Utii wa Kimungu Katika Familia Iliyogawanyika Kidini
“HUUMIZA sana kuliko pigo lolote kwa mwili. . . . Nahisi kana kwamba nina majeraha katika mwili wote, na bado hakuna mtu awezaye kuyaona.” “Nyakati nyingine mimi huhisi kuacha . . . au kutoroka nisirudi tena kamwe.” “Nyakati nyingine ni vigumu kufikiria sawasawa.”
Maneno hayo yenye kujaa hisia-moyo yafunua hisia za kukata tamaa na upweke. Yanatoka kwa watu ambao hushambuliwa kwa maneno makali—kushtakiwa, kutishwa, kubandikwa majina ya kushusha heshima, kunyamaziwa—na hata kutendwa vibaya kimwili na wenzi na washiriki wa familia. Kwa nini watu hawa hutendwa vibaya hivyo? Kwa sababu tu ya itikadi zao za kidini zilizo tofauti. Katika hali hizi, kuishi katika familia iliyogawanyika kidini hufanya iwe vigumu sana kumwabudu Yehova. Na bado, Wakristo wengi kama hao wenye kutendwa vibaya hudhihirisha kwa mafanikio utii wa kimungu.
Kwa uzuri, huzuni na mkazo kama huo haupatikani katika nyumba zote zilizogawanyika kidini. Hata hivyo, upo. Je, nyumba yako inapatana na ufafanuzi huu? Basi, huenda ukaona ugumu wa kudumisha staha kwa mwenzi wako wa ndoa au wazazi wako. Ikiwa wewe ni mke katika hali hiyo au nyinyi ni watoto katika mazingira hayo, mwaweza kufauluje katika kuonyesha utii wa kimungu katika nyumba iliyogawanyika kidini? Wengine waweza kutoa utegemezo upi? Na Mungu aonaje suala hilo?
Kwa Nini Ni Vigumu Sana Kuwa Mtiifu?
Hali ya ulimwengu ya kujipendeza na ukosefu wa shukrani huathiri mielekeo yako mwenyewe na kufanya utii wa kimungu kuwa jitihada ya kila wakati. Shetani ajua jambo hilo, naye anataka kuvunja azimio lako. Mara nyingi yeye hutumia washiriki wa familia ambao hawana uthamini na staha kwa viwango vya kimungu. Adabu zako za kiroho na za kiadili za hali ya juu mara nyingi huwa tofauti sana na zile za familia yako isiyoamini. Jambo hilo lamaanisha kuwa na maoni yanayopingana juu ya mwenendo na utendaji. (1 Petro 4:4) Mbano wa kukugeuza uache kiwango cha Kikristo waweza kuwa mkali sana, kwa kuwa umeitii amri hii: “Msishirikiane na matendo yasiyozaa ya giza.” (Waefeso 5:11) Machoni pao hakuna jambo lolote ufanyalo ambalo ni sawa. Matatizo yote ni kwa sababu ya dini yako. Mama mmoja, alipokuwa na mzigo wa watoto wagonjwa, alimwomba mume wake msaada na kupata jibu lenye kuchoma, “Una wakati kwa ajili ya dini yako; huhitaji msaada.” Maneno kama hayo huongezea ugumu wa kuwa mtiifu.
Kisha kuna pindi ambazo huenda mkakosa kukubaliana juu ya mambo fulani ambayo hayapingi Maandiko moja kwa moja. Lakini, wang’amua kwamba wewe ni sehemu ya familia hiyo na kwa kadiri hiyo una wajibu fulani wa kutimiza. “Mimi hukasirika sana ninapofikiria jinsi baba yangu hututendea kwa sababu natambua kwamba yeye huhisi upweke,” asema Connie. “Ni lazima nijikumbushe mara nyingi nisiudhike na upinzani wa baba yangu. Mimi huhitaji kujiambia kwamba kuna sababu yenye nguvu inayomfanya aitikie vibaya au kukataa msimamo wetu. Shetani ndiye mtawala wa mfumo huu wa mambo.” Susan, ambaye ameolewa na asiyeamini, asema hivi: “Mwanzoni nilikuwa nikihisi tuachane—lakini si hivyo sasa. Nilijua Shetani alikuwa akimtumia kunipata.”
Jitihada za Shetani za kukufanya uhisi hufai kitu zaweza kuonekana kana kwamba hazikomi. Siku nyingi zaweza kupita bila kuzungumza na mwenzi wako wa ndoa. Maisha yaweza kuwa yenye upweke sana. Jambo hilo hudhoofisha uhakika wako na kujistahi na kujaribu utii wako wa kimungu. Watoto pia huhisi kudhoofika kihisia-moyo na kimwili. Katika pindi moja, hata ingawa wazazi wao walikataa, watumishi watatu wa Mungu walio vijana walihudhuria mikutano ya Kikristo kwa uaminifu. Mmoja wao, sasa akiwa mhudumu wa wakati wote, alikiri hivi: “Tungehisi uzito na uchovu wa kihisia; tulishindwa kulala usingizi; tulihuzunika sana.”
Mungu Atarajia Nini Kwako?
Utii kwa Mungu huja kwanza sikuzote, na utii wa kadiri kwa mume ambaye ni kichwa ni lazima nyakati zote upatane na mwelekezo wa Yehova. (Matendo 5:29) Hilo laweza kuwa gumu, lakini lawezekana. Endelea kumtegemea Mungu akupe msaada. Yeye anakutaka ‘umwabudu katika roho na kweli’ na kusikiliza na kunyenyekea mwelekezo wake. (Yohana 4:24) Ujuzi kutokana na Neno la Mungu, uujazapo aina nzuri ya moyo, hutokeza utii wa hiari. Ingawa hali zako binafsi huenda zikabadilika, wala Yehova wala Neno lake halitabadilika. (Malaki 3:6; Yakobo 1:17) Yehova amempa mume ukichwa. Jambo hilo linabaki hivyo awe anakubali ukichwa wa Kristo au la. (1 Wakorintho 11:3) Ingawa hili laweza kuwa gumu kuishi kupatana nalo ikiwa sikuzote unatendwa vibaya na kuaibishwa, mwanafunzi Yakobo asema hivi: “Hekima ya kutoka juu ni . . . tayari kutii.” (Yakobo 3:17, NW) Kutambua ukichwa huo kwa njia ya wazi na kuukubali kwahitaji roho ya Mungu, hasa tunda layo la upendo.—Wagalatia 5:22, 23.
Unapompenda mtu, ni rahisi kuonyesha utii wa kimungu kuelekea mamlaka iliyowekwa kimungu. Waefeso 5:33 lashauri hivi: “Kila mtu ampende mke wake kama nafsi yake mwenyewe; wala mke asikose kumstahi mumewe.”
Fikiria Yesu. Yeye alitendwa vibaya kwa maneno na kimwili, lakini hakutukana mtu yeyote. Alidumisha rekodi safi. (1 Petro 2:22, 23) Ili avumilie ufidhuli wote huo mkubwa, Yesu alihitaji moyo-mkuu wenye nguvu zaidi na upendo ulio imara kwa Baba yake, Yehova. Lakini, upendo “huvumilia yote.”—1 Wakorintho 13:4-8.
Paulo alikumbusha mfanyakazi mwenzake Timotheo, naye atukumbusha leo: “Mungu hakutupa roho ya woga, bali ya nguvu na ya upendo na ya moyo wa kiasi [“utimamu wa akili,” NW].” (2 Timotheo 1:7) Upendo wenye kina kwa Yehova na kwa Yesu Kristo waweza kuendelea kukuchochea katika utii wa kimungu hali ikionekana kuwa haiwezekani kuvumilika. Utimamu wa akili utakusaidia udumishe mtazamo wenye usawaziko na kuendelea kukazia akili uhusiano wako pamoja na Yehova na Yesu Kristo.—Linganisha Wafilipi 3:8-11.
Wenzi Ambao Hufaulu Katika Kuonyesha Utii wa Kimungu
Nyakati nyingine ni lazima ungojee muda mrefu ili uone jinsi Yehova atashughulikia matatizo yako. Lakini, mkono wake daima si mfupi. “Sikuzote fanya mambo ambayo Yehova hukupa haki na pendeleo la kuyafanya—kumwabudu mikutanoni na makusanyikoni, kujifunza, kwenda katika utumishi, na kusali,” ashauri mmoja ambaye anafanikiwa katika kuonyesha utii wa kimungu. Yehova hubariki jitihada zako, si matimizo yako tu. Kwenye 2 Wakorintho 4:17, mtume Paulo alisema kwamba ‘dhiki yetu ni ya muda wa kitambo tu, lakini yatufanyia utukufu wa milele.’ Tafakari hilo. Litakuwa jambo la kukupa usawaziko. Mke mmoja asema hivi: “Maisha yangu ya familia hayaboreki, na nyakati nyingine mimi hufikiria kama kweli Yehova ananifurahia. Lakini jambo moja ninaloliona kuwa baraka yake ni kwamba mimi huibuka kutoka hali hizi zilizo ngumu nikiwa afadhali zaidi kuliko mume wangu. Tukijua kwamba matendo yetu yanampendeza Yehova hufanya jitihada hiyo ifae.”
Yehova aahidi kwamba yeye hatakuacha upitie hali ambazo huwezi kuvumilia. Mtumaini. Yeye ajua zaidi ya wewe, naye akujua zaidi ya ujijuavyo. (Warumi 8:35-39; 11:33; 1 Wakorintho 10:13) Kusali kwa Yehova katika hali zilizo ngumu husaidia. Sali ili roho yake ikuongoze, hasa kama hujui utaenda njia gani au jinsi ya kushughulikia hali fulani. (Mithali 3:5; 1 Petro 3:12) Mwombe kila wakati kwa ajili ya saburi, kujidhibiti, na unyenyekevu ili utii mamlaka iliyo maishani mwako. Mtunga-zaburi alisema: “BWANA ni jabali langu, na boma langu, na mwokozi wangu.” (Zaburi 18:2) Kukumbuka hilo ni msaada wenye kuimarisha kwa wale walio katika nyumba zilizogawanyika kidini.
Zaidi ya yote, weka jitihada zote ili ufanye ndoa yako iwe yenye furaha. Ndiyo, Yesu aliona kimbele kwamba habari njema ingetokeza migawanyiko. Lakini, sali kwamba mgawanyiko wowote usitokee kwa sababu ya mtazamo na mwenendo wako. (Mathayo 10:35, 36) Kwa kufikiria jambo hilo, ushirikiano hupunguza matatizo ya ndoa. Hata kama ni wewe tu unayeonyesha mtazamo huu ufaao, huo utasaidia sana kuzuia matatizo yasifikie hatua ya ugomvi na farakano lenye kupita kiasi. Saburi na upendo ni muhimu sana. ‘uwe mwanana’ na “mvumilivu.”—2 Timotheo 2:24.
Mtume Paulo alikuja kuwa “hali zote kwa watu wote.” (1 Wakorintho 9:22) Vilevile, huku ukiwa huridhiani kazi za Kikristo, nyakati nyingine huenda ukahitaji kurekebisha ratiba yako ili utumie wakati mwingi zaidi na mwenzi wako wa ndoa na familia yako. Tumia wakati mwingi kadiri iwezekanavyo pamoja na yule ambaye ulichagua kushiriki maisha yako naye. Onyesha ufikirio wa Kikristo. Huo ni wonyesho wa utii wa kimungu.
Mke anayemhofu Mungu na mwenye unyenyekeo ambaye hubadilikana na kuwa na hisia-mwenzi huona ikiwa rahisi kudhihirisha utii wa kimungu. (Waefeso 5:22, 23) Maneno yenye neema, ‘yenye kukolea munyu,’ husaidia kupunguza kadiri ya uwezekano wa kutokea kwa magombano.—Wakolosai 4:6; Mithali 15:1.
Hekima ya kimungu yakuhimiza kusuluhisha tofauti zenu haraka na kurudisha amani kwa maneno mazuri yajengayo, badala ya kwenda kulala usingizi kama ungali ‘una uchungu wako.’ (Waefeso 4:26, 29, 31) Jambo hilo huhitaji unyenyekevu. Mtegemee Yehova sana akupe nguvu. Mke mmoja Mkristo alikiri hivi kwa unyenyekevu: “Baada ya sala ya bidii, nimepata ono la roho ya Yehova ikiniimarisha kuwa na mwelekeo wenye upendo zaidi kwa mwenzi wangu wa ndoa.” Neno la Yehova lashauri: “Msimlipe mtu ovu kwa ovu. . . . Uushinde ubaya kwa wema.” (Warumi 12:17-21) Hili ni shauri lenye hekima na ndio mwendo wa utii wa kimungu.
Watoto Waonyeshao Utii wa Kimungu
Shauri la Yehova kwenu watoto mlio katika familia zilizogawanyika kidini ni: “Watiini wazazi wenu katika mambo yote; maana jambo hili lapendeza katika Bwana.” (Wakolosai 3:20) Ona kwamba Bwana Yesu Kristo anatajwa. Kwa hiyo, utii kwa wazazi si kamili. Kwa maana fulani shauri la Matendo 5:29, la “kumtii Mungu kuliko wanadamu,” latumika pia kwa vijana Wakristo. Pindi zitatokea ambapo utalazimika kuamua jambo la kufanya kwa msingi wa yale unayoyajua kuwa sawa kulingana na Maandiko. Huenda kukataa kujiingiza katika tendo la ibada bandia kukatokeza adhabu ya aina fulani. Ingawa hilo si tazamio zuri, unaweza kufarijika na hata kushangilia kwa sababu unateseka kwa ajili ya kufanya yaliyo sawa machoni pa Mungu.—1 Petro 2:19, 20.
Kwa kuwa mawazo yako yanaongozwa na kanuni za Biblia, huenda mkatofautiana na wazazi wako kwa mambo fulani. Jambo hilo haliwafanyi kuwa maadui wako. Hata kama wao si watumishi wa Yehova waliojiweka wakfu, wanastahili heshima ifaayo. (Waefeso 6:2) Sulemani alisema: “Msikilize baba yako aliyekuzaa, wala usimdharau mama yako.” (Mithali 23:22) Jaribu kuelewa uchungu wanaopata kwa sababu ya kufuata kwako dini tofauti inayoonekana kwao kuwa ya kiajabu. Wasiliana nao, na ‘hali yako ya ukubalifu na ijulikane.’ (Wafilipi 4:5, NW) Shiriki nao hisia zako na mahangaiko yako. Uwe imara katika kushikilia kanuni za kimungu, lakini, ‘kama yamkini, kwa upande wako, kaa katika amani na watu wote.’ (Warumi 12:18) Uhakika wa kwamba unatii sheria ya wazazi sasa waonyesha Yehova kwamba unatamani kuendelea kuwa mtiifu ukiwa raia wa Ufalme.
Yale Wengine Wawezayo Kufanya
Wakristo waishio katika familia zilizogawanyika kidini huhitaji utegemezo na uelewevu kutoka waabudu wenzao. Jambo hilo laonyeshwa katika maneno ya mmoja aliyesema hivi: “Nahisi kuwa bure na hoi kabisa, kwa kuwa hakuna lolote awezalo kufanya mtu yeyote, na hakuna niwezalo kufanya ili kubadili hali. Namtumaini Yehova atekeleze mapenzi yake katika familia yetu, hata yawe ni nini.”
Ushirika pamoja na ndugu na dada wa kiroho katika mikutano ya Kikristo ni kimbilio. Mtu uyo huyo alifafanua maisha yake kuwa “kama ulimwengu aina mbili. Mmoja ambao ni lazima niwe ndani yao na mwingine nipendao kuwa ndani yao.” Upendo wa udugu ndio unaofanya watu hawa wenye pigo waweze kuvumilia na kutumika katika hali zote. Uwatie katika sala zako. (Waefeso 1:16) Kwa ukawaida, katika kila pindi, sema nao maneno yenye kutia moyo, yaliyo chanya, na yenye kufariji. (1 Wathesalonike 5:14) Inapowezekana na ifaapo, wahusishe katika utendaji wako wa kitheokrasi na kijamii.
Baraka na Manufaa ya Utii wa Kimungu
Tafakari kila siku juu ya baraka na manufaa ya kuonyesha utii wa kimungu katika nyumba iliyogawanyika kidini. Jitahidi kuwa mtiifu. “Usichoke.” (Wagalatia 6:9) Kuvumilia hali zilizo ngumu na ukosefu wa haki “kwa sababu ya dhamiri kuelekea Mungu . . . ni jambo lenye kukubalika” kwa Mungu. (1 Petro 2:19, 20, NW) Uwe mtiifu kwa kadiri ambayo kanuni na sheria zenye uadilifu za Yehova haziridhiani. Hilo laonyesha uaminifu-mshikamanifu kwa mpango wa Yehova. Mwenendo wako wa kimungu hata waweza kuokoa maisha ya mwenzi wa ndoa, watoto, au wazazi wako.—1 Wakorintho 7:16; 1 Petro 3:1.
Ukabilipo mahitaji na matazamio ya familia iliyogawanyika kidini, kumbuka umuhimu wa kudumisha uaminifu-maadili kwa Yehova Mungu na Yesu Kristo. Unaweza kuridhiana mambo mengi, lakini kuridhiana uaminifu-maadili ni kuridhiana kila kitu, kutia ndani uhai wenyewe. Mtume Paulo alisema hivi: “Mungu . . . mwisho wa siku hizi amesema na sisi katika Mwana, aliyemweka kuwa mrithi wa yote, tena kwa yeye aliufanya ulimwengu.” Kutambua ‘wokovu huo mkuu’ utatuimarisha kuwa wanyenyekevu.—Waebrania 1:1, 2; 2:3.
Utii na uthabiti wako usioridhiana kwa ajili ya maadili na adabu njema ni ulinzi wenye afya kwako na kwa mwenzi wako wa ndoa asiyeamini. Uaminifu hufanyiza vifungo vyenye nguvu vya familia. Mithali 31:11 yasema juu ya mke mwenye uwezo na aliye mwaminifu-mshikamanifu: “Moyo wa mumewe humwamini.” Mwenendo wako safi na staha yako ya kina yaweza kufungua macho ya mume wako asiyeamini. Yaweza kumwongoza kukubali kweli ya Mungu.
Hakika utii wa kimungu ni wenye thamani na wenye kuokoa uhai. Sali kwa ajili yao katika maisha ya familia yako. Utatokeza amani ya akili na kumletea Yehova sifa.