia kwamba aliporudi Yerusalemu, Paulo alitoa ripoti kamili kwa washiriki wa baraza lenye kuongoza waliokuwapo. Luka aliandika hivi: “Paulo akaingia kwa Yakobo pamoja nasi, na wazee wote walikuwako. Na baada ya kuwaamkua, akawaeleza mambo yote moja moja Mungu aliyoyatenda katika Mataifa kwa huduma yake.” (Matendo 21:17-19) Baada ya kumsikiliza Paulo, baraza hilo lililokusanyika lilimpa Paulo maagizo yaliyo wazi, likisema: “Fanya neno hili tunalokuambia.” Walimwamuru aende kwenye hekalu kuonyesha watu wote kwamba yeye hakuwa ‘akiwafundisha Wayahudi wote wakaao katika Mataifa kumwacha Musa, ukiwaambia wasiwatahiri watoto wao, wala wasizifuate desturi.’—Matendo 21:20-24.

¹⁶ Huenda mtu akatia shaka juu ya hekima ya agizo hili. Kama tulivyokwisha kuona, miaka mingi mapema, Yakobo na pengine wazee wengine waliokuwapo katika pindi zote mbili, walikuwa wamemtuma Paulo aende kutoka Yerusalemu kwa sababu maisha yake yalikuwa yakihatirishwa na “Wayahudi wasemao Kigiriki.” (Matendo 9:29, NW) Ijapokuwa hivyo, Paulo alitii amri hiyo, kupatana na yale aliyokuwa amekwisha kusema kwenye 1 Wakorintho 9:20. Lakini visababishi vinavyofanana vinatokeza matokeo yanayofanana. “Wayahudi waliotoka [mkoa wa Kiroma wa] Asia” walitokeza ghasia na kujaribu kumuua Paulo. Ni tendo la haraka tu lililochukuliwa na askari wa Kiroma lililomwokoa asiuawe na kundi hilo lenye ghasia. (Matendo 21:26-32) kwa kuwa Kristo ndiye Kichwa cha kundi chenye kutenda, ni kwa sababu gani yeye alilifanya baraza lenye kuongoza limtake Paulo aende katika hekalu?

17. Uamuzi huu usio wa kawaida ulionekanaje kuwa na mwelekezo wa kimungu, na hilo linaonyesha nini?

¹⁷ Jibu linakuwa wazi katika jambo lililotukia usiku wa pili baada ya Paulo kukamatwa. Yeye alikuwa ametoa ushuhuda mzuri kwa lile kundi lenye ghasia lililotafuta kumuua na kesho yake, kwa Sanhedrini. (Matendo 22:1-21; 23:1-6) Kwa mara ya pili yeye alikaribia sana kuuawa na kundi lenye ghasia. Lakini usiku huo, Yesu alimtokea akamwambia: “Uwe na ushujaa mwingi! Kwa kuwa kama vile umekuwa ukitoa ushuhuda kikamili juu ya mambo yanayohusu mimi katika Yerusalemu, vivyo hivyo wewe ni lazima pia utoe ushuhuda katika Roma.” (Matendo 23:11, NW) Kumbuka ule utume wenye sehemu tatu Kristo aliokuwa amemtabiria Paulo. (Matendo 9:15) Paulo alikuwa amechukua jina la Kristo kwa “Mataifa” na kwa “wana wa Israeli,” lakini wakati ulikuwa umefika sasa kwake atoe ushuhuda kwa “wafalme.” Kwa sababu ya uamuzi huo wa baraza lenye kuongoza, Paulo aliweza kutoa ushuhuda kwa magavana wa Kiroma Feliki na Festo, kwa Mfalme Herode Agripa wa Pili, na, mwishowe, kwa Mfalme Nero wa Kiroma. (Matendo, sura 24-26; 27:24) Ni nani awezaye kutia shaka kwamba Kristo hakuwa akielekeza yote haya?

Yesu kwa Kutenda Angali Anaongoza Kundi Lake

18. Yesu Kristo alisema nini kabla ya kupaa mbinguni?

¹⁸ Kabla ya kuwaacha wanafunzi wake na kupaa kwenye mkono wa kuume wa Baba yake, Yesu Kristo alisema: “Mimi nimepewa mamlaka yote mbinguni na duniani. Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na roho takatifu, kuwafundisha kushika mambo yote ambayo nimewaamuru ninyi. Na, tazama! mimi nipo pamoja na ninyi siku zote mpaka umalizio wa mfumo wa mambo.—Mathayo 28:18-20, NW.

19. Kristo alitumiaje mamlaka yake aliyopewa na Mungu katika karne ya kwanza, na ni jambo gani litakalozungumzwa katika makala inayofuata?

¹⁹ Kitabu cha Matendo, kikisimulia historia ya miaka ya mapema ya Ukristo, kinaonyesha bila shaka lo lote kwamba Kristo alitumia mamlaka yake akiongoza kwa kutenda kundi lake duniani. Yeye alifanya hivyo kwa njia ya roho takatifu, malaika, na baraza lenye kuongoza ambalo washiriki walo walikuwa wale mitume 12 na wazee wa kundi la Yerusalemu. Yesu alisema kwamba yeye angekuwa pamoja na wanafunzi wake hata mpaka umalizio wa mfumo wa mambo ambapo tupo sasa. Katika makala inayofuata, tutaona jinsi yeye angali ndiye Kichwa cha kundi la Kikristo chenye kutenda na jinsi yeye anaongoza “kondoo” zake leo.

Mambo ya Kukumbuka

◻ Ni kwa sababu gani Mashahidi wa Yehova hawatambui mwanadamu ye yote kuwa kiongozi wao?

◻ Kristo alitumiaje roho takatifu kuongoza kundi la Kikristo la kwanza?

◻ Kristo alitumiaje malaika katika kuongoza Wakristo wa karne ya kwanza?

◻ Kristo alitumiaje baraza lenye kuongoza lionekanalo katika kuelekeza kundi lake duniani?

◻ Kristo alielekezaje mambo yeye binafsi nyakati fulani?

[Ramani katika ukurasa wa 12]

(Ona mpangilio kamili katika nakala iliyochapishwa)

Safari ya Pili ya Umisionari ya Paulo

Antioch

Seleucia

CILICIA

Tarsus

Derbe

CAPPADOCIA

PAMPHYLIA

GALATIA

Lystra

Iconium

Antioch

LYCIA

ASIA

BITHYNIA AND PONTUS

Troas

MACEDONIA

Philippi

Thessalonica

[Picha katika ukurasa wa 10]

Kristo aliongoza kundi lake pia kwa njia ya baraza lenye kuongoza lionekanalo