Mawonyesho Mawili Yaliyo Makubwa Zaidi Sana ya Upendo Ambayo Yamepata Kufanywa
“Mungu alipenda ulimwengu sana hivi kwamba akatoa Mwana wake mzaliwa-pekee, ili kila mtu anayejizoeza imani katika yeye . . . awe na uzima wa milele.”—YOHANA 3:16, NW.
1. Ni nini maana ya usemi huu “Mungu ni upendo”?
“MUNGU ni upendo.” Mtume Yohana alitoa usemi huo mara mbili. (1 Yohana 4:8, 16) Ndiyo, Yehova Mungu ni mwenye kupenda si katika njia ile tu ya kwamba yeye ni mwenye hekima, haki, na nguvu nyingi. Zaidi ya hilo yeye NI upendo. Yeye ndiye kiwiliwili, umbo-mtu la upendo. Labda ungejiuliza hivi, ‘Je! mimi najua kwa sababu gani huo ndio ukweli? Je! mimi ningeweza kuandalia mtu elezo lililo wazi, lenye kuungwa mkono na ushuhuda au mifano inayothibitisha kwamba Yeye ni upendo? Na jambo hilo linahusuje maisha na utendaji wangu?’
2. Mungu ametoa mawonyesho gani yenye kuonekana ya upendo wake?
2 Ni upendo mwingi kama nini ambao Yehova Mungu ameweka juu ya viumbe wake duniani! Fikiria uzuri kamili na utendaji wa macho yetu, ajabu ya mifupa yetu yenye nguvu, nguvu za minofu yetu, na wepesi wa hisi ya mguso wetu. Sisi tuna sababu ya kurudia maono ya moyoni ya mtunga zaburi: “Nitakushukuru kwa kuwa nimeumbwa kwa jinsi ya ajabu ya kutisha.” Fikiria, pia, milima yenye fahari, vijito vitulivu vya maji maangavu, makonde ya maua ya wakati wa masika, na machweo ya jua yenye kupendeza sana. “Ee [Yehova], jinsi yalivyo mengi matendo yako! Kwa hekima umevifanya vyote pia. Dunia imejaa mali zako.”—Zaburi 139:14; 104:24.
3, 4. Mi mifano gani ambayo Maandiko ya Kiebrania yanaandaa juu ya mawonyesho ya Mungu juu ya upendo?
3 Mawonyesho ya upendo wa Mungu hayakukoma wakati viumbe wa kwanza wa kibinadamu walipoasi. Kwa mfano, Yehova alionyesha upendo kwa kuruhusu watu hao wawili wa kwanza wazae wazao ambao wangeweza kupata manufaa kutokana na uandalizi wa Yehova kupitia “uzao” wake wa ahadi. (Mwanzo 3:15) Baadaye, yeye aliagiza Noa atayarishe safina ya kuhifadhia jamii ya binadamu na viumbe wengine wa kidunia. (Mwanzo 6:13-21) Ndipo Yeye alipoonyesha upendo mkuu kwa Abrahamu, ambaye akajulikana kuwa rafiki ya Yehova. (Mwanzo 18:19; Isaya 41:8) Katika kuokoa wajukuu wa Abrahamu watoke katika utumwa wa Misri, Mungu alitoa wonyesho zaidi wa upendo wake, kama vile tunavyosoma kwenye Kumbukumbu 7:8: “Kwa sababu [Yehova] anawapenda . . . ndiyo sababu [Yehova] akawatoa kwa mkono wa nguvu.”
4 Ingawa Waisraeli waliendelea kuonyesha ukosefu wa shukrani na wakaasi-asi, Mungu hakuwatupilia mbali mara moja. Bali, yeye aliwasihi kwa upendo hivi: “Ghairini, ghairini, mkaache njia zenu mbaya; mbona mnataka kufa, Enyi nyumba ya Israeli?” (Ezekieli 33:11) Ijapokuwa hivyo, ingawa Yehova ndiye umbo-mtu la upendo, yeye pia ni mwenye haki na hekima. Hivyo wakati ulikuja ambapo watu wake waasi walifikia kikomo cha ustahimilivu wake! Wao walifikia kiwango cha kwamba “hakukuwa na ponyo,” kwa hiyo yeye akawaacha waende wakaingie katika utekwa wa Kibabuloni. (2 Nyakati 36:15, 16, NW) Hata ilipokuwa hivyo upendo wa Mungu haukukoma milele. Yeye alihakikisha kwamba baada ya miaka 70 mabaki yao waliruhusiwa kurudia nchi ya kwao. Tafadhali soma Zaburi 126 na uone kutokana nayo jinsi warudishwa walivyohisi.
Kutayarisha Wonyesho Wake Ulio Mkubwa Zaidi wa Upendo
5. Kwa sababu gani inaweza kusemwa kwamba kutuma Mwanaye duniani ulikuwa wonyesho wa upendo wa Mungu?
5 Baadaye zaidi katika historia wakati ulikuja wa Yehova kutoa wonyesho ulio mkubwa zaidi wa upendo wake. Ulikuwa upendo wa kujidhabihu kikweli. Akitayarishia jambo hilo, Mungu alifanya kwamba uhai wa Mwana mzaliwa-pekee wake uhamishwe kutoka kuwako kwa kiroho mbinguni na kupelekwa kwenye tumbo la uzazi la Mariamu bikira Myahudi. (Mathayo 1:20-23; Luka 1:26-35) Wazia ukaribu wa pekee uliokuwa umekuwako kati ya Yehova na Mwanaye. Tunasoma hivi juu ya maisha ya Yesu kabla hajawa mwanadamu kwa mfano wa hekima-umbo-mtu: “Ndipo nilipokuwa pamoja naye [Mungu], kama stadi wa kazi; nikawa furaha yake kila siku; nikifurahi daima mbele zake.” (Mithali 8:30, 31) Kwa hiyo je! huwezi kukubali kwamba kwa kule kuacha tu Mwana mzaliwa-pekee Wake aache kuwapo Kwake kulikuwa dhabihu kwa Yehova?
6. Ni pendezi gani la kibaba ambalo lazima Yehova awe alikuwa nalo katika maisha ya kwanza-kwanza ya Yesu?
6 Pasipo shaka Yehova aliutazama ukuzi wa mwanaye tangu achukuliwe mimba ya kibinadamu kwa kupendezwa kwingi na kukubwa. Roho takatifu ya Mungu ilimfunika Mariamu hivi kwamba hakuna kitu ambacho kingeweza kudhuru kile kiini-tete chenye kukua. Yehova alihakikisha kwamba Yusufu na Mariamu walienda Bethlehemu kwa ajili ya kuhesabiwa watu hata ije kutukia kwamba Yesu angezaliwa kule kwa utimizo wa Mika 5:2. Kupitia malaika, Mungu alionya Yusufu juu ya mpango wa hila wa Mfalme Herode wa kutaka kumwua, jambo hilo likafanya Yusufu na jamaa yake wakimbilie Misri mpaka kifo cha Herode. (Mathayo 2:13-15) Ni lazima iwe kwamba Mungu aliendelea kupendezwa na maendeleo ya Yesu. Ilikuwa furaha kama nini Mungu kutazama Yesu mwenye umri wa miaka 12 akistaajabisha walimu na wengine hekaluni kwa maulizo na majibu!—Luka 2:42-47.
7. Ni mawonyesho gani matatu yaliyotoa ushahidi wa kupendezwa kwa Mungu katika huduma ya Yesu?
7 Miaka kumi na minane baadaye Yehova alikuwa akitazama wakati Yesu alipomjia Yohana Mbatizaji ili azamishwe. Ndipo yeye alipopeleka kwa furaha roho takatifu yake juu ya Yesu na kusema: “Huyu ni Mwana wangu, mpendwa, ambaye mimi nimekubali.” (Mathayo 3:17, NW) Baba ye yote Mkristo angeweza kuwazia jinsi ingefurahisha Mungu kufuatilia huduma ya Yesu na kuona jinsi yeye alielekeza sifa yote kwa Baba yake wa kimbingu. Katika pindi moja Yesu alichukua mitume fulani wakaenda juu ya mlima mrefu. Kule Yehova alimfanya Kristo ang’ae kwa fahari nyingi kupita ile ya kiasili, na Baba huyo akasema: “Huyu ni Mwana wangu, mpendwa, ambaye mimi nimekubali; sikilizeni yeye.” (Mathayo 17:5, NW) Yehova alifanya sauti yake isikiwe mara ya tatu kwa kujibu ombi la Yesu kwamba Mungu atukuze jina lake mwenyewe. Yehova alisema: “Nimelitukuza, nami nitalitukuza tena.” Inaonekana jambo hilo lilisemwa hasa kwa manufaa ya Yesu, kwa maana wengine waliokuwa pamoja nao walifikiri malaika alikuwa amenena, hali wengine walifikiri kulikuwa kumepiga ngurumo.—Yohana 12:28, 29.
8. Wewe unahisije juu ya upendo wa Mungu?
8 Wewe umekata shauri gani kutokana na mapitio hayo mafupi juu ya vitendo vya Mungu kuelekea Mwanaye na kupendezwa kwake naye? Inapasa ionekane wazi kwamba Yehova anapenda sana Mwanaye mzaliwa pekee. Ukiwa na hilo akilini, na ukithamini jinsi karibu mzazi ye yote wa kibinadamu angehisi kuelekea mtoto wake mmoja tu, fikiria jambo lililofuata baada ya hapo—kifo cha Yesu cha dhabihu.
Wonyesho Ulio Mkubwa Zaidi Sana wa Upendo
9, 10. Ni nini uliokuwa wonyesho mkubwa zaidi sasa wa upendo wa Mungu kuelekea wanadamu, hiyo ikikazia ushuhuda gani wa Kimaandiko?
9 Biblia inaonyesha kwamba Baba yetu wa kimbingu ana hisia-mwenzi. Tunasoma kwenye Isaya 63:9 (NW) hivi kuhusu Israeli watu wake: “Wakati wote wa taabu kubwa yao lilikuwa jambo la kutaabisha sana kwa yeye. Na mjumbe wa kibinafsi wake mwenyewe aliokoa wao. Katika upendo wake na katika huruma yake mwenyewe yeye aliwanunua tena, na yeye akaendelea kuwainua na kuwabeba sikuzote za zamani za kale.” Lazima iwe ilimtaabisha Yehova hata zaidi kwa kusikia na kuona “kulia sana na machozi” ya Yesu. (Waebrania 5:7) Yesu alisali kwa njia hiyo katika bustani ya Gethsemane. Yeye alifanywa kuwa mfungwa gerezani, akafanyiwa kesi ya dhihaka tu, akapigwa na kuchapwa mijeledi, na akafinyiliwa taji la miiba kichwani pake. Kumbuka, Baba yake mwenye upendo alikuwa akitazama yote hayo. Pia yeye alimwona Yesu akijikwaa kwa kulemewa na uzito wa mti wa kufishia na akatazama huku mwanaye akitundikwa mwishowe juu ya mti huo. Na tusisahau kwamba Mungu angaliweza kuzuia taabu hiyo kwa upande wa Mwanaye mpendwa. Hata hivyo Yehova aliruhusu Yesu ataabike sana. Kwa kuwa Mungu ana hisia, kushuhudia kwake matukio hayo bila shaka ndiko kulikomtia maumivu yaliyo makali zaidi ambayo ndiyo yeye alipata au atapata kuwa nayo.
10 Kulingana na yaliyotangulia, sisi tunaweza kuona jinsi yalivyo ya maana maneno haya ya Yesu kwa Nikodemo: “Mungu alipenda ulimwengu sana hivi kwamba akatoa Mwana mzaliwa-pekee wake, ili kila mtu anayejizoeza imani katika yeye asipate kuharibiwa bali awe na uzima wa milele.” (Yohana 3:16, NW) Yenye umaana kama huu ni maneno haya ya Yohana, mtume wa Yesu mpendwa wa Yesu: “Kwa jambo hili upendo wa Mungu ulifanywa udhihirike katika habari yetu, kwa sababu Mungu alituma Mwana mzaliwa-pekee wake katika ulimwengu . . . akiwa dhabihu ya upatanisho kwa ajili ya dhambi zetu.”—1 Yohana 4:9, 10, NW.
11. Mtume Paulo anakaziaje wonyesho ulio mkubwa zaidi sana wa upendo wa Mungu?
11 Basi, unaweza kufahamu ni sababu gani iliyomfanya mtume Paulo, kwenye Warumi 5:6-8, akazie upendo mkuu wa Yehova Mungu kwa maneno haya: “Kristo, wakati sisi tulipokuwa tungali dhaifu, alikufa kwa ajili ya watu wenye kukana Mungu kwa wakati uliowekwa. Kwa maana itakuwa vigumu mtu ye yote kufa kwa ajili ya mtu mwadilifu; ndiyo, kwa ajili ya mtu mwema, labda, mtu fulani hata atathubutu kufa. Lakini Mungu anapendekeza upendo wake mwenyewe kwetu sisi kwa kuwa, sisi tulipokuwa tungali watenda dhambi, Kristo alikufa kwa ajili yetu.” Kwa uhakika, kwa kufanya Mwana mzaliwa-pekee wake aje duniani, ataabike, na kufa kifo chenye aibu kubwa sana, Yehova Mungu alifanya wonyesho ulio mkubwa zaidi wa upendo.
Wonyesho wa Pili Ulio Mkubwa Zaidi Sana
12, 13. (a) Ni kwa njia gani wonyesho wa Yesu wa upendo ulikuwa hauna kifani? (b) Paulo anavutaje fikira kwenye upendo mkubwa wa Yesu?
12 Huenda wewe ukauliza, ‘ni nini uliokuwa wonyesho wa pili ulio mkubwa zaidi sana wa upendo?’ Yesu Kristo alisema: “Hakuna mmoja aliye na upendo mkubwa zaidi ya huu, kwamba mtu fulani atoe nafsi yake kwa ajili ya rafiki zake.” (Yohana 15:13, NW) Ni kweli kwamba katika muda wote wa historia ya wanadamu kumekuwa na watu fulani ambao wamedhabihu uhai wao kwa ajili ya wengine. Lakini wao ulikuwa uhai wenye kikomo tu; muda si muda wao wangalikufa tu. Ijapokuwa hivyo, Yesu Kristo alikuwa mwanadamu mkamilifu mwenye haki ya kilichoridhiwa kwenye uzima. Yeye hakuwa akielekeana na kifo kilichoridhiwa kama wanadamu wengine wote walivyokuwa na walivyo sana. Wala hakuna mtu ambaye angeweza kutoa uhai wa Yesu kwa nguvu bila ya yeye kuruhusu jambo hilo. (Yohana 10:18; Waebrania 7:26) Yakumbuke maneno yake haya: “Je! wewe unafikiri kwamba mimi siwezi kuomba Baba yangu anipe mimi dakika hii zaidi ya malejioni kumi na mawili ya malaika?”—Mathayo 26:53, NW; Yohana 10:17, 18.
13 Tunaweza kuthamini zaidi upendo uliohusika katika jambo alilofanya Yesu kwa kutazama upande unaofuata: Yeye alikuwa ameacha kuwako kwenye utukufu akiwa kiumbe wa kiroho katika mbingu ambamo alikuwa ameishi akiwa mwandamani wa karibu na mfanya kazi mwenzi wa Mwenye Enzi Kuu ya ulimwengu wote mzima na Mfalme wa umilele. Na bado, kwa sababu ya upendo usio na ubinafsi, Yesu alifanya kama vile mtume Paulo anavyotuambia: “Yeye mwanzo alikuwa yuna namna ya Mungu, naye hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu; tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya [mti wa mateso].”—Wafilipi 2:6-8.
14. Nabii Isaya alitoaje ushuhuda kuhusu wonyesho mkubwa zaidi sana wa upendo wa Yesu?
14 Je! huo haukuwa wonyesho wa upendo? Hakika sana ulikuwa—bila mwingine wo wote wa kuupita, isipokuwa ule wa Yehova Mungu, Baba yake wa kimbingu. Maneno ya kiunabii ya Isaya sura ya 53 yanashuhudia mambo yote ambayo Yesu alivumilia: “Alidharauliwa na kukataliwa na watu; mtu wa huzuni nyingi, ajuaye [ugonjwa] . . . Hakika ameyachukua [magonjwa] yetu, amejitwika huzuni zetu; lakini tulimdhania ya kuwa amepigwa, amepigwa na Mungu, na kuteswa. Bali alijeruhiwa kwa makosa yetu, alichubuliwa kwa maovu yetu . . . Kwa kupigwa kwake sisi tumepona . . . Alimwaga nafsi yake hata kufa.”—Isaya 53:3-5, 12.
15, 16. Ni kutokana na maneno gani ya Yesu inaweza kuonekana kwamba hiyo ilikuwa dhabihu kwa upande wake?
15 Kwa sababu ya mambo yote yaliyofunganishwa na kifo chake, Yesu alisali hivi katika bustani ya Gethsemane: “Baba yangu, ikiwezekana, kikombe hiki kiniepuke; walakini si kama nitakavyo mimi, bali, utakavyo wewe.” (Mathayo 26:39) Yesu alikuwa akiomba nini alipotamka maneno hayo? Je! alikuwa akitaka kutoa udhuru asiwe “Mwana-kondoo wa Mungu, aichukuaye dhambi ya ulimwengu?” (Yohana 1:29) Haingeweza kabisa kumaanisha hivyo, kwa maana muda wote ule Yesu alikuwa ameambia wafuasi wake kwamba yeye angetaabika na kufa, hata akaonyesha aina ya kifo ambacho angekufa. (Mathayo 16:21; Yohana 3:14) Kwa hiyo lazima iwe kwamba Yesu alikuwa akifikiria jambo jingine aliposali hivyo.
16 Pasipo shaka Yesu alihangaikia shtaka la kufuru ambalo aliona angevurumishiwa, uhalifu ulio mbaya zaidi ambao Myahudi angeweza kuwa na hatia ya kuutenda. Mbona yeye ahangaikie shtaka la uwongo? Kwa sababu kifo chake chini ya hali hiyo kingeleta suto juu ya Baba yake wa kimbingu. Ndiyo, Mwana wa Mungu asiye na doa, aliyependa sana uadilifu na akachukia ukosefu wa kutii sheria na aliyekuwa amekuja duniani kutukuza jina la Baba yake, sasa angeuawa na watu wa Mungu mwenyewe akiwa mwenye kukufuru Yehova Mungu.—Waebrania 1:9; Yohana 17:4.
17. Kwa sababu gani kifo cha aina ambayo Yesu alikuwa akielekeana nacho kilithibitika kuwa jaribu kali sana?
17 Mapema zaidi katika huduma yake Yesu alikuwa amesema hivi: “Lakini nina ubatizo unipasao kubatiziwa, nami nina dhiki kama nini hata utimizwe!” (Luka 12:50) Sasa ulikuwa upeo wa ubatizo huo. Kwa wazi hiyo ndiyo sababu jasho lake likawa kama matone ya damu wakati aliposali. (Luka 22:44) Tena, kulikuwa na mzigo mzito sana juu ya mabega yake usiku huo, mzigo unaopita uwezo wetu wa kufahamu. Yeye alijua kwamba ilimpasa ajithibitishe kuwa mwaminifu kwa sababu kama angeshindwa, lo! hilo lingekuwa tusi kama nini kwa Yehova! Shetani angedai kwamba yeye alikuwa amesema yaliyofaa na Yehova Mungu alikuwa amekosea. Lakini lo! Shetani Ibilisi ilipata tusi kama nini kwa sababu Yesu alijithibitisha kuwa mwaminifu mpaka kifo! Hapo yeye alimthibitisha Shetani kuwa jitu lenye uwongo wa kupindukia, na lenye utovu wa heshima.—Mithali 27:11.
18. Kwa sababu gani Yesu alikuwa chini ya mkazo mkali sana usiku huo?
18 Yehova Mungu alikuwa na uhakika huo katika ushikamanifu wa Mwanaye hata akatabiri kwamba Yesu angejithibitisha kuwa mwaminifu. (Isaya 53:9-12) Hata hivyo Yesu alijua pia kwamba mzigo wa kudumisha ukamilifu ulimkalia yeye. Angaliweza kushindwa. Angaliweza kutenda dhambi. (Luka 12:50) Uzima wa milele wake mwenyewe na ule wa jamii nzima ya kibinadamu ulikuwa mashakani usiku huo. Lazima iwe kwamba jambo hilo lilikuwa mkazo mkali sana! Kama Yesu angalidhoofika na kutenda dhambi, yeye asingaliweza kuomba rehema kwa msingi wa dhabihu nyingine, kama vile sisi viumbe wasio wakamilifu tunavyoweza kufanya.
19. Yesu alitimiza nini kwa mwendo wake usio wa ubinafsi?
19 Kwa hakika uvumilivu wa Kristo siku ya Nisani 14, 33 W.K. ulikuwa ndio wonyesho mkubwa zaidi sana wa upendo usio wa ubinafsi ambao mwanadamu ye yote amepata kufanya, ukiwa umepitwa tu na ule wa Yehova Mungu. Naye alitimiza mambo makubwa kama nini kwa kifo chake! Kwa kifo chake yeye akawa “Mwana-kondoo wa Mungu, aichukuaye dhambi ya ulimwengu.” (Yohana 1:29) Yeye aliwafungulia njia wafuasi 144,000 wa hatua zake wakawe wafalme na makuhani na kutawala pamoja naye kwa miaka elfu moja. (Ufunuo 20:4, 6) Kwa kuongezea hilo “mkutano mkubwa” wa “kondoo wengine” unapata manufaa kutokana na dhabihu ya Kristo na unaweza kutumaini kuokoka mwisho wa huu mfumo wa mambo wa kale. Hao ndio watakaokuwa wa kwanza kufurahia baraka za paradiso ya kidunia. Bila shaka kutakuwa pia na mabilioni ya wanadamu watakaofufuliwa kama tokeo la alilofanya Yesu. Wao, pia, watakuwa na nafasi ya kufurahia uzima usio na mwisho katika paradiso ya kidunia. (Ufunuo 7:9-14) Yohana 10:16; 5:28, 29) Kwa hizo zimekuwa Ndiyo kwa njia ya yeye, “yaani, kwa njia ya Yesu Kristo.—2 Wakorintho 1:20, NW.
20. Inatupasa sisi tuyaitikieje mawonyesho mawili yaliyo makubwa zaidi sana ya upendo kwa upande wa Yehova Mungu na Yesu Kristo?
20 Hakika inafaa sana kwamba sisi tuonyeshe uthamini kwa yote ambayo Yehova Mungu na Yesu Kristo wamefanya kwa ajili yetu kwa kutupa hayo yaliyo mawonyesho makubwa zaidi sana ya upendo. Sisi tuna deni la kuwaonyesha uthamini huo, na ili sisi tupate manufaa kwa ukamili, ni lazima tuonyeshe uthamini huo. Makala inayofuata itaonyesha baadhi za njia zilizo bora zaidi sana ambavyo sisi tunaweza kufanya hivyo.
Je! Wewe Unakumbuka?
◻ Ni mawonyesho gani ya upendo wa Mungu ambayo wanadamu wote wanaweza kuona?
◻ Ni jinsi gani sisi tunaweza kujua kwamba Yehova alitaabika wakati yeye alipoona Mwanaye akitaabika?
◻ Ni jinsi gani kifo cha Yesu kwa ajili ya wengine kilikuwa tofauti na kile cha wengine ambao huenda wakawa walidhabihu uhai wao?
◻ Ni jinsi gani inatupasa sisi tuguswe na upendo tulioonyeshwa na Yehova na Yesu?