Ni Lazima Habari Njema Ihubiriwe Kwanza

“Katika mataifa yote lazima ile habari njema ihubiriwe kwanza.”—MARKO 13:10, NW.

1, 2. Ni nini alama ya utambulisho ya Mashahidi, na kwa nini?

KWA nini Mashahidi wa Yehova huhubiri kwa udumifu hivyo? Kwa hakika tunajulikana ulimwenguni pote kwa ajili ya huduma yetu ya hadharani, iwe ni ya nyumba kwa nyumba, ya barabarani, au ya wakati wa shughuli za ki-vivi-hivi. Kwenye kila pindi ifaayo, sisi hujitambulisha kuwa Mashahidi na twajaribu kwa busara kuwasilisha ile habari njema tunayohazini. Kwa kweli, tungeweza kusema kwamba huduma hii ni alama yetu ya utambulisho!—Wakolosai 4:6.

² Ebu fikiria hilo—wakati wowote watu waonapo katika ujirani wao kikundi cha wanaume, wanawake, na watoto waliojivalia vizuri na wenye mikoba, ni nini wazo lao la kwanza kwa kawaida? Je! ni, ‘Oh, Wakatoliki (au Waorthodoksi) ndio hawa waja tena!’ au, ‘Wapentekoste (au Wabaptisti) ndio hawa waja tena!’ La. Watu wanajua kwamba dini hizo hazina familia nzima-nzima zikifanya huduma ya nyumba kwa nyumba. Labda baadhi ya vikundi vya kidini hutuma “wamishonari” kwenye migawo ya muda wa miaka miwili katika maeneo fulani-fulani, lakini washiriki wavyo kwa ujumla hawashiriki katika huduma yoyote ya jinsi hiyo. Ni Mashahidi wa Yehova pekee wanaotambuliwa ulimwenguni pote kwa bidii yao katika kuwasilisha ujumbe wao kwa wengine katika kila pindi ifaayo. Nao wanajulikana kwa magazeti yao, Mnara wa Mlinzi na Amkeni!—Isaya 43:10-12; Matendo 1:8.

Tofauti na Makasisi wa Jumuiya ya Wakristo

3, 4. Makasisi wa Jumuiya ya Wakristo huonyeshwaje mara nyingi katika vyombo vya habari?

³ Tofauti sana, ripoti za habari zimefunua mara kwa mara kwamba makasisi wengi katika mabara fulani ni watu wafanyao ngono na watoto, walaghai wasio na adili, na wapunjaji. Kazi zao za mwili na mitindo-maisha yao yenye anasa nyingi mno huonekana waziwazi machoni pa wote. Mwandikaji mmoja wa nyimbo apendwaye na wengi alieleza jambo hilo vema katika wimbo wake wenye kichwa “Je! Yesu Angevaa Rolex [saa ya dhahabu iliyo ghali sana] Katika Maonyesho Yake ya Televisheni?” Yeye auliza swali: “Je! Yesu angekuwa mtu wa kisiasa ikiwa Yeye angerudi Duniani? Awe na nyumba Yake ya pili katika Palm Springs [jumuiya ya California yenye utajiri] na kujaribu kuficha ustahiki Wake?” Maneno haya ya Yakobo yafaa kama nini: “Mmefanya anasa katika dunia, na kujifurahisha kwa tamaa; mmejilisha mioyo yenu kama siku ya machinjo.”—Yakobo 5:5; Wagalatia 5:19-21.

⁴ Urafiki wa makasisi na wanasiasa na hata kushiriki kwao katika upigaji wa kura wakiwa wagombea viti vya kisiasa huwafunua kuwa kama waandishi na Mafarisayo wa ki-siku-hizi. Wakati uleule, katika nchi kama vile Marekani na Kanada, hazina za dini zinapoteza pesa kwa sababu ya gharama za juu za kesi za mahakamani na hukumu dhidi ya makasisi, likiwa tokeo la mwenendo wao usio wa kiadili pamoja na watoto na watu wazima.—Mathayo 23:1-3.

5. Kwa nini makasisi wa Jumuiya ya Wakristo hawathibitiki kuwa “mtumwa mwaminifu mwenye akili”?

⁵ Kwa usahihi, Yesu angeweza kuwaambia makasisi wa siku yake hivi: “Ole wenu, waandishi na Mafarisayo, wanafiki! kwa kuwa mmefanana na makaburi yaliyopakwa chokaa, nayo kwa nje yaonekana kuwa mazuri, bali ndani yamejaa mifupa ya wafu, na uchafu wote. Vivyo hivyo ninyi nanyi, kwa nje mwaonekana na watu kuwa wenye haki, bali ndani mmejaa unafiki na maasi.” Hivyo, Mungu hawapi makasisi wa Jumuiya ya Wakristo, iwe ni Wakatoliki, Waprotestanti, Waorthodoksi, au wale wasioshiriki na madhehebu yoyote, ule utume wa kuhubiri habari njema. Hawathibitiki kuwa “mtumwa mwaminifu mwenye akili” aliyetabiriwa.—Mathayo 23:27, 28; 24:45-47.

Kwa Nini Kuhubiri Habari Njema Kwanza?

6. Ni mambo gani yatakayotukia karibuni?

⁶ Katika simulizi lake fupi la amri ya Yesu juu ya kuhubiri habari njema katika mataifa yote, Marko peke yake ndiye atumiaye neno “kwanza.” (Marko 13:10; linganisha Mathayo 24:14.) Tafsiri ya J. B. Phillips yasoma hivi: “Kwa kuwa kabla ya mwisho kuja ni lazima injili ipigwe mbiu kwa mataifa yote.” Matumizi ya kisifa ya “kwanza” hudokeza kwamba mambo mengine yatafuata ile kazi ya kueneza evanjeli ulimwenguni pote. Mambo hayo yatatia ndani ile dhiki kubwa iliyoahidiwa na utawala mwadilifu wa Kristo juu ya ulimwengu mpya.—Mathayo 24:21-31; Ufunuo 16:14-16; 21:1-4.

7. Kwa nini Mungu ataka habari njema ihubiriwe kwanza?

⁷ Kwa hiyo kwa nini Mungu ataka habari njema ihubiriwe kwanza? Sababu moja ni kwamba yeye ni Mungu wa upendo, haki, hekima, na nguvu. Katika utimizo wa taarifa za Yesu zilizorekodiwa kwenye Mathayo 24:14 na Marko 13:10, twaweza kuona udhihirisho wenye kuvutia wa sifa hizi za Yehova. Acheni tuzichunguze kwa ufupi moja baada ya nyingine na kuona jinsi zinavyohusiana na kule kuhubiri kwa habari njema.

Habari Njema na Upendo wa Yehova

8. Kule kuhubiri kwa habari njema ni udhihirisho jinsi gani wa upendo wa Mungu? (1 Yohana 4:7-16)

⁸ Kuhubiri habari njema huonyeshaje upendo wa Mungu? Kwanza, kwa sababu huo si ujumbe unaokusudiwa hasa jamii au kikundi kimoja. Ni habari njema kwa “mataifa yote.” Mungu hupenda sana familia ya kibinadamu hivi kwamba alimtuma Mwana wake mzaliwa wa pekee duniani ili awe dhabihu ya fidia kwa ajili ya dhambi za wanadamu wote, si kwa ajili ya jamii moja tu. Mtume Yohana aliandika hivi: “Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele. Maana Mungu hakumtuma Mwana ulimwenguni ili auhukumu ulimwengu, bali ulimwengu uokolewe katika yeye.” (Yohana 3:16, 17) Kwa hakika habari njema, ujumbe unaoahidi ulimwengu mpya wa amani, upatano, na haki, ni uthibitisho wa upendo wa Mungu.—2 Petro 3:13.

Habari Njema na Nguvu ya Yehova

9. Kwa nini Yehova hatumii dini zenye nguvu za Jumuiya ya Wakristo kuhubiri habari njema?

⁹ Nguvu ya Yehova hudhihirishwaje na kule kuhubiri habari njema? Fikiria hili, yeye ametumia nani kutimiza utume huu? Je! ametumia matengenezo ya kidini yenye nguvu zaidi ya Jumuiya ya Wakristo, kama vile Kanisa Katoliki la Roma au madhehebu mashuhuri ya Kiprotestanti? La, kuhusika kwayo katika siasa kwaonyesha hawastahili kupewa mgawo huo. (Yohana 15:19; 17:14; Yakobo 4:4) Utajiri wao wa kadiri na mahusiano yao na uvutano wao juu ya jamii ya watawala maalumu haumvutii Yehova Mungu, wala theolojia yao inayohusiana kwa ukaribu na mapokeo. Nguvu ya kibinadamu haihitajiwi ili mapenzi ya Mungu yafanywe.—Zekaria 4:6.

10. Mungu amechagua nani wafanye kazi ya kuhubiri?

¹⁰ Ni kama vile mtume Paulo alivyosema katika barua yake kwa kutaniko la Korintho: “Ndugu zangu, angalieni mwito wenu, ya kwamba si wengi wenye hekima ya mwilini, si wengi wenye nguvu, si wengi wenye cheo walioitwa; bali Mungu aliyachagua mambo mapumbavu ya dunia awaaibishe wenye hekima; tena Mungu alivichagua vitu dhaifu vya dunia ili aviaibishe vyenye nguvu; tena Mungu alivichagua vitu vinyonge vya dunia na vilivyodharauliwa, naam, vitu ambavyo haviko, ili avibatilishe vile vilivyoko; mwenye mwili awaye yote asije akajisifu mbele za Mungu.”—1 Wakorintho 1:26-29.

11. Ni mambo gani ya hakika kuhusu Mashahidi ambayo yamewafanya wasiwe na kifani?

¹¹ Mashahidi wa Yehova wana washiriki wachache sana walio matajiri miongoni mwao na kwa hakika hawana wale wenye nguvu za kisiasa. Kutokuwamo kwao kamili katika mambo ya kisiasa kwamaanisha kwamba hawawezi kutumia uvutano wa kisiasa. Tofauti na hilo, mara nyingi wamekuwa wenye kupatwa na mnyanyaso wenye kuchukiza unaochochewa na viongozi wa kidini na wa kisiasa muda wa karne hii ya 20. Hata hivyo, ujapokuwa upinzani mkali unaochochewa dhidi yao na wanafunzi wa Unazi, Ufashisti, Ukomunisti, utaifa, na dini bandia, Mashahidi wanahubiri habari njema ulimwenguni pote na pia idadi zao zimeongezeka kwa kustaajabisha.—Isaya 60:22.

12. Kwa nini Mashahidi wamekuwa wenye mafanikio?

¹² Mashahidi husema nini kuwa ndiyo sababu ya mafanikio yao? Yesu aliwaahidi wanafunzi wake hivi: “Mtapokea nguvu, akiisha kuwajilia juu yenu Roho Mtakatifu [“roho takatifu,” NW] nanyi mtakuwa mashahidi wangu katika Yerusalemu, na katika Uyahudi wote, na Samaria, na hata mwisho wa nchi.” Kwa hiyo, ni nini hasa kingekuwa ndicho chanzo cha mafanikio yao? Yesu alisema: “Mtapokea nguvu, akiisha kuwajilia juu yenu Roho Mtakatifu [“roho takatifu,” NW].” Vivyo hivyo leo, nguvu kutoka kwa Mungu, si uwezo wa kibinadamu, umekuwa ndio ufunguo wa mafanikio ya Mashahidi katika huduma yao ya ulimwenguni pote. Akiwa anatumia watu waonekanao kuwa dhaifu zaidi ya wote, Mungu anatimiza kazi ya kielimu iliyo kubwa zaidi katika historia.—Matendo 1:8; Isaya 54:13.

Habari Njema na Hekima ya Yehova

13. (a) Kwa nini Mashahidi hutumikia kwa kujitolea na bila malipo? (b) Yehova amejibuje dhihaka ya Shetani?

¹³ Habari njema inahubiriwa na wajitoleaji. Yesu alisema: “Mmepata bure, toeni bure.” (Mathayo 10:8) Kwa hiyo, hakuna yeyote kati ya Mashahidi wa Yehova apokeaye mshahara kwa kumtumikia Mungu, wala hawatafuti mshahara. Kwa kweli, hata hawakusanyi pesa kwenye mikutano yao. Wanafurahi kumpa Mungu jibu la kumtolea mshtaki wake, Shetani Ibilisi, kupitia utumishi wao wa kujitolea bila ubinafsi. Mpinzani-roho huyu wa Mungu amesema kwa kweli kwamba wanadamu wasingemtumikia Mungu bila kuchochewa na ubinafsi. Kwa hekima yake Yehova ametokeza jibu lisilokanika kwa dhihaka ya Shetani—jibu hilo laandaliwa na mamilioni ya Mashahidi Wakristo waaminifu-washikamanifu wanaohubiri habari njema nyumba kwa nyumba, barabarani, na ki-vivi-hivi.—Ayubu 1:8-11; 2:3-5; Mithali 27:11.

14. Ni nini “hekima iliyofichwa” ambayo Paulo arejezea?

¹⁴ Uthibitisho mwingine wa hekima ya Mungu katika kuamuru habari njema ihubiriwe ni kwamba ahadi yenyewe ya Ufalme ni udhihirisho wa hekima ya Mungu. Mtume Paulo aliandika hivi: “Walakini iko hekima tusemayo kati ya wakamilifu; ila si hekima ya dunia hii, wala ya hao wanaoitawala dunia hii, wanaobatilika; bali twanena hekima ya Mungu katika siri [“takatifu,” NW], ile hekima iliyofichwa, ambayo Mungu aliiazimu tangu milele, kwa utukufu wetu.” “Hekima [hiyo] iliyofichwa” yarejezea njia ya Mungu yenye hekima ya kukomesha ule uasi ulioanza Edeni. Hekima ya ile siri takatifu ilifunuliwa katika Yesu Kristo, aliye kiini cha habari njema ya Ufalme wa Mungu.a—1 Wakorintho 2:6, 7; Wakolosai 1:26-28.

Habari Njema na Haki ya Mungu

15. Twajuaje kwamba Yehova ni Mungu wa haki? (Kumbukumbu la Torati 32:4; Zaburi 33:5)

¹⁵ Ni kwa habari ya haki tuonapo hasa umaana wa neno “kwanza” kwenye Marko 13:10. Yehova ni Mungu wa haki inayosawazishwa na fadhili-upendo. Yeye asema hivi kupitia nabii wake Yeremia: “Ajisifuye na ajisifu kwa sababu hii, ya kwamba ananifahamu mimi, na kunijua, ya kuwa mimi ni BWANA, nitendaye wema, na hukumu, na haki, katika nchi; maana mimi napendezwa na mambo hayo, asema BWANA.”—Yeremia 9:24.

16. Yaweza kuonyeshwaje kwamba haki hutaka onyo litolewe kwanza?

¹⁶ Haki ya Yehova huonyeshwaje kwa habari ya kule kuhubiri habari njema? Acheni tuonyeshe hilo kwa kutumia mama ambaye amepika keki tamu sana ya chokoleti ambayo yapasa iliwe wageni wanapokuja baadaye siku hiyo. Yeye akiiacha kwenye meza jikoni bila kuwaambia watoto wake lolote juu ya wakati ipasapo kuliwa, ni nini utakao kuwa mbetuko wa asili wa watoto hao? Sisi sote tulikuwa watoto wakati mmoja! Kidole fulani kidogo kitataka kujaribu keki hiyo! Sasa ikiwa mama ameshindwa kutoa onyo lihitajiwalo, yeye hatakuwa na msingi imara wa kutoa nidhamu. Kwa upande ule mwingine, yeye akisema kwa wazi kwamba keki hiyo italiwa baadaye wageni wanapokuja na kwa hiyo haipasi kuguswa, basi ametoa onyo kwa wazi. Ikiwa hawatii, yeye ana haki ya kuchukua hatua imara na ya haki.—Mithali 29:15.

17. Yehova amedhihirishaje haki kwa njia ya pekee tangu 1919?

¹⁷ Katika haki yake, Yehova, hataleta tendo la kihukumu dhidi ya mfumo huu mwovu wa mambo bila kwanza kutoa onyo lihitajiwalo. Kwa hiyo, hasa tangu 1919, baada ya vita ya ulimwengu ya kwanza kuleta “utungu,” Yehova amewaamuru Mashahidi wake waende kotekote duniani wakipiga mbiu ya habari njema kwa bidii. (Mathayo 24:7, 8, 14) Mataifa hayawezi kudai kwa haki kwamba hawajui kuhusu onyo hili lisilo na kifani.

Ulimwengu Umehubiriwa kwa Upana Kadiri Gani?

18. (a) Kuna uthibitisho upi juu ya utendaji wa Mashahidi katika _maeneo ya mbali? (b) Wewe unajua vielelezo vipi vinginevyo?

¹⁸ Jambo moja lionyeshalo ufanisi wa kazi hii ya kielimu ulimwenguni pote laweza kuonwa kutokana na kitabu Last Places—A Journey in the North. Mtungaji wacho asimulia kwamba alipochunguza chati za bahari za kile kisiwa cha mbali cha Foula, kimojapo Visiwa vya Shetland kaskazini mwa Scotland, chati hizo zilionyesha kwamba “kotekote kuzunguka kisiwa hicho kulikuwa na WKS (kuvunjikiwa meli) kisiwani, RKS (miamba), LDGS (vizingiti), na OBS (vizuizi).” Alama hizo “zilimwonya yeyote yule aliyetaka kuabiri huko asijaribu kufanya hivyo. Maji ya Foula yalikuwa ni kama uwanja wenye makombora ya kuchimbiwa ardhini wa kuogopesha sana, uliowazuia waendesha-mashua, wale wafanyao safari za siku moja, na hata kikosi cha wafanyakazi wa idara ya umma ya Malkia wa Uingereza wasiende huko, ingawa si Mashahidi wa Yehova—kama nilivyopata kujua baada ya siku chache.” Aliendelea hivi: “Kama vile walivyotafuta-tafuta kikamili katika mitaa michafu ya majiji makubwa na nchi zinazositawi ili kupata waongofu, ndivyo pia walivyohubiri imani yao katika Foula kilicho mbali.” Alikiri kwamba mkaaji mmoja wa hapo Andrew, alikuwa na nakala ya Mnara wa Mlinzi lililoachwa mlangoni pake miezi kadhaa awali. Kisha akaongeza hivi: “Juma moja baadaye nilikuwa naona nakala ya [Amkeni! katika Kidenmark] katika Visiwa vya Faeroe [Visiwa vya Bahari ya Kaskazini] na miezi miwili baadaye nakala ya [Mnara wa Mlinzi katika Kidenmark] katika Nuuq, Greenland.” Huo ni ushuhuda dhahiri kama nini wa utendaji wenye bidii wa Mashahidi wa Yehova katika mikoa hiyo ya kaskazini!

Ni Nini Huwachochea Mashahidi Waendelee?

19, 20. (a) Ni nini huwachochea Mashahidi wa Yehova waendelee kuhubiri? (b) Ni maswali gani yatakayojibiwa baadaye?

¹⁹ Bila shaka, kuhubiri nyumba kwa nyumba kwa watu usiowajua si jambo rahisi, haidhuru ni miaka mingapi huenda mtu amekuwa Shahidi. Basi ni nini huwachochea Wakristo hawa waendelee? Wakfu wao wa Kikristo na hisi ya kuwa na daraka. Paulo aliandika hivi: “Maana, ijapokuwa naihubiri Injili [“habari njema,” NW], sina la kujisifia; maana nimewekewa sharti; tena ole wangu nisipoihubiri Injili [“habari njema,” NW]!” Wakristo wa kweli wana ujumbe unaomaanisha uhai, kwa hiyo wangeweza kuwanyimaje wengine ujumbe huo? Kanuni yenyewe ya kuwa na hatia ya damu kwa ajili ya kushindwa kutoa onyo wakati wa hatari ni sababu yenye kuchochea ya kuhubiri habari njema.—1 Wakorintho 9:16; Ezekieli 3:17-21.

²⁰ Lakini, habari njema inahubiriwaje? Ni nini ufunguo wa mafanikio ya Mashahidi? Ni sehemu zipi za huduma na tengenezo lao zisaidiazo kuwatambulisha kuwa dini ya kweli? Makala yetu ifuatayo itayajibu maswali hayo.

[Maelezo ya Chini]

Je! Wakumbuka?

◻ Ni nini kitofautishacho Mashahidi wa Yehova na makasisi?

◻ Kuhubiri huonyeshaje upendo, nguvu, na hekima ya Mungu?

◻ Kuhubiri habari njema huonyeshaje haki ya Mungu?

◻ Ni nini huwachochea Mashahidi wa Yehova waendelee katika huduma yao?

[Picha katika ukurasa wa 15]

Haidhuru ni mbali jinsi gani huenda watu wakawa, Mashahidi wa Yehova wanataka kuwafikia