Amani ya Kimungu kwa Wale Wanaofundishwa na Yehova
“Watoto wako wote watafundishwa na [Yehova]; na amani ya watoto wako itakuwa nyingi.”—Isaya 54:13.
1, 2. Kufurahia amani kunategemea nini?
AMANI! Inatamanika kama nini! Lakini kumbukumbu la wanadamu limekuwa bila amani. Kwa sababu gani iko hivyo?
2 Kufurahia amani kunahusiana sana na kuheshimu mamlaka. Naye ni nani aliye mamlaka iliyo juu zaidi katika ulimwengu mzima wote? Ni Muumba, Yehova Mungu. Basi, uhusiano wenye kibali pamoja naye ni wa maana ili kuwa na amani. (Zaburi 29:11; 119:165) Uhusiano huo wa maana sana ukiharibika, haiwezekani kuwa na amani ya kweli pamoja na Mungu, pamoja na mtu na mwenzake, au ndani ya mtu mwenyewe.—Isaya 57:21.
Sababu kwa Nini Ulimwengu Hauna Amani
3. Uhusiano wa wanadamu pamoja na Mungu uliharibiwaje?
3 Kama tujuavyo, ulikuwa muda mfupi tu baada ya mwanzo wa historia ya wanadamu kwamba mwana wa kiroho wa Mungu akamwasi Yehova. Uasi ni hali ya vita. Mvunja amani huyo, Shetani Ibilisi, alimsihi Hawa asiache sheria ya Mungu imzuie kufanya jambo ambalo yeye alihisi lingemfaidi. Ibilisi alipotoa mambo ya uhakika ili amfanye Hawa afikiri alikuwa akinyimwa jambo zuri kwa kumsikiliza Mungu. Alitumia ubinafsi, mwelekeo wa mimi kwanza. Muda mfupi baadaye mumeye akajiunga pamoja naye katika mwenendo wa kuvunja sheria, na kama matokeo, wazao wao wote wameambukiwa roho hiyo. —Mwanzo 3:1-6, 23, 24; Warumi 5:12.
4, 5. (a) Ni kwa kadiri gani Shetani amefanikiwa katika kuongoza kufikiri kwa wanadamu? (b) Jambo hilo limekuwa na matokeo gani juu ya jitihada za wanadamu za kupata amani?
4 Si sehemu ndogo tu ya wanadamu inayosukumia kando sheria ya kimungu. Maandiko yanatuambia kwamba Shetani ‘anapoteza dunia nzima inayokaliwa na watu.’ (Ufunuo 12:9, NW) Watu fulani ni wavunja-sheria wabaya sana, wakionyesha kutojali kabisa Mungu na wanadamu wenzao; wengine si sana. Lakini Shetani amefanikiwa sana katika kuongoza kufikiri kwa wanadamu hivi kwamba mtume Yohana aliweza kusema: “Ulimwengu mzima umo katika uwezo wa yule mwovu.” (1 Yohana 5:19, NW) Watu wawe wanadai kuamini kwamba Ibilisi yuko au hayuko, wanafanya anayotaka. Wao wanamtii yeye, kwa hiyo yeye ni mtawala wao. Kama matokeo, wanadamu wametengwa mbali na Mungu, wana uadui naye. Katika mazingira kama hayo, je! ni ajabu kwamba jitihada za wanadamu za kupata amani zimeshindwa kufanikiwa?—Wakolosai 1:21.
5 Hata hivyo, hesabu inayoongezeka ya wanadamu kutoka mataifa yote inapata amani ya kimungu, amani ambayo chanzo chayo ni Mungu. Jambo hilo limetokeaje?
Amani Yenye Kuridhisha Ambayo Mungu Anatoa
6. (a) Ni mkazo gani ambao Biblia inaweka juu ya amani? (b) Ni kupitia nani inawezekana kwetu kufurahia amani anayotoa Mungu?
6 Kwenye Warumi 15:33, NW Yehova anaelezwa kwa kufaa kuwa ndiye “Yule Mungu anayetoa amani.” Toka mwanzo kabisa, limekuwa kusudi la Mungu viumbe wake wote wafurahie amani. Zaidi ya mara 300 Neno lake lililoongozwa kwa roho, Biblia, linazungumza juu ya amani. Linasema wazi kwamba Yesu Kristo ndiye “Mwana-Mfalme wa Amani.” (Isaya 9:6, 7, NW) Yeye ndiye aliyeongozwa na Mungu kuzivunja kazi za yule mvunja-amani mkubwa zaidi, Shetani Ibilisi. (1 Yohana 3:8) Na kupitia huyo Mwana Mfalme wa Amani, inawezekana kwa kila mmoja wetu kufurahia amani ambayo Mungu anatoa.
7. (a) Amani hiyo inatia ndani nini? (b) Kwa sababu gani si jambo ambalo lazima sisi tungojee kabla ya kulipata mpaka mfumo wa kale uwe umepita na sisi tuwe hatimaye tumefikia ukamilifu?
7 Nayo ni amani nzuri kama nini! Ni zaidi ya kutokuwa na vita. Neno la Kiebrania sha·lohmʹ, ambalo kwa kawaida linatafsiriwa “amani,” linamaanisha afya, Ufanisi, na hali njema. Amani ya Mungu waliyo nayo Wakristo wa kweli ni ya pekee kwa kuwa haitegemei mazingira ya mtu. Hiyo haimaanishi kwamba mazingira yasiyopendeza hayawi na matokeo juu yao. Lakini wao wanakuja kuwa na nguvu za kindani zinazowawezesha kuepuka kuchangia msukosuko uliopo kwa kulipa kisasi wakati wanapoguswa nao. (Warumi 12:17, 18) Ingawa huenda mtu akawa mgonjwa kimwili au akawa na vitu vichache kimwili, bado anaweza kuwa mwenye afya na ufanisi kwa maoni ya kiroho na hivyo afurahie amani ambayo Mungu ametoa. Kwa wazi, amani ambayo watu kama hao wamekuwa nayo itazidishwa wakati ulimwengu wenye ubinafsi unaotuzunguka utakapotoweka, na itakuwa na kina kirefu wakati wanadamu wote watakapofikia ukamilifu. Lakini amani ya kimungu inayowezekana wakati huu ni hali tulivu ya akili na moyo, hali ya ndani yenye utulivu bila kujali yanayotokea nje ya mtu. (Zaburi 4:8) Inatokana na uhusiano unaokubaliwa pamoja na Mungu. Lo! Ni mali yenye thamani nyingi!
Wana Wanaofundishwa na Yehova
8. Ni nani waliokuwa wa kwanza kufurahia amani hiyo pamoja na Mungu kupitia Yesu Kristo?
8 Ni nani ambao wana amani ya namna hii kwa sababu ya kufundishwa na Yehova na kusikiliza amri zake? Katika kujibu, Biblia inaelekeza fikira zetu kwanza kwa wale ambao ni Waisraeli wa kiroho. Wanatajwa kwenye Wagalatia 6:16, ambapo tunasoma hivi: “Wote watakaoenenda kwa kanuni hiyo, amani na iwe kwao na rehema, naam, kwa Israeli wa Mungu.” Hawa ni wale 144,000 ambao wamechaguliwa na Mungu kushiriki uzima wa kimbingu pamoja na Yesu Kristo. —Ufunuo 14:1.
9. Ni “kanuni” gani inayoshirikishwa na kufurahia kwao amani?
9 Kule nyuma katika karne ya kwanza wale wa Israeli wa kiroho walikuwa wakijifunza ukweli ukiwa msingi, “kanuni” ambayo ilihusiana moja kwa moja na kufurahia kwao amani. Ilikuwa jambo la maana sana kwamba washike kanuni hiyo ya mwenendo. Kwa zaidi ya karne 15, Yehova alikuwa ametumia Sheria ya Musa kuonyesha kivuli cha mambo mazuri ambayo yangekuja. Lakini baada ya kifo cha dhabihu cha Yesu Kristo, matakwa ya Sheria ya Musa hayakuwa ya lazima tena. (Waebrania 10:1; Warumi 6:14) Jambo hilo lilikuwa limeonyeshwa wazi na uamuzi wa baraza linaloongoza la Kikristo katika Yerusalemu kuhusu suala la kutahiriwa. (Matendo 15:5, 28, 29) Lilitiliwa mkazo tena katika barua iliyoongozwa kwa roho waliyoandikiwa Wagalatia. Mambo mazuri yaliyotangulia kutolewa kivuli katika Sheria ya Musa yalikuwa yameanza kutendeka. kwa subira Yehova alikuwa akikaza katika akili na mioyo ya wafuasi wa Kristo wapakwa mafuta umaana wa fadhili zisizostahilika Zake zinazoonyeshwa kupitia Kristo. Kwa kuonyesha imani katika uandalizi huu, kwa kujiendesha kupatana nao, wangeweza kufurahia amani ya aina ambayo haikuwezekana kamwe kabla ya hapo kwa wanadamu wenye dhambi. —Wagalatia 3:24, 25; 6:16, 18.
10. (a) Israeli wa kiroho walikuwa wakipata utimizo wa ahadi gani iliyoandikwa kwenye Isaya 54:13? (b) Kupewa nidhamu ya Yehova kumesababishaje wao waone amani?
10 Wale wa Israeli wa kiroho walikuwa wakiona utimizo wa ile ahadi nzuri ajabu iliyoandikwa kwenye Isaya 54:13. Hapo Mungu alisema hivi kwa tengenezo lake linalofananishwa na mke la viumbe washikamanifu wa kiroho: “Na watoto wako wote watafundishwa na [Yehova]; na amani ya watoto wako itakuwa nyingi.” Bila shaka, Mwana wake mkuu ni Yesu Kristo mwenyewe, aliyezaliwa akawa Masihi alipopakwa mafuta kwa roho takatifu katika 29 W.K. Lakini “mwanamke” wa kimbingu wa Yehova ana wana zaidi—144,000 ambao wanakuwa sehemu ya pili ya uzao uliotabiriwa kwenye Mwanzo 3:15. Yehova aliahidi kwamba yeye angekuwa ndiye Mwalimu Mkuu wa wana hawa wote. Yeye amewafundisha ukweli juu yake mwenyewe na makusudi yake. Amewaambia jinsi ya kumtumikia. Nyakati nyingine, amelazimika kuwapa nidhamu. Nidhamu, hiyo imehitajiwa kabisa wakati wao wamekosa kutii Neno lake. Lakini wao wamekubali kufanya marekebisho yanayohitajiwa, na nidhamu hiyo imezaa matokeo mazuri—“tunda la amani. yaani, uadilifu.”—Waebrania 12:7, 11, NW; Zaburi 85:8.
“Mkutano Mkubwa” Wafundishwa Katika Njia za Mungu
11. (a) Ni nani wengine wanaofundishwa na Yehova katika siku zetu? (b) Wao wanaonyeshaje kwamba wanafaa maelezo yanayopatikana kwenye Isaya 2:2, 3, na matokeo yakiwa nini juu ya wengine?
11 Katika siku zetu. Israeli wa kiroho sicho kikundi pekee ambacho Mungu anafundisha. Wakati wa nusu karne iliyopita, fikira zimeelekezwa pia kwa wengine. Isaya aliongozwa na roho kuandika juu yao katika sura ya 2, mistari 2 na 3: “Itakuwa katika siku .za mwisho, mlima wa nyumba ya [Yehova] utawekwa imara juu ya milima; nao utainuliwa juu ya vilima; na mataifa yote watauendea makundi makundi.” Ndiyo, wale wanaoikubali kwa moyo ibada ya Mungu mmoja tu wa kweli wanaipa mahali palipoinuliwa juu zaidi katika maisha zao. Hivyo inaonekana wazi ikiwa imeinuliwa juu ya kila namna nyingine ya ibada walimokuwa hapo kwanza na ambamo ulimwengu unaowazunguka unaendelea kuwamo. Watu wa mataifa yote wameona jambo hilo. Wameona kwamba, bila kujali madai yanayofanywa na wenye mamlaka ya kilimwengu au mweneo wa mazoea yasiyo ya Kikristo ulimwenguni, wale wanaomwabudu Yehova wanaweka uhusiano wao pamoja naye juu ya kila jambo jinginelo. Watazamaji wameona pia tunda ambalo hilo limetokeza katika maisha ya waabudu kama hao, na wengi wanataka kuishiriki. Kwa hiyo, zaidi ya watu milioni tatu sasa wanawaambia wengine: “Njoni, twende juu mlimani kwa [Yehova], nyumbani kwa Mungu wa Yakobo, naye atatufundisha njia zake, nasi tutakwenda katika mapito yake.”—Ona pia Zekaria 8:23.
12. Wale wanaotajwa kwenye Isaya 2:2, 3 wanapata manufaa gani kwa kuwa na Mungu akiwa Mwalimu wao, na ni nini sehemu ya kutokeza ya maagizo anayowapa?
12 Ebu wazia linalomaanishwa na hilo—kuwa na Mungu akiwa Mwalimu wao! Wale wanaopokea maagizo hayo na kuthamini chanzo chayo kikweli hawapati masumbuko mengi ya daima akilini. Hawajikuti wakiwa katikati ya mawazo mawili au bila kujua lililo jema. Ukweli wa Neno la Mungu u wazi kabisa. Na Isaya 2:4 huonyesha ni nini ingekuwa sehemu yenye kutokeza ya maagizo wanayopokea? Inahusu jinsi ya kufurahia amani katika ulimwengu uliojaa magomvi. Hivyo, bila kujali yale ambayo wale wengine wanachagua kufanya, wale wanaofundishwa na Yehova wanachukua hatua ya kwanza katika kufua panga zao ziwe majembe na mikuki yao iwe miundu. Hawajifunzi vita tena kamwe.
13. “Mkutano mkubwa” ulitoka kwenye hali gani za msingi, lakini ni jambo gani limewafanya wawe watu wa namna walivyo?
13 Ni kikundi kile kile kinachoonyeshwa kwenye Ufunuo 7:9, 10, 14 kuwa waokokaji wenye kuingia katika dunia mpya ya Mungu yenye amani inayofuata “dhiki ile iliyo kuu.” “Mkutano mkubwa” unaookoka unatoka kila taifa, kabila, jamaa, na lugha. Hapo zamani wengi wao walikuwa miongoni mwa vikundi vyenye fitina ambavyo vilipigana. Wengine walifuatia mwendo wa maisha ambao kwa msingi ulikuwa wenye ubinafsi; hata hivyo, huo pia ulizuia kufurahia amani. Lakini sasa hawa ambao wametoka katika mataifa ni watu wenye kupenda amani na kuendeleza amani. Na ni jambo gani ambalo limewafanya wawe hivyo? Wamefundishwa na Yehova.—Isaya 11:9.
Aina ya Pekee ya Amani
14. Amani ya watu wa Yehova inategemea nini, na ikoje hivyo?
14 Amani ambayo Yehova anawapendelea watu wake wawe nayo ni ya pekee kweli kweli. Si aina ya jambo linalotokea wakati upatano usio imara unapofanywa kati ya vikundi viwili ambavyo haviaminiani. Haihusu maridhiano. Inategemea uadilifu. (Isaya 32:17) Lakini hiyo inawezaje kuwa kweli juu ya amani inayohusu wanadamu wasiokamilika? Tukiwa watenda dhambi, ye yote kati yetu ana uadilifu gani? Basi, kupitia imani, tunaweza kufurahia uadilifu unaowezekana kupitia thamani yenye kufunika dhambi ya dhabihu ya Yesu.
15. Wakati wa huduma ya kidunia ya Yesu, ni jambo gani ambalo Yehova alikuwa akifundisha waliotazamiwa kuwa wana wake ambalo lilikuwa lahitajiwa ili kuwe amani?
15 Jambo hilo linatusaidia tuthamini aliyosema Yesu kama yalivyoandikwa kwenye Yohana 6:45-47. Hapa alikuwa akizungumza kwa Wayahudi ambao hawakuwa wamevutwa kwake akiwa Masihi na hivyo walikuwa wakimnung’unikia. Lakini ilikuwa kuhusiana na wanafunzi wake kwamba alisema hivi: “Imeandikwa katika manabii [hasa, kwenye Isaya 54:13], Na wote watakuwa wamefundishwa na [Yehova]. Basi kila aliyesikia na kujifunza kwa Baba huja kwangu. Si kwamba mtu amemwona Baba, ila yeye atokaye kwa Mungu; huyo ndiye aliyemwona Baba. Amin, amin, nawaambia, Yeye aaminiye yuna uzima wa milele.” Wanafunzi hao walikubali maagizo ambayo Yehova alikuwa akiwapa. Walivutwa kwa Yesu. Wakati wengine walipoyakataa mambo aliyofundisha na kumwacha Yesu, mitume wake walibaki. Kama vile Petro alivyosema: “Nasi tumesadiki, tena tumejua, ya kuwa wewe ndiwe Mtakatifu wa Mungu.” (Yohana 6:69) Kwa sababu ya imani yao katika Yesu Kristo, ingewezekana kwao kuingia kwenye uhusiano wa amani pamoja na Yehova Mungu, uhusiano ambao una hakikisho la uzima wa milele.
16. (a) Kuanzia Pentekoste 33 W.K., wafuasi ,wa Yesu walipataje manufaa kutokana na uandalizi uliofanywa kupitia Kristo? (b) Baada ya hapo, ni jambo gani lililotakwa kwao?
16 Kuanzia Pentekoste ya 33 W.K., manufaa za dhabihu ya Kristo zilianza kutumiwa kwa wale wafuasi waaminifu wa Yesu. Aliyoyaandika Paulo baadaye kwenye Warumi 5:1, NW yakawa kweli kwao: “Sasa kwa kuwa sisi tumetangazwa kuwa waadilifu kama matokeo ya imani, acheni sisi tufurahie amani pamoja na Mungu kupitia Bwana yetu Yesu Kristo.” Kwa uzawa wote hao walikuwa wazao wa Adamu. Wakiwa watenda dhambi walikuwa wametenganishwa na Mungu. Hakuna kazi njema ambazo wangekuwa wamefanya kibinafsi ambazo zingefuta urithi wao wa dhambi. Lakini, kwa fadhili zisizostahilika Zake, Yehova alikubali dhabihu ya uhai mkamilifu ya Yesu kwa ajili ya watoto wa Adamu. Kwa wale waliojizoeza imani katika uandalizi huo, ingewezekana sasa wahesabiwe uadilifu na kuwa wana wa Mungu wa kulelewa wakitazamia uzima wa kimbingu. (Waefeso 1:5-7) Lakini je! mengi zaidi yalihitajiwa upande wao? Ndiyo, walipasa watembea katika njia za Yehova. Hawangepaswa kuendelea kufanya dhambi iwe zoea. Lakini wanatambua kwamba uadilifu wo wote walio nao ni kutokana na fadhili zisizostahilika za Mungu zinazoonyeshwa kupitia Kristo. Kama andiko lisemavyo, wao ‘wangefurahia amani pamoja na Mungu kupitia Yesu Kristo.’
17, 18. (a) Je! “kondoo wengine” wanafurahia amani kama hiyo pamoja na Mungu? (b) Ni maulizo gani zaidi yanayostahili kufikiriwa?
17 Namna gani wale ambao Yesu alitaja kuwa “kondoo wengine” wake? (Yohana 10:16) Je! wao wanafurahia amani ya jinsi hiyo pamoja na Mungu? Si wakiwa wana wa Mungu, lakini Wakolosai 1:19, 20, NW huwatia ndani kuwa wapokeaji wa amani ya kimungu andiko hilo linasema kwamba Mungu aliona vema kupitia Kristo ‘kupatanisha tena kwake mwenyewe vitu vingine vyote kwa kufanya amani kupitia damu ambayo Yesu alimwaga juu ya mti wa mateso, si kitu kama hivyo ni vitu vilivyo duniani [yaani, wale ambao watapendelewa wawe na uzima wa milele katika dunia paradiso] ama vitu vilivyo katika mbingu.’ Hao wenye matazamio ya kidunia wanatangazwa kuwa waadilifu na wanafurahia amani pamoja na Mungu hata sasa, si wakiwa wana, bali wakiwa ‘rafiki za Mungu,’ kama alivyokuwa Abrahamu. Lo! hiyo ni hali yenye upendeleo jinsi gani!—Yakobo 2:23.
18 Je! wewe binafsi unaifurahia amani hiyo? Je! unayo kwa ukamili kama inavyowezekana kwa wanadamu wanaoishi katika huu wakati ulio wa maana zaidi katika historia? Katika makala inayofuata tutafikiria baadhi ya mambo yanayoweza kusaidia kufanya jambo hilo liwezekane.
Maulizo ya Kurudia?
◻ Kwa sababu gani ulimwengu hauna amani?
◻ Ni amani gani ambayo Mungu anatoa sasa?
◻ Ni nani wanaoweza kufurahia amani kama hiyo?
◻ Ni jinsi gani uadilifu ulivyo jambo la lazima katika amani hii?
[Picha katika ukurasa wa 14]
“Kila aliyesikia na kujifunza kwa Baba huja kwangu”